Пайвандҳои дастрасӣ

Хабари нав

Хабарҳо

Тазоҳуроти мухолифини тоҷик дар Истамбул ва Вена

Тазоҳургарон дар Вена

Рӯзи 23 феврал ду гурӯҳи хурди мухолифини ҳукумати кунунии Тоҷикистон дар шаҳрҳои Истамбули Туркия ва Венаи Австрия тазоҳуроти эътирозӣ доир карданд. Дар Истамбол ин эътироз дар назди бинои консулгарии Тоҷикистон ва дар Вена дар назди дафтари Иттиҳодияи Аврупо доир шудааст. Эътирозгарон шиорҳоеро бо талаби хатми таъқиби дигарандешон аз сӯи мақомоти Тоҷикистон ва озодии маҳбусони сиёсиро дар даст доштанд.

Як рӯз пеш, дар Душанбе як гурӯҳи ҷавонон дар назди дафтари Иттиҳодияи Аврупо ва сафорати Туркия ҷамъ омада, талаб карданд, ки Туркия ва кишварҳои Аврупо ба тазоҳуроти мухолифини тоҷик роҳ надиҳанд ва раҳбарони мухолифонро ба Тоҷикистон таслим кунанд.

Ҳамаи хабарҳои имрӯзро дар инҷо бихонед

Теъдоди гирифторони коронавирус дар Тоҷикистон аз 8 ҳазор нафар гузашт

Акси як навъи ваксинае, ки зидди коронавирус ихтироъ шудааст

Шумораи гирифторони коронавируси нав дар Тоҷикистон, ба иттилои расмӣ, аз 8 ҳазор нафар гузашт.

Вазорати тандурустии Тоҷикистон хабар додааст, ки дар як рӯзи ахир 40 ҳолати нави сироятёбӣ аз коронавирусро сабт кардаанд ва теъдоди гирифторони ин вирус ба 8 ҳазору 29 нафар расидааст.

Тоҷикистон охири моҳи апрел пас аз фавти чанд сокин бо нишонаҳои "илтиҳоби шуш" вуҷуди коронавирусро дар кишвар эътироф кард.

То ҳол бар асоси иттилои расмӣ 64 нафар аз ин беморӣ фавтидаанд. Ба гуфтаи Вазорати тандурустӣ 6815 нафар шифо ёфтаанд.

Дар феҳрасти ғайрирасмии қурбониёни эҳтимолии COVID-19 ва илтиҳоби шуш номи беш аз 440 нафарро дарҷ кардаанд. Мақомот ин рӯйхатро қабул надоранд ва мегӯянд, ҳоло вазъи вобаста ба коронавирус дар кишвар муътадил аст.

Коршиносон мегӯянд, танҳо онҳое ҳамчун гирифтори коронавирус сабт мешаванд, ки ташхис месупоранд. Шумораи аслии гирифторони ин беморӣ ва фавтидагонро бамаротиб бештар медонанд.

Лукашенко бо Путин суҳбат кард

Владимир Путин бо Александр Лукашенко дар Кремл. Акс аз рӯзи 24-уми июни соли 2020

Президенти Русия ва Беларус рӯзи шанбе, 15-уми август сӯҳбати телефонӣ кардаанд.

Хадамоти матбуотии Кремл хабар додааст, ки Владимир Путин ва Александр Лукашенко вазъияти Беларус пас аз интихоботи президентиро муҳокима кардаанд.

"Ҳарду ҷониб изҳори итминон кардаанд, ки тамоми мушкилоти пайдошуда ба зудӣ ҳал хоҳанд шуд", - зикр шудааст дар хабарномаи расмӣ, аммо аз "мушкилоти пайдошуда" ном набурдаанд.

Пеш аз ин, Александр Лукашенко, президенти Беларус, ки як ҳафта боз барои аз канор рафтанаш ҳазорҳо нафар эътироз мекунанд, эълон кард, ки нияти тамос бо Владимир Путин, президенти Русияро дорад.

Ба эътиқоди Лукашенко, эътирозҳо на танҳо ба Беларус, балки ба Русия ва "фазои умумӣ" таҳдид мекунад.

Лукашенко дар як ҷаласса дар Минск гуфт, ки агар дар Беларус пеши ин вазъ гирифта нашавад, ин мавҷ ба дигар кишварҳо низ роҳ хоҳад ёфт.

Лукашенко мустақиман нагуфт, ки аз Путин кӯмак мепурсад, вале гуфт, ният дорад, бо президенти Русия дар бораи «таҳдидҳо» сӯҳбат кунад.

Ба андешаи Лукашенко эътирозҳо дар кишвар бо "усули инқилобҳои ранга" ва бо дахолат аз хориҷа роҳандозӣ шудааст.

Рӯзи 9-уми август дар Беларус интихоботи президентӣ баргузор шуд. Александр Лукашенкоро пирӯз эълон карданд. Мухолифон инро қабул надоранд ва мегӯянд, аксари мардум ба Свтелана Тихановская, номзади дигар ба мақоми президентӣ овоз додаанд.

Дар 15 рӯзи оянда миёни Русия ва Тоҷикистон 55 парвоз сурат мегирад

Даромадгоҳи Фурудгоҳи Душанбе

Вазорати корҳои хориҷии Тоҷикистон эълон кард, ки дар 15 рӯзи оянда миёни Тоҷикистон ва Русия 55 парвоз ба роҳ монда мешавад.

Хабаргузории давлатии “Ховар” рӯзи 15-уми август изҳороти Вазорати корҳои дохилии Тоҷикистонро нашр кардааст.

Дар изҳорот гуфта мешавад, ки ин парвозҳоро ширкати "Тоҷик Эйр" ва "Сомон Эйр" аз шаҳрҳои Москва, Санкт-Петербург, Екатеринбург, Новосибирск, Қазон, Краснодар ва Сургут ба Душанбе анҷом медиҳанд.

Ҳамарӯза аз шаҳрҳои мухталифи Русия ба Тоҷикистоне аз 3 то 4 парвоз сурат хоҳад гирифт.

Ба гуфтаи манбаъ, мусофироне ба ин парвозҳо роҳ меёбанд, ки “аз ҷониби сафорат ва консулгариҳои генералии Тоҷикистон дар Русия номнавис мешаванд”.

“Ҳамзамон, афзалият ба гурӯҳҳои осебпазири шаҳрвандон, пеш аз ҳама, беморон, занони дорои кӯдакони хурдсол, пиронсолон, донишҷӯён, инчунин шахсоне, ки қаблан ба Русия бо сафари хизматӣ рафтаанд, дода мешавад”,-гуфта шудааст дар ин изҳорот.

Вазорати корҳои хориҷии Тоҷикистон гуфтааст, ки шаҳрвандон барои бозгашт бояд ба почтаи электронии charter-russia@mfa.tj муроҷиат кунанд.

Дар изҳорот таъкид мешавад, ки шаҳрвандон пеш аз бозгашт бо худ бояд маълумотнома дар бораи бемори коронавирус набудан дошта бошанд ва ин маълумотнома ҳам то 4 рӯз, яъне 96 соат пеш аз бозгашт гирифта шуда бошад. Кӯдакони то се сола ба чунин маълумотнома ниёз надоранд.

Дар ин сурат афроде, ки аз хориҷа бармегарданд, карантин намешаванд.

Тоҷикистон аз охири моҳи март ба хотири ҷилавгирӣ аз коронавирус парвозҳо ба хориҷаро қатъ кард. То ҳол танҳо тариқи парвозҳои чартерӣ ва ба таври маҳдуд шаҳрвандонро аз хориҷа ба ба ватан бармегардонанд.

Ҳайати нави Кумитаи давлатии ҷоизаи Рудакӣ маълум шуд

Бинои Иттифоқи нависандагони Тоҷикистон

Низом Қосим, раиси Иттифоқи нависандагони Тоҷикистон ба ҷои Гулназар Келдӣ, муовини раиси ин кумита интихоб шудааст.

Ин тағйирот дар рузҳое сурат гирифт, ки Гулназар бар асари бемории коронавирус рӯзи 13-уми август даргузашт.

Аз идораи Кумитаи ҷоизаи Рудакӣ, воқеъ дар бинои Иттифоқи нависандагон рӯзи 15-уми август ба Радиои Озодӣ гуфтанд, ки ҳайати ин кумита бар асоси қарори ҳукумати кишвар бо узвияти 17 нафар намояндагони иттиҳодияҳои адабиву ҳунарии кишвар таъин карда шуд.

Қарори ҳукумати Тоҷикистон рӯзи 30 июл ба тасвиб расидааст.

Раҳмат Назрӣ, шоири шинохта узви пешини Кумитаи давлатии Ҷоизаи Рудакӣ ба Радиои Озодӣ гуфт, тарҳи ҳайати нав ва низомномаи ҷоизаро соли гузашта ба ҳукумат пешинҳод карда буданд ва аз тасдиқи он хабар надоштааст.

Ӯ гуфт, бар асоси низомномаи наве, ки тартиб дода шуд, ҷоиза агар то соли 2014 сол дармиён ба барандагон дода мешуд, ҳамакнун ҳар чаҳор сол дода мешавад ва маблағаш ҳам аз 3,5 ҳазор доллар ба 4 ҳазор доллар зиёд карда шуд.

Вай гуфт, бо тасдиқи ҳайати нав низомномаи нав низ тасдиқ карда шудааст.

Дар ҳайати нави ин Кумита Фарзона, шоираи шинохта, адабиётшинос Абдураҳмон Абдуманонов, овозхони шинохта Саидқул Билолов, шоир Рустам Ваҳобзода, Ғанизода Ҷамшед, ректори донишкадаи ҳунарҳои тасвирӣ, шоир Муҳаммад Ғоиб, Миралӣ Достизода, ректори Консерваторияи миллӣ, ҳунарпешаи маъруф Машраб Абдулло, театршинос Суҳроб Мирзоев, Бахтиёр Муртазоев, публисист, Амирбеки Мусо, раиси ититфоқи композиторон, Носир Саидов, мудири телевизиони “Сафина”, театршинос Муҳаммадулло Табар, Сафар Ҳақдодов, раиси Итифоқи кинематографҳо ва Наригс Ҳамидова, раиси иттифоқи рассомони Тоҷикистон мебошанд.

Ҷоизаи ба номи Абӯабдуллоҳи Рӯдакӣ дар соҳаи адабиёт, санъат ва меъморӣ, ки соли 1964 таъсис ёфтааст, ҳамасола ба саршиностарин чеҳраҳои адабиву фарҳангӣ тақдим мешавад.

Маблағи ҷои аввали ҷоизаи Рӯдакӣ баробари 3500 доллар аст. Ҷоизаи ба номи Рӯдакӣ аз пуррақобаттарин мукофоти давлатӣ ба шумор меравад, ки бисёр адибонро барои пешниҳоди асар ба озмун ташвиқ мекунад. Ин ҷоизаро маъмулан дар арафаи 9-уми сентябр - Рӯзи истиқлоли Тоҷикистон тақдим мекунанд. Дар солҳои Шӯравӣ Мирзо Турсунзода, Мӯъмин Қаноат, Лоиқ Шералӣ, Бозор Собир ва дигарҳо барандаи ин ҷоиза шудаанд.

Лукашенко гуфт, ният дорад, Путинро аз "таҳдид" огоҳ кунад

Александр Лукашенко, президенти Беларус. Акс аз 14-уми август

Александр Лукашенко, президенти Беларус, ки як ҳафта боз барои аз канор рафтанаш ҳазорҳо нафар эътироз мекунанд, эълон кард, ки нияти тамос бо Владимир Путин, президенти Русияро дорад.

Ба эътиқоди Лукашенко, эътирозҳо на танҳо ба Беларус, балки ба Русия ва "фазои умумӣ" таҳдид мекунад.

Лукашенко дар як ҷаласса дар Минск гуфт, ки агар дар Беларус пеши ин вазъ гирифта нашавад, ин мавҷ ба дигар кишварҳо низ роҳ хоҳад ёфт.

Лукашенко мустақиман нагуфт, ки аз Путин кӯмак мепурсад, вале гуфт, ният дорад, бо президенти Русия дар бораи «таҳдидҳо» сӯҳбат кунад.

Ба андешаи Лукашенко эътирозҳо дар кишвар бо "усули инқилобҳои ранга" ва бо дахолат аз хориҷа роҳандозӣ шудааст.

Лукашенко ҳеҷ далеле, ки эътирозҳо аз хориҷа роҳандозӣ шудаанд, пешниҳод накард, вале ӯ аз дахолати нафароне аз Полша, Ҳоланд, Украина ва Алексей Навалний, раҳбари як гуруҳи мухолифин дар Русия ба эътирозҳои Беларус ишора кард.

Дар ҳамин ҳол, ҳукумати Беларус 32 нафарро, ки зархаридони ширкати хусусии "Вагнер" гуфта мешуданд ва пеш аз маъракаи интихобот боздошт шуда буданд, ба Русия супурдааст. Лукашекно қаблан онҳоро барои омодагӣ ба ташкили бетартибиҳо дар Баларус муттаҳам карда буд.

Тихановская пешниҳод кард, ки дар Беларус ҳукумати давраи гузор ташкил шавад

Светлана Тихановская, номзад ба мақоми президенти Белорус буд

Ситоди Светлана Тихановская, номзад ба мақоми президенти Беларус дар интихоботи рӯзи 9-уми август пешниҳод кард, ки Шӯрои ҳамоҳангсозӣ "барои таъмини интиқоли қудрат" ташкил карда шавад.

Свтелана Тихановская аз рақибони асосии Александр Лукашенко дар интихоботи президентии Беларус буд, ки ба гуфтаи мақомот наздики 10 дар сад, вале ба гуфтаи ҷонибдоронаш аксари райъи мардумро ба даст овардааст.

Ҳазорон нафар дар Беларус натиҷаҳои расмии интихоботро қабул надоранд ва чанд рӯз боз барои аз қудрат канор рафтани Александр Лукашенко, ки 26 сол боз раҳбари ин кишвар аст, дар хиёбонҳо эътироз мекунанд.

Тихановская, ки ҳоло дар хориҷ аз Белорус қарор дорад, гуфтааст, дар Шӯрои ҳамоҳангсозӣ ҳар фарде, ки ҷонибдори интиқоли қудрат бо роҳи осоишта аст, метавонад шомил шавад.

Ин изҳорот дар саҳифаи Телеграми Ситоди интихоботии Тихановская нашр шудааст.

Ҳамзамон ӯ аз кормандони ҳифзи ҳуқуқ даъват кардааст, ки аз иҷрои «амрҳои ғайриқонунӣ» даст кашанд.

Рӯзи 11-уми август Тихановская Беларусро тарк кард ва ҳоло дар Литва қарор дорад. Ҷонибдоронаш мегӯянд, ӯ зери фишор аз кишвар хориҷ шудааст.

Рӯзи 9-уми август дар Беларус интихоботи президентӣ баргузор шуд. Ба иттилои расмӣ, раиси ҷумҳури феълӣ Александр Лукашенко 80,08 дарсади ройи мардумро соҳиб шудааст. Мақомот мегӯянд, тақрибан даҳ дарсади мардум аз Светлана Тихановская, рақиби асосии Лукашенко, пуштибонӣ карданд. Мухолифон бо натиҷаҳои расмӣ розӣ нестанд.

Чор узви як хонавода дар рӯдхонае дар ноҳияи Айнӣ ғарқ шудаанд

Рудхонае дар ноҳияи Айнӣ. Акс аз бойгонӣ

Кумитаи ҳолатҳои фавқулоддаи Тоҷикистон хабар дод, ки чор сокини деҳаи Махшевади ноҳияи Айнӣ ҳангоми убури рудхонаи Искандар бо заврақи худсохт ғарқ шудаанд.

Ҳодиса рӯзи 14-уми август дар мавзеи Куруни Сиёҳи ин ноҳия рӯх додааст ва ин чор нафар аъзои як хонавода будаанд.

Ба иттилои Кумитаи ҳолатҳои фавқулодда заврақ аз беэҳтиётӣ чаппа шудааст ва марди 61 сола бо келини 33 солаю набераи ду сола ба коми дарё рафтаанд.

Дастаи зудамали Кумита ҷасади ғарқшудагонро ҷустуҷӯ дорад ва то ҳол ҳеҷ нишоне пайдо накардаанд.

Ба иттилои расмӣ, дар ним соли гузашта 34 нафар дар дарёву кӯлҳои кишвар ғарқ шудаанд, ки бештари онҳо аз 17 то 35 сол доштанд.

Наздикон: Се писари Саид Қиёмиддини Ғозӣ боздошт шуданд

Саид Қиёмиддини Ғозӣ соли гузашта дар ошӯб дар зиндони шаҳри Ваҳдат кушта шуд

Наздикони рӯҳонӣ ва аз чеҳраҳои шинохтаи ҷанги дохилии Тоҷикистон Саид Қиёмиддини Ғозӣ, ки соли гузашта дар ошӯб дар зиндони шаҳри Ваҳдат кушта шуд, мегӯянд, мақомоти интизомӣ якбора се писари ӯро дастгир кардаанд.

Мақомот дар бораи боздошту иттиҳоми бародарон расман чизе нагуфтаанд, вале ба қавли наздикон, Саидмуҳаммади 44-сола рӯзи 17-уми июл, Саидҳасани 33-сола ва Саидмуҳаммадии 25-сола рӯзи 19-уми июли имсол боздошт шудаанд.

Ду писари дигари хонавода – Саидҳусейни Ғозӣ ва Саидяҳёи Ғозиро пас аз як ҳафтаи бозпурсӣ раҳо кардаанд.

Раҷабгул Мусулмонова, ҳамсари Саид Қиёмиддини Ғозӣ, рӯзи 14-уми август ба Радиои Озодӣ гуфт, "барои фарзандон ба боздоштгоҳ хӯроку дору мебарем, вале дар бораи қазияи онҳо чизе намедонем. Мақомот моро низ даъват карда, дар бораи ҷойи зист ва шумораи телефонҳоямон пурсиданд. Мо ҷавоб додем. Аммо вақте пурсидем, ки писарон чӣ айб доранд, гуфтанд, ки ҳоло мефаҳмед."

Талошҳои мо барои маълум кардани иттиҳомҳо ба зидди писарони Саид Қиёмиддини Ғозӣ то ин дам бенатиҷа буд. Як намояндаи мақомоти интизомии Тоҷикистон бо шарти зикр нашудани номаш гуфт, "аллакай нисбат ба онҳо айб эълон шудааст", вале нахост ҷузъиётро ошкор кунад.

Ин ҳафта барои ҳимоят аз ҳуқуқи писарони боздоштшудаи Саид Қиёмиддини Ғозӣ вакили мудофеъ гирифтаанд, вале ба қавли наздикон, "ӯ ҳанӯз барои мулоқот вориди СИЗО нашудааст".

Саид Қиёмиддини Ғозӣ соли 2017 дар шаҳри Санкт-Петербург боздошт ва дар шароити мармуз ба Тоҷикистон оварда шуд. Ӯро ба 25 соли зиндон маҳкум карданд ва дар ошӯби тобистони соли гузашта дар зиндони шаҳри Ваҳдат кушта шуд.

Ӯ ар оғози ҷанги шаҳрвандии Тоҷикистон яке аз муҷриҳои майдони "Шаҳидон" буд. Пас аз шурӯи ҷанг ба Афғонистон паноҳанда шуда, дар ҳайати Иттиҳоди нерӯҳои мухолифини тоҷик фаъолият кард.

Бо имзои Созишномаи сулҳ, Саид Қиёмиддини Ғозӣ ба ватан баргашта, узви зеркомиссияи ҳуқуқии Комиссияи оштии миллӣ буд. То қатъи фаъолияти Комиссияи оштии миллӣ дар ин вазифа кор кард ва барои хизматаш дар татбиқи созишномаи сулҳ аз Ҳукумати Тоҷикистон бо ордени "Шараф" қадрдонӣ шудааст.

Полковники муттаҳам баъди раҳоӣ сардори идораи амният таъйин шудааст

Полковник Таймураз Олимов, ки охири соли 2019 аз зиндон озод шуда буд, сардори Идораи амнияти давлатии вилояти Қашқадарёи Узбекистон таъйин гардидааст.

Дар ин бора се манбаи наздик ба ҳукумати Узбекистон ба бахши узбекии Радиои Озодӣ хабар доданд. Яке аз онҳо 13-уми август гуфт, Таймураз Олимовро дар ҷаласаи маъмурияти вилояти Қашқадарё дидааст.

Манбаи дигар мегӯяд, ному насаби Олимовро дар қарори раиси вилояти Қашқадарё хондааст, ки ба ҳайси сардори Идораи амнияти давлатии вилоят зикр шуда буд.

Дар Додситонии кулли Узбекистон хабари аз зиндон озод шудани Олимов ва таъйин гаштанашро ба мақоми сардори Идораи амнияти Қашқадарё шарҳ надоданд. "Ин масъала дар салоҳияти Хадамоти амнияти давлатии Узбекистон аст. Бинобар ин, бояд ба он ниҳод муроҷиат кард", - гуфтанд дар хадамоти матбуотии Додситонии кул.

Талошҳои бахши узбекии Радиои Озодӣ барои тамос бо дафтари матбуотии хадамоти амният бенатиҷа буданд.

Таймураз Олимови 44-сола 26-уми феврали соли 2018 боздошт шуда буд. Ба зидди ӯ, ки он замон ба ҳайси муовини сардори Идораи мубориза бо коррупсия ва ҷиноятҳои муташаккили Хадамоти амнияти давлатии Узбекистон кор мекард, бо гуноҳи "куштори барқасдона", "суистифода аз мақом ё беамалӣ" ва "ба ҷавобгарӣ ҷалб кардани шахси бегуноҳ" айб эълон шуда буд.

СММ ба узбекистониҳои осебдида аз коронавирус ёрӣ мекунад

Намояндагии Созмони Милали Муттаҳид дар Узбекистон барои дастгирии сокинони ин кишвар, ки дар натиҷаи ҳамагир шудани коронавирус аз ҳама бештар осеб дидаанд, барномаи муштаракеро бо буҷаи 1 миллион доллар роҳандозӣ мекунад.

Ба иттилои намояндагии Барномаи рушди СММ дар Узбекистон, дар иҷрои тарҳи мазкур Бунёди кӯдакони СММ, Хазинаи СММ ва Созмони байналмилалии муҳоҷират иштирок хоҳанд кард.

Дар миёни шарикони дохилӣ Комиссия оид ба масъалаҳои баробарии гендерии назди Сенати Узбекистон, вазоратҳои рушди иқтисод, коҳиши фақр, дастгирии хонавода ва маҳаллаҳо, молия, шуғл ва муносибатҳои корӣ, маориф, умури дохилӣ ва созмонҳои ҷомеаи шаҳрвандии ин кишвар низ ҳастанд.

Дар доираи барномаи муштарак ба кормандони бахшҳои ғайрирасмӣ, ки кори худро аз даст додаанд, бахусус ҷавонону занон, аз ҷумла бонувони дорои имкониятҳои маҳдуд ва сарпарасти оила кумаки техникиву молӣ расонида мешавад.

Ҳамчунин хонаводаҳое, ки аз минтақаҳои ҷангӣ баргаштаанд, кумаки равониву ҳуқуқӣ дарёфт мекунанд.

Кобул гуфт, ба озод кардани 400 ҷангҷӯи дигари Толибон оғоз кард

Ҳукумати Афғонистон рӯзи 14-уми август гуфт, ки ба озод кардани 400 ҷангҷӯйи дигари Толибон аз маҳбас оғоз кардааст. Шӯрои амнияти миллии Афғонистон дар Твиттер навишт, рӯзи 13-уми август 80 зиндонии Толибон озод шуд. Ниҳоди амниятӣ мегӯяд, озодии зиндониён талошҳоро барои гуфтугӯйи мустақими Кобулу Толибон ва оташбаси пойдор метезонад. Бар асоси созише, ки Амрикову Толибон моҳи феврал имзо карданд, ҳукумати Афғонистон бояд 5 ҳазор зиндонии Толибонро озод кунад. Дар моҳҳои гузашта 4600 зиндониро раҳо карда буданд, вале раиси ҷумҳур Ашраф Ғанӣ гуфт, азбаски 400 нафари боқимонда барои ҷиноятҳои сахт паси панҷара рафтаанд, ҳаққи раҳоии онҳо дар ихтиёри Лоя Ҷирга аст. Лоя Ҷирга рӯзи 9-уми август ба раҳоии ҷангҷӯёни Толибон розӣ шуд. Ин афрод бо гуноҳи ҳамла маргбор ба афғонҳо ва хориҷиён маҳкум шуда буданд.

Арзёбии барандаи ҷоизаи Нобел дар бораи он чи дар Беларус мегузарад

Светлана Алексиевич

Светлана Алексиевич, нависанда ва барандаи ҷоизаи Нобел дар соҳаи адабиёт аз Беларус хушунати пулис дар баробари эътирозгаронро дар ин кишвар сахт танқид кард. Ӯ дар суҳбат бо бахши беларусии Радиои Озодӣ гуфт: “Ба назари ман, мақомот алайҳи мардуми худ эълони ҷанг кардаанд. Ман дида метавонам, ки чӣ гуна дар баробари чашми мо ҷомеа дар ҳоли радикал шудан аст, ба хотири он ки ҳеч кас ҳатто рафтори нерӯҳои пулиси вижаи зидди ошӯбро тасаввур карда наметавонист.” Баъд аз интихоботи 9-уми авугст дар Беларус, ки ба қавли масъулони Кумисюни марказии интихобот бо пирӯзии Александр Лукашенко анҷом шуд, норозиён гирдиҳамоӣ баргузор мекунанд. Мухолифони сиёсӣ мегӯянд, дар интихобот тақаллуб шудааст, то ҳукумати 26-солаи Александр Лукашенко ҳифз шавад. Аз замони оғози эътирозҳо дар Беларус 2 норозӣ ҷон бохтаанд ва ҳудуди 6700 кас дастгир шудаанд.

Амрико пажуҳишгоҳи Конфутсийро ҳамчун “агенти хориҷӣ” мешиносад

Майк Помпео

Амрико ба пажӯҳишгоҳи Конфутсий, ки аз ҷониби ҳукумати Чин таъмини молӣ мешавад, мақоми “агенти хориҷӣ” додааст. Интизор меравад, ин иқдом равобити бе он ҳам муташанниҷи байни Вашингтону Пекинро тиратар созад. Вазири умури хориҷии Амрико Майк Помпео рӯзи 13-уми август дар як эъломия гуфт, Пекин аз пажӯҳишгоҳи Конфутсий дар Амрико барои таблиғи худ истифода мекунад ва барои пешбурди аҳдофи бад талош дорад дар донишгоҳҳову мактабҳои Амрико нуфуз пайдо кунад. Помпео мегӯяд, Ҷумҳурии Мардумии Чин аз озодии ҷомеаи Амрико суистифода карда, таблиғоти густардаро барои афзоиши нуфузи худ дар ин кишвар ба роҳ мондааст. Амрико дар моҳи июл консулгарии Чинро дар аёлати Техас баст ва Чин ҳам консулгарии Амрикоро масдуд намуд.

СҶТ: "Сирояти коронавирус тавассути ғизо номумкин аст"

Майк Райан, раҳбари барномаҳои изтирории Созмони Ҷаҳонии Тандурустӣ

Созмони Ҷаҳонии Тандурустӣ мегӯяд, далелҳое мавҷуд нест, ки сирояти коронавирус аз як шахс ба шахси дигарро тавассути ғизо тасдиқ кунад ва аз ин рӯ сокинон набояд ҳарос дошта бошанд, ки ин вирус ба воситаи ғизо мегузарад.

Ин изҳороти Созмони Ҷаҳонии Тандурустӣ баъди он нашр мешавад, ки ахиран дар ду шаҳри Чин дар бастаҳои маҳсулоти яхбастаи воридотӣ коронавирус ошкор шуд. Ин чиз нигарониҳоеро низ ба вуҷуд овард, ки эҳтимоли паҳншавии вирус тавассути маҳсулоти ғизоӣ вуҷуд дорад.

"Мардум аз маҳсулоти ғизоӣ, бастаҳои маводи ғизоӣ ё дастрас кардани он набояд ҳарос дошта бошанд. Ягон далеле мавҷуд нест, ки саҳми маводи ғизоӣ дар паҳншавии коронавирусро тасдиқ кунад", - изҳор дошт раҳбари барномаҳои изтирории Созмони Ҷаҳонии Тандурустӣ Майк Райан 13-уми август дар Женева.

Рӯзи панҷшанбе шумори қурбониёни коронавирус дар саросари ҷаҳон аз 750 ҳазор гузашт. Баъзе аз кишварҳо дар пасманзари афзоиши шумори мубталоён карантинро сахттар карданд. То ба имрӯз дар ҷаҳон беш аз 20 миллион кас ба вируси мазкур мубтало шудааст.

Тихановская аз ҷонибдоронаш хост, аз "интихоби худ" ҳимоят кунанд

Светлана Тихановская ва Александр Лукашенко

Светлана Тихановская, рақиби аслии Александр Лукашенко дар интихоботи президентии Беларус аз тарафдоронаш хост, аз "интихоби худ дифоъ кунанд" ва хостори баргузории эътирозҳои сулҳомез дар ҳама шаҳрҳо шуд.

Тихановская баъд аз эълони натиҷаҳои интихоботи президентии 9-уми август маҷбур шуд, кишварро тарк кунад ва ҳоло дар Литва аст. Ӯ дар як муроҷиати видеоӣ рӯзи 14-уми август гуфт, аксари интихобкунандагон ба ӯ овоз додаанд, на ба Лукашенко.

Ин дар ҳолест, ки Кумисюни марказии интихоботи Беларус мегӯяд, Лукашенко 80 дарсад ва Тихановская камтар аз даҳ дарсади раъйи мардумро соҳиб шуданд.

"Мо, тарафдорони тағйирот, аксарият ҳастем. Инро санадҳо ва нусхаи протоколҳо аз марказҳои овоздиҳӣ тасдиқ мекунанд. Дар қитъаҳое, ки варақаҳоро мунсифона ҳисоб кардаанд, тарафдорони ман аз 60 то 70 дарсадро ташкил медиҳанд. Беларусиҳо ҳеч вақт намехоҳанд, бо ҳукумати пешина бимонанд. Ҳеч кас ба пирӯзии Лукашенко бовар надорад", -- афзудааст ӯ.

https://www.youtube.com/watch?time_continue=176&v=N3OspbawDCA&feature=emb_logo

Тихановская ҳукумати Беларусро ба он муттаҳам кард, ки "эътирозҳои мусолиматомезро ба муборизаи хунин" табдил додааст. Вай мегӯяд, "бояд ба хушунатҳо дар шаҳрҳои Беларус поён дода шавад. Аз ҳамаи раисони шаҳрҳо хоҳиш мекунам, ки рӯзҳои 15 ва 16-уми август гирдиҳамоиҳои сулҳомез ташкил кунанд."

Номзади мухолифон дар интихоботи Беларус аз сокинони ин кишвар даъват кардааст, ки исбот кунанд, аксарият ба ӯ овоз додаанд. Вай афзуд, дар сомонаи расмиаш гӯшае гузоштаанд, ки ҳар касе дар давраи интихобот аз ӯ пуштибонӣ карда буд, метавонад дар он ҷо худро номнавис кунад.

Тихановскаяи 37-сола ба ҷонибдоронаш, ситоди пешазинтихоботӣ, коргароне, ки бо нишони ҳамраъйӣ ба эътирозҳо ҳамроҳ шуданд ва маъмурони пулис, ки аз иҷрои фармони раҳбаронашон барои саркӯби муътаризон даст кашиданд, сипосгузорӣ кардааст.

Аврупо хостори поён ёфтани саркӯби шадиди эътирозҳо дар Беларус шуд

Иттиҳодияи Аврупо дар посух ба он чи "саркӯби бераҳмона"-и эътирозҳо дар Беларус меномад, фишорҳоро ба Александр Лукашенко, раиси ҷумҳури ин кишвар афзоиш додааст.

Ҷозеп Борел, раиси сиёсати хориҷии Иттиҳодияи Аврупо, хостори поён ёфтани саркӯби шадиди эътирозҳо дар Беларус шуда, гуфтааст, ба ҳуқуқи башар ва демократия эҳтиром гузошта шавад.

Ӯ рӯзи 13-уми август дар як блог навишт, "тағйири сиёсии бунёдӣ пешшарте барои густариши бештари равобит миёни Иттиҳодияи Аврупо ва Беларус аст."

Борел ин суханонро пеш аз мулоқоти фаврии вазирони умури хориҷии кишварҳои аврупоӣ гуфтааст. Пеш аз оғози нишасти дипломатҳои аршади аврупоӣ, мақомҳои Беларус раҳоии садҳо боздоштшударо оғоз карданд.

Бисёре аз шахсони озодшуда аз шароити "ваҳшатнок", аз ҷумла латту кӯб ва бадрафториҳои дигар дар боздоштгоҳҳои Беларус қисса кардаанд. Созмони Афви Байнулмилал гуфтааст, ин афрод аз шиканҷаи густарда ва таҳдиди таҷовуз нақл кардаанд.

Аз замони оғози эътирозҳо дар 9-уми август дастикам 2 норозӣ ҷон додаанд ва ҳудуди 6700 кас дастгир шудаанд. Эътирозҳо бо баранда эълом шудани Александр Лукашенко, раиси ҷумҳури Беларус дар интихобот авҷ гирифт. Кумисюни марказии интихоботи Беларус эълон кард, ки Лукашенко 80 дарсади овозҳоро касб карда ва рақиби умдааш дар интихоботи 9-уми август Светлана Тихановская камтар аз 10 дарсади ороро ба даст овардааст.

Тихановская натиҷаи интихоботро напазируфт ва маҷбур шуд Беларусро ба қасди Литва тарк кунад. Мухолифони сиёсӣ мегӯянд, дар интихоботи рӯзи 9-уми август тақаллуб сурат гирифтааст, то ҳукумати 26-солаи Лукашенко идома ёбад.

Ҳукумат гуфт, арзиши доллар дар Тоҷикистон то соли 2023 рӯ ба болост

Қурби як доллари амрикоӣ дар баробари сомонӣ то соли 2023 то ба 11 сомониву 67 дирам метавонад боло равад. Чунин қурби долларро ҳукумати Тоҷикистон пешбинӣ кардааст.

Ҳукумати Тоҷикистон бо қарори рақами 412 "Пешбинии нишондодҳои макроиқтисодии Ҷумҳурии Тоҷикистон барои солҳои 2021-2023"-ро тасдиқ кард, ки дар он болоравии қурби доллар тайи се соли оянда пешбинӣ мешавад.

Мувофиқи пешбинии ин санад қурби як доллар то поёни соли 2020 интизор меравад то сатҳи 10 сомониву 69 дирам бирасад. Ҳоло Бонки миллии Тоҷикистон арзиши 1 долларро 10 сомониву 31 дирам таъин кардааст.

Бино ба пешбинии ҳукумат дар соли 2021 қурби 1 доллар ба 11 сомонӣ ва соли 2022 ба 11 сомониву 33 дирам хоҳад расид.

Бори охир дар Тоҷикистон моҳи марти 2020 қурби сомонӣ дар баробари доллар ба таври қобили мулоҳиза афтид. Бонки миллии Тоҷикистон рӯзи 20-уми март қурби сомониро дар баробари доллари амрикоӣ якбора 5 дарсад поин овард ва арзиши 100 доллар расман ба 1020 сомонӣ баробар шуд.

Бонки миллии Тоҷикистон пас аз 5 дарсад поин овардани қурби сомонӣ дар баробари доллар онро "тасҳеҳи якдафъаина" номид ва гуфт, паҳншавии коронавирус дар ҷаҳон ба иқтисоди Тоҷикистон "бевосита таъсири манфии худро расонд".

Дар қатли корманди Додгоҳи олии Узбекистон як табиб гумонбар аст

Дар робита ба куштори як сокини шаҳри Тошканд, ки ҷасадашро аз дохили ҷузвдон пайдо карда буданд, табибе боздошт шудааст.

Пулиси Тошканд қаблан хабар дод, ки дар ноҳияи Қибрай ҷасади марди соли таваллудаш 1968, сокини ноҳияи Яккасаройро аз дохили ҷузвдон пайдо кардаанд. Тавре дертар маълум шуд, ин мард ба ҳайси сардори шуъбаи хоҷагии Додгоҳи олии Узбекистон кор мекардааст.

Дар Додситонии кулли Узбекистон гуфтанд, ки роҷеъ ба куштори корманди Додгоҳи олии ин кишвар ду нафар дастгир шудааст.

Бино ба хабарҳо, корманди Додгоҳи олӣ 7 август ба назди шиносаш Р.Х, ки ба ҳайси табиб дар Маркази ҷумҳуриявии ёрии таъҷилии Тошканд кор мекард, рафтааст. Табиб аз ин фурсат истифода бурда, ӯро ба утоқи холие мебарад ва бо ашёе ба сараш зада, ба қатл мерасонад.

Барои пинҳон кардани осори ҷиноят ҷасадро дар дохили ҷузвдон андохта, як шиноси табиб (сокини шаҳри Тошканд, муваққатан бекор) онро ба назди дарёи Бозсуи Қибрай бурдааст.

Бино ба иттилои Кумитаи тафтишотии Узбекистон, эҳтимол меравад, табиб сокини Яккасаройро дар натиҷаи рашк ба қатл расонда бошад.

Табиб бо гумони куштор дастгир шуда, дар боздоштгоҳ қарор дорад.

Мақомоти Беларус як қисми боздоштшудаҳоро озод карданд

Дар Беларус 13 август даҳҳо ҳазор одам дар эътирозҳои осоишта зидди натиҷаҳои расмии интихоботи президентии ин кишвар иштирок карданд. Ин рӯзи панҷум аст, ки сокинони Беларус алайҳи дубора президенти ин кишвар эълом шудани Александр Лукашенко даст ба эътироз мезананд.

Мақомоти Беларус ба хотири коҳиши ташаннуҷ шаби 13 ба 14 август беш аз ҳазор эътирозгари боздоштшударо озод карданд ва вазири умури дохилии ин кишвар дар як изҳороти худ барои истифодаи нерӯ зидди роҳгузарони тасодуфӣ узр пурсид.

"Ман масъулиятро бар зимма мегирам ва аз онҳое, ки тасодуфан дар маҳалли эътирозҳо ҳузур доштанду захм бардоштаанд, узр мепурсам", - изҳор дошт вазири умури дохилии Беларус Юрий Караев.

Яке аз ҷонибдорони дигари Лукашенко, раиси Шӯрои миллии Беларус Наталя Кочанова гуфт, президент дастур додааст, ки ба масъалаи боздошти иштирокдорони ҳамоишҳои эътирозӣ расидагӣ шавад. "Ба мо занозанӣ ва ҷанг лозим нест. Дишаб беш аз ҳазор боздоштшуда ба шарти иштирок накардан дар ҳамоишҳои бидуни иҷозат озод шуданд", - афзуд Кочанова.

Дар натиҷаи саркӯби эътирозҳои Беларус садҳо нафар осеб дида, дасти кам ду нафар ҷон бохтааст. Нерӯҳои таъйиноти махсуси Беларус одамонро дар кӯчаҳо бо чӯбдасти резинӣ латтукӯб ва дар баъзеи ҳолатҳо зидди тазоҳургарон аз силоҳ истифода карданд.

Додгоҳ ҳукми президенти пешини Қирғизистонро бетағйир гузошт

Алмосбек Отамбоев

Додгоҳи шаҳри Бишкек ҳукми 11 соли зиндони президенти пешини Қирғизистон Алмосбек Отамбоевро дар доираи парвандаи ғайриқонунӣ озод кардани ҷинояткори бонуфуз Азиз Ботукаев бетағйир гузошт.

Вакили дифои Отамбоев Сергей Слесарев дар ин бора хабар дод. Отамбоевро Додгоҳи ноҳияи Якуми майи Бишкек барои аз зиндон озод кардани Азиз Ботукаев дар соли 2013 ба 11 солу ду моҳи зиндон маҳкум кард. Додситонҳо барои ӯ 15 соли ҳабс талаб карда буданд.

Отамбоеви 63-сола ҳама гуна қонуншиканиҳоро рад кардааст. Ӯ августи порсол баъди як муқовимати мусаллаҳонаи дурӯза бо пулис, таслим шуд. Ин аввалин бор дар таърихи Қирғизистони соҳибистиқлол аст, ки собиқ раҳбари давлат дар мурофиаи судӣ ширкат ва ба зиндон маҳкум шавад. Отамбоев аз ҷоизаҳои давлатии мисли ордени “Данакер”, “Манас”, “Ланк” ва соати хусусии президентӣ маҳрум мешавад.

Додгоҳ инчунин ба мусодираи моликияти собиқ президент ва хешовандонаш амр дод. Дар феҳристи моликияти марбут ба Отамбоев ва наздиконаш панҷ мошин, хонаҳо дар вилоятҳои Чуй ва Иссиқкӯл, қитъаҳои замин – ҷамъан даҳ адад мусодира хоҳад шуд. Инчунин дар ин феҳрист исми ширкатҳои "Медиа Форум", "Форум", "Автомаш-Энерго" ва "Апрел ТВ" зикр мешаванд. Маълум нест, ки Отамбоев аз болои ин ҳукм шикоят хоҳад кард ё на.

Азиз Ботукаев як марди чечентабори шаҳрванди Қирғизистон соли 1966 дар шаҳри Токмаки вилояти Чуй таваллуд шудааст. Исми ӯ дар фазои ҷиноӣ бори аввал солҳои 1990-ум садо дод. Соли 2006 ӯро ба 16 солу 8 моҳ бо мусодираи молумулк маҳкум карданд. Ӯ дар куштор, гардиши ғайриқонунии маводи мухаддир, таҳияи силоҳ ва ташкили беназмиҳои ҷамъиятӣ гунаҳгор шуд. Мӯҳлати зиндонаш бояд соли 2021 хотима меёфт.

Соли 2013 ӯ пеш аз мӯҳлат аз зиндоне дар Норин озод гардид. Сабаби раҳоии пеш аз мӯҳлаташ “бемории табобтанашаванда” навишта шуд ва ӯро дар иҳотаи афроди махсус ба Бишкек интиқол доданду аз он ҷо ҳамон замон ба шаҳри Грознии Чеченистон парвоз кард. Соли 2019 вазорати умури дохилӣ таҳқиқи парвандаро аз сар гирифт ва октябри порсол онро ба додгоҳ фиристод.

Ҷудо аз ин парванда Алмосбек Отамбоев ва беш аз даҳ тарафдори ӯ аз рӯи ҳодисаҳои Койташ ба куштор, сӯиқасд ба куштор, гаравгонгирӣ, бетартибиҳои оммавӣ, авбошӣ ва дигар иттиҳомот гунаҳгор мешаванд.

Додгоҳи олии Беларус рӯйхати 566 эътирозгари боздоштшударо нашр кард

Эътирозгарон дар Минск. 13 август, 2020.

Сомонаи Додгоҳи олии Беларус номи 566 иштирокчии эътирозҳои ин кишварро нашр кард, ки 11 август боздошт шудаанд. Сухан дар бораи онҳое меравад, ки шаби аввали эътирозҳо дастгир гардидаанд. Бар асоси рӯйхат, дастгиршудаҳо аз 4 то 25 шабонарӯз ҳабс шудаанд. Бештари онҳо ба муҳлати 15 рӯз ҳабс гаштаанд.

Эътирозҳо зидди натиҷаҳои расмии интихоботи президентии Беларус рӯзи панҷум низ идома ёфтанд. Пулис дар рӯзи аввал барои пароканда кардани ҷамъшудаҳо аз тирҳои резинӣ, гази ашковар, мошинҳои обпош ва норинҷакҳои садоӣ истифода ва садҳо нафарро дастгир кард.

Дар натиҷаи саркӯби эътирозгарон садҳо тани дигар боздошт шуда, як нафар - Александр Тарайковскийи 34-сола ба ҳалокат расид. Ба иттилои расмӣ, дар дасти ӯ дастгоҳе таркида, ки гӯиё мехост ба тарафи нерӯҳои таъйиноти махсус партояд. Вале наздиконаш ба ин суханҳо бовар надоранд.

Александр Лукашенко, ки дубора барандаи интихоботи президентии Беларус эълом шуд, эътирозҳоро нодида гирифта, дар мазҳари ом ҳозир намешавад. Раҳбарони Лаҳистон ва кишварҳои Балтик аз ӯ даъват карданд, ки "истифодаи нерӯ зидди мардуми худро қатъ, эътирозгарони боздоштшударо озод ва гуфтугӯ бо тазоҳургаронро оғоз кунад".

Барқи 10 ҳазор сокини Бишкек ба далели қарздорӣ қатъ мешавад

Қирғизистон. Акс аз бойгонӣ.

Ширкати тақсимоти нерӯи барқ дар Қирғизистон -- "Северэлектро" тасмим дорад, рӯзҳои 17 ва 18 август интиқоли барқ ба 10 ҳазор муштариро ба далели пардохт накардани қарзҳояшон қатъ кунад.

"Северэлектро" мегӯяд, аз 26 марти соли равон бо тавсияи ҳукумати Қирғизистон барои се моҳ нерӯи барқи муштариёни қарздорро қатъ накард. Вале ҳоло, ки ҳамаи шуъбаҳои почта фаъолият доранд, "Северэлектро" ба низоми муқаррарии кор бармегардад.

Қатъи интиқоли нерӯи барқ ба сокинон фосилавӣ сурат гирифта, муштариёни қарздор метавонанд, қарзҳоро пардохт намоянд.

Ин бори аввал хоҳад буд, ки дар шаҳри Бишкек якбора нерӯи барқи 10 ҳазор муштарӣ қатъ карда мешавад.

Қазоқистон карантинро ба тадриҷ бекор мекунад

Шаҳри Нурсултон, Қазоқистон, августи 2020.

Мақомоти Қазоқистон "нақшаи ба тадриҷ бекор кардани карантин"-ро аз 17 августи соли равон қабул карданд

Комиссияи давлатӣ 13 август дар ҷаласаи худ гуфт, карантине, ки аз 5 июли соли равон ҷорӣ шуда буд, барои ба эътидол овардани вазъи эпидемиологӣ дар Қазоқистон кумак кард.

Ба огаҳии дафтари матбуотии сарвазири Қазоқистон, дари кинотеатрҳо, осорхонаҳо ва иттиҳодияҳои динӣ баста мемонад. Ҳамчунин баргузории чорабиниҳои оммавӣ, намоишгоҳ, форум ва сафар ба берун аз шаҳру ноҳияҳо манъ хоҳад буд.

Бар асоси қарори комиссия, аз 17 август марказҳои гуногуни савдо, кошонаҳои ҳусн, сартарошхонаҳо, толорҳои варзишӣ, марказҳои омӯзишӣ ва гуруҳҳои навбатдори боғчаҳо фаъолияти худро аз сар мегиранд.

Ба ҷуз ин, ба тамринҳо дар осмони боз ва ҳаракати нақлиёти ҷамъиятӣ низ иҷозат дода мешавад.

Дар Қазоқистон 5 июли соли равон, дар пайи афзоиши шумори мубталоён ба коронавирус баъди бекор кардани карантини аввал дубора карантини сахттар ҷорӣ шуд.

Дар ин кишвар ҷамъан 117 104 нафар ба коронавирус мубтало шуда, 1 433 бемор фавтидааст.

Президент хостори "тоза" кардани додгоҳҳо ва додситониҳо аз афроди "тасодуфӣ" шуд

Мулоқоти президент бо афроде, ки мақоми нав гирифтанд. 13 август, 2020.

Президенти Тоҷикистон бо ишора ба қонуншиканӣ ва ба коррупсия даст задани бархе аз кормандони додситонӣ ва додгоҳҳо ишора карда, аз раиси Додгоҳи олӣ ва Додситони кулл талаб кардааст, ки бо гузаронидани санҷишҳои тахассусӣ, ин ниҳодҳоро "аз афроди тасодуфӣ тоза" намоянд.

"Худатон дар ҷомеа намунаи ибрат бошед ва барои таъмини волоияти қонуну тартибот кӯшиш ба харҷ диҳед",-гуфтааст оқои Раҳмон рӯзи 13-уми август дар мулоқот бо афроде, ки дар ниҳодҳои додгоҳӣ, додситонӣ ва муассисаҳои соҳаи маориф ва илм мақоми нав гирифтанд.

Ба иттилои дафтари матбуоти раёсати ҷумҳури Тоҷикистон, бо фармонҳои президент раисони додгоҳҳои ВМКБ, шаҳри Норак ва ноҳияи Муъминобод, шаҳрҳои Бохтар ва Ваҳдат афроди нав тайъин шуданд. Манбаъ мегӯяд, дар мувофиқа бо президент додситонҳои ноҳияҳои Кӯшониён, Хуросон, Шаҳритус, Спитамен, Тоҷикобод, шаҳри Исфара ва гарнизони ҳарбии Рашт низ таъйин гардиданд.

Хадамоти матбуоти президенти Тоҷикистон дар хабарномаи рӯзи 13-уми август навишт, дар ҷараёни суҳбат бо додрасҳо ва додситонҳо раиси ҷумҳур ба мубориза ба зидди "амалҳои коррупсионӣ” таъкид кардааст.

Ҷойивазкунии кадрҳо дар низоми додгоҳӣ ва додситонии Тоҷикистон дар ҳоле сурат гирифт, ки охири соли гузашта президент Раҳмон аз боздошту зиндонӣ шудани ​25 додраси додгоҳҳои кишвар бо "ҷиноятҳои коррупсионӣ" нигаронӣ карда буд. Айни чунин ҳарфҳо дар мулоқоти президенти Тоҷикистон бо додрасҳо дар моҳи ноябри соли 2019 низ садо дода буд.

Мардуми бумии шимоли Русия раҳпаймоӣ карданд

Хонаводае аз қавми ненетс. Моҳи марти соли 2015

Намояндагони мардуми бумӣ дар нимҷазираи Таймур дар шимоли Русия ба зидди фаъолиятҳои Норникел, бузургтарин тавлидкунандаи палладиум ва никел дар ҷаҳон эътироз карданд. Даҳҳо нафар аз намояндагони қавмҳои ненетс, нганас, долган ва энетсҳо рӯзи 12-уми август бо либосҳои суннатӣ дар бар шаҳри Норилск раҳпаймоӣ карданд. Онҳо мегуфтанд, ки мақомоти расмӣ ва ширкатҳои бузург ба мисли Норникел ҳуқуқи онҳоро зери по мекунанд. Рӯзи 29-уми май тақрибан 21 ҳазор тонна маводи сӯхт аз як анбори нерӯгоҳи барқи бухории Норникел ба як рӯдхона ва кӯли Пясино рехт ва сабаби фалокати муҳити зистӣ шуд.

Ёфтҳои бештар

XS
SM
MD
LG