Пайвандҳои дастрасӣ

Хабари нав

Хабарҳо

Тақсим шудани ширкати "Барқи Тоҷик" ба таъхир афтод

Таҷдиди ширкати "Барқи тоҷик" ба таъхир афтодааст. Қарор буд ин ширкат то охири соли 2018 ба ду ширкати алоҳида таъсис ёбад.

Рустам Маҷидзода, сардори бахши молияи "Барқи тоҷик", рӯзи 13-уми феврал дар нишасти хабарии ин ниҳод гуфт, раванди таҷдиди ширкат ба таъхир афтодааст. Ба гуфтаи Маҷидзода, сабаби аслии таъхир дар таҷдиди ширкат, ин тӯл кашидани баррасии санадҳо дар Кумитаи давлатии сармоягузорӣ мебошад.

Феълан як гурӯҳи корӣ дар Тоҷикистон таҷдиди ширкати "Барқи тоҷик"-ро амалӣ мекунанд. Масъулини ширкат мегӯянд, ин гурӯҳи корӣ то охири соли гузашта танҳо масъалаҳои асосиро диданд ва таҷдиди ширкат дар вақти муқарраршуда амалӣ нашуд. Феълан маълум нест, ки ширкати "Барқи тоҷик" кай ба ширкатҳои алоҳида тақсим мешавад.

Қарори ҳукумат барои таҷдиди ширкати “Барқи тоҷик” моҳи апрели соли гузашта содир шуд.Дар ин қарор раиси ҷумҳур ба вазорату идораҳои кишвар дастур дода буд, ки дар тӯли се моҳи оянда дар заминаи "Барқи тоҷик" ҷамъияти саҳомии "Шабакаҳои интиқолдиҳандаи барқ" ва "Шабакаҳои тақсимкунандаи барқ"-ро таъсис бидиҳанд.

Бо иҷро шудани ин қарор худи ширкати "Барқи тоҷик" ба истеҳсоли нерӯи барқ машғул гашта, ду ширкати дигар масъули нигоҳубини хатҳои барқу симчӯбҳо ва фурӯшу ҷамъоварии пули барқ хоҳанд буд.

Созмонҳои байналмилалӣ, ба мисли Бонки ҷаҳонӣ ва Бонки Осиёии Рушд, борҳо ба Тоҷикистон машварат дода буданд, ки дар ширкати "Барқи тоҷик" таҷдиди сохторӣ сурат гирад. "Барқи тоҷик" солҳост барои фаъолияти ношаффоф ва қарзҳои беш аз 1-миллиард сомониаш танқид мешавад.

Ширкати "Барқи тоҷик" аз корхонаҳои калони давлатии муаммодор дар Тоҷикистон мебошад. Тибқи омори ахири Мирзо Исмоилзода, роҳбари “Барқи тоҷик” қарзи ин ширкат беш аз 23 миллиард сомонӣ мебошад.

Ҳамаи хабарҳои имрӯзро дар инҷо бихонед

Раиси Бунёди иҷтимоии Қирғизистон бо гумони тамаъҷӯӣ ҳабс шуд

Медер Ирсалиев, раиси Бунёди иҷтимоии Қирғизистон.

Додгоҳи ноҳияи Якуми майи шаҳри Бишкек 20 ноябр раиси Бунёди иҷтимоии Қирғизистон Медер Ирсалиевро то 17 январи соли 2021 ҳабс кард.

Дар хадамоти матбуотии Додгоҳи олии Қирғизистон гуфтанд, ки Ирсалиев ду моҳ дар боздоштгоҳи муваққатии Кумитаи давлатии амнияти миллии ин кишвар нигаҳдорӣ мешавад.

Ирсалиевро 18 ноябр дар доираи парвандаи тамаъҷуии мунтазам аз воҳидҳои Бунёди иҷтимоӣ дастгир карданд.

Пештар хабар дода шуд, ки як гуруҳи мансабдорони баландпояи Бунёди иҷтимоии Қирғизистон ба таври мунтазам ва иҷборӣ аз мудирони воҳидҳои ин ниҳод маблағ талаб мекардаанд.

Медер Ирсалиев моҳи майи соли 2018 бо қарори сарвазири вақти Қирғизистон Муҳаммад Абилғозиев раиси бунёди мазкур таъйин шуда буд. Ӯ то ин дам муовини аввали раиси бунёд буд.

Таркиш дар наздикии Тошканд ба сабаби таъмири бесифати лӯлаи газ

Яке аз маҳаллаҳои шаҳри Тошканд. Акс аз бойгонӣ.

Таркиш дар ноҳияи Қибрайии вилояти Тошканди Узбекистон, ки дар натиҷаи он падару писаре фавтиданд, ба далели таъмири бесифати лӯлаи газ рух додааст.

Рӯзи 23 ноябр Додситонии кулли Узбекистон дар пайи ин ҳодиса парвандаи ҷиноӣ боз кардааст.

"Дар натиҷаи тафтишот муайян шуд, ки таъмири лӯлаи газ дар наздикии манзилҳои зист бе сифат сурат гирифта ва ин боиси таркиш шудааст", - хабар медиҳад Додситонии кулли Узбекистон.

Мақомоти он кишвар мегӯянд, лӯлаи газ сурох ва дар таҳхонаи манзили баландошёна газ ҷамъ шуда, дар натиҷа боиси таркиш шудааст.

Пештар аз ин расонаҳо хабар дода буданд, ки дар кӯчаи Гулистон-3, дар ноҳияи Қибрайии вилояти Тошканд падару писаре дар натиҷаи таркиш фавтидаанд.

Песков гуфт, дар Русия вазъи эпидемиологӣ то рафт бадтар мешавад

Дар Русия дар шароити пандемия омодагиҳо ба Соли нав ҳам идома дорад. Дар Майдони Сурх рӯзи 23-юми ноябр арчаи солинавиро гузоштанд

Мақомоти Русия мегӯянд, дар шароити пандемия низоми беҳдошти Русия дар режими бисёр сангин кор мекунад, вале, ба таъкиди мақомот, вазъият таҳти назорат аст. Дар ин бора сухангӯи Кремлин Дмитрий Песков рӯзи 24-ми ноябр дар нишасти матбуотӣ дар Маскав гуфт.

“Вазъи эпидемиологӣ то рафт сангинтар мешавад. Ин як чолиши беҳдоштӣ аст, ки ҳамаи кишварҳои ҷаҳон бо он рӯбарӯ шуданд. Дар таърихи навтарин инсоният бо чунин чолишҳо рӯбарӯ нашудааст. Низоми беҳдоштӣ дар як режими бисёр сарборӣ кор мекунад, вале, бо ин вуҷуд, ба ҷуз чанд манотиқи дорои мушкил, вазъият дар маҷмӯъ таҳти назорат аст”.

Ба иттилои Пажӯҳишгоҳи Ҷон Ҳопкинс, дар Русия шумори олудашудаҳо ба коронавирус аз 2,1 миллион нафар гузашта, шумори фавтидаҳо аз 36,6 ҳазор нафар бештар мебошад. Рӯзона дар саросари Русия ба ҳисоби миёна беш аз 24 ҳазор нафари нав ба коронавирус олуда мешавад.

Дар мурофиаи Шамсуддинов шоҳидон аз озори таҳқиромези сарбозон гуфтанд

Мурофиаи додгоҳии Рамил Шамсуддинов дар додгоҳи шаҳри Чита ҷараён дорад

Дар аввалин баёнияҳои шоҳидони куштори ҳашт низомӣ, ки дар он сарбоз Рамил Шамсуддинов айбдор мешавад, ҳамхидматҳояш аз шаклҳои бисёр сангину таҳқиромези меҳтарсолорӣ дар қисми низомӣ нақл карданд. Шамсуддинов баъди куштори моҳи октябри соли 2019 дар қисми ҳарбии Горнии минтақаи Забайкалеи Русия ба ҷавобгарӣ кашида шуд.

Шоҳиди аввал Дмитрий Коновалов дар ҷараёни мурофиаи додгоҳии 23-юми ноябр гуфтааст, ки яке аз кушташудаҳо лейтенант Даниил Пянков Шамсуддиновро маҷбур мекард, ки ҳоҷатхонаву ҳаммомро тоза кунад. Ӯ таҳдид мекард, ки агар ин ҷойҳо тоза нашавад, “бо рӯяш атрофи туалетро тоза мекунад”. Барои ифлос будани ҳоҷатхона Шамсуддинову дигар ҳамхидматҳояшро маҷбур мекарданд, ки сарулибоси ҳифозатии махсусро бипӯшанд. Пянков гуфтааст, ки талабот барои тоза нигоҳ доштани ҳоҷатхона аз меъёр сахттар буд, вале барои ин набояд инсон кушта мешуд. Ба илова, Шамсуддинову ду ҳамхидмати дигарашро дар долони бинои марказии қисми ҳарбӣ маҷбур мекарданд, ки истода оинномаро азёд кунад. Худи Шамсуддинов гуфт, ки чанд рӯз пеш аз куштор ӯро аз хоб маҳрум карда, маҷбур мекарданд, ки оинномаро рост истода азхуд кунад ва дар як шабонарӯз ҳамагӣ чанд соат ваё ним соат иҷозаи хоб медоданд.

Сарбозон гуфтанд, ки ҳамхидматҳояш ӯро азият мекарданд ва яке аз афсарон таҳдид кард, ки ба номусаш таҷовуз мекунад. Дар вазорати дифои Русия эътироф карданд, ки Шамсуддинов бо яке аз афсарон мушкил дошт ва чанде баъд бар асоси парвандаи меҳтарсолорӣ (“дедовшина”) парванда боз шуд. Як сарбоз ба ду соли шартии зиндон маҳкум шуд.

Ашраф Ғанӣ аз хатари коҳиши кӯмакҳои байналмилалӣ ба Афғонистон ҳушдор дод

Ашраф Ғанӣ, президенти Афғонистон

Президенти Афғонистон Ашраф Ғанӣ ҳушдор дод, ки ҳама гуна коҳиш дар ҳаҷми кӯмакҳои байналмилалӣ ба Афғонистон ба хадамоти ҷамъиятӣ, фаъолиятҳои иқтисодӣ ва мизони зиндагии мардум дар ин кишвар таъсири манфӣ мерасонад. Ғанӣ рӯзи 24-уми ноябр зимни суханронӣ дар ҷаласаи кишварҳову созмонҳои ёрирасони Афғонистон дар Женева гуфт, кӯмаки байналмилалӣ “на танҳо барои рушд, балки барои ҳифзи сулҳ муҳим аст”. Конфронси Женева ҳам бо роҳи онлайнӣ ва ҳам ҳузурӣ ҷараён мегирад ва ин дар ҳолест, ки ҳукумати Афғонистон ва ҷангиёни Толибон дар Қатар дар музокироти сулҳ ба пешрафте даст наёфтаанд ва мизони хушунатҳо дар саросари Афғонистон кам намешавад. Илова ба он, президенти ИМА Доналд Трамп гуфт, ки то миёнаҳои моҳи январ шумори нирӯҳои амрикоӣ дар Афғонистонро коҳиш медиҳад. Ғанӣ гуфт, “созиши сиёсӣ бо Толибон базудӣ ниҳоӣ мешавад. Вале дар шароити бад шудани даромадҳо, поинравии сифати хадамот ва болоравии бекорӣ дастёбӣ ба сулҳи пойдор душвор мешавад”. Ин нишаст дар ҳоле баргузор мешавад, ки бино ба пешбиниҳои Бонки Ҷаҳонӣ иқтисоди Афғонистон 5,5 дар сад кам хоҳад шуд ва пандемия ҳам боиси бад шудани вазъи башарӣ дар кишвар мешавад. Вале мақомот мегӯянд, ки назар ба чор соли пеш, ҳоло эҳтимолан кӯмаки камтар дастрас шавад. Соли 2016 мизони ёриҳои байналмилалӣ ба Афғонистон, ки дар конфрони Брюссел мувофиқа шуда буд, барои солҳои 2017-2020 15,2 миллиард долларро ташкил дода буд.

Мошини журналисти Znak.com оташ зада шуд

Акс аз бойгонӣ

Афроди номаълум дар шаҳри Челябински Русия мошини як журналисти вебсайти хабарии мустақилро оташ заданд. Вебсайти Znak.com гуфт, ки хароб кардани мошини журналист Марина Малкова ба фаъолияти касбии ӯ рабт дорад. Ҳодиса шаби гузашта рух дод. Ба иттилои Znak.com, Малкова дар хона буд, ки ногаҳон садои баланди монанд ба таркишро шунид ва баъди он дид, ки мошинаш оташ гирифтааст. Дар наворҳои видеоӣ ду нафари ношиносе сабт шудаанд, ки аз макони сӯхтор фирор мекунанд. Нашрия гуфт, дар ҳоле, ки дар таваққуфгоҳ чанд мошини дигар ҳам истода буд, оташ гирифтани мошини журналист ба он маъност, ки он махсус мавриди ҳадаф қарор дода шуд. Малкова бо гузоришҳояш дар бораи фасод дар миёни мақомдорон ва кормандони ҳифзи қонун маъруф аст. Дар гузоришҳои ахири Малкова шеваи бархӯрди мақомот бо COVID-19 мавриди таҳқиқ қарор гирифтааст.

Раисони 6 шаҳру ноҳияи Тоҷикистонро иваз карданд

Кохи Миллат

Бино ба фармонҳои нави раиси ҷумҳури Тоҷикистон, ки рӯзи 24-уми ноябр нашр шуд, раисони шаш шаҳру ноҳия иваз шудаанд. Сабаби барканории аксари онҳоро "гузаштан ба вазифаи дигар" гуфтанд. Тағйироте, ки мухолифон ҳамвора танқид мекунанд ва онро бештар ҷойивазкунии кадрҳои кӯҳна меноманд.

Киҳо рафтанд:

  • Кишвар Шамиров аз вазифаи раиси шаҳри Хоруғ;
  • Акрам Сулаймонзода аз вазифаи раиси шаҳри Исфара;
  • Рустам Акрамзода аз вазифаи раиси ноҳияи Рӯдакӣ;
  • Нусратулло Аюбзода аз вазифаи раиси ноҳияи Шаҳринав;
  • Миралӣ Раҷабзода аз вазифаи раиси ноҳияи Файзобод;
  • Тоҳирхон Амиршозода аз вазифаи раиси ноҳияи Муъминободи вилояти Хатлон.

Киҳо омаданд:

Ширкати ҳавоии Австралия: Эҳтимол барои парвозҳои байналмилалӣ воксинаи зидди коронавирус талаб мешавад

Ҳавопаймои Boeing 787 аз Сидней дар Лондон фуруд омадааст

Раҳбари ширкати азими ҳавоии Австралия тахмин кард, ки ширкатҳои интиқолдиҳандаи бор дар ҷаҳон эҳтимолан баъди дастрас шудани воксинаҳои зидди коронавирус аз мусофирон талаб кунанд, ки ҳатман санади эмкуниро пешниҳод кунанд. Алан Ҷойс, раҳбари кулли ширкати Qantas рӯзи 23-юми ноябр гуфт, ки дар сурати ҷорӣ шудани чунин қарор онҳо низ онро иҷро хоҳанд кард. Ҷойс дар сӯҳбат бо телевизиони маҳаллӣ гуфт,

“Мо тағйироти қоидаву муқарраротро интизор ҳастем, то ки ба мусофирони парвозҳои байналмилалӣ бигӯем, ки пеш аз нишастан ба ҳавопаймо эм карда шаванд”. Ӯ гуфт, ки чунин тадбир барои меҳмонҳои аз хориҷа ба Австралия сафаркунанда ва ҳам барои ҳамватанонаш, ки ба хориҷа парвоз мекунанд, бисёр амри зарурӣ аст. Ҷойс гуфт, ки доштани “шиносномаи эмкунӣ” як таҷрибаи маъмулӣ хоҳад буд.

Тарс аз афзоиши олудашавӣ ба COVID-19 дар остонаи иди "Шукргузорӣ" дар ИМА

Иди "Шукргузорӣ" ҷашни миллии амрикоиҳо буда, онро дар ҳама хонаводаҳо, аз ҷумла президент Доналд Трамп ҳам таҷлил мекунанд. Муҳимтарин ороиши дастархони идона - мурғи марҷон мебошад

Бо вуҷуди ҳушдорҳои батакрори мақомот дар ИМА барои худдорӣ аз таҷлили ҷашни суннатии “Шукргузорӣ”, хатари нодида гирифта шудани ин даъватҳову афзоиши ҳодисаҳои олудашавӣ ба коронавирус вуҷуд дорад. Даҳҳо миллион амрикоиҳо мехоҳанд имсол ҳам ҷашнро дар ҳалқаи оилаву наздиконашон пешвоз гиранд. Дар қиёс бо ИМА, дар Мексикаи ҳамсоя бо сабаби пандемияи коронавирус калисои католикии Рум маросими азими зиёрати маконҳои муқаддаси динӣ дар Гваделупаро бекор кард.

Дар Олмон мақомоти маҳаллӣ маҳдудиятҳои амалкунандаро то 20-уми декабр тамдид карданд ва қарори ниҳоиро ҳукумати федеролӣ қабул мекунад. Қарор аст мавзӯи пандемия рӯзи 25-уми ноябр дар маркази таваҷҷӯҳи садри аъзам Ангела Меркел қарор гирад. Мақомоти Иттиҳоди Аврупо қаблан гуфтанд, тадбирҳои боздорандаи паҳншавии коронавирус дар Олмон “номутаносиб” аст. Дар ҳамин ҳол дар Фаронса, ки аз моҳи октябр бори дуюм чораҳои маҳдудкунанда ҷорӣ шуданд, интизор меравад, ки ҳодисаҳои олудашавиву бистаришавиҳои нав коҳиш меёбад. Рӯзи 24-уми ноябр президент Эммануэл Макрон суханронӣ мекунад ва эҳтимол дорад, ки дар бораи сабуктар шудани чораҳои боздорандаи пандемия дар остонаи ҷашни Милоди Масеҳ изҳорот бидиҳад.

Парвандаи як зан, ки 4 фарзандашро бӯғӣ кард, ба додгоҳи Хатлон рафт

Бинои Додгоҳи вилояти Хатлон.

Додгоҳи вилояти Хатлон ба баррасии парвандаи як зан, ки чаҳор фарзанди ноболиғашро тариқи бӯғӣ кардан ба ҳалокат расонд, оғоз мекунад. Ҳодисаи қатли ин чаҳор ноболиғ рӯзи 9-уми сентябри соли ҷорӣ дар ҷамоати Ориёни ноҳияи Кӯшониён рух дода буд.

Як масъули Додгоҳи вилояти Хатлон дар сӯҳбат бо Радиои Озодӣ гуфт, ки баррасии ин парванда рӯзи панҷшанбеи 26-уми ноябр оғоз мешавад. Ба гуфтаи манбаъ, нисбати Назокатхон Тоирова бо моддаи 104-и Кодекси ҷиноӣ, яъне "куштор" парванда боз шудааст. Таҳқиқотро додситонии вилоят анҷом дода, ба додгоҳ ирсол кардааст.

Дар пайи ин ҳодиса эҳтимол мерафт, ки ӯ бемории равонӣ аст. Аммо як мақом аз Додгоҳи вилояти Хатлон ба Радиои Озодӣ гуфт, ки ташхиси анҷомшуда бемории равонӣ доштани занро нагуфтааст, аммо тафсилоти бештарро бо оғози муҳокимаи додгоҳӣ дар миён мегузоранд. Баъзе аз равоншиносон гуфтанд, ки ин ҳодиса метавонад дар заминаи ошуфтагии сахт рух дода бошад.

Шавҳари ин зан дар сохтмон кор мекардааст ва рӯзи ҳодиса дар хона набудааст. Ба гуфтаи оноҳое, ки хонаводаро аз наздик мешиносанд, Назокатхон Тоирова ҷанҷоли оилавӣ надошт ва бемори равонӣ ҳам набуд.

Дар солҳои ахир чанд ҳодисае расонаӣ шуд, ки занон ҳамроҳ бо фарзандон қасд ба ҷони худ карданд. Моҳи августи имсол як зани 30-сола дар ноҳияи Рашт худ ва се кӯдакашро ба дарё партофта, худкушӣ кард. Кӯдакон 3, 6 ва 9-сола буданд.

Соли 2016 Зӯҳро Маҳмуродоваи 25-сола аз Норак худ ва чаҳор фарзандашро ба дарёи Вахш андохт, ки дар натиҷа ҳама ба ҳалокат расиданд. Пеш аз ин як модари ҷавон дар ноҳияи Вахш ҳамроҳ бо се тифли хурдсолаш кӯшиши худкушӣ карда, худ наҷот ёфт, вале боис ба ҳалокати се кӯдакаш шуд.

Киштии чинӣ барои омӯзиши қишри Моҳ ба кайҳон рафт

Парчамҳои коммунистӣ дар роҳ ба Истгоҳи кайҳонии Венчанг, воқеъ дар вилояти Ҳайнан қомат афрохтаанд. Аз ин истгоҳ субҳи 24-уми ноябр киштие барои омӯзиши қишри Моҳ ба кайҳон фиристода шуд

Рӯзи 24-уми ноябр Чин як киштии бесарнишинро ба кайҳон фиристод, то намунаҳое аз қишри Моҳро барои таҳқиқ биёрад. Истгоҳи "Чанъэ-5" бомуваффақият аз киштӣ ҷудо шуда ба мадори Замин ворид шуд. Интизор меравад, ки ковишгар ё киштии таҳқиқотии кайҳонӣ рӯзи якшанбе дар рӯи Моҳ фуруд меояд. Дар давоми ду ҳафта ковишгар бо ҷамъоварии намунаҳои хоку санги “Уқёнуси тӯфон” машғул мешавад, ки онро донишмандон баҳри азимтарин дар қишри Моҳ меноманд ва он дар қисмати дидашавандаи он ҷойгир аст. Қаблан ин ноҳияи Моҳ таҳқиқ нашуда буд.

Дар сурати анҷоми муваффақиятомези ин ҳайат, Чин дар 44 соли охир аввалин кишваре хоҳад буд, ки тарҳи интиқоли намунаҳои геологии қишри рӯи Моҳро анҷом медиҳад. Дар гузашта чунин корҳоро ИМА ва Иттиҳоди Шӯравӣ анҷом додаанд. NASA – оҷонсии кайҳоннавардии ИМА изҳори умедворӣ кард, ки Чин дар поёни маъмурияти "Чанъэ-5" маълумоти бадастомадаро бо онҳо низ дар миён мегузорад.

Дар Қирғизистон зидди ислоҳоти Конститутсия имзо ҷамъ меоранд

Бишкек, Қирғизистон. 22 ноябри соли 2020.

Дар Қирғизистон зидди қабули тарҳи нави Конститутсия имзо ҷамъ меоранд. Дар ин бора рӯзи 23 ноябр ташаббускорони ҷамъоварии имзо хабар доданд.

Ҷамъоварии имзо дар сомонаи www.stop-referendum-kg.com сурат мегирад.

Ташаббускорон гуфтанд, тасмим доранд, ҳадди ақал 500 ҳазор имзо ҷамъ оваранд ва ба ин тартиб, қонун дар бораи баргузории ислоҳот ва интихоботи порлумониро бозхонд кунанд.

"Агар ҳоло мо ба ислоҳоти конститутсионӣ роҳ диҳем, пас баъди чанд сол дубора ба ин масир бармегардем. Ва Қирғизистон бори дигар вориди табаддулоти давлатӣ мешавад", - гуфт Сания Токтоғозиева, ҳуқуқшинос ва коршиноси қонунгузории конститутсионӣ дар Қирғизистон.

Порлумони Қирғизистон рӯзи 17 ноябр тарҳи нави Қонуни асосиро дар баррасии умум гузошт. 80 вакили порлумон қонуни мазкурро дар бораи ворид кардани ислоҳот ба Конститутсияро пешниҳод кардаанд. Аммо муаллифи тарҳи қонун то кунун номаълум аст.

Дар тарҳи нави Конститутсияи Қирғизистон салоҳиятҳои президент васеътар шуда, курултойи мардумӣ ҳамчун шохаи ҳокимият ба эътибор гирифта шудааст. Президент раиси давлат буда, ҳукумати иҷроияро идора мекунад ва сиёсати дохиливу хориҷиро муайян месозад, омадааст дар тарҳи нав. Президент метавонад, ду давраи панҷсола интихоб шавад, сохтор ва ҳайати ҳукуматро муайян созад. Шумори вакилон дар тарҳи нави Қонуни асосии Қирғизистон аз 120 нафар ба 90 кас оварда шудааст.

Ҷомеи Қирғизистон аз ин тарҳ розӣ нест ва онро ҷамъоварии қудрат дар дасти як нафар унвон мекунад. Рӯзи 22 ноябр садҳо сокин дар шаҳри Бишкек ба кӯча баромада, зидди тарҳи нав эътироз карданд.

Роҳбари ҳизби "Ота Макон": Қарори додгоҳ дар бораи маҳрум кардани ман аз вакилӣ сиёсист

Омурбек Текебоев, раиси ҳизби "Ота Макон".

Додгоҳи ноҳияи Якуми майи шаҳри Бишкеки Қирғизистон рӯзи 23 ноябр даъвои фаъоли шаҳрвандӣ Темирлан Ормуковро дар бораи бекор кардани мандати вакилии Омурбек Текебоев қонеъ кард.

Ин иттилоъро Омурбек Текебоев, раиси ҳизби "Ота Макон" тасдиқ кард. Текебоев гуфт, ки ин қарор сиёсист. "Бояд бигӯям, ки ин қарор сиёсист. Ҳолатҳое буд, ки роҳбарияти имрӯзаи кишвар дар пеши чашми роҳбарони фраксияҳои дигари порлумонӣ маро тарс медоданд, мегуфтанд, ки "даркор шавад, мандататро мегирем". Додгоҳҳо ҳамон фармоишҳои сиёсиро иҷро мекунанд", - гуфт Текебов.

Комисияи марказии интихоботии Қирғизистон ин хабарро ҳоло шарҳ надодааст.

Мандати вакилӣ ба раиси ҳизби "Ота Макон" рӯзи 15 октябри соли 2020 дода шуд. Он замон намояндаи ҳизб дар порлумон Содиқ Шерниёз аз мандат даст кашид ва ба ин тартиб, Текебоев ба порлумон роҳ ёфт.

Текебоев дар соли 2017 бо айби фасодкорӣ 8 сол зиндонӣ шуд. Додгоҳ моҳи августи соли 2019 ӯро аз зиндон ба ҳабси хонагӣ фиристод.

Барканории мудири мактаб дар Андиҷон баъди бо либоси тунук ба кӯча баровардани хонандагон

Мактаби рақами 43-и Андиҷон.

Дар шаҳри Андиҷони Узбекистон мудир ва муовини мудири мактаби №43 баъди он аз мақом барканор шуданд, ки хонандагонро дар ҳавои сард бо либоси тунук барои афроштани парчам ба кӯча бароварданд.

Дар бораи барканории мудир ва муовинаш рӯзи 23 ноябр Раёсати маорифи халқии вилояти Андиҷони Узбекистон хабар дод.

Дар хабари Раёсат омадааст, ки ҳодиса ба кӯча баровардани хонандагон рӯзи 19 ноябр сурат гирифтааст.

Гуруҳи корие, ки барои таҳқиқи ҳодисаи мазкур ташкил шудааст, хабар дод, кӯдакон ҳамагӣ 2-3 дақиқа дар берун қарор доштанд ва баъдан ба синфхонаҳо даромаданд.

Дар хабари расмӣ омадааст, ки волидон нисбати ин ҳодиса эътирозе накардаанд.

Аммо сарфи назар аз ин, мудир ва муовини мудири мактаби №43 аз мақом барканор шуданд.

Рӯзи 22 ноябр дар шабакаҳои иҷтимоӣ аксе нашр шуд, ки дар он хонандагон бо парчамҳои Узбекистон ва бо либоси нисбатан тунук дар ҳавои сард дар берун қарор доштанд. Дар канори хонандагон мардон ва заноне ҳам дида мешуданд, ки дар тан либоси зимистонӣ доштанд.

Ба ҳайати Украина иҷозат нашуд, бо сарвазири Қазоқистон мулоқот кунад 

Сарвазири Қазоқистон. Акс аз бойгонӣ.

Ҳайати ҳукумати Украина ба раҳбарии вазири зербиноии ин кишвар Владислав Криклий, ки дар доираи як сафар вориди шаҳри Нурсултон шуданд, натавонистанд бо сарвазири Қазоқистон Аскар Мамин мулоқот кунанд.

"Барои таъмини амнияти иштирокдорони вохӯриҳо дар шароити пандемия риояи қоидаҳои беҳдоштӣ, аз ҷумла доштани маълумотнома дар бораи мубтало нашудан ба коронавирус зарур аст. Бинобар ин, сарвазири Қазоқистон Аскар Мамин ба далели он ки муҳлати маълумотномаи ҳайати Украина дар мавриди мубтало набудан ба вирус сипарӣ шуда буд, натавонист бо Владислав Криклий мулоқот кунад",-иттилоъ додааст хадамоти матбуотии ҳукумати Украина.

Владислав Криклий бори нахуст нимаи аввали моҳи ноябр ба Қазоқистон рафта буд. Он замон миёни вазоратхонаҳои саноат ва зербиноии Қазоқистону Украина ёддошти ҳамкорӣ имзо шуда буд. Мулоқоти ӯ бо сарвазири Қазоқистон бояд 12 ноябр баргузор мешуд, вале ҳайати Украинаро ба ҷои сарвазир муовини ӯ Роман Скляр ба ҳузур пазируфт.

​Криклий ва атрофиёнаш гуфтанд, бо назардошти ин ки мулоқоти онҳо бо Аскар Мамин 10 ноябр баргузор мешавад, 6 ноябр аз санҷиши коронавирус гузаштанд. Вале баъди ворид шудани ҳайат ба Қазоқистон мулоқот ба рӯзи 12 ноябр гузошта шуд ва бинобар ин, муҳлати санҷиш аз вирус сипарӣ гашт.

Вазорат гуфт, рӯзи гузашта дар Тоҷикистон касе аз КОВИД-19 нафавтидааст

Дохили яке аз мошинҳои Ёрии таъҷилӣ дар Душанбе

Вазорати тандурустии Тоҷикистон рӯзи 23-уми ноябр эълон кард, ки шумораи афроди фавтида бар асари сироят ба коронавирус тағйир наёфтааст ва ин ниҳод сабаби марги танҳо 86 нафарро аз вируси нав тасдиқ мекунад.

Коршиносон ба омори расмӣ бовар надоранд ва мегӯянд, теъдоди фавтидаҳо ба маротиб бештар аст.

Ба иттилои расмӣ, дар шабонарӯзи охир дар Тоҷикистон 38 нафар ба бемории COVID-19 гирифтор шудаанд. Вазорати тандурустӣ гуфт, дар умум омори беморон то 23-уми ноябр ба 11 ҳазору 932 нафар расидааст. Ба иддаои Вазорати тандурустии Тоҷикистон, аз замони эътирофи мавҷудияти коронавируси нав дар кишвар беш аз 94 дарсади беморон шифо ёфтаанд. Аммо муттахасисон омори расмиро дар бораи беморони коронавируси нав ва маргу мир аз он дар Тоҷикистон зери шубҳа мегузоранд. Онҳо мегӯянд, миқёси беморӣ ва фавти одамон метавонад аз маълумоти расмӣ ба маротиб бештар бошад.

Дар Қирғизистон тарҳи Сарқонуни навро зидди ҳуқуқи инсон номиданд

Раҳпаймоии зидди лоиҳаи нави Қонуни асосии Қирғизисттон дар Бишкек. 22 ноябри соли 2020

Сардори Маркази пажӯҳишҳои башарии Академияи миллии улуми Қирғизистон Чопон Койчуманова 23 ноябр дар ҷаласаи Маҷлиси конститутсионӣ банди 23-и лоиҳаи Қонуни асосии нави ин кишварро ба баҳс кашид.

Дар ин банд омадааст, "фаъолияти расонаҳо, аз ҷумла чопӣ, электронӣ, телевизионӣ ва чорабиниҳои ҷамъиятие, ки хилофи арзишҳои ахлоқии эътирофшудаи умум, анъанаҳои мардуми Қирғизистон ва меъёрҳои байналмилалӣ мебошанд, манъ аст".

"Ҳар кас мафҳуми арзиш ва анъанаро ҳар хел мефаҳмад. Имрӯз кӣ муайян мекунад, ки арзишҳо ва анъанаҳо кадоманд? Онҳоро бояд дар қонун ҷой дод, вале ин корро касе намекунад, зеро арзишҳову анъанаҳо гуногунанд. Бар асоси ин банд, дилхоҳ одамеро, ки суханҳояш писанд намеоянд, метавон ба ҷавобгарӣ кашид. Ҷомеа ин бандро интиқод дорад. Он ихтилофҳои бузургеро ба бор хоҳад овард. Инҷо нақзи бузурги ҳуқуқи инсон мушоҳида мешавад", - изҳор дошт сардори марказ.

Иҷрокунандаи вазифаҳои президенти Қирғизистон Талант Мамитов 20 ноябр бо имзои фармоне Маҷлиси конститутсиониро таъсис дод. Онро мудири кафедраи ҳуқуқи конститутсионӣ ва байналмилалии Донишгоҳи словянии Қирғизистону Русия Бекбосун Борубашев раҳбарӣ мекунад.

Лоиҳаҳои Конститутсияи нав ва қонуни таъйини раъйпурсӣ дар рӯзи 10 январро сомонаи порлумони Қирғизистон 17 ноябр нашр кард. Лоиҳаи қонун баъди як моҳи баррасии умум ба порлумон пешниҳод мешавад.

Дар Конститутсияи нав салоҳиятҳои президент бештар ва таъсис шӯрои мардумӣ пешбинӣ шудааст. Тибқи он, президент раҳбари давлат ва мақомоти иҷроия аст.

Ду мансабдори баландпояи ҳукумати Ёвонро боздошт кардаанд

Даромадгоҳ ба ноҳияи Ёвон

Ду мансабдори баландпояи ҳукумати ноҳияи Ёвони вилояти Хатлон бо гумони даст доштан дар "хилофкорӣ ва тақсими нодурусти қитъаи замин барои бунёди манзили зист" боздошт шудаанд.

Қарори боздошти Аскар Набизода, муовини раиси ноҳияи Ёвон ва Хайриддин Саидмуродзода, роҳбари Идораи замини ин ноҳия пас аз санҷиши додситонии вилояти Хатлон содир шудааст.

Назари пайвандони боздоштшудаҳо маълум нест ва гуноҳи онҳо ҳанӯз исбот нашудааст.

Ду ҳамсуҳбати Радиои Озодӣ дар ҳукумати Ёвон рӯзи 23-юми ноябр ба ҳабси пешакӣ гирифта шудани ин ду мақомдорро тасдиқ карданд.

Ба гуфтаи онҳо, қабл аз ин, як ҳайат аз мақомоти додситонӣ дар вилояти Хатлон ба тафтиши қонунгузорӣ дар робита ба тақсиму ҳуҷатгузории замин ба ҳукумати Ёвон омада буданд.

"Дар маҷлиси охири ҳукумати ноҳия эълон карданд, ки Аскар Набизода бинобар талаботи ҷойивазкунии кадрҳо (ротатсия) аз вазифаи муовини раиси ноҳия сабукдӯш карда шуд. Хайриддин Саидмуродзода низ дар маҷлисҳо ҳузур надорад, чун гуфта мешавад, ӯ дар рухсатии меҳнатист", ‑‑афзуд ҳамсуҳбати мо.

Ба гуфтаи онҳо, Аскар Набизода ва Хайриддин Саидмурозода тақрибан ду ҳафта пеш боздошт шудаанд.

Дар Додситонии вилояти Хатлон аз ифшои ҷузъиёти боздошти ин ду мансабдор ба далели халал ворид нашудан ба тафтишот худдорӣ варзиданд.

Боздошти ин ду мансабдори ноҳияи Ёвон дар ҳолест, ки солҳои охир ҳодисаҳои ришватхорӣ ҳангоми тақсими замин ва хилофкориҳо дар ин замина афзоиш ёфтаанд.

Президенти Тоҷикистон ду сол қабл дар як суханронӣ аз афзоиши ҳолатҳои заминфурӯшии мансабдорон изҳори нигаронӣ карда, гуфта буд, ки ин мушкил ба "як дарди бедаво" табдил шудааст. Ба назар мерасад, ин таъкид таъсир надошт, ки шумори парвандаҳои заминфурӯшӣ ҳамоно рӯ ба афзоиш аст.

Сокинони Тоҷикистон мегӯянд, тамаъҷӯии мансабдорон зиёдтар аз ҳама ҳангоми тақсими замин барои бунёди хона ва замин барои кишоварзӣ рух дода, рӯзгори онҳоро табоҳ кардааст.

Созмони ҳамкориҳои иқтисодӣ ва рушд (OCED) ҳам дар гузориши охирини худ дар робита ба муборизаи зидди коррупсия дар Тоҷикистон менависад, "хавфи аз ҳама зиёди ришватхорӣ дар ҷараёни тақсими порчаҳои замин вуҷуд дорад".

Кумитаи давлатии замин мегӯяд, дар давоми 28 соли истиқлол бо қарорҳои ҳукумат ҳудуди 130 ҳазор гектар заминро барои бунёди манзилҳои истиқоматӣ ба як миллиону 400 ҳазор оила тақсим кардааст.

Дар Маскав ҳайкали Иосиф Кобзонро месозанд. Ба 52 млн рубл

Аз чап ба рост: сароянда Иосиф Кобзон ва президенти Русия Владимир Путин, акс аз соли 2017

Шаҳрдории Москва мехоҳад, бо харҷи 52 миллион рубл муҷассамаи овозхони замони Шӯравӣ, арбоби ҷамъиятӣ, ҳунарманди мардумии Иттиҳоди Шӯравӣ Иосиф Кобзонро дар маркази пойтахти Русия насб кунад.

Нақшаи насби пайкараи ҳунармандро раиси комиссияи Маҷлиси шаҳрии Москва дар умури фарҳангӣ ва иртибототи умум Евгений Герасимов дар суҳбат бо "Эхо Москава" тасдиқ кард.

Ба гуфтаи вакили маҷлиси ноҳиявии Твер ва раиси кумитаи сохтмони давлатӣ Кетеван Хараизде гуфт, тасмими ниҳоии бунёди муҷассама аз натиҷаи раъйгирӣ дар шӯрои вакилони ноҳияи Твер вобастааст.

Дар баробари овозхонӣ, Кобзон ҳамчунин дар Донишгоҳи омӯзгории мусиқӣ дарс мегуфт. Ӯ соли 1990 намояндаи мардумӣ дар Шӯрои олии СССР ва аз соли 1997 депутати Думаи давлатии Русия буд.

Моҳи марти соли 2014 Кобзон бо иншои як муроҷиатнома ба шахсиятҳои фарҳангӣ аз сиёсати Владимир Путин дар робита ба Қрим пуштибонӣ намуд ва борҳо ба ҷумҳуриҳои худхондаи Донетск ва Луҳанск сафар ва аз ҷудоиталабии онҳо ошкоро ҳимоят кард.

Ӯ охирҳои моҳи августи соли 2018 дар 81-солагӣ фавтид. Соли 2005 табибон дар ҷисми Кобзон бемории саратонро ташхис карда буданд.

Дар Чита додгоҳи сарбозе шурӯъ шуд, ки 8 ҳамхидматашро куштааст

Рамил Шамсуддинов дар додгоҳи Чита

Дар шаҳри Читаи минтақаи Сибири Русия мурофиаи додгоҳии сарбозе шурӯъ шуд, ки моҳи октябри соли 2019 ҳашт ҳамхидматашро дар як қисми ҳарбии минтақаи Забайкале аз тири туфанг ба қатл расонид. Рамил Шамсуддинов дар он муттаҳам мешавад, ки дар ҳодисаи рӯзи 25-уми октябри порсол ҳашт нафар, аз ҷумла ду афсарро ба қатл расонд. Шамсуддинов баъдан ба тафтишот гуфт, ки ӯро дар хидмат азият мекарданд. Дар вазорати дифоъ баъдан тасдиқ карданд, ки воқеан ҳам яке аз афсарон ин сарбозро озор медод ва бар асоси ин аз рӯи моддаи “меҳтарсолорӣ” (ба русӣ “дедовшина”) парванда боз карданд. Рӯзи 23-юми сентябр дар Кумитаи тафтишоти Русия гуфтанд, ки Рамил Шамсуддинов дар куштори ҳамхидматҳои худ иқрор шудааст. Вакилонаш гуфтанд, ки куштор дар ҳолати аффект ваё асабонияти шадиде, ки берун аз назорат мемонад, анҷом шудааст.

Рӯзи 23-юми ноябр инчунин ба як сарбози дигаре, ки дар марги се нафар ҳамхидматаш гумонбар мешавад, айб эълон шуд. Антон Макаров дар он гунаҳгор мешавад, ки дар фурудгоҳи низомии Воронеж аввал силоҳро дуздида баъдан чанд нафарро куштааст. Дар вазорати дифоъ гуфтанд, ки ин куштор ҳам дар ҳолати асабонияти шадид рух додааст, вале вуҷуди азияту озори сарбозро эътироф накарданд.

Матбуот: Нетаняҳу пинҳонӣ ба Арабистони Саудӣ сафар кард

Нахуствазири Исроил Бенямин Нетаняҳу

Чандин матбуоти исроилӣ хабар доданд, ки нахуствазири кишвар Бенямин Нетаняҳу рӯзи 22-юми ноябр ба таври пинҳонӣ ба Арабистони Саудӣ сафар карда, бо раҳбари воқеии ин кишвар ва ҳам котиби давлатии ИМА Майк Помпео, ки дар ин кишвар меҳмон буд, дидан кардааст. Телевизиони давлатии “Kan”-и Исроил рӯзи 23-юми ноябр бо такя ба мақомоти беном хабар дод, ки Нетаняҳу ва раҳбари оҷонсии иктишофии “Моссад” Ёсӣ Коҳен бо шоҳзода Муҳаммад Бин Салмон ва дипломати аршади амрикоӣ дар шаҳри Неоми Арабистони Саудӣ, ки дар соҳилҳои баҳри Сурх ҷойгир аст, дидору гуфтугӯ анҷом дод. Ин хабарро чандин матбуоти дигар ҳам нашр кардааст. Дафтари Нетаняҳу ва сафорати ИМА дар Байтулмуқаддас барои шарҳи ин хабар дастрас набуданд. Агар ин хабар ҳақиқат дошта бошад, пас ин аввалин сафари нахуствазири Исроил ба Арабистони Саудӣ мебошад. Мулоқоти мазкур дар ҳоле баргузор мешавад, ки Исроил чанде пеш созиши таърихии оддӣ шудани муносибатҳо бо ду кишвари муттафиқи Саудия дар минтақаи Халиҷи Форс – Имороти Муттаҳидаи Арабӣ ва Баҳрайнро имзо кард. Нақши миёнҷиро дар ин муносибатҳо маъмурияти президенти ИМА Доналд Трамп иҷро кардааст.

Ин таҳаввулот дар ҳолест, ки аксар кишварҳои минтақа дар қиболи Эрон мавзеи муштарак доранд. Арабистони Саудӣ ба таври ошкор гуфтааст, ки ба қавлаш дар баробари Лигаи кишварҳои араб пойбанд мемонад, ки то замони ҳал шудани низоъ дар Фаластин бо Исроил наздик нахоҳад шуд. Бо ин вуҷуд, саудиҳо ба ҳавопаймоҳои исроилӣ иҷоза доданд, ки аз ҳарими ҳавоии онҳо убур кунанд.

Воксинаи ширкати AstraZeneca  зидди COVID-19  90 % муфид будааст

Озмоишгоҳи назди донишгоҳи Оксфорди Бритониё

Ширкати AstraZeneca гуфт, озмоишҳои воксинаи нави ин ширкат дар муқобили COVID-19 90 дарсад муассир будааст. Ин озмоишҳо дар Бритониё, дар назди донишгоҳи Оксфорд ба роҳ монда шудаанд. Ин натиҷаҳо дар ҳоле эълон мешаванд, ки дар ҷаҳон шумори олудашудаҳо ба коронавирус аз 58 миллион нафар гузашта 1,4 миллион нафар ҷон додаанд. Хабари мазкур дар ҳоле нашр мешавад, ки дар ИМА рақибони донишмандони бритониёӣ аз ширкатҳои Pfizer ва Moderna дар бораи муассирияти 90 дарсадии воксинаҳои сохтаи онҳо хабар доданд. Ба марҳилаи ниҳоии озмоишҳо ширкатҳои дигари мисли Johnson & Johnson ва Sanofi-GSK ҳам наздик мешаванд.

Русияву Чин гуфтанд, ки воксинаҳои худро пешниҳод мекунанд, вале дар заминаи амният ва муассирияти онҳо ҳанӯз суол зиёд аст. Мутахассисони тиб дар ҷаҳон мегӯянд, ки барои мубориза бо COVID-19 воксинаи зиёд лозим мешавад.

Барқкушӣ ба соҳибкорони Узбекистон даҳҳо ҳазор доллар зиён овардааст

Симҳои барқ. Акс аз бойгонӣ.

Дар ноҳияи Яккабоғи вилояти Қашқадарёи Узбекистон дар пайи се рӯзи хомӯш кардани неруи барқ 6 ҳазор мурғи як соҳибкори маҳаллӣ талаф шудааст.

Дар ноҳияи Каттақурғони вилояти Самарқанди он кишвар як кишоварз ба далели сармо задани ниҳолҳои гармхонааш 35 ҳазор доллар зиён дидааст. Дар ин бора корбарони шабакаҳои иҷтимоӣ дар Узбекистон рӯзи 22 ноябр хабар додаанд.

Блогнависи узбекистонӣ Комил Фахриддинов хабар дод, ки аз 18 то 20 ноябр дар ноҳияи Яккабоғ неруи барқро хомӯш кардаанд. Дар натиҷа 6 ҳазор чӯҷаи мурғи соҳибкор Абдунабӣ Ғиёсов талаф ёфтааст.

Корбарони шабакаҳои иҷтимоӣ ҳамчунин аз хомӯш шудани неруи барқ дар зоишгоҳ ё таваллудхонаи ноҳияи Тошканди вилояти Тошканд хабар дода, онро танқид карданд.

Вазорати энержии Узбекистон мегӯяд, ки дар натиҷаи фаро расидани сардиҳо талабот ба неруи барқ афзуда ва ин боиси аз кор мондани хатҳои барқ шудааст.

Байден ёвари собиқадори худ Энтони Блинкенро ба мақоми Котиби давлатӣ баргузид

Энтони Блинкен дар сурати мувофиқати Сенат дар ҳукумати президенти мунтахаб Ҷо Байден Котиби давлатии ИМА мешавад

Матбуоти амрикоӣ рӯзи 22-юми ноябр хабар дод, ки президенти мунтахаб Ҷо Байден ёвари дарозмуддати худ ва дипломати собиқадор Энтони Блинкенро ба мақоми котиби давлатии ИМА баргузидааст. Дар сурати мувофиқати Сенат, Блинкен масъули таҳрири сиёсати хориҷии ИМА бо ҷаҳон баъди сиёсати чорсолаи Трамп мешавад, ки гуфта буд, “Амрико дар ҷои аввал аст”. Ин сиёсат боиси то ҷое фосила гирифтани ИМА аз шарикони байналмилалӣ, ихтилофҳои дидгоҳӣ ва ҳам то ҷое ба рақобат бо шарикони суннатии худ гузаштани Вашингтон гардид. Эълони исми номзади курсии котиби давлатии ИМА рӯзи 24-уми ноябр сурат мегирад. Дар миёни номзадҳо ба мақомҳои дигар исми Ҷейк Салливан, ки як ёвари наздики собиқ котиби давлатӣ Ҳилларӣ Клинтон буд, ба мақоми мушовири амнияти миллӣ пешниҳод шудааст. Корҳо дар самти таъини мақомдорони ҳукумати ояндаи ИМА дар ҳоле идома доранд, ки президент Доналд Трамп то ҳол талош дорад натиҷаҳои овоздҳии 3-юми ноябрро бозбинӣ бикунад ва дар ҷараёни марҳилаи гузариш, ки аз рӯи қонун тақозо мешавад, бо тими Байден ҳамкорӣ намекунад.

Душанбе дар соли 2021 пойтахти фарҳангии ИДМ хоҳад буд

Маркази Душанбе

Душанбе дар соли 2021 пойтахти фарҳангии Иттиҳоди давлатҳои мустақил эълон шуд ва ин мақоми рамзӣ ба пойтахти Тоҷикистон аз Шимкенти Қазоқистон гузашт. Дар маросими ба Душанбе эъто шудани мақоми пойтахти фарҳангӣ, ки бо сабаби пандемия ба таври онлайнӣ баргузор шуд, шаҳрдори Шимкент Мурат Айтенов тугмаи рамзии пойтахти фарҳангии ИДМ-ро ба раиси шаҳри Душанбе Рустами Эмомалӣ тақдим кард. Дар маросиме, ки ҳафтаи гузашта баргузор шуд, консули генералии Тоҷикистон дар Алмаато Баҳодур Назир аз номи шаҳрдори Душанбе инчунин корвони рамзиро бо 2200 китоб ва 2200 пиёзаки гули лола қабул кард, ки рамзи аз роҳи Абрешим гузар карда ба Душанбе рафтани он мебошад. Дар чаҳорчӯби соли рамзии пойтахти фарҳангии ИДМ будани Душанбе қарор аст дар пойтахти Тоҷикистон барномаҳои зиёд, аз ҷумла, сафарҳои ҳунарии театрҳову ҳунармандон, намоишгоҳу муаррифии китобҳо ва дигар маъракаҳо ташкил шавад.

Эълони Душанбе ба унвони пойтахти фарҳангии ИДМ дар ҳолест, ки Тоҷикистон ва дигар ҳама кишварҳои ИДМ дар ҳолати пандемияи коронавирус қарор доранд ва ҳамарӯза дар Тоҷикистон каму беш 40 нафар ба вирус олуда мешавад. Омори расмии гирифторӣ дар кишварҳои дигари ИДМ ба маротиб бештар аст ва маълум нест, ки оё барномаҳои фарҳангиву ҳунарии соли 2021-ро шаҳрдории Душанбе ба чӣ шакл роҳандозӣ мекунад.

Пойтахти фарҳангии ИДМ эълон шудани ин ё он шаҳри кишварҳои узв тағйири ҷиддие дар эътибори ин шаҳрҳо ба бор намеорад, вале барои Шимкент ин унвон вижагие дошт, ки он ҳамчун яке аз шаҳрҳои қаторӣ дар соли 2020 ба пойтахти як бахши аъзами Ҷануби Қазоқистон табдил ёфт. Гумон намеравад, ин унвон ба ҷойгоҳи Душанбе, ки пойтахти яке аз давлатҳои узви ИДМ аст, таъсири амиқе гузорад.

ИДМ як созмони дигари зери назари Русия буда, баъди пошхӯрии Иттиҳоди Шӯравӣ дар соли 1991 таъсис шуд. Ба узвияти он Русия, Арманистон, Озарбойҷон, Беларус, Қазоқистон, Қирғизистон, Тоҷикистон, Молдова ва Узбекистон шомил ҳастанд. Ҷумҳуриҳои дигари шӯравии собиқ, мисли Украинаву Гурҷистон бо далели фосилагирӣ аз сиёсати Маскав ва тамоюл ба Ғарб дар солҳои мухталиф аз узвияти ин созмон берун шудаанд.

Ёфтҳои бештар

XS
SM
MD
LG