Пайвандҳои дастрасӣ

Хабари нав

Хабарҳо

Дахости демократҳо барои маълумот оиди сӯҳбати Трамп бо Путин рад шуд

Владимир Путин ва Доналд Трамп

Кохи сафед дархости конгрессменҳои демократро, ки мехоҳанд дар бораи музокироти президенти ИМА ва Русия - Доналд Трамп ва Владимир Путин маълумот бигиранд, рад кард. Дар ин бора нашрияи The Hill ва шабакаи телевизионии CNN рӯзи 21 март гузориш доданд.

Дар посухе бо имзои ҳуқуқдони Кохи сафед Пэт Чипаллоне гуфта мешавад, ки музокироти президент бо раҳбарҳои кишварҳои хориҷӣ маҳрамона буда, Конгресс салоҳият надорад онҳоро дархост кунад.

Аввали моҳи март раҳбарони кумитаҳои Палатаи намояндагон дар умури истихборот, равобити хориҷӣ ва назорат - конгрессменҳои демократ Адам Шифф, Элиот Энҷел ва Элайҷа Каммингс аз Кохи сафед ва Котиби давлатии ИМА Майк Помпео хостанд дар бораи муҳтавои гуфтугӯи ҷойдошта дар байни Трамп ва Путин санад пешниҳод кунанд ва ҳамчунин ба суолҳои марбута посух диҳанд.

Ин дархост баъди мақолаи The Washington Post ворид шуд. Нашрия иддао кард, ки Трамп матни тарҷумони сӯҳбати президент бо Путинро гирифт ва талаб кард, ки муҳтавои сӯҳбат ошкор нашавад. Конгрессменҳо дархост карданд, ки тарҷумонҳо низ барои гузориш додан даъват шаванд. Онҳо аз ҷумла ба нафароне таваҷҷӯҳ доранд, ки моҳи июли соли 2018 мулоқоти Трамп ва Путинро дар Ҳелсинки ташкил карданд.

Дар ИМА таҳқиқи дахолати эҳтимолии Русия ба умури интихобти соли 2016 идома дорад. Прокурори махсус Роберт Мюллер бояд мушаххас кунад, ки дар байни ситоди интихобтии Доналд Трамп ва Кремл муомилот вуҷуд дошт ё не.

Ҳамаи хабарҳои имрӯзро дар инҷо бихонед

ИМА мегӯяд, “нерӯҳои мушакии Эрон бузургтарин дар минтақа аст”

Оҷонси истихбороти низомии Амрико дар гузориши нави худ мегӯяд, барномаи “густарда”-и Эрон имкон додааст, ки ин кишвар “бузургтарин нерӯҳои мушакиро дар Ховари Миёна” созмон диҳад. Дар гузорише, ки Пентагон 19-уми ноябр нашр кард, гуфта мешавад, “шумора ва тавонмандии нерӯҳои мушакӣ новобаста ба талошҳо аз ҷилавгирии рушди он бештар мешавад”.

Дар он таъкид шудааст, “новобаста ба даҳҳо сол таҳрим ба зидди барномаи мушакии Эрон нерӯҳояш тавони партоби мушакро то ба рақибони минтақавиаш ба масофаи то 2 ҳазор километр дорад.

“Бо он ки Эрон нерӯҳои ҳарбии ҳавоии муосир надорад, мушакҳои баллистикиро ба роҳ монд. Бо ин силоҳи зарбазан дар масофаи дур Эрон ҳамлаи эҳтимолии рақибони минтақавии худ – хусусан Иёлоти Муттаҳидаи Амрико, Исроил ва Арабистони Саудиро пешгирӣ кард”, -- омадааст дар гузориш.

Эрон ҳамчунон аз амалиёти ғайрианъанавии ҳарбӣ кор мегирад ва шабакаи “нерӯҳои низомӣ ва миёнравҳо”-ро дорад, ки имкон медиҳад дар минтақа манфиатҳои худро пеш барад.

Дар гузориш ҳамчунон гуфта мешавад, Теҳрон ба ҳаракати шиаҳо, аз ҷумла Ҳизбуллоҳ дар Лубнон ва ҳусиҳо дар Яман аз ҷиҳати моливу сиёсӣ кумак расонида, бо адабиёти таълимӣ таъмин мекунад.

Дар даҳ сол 25 додраси додгоҳҳои Тоҷикистонро зиндонӣ кардаанд. ВИДЕО

Дар даҳ соли ахир 25 додраси додгоҳҳои Тоҷикистон, аз ҷумла як додраси занро ба зиндон маҳкум кардаанд. Дар ин бора рӯзи 21-уми ноябр раиси ҷумҳури Тоҷикистон дар мулоқот бо кормандони додгоҳҳо иттилоъ дод ва гуноҳи асосии онҳоро "ҷиноятҳои коррупсионӣ" ном бурд.

Бархе аз сокинони Тоҷикистон додрасҳоро ба эълони, ба бовари онҳо, ҳукмҳои ноодилона ва суистифода аз мансаб муттаҳам мекунанд. Коршиносон ба мустақил набудани ин шохаи ҳокимият таъкид доранд.

Эмомалӣ Раҳмон, раиси ҷумҳури Тоҷикистон, рӯзи панҷшанбе дар мулоқот бо додрасҳо дар Душанбе гуфт, "ҳамчунин дар даҳ сол 16 корманди дастгоҳҳои судҳо барои содир кардани ҷиноят маҳкум гардиданд" ва ӯ чунин вазъро "бисёр нигаронкунанда ва боис ба ташвиш" хонд.

Аммо сафи онҳое, ки дар ин даҳ сол аз кор дар додгоҳҳои кишвар ронда шуда, ба зиндон маҳкум нагардидаанд, бамаротиб зиёдтар аст. Танҳо дар соли 2018 тақрибан даҳ корманди додгоҳҳои кишвар бо гуноҳи "риоя накардани қонун ҳангоми баррасии парвандаҳо" ва “содир намудани кирдоре, ки шаъну эътибори додрасро паст мезанад" аз мақомҳои худ ронда шудаанд.

Мақомот ҷузъиёт надодаанд, ки қонуншикании додрасҳо ва паст задани шаъну эътибори онҳо чист, вале таҳлилгарон бештар ба ҳукмҳои хато ва вуҷуди фасод ишора мекунанд.

Бори охир рӯзи 30-уми октябри имсол президент фармони аз кор озод кардани Рухшона Раҳмонализода як додраси додгоҳи ноҳияи Синои пойтахтро содир кард. Аз он пеш Оҷонси мубориза бо фасод гуфт, Раҳмонализода аз як шаҳрванд барои ба манфиати ӯ ҳал намудани баҳси манзил 2 ҳазор доллар талаб кардааст.

Тобистони имсол Шермуҳаммади Шоҳиён, раиси Додгоҳи олии Тоҷикистон гуфта буд, мизони қонуншиканӣ дар миёни додрасҳои кишвар дар муқоиса ба солҳои гузашта кам шудааст ва онҳо пеш аз он ки додрасро ба кор бигиранд, як сол ба ҳайси коромӯз месанҷанд. Вале сокинони корафтода мегӯянд, дар воқеият чизи дигарро мебинанд.

Назари сокинонро дар бораи кори додрасҳо дар ин ҷо бинед, ки охири моҳи октябри имсол сабт шудааст:

Гуфтанд ба мо. Сокинон дар бораи адолати додгоҳӣ дар Тоҷикистон
лутфан мунтазир бошед

Феълан кор намекунад

0:00 0:05:26 0:00

Шоҳиди ҳодисае шудед, манзараи ҷолиберо дидед ва ё хабари муҳим шунидед? Аз роҳи осон ва амн бо рақами Телеграми мо +420 724 053 959 фиристед.
Ба канали Телеграми мо ҳамроҳ шавед

Мақоми Пентагон: Украина дар рӯзи суҳбати Трампу Зеленский кумак хоста буд

Владимир Зеленский, Ҷо Байден ва Доналд Трамп

Мақомоти Украина 25-уми июли имсол, дар рӯзе, ки суҳбати телефонии баҳсбарангези президенти Амрико Доналд Трамп ва раиси ҷумҳури Украина Владимир Зеленский баргузор шуд, аз манъи пешниҳоди ёриҳои низомӣ ба Киев изҳори нигаронӣ кардаанд.

Муовини ёвари вазири дифои Амрико дар умури Русия ва Украина Лаура Купер рӯзи 20-уми ноябр ба қонунгузороне, ки масъалаи эҳтимоли импичмент ё изҳори нобоварӣ ба Трампро дар Конгресс баррасӣ мекунанд, гуфт, ҳамкорони ӯ аз сафорати Украина имейле гирифтанд, ки дар он дар бораи боздошта шудани кумакҳо хабар дода мешуд.

Купер дар суҳбат бо аъзои гуруҳи таҳқиқотии Маҷлиси Намояндагон, ки аз ҷониби демократҳо раҳбарӣ мешавад, гуфт, "кормандони сафорати Украина пурсидаанд, бо кумакҳои амниятии Украина чӣ шуд?"

Имейлҳо ахиран ба ӯ нишон дода шуданд ва баъди як суолу ҷавоби пушти дарҳои бастаи моҳи гузашта вай ин мукотибаҳоро ба аъзои маҷлис дод.

Кумитаи умури хориҷии Маҷлиси Намояндагон инчунин аз зердастони Купер худи ҳамон рӯз дар бораи ёриҳои амниятӣ суол кард. Вале ӯ гуфт, “бо боварӣ” гуфта наметавонад, ки мақомоти украинӣ дар Киев дар бораи масдуд шудани кумакҳо хабар доранд, ё не. Вай афзуд, “инро ҳамкоронаш ба ёд оварданд ва эҳтимол онҳо аз ин чиз хабар доштанд”.

Ҷумҳурихоҳон пойфишорӣ доранд, ки ҳеч тиҷорате дар заминаи ин ки ба ивази кумакҳои низомӣ Украина мебоист ба таҳқиқи муовини пешини президенти Амрико Ҷо Байден ва писари ӯ шурӯъ мекард, вуҷуд надошт.

Як фаъоли ҳуқуқи башар дар Покистон "нопадид шудааст"

Идрис Хаттак

Идрис Хаттак, фаъоли ҳуқуқи башари Покистон, ки ба зидди поймол шудани ҳуқуқи одамон мубориза мекард, нопадид шудааст.

Хонаводааш рӯзи 20-уми ноябр ба расонаҳо гуфтанд, Хаттак ҳафтаи гузашта дар ҳоле ки ҳамроҳи ронандааш ба Хайбар Пахтунхва рафта буд, "гум шуд".

Кумисюни ҳуқуқи башари Покистон аз ин вазъият ибрози нигаронӣ кард ва гуфт, "эҳтимол ин як нопадид шудани маҷбурӣ аст". Ин кумисюн рӯзи 20-уми ноябр дар “Твиттер” навишт: "Аз замони зоҳиран рабуда шудани Идрис Хаттак, мудофеи ҳуқуқи башару фаъоли сиёсӣ аз тарафи афроди ношинос дар ноҳияи Свобӣ як ҳафта гузашт."

Идрис Хаттак дар Навшаҳра, шимолу ғарби Покистон, барои созмони Дидбони Ҳуқуқи Башар ва Афви Байналмилал кор мекард.

Мақомоти Покистон дар ин бора изҳори назар накардаанд. Аммо Иқбол Афридӣ, намояндаи ҳизби ҳокими Таҳрик ва Инсоф ба Радиои Озодӣ гуфт, нерӯҳои амниятии Покистон "мардумро ҳаргиз бе далел боздошт намекунанд" ва афзуд, "агар ба зидди ӯ ҳеч иттиҳоме нест, озод карда хоҳад шуд".

Сербистон видеои "ҷосусӣ"-ро таҳқиқ мекунад

Саҳнае аз видео

Мақомоти Сербистон мегӯянд, гузоришҳо дар бораи ҷосусӣ бо ширкати як дипломати Русияро таҳқиқ мекунанд. Манзур видеое дар шабакаҳои иҷтимоист, ки дар он дида мешавад, як дипломати рус ба фарде, ки бовар меравад, узви баландпояи Хадамоти амнияти Сербистон аст, пул медиҳад.

Ана Брнабич, нахуствазири Сербистон рӯзи 20-уми ноябр гуфт, ба Хадамоти махсуси низомӣ дастур додааст, видео ва ин иддаоро таҳқиқ кунанд, марде, ки пулро медиҳад, маъмури Хадамоти ҷосусии низомии Русия аст ё не.

Видеоро рӯзи 17-уми ноябр дар саҳифае бо номи ‘Kdjuey Lskduf’ гузоштанд ва зери видео навиштаанд, ки “Мулоқоти афсари иттилоотии Русия бо ҷосуси серб”.

Дар видео дида мешавад, ки дипломати рус гӯиё дар назди як ресторане дар Белград, халтаи пластикиро медиҳад. Баъдан марди серб дар Осорхонаи Санъат дар Белград лифофаи дорои пулро аз ҳамон халтаи пластикӣ берун меорад.

Реля Зелски, раиси идораи иттилоотии Хадамоти Амнияти Сербистон гуфтааст, "бешак собит шуд, марде, ки дар видео аст, афсари иттилоотии рус мебошад." Зелски номи фарди дигареро, ки дар видео рӯяшро тира кардаанд, ифшо накард.

Дар мошини фаъоли қазоқи мухолифи нуфузи Чин каллаи саг гузоштанд

Афроди номаълум мошини фаъоли ҳуқуқи башари қазоқ Нурҷон Муҳаммадовро тахриб намуда, дар курсии ронанда каллаи сагро ҷой додаанд. Тирезаҳои мошин шикаста, ҳавои чархҳояш хориҷ ва дар тани он калимаи ноҷо навишта шудааст.

Нурҷон Муҳаммадов гуфт, "ман ин амалро бо афкори сисёсиам марбут медонам. Ҳеҷ шубҳа надорам. Сухани ман ҳақ аст ва ман бар зидди тавсеаи ҳузури Чин ҳастам. Ҳадафи онҳо бидуни шубҳа тарсонидани ман аст. "

Муҳаммадов мухолифи тавсеаи рӯзафзуни ҳузури иқтисодии Чин дар Қазоқистон аст. Ӯ ҳамчунон ба ҳимоят аз маҳбусони сиёсӣ ва мардуми бехонаву ҷой садо баланд кардааст. Соли равон Муҳаммадов чанд дафъа ба мудддати кӯтоҳ ҳабс шудааст.

Тарафдорони Муҳаммадов ба идораи додситонӣ рафта, тафтиши ҳамларо талаб кардаанд. Мухтор Аристон, аз додситонӣ гуфт, "тафтиши ин қазияи авбошӣ оғоз ёфт. Ҳодиса ҳамин рӯз ба вуқӯъ пайвастааст".

Рӯзноманигор: "Пас тафтиш расман шурӯъ шуд?"

Мухтор Аристон: "Бале, мо аз полис аризаи хос дастрас кардем."

Дар гузашта низ ба журналистони мустақили Қазоқистон ҷасади саг ва ё сари саг фиристода буданд.

Шумкентай Бортебай, сокини Чимкент ва яке аз тарафдорони Муҳаммадов гуфт, "ин бори аввал нест. Ахиран, аснои мурофиаи парвандаи Нурҷон Муҳаммадов, мошини вакили дифои ӯро тахриб карда буданд. Онҳо дар масофаи даҳ метр аз бинои додгоҳ ва дар рӯ ба рӯи дурбинҳои назорати ин коррро карда буданд".

Эргалӣ Қулбаев, сокини Чимкент ва як тарафдори дигари Муҳаммадов гуфт, "дар ин ҷо ҳуқуқи мо ҳимоят намешавад. Дар кишварҳои мутараққӣ сагро ҳам ҳимоят мекунанд ва кӯмаки тиббӣ мерасонанд. Дар ин ҷо аз ҳуқуқи мардум ва фаъолони ҷамъиятӣ дифоъ намекунанд. Моро баробари ҳамон саг эҳтиром намекунанд".

USAID ба беморони сил дар Тоҷикистон $15 млн кӯмак мерасонад

Барои мубориза бо бемории сил Оҷонсии Иёлоти Муттаҳидаи Амрико оид ба рушди байналмилаллӣ ё худ USAID, ба Тоҷикистон кӯмак хоҳад кард. Ба қавли Вазорати тандурустии Тоҷикистон, ин созмон дар маҷмӯъ ҷиҳати коҳиши бемории сил дар Осиёи Марказӣ барои 5 сол беш аз 31 миллион доллар ҷудо мекунад. Аз ин маблағ беш аз 15 миллион доллар ба Тоҷикистон дода мешавад.

Тоҷикистон дар миқёси ҷаҳон яке аз 30 кишварест, ки дорои шумораи зиёдтарини гирифторони бемории сили ба доруҳои гуногун тобовар, ба шумор мешавад. Ҳар сол садҳо шаҳрванди Тоҷикистон бо бемории сил ташхис мешаванд.

Зимнан, тобистони имсол Тоҷикистон ҷазои шахсонеро сахттар кард, ки мубталои бемории сироятӣ, аз ҷумла сил ва вируси норасоии масунияти бадан ҳастанд, вале аз муоина ва муолиҷа сарпечӣ мекунанд. Онҳо аз 1100 то 1650 сомонӣ ҷарима мешаванд.

Бино бар омори охирин, дар кишвар ҳудуди 10 ҳазор мубталои бемории сил ва беш аз 7 ҳазор гирифтори вируси норасии масъунияти бадан сабт шудаанд.

Дар амалиёти "Пиёдагард" беш 1500 тан дар Душанбе ҷарима шуданд

Нозирони роҳи Душанбе дар як ҳафтаи амалиёти вижа зери унвони "Пиёдагард" беш аз як ним ҳазор сокинон ва меҳмонони пойтахтро барои нақзи ҳаракат дар роҳ ҷарима кардаанд. Мақомот маълум намудаанд, ки асосан пиёдагардон қоидаҳои ҳаракат дар роҳро вайро мекунанд.

Ба қавли дафтари Раёсати Вазорати умури дохилӣ дар шаҳри Душанбе, "истифода накардан аз гузаргоҳҳои зерзаминиву рӯизаминӣ ва гузаштани роҳ дар ҷойҳои муқаррарнагардида ё манъшуда ба ҳолатҳои садамавӣ боис мегарданд, ки баъзан худи пиёдагардон аз онҳо осеб мебинанд".

Манбаъ меафзояд, аз ҳар нафаре, ки қоидаҳои ҳаракат дар роҳро вайрон кардаанд, дар ҷоий ҳодиса 6 сомониву 88 дирам ҷарима ситониданд. Амалиёти "Пиёдагард" 11-уми ноябр оғоз шуда, 21-уми ноябр ба поён мерасад.

Боздошти як табиб дар Қазоқистон барои пайванди ғайриқонунии гурда

Мақомоти Қазоқистон аз боздошти сардухтури бемористони №1 шаҳри Чимкент Абилой Донбой хабар медиҳанд. Мақомот гуфтанд, дар бемористони таҳти роҳбарии Абилой Донбой ҷарроҳии ғайриқонунии пайвандсозии гурда анҷом шудааст.

Ба иттилои вазорати корҳои дохилии Қазоқистон, амалҳои ҷарроҳӣ давоми солҳои 2017-2018 сурат гирифтааст.

"Асосан шаҳрвандони Узбекистон, Қирғизистон, Украина ба далели вазъи сахти моддиашон гурда мефурӯхтанд ва муштариҳои бемористон асосан шаҳрвандони хориҷи дур, аз ҷумла Исроил буданд",-омадааст дар хабари ВКД.

Абилой Донбой бо моддаҳои "Ширкат дар гуруҳи ҷиноии фаромиллӣ" ва "Буридани ғайриқонунии аъзои инсон" айбор мешавад. Пештар аз ин чанд тан аз табибони дигар бо айни ҳамин айбҳо боздошт шуда буданд.

Бозгашти дубораи опера ба Турманистон баъди 19 соли мамнуият

Дар Туркманистон баъди 19 соли танаффус опера - эҷоди оҳангсози итолиёӣ Руҷеро Леонкавалло "Масхарабозон" дубора рӯи саҳна омад.

Опера ва балетро замони роҳбарии президенти пешини он кишвар Сафармурод Ниёзов мамнуъ эълом карда буданд. Ниёзов бар ин назар буд, ки ин навъи санъат "бо фарҳанги туркманӣ созгор нест".

Намоиши охир дар доираи барномаи табодули фарҳангӣ байни Итолиё ва Туркманистон рӯи саҳна омад. Дар ин намоишнома ҳунармандони Туркманистон, аз ҷумла Амангелдӣ Аманов нақш офариданд. Амонов бори охир соли 2001 нақш бозида буд.

Сафармурод Ниёзов ҳам дар соли 2001 ин навъи санъатро дар кишвараш мамнуъ эълом кард.

Ҳомиёни ҳуқуқ Туркманистонро ба гуруҳи режимҳои пӯшидатарин нисбат медиҳанд. Ҳукумати он кишвар талош дорад, ки тамоми ҷанбаҳои ҳаёти шаҳрвандонро зери назорат гирад.

Фавти ҳунарманд Гавҳар Шарипова бар асари хушунати як ронанда

Гавҳар Шарипова, ҳунарманди маъруфи Узбекистон аз мошин ба замин парида, ҷон бохтааст. Дар ин бора расонаҳои маҳаллӣ бо такя ба раёсати корҳои дохилии вилояти Қашқадарё хабар доданд.

Ин ҳунарманд шаби 19 ноябр тақрибан соати 02:20 дақиқа дар километри 140-уми роҳи мошингарди "Самарқанд-Гузор" фавтид.

Ҳунарманд дар пайи хушунатҳои шаҳвонии ронанда дар ҳоле худро ба замин ҳаво додааст, ки мошин бо суръати 140 км/соат ҳаракат мекард.

"Ронандаи мошин Ш.Ф. соли таваллудаш 1990, сокини вилояти Сурхандарё аст. Ҳангоми мошин рондан нисбати ҳунарманд амалҳои шаҳвонӣ анҷом додааст",-менависанд расонаҳо.

Ронанда боздошт шуда, тафтишоти ҳодиса давом дорад. Дар сурати айбдор дониста шудани ронанда, эҳтимоли то 7 соли зиндон шудани вай мавҷуд аст.

Ҳомиёни ҳуқуқ: дар эътирозҳои Эрон беш аз 100 кас кушта шуд

Президенти Эрон Ҳасан Руҳонӣ рӯзи чоршанбе эълом кард, ки бар "тавтеаи душман" пирӯз шуданд. Дар ҷаласаи девони вазирон, ки мустақиман ба воситаи телевизион намоиш дода мешуд, эътирозҳои ахири кишварашро дар пайи болоравии нархи сӯзишворӣ шарҳ дод.

"Мардуми Эрон бори дигар аз имтиҳон гузашт ва нишон дод, ки намегузорад душман аз вазъ сӯистифода кунад",-изҳор дошт Руҳонӣ. Ӯ афзуд, ки мардум ҳаққи эътироз ба амали ҳукуматро доранд.

Расонаҳои расмӣ аз эътирозҳои ҷонибдорони ҳукумат дар шаҳрҳои гуногун хабар доданд. Ба иттилои расонаҳо, дар миёни боздоштшудаҳо сокиноне низ ҳастанд, ки шаҳрвандии дигар кишварҳо, аз ҷумла Туркия ва Олмонро доранд.

Мақомоти Эрон пас аз оғози эътирозҳо, задухурди кормандони пулис бо тазоҳургарон ва кӯшиши дуздии бонку муассисаҳои давлатӣ дастрасӣ ба Интернетро дар ин кишвар қатъ карданд.

Созмони байналмилалии ҳомии ҳуқуқи Amnesty International бо истинод ба шоҳидон ва фаъолони эронӣ иттилоъ додааст, ки дар натиҷаи пароканда кардани тазоҳургарон дар беш аз 20 шаҳри Эрон дасти кам 106 кас кушта ва наздики 1000 нафар боздошт шудаанд. Намояндаи Эрон низ аз ҳалокати даҳҳо нафар хабар дод. Мақомоти Эрон ин рақамҳоро рад мекунанд, вале шумори дақиқи қурбониёнро эълом намекунанд.

Эътирозҳо 15 ноябр якбора дар чандин шаҳри Эрон оғоз шуданд. Ба норозигии сокинон болоравии нархи бензин (тақрибан то ба 13 сент барои як литр) сабаб шуд. Мақомот гуфтанд, танҳо бо ҳамин роҳ имкони ҳалли мушкилиҳои иқтисодие вуҷуд дорад, ки дар пайи таҳримҳои ИМА ба миён омадаанд.

Ваҳид Мужда, таҳлилгари сиёсии афғон дар Кобул кушта шуд

Вазорати умури дохилии Афғонистон мегӯяд, ки Ваҳид Мужда, коршиноси шинохтаи масоили сиёсӣ дар ин кишвар, шоми чаҳоршанбеи 20-уми ноябр дар роҳ ба сӯи масҷид дар наздикиҳои сафорати Русия дар шаҳри Кобул аз сӯи ду нафар мотосиклсавор ҳадафи ҳамла қарор гирифт ва ба қатл расид. Вазорати умури дохилии Афғонистон мегӯяд, ки пулис қазияро таҳқиқ ва баррасӣ дорад.

Ваҳид Мужда зодаи вилояти Бағлон дар шимоли Афғонистон ва дар як хонаводаи таҳсилкарда ба дунё омада буд. Оқои Мужда таҳсилоти ибтидоии худро дар Бағлон ва сипас дар Кобул ба поён расонд ва хатмкардаи факултаи иқтисоди Донишгоҳи Кобул буд.

Ӯ дар замони ҳукумати Бурҳониддин Раббонӣ шомили вазорати умури хориҷии он кишвар шуд ва баъд аз омадани Толибон, муддати панҷ сол дар ҳамон вазорат барои Толибон кор кард.

Ваҳид Мужда дар замоне, ки дар вазорати умури хориҷии Афғонистон кор мекард, китобе ба номи "Афғонистон ва панҷ соли султаи Толибон"-ро навишт.

Ӯ яке аз таҳлилгарони шинохташудаи масоили сиёсӣ дар Афғонистон буд ва дар аксар баҳсҳо дар телевизионҳо ва радиоҳо иштирок мекард.

Толибон "қаттолтарин гуруҳи террористӣ" дар соли 2019

Маҳалли бомбгузории маргталабона дар Кобул дар рӯзи 13-уми ноябри соли 2019

Муаллифони як гузориши байналмилалӣ Толибонро "қаттолтарин гуруҳи террористии сол" номида ва гуфтаанд, ки соли 2018 қурбониёни дасти ин гурӯҳ назар ба қурбониёни дасти созмонҳои дигари террористӣ бештар будааст.

Шохиси Байналмилалии Терроризм, ки Пажуҳишгоҳи Иқтисод ва Сулҳ рӯзи 20-уми ноябр нашр кард, нишон медиҳад, маргумир аз дасти Толибон дар муқоиса ба соли 2018-ум 71 дарсад афзудааст.

Ин муассиса дар Австралия қароргоҳ дорад. Созмон мегӯяд, соли 2018 дар натиҷаи ҳамлаву бомбгузориҳои Толибон 6103 нафар ҳалок шудаанд, ки ин 38 дарсади маргумир аз амалҳои террористӣ дар саросари ҷаҳонро ташкил медиҳад.

Толибон дар соли 2019 мақоми гуруҳи ба ном “Давлати исломӣ”-ро, ки қаттолтарин гуруҳи террористӣ буд, гирифтааст.

Ба гуфтаи таҳиягарони Шохиси Байналмилалии Терроризм аз дасти ДОИШ 1328 нафар ҷон додаанд, ки дар муқоиса ба соли 2017 70 дар сад камтар аст. Дар умум, соли 2018 теъдоди онҳое, ки дар натиҷаи терроризм дар саросари ҷаҳон ба ҳалокат расидаанд, 15 дар сад камтар шуда, ба 15 952 нафар расидааст. Дар муқоиса ба чаҳор соли гузашта, теъдоди қурбониён ним баробар кам шудааст.

Бештар аз ҳама ҳамлаҳои террористӣ дар Ироқ камтар шудааст, ки баъд аз соли 2003 нахустин бор ҳамчун осебпазиртарин кишвар дар баробари терроризм ном бурда нашудааст.

Ироқ, ки соли 2017 аз шикасти ДОИШ хабар дод, баъд аз Нигерия ва Сурия саввумин кишвари осебпазир аз терроризм номида шудааст.

Дар гузориш омадааст, аксари ҳамлаҳои террористӣ дар кишварҳои гирифтори ҷанг рух додаанд.

Хонае, ки дар он Ҳитлер ба дунё омадааст, идораи пулис мешавад. ВИДЕО

Манзиле, ки як замон ба хонаводаи Адолф Ҳитлер тааллуқ дошт

Қарор аст, хонаеро, ки дар он соли 1889 Адолф Ҳитлер зода шудааст, ба идораи пулис табдил диҳанд. Мақомот умед доранд, ин иқдом чапгароҳои ашаддиро, ки ин хонаро ба макони зиёрат табдил медиҳанд, бозмедорад.

Неонатсистон ё қавмгароёни тозапайдо дигар наметавонанд ба зиёрати хонае, ки Адолф Ҳитлер зода шудааст, бираванд. Чунки эҳтимол онҳоро дар он ҷо боздошт кунанд. Вазорати корҳои дохилии Австрия эълон кард, биное, ки диктатор ба дунё омадааст, ба идораи пулис табдил медиҳанд.

Ин тасмим ба моҷаро дар атрофи бинои кӯчаи Залсбургер Ворштадт 15, ки дар шаҳраки Бранау ам Инн аст, поён мегузорад. Ҳудуди сад сол боз бино ба оилаи Пеммерҳо тааллуқ дошт.

Аввал дар ин бино меҳмонхона ҷойгир шуда буд, баъдан маркази кумак ба муътодон. Моликони бино барои ҷой кардани ин марказ аз давлат ҳудуди 5 ҳазор евро мегирифтанд. Аммо се сол пеш ин шарикии бахши хусусӣ ва давлат халалдор шуд.

Моликони хона шартномаро бекор карданд ва мақомоти Вена дар ташвиш афтоданд, ки мабодо бино ба дасти ҳаводорони Ҳитлер гузарад. Ҳатто порлумон маҷбур шуд, қонуни алоҳидае қабул кунад ва имкон дод бино ба ивази 800 ҳазор евро мусодира шавад.

Биноро акнун тармим мекунанд. Музояда дар фурсатҳои наздик эълон мешавад. Барои ширкат дар он меъморон аз тамоми қаламрави Иттиҳоди Аврупо даъват мешаванд.

Писари президенти пешини Олмон дар Берлин кушта шуд

Дар шаҳри Берлин Фритс фон Вайтсзеккери табиб, фарзанди президенти аввали Олмони муттаҳида Рихард фон Вайтсзеккер кушта шуд. Сабабҳои куштани ӯ ҳанӯз маълум нест. Замоне, ки Фритс фон Вайтсзеккер дар клиникаи хусусии Шарлотенбург, дар мавриди маризиҳои ҷигар суханронӣ мекард, шахси номаълум бо корд ҳамла карда, ба ӯ чанд зарбаи марговар задааст.

Пулисе, ки бо либоси мулкӣ миёни шунавандаҳо ҳузур дошт, талош кард ба ҳамлавар монеъа эҷод кунад, аммо худи ӯ ҳам сахт захмӣ шуд. Фритс фон Вайтсзеккер 59-сола буд ва дар клиникаи хусусии Шарлотенбург кор мекард. Нафари ҳамлавар боздошт шудааст.

Падари Фритс-Рихард фон Вайтсзеккер солҳои 1984-1994 президенти Олмон буд.

Замони Ҷанги Дувуми Ҷаҳон Рихард фон Вайтсзеккер дар ҷабҳаи шимол, аз ҷумла замони муҳосираи Ленинград дар атрофи ин шаҳр хидмат кардааст.

Шоҳидии Курт Волкер ва Тим Мориссон дар Конгресси Амрико

Фиристодаи пешини Амрико барои Украина Курт Волкер ҳамроҳ бо мақоми собиқи Шӯрои амнияти миллӣ Тим Моррисон шоми 19-уми ноябр давоми панҷ соат бо гуруҳе аз аъзои Конгресс дар бораи импичмент ё радди салоҳияти президент гуфтугӯ карданд.

Аъзои демократи Маҷлиси Намояндагон масъалаи эҳтимоли суистифодаи қудрат аз ҷониби Доналд Трамп ва талоши боздоштани кумакҳо ба як ҳукумати хориҷӣ ба хотири роҳандозӣ шудани тафтиши кори рақиби интихоботиашро таҳқиқ мекунанд.

Дар меҳвари ин ҳама таҳқиқот гуфтугӯи телефонии рӯзи 25-уми июли имсол миёни Доналд Трамп ва президенти Украина Владимир Зеленский қарор гирифтааст, ки дар ҷараёни он президенти Амрико аз Киев хост, муовини пешини президент Ҷо Байден ва писари ӯ Ҳантерро тафтиш кунад.

Трамп батакрор гуфт, ҳеч кори хато накардааст ва оғози ҷараёни радди салоҳияти президентро “дурӯғ” ва “шикори ҷоду” ва таҳқиқи Конгрессро “додгоҳи худсарона” арзёбӣ кард.

Дар ҷараёни муҳокимаҳои кушодаи 19-уми ноябр, Волкер зоҳиран баъзе баёноти гузаштаи худро каме тағйир дод. Вай гуфт, танҳо ба ҳамин наздикиҳо фаҳмид, ки ширкати украинии энержии “Бурисма” ба Ҳантер Байден тааллуқ дорад.

Трамп аз Зеленский хоста буд, дар баробари падараш парвандаи Ҳантер Байденро низ тафтиш кунанд.

Аз се ду ҳиссаи кӯдакони афғон аз ҷанг ҷабр дидаанд

Акс аз бойгонист.

Save The Children ё созмони "Наҷоти кӯдакон" мегӯяд, аз ҷангҳои дарозмуддат дар Афғонистон аз се ду ҳиссаи кӯдакони ин кишвар осеб дидаанд. Дар гузориши созмон аз рӯзи 19-уми ноябр омадааст, ин кӯдакон ё узви хонаводаро аз даст додаанд, маҷруҳ шудаанд ва ё шоҳиди ҷангу ҳамлаҳо будаанд.

Дар пурсише, ки миёни 700 калонсол ва кӯдакон дар чаҳор вилояти Афғонистон анҷом шуд, маълум гардидааст, ки аксари ноболиғон аз афсурдагӣ ва изтироб ранҷ мебаранд ва барои раҳоӣ аз ин ҳол ба хадамоти ҳаётан муҳим дастрасӣ надоранд.

Волидони пурсидашуда гуфтаанд, кӯдакон бештар аз ҳама дар роҳ ба мактаб метарсидаанд.

"Наҷоти Кӯдакон" менависад, 38 дарсади кӯдакон дар Афғонистон ба худ осеб мерасонанд ва бақия ба атфоли дигар муносибати дағалу хашин доранд.

Бино ба гузориши семоҳаи Барномаи кумаки Созмони Милали Муттаҳид дар Афғонистон (UNAMA) соли гузашта барои кӯдакони афғон маргбортарин сол буд, чун дар ин сол 927 кӯдак кушта, беш аз 2100 нафари дигар захмӣ шуданд.

Ҳалокати ду сарбози амрикоӣ дар суқути чархбол дар Афғонистон

Низомиёни Амрико гуфтанд, ки бар асари суқути чархболе дар Афғонистон ду сарбози амрикоӣ кушта шудаанд. Бино ба изҳороти бахши матбуоти нирӯҳои Амрико дар Афғонистон, таҳқиқ дар бораи сабабҳои садама оғоз шуд.

Дар изҳорот гуфта шудааст, ки бар асоси маълумоти ибтидоӣ, чархбол ба асари "тирандозии душман" суқут накардааст. Ҷузъиёти дигар дастрас нест.

Толибон иддао карданд, ки чархбол соати яки шаби 20-уми ноябр дар минтақаи Чархи вилояти Лугар зада шуд ва ҳамаи сарнишинонаш ҷон бохтанд. Фавод Амон, сухангӯи Вазорати дифои Афғонистон, иддаои Толибонро рад кард.

Гурӯҳи Толибон борҳо масъулияти суқути чархбол ва ҳавопаймоҳои бесарнишинро бе он ки далел пеш биорад, ба уҳда гирифтааст.

Аз аввали имсол 19 сарбози амрикоӣ дар Афғонистон кушта шудаанд. Дар ҳоли ҳозир тақрибан 13 ҳазор нерӯи Иёлоти Муттаҳида дар Афғонистон ҳузур доранд.

Зарбаҳои ҳавоии Исроил ба чанд таъсисот дар Сурия

Зиреҳпӯшҳои Исроил дар Баландиҳои Ҷулон дар наздикии марзи Сурия дар рӯзи 19-уми ноябр. Исроил ин минтақаи стротегии Сурияро ишғол ва ба қаламраваш ҳамроҳ кардааст.

Артиши Исроил гуфт, дар посух ба мушакандозиҳо ба Баландиҳои Ҷулони зери назораташ ба даҳҳо таъсисоти низомиёни эронӣ ва Сурия дар қаламрави ин кишвар зарба задааст. Дар баёнияи артиш, омадааст, ки ҳавопаймоҳои ҷангӣ рӯзи 20-уми ноябр ба таъсисоти Сипоҳи Посдорони Инқилоби Исломии Эрон аз ҷумла, мушакҳои замин ба ҳаво, анбори аслиҳа, пойгоҳҳоро ҳадаф гирифтанд.

Артиши Исроил ҳамчунин гуфт, ки баъзе аз тӯпхонаҳои дифои ҳавоии нерӯҳои Сурияро баъди оташ кушодан ба самти ҳавопаймоҳо нобуд кардааст. Як созмони нозири ҷанг гуфт, 11 размҷӯ аз ҷумла 7 хориҷӣ дар натиҷаи ҳамлаҳои ҳавоӣ кушта шудаанд. Пеш аз ин матбуоти давлатии Сурия гузориш дод, ки дар натиҷаи ҳамлаи мушакии Исроил дар наздикии шаҳри Димишқ ду ғайринизомӣ кушта шуданд ва чандин нафари дигар ҷароҳат бардоштанд.

Мақомоти Эрон то кунун шарҳе дар ин бора надодаанд, вале Русия ҳамлаҳои Исроилро кори нодуруст номид. Исроил борҳо ба таъсисоти низомии Эрон дар Сурия зарба задааст, то аз талоши Эрон барои таъсиси пойгоҳи низомии доимӣ дар онҷо пешгирӣ кунад. Дар ҷанги дохилии 8 солаи Сурия Эрон дар баробари Русия ба ҳукумати раиси ҷумҳур Башшор Асад кӯмакҳои бисёр муҳим расондааст. Ин ҷанг моҳи марти соли 2011 баъди саркӯби хушунатбори тазоҳуроти мардум шурӯъ шуд.

Ҳушдори мақоми рус аз хатари ДОИШ пас аз ҳамла ба дидбонгоҳи "Ишқобод"

Игор Моргулов, муовини вазири умури хориҷии Русия.

Мақомоти Русия бо ишора ба ҳамла ба дидбонгоҳи марзии "Ишқобод" дар наздикии марзи Тоҷикистон ва Узбекистон гуфтаанд, ки хатари гурӯҳи "Давлати исломӣ" барои минтақа воқеӣ мебошад. Ин матлабро Игор Моргулов, муовини вазири умури хориҷии Русия дар ҳамоиши Созмони Милали Муттаҳид ва Созмони Ҳамкориҳои Шанхай дар бахши амнияту пешгирии тундгароӣ, баён додааст.

Ба навиштаи хабаргузории русии РИА Новости, оқои Моргулов барқарории субот дар Афғонистонро омили асосии сулҳ дар қаламрави кишварҳои узви СҲШ гуфтааст. Муовини вазири умури хориҷии Русия ҳамлаи хунбор ба дидбонгоҳи "Ишқобод"-ро далели ҷой доштани таҳдиди террористӣ дар минтақа хондааст.

Дар ҳамлаи шаби 6-уми ноябр ба дидбонгоҳи "Ишқобод" дар ҳудуди ноҳияи Рӯдакӣ ва дар марзи Тоҷикистону Узбекистон 15 ҳамлавар ва чанд тан аз нерӯҳои марзбонӣ ва милиса кушта, панҷ ҳамлавар дастгир шудаанд. Мақомот гуфтанд, ки ҳамла кори ҷангҷӯёни гуруҳи тундрави "Давлати исломӣ" аст ва ба иттилои расмӣ "онҳо аз ноҳияи Қалъаи Золи Афғонистон омадаанд".

ДОИШ низ масъулияти ҳамларо ба дӯш гирифт, вале ҳамчунон фарзия ва гумонзаниҳои дигаре дар ҷомеа ва расонаҳо вуҷуд дорад. Мақомоти Афғонистон ва чандин манбаи боварбахш дар мақомоти Тоҷикистон убури ҳаросафканонро аз марз рад кардаанд.

Дар доираи парвандаи изҳори нобоварӣ ба Трамп 4 шоҳид баёнот доданд

Сардори умури аврупоии Шӯрои амнияти миллии ИМА ва мутахассис оид ба Украина подполковник Александр Виндман рӯзи сешанбе дар ҷаласаи бози Кумитаи иктишофии Палатаи намояндагони Конгресс баромад кард.

Виндман 25-уми июли соли равон дар суҳбати телефонии президенти ИМА Доналд Трамп бо ҳамтои украиниаш Владимир Зеленский ҳузур дошт.

Мухолифони Трамп, ки ба барканорияш аз қудрат талош доранд, мегӯянд, президенти Амрико дар он суҳбат аз ҳамтои украинии худ хостааст, то зидди Хантер Байден, писари рақиби сиёсияш аз Ҳизби демократ Ҷо Байден тафтишотро оғоз кунад.

Виндман аз ин суҳбати Трамп нигарон шуда, дар бораи он ба додситони кули ИМА хабар додааст. Ба гуфтаи вай, "президенти ИМА ҳақ надошт, аз раҳбари як кишвари хориҷӣ тафтишот зидди шаҳрванди Амрико ва рақиби сиёсии худро талаб кунад".

Ба гуфтаи Виндман, додситони кулли Украина Юрий Лутсенко, шаҳрдори пешини Ню-Йорк ва вакили дифои шахсии Трамп Рудӣ Ҷулиан "иттилои дуруғеро паҳн карданд, ки сиёсати ИМА нисбат ба Украинаро ба ҳам мезанад".

Ҳамроҳ бо Виндман дипломат Ҷенифер Уилямс ҳам баёнот дод. Ӯ дар тими муовини президент Майк Пенс мушовир буд ва дар суҳбати Трамп бо Зеленский ҳузур дошт. Уилямс гуфт, суҳбати ду президент "ғайриодӣ" буд, зеро дар он "сиёсати дохилии ИМА" баҳс шуд.

Трамп баёноти Виндман Уилямсро дар Твиттер танқид карда, рӯзи сешанбе дар Кохи Сафед ба рӯзноманигорон гуфт, Виндманро намешиносад.

Дар доираи тафтиши изҳори нобоварӣ ба Доналд Трамп шоми сешанбе ду шоҳиди дигар - фиристодаи махсуси ИМА дар Украина Курт Волкер ва корманди Кохи Сафед Тим Миррисон бозпурсӣ шуданд.

Додгоҳи Қазоқистон ҳукми "ҷонибдорон"-и Аблязовро содир кард

Додгоҳе дар шаҳри Алмато 19 ноябр чаҳор сокини маҳаллиро, ки ба иштирок дар фаъолияти ҳаракати мамнуи "Интихоби демократии Қазоқистон" (ИДҚ) айбдор мешуданд, яксолӣ шартан аз озодӣ маҳрум кард.

Ҳабси пешакии ҳамаи гумонбарон тағйир ёфта, Гулзода Ҷаукерова, Оксана Шевчук ва Ануар Аширалиев аз толори додгоҳ озод шуданд. Гумонбари чаҳорум Жазира Демеуова аз моҳи сентябр ба ин сӯ дар ҳабси хонагӣ қарор дошт. Додгоҳ се нафарро ба корҳои ислоҳӣ маҳкум карда, Шевчук ба иллати модари серфарзанд буданаш озод шуд.

Қаблан додситон Муҳит Рисбеков дар мурофиаи 18 ноябр барои чаҳор сокини маҳаллие, ки ба иштирок дар фаъолияти ҳаракати мамнуи "Интихоби демократии Қазоқистон" (ИДҚ) айбдор мешаванд, дусолӣ ҳукми зиндон талаб кард. Ба гуфтаи Рисбеков, баёноти шоҳидон ва маводи парванда гуноҳи гумонбаронро пурра исбот кард.

Гумонбарон айбҳои эъломшударо рад карда, аз додрас хоста буданд, ки ҳукми одилона содир кунад.

Се гумонбар — Оксана Шевчуки 30-сола, Гулзода Ҷаукероваи 51-сола ва Ануар Аширалиеви 36-сола аз 4 июли соли равон дар боздоштгоҳи шаҳри Алмато нигаҳдорӣ мешуданд.

“Ҳудуди ним миллион шаҳрванди то 30-солаи Тоҷикистон аз таҳсил дур мондаанд"

“Ҳудуди ним миллион шаҳрванди то сисолаи Тоҷикистон ба ҳар шакле аз таҳсил дур мондаанд.” Ин хабарро масъули дафтари Бунёди кӯдакони Созмони Милали Муттаҳид (ЮНИСЕФ) дар Душанбе 19-уми ноябр ва дар рӯзи 30-солагии қабули Қатъномаи ҳуқуқи кӯдакон баён дошт. Тоҷикистон соли 1993 ба ин қатънома пайвастааст.

Намояндагии ЮНИСЕФ дар Тоҷикистон бо баргузории нишасте бахшида ба ин рӯз аз мушкил ва дастовардҳои кишвар дар раванди таъмини ҳуқуқи кӯдакон натиҷагирӣ кард.

Азим Иброҳим, муовини нахуствазири Тоҷикистон гуфт, “барои кӯдакон ҳамаи шароит фароҳам карда шудааст. Албатта, камбудҳо низ вуҷуд доранд, аммо омода ҳастем якҷо бо шарикон дар пайи беҳбуди вазъ иқдомҳоеро рӯйи даст бигирем. Намунаи равшани чунин тасмим бозгардондани кӯдакони тоҷик аз Ироқ аст, ки бо кумаки ЮНИСЕФ сурат гирифт”.

Лучано Калестинӣ, роҳбари намояндагии ЮНИСЕФ дар Тоҷикистон гуфт, фарзандони муҳоҷирони тоҷик, ки низ аз таълиму тарбия дур мондаанд, мояи нигарони мақомот мебошанд. Вай афзуд, феълан ҳукумати Тоҷикистон 32 барномаро барои беҳбуди вазъи кӯдакон мавриди иҷро қарор додааст, аммо бештаре аз онҳо ба хотири камбуди маблағ пурра иҷро нашудаанд.

Нуриддини Саид, вазири маориф ва илми Тоҷикистон, дар посух ба ин нигарониҳо гуфт, камбуди маблағ наметавонад садди иҷрои барномаҳо шавад: “Роҳҳои дигари дарёфти маблағ вуҷуд доранд. Ҳукумат метавонад маблағҳои қарзиро барои иҷрои ин барномаҳо ҷалб кунад. Ҳамчунин метавонем аз маблағҳои соҳибкорони баномуси худамон истифода кунем. Аз ҳамаи сарчашмаҳое, ки қонунгузории Тоҷикистон онро манъ накардааст, метавонем маблағҳои заруриро барои иҷрои ин барномаҳо ҷалб кунем ва ба ҳадафҳои ин барномаҳо то соли 2030 даст ёбем.”

Намояндагии ЮНИСЕФ ҳисоб кардааст, ки барои иҷрои пурраи ин барномаҳо то соли 2030 маблағи баробар ба 16 миллиард доллар зарур аст. Маълум нест, мақомот ин пулро ба зудӣ пайдо хоҳанд кард ва ё аз таҳсил дур мондани кӯдакону наврасон ва мушкили дигари онҳо солҳо ҳалношуда мемонад.

Сенатори амрикоӣ: Барои озодии матбуот дар Тоҷикистон тамоми талошро мекунем

Сенатор Ҷим Рисч (Jim Risch), раиси Кумитаи равобити хориҷии Сенати Амрико дар мулоқот бо Ҷейми Флай, президенти Радиои Аврупои Озод/ Радиои Озодӣ таъкид кардааст, ки ҳама талошашонро барои озодии матбуот дар Тоҷикистон анҷом хоҳанд дод.

Дар ин мулоқот, ки рӯзи 13-уми ноябр сурат гирифтааст, раиси Кумитаи равобити хориҷии Сенати Амрико аз нақши Радиои Аврупои Озод/Радиои Озодӣ дар ироаи хабарҳои дуруст ва дақиқ таъкид карда, ба масъалаи мушкили иҷозатномаи фаъолияти кормандони Радиои Озодӣ дар Тоҷикистон ишора намудааст.

“Ниҳодҳое чун Радиои Аврупои Озод дар сафи аввал барои озодии матбуот дар саросари Аврупо ва Осиёи Миёна истодааст,” -- гуфтааст раиси Кумитаи равобити хориҷии Сенати Амрико.

Вай афзуд, ахиран бо чанд мақоми баландпояи сенат ба президент Эмомалӣ Раҳмон ба пуштибонӣ аз гузоришҳои Радиои Озодӣ дар дохили он кишвар нома фиристоода, аз ҳукумат хоста буданд, ки тибқи қонунҳои Тоҷикистон ба хабарнигорони ин радио иҷозатномаи фаъолият диҳанд.

Масъалаи аккредитатсия ё парвонаи кори журналистони Радиои Озодӣ аз моҳи апрели имсол доғ шуд ва имрӯз 11 хабарнигору корманди фаннии намояндагии он дар Душанбе аз ҳаққи кор маҳрум мондаанд. Рӯзи 31-уми октябр, пас аз баёнияҳои бешумори созмонҳои байнулмилалӣ ва ватанӣ Вазорати умури хориҷии Тоҷикистон ба 6 хабарнигор парвонаи нимсола ва ба як нафар семоҳа дод. "Ин барои мо қобили қабул нест ва ман ба фишори ҳукумати Тоҷикистон барои озодии матбуот идома хоҳам дод," -- гуфтааст Ҷим Рисч.

Дар оғози моҳи ноябри имсол президенти Радиои Аврупои Озод/Радиои Озодӣ Ҷейми Флай бо раиси ҷумҳури Тоҷикистон Эмомалӣ Раҳмон мулоқот кард. Ин дидор бо дархости Радиои Озодӣ дар ҷараёни сафари президенти Тоҷикистон ба Аврупо, дар Сюрихи Швейтсария сурат гирифт. Ду тараф вазъ ва шароити кори хабарнигорон ва кормандони Радиои Озодӣ дар Тоҷикистонро баррасӣ намуданд.

Ёфтҳои бештар

Гузоришҳои видеоӣ

XS
SM
MD
LG