CNN: Трамп аз раёсати ҷумҳури якумрӣ дар Чин "ситоиш кард"

Доналд Трамп, раиси ҷумҳури Амрико, аз иқдоми Ҳизби коммунисти Чин барои бе маҳдудият дар сари қудрат боқӣ гузоштани Сӣ Ҷинпин, президенти кунунии он кишвар, ситоиш кардааст. Бар асоси як навори садоӣ, ки аз тарафи телевизиони CNN пахш шуд, Трамп гуфтааст, "ҳоло Сӣ Ҷинпин раиси ҷумҳури абадист. Раиси ҷумҳури модомулумр. Ӯ шахсияте бузург аст."

Вай афзудааст, "бибинед, ӯ ба ин кор муваффақ шуд. Ба назарам, кори бузурге аст. Шояд мо ҳам рӯзе инро имтиҳон кунем." Пас аз ин ҷумлаҳо садои ханда ва даст задани ҳозирон шунида мешавад.

CNN мегӯяд, ки ин навори садоиро аз нишасти паси дарҳои баста дар аёлати Флорида ба даст овард. Ин нишаст рӯзи 3-юми март баргузор шуд.

То кунун Кохи Сафед ва манобеи дигари хабарӣ дар мавриди дурустӣ ё нодурустии ин сабт чизе нагуфтаанд. Рӯшан нест, ки гапҳои Доналд Трамп ба сурати нуқтаи назари ӯ баён шудааст, ё хайр. Шуморе аз расонаҳои амрикоӣ гуфтаанд, Кохи Сафед ҳанӯз ба дархости онҳо барои изҳори назар дар бораи ин сабт посух надодааст.

Сӣ Ҷинпин соли 2012 раҳбари Ҳизби коммунисти Чин интихоб шуд ва пас аз як соли он ба курсии раёсати ҷумҳурӣ нишаст. Чанде пеш Ҳизби коммунисти Чин ӯро дубора, барои як панҷсолаи дигар, раиси ҷумҳур интихоб кард.

Охири моҳи феврали имсол Ҳизби коммунисти Чин хостори ислоҳи Қонуни асосии ин кишвар шуд, то замони президентӣ ба ду давраи панҷсола маҳдуд набошад. Дар сурати амалӣ шудани ин тарҳ Си Ҷинпин, президенти кунунии Чин метавонад баъд аз соли 2023, яъне панҷ соли дигар, ҳамчунон дар қудрат боқӣ бимонад. Бар асоси қонуни феълии Чин, президент ва муовинаш фақат метавонанд ду давраи пайдарпай ифои вазифа кунанд.

Аз Сӣ Ҷинпин ба унвони як сиёсатмадори оянданигар ёд мекунанд, ки тарҳҳои зиёдеро рӯи даст дорад ва аз ҷумла мехоҳад, то соли 2020 фақрро аз байн барад. Ҳамчунин, ӯ мехоҳад тарҳҳои нави тиҷоратиро роҳандозӣ кунад. Раиси ҷумҳури кунунии Чин аз замони ба қудрат расидан, муборизаи сахтеро бо фасоди молӣ дар пеш гирифтааст.

Аммо Чин аз сӯи ҷомеаи ҷаҳонӣ барои нақзи озодиҳои баён ва ақида, фишор ба рӯзноманигорон, интернет ва ҷомеаи шаҳрвандӣ пайваста интиқод мешавад.

Чин, ки яке аз густурдатарин шабакаҳои сонсури шабакаҳои маҷозӣ дар ҷаҳонро доро аст, ба саркӯби мухолифон, вакилони дифои зиндониёи эътиқодӣ ва сиёсӣ, маҳдуд кардани озодиҳои мазҳабӣ ва ҳамчунин дахолат дар умури бархе кишварҳо, аз ҷумла Тайван, муттаҳам аст.