Пайвандҳои дастрасӣ

Хабари нав

Хабарҳо

Дар Хуҷанд алайҳи миссионери куриёгӣ парвандаи ҷиноӣ боз карданд

Додситонии шаҳри Хуҷанд алайҳи як зани 70 – сола, шаҳрванди Куриёи Ҷанубӣ парвандаи ҷиноӣ боз кард. Нозирҷон Бӯриев, сухангӯи Кумитаи давлатии амнияти миллии Тоҷикистон дар шарҳи ин хабар гуфт, Ли Ҷон Бун бар асоси моддаи 320, қисми 2 – и Кодекси ҷиноии Тоҷикистон – додани пора ба корманди мақомоти ҳукуматӣ боздошт шудааст. Вай афзуд, мавсуф мехост ба як корманди Раёсати КДАМ дар вилояти Суғд ба маблағи 20 ҳазор доллар пора диҳад, ки аз сӯи кормандони ин раёсат ва додситонии Хуҷанд аснои ҷиноят боздошт шуд. Мақомоти амниятӣ ҳамчунин аз манзили Ли Ҷон Бун 1 туфангчаи травматикӣ бо 12 тир, як адад садопасткунак, ду ҷевони оҳании ҳомили 150 ҳазор сомонӣ пули нақд дарёфт ва мусодира кардаанд.

Тибқи иттилои расмӣ, Ли Ҷон Бун, мутаваллиди соли 1944, шаҳрванди Куриёи Ҷанубӣ, сокини муваққатии шаҳри Хуҷанд ва ҳам пастори генералии маркази миссионерии Сонмин Сунбогин аст, ки соли 1992 вориди Тоҷикистон шуда, то соли 2009 дар маркази миссионерии Грей Сонмини шаҳри Душанбе фаъолият доштааст. Вазорати фарҳанг худи ҳамон сол фаъолияти маркази миссионериро манъ кард. Маркази матбуотии КДАМ мегӯяд, Ли Ҷон Бун соли 2000 Маркази хусусии тиббии шаҳри Чкаловро таъсис дода, соҳибмулки мактаби хусусии «Файз» ва меҳмонхонаи «Херсон» дар ин шаҳр аст. Ин манбаъ мегӯяд, дар ин муассисаҳо дар масъалаи андоз қонуншиканиҳо ба қайд гирифта шудаанд.

Нозирҷон Бӯриев мегӯяд, қаблан ҳама алайҳи Ли Ҷон Бун бо иттиҳоми ворид кардани маводи дорувории муҳлаташ гузашта аз рӯи моддаи 314, қисми 1 (сӯистифода аз мақому вазифа) ва 340, қисми 2 (тақаллуби асноди расмӣ) - и Кодекси ҷиноии Тоҷикистон парвандаи ҷиноӣ боз шуда, додгоҳи шаҳри Хуҷанд ба 2 солу 6 моҳ аз озодӣ маҳрум карда, аммо бар асоси моддаи 71 – и кодекси мазкур – татбиқ накардани ҷазо, шартан як сол ҷазо гирифтааст.

Сухангӯи КДАМ мегӯяд, Маркази хусусии ташхиси тиббии Чкалов асбобу таҷҳизоти тиббӣ ва дигар воситаҳои ташхисӣ, 500 намуд дорувории муҳлаташ гузашта, 25 адад таҷҳизоти тиббии фарсударо, ки ба саломатии маризон хатар доранд, бе иҷозатномаи махсус ва тариқи қочоқ ба Тоҷикистон ворид кардааст.

Ҳамаи хабарҳои имрӯзро дар инҷо бихонед

Дар Қазоқистон бештар аз 2,2 млн кас кӯмаки давлатӣ дарёфт карданд

Бештар аз 2,2 миллион қазоқистонӣ дар робита ба тамдиди муҳлати карантин дар ҳаҷми 50 доллари ИМА кӯмаки якдафъаинаи давлатӣ дарёфт карданд. Дар ин бора рӯзи 10 август аз ҳукумати Қазоқистон хабар доданд.

То рӯзи 10 август 2,5 миллион шаҳрванд барои дарёфти кӯмак дар ҳаҷми 100 доллари ИМА ариза додаанд. Ин ҳаҷми кӯмакро ҳукумати Қазоқистон дар робита ба аз даст додани даромади сокинон дар пайи эъломи карантин ваъда дода буд. Мақомот гуфтанд, қабули дархостҳо барои дарёфти кӯмак то моҳи сентябр идома мекунад.

Дар Қазоқистон 5 июл, баъди бештар шудани шумори гирифторони коронавирус, дубора карантин эълом шуд. Дар ибтидо карантин барои 14 рӯз эълом шуд, аммо баъдтар онро то 17 август тамдид карданд.

Ба иттилои расмӣ, дар Қазоқистон наздики 100 ҳазор гирифтори вируси корона ва 1269 ҳолати марг аз ин вирус сабт шудааст.

Узбекистониҳое, ки аз Русия баргаштанд, карантин шуданд

Марзи Қазоқистон бо Узбекистон.

Наздики ҳазор тан аз узбекистониҳое, ки баъди чанд рӯзи банд мондан дар марзи Русия бо Қазоқистон ниҳоят ба Узбекистон оварда шуданд, дар вилояти Намангон ба карантин гирифта шуданд. Дар ин бора аз мақомоти вилояти Намангон хабар доданд.

Ин шаҳрвандонро рӯзи 9 август тариқи қатора аз вилояти Самараи Русия ба Узбекистон оварданд.

"Шаҳрвандон сокинони ноҳияҳои мухталифи кишвар ҳастанд. Ҳамаи онҳо 10 рӯз таҳти назорат мемонанд", - омадааст дар хабари мақомоти вилояти Намангон.

Аз оғози паҳншавии ин бемории фарогир дар Русия бисёре аз муҳоҷирони Осиёи Марказӣ бекор ва бе даромад монданд. Қисме аз онҳо тасмим гирифтанд, ки ба ватанҳояшон баргарданд. Аммо баста будани марзи байни давлатҳо баргаштани онҳоро мушкил кард.

Дар Тоҷикистон 42 нафари дигар ба СOVID-19 гирифтор шудаанд

Пизишкон дар яке аз шифохонаҳои вилояти Хатлон

Дар як шабонарӯзи гузашта дар Тоҷикистон 42 нафари дигар ба бемории СOVID-19 гирифтор шудаанд. Дафтари матбуоти Вазорати тандурустӣ иттилоъ дод, ки аз 30-юми апрел то 10-уми август дар Тоҷикистон, дар маҷмуъ, коронавируси нав ба 7827 нафар сироят карда, 62 нафар аз ин беморӣ ҷони худро аз даст додаанд. Ба иттилои расмӣ, 6614 нафар ё 84 дарсад шифо ёфтаанд. Дар Тоҷикистон ба дурустии омори расмии қурбониён ва гирифторони COVID-19 шак мекунанд. Дар як феҳрасти ғайрирасмӣ дар Интернет номи беш аз 400 нафар зикр шудааст, ки гуфта мешавад аз бемории СOVID-19 ва илтиҳоби шуш даргузаштаанд.

Таркиши бомб дар марзи Покистону Афғонистон 5 нафарро кушт

Ҷойи ҳодиса

Бомбе, ки мошини нерӯҳои мубориза бо қочоқи маводи мухаддири Покистонро ҳадаф қарор дода буд, рӯзи 10-уми август дар бозори пуродам дар наздикии марз бо Афғонистон таркид. Дар натиҷа, камаш 5 нафар кушта ва 10 нафари дигар бо ҷароҳатҳо ба бемористон бурда шуданд. Дар ин бора пулиси маҳаллӣ иттилоъ дод.

Дар иттилоияе, ки барои хабарнигорон дар Покистон дода шуд, гуфта мешавад, масъулияти ҳамларо дар шаҳри ноороми Чаман “Ҷамоат-ул-Аҳрор”, як шохаи аз Толибон ҷудошудаи силоҳбадастон бар дӯш гирифтанд.

Ба гуфтаи мақомот бомб дар мототсикл ҷобаҷо шуда буд ва тавассути дастгоҳи аз масофа идорашаванда ба кор дароварда шуд.

Муовини сардори пулиси шаҳри Чаман ба Радиои Озодӣ гуфт, кушташудагон афроди мулкӣ буданд. Вай афзуд, ду узви “Ҷамоат-ул-Аҳрор” низ дар натиҷаи инфиҷор захм бардошта, дар маҷмуъ вазъи 7 нафар аз маҷруҳон “вазнин” аст.

Нерӯҳои амниятӣ ва пулис маҳалли ҳодисаро иҳота карданд. Ба гуфтаи сокинони маҳаллӣ, чанде аз фурӯшгоҳҳо ва мошинҳои сабукрав вайрон шуданд. Имрон Хон, нахуствазири Покистон ҳамларо маҳкум кард.

Инфиҷор пас аз он рух дод, ки нерӯҳои қудратии Покистон ба сӯи гирдиҳамомадагон дар як раҳпаймоӣ дар ин шаҳр оташ кушоданд. Гузаргоҳи марзии Чаман бинобар пандемияи коронавирус бастааст ва имкон намедиҳад, ки сокинон сарҳади Афғонистонро гузаранд.

Ёрии Иттиҳоди Аврупо ба мактабу бунгоҳҳои тиббии Айниву Панҷакент

Акс аз бойгонӣ

Созмони Оксфам бо сарпарастии Иттиҳоди Аврупо ба 47 бунгоҳи тиббӣ ва 53 мактаби ҳамагонии ноҳияи Айнӣ ва шаҳри Панҷакент бастаи маводи зиддиуфунӣ медиҳад.

Ин бастаҳо ба хотири пешгирӣ аз сирояти бемории COVID-19 тақдим мешаванд ва арзиши умумии кумакҳо ба беш аз 287 ҳазор сомонӣ, муодили 28 ҳазор доллар мерасад.

Дафтари Иттиҳоди Аврупо дар Душанбе рӯзи 10-уми август гуфт, аз ин иқдом зиёда аз 75 ҳазор сокини деҳот ва тақрибан 17 ҳазор хонандаву омӯзгор баҳра хоҳанд бурд.

Ин кор бо ҳадафи пешгирӣ аз бемории ҳамагир сурат гирифта, Оксфам тасмим дорад, дар мубориза ба зидди такроран паҳн шудани пандемия саҳм гузорад.

Иттиҳоди Аврупо аз оғози пандемияи коронавирус барои пешгирӣ аз густариши короновирус ба қадри 47 миллион евро грант ва ё кумакҳои билоиваз ҷудо кард.

Ба иттилои Бонки Миллии Тоҷикистон, кишвару созмонҳои байнулмилалии молӣ аз оғози пандемияи коронавирус ба кишвар беш аз 300 доллар қарзу грант додаанд.

Молики расонаҳо дар Ҳонгконг ба "ҳамкорӣ бо хориҷиҳо" муттаҳам шуд

Ҷимми Лай

Ҷимми Лай, молики расонаҳоро дар Ҳонгконг, рӯзи 10-уми август бар асоси қонуни нави амниятӣ, ки аз тарафи Чин қабул шуд, дастгир карданд. Боздошти ӯ эътирози Созмони Милали Муттаҳид ва мудофеони озодии баёнро ба бор овард.

Бино ба қонуни нави амниятӣ, ки Пекин дар ин шаҳр аз 30-юми июн ҷорӣ кард, Лай "ба ҳамкорӣ бо нерӯҳои хориҷӣ" муттаҳам шуд. Полис ҳамчунон идораи марказии нашрияи ӯро кофтукоб кард.

Лайи 71-сола, молики нашрияи машҳури Apple Daily, яке аз фаъолони барҷастаи демократия ва аз мунтақидони ашаддии Пекин буд.

Боздошти Лай дар пасманзари саркӯби нерӯҳои мухолифони демократихоҳ аз сӯи Пекин нигарониҳоро дар мавриди озодии матбуот ва дигар ҳуқуқу озодиҳо бештар мекунад. Замоне ки Ҳонгконг соли 1997 аз мустамликаи Бритониё ба ихтиёри Пекин гузашт, ин ҳуқуқу озодиҳо кафолат дода шуда буд.

Идораи ҳуқуқи башари Созмони Милали Муттаҳид аз боздошти Ҷимми Лай шадидан ибрози нигаронӣ карда, аз мақомот тақозо кард, ки ҳуқуқу озодиҳои шаҳрвандонро кафолат дода, аз қонуни нав сӯистифода накунанд.

Кумитаи дифоъ аз журналистон (CPJ), қароргоҳаш дар Ню- Йорк, ин боздоштро танқид кард.

Қонуни нав фаъолияти вайронгарона, терроризм ва ҳамкорӣ бо нерӯҳои хориҷиро манъ карда, ҳадди ақал даҳ соли зиндон ва ё дар баъзе ҳолатҳо ҳабси якумриро дар назар дорад.

Туркияву Иморот парвозҳоро ба Қирғизистон аз сар гирифтанд

Туркия ва Имороти Муттаҳидаи Араб бо Қирғизистон парвозҳои доимиро ба роҳ монданд.

Аз Вазорати нақлиёт ва роҳҳои Қирғизистон хабар доданд, ки айни замон барои барқарорсозии равуои ҳавоӣ бо Русияву Чин гуфтугӯҳо идома доранд. Бо ин вуҷуд дақиқ нест, ки равуои қаторҳои мусофирбар ва дигар навъи нақлиёти заминӣ байни кишварҳо кай ба аз сар гирифта мешавад.

Мақомоти Қирғизистон гуфтанд, парвозҳо байни Туркияву Қирғизистон ва Имороти Муттаҳидаи Араб бо Қирғизистон аз 10-уми август ба роҳ монда мешавад.

Баъди он ки дар моҳи март нахустин ҳолатҳои гирифторӣ ба коронавирус дар Қирғизистон сабт шуд, марзҳои он кишвар баста ва низоми фавқулода ҷорӣ шуд.

Бил Гейтс: Амрико дар назорати коронавирус аз дигарон ақиб монд

Бил Гейтс

Бил Гейтс, бунёдгузори ширкати "Майкрософт", мегӯяд, Амрико дар контроли бемории коронавируси нав аз кишварҳои дигар ақиб мондааст. Вай рӯзи 9-уми август дар суҳбат бо шабакаи телевизионии CNN гуфт, Иёлоти Муттаҳида натавонист барномаи санҷиши коронавирусро ба таври кофӣ анҷом диҳад.

Доналд Трамп, раиси ҷумҳури Иёлоти Муттаҳида аз барномаи ташхиси коронавирус дар ин кишвар дифоъ кардааст. Ӯ иддао дорад, ки ошкор шудани мавридҳои зиёди вирус дар Иёлоти Муттаҳида ба он хотир баланд аст, ки санҷишҳои бисёре дар ҳоли иҷро шудан аст.

Бар асоси маълумоти Донишгоҳи Ҷон Ҳопкинс, шумори беморони коронавируси нав дар Иёлоти Муттаҳида аз 5 миллион нафар бештар шуд. Дар ин кишвар 162 ҳазор кас аз COVID-19 ҷони худро аз даст додаанд.

Созмонҳои хайрия гуфтанд, ки ба Бейрут ёрӣ медиҳанд

Сокинони Бейрут баъд аз таркиши азим дар ин шаҳр, рӯзҳои шанбе ва якшанбе даст ба тазоҳуроти хашин заданд. Рӯзи якшанбе созмонҳои хайрияи байнулмилалӣ аз оғози маъракаи ҷамъоварии кумак ба Лубнон хабар доданд. Бино ба баҳогузории Созмони Милал, барои бартарафсозии пайомадҳои таркиши рӯзи 4-уми август дар пойтахти Лубнон тақрибан ба 117 миллион доллар ниёз ҳаст. Дар натиҷаи таркиш 160 кушта, ҳазорон тан маҷруҳ ва наздики 300 ҳазор шаҳрванд бесарпаноҳ монданд. Эммануэл Макрон, президенти Фаронса бо Созмони Милал нишасти маҷозӣ баргузор ва масъалаи кумак ба Лубнонро баррасӣ кард. Даҳҳо кишвар изҳор доштанд, ки омодаи ёрӣ расондан ҳастанд. Дастгоҳи президенти Фаронса хабар дод, ки айни замон барои кумак ба Лубнон 298 миллион доллар ҷамъ шудааст. Мақомоти Лубнон гуфтанд, таркиш 15 миллиард доллар хисорот овардааст. Гуфта мешавад, селитраи аммиак, ки дар анборҳои бандар нигаҳдорӣ мешуд, боис ба таркиш шудааст. Эҳсоси ноумедии мардум якбора ба эътироз табдил шуд. Сокинон мегӯянд, хунукназарӣ ва идораи номуваффақонаи элитаи сиёсӣ боис ба таркиш шудааст.

Шӯрои Ҳамкории Халиҷ аз идомаи таҳримҳо ба зидди Эрон пуштибонӣ кард

Шӯрои Ҳамкории Халиҷ бо ирсоли номае ба Шӯрои амнияти Созмони Милали Муттаҳид аз дароз шудани таҳрими таслиҳотии Эрон пуштибонӣ кардааст.

Иёлоти Муттаҳида ба шиддат пофишорӣ кард, ки набояд гузошта шавад то ин таҳримҳо дар моҳи октябр ба анҷом бирасад.

Шӯрои Ҳамкории Халиҷ аз Баҳрайну Кувайт, Аммон, Қатар, Арабистони Саудӣ ва Имороти Муттаҳидаи Арабӣ иборат аст.

Дар номае, ки дирӯз фиристоданд, омадааст: "Аз замони имзои мувофиқатномаи ҳастаӣ бо Эрон дар соли 2015, Эрон мудохилаи мусаллаҳона дар умури кишварҳои ҳамсояро коҳиш надода, ё мутаваққиф насохтааст."

Аббос Мӯсавӣ, сухангӯи Вазорати корҳои хориҷии Эрон дархости Шӯрои Ҳамкории Халиҷ барои тамдиди таҳрими таслиҳотии Эронро накӯҳиш кардааст. Амрико дар ин ҳафта талош хоҳад кард, то Шӯрои амнияти Созмони Милали Муттаҳид ин таҳримҳоро дароз кунад.

Қирғизистон боздошти рӯзноманигори узбекистониро тасдиқ кард

Бобомурод Абдуллоев

Кумитаи давлатии амнияти миллии Қирғизистон (КДАМ) боздошти Бобомурод Абдуллоев, рӯзноманигори узбекистониро тасдиқ кард. Пештар аз ин дар бораи боздошти Абдуллоев вакили мудофеаш Тимур Қарабоев хабар дода буд.

КДАМ мегӯяд, Абдуллоев рӯзи 8-уми август боздошт шуд, дар ҳоле ки вакили мудофеаи вай гуфт, Абдуллоевро шоми 9-уми август боздошт карданд.

Боздошти рӯзноманигорро ба иҷрои Конвенсияи Минск дар бораи кумаки ҳуқуқӣ ва муносибатҳои ҳуқуқӣ дар доираи парвандаҳои шаҳрвандӣ, хонаводагӣ ва ҷиноӣ рабт доданд. Мақомоти Қирғизистон гуфтанд, Абдуллоевро мақомоти ҳифзи ҳуқуқи Узбекистон барои содир кардани чанд ҷиноят дар пайгард қарор додаанд.

Абдуллоев дар боздоштгоҳи КДАМ нигаҳ дошта мешавад. Айни замон Додситонии кулли Қирғизистон масъалаи истирдоди ӯро ба Узбекистон баррасӣ мекунад.

Вакили мудофеи рӯзноманигор гуфт, ӯро дар яке аз қаҳвахонаҳои шаҳри Бишкеки Қирғизистон боздошт кардаанд.

Сабти 332 ҳолати нави гирифторӣ ба COVID-19 дар Қирғизистон

Дар Қирғизистон дар як рӯзи охир 332 ҳолати гирифторӣ ба коронавирус сабт шудааст. Дар ин бора аз Ситоди ҷумҳуриявии он кишвар хабар доданд.

Ба иттилои ситод, дар як рӯзи охир ҳамзамон 8 ҳолати марг аз коронавирус ба қайд гирифта шудааст.

Шумори умумии гирифторон ба коронавирус дар Қирғизистон ба 39 ҳазору 919 ва шумори фавтидагон ба 1468 кас расидааст.

"Дар кишвар ҳолатҳои дубора мубталошавии сокинон ба қайд гирифта нашудааст", гуфт Таланд Сооронбоев, як мақомдори вазорати тандурустии Қирғизистон дар нишасти хабарии рӯзи 8 август.

Буҷавиҳои Ишқободро ба супоридани ташхиси COVID-19 вазифадор карданд

Яке аз бемористонҳои Ишқобод.

Дар пойтахти Туркманистон кормандони соҳаи буҷавӣ ва ширкатҳоро вазифадор карданд, ки аз ташхиси COVID-19 гузаранд. Ба иттилои огаҳон, дастури мақомот дар ин бора 6 август содир шудааст.

"Дар сурати нагузаштан аз ташхис ва надоштани натиҷаи ташхис дар даст, ба коргоҳ роҳ намедиҳанд",-гуфт як сокини шаҳри Ишқобод.

Кормандони буҷавӣ гуфтанд, ки арзиши ташхис 100 манат (қариби 30 доллари ИМА) аст.

"Ба табибон дастур шудааст, ки натиҷаи ташхисро дар варақа нанависанд, балки коргоҳи давлатиро дар ҷараён гузоранд ва коргоҳ кормандонро ба бемористон ирсол хоҳад кард",-гуфт сокини Ишқобод.

Дар ҳафтаҳои охир Туркманистон аз Созмони Ҷаҳонии Тандурустӣ ва Имороти Муттаҳидаи Арабӣ барои мубориза зидди коронавирус кӯмаки башарӣ дарёфт кард. Аммо сарфи назар аз ин то кунун мақомоти он кишвар мавҷудияти коронавирусро дар Туркманистон рад мекунанд.

Дар наздикии Тошканд барои зиндониҳои мубталои COVID-19 минтақаи карантин месозанд

Яке аз зиндонҳои шаҳри Тошканд. Акс аз бойгонӣ.

Як манбаъ аз мақомоти корҳои дохилии Узбекистон гуфт, дар фурсатҳои наздик дар шаҳри Ангрени вилояти Тошканд барои 3 ҳазор зиндонӣ минтақаи карантин бунёд мешавад.

Мақомоти давлатии сохтмонии Узбекистон ба тарҳкашии ин минтақа шуруъ кардаанд.

"Барои муолиҷаи зиндониёни гирифтори коронавирус 300 миллион сӯм, 4 зарфи киcлород, 600 адад дастгоҳи набзсанҷ ва чанд дона дастгоҳи нафаси сунъӣ ҷудо шудааст",-гуфт манбаъ.

Хабар дода мешавад, ки наздики 70 тан аз зиндониён, зиндонбонон ва сарбозон дар зиндони вилояти Бухорои он кишвар бо гумони мубталоӣ ба коронавирус карантин шудаанд.

Мақомоти зиндонҳои Узбекистон гуфтанд, қабули ғизо ба зиндониён муваққатан манъ гардидааст. Ҳамзамон мулоқоти вакилони мудофеъ ва хешовандони наздикро ҳам бо зиндониён манъ кардаанд.

Ҳалокати як нафар бар асари чаппа шудани кран дар Душанбе. ВИДЕО

Акс аз бойгонӣ

Бар асари чаппа шудани як крани борбардор дар шаҳри Душанбе як сохтмончӣ ҳалок шуда, як каси дигар бо ҷароҳатҳои вазнин дар бемористон бистарӣ шудааст.

Умеда Юсуфӣ, сухангӯи Кумитаи ҳолатҳои фавқулода гуфт, ҳодиса шоми 8-уми август дар кӯчаи Сурхоби пойтахт рух дод. Дар ин ҳодиса болопӯши чанд хона низ хароб шудааст.

Ба иттилои Кумитаи ҳолатҳои фавқулода, дарозии кран 35 метр аст ва ба ширкати "Хиштрез" тааллуқ дорад.

Мақомот сабабҳои чаппа шудани крани борбардор ва мизони зарари расидаро ба сокинон баррасӣ доранд.

Дар шабу рӯзе, ки дар Душанбе сохтмони биноҳо босуръат ҷараён дорад, тақрибан дар ҳар кӯчаву хиёбон 2-3 борбардор қомат рост кардааст. Хадамоти бехатарии корҳо дар саноат ва соҳаи кӯҳкорӣ моҳи июни соли гузашта хабар дод, ки дар сохтмонҳои пойтахт беш аз 100 кран фаъол аст.

Кори ин азимҷуссаҳо дар фосилаи баъзан хеле наздик ба минтақаҳои аҳолинишин ва роҳҳои мошингузар мояи нигаронии бархе аз сокинон шудааст. Мақомот мегӯянд, дар кори кранҳо чанд хатои техникиро ошкор карданд, вале гардиши онҳоро дар болои роҳҳову наздикии хонаи мардум хатарзо намешуморанд.

Дар солҳои гузашта ҳодисаҳои чаппашавии кранҳои сохтмонӣ дар шаҳри Душанбе сабт шудааст, ки иллати он ҳам шамоли сахт ва ҳолати нодурусти фаннӣ номбар шуда буд.

Дар як ҳодиса дар маҳаллаи наздик ба бозори “Корвон” як крани борбардор аз баландии беш аз 30 метр чаппа шуда, ба чанд хона зарар расонда буд.

Ин видео аз бойгонии Радиои Озодист:

Душанбе-шаҳри кранҳои сохтмонӣ
лутфан мунтазир бошед
Embed

Феълан кор намекунад

0:00 0:03:30 0:00

Як соҳибкори чинӣ баъди рафтан аз Тоҷикистон "бемор шудааст"

Дар бадани як соҳибкори чинӣ, ки аз Тоҷикистон ба музофоти Ҳубей баргаштааст, бемории COVID-19-ро ошкор кардаанд. Расонаҳои Чин рӯзи 7-уми август навиштанд, беморӣ баъд аз як рӯзи будани ӯ дар "карантин" маълум шуд. Вагарна, ба иттилои Кумисюни тандурустии музофоти Ҳубэй, соҳибкор пеш аз сафар аз ташхис гузашта буд ва ҳеч беморӣ надошт. Ин соҳибкори чинӣ ҳамроҳи 90 нафари дигар рӯзи 6-уми август дар як парвози чартерӣ ё ғайринақшавии ҳавопаймое аз Тоҷикистон ба Чин рафтааст. Тибқи муқаррароти беҳдоштӣ онҳо ду ҳафта дар "карантин" хоҳанд буд. Бемории коронавируси нав охири соли гузашта дар шаҳри Вуҳани Чин ошкор шуд ва то кунун дар ҷаҳон зиёда аз 19 миллион нафарро бемор кард ва боис ба марги беш аз 728 ҳазор нафар шуд. Тақрибан 12 миллион кас шифо ёфтаанд.

Шаҳриёри Давлат, овозхони ҷавони тоҷикро 10 рӯз ҳабс кардаанд

Дар аксҳое, ки Раёсати умури дохилии Душанбе паҳн кард, ӯ завлона ба даст тасвир ёфтааст

Маъмурони милиса дар шаҳри Душанбе овозхони ҷавон Шаҳриёри Давлатро барои сабту паҳн кардани "пранк" ё саҳнаи шӯхиомез дастгир карда, бо қарори додгоҳ даҳ рӯз ба ҳабс гирифтаанд.

Вай ва ду ҳамроҳаш – Дилшод Мирзоев ва Фарҳод Солеҳзода – ба "вайрон кардани тартиботи ҷамъиятӣ" ва "тарғиби бадгуфториву алфози қабеҳ" гунаҳкор шуданд.

То ба ҳол назари Шаҳриёри Давлат ва ё наздиконаш ба ин қазия маълум нест. Аммо бештари блогерон ва овозхонҳои тоҷик бо ташкили "пранк" ё саҳнаи шӯхиомез ва гузоштани он дар саҳифаашон дар Ютуб мехоҳанд, бинандаи бештар ҷалб кунанд.

Мақомот мегӯянд, боздошти овозхон ва ҳамроҳонаш бо дархости корбарони Ютуб сурат гирифтааст.

Дар навор ҳамкорони Шаҳриёри Давлат чархҳои мошинаи ӯро кушода, мехоҳанд, вокуниши овозхонро дар чунин лаҳза шоҳид шаванд. Мақомоти Раёсати умури дохилии шаҳри Душанбе рӯзи 7-уми август гуфтанд, "Шаҳриёри Давлат бо мушоҳидаи ин ҳолат тартиботи ҷамъиятиро дағалона вайрон карда, нисбат ба ҳамкорони худ суханони қабеҳ ва амалу рафтори ноҷо намуда, дидаву дониста ин наворро дар шабакаи худ нашр намудааст."

Шаҳриёри Давлат 29-сола ва сокини ноҳияи Вахши вилояти Хатлон аст. Ӯ бештар бо иҷрои таронаҳои ошиқона дар миёни ҷавонон шуҳрат дорад.

Рӯҳонӣ гуфт, "ҳолати фавқулода" то 2021 идома хоҳад дошт

Ҳасани Рӯҳонӣ, раиси ҷумҳури Эрон

Раиси ҷумҳурии Эрон мегӯяд, ҳолати фавқулодае, ки ба хотири густариши коронавируси нав дар ин кишвар ҷорӣ шудааст, дастикам то моҳи январи соли 2021 идома хоҳад дошт.

Ҳасани Рӯҳонӣ рӯзи якшанбе дар як баёния гуфт: "Мо аз шаш моҳ ба ин сӯ дар ин вазъият ҳастем ва худро барои ҳадди ақал шаш моҳи дигар бояд омода созем."

Рӯҳонӣ афзуд, ҳеч гуна бардоштани комили маҳдудиятҳои беҳдоштӣ дар ҳоли ҳозир дар назар нест. Эрон дар ду моҳи ахир баъзе аз маҳдудиятҳои ҷилавгирӣ аз паҳншавии вируси коронаро коҳиш додааст.

Ба иттилои мақомоти Эрон, коронавируси нав дар ин кишвар ба 320 ҳазор кас сироят карда, боис ба марги 18 ҳазор нафар шудааст.

Интихоботи президентии Беларусро баргузоршуда эълон карданд

Кумисюни марказии интихоботи Беларус гуфт, беш аз 50 дар сади афроди қобили рой ба пойи сандуқҳои овоздиҳӣ рафтаанд ва интихоботи президентии рӯзи 9-уми август баргузоршуда аст. Дар Беларус тақрибан 7 миллион нафар ҳаққи ройдиҳӣ доранд.

Мақомҳои Беларус пеш аз интихоботи раёсати ҷумҳурӣ фишори худро ба мухолифону нозирони мустақили интихобот афзоиш доданд.

Нигарониҳо вуҷуд доранд, ки раиси ҷумҳури кунунӣ Александр Лукашенко, ҳукуматдории 26-солаи худро бо истифода аз тақаллубу саркӯб дар баробари мухолифон дароз кунад. Ӯ 65-сола аст ва аз соли 1994 ҷилави қудратро дар Беларус ба даст дорад.

Марказҳои ройдиҳӣ соати ҳашти субҳ ба вақти маҳаллӣ кушода шуданд ва қарор аст ройдиҳӣ то соати ҳашти шаб идома ёбад. Қарор аст, натиҷаҳои муқаддамотӣ фардо эълон шавад.

Маҷлиси Олӣ баъди 3 моҳ барканории Насим Олимзодаро тасдиқ кард

Ҷамолиддин Абдуллозода ва Насим Олимзода

Аъзои Маҷлиси Олии Тоҷикистон бо гузашти се моҳ фармони раиси ҷумҳурро дар бораи барканории вазири пешини тандурустӣ Насим Олимзода тасдиқ карданд.

Ҷаласаи якҷояи аъзои Маҷлиси Миллӣ ва вакилони Маҷлиси Намояндагон рӯзи 6-уми август дар Душанбе баргузор шуд.

Насим Олимзода 5-уми май, баъд аз эътирофи расмии мавҷудияти коронавирус дар Тоҷикистон аз мансаб ронда шуд. Он замон намояндагони ҷомеаи шаҳрвандӣ Вазорати тандурустӣ ва мақомоти дигарро бештар барои он танқид мекарданд, ки чандин мавридҳои шубҳаовари марги сокинонро ба илтиҳоби шуш рабт дода, мавҷудияти коронавирусро рад карданд.

Дар фармони раиси ҷумҳур гуфта мешуд, Олимзода ба кори дигар гузаштааст, вале ҳанӯз мақоми навашро эълон накардаанд.

Аъзои Маҷлиси Олӣ ба мақоми вазири нави тандурустӣ таъин шудани Ҷамолиддин Абдуллозода низ ризоят додаанд. Аммо вақте аз аъзои маҷлис пурсидаанд, ки ба вазири нави тандурустӣ ва ҳифзи иҷтимоии аҳолӣ суоле доранд, касе чизе напурсидааст.

Ҷамолиддин Абдуллозодаи 54-сола зодаи ноҳияи Данғара аст ва то замони таъин шудан ба мансаби вазири тандурустӣ мудири бемористони "Истиқлол"-и шаҳри Душанбе буд.

Ба иттилои расмӣ, аз охири моҳи апрел то кунун коронавируси нав дар Тоҷикистон ба 7745 нафар сироят карда, 62 касро куштааст. Мақомот мегӯянд, беш аз шашуним ҳазор кас шифо ёфтаанд. Иттилои ғайрирасмии беморону ҷонбохтагон аз коронавирусро дар Тоҷикистон бештар аз ин медонанд.

Ҳалокати як зан дар Язғулом. Мақомот мегӯянд, ӯ ғарқ шуд

Акс аз бойгонӣ

Як зани бистсола дар ноҳияи Ванҷи Вилояти Мухтори Кӯҳистони Бадахшон дар об ғарқ шуда, ҷони худро аз даст додааст. Мақомоти Кумитаи ҳолатҳои фавқулодаи Тоҷикистон гуфтанд, ҳодиса рӯзи 7-уми август дар ҷамоати Язғулом руй дод.

Ба иттилои расмӣ, ин зан мехостааст дар дарёи Ванҷ оббозӣ кунад ва ногаҳон ғарқ шудааст. Ҷасади ӯро "баъд аз ҷустуҷӯйҳои зиёд" дар поинтар аз Дашти Язғулом ёфта, ба пайвандонаш додаанд.

Ба иттилои расмӣ, дар ним соли гузашта 34 нафар дар дарёву кӯлҳои кишвар ғарқ шудаанд, ки бештари онҳо аз 17 то 35 сол доштанд.

Покистон дубора ба парвозҳои байнулмилалӣ иҷозат дод

Мақомоти Покистон гуфтанд, ки аз 9-уми август ба ҳама парвозҳои байнулмилалӣ дубора иҷозат додаанд. Ин кор баъди беш аз чаҳор моҳ "танаффуси иҷборӣ" сурат мегирад.

Покистон дар охири моҳи марти имсол ба хотири пешгирӣ аз коронавируси нав парвозҳои дохилӣ ва байнулмилалиро манъ кард.

Идораи ҳавонавардии Покистон азсаргирии парвозҳоро як рӯз пас аз он эълон кард, ки ҳукумати ин кишвар аз бозкушоии ҳама бахшҳои иқтисодиву иҷтимоӣ хабар дод.

То кунун бар асари коронавируси нав дар Покистон беш аз 6 ҳазор кас ҷони худро аз даст додаанд. Беморӣ ба зиёда аз 283 ҳазор нафар сироят кардааст.

400 ҷангҷӯйи дигари Толибонро озод мекунанд

Лоя Ҷирга се рӯз баргузор шуд

Лоя Ҷиргаи Афғонистон бо судури қатънома раҳоии 400 зиндонии Толибонро тасдиқ кард. Ашраф Ғанӣ, раиси ҷумҳури Афғонистон, рӯзи 9-уми август гуфт, қарори Лоя Ҷиргаро "ҳамчун бахши охири табодули зиндониён ва ҳамвор кардани роҳ барои музокироти байнулафғонӣ" мепазирад. Аксари ин афрод ба ҳамлаҳои маргбор ба афғонҳо ва хориҷиён гунаҳкор ҳастанд.

Бар асоси созише, ки Амрикову Толибон моҳи феврал имзо карданд, ҳукумати Афғонистон муваззаф шуд, 5 ҳазор зиндонии Толибонро озод кунад.

Абдуллоҳ Абдуллоҳ, раиси Лоя Ҷирга гуфт, қатъномаи 9-уми август монеаи боқимондаро барои шурӯи музокироти байни ҳукумати Афғонистон ва Толибон бардоштааст.

Ҳомид Карзай, раиси ҷумҳури пешини Афғонистон, мегӯяд, интизор дорад баъд аз ду ё се рӯзи озодии зиндониён, як ҳайат музокиротро бо Толибон оғоз кунад. Қарор аст, Маъсум Станакзай, раиси собиқи идораи амнияти миллӣ, раҳбари ҳайати Афғонистон шавад.

Ин ҳайат шомили сиёсатмадорони афғон, мақомоти пешин ва намояндагони ҷомеаи маданӣ хоҳад буд. Кобул пештар гуфта буд, панҷ узви ҳайат занон ҳастанд.

Эспер гуфт, Амрико нирӯҳояшро дар Афғонистон камтар мекунад

Марк Эспер

Вазири дифои Амрико гуфт, Иёлоти Муттаҳида қасд дорад, ки то охири моҳи ноябр шумораи нирӯҳои худро дар Афғонистон "ба камтар аз 5000 ҳазор нафар" расонад. Марк Эспер рӯзи 8-уми август дар ин бора дар суҳбат бо телевизиони Fox News ибрози назар кард. Дар ҳоли ҳозир Амрико дар Афғонистон 8600 сарбоз дорад. Президент Доналд Трамп 3-юми август гуфта буд, ки Иёлоти Муттаҳида мехоҳад, ин шумораро то 4 ҳазор нафар коҳиш диҳад.

Ба кормандони давлат дар Туркманистон дастур додаанд, пули озмоишро бипардозанд

Мақомоти Туркманистон мегӯянд, вируси нав ба ин кишвар сироят накардааст.

Кормандони давлат дар Туркманистон дастур гирифтаанд, ки ҳаққи гарони озмоиш аз коронавирусро худашон бипардозанд, ҳарчанд ҳукумат мегӯяд, дар кишвар ҳеҷ COVID-19 нагирифтааст. Сабабҳои судури чунин дастур дар рӯзи 6-уми август рӯшан нест.

Пофишории мақомоти Туркманистон ба орӣ будани кишвар аз вирус шубҳаи зиёдеро ба бор овардааст. Айни замон бино ба гузоришҳо, шифохонаҳо пур аз беморон бо аломатҳои илтиҳоби шуш шудаанд. Дар Узбекистон мақомот гуфтанд, ки имтиҳонҳои қабул ба донишгоҳҳо дар майдонҳои варзишӣ ва бо риояти фосилагирии ҷисмонӣ сурат мегирад.

Дар Тоҷикистон теъдоди беморони COVID-19 аз 7700 нафар гузашт. Мақомот мегӯянд, ки то кунун 62 нафар бар асари сирояти коронавирус ҷон додаанд, ҳарчанд як таҳқиқи Радиои Озодӣ нишон дод, ки талафот аз беморӣ ба садҳо нафар мерасад.

Дар Қирғизистон ба гуфтаи мақомот, то рӯзи 7-уми август шумораи беморон ба бештар аз 39 ҳазор нафар расид ва талафот 1451 нафарро ташкил медиҳад. Дар Қазоқистон тақрибан 97 ҳазор нафар бемор шудаанд ва бештар аз 1000 нафар фавтидаанд.

Ёфтҳои бештар

XS
SM
MD
LG