Шон Спайсер, аз дастёрони аршади Доналд Трамп – президенти мунтахаби Амрико – хабарҳоро дар бораи барномаи дидори ӯ бо раиси ҷумҳури Русия Владимир Путин дар Исландия рад кард. Нашрияи Sunday Times ба тозагӣ дар гузорише ба нақл аз мақомҳои бритониёӣ гуфт, Доналд Трамп баъди оғози кор ба унвони президенти Амрико қасд дорад дар нахустин сафари хориҷиаш дар нишасте дар Исландия иштирок ва бо Владимир Путин дидор кунад. Шон Спайсер, ки қарор аст, дар давлати оқои Трамп нақши сухангӯи Кохи Сафедро ифо кунад, 14 январ дар вокуниш дар Твиттери худ навишт, "дуруст нест. Ин гузориш сад дар сад ҷаълист." Як дастёри дигари Доналд Трамп ҳам ба хабаргузории Ройтерс гуфтаст, "ин гузориш хаёлбофист". Доналд Трамп, президенти 45-уми Амрико, рӯзи 20 январи имсол бо адои савганд ворид Кохи Сафед хоҳад шуд. Вай тарафдори беҳбуд бахшидани равобити Амрико бо Русия аст ва қаблан гуфта буд, ки дар замони раёсати ӯ Маскав Вашингтонро бештар эҳтиром хоҳад кард.
