Айбдоршавандаи парвандаи ҳамлаи киберӣ ба шабакаи интернетии Yahoo Карим Баротов, зодаи Қазоқистон, ки дар ҳамдастӣ бо мақомоти махсуси Русия айбдор мешавад, 5 апрел аз додгоҳи Канада хост, то дар ивази гарав озод карда шавад.
Додситонӣ ин пешниҳодро қабул накард, зеро, ба гуфта додситонӣ, Карим Баротов баъди озод шудан метавонад фирор кунад. Вакилони Баротов гуфтанд, волидони айбдоршаванда омодаанд, гаравпулӣ бигзоранд. Падари Карим Баротов Ахмет Токбергенов гуфт, агар додгоҳ талаб дорад, омодааст, ки интернети манзилашро қатъ кунад.
Карим Баротови 22 сола гуфт, соли 2014 тиҷорати интернетӣ ба роҳ монда, ҳамон сол аз ин тиҷорат 81 ҳазор доллар даромад доштааст.
Ба ақидаи додситонӣ, Баротов ба ҳайси рахнагар аз сӯи ҷосусони Хадамоти амнияти федеролии Русия Игор Сушин ва Дмитрий Докучаев киро шудааст. Сушин ва Докучаев низ дар доираи ин парванда айбдор шудаанд.
Баротов, зодаи Қазоқистон соли 2007 ба Канада рафт ва соли 2011 шаҳрвандии ин кишварро дарёфт кард. Вай моҳи гузашта боздошт шуд ва эҳтимоли истирдодаш ба ИМА зиёд аст.
