Дар изҳороте ҷумбиши “Ислоҳот ва рушд” гуфт, ки дар нишасти изтирории ин созмон рӯзи 31 март дар шаҳри Эйдховени Ҳолланд як маркази ҳамоҳангсозии «Ҳомиёни Ватан» таъсис шуд, ки ҳадафи асосии он – кӯмак дар демократикунонии ҷомеаи Тоҷикистон аст.

Дар изҳорот гуфта мешавад, ки ин марказ бо сарҷамъ овардани «тарафдорон дар дохил ва хориҷи кишвар” мехоҳад дар самти “таҳкими ҳисси ватандӯстӣ”, муттаҳид кардани “ҳаракату созмонҳо барои бунёди як давлати иҷтимоӣ ва ҷомеаи шаҳрвандӣ бар асоси принсипҳои демократӣ ва адолати иҷтимоӣ” ва дигар ҳадафҳо амал кунад.

Шарофиддин Гадоев, як фаъоли мухолифи ҳукумати Тоҷикистон дар ин нишаст дубора раҳбари ҷумбиши "Ислоҳот ва рушд" интихоб шуд. Шарофиддин Гадоев рӯзи 15-уми феврал дар Душанбе пайдо шуд ва дар навори видеоӣ гуфт, ки “ихтиёрӣ баргаштааст”. Ҷонибдоронаш ба ин бовар надоштанд ва мегуфтанд, ӯ рабуда шудааст. Дар давоми ду ҳафтаи талошҳои ҷомеаи байналмилалӣ, аз ҷумла намояндагиҳои дипломатии Иттиҳоди Аврупову ҳукумати Ҳолланд, Гадоев озод шуд ва ба Ҳолланд баргашт. Дар нишасти матбуотие пас аз бозгашт гуфт, ки ӯро бо шиканҷа аз Русия ба Тоҷикистон рабуда буданд.

Шарофиддин Гадоев, рӯзи 1-уми апрел дар сӯҳбат ба Радиои Озодӣ гуфт, ки пас аз қазияи рабуда шудан ва дубора озод шуданаш “беш аз 100 нафари дигар” ба сафи онҳо пайваст.

Шарофиддин Гадоев, раҳбари ҷунбиши «Ислоҳот ва рушди Тоҷикистон» мегӯяд, додситонии Ҳоланд ба тафтиши парвандааш идома медиҳад ва мақомоти Ҳолланд ҳамчунин баргардонидани шиноснома ва корти ҳувиятии ӯро аз мақомоти Тоҷикистон дархост кардаанд.

“Намедонам, ки ҳуҷҷатҳои ман дар Русия аст ё дар Тоҷикистон, вале ман тариқи шиносномаи хориҷии Тоҷикистон, ки вақти он ҷо будан бароям доданд, сафар кардам. Бе ягон раводид. Ин ҳуҷҷатҳо моли Ҳолланд ҳисоб мешаванд ва онҳо бояд баргардонида шаванд,” - гуфт ӯ.

Мақомоти Тоҷикистон, ки рӯзҳои аввал мегуфтанд, гӯё Гадоев “ихтиёрӣ ба ватан баргаштааст”, пас аз бозгашти ӯ ба Аврупо дигар ҳеҷ гоҳ ин мавзӯъро шарҳ надоданд.

“Додситонии Ҳолланд тафтишро ҷиддӣ идома медиҳад ва рақами парвандае, ки тафиш мешавад, ба ман гуфтанд. Бо онҳо сӯҳбат доштем. Бо мақомоти Русия ва аз тариқи Вазорати корҳои хориҷӣ бо мақомоти Тоҷикистон низ дар тамос ҳастанд,” - гуфт ӯ.

Ин иттилоъро мақомоти Ҳолланд ҳанӯз тасдиқ ва ё рад накарданд.

Дар Вазорати корҳои хориҷии Тоҷикистон ба ин савол, ки оё мақомоти Ҳолланд тамосҳое барои таҳқиқи қазияи рабуда шудани Гадоев дошт ё на, посух надоданд. Як манбаъ дар Додситонии кулли Тоҷикистон рӯзи 1-уми апрел гуфт, онҳо ҳеҷ дархост ё шарҳе аз ягон мақомоти аврупоӣ дарёфт накардаанд.

Қазияи Шарофиддин Гадоев, ки ҳоло ба гуфтаи ӯ, аз ҷониби додситонии Ҳоланд таҳқиқ мешавад, дар миёнаи моҳи феврал сару садои зиёде ба бор овард.

Гадоев пас аз бозгашт гуфт, ки зери латукӯбу шиканҷаи ходимони интизомӣ қарор гирифт ва аз ӯ тақозо шуд, ки барои пуштибонӣ аз ҳукумат ва таблиғи номзадии писари президенти Тоҷикистон Рустами Эмомалӣ дар интихоботи президентии соли 2020 розӣ шавад.

Дар хориҷи Тоҷикистон, асосан дар кишварҳои аврупоӣ даҳҳо тоҷикистониёне зиндагӣ мекунанд, ки мегӯянд, дар паи саркӯб шудани мухолифон ва маҳдуд шудани фазои сиёсӣ дар кишвар дар ин давлатҳо паноҳанда шудаанд.

Дар миёни онҳо аъзои ҳизби дар Тоҷикистон мамнӯи наҳзати исломӣ, “Гурӯҳи 24”, журналистон, вакилони дифоъ, фаъолони ҷомеаи шаҳрвандӣ мебошанд. Созмонҳои байналмилалии ҳомии ҳуқуқ мегӯянд, ки баъди интихоботи президентии соли 2013 фазои сиёсии Тоҷикистон маҳдуд шуд ва дар интихоботи парлумонии ду сол баъдаш ҳеҷ як ҳизби мухолифи ҳукумат ба узвияти маҷлис роҳ наёфт.

Дар соли 2015 ҳукумати Тоҷикистон Абдуҳалим Назарзода, собиқ муовини вазири дифоъ ва раёсати ҳизби наҳзати исломиро дар терроризм муттаҳам кард. Ҳизби наҳзат ин иттиҳомро рад мекунад.

Вале дар пасманзари чунин таҳаввулот даҳҳо фаъоли сиёсӣ боздошту зиндонӣ шуданд ва ё тарки кишвар карданд.

Шарофиддин Гадоев чанд сол пеш аз ин таҳаввулот Тоҷикистонро тарк кард ва ба мунаққиди ҳукумат табдил шуд. Ӯ соли 2015, баъди кушта шудани муассиси созмони “Гурӯҳи 24” Умаралӣ Қувватов, муддате раҳбарии ин созмонро ба ӯҳда гирифт.

Гадоев тавассути веблогҳои фейсбукиаш ҳукумати Тоҷикистонро танқид мекунад ва ба ҳамин хотир, бисёриҳо ба бозгашти ихтиёрии ӯ ва ҳам ҳам гӯё пушаймон шуданаш аз фаъолиятҳои сиёсӣ шубҳа карда буданд.

Ҷасад ё пайкари Комрон Саидовро, ки бо лақаби “Коля Тоҷик” машҳур аст ва дар ҷанги Русия алайҳи Украина кушта шудааст, рӯзи 15-уми декабр дар шаҳри Ҳисор дафн карданд.

Вай 34-сола ва дар Русия зиндонӣ буд.

Яке аз наздиконаш ба Радиои Озодӣ гуфт, Саидов аз зиндон ба майдони ҷанг фиристода шуда, аз моҳи январи имсол беному нишон будааст.

“Ҷасадашро чанде пеш дар сардхонаи Ростов ёфтанд. Бори охир моҳи январи соли 2025 бо волидонаш суҳбат дошт. Эҳтимол ҳамон вақт кушта шуда бошад,” – гуфт хешовандаш.

Комрон Саидов шаҳрвандии Тоҷикистону Русияро дошта, ба тиҷорат машғул будааст. Вай бо ситондани пули муҳоҷирон аз корфармоёну миёнравон дар Русия низ шуҳрат дошт.

Ӯро тирамоҳи соли 2023 бо айби “одамрабоӣ” ва “тамаъҷӯӣ” дар Русия боздошту зиндонӣ карданд. Маълум нест, оё худаш айбҳои эълоншударо эътироф карда буд ё на. Баъзе аз ҳамкоронаш мегуфтанд, ӯ қурбонии дасиса шудааст.

Дар ҳафтаҳои охир ин чаҳорумин зодаи Тоҷикистон аст, ки хабари кушта шудан ё овардани ҷасадашон ба кишвар расонаӣ мешавад.

Тарҳи "Зистан мехоҳам" дар Украина моҳи майи имсол номи 931 зодаи Тоҷикистонро нашр кард, ки аз ҷониби Русия дар ҷанги зидди ин кишвар иштирок доранд. Ҳамин тарҳ моҳи сентябр рӯйхати боз 446 зодаи Тоҷикистонро нашр кард, ки дар ҷанги Украина кушта шудаанд.

Иштироки шаҳрвандони Тоҷикистон дар ҷанги кишварҳои дигар ҷавобгарии ҷиноӣ дар пай дорад. Мақомоти Тоҷикистон дар тақрибан чор соли охир барои иштирок дар ҷанги Русия зидди Украина нисбат ба ҳеч кас парванда боз накардаанд.

Вакилони мудофеи Муҳаммадсобир Файзов, яке аз гумонбарони ҳамла ба “Крокус”, гуфтаанд, ӯ тақрибан ду сол пеш ба таври бераҳмона дастгир шуда, осеби сахт бардошт ва ҳоло мехоҳанд, нисбат ба рафтори маъмурони интизомӣ шикоят кунанд. Дар ин бора расонаҳои Русия рӯзи 14-уми декабр гузориш доданд.

Ин шаҳрванди 19-солаи Тоҷикистон 23-юми марти соли 2024 дастгир ва сипас бо аробаи маъюбӣ ва либоси тиббӣ ба толори додгоҳ оварда шуд. Бозпурсияш дар шуъбаи эҳё гузашт.

Ба гуфтаи вакилони дифоъ, ӯ дар болои дарахт буда, ба талаби маъмурони интизомӣ барои фаромадан ба поин гӯш надодааст. Баъдан, ба нақли онҳо, нерӯҳои амниятӣ дарахтро буридаанд ва Муҳаммадсобир Файзов аз баландии 15-20 метр ба замин афтода, ҷароҳати вазнин бардоштааст.

Вакилон бовар доранд, ки ҳангоми боздошти ӯ қонуншиканӣ сурат гирифтааст ва акнун талаб хоҳанд кард, ки ба аъмоли нерӯҳои қудратии Русия баҳои ҳуқуқӣ дода шавад.

Баррасии парвандаи ҳамла ба "Крокус Сити Ҳол" дар наздикии Маскав моҳҳо боз дар яке аз додгоҳҳои пойтахти Русия идома идома дорад. 19 нафар, асосан зодагони Тоҷикистон, дар ин ҳодиса гумонзад ҳастанд.

Онҳо ба тарҳрезиву мусоидат ва анҷоми ҳамлаи террористӣ муттаҳам мешаванд, вале хешовандони баъзе аз онҳо гуфта буданд, ки ба иттиҳом бовар надоранд.

Дар ҳамлаи террористӣ ба "Крокус" дар канори Маскав дар рӯзи 22-юми марти соли 2024, 149 нафар кушта ва 609 каси дигар маҷруҳ шуданд.

Теъдоди қурбониёни ҳамла ба ҷашни яҳудиён дар Австралия ба 16 кас расид.

Рӯзи 14-уми декабр ду нафар дар соҳили Бонди (Сидней, Австралия) ба сӯи ҷамъияти яҳудиён оташ кушоданд, ки машғули таҷлили ҷашни Ҳанока буданд.

Дар соатҳои аввал гузориш шуд, ки дар ин ҳодиса дувоздаҳ кас кушта шуда, 29 нафари дигар захмӣ шудаанд. Тибқи гузоришҳои охир, шумораи қурбониён ба 16 кас расид ва 42 нафари дигар дар бемористон ҳастанд.

Як ҳамлавар кушта шудааст.

Энтони Албанез, нахуствазири Австралия, ҳодисаро "даҳшатбор" ва "дардовар" хонд. Мақомоти Исроил низ онро маҳкум карданд.

Масъулияти ҳамларо то ҳол ҳеч гуруҳе ба уҳда нагирифтааст.

Намояндагони ҷомеаи яҳудиёни Австралия гуфтанд, бо вуҷуди ҳушдорҳо, мақомот барои таъмини ширкатдорони чорабинӣ талошҳои лозимро анҷом надоданд.

Дар ҳамин ҳол Шӯрои имомони Австралия ин ҳамларо маҳкум карда, ба қурбониёни ҳодиса изҳори ҳамдардӣ кардааст.

Гуфтугӯҳо миёни Владимир Зеленский, раисҷумҳури Украина ва ҳайати музокиракунандаи Иёлоти Муттаҳидаи Амрико рӯзи 15-уми декабр дар Берлин, пойтахти Олмон идома меёбад.

Ба гузориши маркази хабари Радиои Аврупои Озод/Радиои Озодӣ, ду тараф рӯзи 14-уми декабр ҳудуди панҷ соат гуфтугӯ карданд, аммо ба натиҷаи рӯшане даст наёфтанд.

Дар ин гуфтугӯ, Стив Виткофф, намояндаи вижаи президент Доналд Трамп барои Ховари Миёна ва шуморе дигар аз мақомҳои амрикоӣ ба намояндагӣ аз ИМА ҳузур доранд.

Ин гуфтугӯҳо сари тарҳи сулҳи 28-бандӣ баҳс мекунад, ки аз сӯи Амрико пешниҳод шуда буд. Тарҳе ки Украина баъдан онро ба 20 модда коҳиш дод.

Зеленский пеш аз мулоқоти панҷсоата ба хабарнигорон гуфт, Киев эҳтимол дар баробари дарёфти замонатҳои амниятӣ аз хости худ барои узвият дар НАТО даст бикашад.

Ҳолати минтақаи Донбасс ва назорат бар нерӯгоҳи ҳастаии Запорожйе, ду нуқтаи калидии мавриди ихтилоф дар музокирот бо Вашингтон барои расидан ба созиш ҷиҳати поён додан ба ҷанг бо Русия аст.

Тибқи иттилои дарёфтии Радиои Озодӣ, як қаторае, ки сӯзишворӣ мекашонд, дар ноҳияи Ёвон ба садама дучор шудааст.

Ба дасти Радиои Озодӣ чанд акс ва наворе расид, ки дар он дида мешавад, як қатор чаппа шуда, оташ гирифтааст.

Корбарон бо ирсоли ин навору аксҳо ба Радиои Озодӣ гуфтанд, рӯзи 14-уми декабр дар деҳаи Даҳанаи ноҳияи Ёвон бар асари лағзиши замин роҳ вайрон шуда, қатора ба садама дучор шудааст.

Ҳанӯз маълум нест, ки ин ҳодиса чӣ талафот доштааст.

Радиои Озодӣ субҳи 15-уми декабр барои гирифтани шарҳи расмӣ ба Корхонаи воҳиди давлатии Роҳи оҳани Тоҷикистон муроҷиат кард, аммо посухе дарёфт накард.

Бояд гуфт, ки бахши асосии сӯзишвории мавриди ниёзи Тоҷикистон тариқи қатора оварда мешавад.

Соли оянда нархи патент ё иҷозатномаи кор барои муҳоҷирон дар шаҳрҳои калони Русия боло меравад.

Ба гузориши расонаҳои русӣ, аз моҳи январи соли 2026 нархи патент барои муҳоҷирон дар шаҳри Маскав 10 ҳазор рубл хоҳад шуд. Имсол патент дар пойтахти Русия 8 ҳазору 900 рубл арзиш дошт.

Ҳамчунин аз соли оянда нархи патент дар Санкт-Петербург, дувумин шаҳри бузурги Русия аз 6 ба 8 ҳазор рубл афзоиш меёбад.

Соли 2026 арзиши иҷозатномаи кор дар Екатеринбург 9500 рубл, дар Қазон 7940 рубл ва дар Севастопол 12 ҳазору 340 рубл хоҳад буд.

Масъулин дар вилояти Новосибирск ҳам гуфтаанд, арзиши иҷозатномаи корро 11 дарсад боло мебаранд. Аз соли 2026 нархи патент дар ин вилоят 10 ҳазору 860 рублро ташкил хоҳад дод, ки нисбат ба соли ҷорӣ 2950 рубл бештар будааст.

Дар вилояти Иркутск ҳам муҳоҷирон барои патент ба ҷойи 10 ҳазору 900 рубл бояд 12 ҳазору 231 рубл пардохт кунанд.

Қонунгузорон дар Камчатка рӯзи 28-уми октябр эълон карданд, ки нархи патент аз 9 ҳазору 27 рубл ба 13 ҳазору 776 рубл боло бурда мешавад.

Аксар муҳоҷирони тоҷик дар Русия тариқи патент фаъолият доранд ва пайваста аз нархи баланди он шикоят мекунанд.

Бидуни патент дар Русия кор кардан манъ аст ва ҳамасола садҳо муҳоҷир бо ҳамин далел ронда мешаванд.

Дар тирпаронӣ дар соҳили Бонди (Сидней, Австралия) дастикам дувоздаҳ кас кушта шуда, 29 нафар дар бемористон ҳастанд.

Хабаргузории "Рейтерс" бо такя ба пулис аз боздошти ду нафар хабар дод.

Расонаҳои Австралия гуфтанд, яке аз ҳамлагарон кушта шудааст.

Тирпаронӣ ҳангоми таҷлил аз Ҳанока, ҷашни мазҳабии яҳудиён рух дод.

Энтони Албанез, нахуствазири Австралия, ҳодисаро "даҳшатбор" ва "дардовар" хонд.

Мақомоти Исроил низ ҳодисаро маҳкум карданд.

Идораи зиндонҳои Туркманистон бо далели "набудани заминаи қонунӣ" розӣ нашудааст, ки Мансур Мингелов шартӣ ва пеш аз муҳлат аз маҳбас раҳо карда шавад.

Ин ҳомии зиндонии ҳуқуқи башар сахт бемор аст. Дар ин бора вебсайти turkmen.news хабар дод.

Як кумисюн аз Вазорати тандурустии Туркманистон соли 2024 дарди буғуми зонуи Мингеловро тасдиқ карда, ҳамзамон гуфта буд, ки муолиҷаи ин беморӣ дар дохили кишвар ғайриимкон аст.

Бо вуҷуди ин, тибқи номаи Идораи зиндонҳо, мансабдорон "ҳамаи далелҳоро баррасӣ карда", ба хулосае омадаанд, ки "онҳо ба талаботи қонунгузории Туркманистон мутобиқ нестанд".

Наздикони Мингелов моҳи сентябри имсол бо ишора ба қонунҳои Туркманистон аз Додситонии кул ва Вазорати корҳои дохилии ин кишвар озодии ӯро хоста буданд. Ин ду банди қонун, ба гуфтаи онҳо, раҳоии зиндониёнро дар вақти бемории вазнин иҷоза медиҳанд.

Мансур Мингелов 50-сола аст. Додгоҳи Туркманистон ин ҳомии ҳуқуқи башарро соли 2012 бо гуноҳи қочоқ ва паҳн кардани маводи порнографӣ ба 22 сол зиндон маҳкум кард.

Созмонҳои ҳуқуқи башар парвандаи ӯро комилан сохта медонанд.

Мақомоти Узбекистон гуфтанд, ки дар даҳ моҳ, аз январ то октябри имсол, беш аз 75 ҳазор хориҷӣ барои гирифтани табобат ё хадамоти пизишкӣ ба ин кишвар рафтаанд.

Ба иттилои Кумитаи миллии омори Узбекистон, аксари онҳо аз кишварҳои Осиёи Марказӣ ҳастанд, аз ҷумла 53 ҳазор нафарашон аз Тоҷикистон.

Аз Қирғизистон зиёда аз 13 ҳазор, аз Қазоқистон тақрибан 7 ҳазор, аз Русия беш аз 1 ҳазору 700 ва аз Афғонистон зиёда аз 500 кас аз хадамоти пизишкии Узбекистон истифода кардаанд.

Теъдоди шаҳрвандони кишварҳои дигар андак будааст. Барои мисол, аз Туркия 43, аз Иёлоти Муттаҳида 15 ва аз Чин 14 нафар.

Баъди боз шудани марз бо Узбекистон дар соли 2018, шаҳрвандони Тоҷикистон бештар бо ҳадафи табобату сайёҳӣ ва парвоз ба Русияву кишварҳои дигар ба Узбекистон мераванд.

Барои муқоиса, дар ҳашт моҳи аввали соли гузашта тақрибан 60 ҳазор шаҳрванди Тоҷикистон барои гирифтани ёрии пизишкӣ ба Узбекистон рафта буданд.

Пас аз он ки Вашингтон дар бораи имкони бекор кардани таҳримҳо алайҳи содироти нуриҳои минералии Беларус сухан гуфт, Минск рӯзи 13-уми декабр даҳҳо зиндониро озод кард.

Ба гуфтаи намояндагони Амрико, расонаҳои Беларус, созмонҳои ҳуқуқи башар ва мақомоти Украина, раисҷумҳури Беларус Александр Лукашенко дар умум 123 зиндонӣ, аз ҷумла баъзе аз намояндагони мухолифинро "бахшидааст".

Дар байни онҳое, ки аз зиндон раҳо шуданд, яке аз раҳбарони эътирозҳои соли 2020 Мария Калесникова ва барандаи ҷоизаи Нобел Алес Белятский низ ҳастанд.

Денис Кучинский, намояндаи раҳбари мухолифини Беларус Светлана Тихановская, гуфт, ҳамаи маҳбусони сиёсии раҳошуда “саломат ҳастанд” ва Беларусро тарк карданд. Мақомоти Украина гуфтанд, ки 114 зиндонии раҳошуда аз Беларус ба Украина расиданд. Нӯҳ нафари дигар ба Литва рафтаанд.

Мария Калесникова баъд ворид шуданаш ба хоки Украина хоҳони раҳоии ҳамаи маҳбусони сиёсӣ дар Беларус шуд. Алес Белятский дар Литва ба Радиои Аврупои Озод/Радиои Озодӣ ва расонаҳои дигар гуфт, "муборизаи мо идома дорад".

Ҷон Коул, фиристодаи вижаи президенти Амрико Доналд Трамп дар умури Беларус, дар шабакаи “X” аз ин иқдом ситоиш кард ва онро як гоми муҳим дар муносибатҳои байни Иёлоти Муттаҳида ва Беларус номид.

Коул инчунин ба хабаргузории "Рейтерс" гуфт, эҳтимол Беларус дар моҳҳои оянда маҳбусони бештарро раҳо кунад, вале тафсилот надод.

Беларус дар моҳи феврали соли 2022 барои ҳамкорӣ бо Русия дар ҳамла ба Украина бо таҳримҳои шадиди Ғарб рӯ ба рӯ шуд. Ҳукумати ин кишвар дар моҳҳои охир дар чанд марҳила даҳҳо зиндониро озод кард, аммо садҳо нафаре, ки маҳбусони сиёсӣ дониста мешаванд, то ҳол дар зиндонҳои Беларус ҳастанд.

Наргис Муҳаммадӣ, барандаи Ҷоизаи сулҳи Нобел рӯзи 12-уми декабр дар шаҳри Машҳади Эрон боздошт шудааст.

Бунёди Наргис Муҳаммадӣ хабар дод, мақомоти Эрон ин фаъолияти ҳуқуқи башарро дар маросими ёдбуди Хусрав Аликурдӣ, вакил ва фаъоли ҳуқуқи башар дастгир карданд.

Ба гуфтаи ин манбаъ, мақомоти қудратии Эрон дар вақти боздошти Наргис Муҳаммадӣ ва чанд фаъоли дигари ҳуқуқи башар аз хушунат истифода бурданд.

Саҳифаи Наргис Муҳаммадӣ дар шабакаи X (Твиттер) баъд аз зуҳри 12 декабр навишт, ин фаъоли ҳуқуқи башар "бо хушунат тавассути маъмурони амниятӣ ва интизомӣ боздошт шуд".

Шавҳари Наргис Муҳаммадӣ низ, ки муқими Фаронса аст боздошти ӯро тасдиқ кард.

Кумитаи нобели Норвеж, ки барандаи Ҷоизаи Нобелро эълом мекунад, бо пахши баёнияи кутоҳ аз мақомоти Эрон хост, ки Наргис Муҳаммадиро бе қайду шарт озод кунанд.

Наргис Муҳаммадӣ соли 2023 барандаи Ҷоизаи сулҳи Нобел эълон шуд. Ин фаъоли ҳуқуқи башар солҳо дар зиндон буд ва моҳи декабри соли 2024 барои муолиҷа аз маҳбас раҳо шуд.

Мутарҷими Порлумони Аврупо дар вақти тарҷумаи суханҳои Романи 11-сола, як наврас аз Украина гирист.

Роман дар ҳамлаи мушакии Русия ба шаҳри Виннитсаи Украина дар рӯзи 14 июли соли 2022 зинда монд, аммо модараш дар натиҷаи он ҳамла кушта шуд.

Роман 36 ҷарроҳӣ гирифт ва ба далели ҷароҳатҳову сӯхтагии зиёд давраи тавонбахшии тӯлониро пушти сар кард. Сарфи назар аз ин, вай ба таҳсил, рақс ва мусиқӣ боз гашта, инчунин мукофотеро аз президенти Украина дарёфт кардааст.

Рӯзи 10-уми декабр Роман ба намоиши филм ба шаҳри Брюссел рафт ва онҷо саргузашти худро ба вакилони Порлумони Аврупо нақл кард ва онҳоро даъват кард, ки “ҳаргиз таслим нашаванд”, зеро ба гуфтаи вай, “замоне, ки мо якҷоем, мо нерумандем”.

Дар ин рӯз ҳамчунин барои вакилони Аврупо филмҳои мустанад дар бораи кӯдакони украинӣ намоиш дода шуд.

Навор аз саҳифаи инстаграми Радиои Озодӣ:

Рӯзи 12-уми декабр дар шаҳри Ишқобод, пойтахти Туркманистон Форуми байналмилалӣ бахшида ба сивумин солгарди бетарафӣ ё худ нейтралитети Туркманистон доир шуд.

Телевизиони русии "ДОЖД" дар шабакаи Фейсбук навори суханронии Владимир Путинро нашр кардааст, ки дар он раҳбари Русия наздик ба як дақиқа бо микрофони хомӯш суҳбат мекунад.

Албатта баъдан микрофон фаъол шудаву суханронӣ идома кардааст.
Дар нишасти Ишқобод ҳамчунин раҳбарони Эрон, Туркия, Қазоқистон, Узбекистон, Қирғизистон ва раиси ҷумҳури Тоҷикистон Эмомалӣ Раҳмон иштирок карданд.
Раиси ҷумҳури Тоҷикистон дар суханрониаш ба тахдиду чолишҳои ҷаҳони муосир ишора карда гуфт, ин мушкилот рушди иқтисодро ба ақиб мезананд.

Туркманистон як кишвари худкома ва баста аст, ки давоми 20 соли ахир аз сӯи падар ва писар Бердимуҳаммадовҳо роҳбарӣ мешавад.

Соли 2025 дар пайи таркиши минаҳо дар Тоҷикистон 2 нафар ба ҳалокат расидаанд, ки якеаш навраси 10-сола мебошад. Дар ин бора хабаргузории "Азия-Плюс" аз қавли Умед Мансуров, намояндаи ҳуқуқии Кумитаи байналмилалии Салиби Сурх хабар додааст.

Ба қавли манбаъ, наврасе, ки дар таркиши мина ба ҳалокат расид, сокини минтақаи Саридашти ноҳияи Дарвоз буд.

Нафари дуюме, ки дар таркиши мина ҷон бохтааст "як масъули поксозии минаҳо ё сапёр" будааст.

Тибқи омори намояндаи Кумитаи байналмилалии Салиби Сурх, давоми 33 соли ахир 351 нафар дар Тоҷикистон аз таркиши мина ба ҳалокат расида, 541 каси дигар ҷароҳат бардоштаанд

Баъзе майдонҳои минакоришуда аз замони ҷанги шаҳрвандии солҳои 1992-97 боқӣ мондааст.

Иттиҳоди Аврупо дороиҳои Русияро дар ҳудуди ин созмон ба муддати номаҳдуд ҳабс мекунад. Дар ин бора хабаргузории Ассошиэйтед Пресс хабар додааст.

Ба гузориши манбаъ, ин тасмим бо истифода аз тартиби махсусе гирифта шудааст, ки барои ҳолатҳои фавқулода пешбинӣ гардидааст.

Ба ин тартиб, дороиҳои Русия то замони поёни ҷанги Маскав алайҳи Украина ва пардохти ҷуброн ба Киев, дар банд мемонанд.

Танҳо баъди поёни ҷанг ва розигии Русия барои пардохти ҷуброн ба Украина, Маскав метавонад аз дороиҳои худ дар ҳудуди Иттиҳоди Аврупо истифода барад.

Қарори ахири Иттиҳоди Аврупо имкон медиҳад, ки аз дороиҳои Русия барои кумак ба Украина истифода шаванд.

Дороиҳои Русия дар Аврупо 210 миллиард евро ҳисоб шудааст. Бештари ин маблағҳо дар ҳисоби бонкии Euroclear дар Белгия нигаҳдорӣ мешаванд.