Як доруфурӯш аз ноҳияи Шаҳрихони Узбекистон хабар дод, ки ширкати дорусозии "Андиҷон Дору-Дармон" соҳибони дорухонаҳоро дар вилояти Андиҷон ба фурӯхтани доруҳои муҳлатгузашта ва доруҳое, ки муҳлати истифодаашон кам мондааст, маҷбур мекунад.

Дар як огоҳие аз рӯзи 22-юми апрел роҳбарияти ширкати саҳҳомии "Андиҷон Дору-Дармон" аз соҳибони дорухонаҳо дархост кардааст, ки дар фурӯши 30 номгуи доруҳо кумак кунанд. "Агар ман доруҳои муҳлатгузаштаашонро намегирифтам, онҳо ба ман дигар дору намедоданд",-шикоят кард як доруфурӯш.

Аз ширкати "Андиҷон Дору-Дармон" гуфтанд, ки ин мушкил бартараф ва касоне, ки чунин тасмим гирифта буданд, аз мақом барканор шуданд. Вале доруфурӯшҳо мегӯянд, сарфи назар аз иваз шудани роҳбарияти ширкат, ҳанӯз ҳам ин мушкил ҳал нашудааст.

Хабарнигори бахши белорусии Радиои Озодӣ Иҳар Карней ва мухолифи белорус Сергей Тихановский аз зиндон озод шуданд. Раҳоии онҳо пас аз сафари Кит Келлог, намояндаи вижаи президенти ИМА ба Минск ва мулоқоти ӯ бо президент Алякандр Лукашенко рух дод.

Дар маҷмӯъ 14 маҳбуси сиёсии Беларус озод шудаанд. Онҳоро ба Вилнюс бурданд, гуфт муовини Келлогг Ҷон Коул. Коул қайд кард, ки раҳоии маҳбусон бо талошҳои президенти ИМА Доналд Трамп имконпазир шудааст.

"Мо аз президент Трамп барои раҳоии ин рӯзноманигори ҷасур, ки аз дасти мақомоти Белорус осеб дидааст, хеле миннатдорем. Мо ба котиби давлатӣ Рубио ва тими ӯ, ҳукумати Литва ва ҷомеаи ҷаҳонӣ барои пуштибонӣ аз хабарнигорони зиндонии мо ташаккур мегӯем",- гуфт дар баёнияе Стивен Капус, раис ва мудири кулли Радиои Аврупои Озод/Радиои Озодӣ.

Рӯзноманигори собиқадор Иҳар Карней беш аз 20 сол бо Радиои Аврупои Озодӣ/Радиои Озодӣ ҳамкорӣ дошт. Ӯ дар моҳи июли соли 2023 дар Минск боздошт ва дар моҳи марти соли 2024 ба иттиҳоми узвият дар як гурӯҳи "ифротӣ" барои иртиботаш бо Анҷумани рӯзноманигорони Белорус, ба се сол зиндон маҳкум шуд. Ин созмон соли 2023 гурӯҳи "ифротгаро"эълон шуда, ҳоло дар хориҷ аз Беларус кор мекунад.

Дар декабри соли 2024, ҳукми Иҳар Карней ҳашт моҳ дароз карда шуд. Ин дафъа мақомот ӯро ба "нофармонӣ" дар дохили зиндон, гунаҳкор карданд.

Раҳоии Иҳар Карней дар рӯзи 21 июн дар ҳолест, ки моҳи феврали имсол корманди дигари бахши беларусии Радиои Озодӣ Андрей Кузнечик низ бо талошҳои ИМА озод шуда буд. Як ҳамкори дигари онҳо Иҳар Лосик ҳамоно дар маҳбас боқӣ мемонад. Ҳамаи онҳо якҷо бо 400 рӯзноманигори дигар барои бозтоби эътирозҳо аз натиҷаҳои интихоботи президентӣ ва матолиби танқидияшон аз соли 2020 ба ин сӯ зиндонӣ шудаанд.

Вазири корҳои дохилии Ҳинд гуфтааст, ки кишвараш "ҳаргиз" қарордоди оби Индус бо Покистонро барқарор нахоҳад кард.

Амит Шоҳ рӯзи 21 июн дар суҳбат бо рӯзномаи Times of India гуфт, масири обе, ки қаблан ба Покистон сарозер мешуд, тағйир дода хоҳад шуд, то дар дохили худи Ҳинд истифода шавад.

Ҳинд ин қарордодро пас аз ҳамлаи моҳи апрел ба гурӯҳе аз сайёҳон дар Кашмир, боздошт. Ҳинд иддао кард, ки ин ҳамларо ҷангҷӯён дар Кашмир, ки аз сӯи Покистон ҳимоят мешаванд, анҷом доданд.

Муоҳида ё паймони оби Ҳиндус дар соли 1960 бо кӯмаки Бонки ҷаҳонӣ миёни Ҳинд ва Покистон имзо шуд.

Бар асоси ин паймон, оби се дарёи Ҳинд ба Покистон сарозер мешавад ва наздик ба 80 дарсад аз деҳқонони покистониро бо об таъмин мекунад.

Покистон боздоштани ин паймонро ғайриқонунӣ ва "иқдоми ҷангҷӯёна" хондааст.

Мусобиқоти қаҳрамонии даставии ҷудои ҷаҳон, ки 20-уми июн дар шаҳри Будапешти Венгрия (Маҷористон) баргузор шуд, бо пирӯзии тими омехтаи Гурҷистон ба поён расид.

Ба иттилои сомонаи расмии Федератсияи ббайналмилалии ҷудо (IJF), дар мусобиқот 16 дастаи омехта иштирок карда, ба чаҳор зергурӯҳ тақсим шуданд. Ба таркиби дастаҳои омехта занон дар вазнҳои -57 кг, -70 кг, +70 кг ва мардон дар вазнҳои -73 кг, -90 кг, +90 кг дохил буданд.

Дар финал тими омехтаи Гурҷистон бар дастаи мунтахаби Кореяи Ҷанубӣ бо ҳисоби 4:1 пирӯз шуда, ба унвони қаҳрамони ҷаҳон мушарраф гардид.

Дар ҳайати дастаи ғолиб – Гурҷистон – даҳ нафар ҳунарнамоӣ карданд: мардон: Михаил Бахбахашвили (73 кг), Лаша Бекаури (90 кг), Лука Майсурадзе (90 кг), Гурам Тушишвили (+90 кг), Саба Инанеишвили (+90 кг): занон: Этери Липертелиани (57 кг), Нино Лоладзе (57 кг), Этер Акилашвили (70 кг), Мариам Чантурия (70 кг), Софио Сомхишвили (+70 кг).

Натиҷаҳои мусобиқоти даставии қаҳрамонии ҷудои ҷаҳон-2025:

1. Гурҷистон.
2. Кореяи Ҷанубӣ.
3. Ҷопон ва Олмон.

5. Италия ва Бразилия.

Маблағи умумии ҷоизаҳои мусобиқоти даставӣ 200 ҳазор евро буд. Ба дастаи ғолиб 90 ҳазор евро (ба варзишгарон - 72,000 евро ва ба мураббиён - 18,000 евро), барои ҷойи дуюм 60 ҳазор евро (ба варзишгарон - 48,000 евро ва ба мураббиён - 12,000 евро), барои ҷойҳои сеюм 25 ҳазор евроӣ (ба варзишгарон - 20,000 евро ва ба мураббиён - 5,000 евро) тақдим гардид.

Аммо варзишгарони тоҷик дар мусобиқоти қаҳрамонии ҷудои ҷаҳон байни дастаҳои омехта ширкат надоштанд.

Ёдовар мешавем, паҳлавонони тоҷик дар мусобиқоти қаҳрамонии инфиродии ҷаҳон миёни бузургсолон, ки рӯзҳои 13-19-уми июн дар Будапешт доир гардид, се медал (як нуқра ва ду биринҷӣ) гирифтанд. Бояд зикр намуд, ки ин натиҷаи беҳтарин дар таърихи ҷудои кишвар мебошад.

Медали нуқраро Эмомалӣ Нуралӣ дар вазни то 66 кило ба даст овард. Дарвоқеъ, ин аввалин ва ягона медали нуқра дар таърихи ҷудои тоҷик дар мусобиқоти қаҳрамонии ҷаҳон аст.

Обид Ҷебов дар вазни то 66 кило ва Темур Раҳимов дар вазни беш аз 100 кило бо медалҳои биринҷӣ сарфароз шуданд.

Натиҷаи нишондодаи Ҷаҳонгир Маҷидов низ дар қаҳрамонии ҷаҳон дар Будапешт қобили қайд аст. Вай дар вазни то 100 кило мақоми ҳафтумро касб кард.

Аммо панҷ гуштигири тоҷик - Меҳрзод Суфиев дар вазни то 60 кило, Беҳрӯзи Хоҷазода ва Абубакр Шеров – ҳарду дар вазни то 73 кило, Сомон Маҳмадбеков дар вазни то 81 кило, Кароматулло Ҳакимов дар вазни то 100 кило - дар даврҳои интихобӣ аз рақибонашон ноком шуда, аз ҳаққи идомаи мубориза маҳрум гаштанд.

Ба иттилои сомонаи расмии Федератсияи байналмилалии ҷудо (IJF), дар мусобиқоти қаҳрамонии инфиродии ҷаҳон дар пойтахти Маҷористон 556 варзишгар (294 мард ва 262 зан) аз 93 кишвари олам иштирок карданд.

Дар ҳисоби медалҳо Ҷопон бо касби 14 медал (6 тилло, 4 нуқра ва 4 биринҷӣ) ҷойи аввалро соҳиб шуд. Дастаи IJF (Федератсияи байналмилалии ҷудо), ки аз ҳисоби варзишгарони русиягӣ иборат буд, бо касби 5 медал (3 тилло ва 2 биринҷӣ) дар ҷойи дуюм ва Италия бо касби ду медали тилло дар ҷойи сеюм қарор гирифтанд.

Мунтахаби Тоҷикистон бо як медали нуқра, ду нишони биринҷӣ ва як мақоми ҳафтум дар байни 93 кишвар ҷойи ҳафтумро азони худ кард.

Ғолибону ҷоизадорони мусобиқоти қаҳрамонии инфиродии ҷудои ҷаҳон ба ҷуз аз медал, бо ҷоизаҳои молӣ - барои ҷойи аввал 26,000 евро (ба варзишгар – 20,800 евро, ба мураббӣ - 5,200 евро), барои ҷойи дуюм 15,000 евро (ба варзишгар – 12,000 евро, ба мураббӣ - 3000 евро) ва барои ҷойҳои сеюм 8000-евроӣ (ба варзишгар – 6,400 евро, ба мураббӣ - 1,600 евро) - қадрдонӣ шуданд.

Ёдовар мешавем, соли гузашта дар мусобиқоти қаҳрамонии ҷудои ҷаҳон дар шаҳри Абузабии Имороти Муттаҳидаи Арабӣ паҳлавони тоҷик Сомон Маҳмадбеков дар вазни то 81 кило барандаи медали биринҷӣ гардида буд.

Бояд зикр намуд, ки ин дуюмин медал дар таърихи ҷудои тоҷик дар мусобиқоти қаҳрамонии ҷаҳон миёни бузургсолон ба шумор меравад. Аввалин медалро дар ин мусобиқот Расул Боқиев соли 2007-ум дар шаҳри Рио-де-Жанейрои Бразилия ба даст овардааст. Вай дар вазни то 73 кило бо медали биринҷӣ сарфароз шуда буд.

Дар маҷмуъ, паҳлавонони тоҷик дар мусобиқоти қаҳрамонии ҷудои ҷаҳон панҷ медал гирифтаанд, ки яктоаш нишони нуқра ва чаҳортоаш биринҷист.

Бар асари ҳамлаҳои паҳбодии Русия ба шаҳри Одессаи Украина дар рӯзи 20 июн, дастикам як нафар кушта ва 13 тани дигар ба шумули як корманди бахши наҷотдиҳӣ, захмӣ шуданд.

Нерӯҳои ҳавоии Украина мегӯянд, ки Русия дар ҳамлаи рӯзи ҷумъа 86 паҳбод ба шаҳри Одесса партоб кард. Ҷониби Украина мегӯяд, ки 70 паҳбод тавассути системаҳои дифои ҳавоии ин кишвар раҳгирӣ шуданд.

Владимир Зеленский, раисҷумҳури Украина ҳамлаҳои ахири Русияро "ваҳшиёна" хонд.

Ин изҳороти Зелеленский як рӯз пас аз он сурат гирифт, ки Владимир Путин, раисҷумҳури Русия иддао кард, ки омода аст барои поёни ҷанг алайҳи Украина, як "роҳи ҳал пайдо кунад" ва бо президенти Украина мулоқот намояд.

Дар ҳамин ҳол, Вазорати дифои Русия гуфтааст, ки субҳи 20 июн нерӯҳои дифои ҳавоии ин кишвар дастикам 61 паҳбоди украиниро, ки ба сӯи минтақаҳои гуногуни Русия, аз ҷумла, Маскав партоб шуда буданд, аз байн бурданд.

Як созмони ҳомии ҳуқуқи хабарнигорон мегӯяд, ҷанги Исроилу Эрон сабаби тақвияти сензура дар Эрон ва зӯриву бадрафторӣ бо хабарнигорон дар Исроил шудааст.

Кумитаи Дифоъ Аз Хабарнигорон (СPJ) рӯзи 20-уми июн бо нашри як баёнияи расмӣ гуфт, баъди оғози ҳамлаҳои Исроил ба Эрон дар рӯзи 13-уми июн ба хабарнигорони эронӣ гуфтаанд, ки аз шарҳ навиштан дар интернет даст кашанд. Илова бар ин гурӯҳеро таъсис додаанд, то онҳоеро, ки хабарҳои “сохтаву бофта”-ро дар шабакаҳои иҷтимоӣ паҳн мекунанд, ба ҷавобгарӣ бикашанд.

СPJ, ки дар Ню Йорк қароргоҳ дорад, аз қавли ду хабарнигори эронӣ навиштааст, ки чанд соат баъд аз оғози ҳамлаҳои Исроил, муассис ва мудири як нашрияи хусусӣ онҳоро даъват карда гуфтааст, ки “ҳаргуна шарҳи мустақилона ва ё гузориш дар саҳифаҳои мо дар шабакаҳои иҷтимоӣ сабаби рондан аз кор мешавад.” Эрон аз назари зиндонӣ кардани хабарнигорон дар ҷаҳон дар мақоми саввум қарор дорад. То рӯзи 1-уми декабри соли 2024 дар он кишвар 16 хабарнигор паси панҷара будаанд.

Дар Исроил ба гуфтаи Кумитаи Дифоъ аз Хабарнигорон, хабарнигорони фаластиниро, ки низоъ бо Эронро пӯшиш медодаанд, ба “хидмат ба душман” муттаҳам карда, “иҷоза намедодаанд, ба маҳалли ҳодиса бираванд, онҳоро мезадаанд ва дашном медодаанд.”

CPJ гуфтааст, ки фақат дар рӯзҳои 14 ва 15 июн ҳашт мавриди озори хабарнигорон, монеагузорӣ ба корашон, мусодираи абзори корӣ ва ҳам ба зӯр аз маҳалли ҳодиса берун бурдани камаш 14 хабарнигор аз тарафи пулиси Исроилро сабт кардааст. Аксари ин хабарнигорон барои расонаҳои арабзабон кор мекардаанд ва ҳангоми гузориш додан аз маҳаллаҳои гузориш медоданд, ки дар ҳамлаҳои Эрон ва ё Исроил садама дидаанд.

Исроил рӯзи 13-уми июн таъсисоти атомӣ ва фармондеҳону раҳбарони олирутбаи эронро ҳадаф гирифт ва сипас Эрон ба ин ҳамлаҳо ҷавоб дод. Як созмони ҳомии ҳуқуқи башар, ки дар Вашингтон қароргоҳ дорад, гуфтааст, ки дар Эрон 657 нафар кушта шудаанд. Теъдоди талафоти дақиқи исроилиён дар даст нест, вале мақомоти ин кишвар рӯзи 20-уми июн гуфтанд, ки теъдоди кушташудагон дар ҳамлаҳои Эрон ба 25 нафар расидааст.

Додгоҳи ноҳияи Рӯдакӣ як корманди собиқи Шабакаи барқии ноҳияро барои қаллобӣ ва аз худ кардани пули муштариён ҷазо дода ва аз ҳаққи кор дар ин идора маҳрум кардааст. Додгоҳ рӯзи рӯзи 16-уми июн бо нашри як баёнияи расмӣ гуфт, нозири ин идора фақат дар муддати ним соли кор 36 ҳазор сомонӣ ва ё 3600 доллар ҳаққи пули барқро ба ҷайби худ задааст.

Додгоҳ ному насаби ин фарди 32-соларо ошкор накарда, аз ӯ фақат А.М ва сокини Душанбе ном бурдааст. Ба қавли додрас Ҳокимбек Зиёзода, ин фард аз моҳи май то моҳи сентябри соли 2024 пули баъзе аз муштариёни нерӯи барқ аз деҳаи Шаҳристони ҷамоати деҳоти Гулистонро ҷамъ оварда, ба ҷойи супурдан ба идора ба манфиати хусусиаш истифода мекардааст.

Дар баёнияи додгоҳ омадааст: “Шаҳрванд А.М. аз боварии сокинон истифода бурда, бо истифода аз мақоми хизматӣ барои тасарруфи молу мулки ғайр, бо истифода аз расиди пардохти «Амонатбанк», ки пардохти маблағро нишон медиҳад, 50 ҳолати қаллобӣ карда, ба маблағи умумии 36 ҳазор сомонӣ ба шаҳрвандон зарари молӣ расонидааст. Маблағҳои бо роҳи фиреб ва истифода аз мақоми хизматӣ ба даст овардаашро барои хушҳолиаш дар тарабхонаҳо ва марказҳои дилхушӣ сарф кардааст. “

Назари нозири собиқ маълум нест, агарчӣ дар ҳукми додгоҳ омадааст, ки ӯ дар тафтиши ҷиноятҳо бо мақомот кӯмак ва ҳамкорӣ кардааст. Додгоҳ бо назардошти ин ҳама ва баъдан ҷуброн кардани зарари ҷабрдидагон нозири собиқи Шабакаҳои тақсими барқро ҷарима баста ва аз ҳуқуқи ишғоли вазифаҳое, ки ба моликияту пул сару кор доранд, маҳрум кардааст.

Шикоят аз тақаллубкорӣ дар супурдани пули нерӯи барқ дар Тоҷикистон солҳо боз садо медиҳад ва онро як сабаби бедалел зиёд нишон додани қарзи мардум аз ширкати “Барқи тоҷик” медонанд. Кор то ба ҳадде расид, ки чанде пеш дар Тоҷикистон барои ин тақаллуб дар истифода аз нерӯи барқ ҷазои ҷиноятӣ таъйин карданд.

Интизор меравад, ки имрӯз вазирони корҳои хориҷии шуморе аз кишварҳои аврупоӣ бо вазири корҳои хориҷии Эрон дар Женева дидор кунанд. Мавзуи меҳварӣ, ҷангӣ ҷорӣ байни Исроил ва Эрон ва барномаи ҳастаии Теҳрон хоҳад буд.

Вазири корҳои хориҷии Бритониё рӯзи 19 июн пас аз дидор бо мақомҳои амрикоӣ дар Вашингтон гуфт, "ҳанӯз равзанаи дуҳафтаӣ барои расидан ба як роҳҳали дипломатӣ вуҷуд дорад".

Дар нишасти имрӯз бо Аббос Ароқчӣ, вазири корҳои хориҷи Эрон, вазирони хориҷии Бритониё, Фаронса, Олмон ва шуморе дигар аз кишварҳои узви Иттиҳоди Аврупо, ширкат хоҳанд кард.

Пеш аз ин Доналд Трамп, раисҷумҳури Амрико гуфта буд, ки зарфи ду ҳафта тасмим хоҳад гирифт, ки оё кишвараш дар ҳимоят аз Исроил ба таври мустақим вориди ҷанг алайҳи Эрон шавад ё не.

Сухангӯи Кохи Сафед зимни нишасти хабарӣ гуфт, ки президент Трамп роҳҳали дипломатӣ бо Теҳронро афзал мешуморад, аммо ҳадафи аслӣ ин аст, ки Эрон набояд ба силоҳи ҳастаӣ даст ёбад.

Эрон ҳамеша гуфтааст, ки барномаи ҳастаиаш ҳадафи ғайринизомӣ дорад ва дунболи даст ёфтан ба силоҳи ҳастаӣ нест.

Президентҳои Русия ва Чин рӯзи 19 июн зимни тамоси телефонӣ ҳамлаи Исроил ба Эронро маҳкум карданд. Ба гузориши хабаргузории "Рейтерз", Владимир Путин ва ҳамтои чинии ӯ Сӣ Ҷинпин дар мавриди коҳиши таниш, ҳамназар ҳастанд.

Юрий Ушаков, ёвари Путин дар баёнияе дар ин бора гуфт, ки ду президент таъкид карданд, ки ҳамлаи Исроил нақзи санадҳои СММ ва дигар муқаррароти байналмилалӣ аст.

Ба гуфтаи ӯ, Маскав ва Чин комилан ба ин бовар ҳастанд, ки барои вазъияти ҷорӣ ва мавзуи ҳастаии Эрон, стратегияи низомӣ вуҷуд надорад ва бояд аз роҳи сиёсӣ ва дипломатӣ ҳал шавад.

Дар баёнияи Маскав аз вуқӯи фоҷеа дар сурати идомаи бӯҳрон ҳушдор дода шуда, аз Амрико хоста шудааст, ки ба бомбаборонҳои Исроил дар Эрон напайвандад.

Кремл афзудааст, ки Путин дар рӯзҳои гузашта бо Доналд Трамп, раисҷумҳури Амрико, Бенямин Нетаняҳу, нахуствазири Исроил ва Масъуд Пизишкиён, президенти Эрон, дар тамос будааст.

Раисҷумҳури Чин аз мавзеи Кремл дар мавриди миёнҷигарӣ дар ин даргирӣ истиқбол кардааст. Ду раҳбар қарор гузоштанд, ки ба тамосҳои худ дар рӯзҳои оянда дар ин бора идома диҳанд.

Хабаргузории расмии Чин низ гузориш дод, ки Си Ҷинпин дар тамос бо Путин таъкид кардааст, ки "вазъияти минтақа бисёр ҳассос аст" ва "ҷаҳон вориди даврае бесуботӣ шудааст".

Исроил рӯзи 13 июн ба таври ногаҳонӣ ба таъсисоти низомӣ ва ҳастаии Эрон ҳамла кард. Дар пайи ин ҳамлаҳо, шуморе аз фармондеҳони баладпояи низомии Эрон кушта шуданд.

Эрон ҳам дар вокуниш шаҳрҳои Исроилро ҳадаф қарор дод ва гуфт, ки ба таъсисоти низомӣ ва иқтисодии он кишвар зарбаи сахт задааст.

Бар асари ин ҳамлаҳо то кунун аз ҳар ду ҷониб даҳҳо нафар кушта ва садҳо тан захмӣ шудаанд.

Русия ва Украина рӯзи панҷшанбе аз табодули дигари асирони ҷангӣ хабар доданд. Ҳафтаи гузашта ҳам ин корро карда буданд.

Табодули асирон бар асоси тавофуқе сурат мегирад, ки ду тараф дар шаҳри Истанбули Туркия аввали моҳи июн ба даст оварданд. Владимир Зеленский, раиси ҷумҳури Украина аксеро бо асирони табодулшуда нашр кард.

Ба навиштаи вай, Русия сарбозони Горди миллӣ ва марзбонони Украинаро раҳо кардааст, ки бештарашон аз соли 2022 дар асорат буданд. Онҳо дар қаламравҳои вилоятҳои Донетск, Луганск, Запорожйе, Харков, Суми, Чернигов ва Киев меҷангидаанд.

Пештар аз ин вазорати дифои Русия ҳам дар бораи табодули асирон хабар дод, вале ҳеч яке теъдоди асирони ивазкардаашонро нагуфтаанд. Интизор меравад, ки теъдоди асирони табодулшударо баъди поён ёфтани ҷараёни он, ки ба қавли Зеленский мумкин аст, рӯзҳои 20-21-уми июн хотима ёбад, эълон кунанд.

Аммо аз аксҳои нашршуда бармеояд, ки садҳо нафар сарбозро озод кардаанд. Чанде пеш табодули ҷасадҳои сарбозони талафёфта дар ҷанг сурат гирифт. Русия ба Украина 6 ҳазор ҷасадро баргардонд, Украина даҳҳо нафарро.

Дар вазорати маорифи Тоҷикистон тарҳи «Барномаи давлатии рушди таҳсилоти томактабӣ барои солҳои 2026–2030» баррасӣ кардаанд, ки ҳадафи он фаро гирифтани теъдоди бештари кӯдакон ба муассисаҳои томактабӣ, бахусус кӯдакистонҳо аст.

Бунёди Ҳимоят аз Кӯдакони Созмони Милал ЮНИСЕФ мегӯяд, дар Тоҷикистон беш аз 84% атфоли 3 то 6-сола, бахусус дар деҳот ва минтақаҳои дурдаст, “бо сабаби таъмини нокифоя, афзоиши аҳолӣ ва набуди имкониятҳои иқтисодии волидон” маълумоти бунёдии томактабӣ дарёфт намкунанд.

Аз ҳадафҳои аслии барнома ба кӯдакистонҳо ҷалб кардани кӯдакон дар деҳоту минтақаҳои дурдасти Тоҷикистон будааст. Эмомалӣ Раҳмон, раиси ҷумҳури Тоҷикистон аввали имсол аз мақомот хост, “барои фарогирии 50 фоизи кӯдакони синну соли томактабӣ бунёди 800 муассисаи таҳсилоти томактабӣ ва беш аз 1000 муассисаи таҳсилоти умумиро таъмин намоянд.”

Раиси ҷумҳур ҳамчунин ба раҳбарони шаҳру вилояту ноҳияҳо дастур дод, ки бо назардошти афзоиши аҳолӣ дар ҳар маҳаллае, ки на камтар аз 100 хонавода зиндагӣ мекунад, як кӯдакистон бисозанд.

Дастаи мунтахаби олимпии футболи Тоҷикистон (U-23) зери раҳбарии мутахассиси гурҷӣ Леван Хомерики дар бозии байналмилалии дӯстона тими ҷавонони Ҳиндустонро бо ҳисоби 3:2 мағлуб кард.

Ин бозӣ шаби 18-уми июн дар варзишгоҳи «ТАЛКО-Арена»-и шаҳри Турсунзода баргузор шуд. Голҳои мунтахаби олимпии Тоҷикистонро Ансор Ҳабибов, Муҳаммадиқбол Давлатов ва Муҳаммадалӣ Азизбоев заданд. Голҳои тими Ҳиндустонро Суҳайл Аҳмад Бҳат ва Партхиб Сундар вориди дарвозаи Тоҷикистон карданд. Бозиро Насрулло Кабиров аз Тоҷикистон, доварӣ кард.

Дастаи олимпии Тоҷикистон бозии навбатии дӯстонаро бо ҳамсолони худ аз Қирғизистон анҷом медиҳад. Ин бозӣ 24-уми июн дар Варзишгоҳи марказии шаҳри Ҳисор баргузор мешавад.

Ба ҳайати дастаи мунтахаби олимпии Тоҷикистон 26 бозигар – 4 дарвозабон, 8 ҳимоятгар, 10 нимҳимоятгар ва 4 ҳамлагар даъват шудаанд. Ҳайати дастаи мунтахаби олимпии Тоҷикистон (U-23) дар бозиҳои дӯстонаи моҳи июн:

Дарвозабонҳо: Сафармад Ғаффоров, Фирӯз Назаров (ҳарду аз «Барқчӣ, Ҳисор»), Шаҳобиддин Маҳмудзода («Регар-ТадАЗ», Турсунзода), Суҳробхуҷа Юсупов («Тоҷ»);

Ҳимоятгарон: Александр Мухин («Арсенал», Русия), Меҳрубон Каримов («Самгурали», Гурҷистон), Содиқҷон Қурбонов, Рустам Камолов (ҳарду аз «Истиқлол», Душанбе), Меҳрубон Гаффорзода, Мусо Қаҳҳоров, Диловар Ҷамшедзода (ҳама аз «Барқчӣ»), Фахриддин Аҳтамов («Хуҷанд», Хуҷанд);

Нимҳимоятгарон: Ҳамадонӣ Камолов («Гулгуҳар», Эрон), Ансор Ҳабибов («Арсенал», Русия), Алиҷони Буризод («Самгурали», Гурҷистон), Муродалӣ Ҳақназаров («Самтредиа», Гурҷистон), Азизбек Ҳаитов («Равшан», Кӯлоб), Абубакр Сулаймонов («Вахш», Бохтар), Ҷовидон Хушвахтов, Азизбек Далиев (ҳарду аз «Барқчӣ»), Фаридун Давлатов («Регар-ТадАЗ»), Муҳаммадиқбол Давлатов (КМВА, Душанбе);

Ҳамлагарон: Масрур Ғафуров («Истиқлол»), Шаҳбоз Ҳабибов (КМВА), Абдулфаттоҳ Худойдодзода («Панҷшер», Румӣ), Муҳаммадалӣ Азизбоев («Парвоз», Фурудгоҳи Хуҷанд).

Сармураббӣ – Леван Хомерики (Гурҷистон).

Ёдовар мешавем, дастаи мунтахаби олимпии Тоҷикистон (U-23) бар асоси қуръакашии марҳилаи интихобии Ҷоми Осиё-2026 дар гурӯҳи «К» бо тимҳои Сурия, Филиппин ва Непал бозӣ мекунад. Бозиҳои ин гурӯҳ аз 3-юм то 9-уми сентябр дар Варзишгоҳи марказии шаҳри Душанбе баргузор мешаванд.

Тими олимпии Тоҷикистон дар даври интихобии Ҷоми Осиё-2026 дар гурӯҳи «К» бо дастаҳои Непал (3-юми сентябр), Филиппин (6-уми сентябр) ва Сурия (9-уми сентябр) бозӣ мекунад.

Ғолибони 11 гурӯҳи интихобӣ ва ҳамчунин чаҳор тими беҳтарини ҷойҳои дуюм ба қисми ниҳоии Ҷоми Осиё-2026, ки аз 7-ум то 25-уми январ дар Арабистони Саудӣ доир мегардад, роҳ меёбанд.

Шашсад шаҳрванди Тоҷикистонро барои кор дар Кореяи ҷанубӣ даъват доранд. Оҷонсии бокортаъминкунӣ дар хориҷаи Тоҷикистон мегӯяд, кор дар сохтмон, истеҳсолот, кишоварзӣ, саноати хӯрокворӣ ва дигар соҳаҳо мебошад.

Ба навиштаи манбаъ, довталаб бояд аз 18 то 39-сола бошад, забони кореягиро дар сатҳи муошират донад, доғи судӣ надошта бошад ва аз ҷиҳати ҷисмониву равонӣ солим бошад. Ба гуфтаи ин ниҳод, маош то 4 ҳазор доллар вобаста ба касбу кор муайян шудааст.

"Музди меҳнат барои кафшергарӣ аз 3 то 4 ҳазор доллар, барои дигар касбу кор аз 1,5-2 ҳазор доллар музди меҳнат оғоз мешавад. Хароҷоти то рафтан ба Корея аз сӯи худи коргар пардохт мегардад. Баъди расидан ба ин кишвар, аз ҷониби корфармои кореягӣ тамоми хароҷоти коргар аз ҷумла ҷойи хоб, хӯрду хӯрок таъмин мегардад",- гуфтаанд дар ин Оҷонсӣ.

Дар як таҳлили Созмони ҷаҳонии муҳоҷират, соли 2024 дар Кореяи ҷанубӣ 6 ҳазору 339 шаҳрванди Тоҷикистон, аз ҷумла, 67 дарсади мардон ва 33 дарсади занон бар асоси визаҳои кӯтоҳу дарозмуддат қарор доштанд.

Ин қариб чил дарсад бештар назар ба соли 2023 буда, ба қарордоди расмии байни ду кишвар бастагӣ дорад, ки кори мавсимии шаҳрвандони Тоҷикистонро дар Кореяи ҷанубӣ фароҳам мекунад.

Теъдоди қурбониёни ҳамлаҳои мушакӣ ва паҳподии Русия дар шаҳри Киеви Украина ба 24 нафар расидааст.

Маъмурони наҷот рӯзи 18-уми июн аз зери вайронаҳои биноҳои истиқоматӣ дар пойтахти кишвар чанд ҷасади дигарро берун оварданд. Нерӯҳои Русия рӯзми 17-уми июн бо ҳамла ба пойтахти Украина на камтар аз 20 нафарро куштанд.

Зарбаҳои мушакӣ ва паҳподӣ ба Киев дар рӯзи гузашта яке аз ҳамлаҳои сахттарин ба шаҳр дар замони ҷанг аст. Ба гуфтаи Кумитаи ҳолатҳои фавқуллодаи Украина, дар ин ҳамла 150 нафари дигар захмӣ шудаанд. Дар шаҳри Одесса дар соҳили Баҳри Сиёҳ ҳам камаш ду каси дигар ҷон додаанд.

Мақомоти Украина барои гиромидошти ёди қурбониёни ҳамла як рӯзи мотам эълон карданд. Раиси ҷумҳур Владимир Зеленский, “терроризм” номид ва Владимир Путин президенти Русияро гунаҳкор донист.

Дар натиҷаи зарбаи мушакии Русия, як бинои нӯҳтабақа ба хок яксон шуд ва дар бомдоди содиқ ва замоне, ки бисёре аз сокинонаш дар хоб буданд.

Си Ҷинпин, раиси ҷумҳури Чин гуфт, кишвараш имсол ба кишварҳои Осиёи Марказӣ якуним миллиард юан ва ё тақрибан 210 миллион доллар кӯмаки молии бебозгашт мекунад.

Ӯ рӯзи 17-уми июн зимни суханронӣ дар нишасти дуввуми сарони кишварҳои Осиёи Марказӣ ва Чин дар шаҳри Остона гуфтааст, пули мазкур барои тарҳҳои иҷтимоии муҳим харҷ мешавад, ки ҳадафи онҳо беҳтар кардани некӯаҳволии мардум ва рушди пойдори панҷ кишвари Осиёи Марказӣ аст.

Раҳбарони Тоҷикистону Узбекистон, Қазоқистону Қирғизистон ва Туркманистон дирӯз дар ҳамоиши «Чин ва Осиёи Марказӣ» роҳҳои тақвияти ҳамкориҳои иқтисодӣ ва амниятиро баррасӣ кардаанд. Раиси ҷумҳури Чин ҳамчунин гуфтааст, кишвараш омода аст, барои бештар омӯхтани забони чинӣ дар донишгоҳҳои Осиёи Марказӣ марказӣ марказҳои нав боз кунад ва омӯхтани забонҳои кишварҳои Осиёи Марказӣ дар Чинро вусъат мебахшад.

Эмомалӣ Раҳмон, раиси ҷумҳури Тоҷикистон дар ин нишаст дар бораи тақвияти ҳамкориҳои Чин ва кишварҳои минтақа сухан гуфта, афзудааст, ки таҳкими сулҳу суботи пойдор ва зиндагии осоишта дар минтақа ва атрофи он яке аз ҳадафҳои асосии ҳамкории бисёрҷониба аст.

Ба ақидаи коршиносони ғарбӣ, ҳузури афзояндаи Чин дар минтақа қарзҳои азими он ба кишварҳои Осиёи Марказӣ ба рушди иқтисодии онҳо мусоидат мекунад, аммо айни замон суолҳо дар бораи пойбандии панҷ кишвар ба ҳамсояи азимашон, тағйири самтгириҳои геополитикӣ ва тақвияти худкомагӣ дар онҳоро ба миён овардааст.

Дар Думаи давлатии Русия тарҳи наверо мехоҳанд баррасӣ кунанд, ки он дар сурати надоштани бимаи тиббӣ иҷоза медиҳад, ки муҳоҷирон аз хоки Русия ихроҷ карда шаванд. Тарҳи қонунро ҷиноҳи Ҳизби либерал-демократи Русия пешниҳод кардааст.

Дар шарҳи зарурати чунин қонун гуфта шудааст, ки «агар коргари хориҷӣ дар Русия бимаи тиббӣ ё шаҳодатномаи бимаи тиббиро надошта бошад, ӯро бояд ба рӯйхати афроди таҳти назорат ворид кунанд». Дар феҳрасти мазкур, номи хориҷиёне шомил шудааст, ки гӯё дар Русия қонуншиканӣ кардаанд ва онҳоро метавонанд, аз кишвар берун кунанд.

Леонид Слутский, раҳбари ЛДПР иддао кард, ки дар панҷ соли гузашта хароҷоти давлат барои хадамоту харҷи тиббии муҳоҷирон 66 миллиард долларро ташкил додааст ва ин пул метавонист барои сохтмони дармонгоҳу шифохонаҳо сарф шавад. Маълум нест, то куҷо ин омор дуруст ва воқеӣ аст, вале дар сурати қабули қонуни нав он яке дигар аз қадамҳои ҳукумати Русия барои маҳдуд ва сахт кардани кардани ҳузури муҳоҷирон дар кишвар мешавад. Вакилони Думаи давлатии Русия гуфтаанд, баъди ҳамла ба «Крокус» дар соли 2024 дар умум зиёда аз 30 қонуни зидди муҳоҷирон қабул шудааст.