Пайвандҳои дастрасӣ

Хабари нав

Хабарҳо

Дар Пхенян шаҳрванди Амрикоро ба додгоҳ кашиданд

Хабаргузории давлатии Кореяи Шимолӣ гуфтааст, як шаҳрванди Амрикоро ба додгоҳ мекашонад, зеро вай талош кардааст ҳукумати ин кишварро сарнагун кунад. Ин хабаргузорӣ гуфтааст, Кеннет Бей соли гузашта боздошт шуда буд ва номи кореяии вай По Ҷун Ҳу ифшо шудааст.

Вай 3 ноябри соли гузашта дар ҷараёни саёҳат дар минтақае бо номи Расон дар Кореяи Шимолӣ боздошт шудааст. Расон минтақаи вижаи иқтисодист, ки Русия ва Кореяи Шимолӣ дар он ҷо ба таври муштарак барномаҳои иқтисодиро иҷро мекунанд.

Агар Кеннет Бей муттаҳам эълон шавад, дар он сурат вайро ҳукми қатл интизор аст.

Ҳамаи хабарҳои имрӯзро дар инҷо бихонед

Фавт аз коронавирус дар Русия бештар шудааст

Яке аз беморхонаҳои Маскав

Дар давоми рӯзҳои 17 ва 18-уми июн фавти сокинон аз коронавирус дар Русия 14 дар сад афзудааст.

Дар ин бора Татяна Голикова, муовини сарвазири Русия, ки раҳбари ситоди фаврии мубориза бо коронавирус аст, ба хабаргузории "Интерфакс" хабар дод.

Ба гуфтаи ӯ, ба он хотир шумораи марг афзуд, ки гирифторони коронавирус сари вақт барои кӯмаки тиббӣ муроҷиат намекунанд.

Ӯ гуфтааст, аксаран ҳангоми беморӣ доруҳои одии муқовимат бо вирусро истифода мекунанд ва коронавирусро аз сармохӯрдагӣ фарқ намекунанд.

Нимаи моҳи июн якбора гирифторӣ ба коронавирус афзоиш ёфт. Рӯзи 18-уми июн дар Русия беш аз 17 ҳазор нафар ба КОВИД-19 сироят ёфтааст, ки як баробар аз рӯзҳои пеш зиёдтар аст.

Дар пайи афзоиши гирифторони коронавирус мақомоти рус баъзе маҳдудиятҳо ҷорӣ карданд.

Дар Русия ҳазорон муҳоҷири кории тоҷик кор мекунанд ва тағйирот дар Русия ба зиндагии онҳо низ таъсир мерасонад.

Дар пайи карантини соли гузашта ҳазорон муҳоҷири тоҷик дар ин кишвар ҷойи кори худро аз даст дода буданд.

Сафири Русия дар ИМА ба кор баргашт

Анатолий Антонов, сафири Русия дар Амрико

Анатолий Антонов, сафири Русия дар Амрико субҳи рӯзи 20-уми июн барои идомаи кораш аз Маскав ба Ню-Йорк рафт. Вақте дар як суҳбат Ҷо Байден, президенти Амрико Владимир Путинро "қотил" номид, Русия сафирашро барои "машварат" бозхонд.

Пас аз се моҳ, баъди мулоқоти Путин бо Байден дар рӯзи 16-уми июн дар Женева мувофиқа шуд, ки сафирони ду кишвар ба кор бармегарданд. Ҷон Салливан, сафири Амрико низ пас аз сардии равобит Маскавро тарк карда буд.

Владимир Путин дар нишасти матбуотиаш пас аз мулоқот бо Байден гуфт, ки "масъалаи кори сафирон ҳал шуд".

Сафири ИМА дар Русия ҳафтаи дигар ба кор бармегардад.

Муносибати ду кишвар пас аз заҳролуд шудани Алексей Навалний, мухолифи Путин ва ошкор шудани изи Русия дар таркиши анбори силоҳ дар Чехия сардтар шуд. ИМА нисбат ба Русия таҳрим эълон кард ва Русия Амрикоро вориди руйхате кард, ки "дӯстони Русия нестанд".

Интихоботи порлумонии пешазмӯҳлат дар Арманистон

Райъдиҳӣ дар Арманистон

Имрӯз, 20-уми июн дар Арманистон интихоботи пешазмӯҳлати порлумонӣ баргузор мешавад.

Санаи интихобот дар пайи созиши Никол Пашиниян, сарвазири Арманистон бо мухолифин муайян шудааст. Мухолифин Пашиниянро пас аз ҷанги миёни ин кишвра бо Озарбойҷон ба нотавонӣ муттаҳам карданд. Як шарти онҳо барои берунрафт аз бӯҳрони сиёсӣ интихоботи пеш аз мӯҳлат буд.

Барои соҳиб шудан ба курсиҳо дар порлумон намояндаи 25 ҳизб рақобат мекунанд, ки дар таърихи Арманистон бесобиқа аст. Порлумон ҳукумати ояндаро тасдиқ мекунад.

Дар ин интихобот ҳизби “Созиши шаҳрвандӣ” бо раҳбарии Никол Пашиниян, сарвазири кунунӣ ва ҷумбиши “Арманистон” бо раҳбарии Роберт Кочариян, президенти собиқи ин кишвар аз рақибони аслӣ ҳисоб мешаванд.

Бар асоси рӯйхат беш аз 2,5 миллион шаҳрванди Арманистон ҳаққи ширкат дар интихоботро доранд.

Пас аз ҷанг миёни Арманистон ва Озарбойҷон дар моҳи сентябр-октябри соли гузашта садҳо нафар кушта ва захмӣ шуданд. Пас аз хатми ин ҷанг, ки бахше аз Қарабоғи Кӯҳӣ ба ҷониби Озарбойҷон гузашт, дар Арманистон бӯҳрони сиёсӣ ба вуҷуд омад. Мухолифин Никол Пашиниянро дар гузашт ба Озарбойҷон ва шикасти низомӣ муттаҳам мекунанд.

Бисмиллоҳ Муҳаммадӣ вазири дифои Афғонистон шуд

Бисмиллоҳ Муҳаммадӣ вазири дифои Афғонистон шуд

Муҳаммад Ашраф Ғанӣ, президенти Афғонистон раҳбарони ду вазорати калидӣ, вазорати дифоъ ва вазорати корҳои дохилиро иваз кард.

Ин тағйирот дар пасманзари фаъолтар шудани ҷангиёни гуруҳи Толибон гирифта шудааст, ки пай дар пай ноҳияҳои Афғонистонро таҳти назорат медароранд.

Президент Ашраф Ғанӣ гуфт, ки генерал Бисмиллоҳ Муҳаммадиро ба ҷойи Асадуллоҳ Холид вазири дифоъ пешбарӣ кард. Асадуллоҳ Холид пас аз ду соли кор аз ин мақом барканор шуд.

Ӯ ҳамчунин Абдул Саттор Мирзаквал, ки дар гузашта раиси чанд вилоят, аз ҷумла Қундуз буд, вазири корҳои дохилӣ пешбарӣ кард.

Ин ду вазир вазифаҳои худро анҷом медиҳанд, вале онҳоро бояд порлумон тасдиқ кунад.

Тағйир дар ду вазорати калидӣ дар ҳолест, ки пас аз оғози хуруҷи низомиёни ИМА сар аз 1-уми май, Толибон чанд ноҳияро дар Афғонистон аз дасти неруҳои ҳукуматӣ гирифтанд.

Мақомоти Афғонистон рӯзи 19-уми июн гуфтанд, ки идораи қариб шаш ноҳияи дигар - - дар вилоятҳои Тахор, Форёб, Ҷузҷон, Самангон, Фароҳ ва Пактиё - дар тӯли камтар аз як ҳафта ба дасти Толибон гузашт.

Гуруҳи Толибон бо давлати Афғонистон барои сулҳ музокира мекунанд, вале ҳанӯз гуфтушунид натиҷа надодааст.

Дар Афғонистон, кишвари ҳамсояи Тоҷикистон 40 сол боз ҷанг давом дорад.

Посбони сафорати Туркманистон дар Маскав худкушӣ кардааст

Даромадгоҳи сафоратхонаи Туркманистон дар Маскав

Навбатдори полис дар назди сафорати Туркманистон дар Маскав рӯзи 20 июн худкушӣ кардааст. Дар ин бора хабаргузории ТАСС ба нақл аз мақомоти полиси Русия хабар додааст. Ҷасади лейтенанти калон полисро ҳамкоронаш дар дидбонгоҳи назди сафорат пайдо кардаанд. Пулиси Маскав ҳодисаро худкушӣ унвон карда, афзудааст, ки таҳқиқи воқеа идома дорад.

Дар интихоботи зудраси Арманистон 21 ҳизб ширкат мекунад

Рафти интихобот дар яке аз ҳавзаҳои шаҳри Ереван, 20 июни соли 2021.

Дар Арманистон интихоботи пешазмуҳлати порлумонӣ ҷараён дорад. Дар он 21 ҳизби сиёсӣ, чаҳор эътилоф ва се президенти пешини ин кишвар бо ҳам рақобат доранд. Сарпарасти сарвазирии Арманистон Никол Пашинян аз ҳизби "Аҳди шаҳрвандӣ" дар муқобили эътилофи «Айастан» («Арманистон») таҳти сарварии президенти пешини Арманистон Роберт Кочарян аз пешсафони раъйдиҳӣ шумурда мешаванд. Барои даромадан ба порлумон ҳар ҳизб зарур аст, ба камияш 5 дарсад ва эътилофҳои сиёсӣ 7 дарсади орои интихобкунандагонро ба даст орад. 2,5 миллион шаҳрванди Арманистон ба рӯхат ворид карда шуда, раванди интихоботро 483 нозири байнулмилалӣ аз 8 созмони ҷаҳонӣ назорат мекунанд. Аҳзобу эътилофи мухолиф талош доранд, ҳизби Пашинян аз қудрат барканор шавад. Онҳо ин ҳизбро масъули "шикасти шармсоркунанда дар Кӯҳистони Қаробоғ медонанд.Пашинян моҳи апрели соли равон истеъфо дод, вале то интихобот сарпарастии мақоми сарвазироро идома медиҳад. Вай низ аз даст додани Қаробоғро шикасти Арманистон медонад, вале мегӯяд, танҳо бо ҳамин созишнома имкон дошт, аз ҷанги бузург пешгирӣ шавад.

Дар Австралия озмоиши эми нави зидди COVID-19 сар шуд

Нишонаи роҳнамои маркази озмоиши коронавирус дар Мелбурни Австралия

Олимони Австралия озмоиши эм ё воксини нави зидди COVID-19 – ро оғоз карданд, ки ҳамчун моеъ ба бинӣ ва димоғи инсон ворид карда мешавад. Мутахассисони ширкати австралии Nucleus Network изҳор медоранд, ки ин эм аз маҳсулоти AstraZeneca ва Pfizer дида босамартар хоҳад буд. "Садои Амрико" ҷузъиёти ихтирои олимони австралро дар матлаби вижае баррасӣ кардааст. Доктор Пол Гриффин, мудири илмии ширкати Nucleus Network, ки санҷиши кори эми навро дар дармонгоҳҳо сар кардааст, мегӯяд, воксини австралӣ хатари сироят ба коронавирусро ба охирин ҳад коҳиш медиҳад."Бартарии асосии эми нав дар он аст, ки бо ҳамон роҳи вурудии вирус ба бадан ворид карда мешавад. Мо бовар дорем, ки ин таъсири ваксинаро бештар ва даромадани вирусро ба бадани инсон пешгирӣ мекунад," - гуфт Гриффин. Аммо олимони австралӣ инро ҳам гуфтаанд, ки эми нав тақрибан пас аз ду сол дастраси одамон хоҳад шуд. Алҳол дар Австралия барои мубориза бо COVID-19 ду ваксини AstraZeneca ва Pfizer истифода мешаванд. Ин ҳафта мақомоти беҳдоштии кишвар эълом доштанд, ки эми AstraZeneca ба одамони аз шастсола боло тавсия дода мешавад. Сабаб дар он буда, ки эми мазкур дар афроди ҷавонтар кам ҳам бошад, хатари сар задани бемории тромбозро ба миён меовардааст. Мақомоти Австралия нақша доранд, эмгузаронии аҳолии 25-миллионнафараи ин кишварро то поёни соли 2021 ба анҷом расонанд. То имрӯз дар Австралия наздики 30 ҳазор нафар ба коронавирус олуда шуда, беш аз 900 нафари онҳо фавтидаанд.

Иброҳим Раисӣ дар интихоботи раёсатҷумҳурии Эрон пирӯз эълон шуд

Иброҳим Раисӣ

Мақомоти интихоботии Эрон рӯзи 19-уми июн эълом доштанд, ки Иброҳим Раисӣ ҷонибдори сиёсатҳои тунд, аз миёни номзадҳои умдатан муҳофизакорро дар интихоботи раёсатҷумҳурии Эрон бо касби ҳудуди 62 дарсади овозҳо пирӯз шуд.

Аммо интихобот бо иштироки ками мардум баргузор шуд, ки як мояи танқиди мухолифони ҳукумат аст, ки дар қабзаи рӯҳониён қарор дорад.

Созмони Афви Байналмилал дар вокуниш ба пирӯзии Раисӣ, даъвати худро ҷиҳати таҳқиқи нақши ӯ дар нопадидшавии инсонҳо, шиканҷа ва куштор "саркӯби босуръат" -и ҳуқуқи инсон, такрор кард. Аммо роҳбари руҳонии Эрон Оятуллоҳ Алии Хоманаӣ, ки дар умури сиёсӣ ва динии Эрон қудрати ниҳоиро дар даст дорад, овоздиҳиро шикасти "таблиғоти душман" номид.

Масъулини интихобот ва расонаҳои давлатӣ пас аз нисфирӯз гуфтанд, ки Раисӣ 62 дарсади овозҳоро ба даст овардааст.

Иброҳим Раисии 60-сола низоми додгоҳии Эронро раҳбарӣ мекунад ва яке аз додрасҳое буд, соли 1988 як зумра мурофиаҳои сареъро назорат мекард ки дар он ҳазорон маҳбусони сиёсӣ ба ҳукми қатл маҳкум шуда, эъдом шуданд. Созмонҳои ҳуқуқи башар мегӯянд, ки Раисӣ дар ҷиноятҳои зидди башарӣ айбдор аст ва Иёлоти Муттаҳида Амрико ӯро таҳти таҳрим қарор додааст.

Дидори вазирони корҳои хориҷии Тоҷикистон ва Эрон дар Анталияи Туркия

Вазири корҳои хориҷии Тоҷикистон Сироҷиддин Муҳриддин дар нишасти хабарӣ, Душанбе 19 майи соли 2021

Вазири корҳои хориҷии Тоҷикистон Сироҷиддин Муҳриддин рӯзи 19 июн дар ҳошияи Форуми дипломатии Анталия бо ҳамтои эронии худ Муҳаммад Ҷавод Зариф мулоқот кард. Дар ин дидор тарафҳо ба зарурати густариши ҳамкориҳои дуҷониба, ба вижа дар таъмини суботи минтақа ва пешгирии ноамнӣ дар Афғонистони таъкид карданд. Раҳбари идораи умури хориҷии Тоҷикистон аз тавсеаи ҳамкориҳои байни ду кишвар истиқбол намуд. Вазири Эрон ба зарурати ҳамкории кишвараш ва Тоҷикистон барои истодагарӣ зидди талошҳои ноором кардани минтақа ишора намуд. Зариф гуфтааст, ки барои пешгирии ноамнӣ дар Афғонистон ҳамкории зич барои Эрону Тоҷикистон зарур аст. Вай дар идома ба президенти Тоҷикистон Эмомалӣ Раҳмон барои кушодани роҳ барои раҳоии ду шаҳрванди эронии зиндонӣ дар Тоҷикистон сипосгузорӣ намудааст. Сироҷиддин Муҳриддин дар навбати худ мавзеъгириҳои Ҷумҳурии Исломиро дар пайванд бо рӯйдодҳои минтақа, бахусус дар Афғонистон арзишманд номидааст. Пас аз робитаҳои сарди чанд сол пеш, айни замон ду тарафи Тоҷикистон ва Эрон ба ҳам наздик мешаванд. Дар моҳҳои охир вазирони дифоъ ва корҳои дохилии Тоҷикистон аз Эрон сафар карданд. Дар моҳҳои феврал ва март вазирони корҳои дохилӣ ва хориҷии Эрон аз Тоҷикистон дидан намуда буданд. Дар поёни соли 2015 равобит миёни Тоҷикистону Эрон ба сардӣ гароид. Тоҷикистон ошкору ниҳон мақомоти Эронро ба пуштибонӣ аз ҳизби дар кишвар мамнӯи наҳзати исломӣ ва Теҳрон Душанберо барои гум шудани миллионҳо доллари Бобаки Занҷонӣ муттаҳам карданд. Телевизионҳои давлатии Тоҷикистон он замон чанд филми таҳиякардаи Вазорати корҳои дохилии Тоҷикистонро намоиш дода буданд, ки дар онҳо Эрон ошкору пинҳон дар қатли шахсиятҳои маъруфи тоҷик дар солҳои ҷанги шаҳрвандӣ айбдор мешуд. Аммо дар се соли ахир равобити ду кишвар рӯ ба гармӣ ниҳодааст.

Ҷасади Кэтрин Серу унвонҷӯи амрикоӣ дар Русия ёфт шуд

Кэтрин Серу

Ҷасади унвонҷӯи амрикоӣ, ки як ҳафта инҷониб дар Нижний Новгороди Русия нопадид шуда буд, пас аз кофтукоби серӯза кашф шудааст. Дар ин бора манобеи маҳаллӣ рӯзи 19-уми июн хабар доданд.

Пас аз оне ки Кэтрин Серуи 34-сола дар оғози ҳафта ба як мошин "бо марди бегона" нишаст, беному нишон шуд, полис тафтишотро оғоз кард. Модари Серу, ки дар аёлати Миссисипи ба сар мебарад, ба Радиои Миллии Ҷамъиятии ИМА (NPR) гуфт, ки вай бори охир рӯзи 15 июн аз духтараш паёмаке гирифт, ки дар он навишта шудааст: "Дар мошин бо марди ношинос ҳастам. Умедворам, ки маро рабуданӣ нестанд. "

Гуфта мешавад, ки афсарону беш аз 100 нафар ихтиёриён минтақаи ҷангалро дар беруни шаҳр, ки дар 400 километрии шарқи Маскав ҷойгир аст, ҷустуҷӯ мекарданд.

Бино ба гузоришҳо, Серу ду сол пеш хонаи худро дар аёлати Калифорния, барои харҷи сафар ба Русия ҷиҳати омӯзиши забон фурӯхта буд. Баъдан ӯ барои шомил шудан ба факултаи ҳуқуқшиносӣ ҳуҷҷат супурдааст. Ба иттилои Радиои Миллии Ҷамиятии Амрико Кэтрин тирамоҳи соли 2019 ба бахши магистри ҳуқуқи Донишгоҳи Лобачевский дар Нижний Новгород шомил шуда буд.

Як созмони ихтиёриёни ҷустуҷӯгар ва наҷотбахшони Русия “Рис”, ки ихтиёриёнаш дар ҷустуҷӯи одамони нопадидшуда кӯмак мекунанд, хабари пайдо шудани ҷасадро нашр карда ва ба оилаи Кэтрин Серу изҳори тасаллият баён карданд.

Президенти Узбекистон хостори санҷиши солонаи варзишгарии аҳолӣ шуд

Яке аз толорҳи варзиш дар шаҳри Тошканд

Бино бар дастури президенти Узбекистон Шавкат Мирзиёев, сар аз 1 августи соли равон дар ин кишвар низоми баҳодиҳӣ ба сатҳи омодагии ҷисмонии сокинон ҷорӣ мешавад. Аз ин ба баъд дар Узбекистон соле як бор шуғли аҳолӣ ба варзиш ба таври сабқат санҷида хоҳад шуд. Ба иштирокдорони мусобиқа вобаста ба мақоми ишғолкарда ва сатҳи омодагиашон унвонҳо дода мешавад. Ба ҷуз ин, шахсоне, ки талаботи махсуси варзиширо иҷро мекунанд, дар давоми сол аз имтиёзҳое бархурдоранд. Барандагони ҷойҳои аввал бе имтиҳон ба "Мактаби Темурбекҳо" дохил шуда, ташхисашон дар муассисаҳои тиббии бисёрсоҳагӣ ройгон хоҳад буд. Мақомоти Узбекистон мегӯянд, ҳадаф аз ин дастур оммавӣ гшардондани варзиш ва ҳифзи тандурустии аҳолӣ аст.

Амрико мегӯяд, ки агар Русия ба Украина ҳамла кунад, кӯмаки 'фаврӣ' омода аст

Ҷейн Псаки, сухангӯи Кохи Сафед

Кохи Сафед рӯзи 18-уми июн гуфт, ки Иёлоти Муттаҳидаи Амрико дар сурати ҳамлаи низомии Русия ба Украина кӯмакҳои низомии фавқулодда омода кардааст.

Ҷейн Псаки, сухангӯи Кохи Сафед, дар изҳороте гуфт, хабарҳои охири расонаҳои Амрико дар робита ба он, ки ИМА аз расонидани ёриҳои низомӣ ба Украина худдорӣ меварзад “сафсата” аст.

Ҳафтаи охир нашрияи “Politico” ва “The Washington Post” хабар доданд, ки маъмурияти президент Ҷо Байден як бастаи кӯмаки низомӣ ба Украинаро ба маблағи даҳҳо миллион доллар ҷудо кардааст, ки дар он силоҳи марговар ҳам ҳаст. Бастаи эҳтимолӣ, ки гуфта мешуд силоҳ ва мушакҳои зиддитонкиро дар бар мегирад, дар посух ба афзоиши нерӯҳои Русия ва таҷҳизоти низомии Русия дар наздикии марзҳои Украина баҳори имсол таҳия шуд. Расонаҳои Амрико хабар доданд, ки Иёлоти Муттаҳида ин пешниҳодро дар пасманзари он, ки Русия моҳи апрел гуфт, ният дорад шумори сарбозонашро дар наздикии марзи Украина 100 ҳазор кам кунад, муваққатан боздошт.

Бо вуҷуди эълони хуруҷ, мақомоти Амрикову Украина мегӯянд, ки Русия баъзе таҷҳизоти низомиро дар ҷои худ боқӣ гузоштааст, ки бо истифода аз онҳо дар сурати ташаннуҷи вазъ, нерӯҳои худро метавонад зуд сафарбар кунад. Иёлоти Муттаҳида аз соли 2014 ба ин сӯ ба Украина ба маблағи беш аз 2,5 миллиард доллар кумаки низомӣ расондааст.

“Ин андеша, ки мо кӯмаки низомиро ба Украина бозмедорем, сафсата аст. Танҳо ҳафтаи гузашта - дар арафаи ҳамоиши ИМА ва Русия - мо 150 миллион доллар кӯмаки низомӣ аз ҷумла силоҳи марговар расондем, - гуфт Псаки дар изҳороти худ. Ӯ афзуд, "Мо ҳамчунин будҷаи эҳтимолиро ба Украина дар сурати ҳамлаи Русия ба ин кившар омода кардаем”.

Ноиб-сарвазири пешини Қирғизистон дар доираи парвандаи "Қумтор" боздошт шуд

Тойирбек Сарпашев, ноиб-сарвазири пешини Қирғизистон

Кумитаи давлатии амнияти миллии Қирғизистон дар доираи таҳқиқи парвандаи ҷиноии фасодкорӣ дар кони тилои "Қумтор" ноиб-сарвазири пешини ин кишвар Тойирбек Сарпашевро боздошт кард. Тафтишот муайян кардааст, ки Сарпашев "дар ҳамдастӣ бо роҳбарияти олии Қирғизистон ва намояндагони ширкати канадагии Centerra Gold Inc. рафторе содир кардааст, ки бар зарари муҳити зисти Қирғизистон равона шудааст". Тафтишот мегӯяд, "Тойирбек Сарпашев дар замони ноиб-сарвазир буданаш монеи қабули қонун дар бораи "Пиряхҳо" шудааст. Қонуни мазкур ба ҳифзи пиряхҳо равона шуда буд". Мақомоти Қирғизистон то ин замон чанде дигар аз мансабдорони пешини он кишвар ва вакилонро бо гумони фасодкорӣ дар кони тилои "Қумтор" боздошт карданд.

Барои матолиби тундравона 20 корбари Телеграм дар Узбекистон боздошт шуданд

Акс аз бойгонӣ

Раёсати пулиси вилояти Сирдарёи Узбекистон аз боздошти 20 сокини ноҳияҳои Мирзообод ва Янгиёри вилоят бо гумони паҳн кардани матолиби экстремистӣ тавассути паёмакрасони Телеграм хабар додааст. Ба огаҳии раёсат, гумонбарон 16 июни соли равон дар натиҷаи як амалиёти муштараки Вазорати корҳои дохилӣ ва Хадамоти амнияти давлатии Узбекистон боздошт шудаанд. Боздоштшудаҳо ба паҳн кардани матолиби садоию видеоие тавассути паёмакрасони Телеграм айбдор мешаванд, ки "созмонҳои террористӣ ва экстремистиро таблиғ мекунанд". Пештар Раёсати пулиси вилояти Ҷизахи Узбекистон низ аз боздошти гуруҳе хабар дода буд, ки гӯиё мехостанд ба созмони мамнуи "Катиба Тавҳид ва ал-Ҷиҳод" дар Сурия бипайванданд.

Дар Қирғизистон 870 ҳолати нави сирояти COVID-19 ошкор гашт

Даромадгоҳи "минтақаи сурх" дар яке аз бемористонҳои шаҳри Бишкек

То субҳи 19 июн дар Қирғизистон 870 ҳолати сирояти коронавирус ва пневмония ошкор карда шуд. Дар ин бора Вазорати тандурустӣ ва рушди иҷтимоии Қирғизистон хабар додааст. Гуфта мешавад бори охир чунин нишондиҳандаи баланд моҳи июли соли гузашта ба қайд гирифта шудааст. 25 июли соли 2020 дар ин кишвар 877 ҳолати нави сирояти коронавирус ошкор шуда буд. Шумораи беморони COVID-19 дар Қирғизистон аз оғози ҳамагирӣ ё пандемия то ҳоло 114 ҳазору 300 нафарро ташкил дод. Дар ин муддат 1925 нафар фавтидаанд. Аз аввали моҳи июни имсол дар ин кишвари ҳаммарзи Тоҷикистон афзоиши шумораи сироятёфтагон ба мушоҳида мерасад, ки онро "мавҷи сеюм" -и COVID-19 донистаанд. Биноан, шаҳрдориҳои Бишкек ва Ош дубора дар фаъолияти муассисаҳои фароғатӣ ва нуқтаҳои хӯроки умумиро маҳдуд карданд. Ситоди фаврии ҷумҳуриявии зидди коронавирус тавсия дод, ки шаҳрвандон ба Бишкек ва вилоятҳои Чу ва Ош, ки дар он ҷо вазъи эпидемиологӣ бад аст, сафар накунанд. Қирғизистон аз 21 майи соли равон марзҳояшро бо Тоҷикистон ба тври якҷониба бастааст. Тоҷикистон аз моҳи январ ба ин сӯ мегӯяд, дар ин кишвар ягон ҳолати сироят ба COVID-19 ошкор нагаштааст.

Дар интихоботи президентии Эрон номзадҳои муҳофизакор бартарӣ доранд

Раҳбари олии Эрон Оятуллоҳ Алии Хоманаӣ пас аз раъй додан дар интихобот бо хабарнигорон суҳбат мекунад, 18-уми июни 2021.

Шаҳрвандони Эрон рӯзи 18-уми июн барои интихоби президенти нав райъ доданд. Доираи номзадҳо ба мақоми раёсатҷумҳурӣ хеле маҳдуд ва афроди санҷидашудаи низом буданд ва дар миёни онҳо муҳофизакорони ашаддӣ бартарӣ доранд.

Интизор меравад, ки рӯҳониии муҳофизакор Иброҳим Раисӣ дар интихоботи рӯзи 18-уми июн ба осонӣ пирӯз шавад. Зеро бисёре аз рақибони эҳтимолии ӯ аз ҷониби Шӯрои нигаҳбони таҳти назорати раҳбари олии Эрон Оятуллоҳ Алии Хоманаӣ аз сабқат боздошта шуданд. Тибқи иттилои Вазорати корҳои дохилӣ, натиҷаҳои аввали интихобот рӯзи 19-уми июн баъд аз зӯҳр ва натиҷаҳои ниҳоӣ, рӯзи 20-уми июн эълон мешаванд.

Иброҳим Раисии 60-сола низоми додгоҳии Эронро раҳбарӣ мекунад ва яке аз додрасҳое буд, соли 1988 як зумра мурофиаҳои сареъро назорат мекард ки дар он ҳазорон маҳбусони сиёсӣ ба ҳукми қатл маҳкум шуда, эъдом шуданд. Созмонҳои ҳуқуқи башар мегӯянд, ки Раисӣ дар ҷиноятҳои зидди башарӣ айбдор аст ва Иёлоти Муттаҳида Амрико ӯро таҳти таҳрим қарор додааст.

Бинобар пешбинии таҳлилгарон пирӯзии Раисӣ дар интихобот аз бештар шудани нуфузи онҳое, ки зидди ғарб ҳастанд гувоҳӣ медиҳад, ки бар зиёни таҳамулгароён, ба мисли Ҳасани Рӯҳонӣ аст, ки ду давра раисҷумҳур буд. Ӯро аз меъморони асосии созишномаи ҳастаии соли 2015 меноманд, ки мувофиқи он Эрон ба маҳдуд кардани барномаи ҳастаии худ дар ивази сабук кардани таҳримҳо розӣ шуд. Ҳам Теҳрон ва ҳам Вашингтон гуфтанд, ки мехоҳанд ин созишномаро, ки соли 2018 аз ҷониби маъмурияти президенти пешини ИМА Доналд Трамп бекор шуд, барқарор кунанд.

Музокирот барои эҳёи созишнома моҳи апрели 2021 аз сар гирифта шуд. Аммо Хоманаӣ гуфт, аз панҷ қудрати ҷаҳонӣ, ки дар ибтидо созишномаро бо Теҳрон имзо кардаанд, “амал мехоҳад, на ваъда”. Дар ҳоле ки Теҳрон бо барқарор кардани анборҳои ғанишудаи уран ва тақвияти имконоти ғанисозии уран то сатҳи баландтар бандҳои созишномаро нақз мекард. Қабл аз рӯзи интихобот Шӯрои нигаҳбон, ки мустақиман аз ҷониби Хоманаӣ таъин мешавад, аксарияти кулли номзадҳои эҳтимолии ислоҳотхоҳро аз байн бурд ва имкони Раисиро тақвият бахшид.

Макей ва Лавров сарнавишти Сапегаро баррасӣ карданд

25 май. Акс аз саҳнаи гӯё дар қонуншиканӣ иқрор шудани София Сапега гирифта шудааст

Рӯзи 18 май дар Маскав вазири хориҷаи Беларус Владимир Макей бо ҳамтои русаш Сергей Лавров сарнавишти шаҳрванди дар Минск боздоштшудаи Русия София Сапега, дӯстдухтари блоггери ҳабсшуда Раман Пратасевичро баррасӣ кардааст. Дар як нишасти хабарие, ки 18 июн дар Маскав ҷараён гирифт, Лавров ба хабарнигорон гуфт, ки Макей ӯро дар бораи парвандаи ҷиноии Сапега ва ҳам як шаҳрванди дигари боздоштшудаи Русия Егор Дудников хабардор кард. Дудников моҳи маи соли ҷорӣ барои ширкат дар намоишҳои эътирозии зидди раҳбари худкомаи Беларус Александр Лукашенка боздошт шуд. Лавров гуфт, “сафорати Русия дар Минск ин қазияҳоро таҳти назорати ҷиддӣ қарор додааст” ва афзуд, ки умедвор аст вазъияти атрофи Сапега ва Дудников “базудӣ ҳал мешавад”. Ӯ аз додани ҷузъиёт худдорӣ кард.

Мақомоти беларусӣ рӯзи 23 май Сапега ва Пратасевичро аз ҳавопаймои ширкати тиҷоратии Ryanair, ки аз Атен ба Вилнюс парвоз мекарду онро маҷбуран дар Минск фуруд оварданд, боздошт карданд. Фуруди маҷбурии ҳавопаймо дар Минск, ки аз як кишвари аврупоӣ ба дигараш парвоз мекард, мавриди маҳкумияти кишварҳои ғарбиву аврупроӣ шуд. Вале додгоҳи Беларус дар ҳукми 14 июнаш гуфт, ки Сапега озод намешавад ва боздошти ӯ қонунӣ буд.

Файзов гуфт, ба қабули паноҳандагони эҳтимолӣ аз Афғонистон бояд омода шуд

Ёдгор Файзов, раиси Вилояти Мухтори Кӯҳистони Бадахшон

Ёдгор Файзов, раиси Вилояти Мухтори Кӯҳистони Бадахшон аз вазъи Афғонистон ва таъсири эҳтимолии он ба Тоҷикистон нигаронӣ кардааст.

Дар хабарномаи нашршуда дар рӯзи 18-уми июн дар саҳифаи фейсбукии ҳукумати ин вилоят, раиси ВМКБ вазъ дар ноҳияи Баҳорак, Зебок ва Моҳи Майи Афғонистонро, ки дар наздикии сарҳади Тоҷикистон қарор доранд, “мураккаб” номидааст.

Ба гуфтаи Файзов, “гуруҳҳои тундрав аксари минтақаҳои сарҳадиро таҳти тасарруф қарор дода, ба инфрасохтори кишвари ҳамсоя хисороти моливу ҷонӣ ворид намуданд.”

“Вазъияти ноамн дар кишвари ҳаммарз - Афғонистон моро ҳушдор медиҳад, ки суботи дохилиро таъмин намоем, дар ҳолатҳои эҳтимолии халалдор сохтани марзи давлатӣ баҳри муҳофизати хоки муқаддаси кишвар истодагарӣ намуда, аксуламали ҷавобиро аз худ нишон диҳем.”,--гуфтааст раиси ВМКБ.

Вилояти Мухтори Кӯҳистони Бадахшони Тоҷикистон марзи тӯлонӣ бо вилояти Бадахшони Афғонистон дорад. Дар чанд ноҳияи вилояти Бадахшони Афғонистон ҷанг миёни Толибон ва нерӯҳои ҳукуматӣ давом дорад. Ёдгор Файзов дар ҷаласае гуфтааст, ки маҳсулоти ниёзи аввалро дар ин вилоят бояд захира кунанд ва барои қабули паноҳандагони эҳтимолӣ омодагӣ гиранд.

Ба гуфтаи ӯ, сокинон бо марзбонон барои ҳифзи сарҳад кӯмак мекунанд ва даъват кардааст, ки барои ҳифзи марз бояд ҳама дар ҳолати омодабош қарор дошта бошанд.

Борҳо мақомоти Тоҷикистон аз ҷамъ шудани гуруҳҳои тундрав дар наздикиҳои марзи Афғонистон бо ин кишвар хабар дода буданд.

Вазъи амниятии Афғонистон пас аз эълони хуруҷи низомиёни Амрико пас аз 20 соли ҳузур дар ин кишвар бадтар шудааст. Гуфтушунидҳои сулҳ миёни Толибон ва ҳукумати Афғонистон ҳанӯз натиҷа надодааст.

Лавров эҷоди пойгоҳи низомии Туркия дар Озарбойҷонро "як овоза" номид

Сергей Лавров, вазири хориҷаи Русия

Вазири умури хориҷии Русия Сергей Лавров сарусадоро дар бораи ин ки Туркия дар хоки Озарбойҷон як пойгоҳи низомӣ месозад, ҳамчун “овоза” рад кард. Президенти Туркия Раҷаб Тайиб Эрдуғон зимни боздидаш аз Боку ҳафтаи ҷорӣ бунёди як пойгоҳи низомии Туркия дар хоки Озарбойҷон бар пояи созишномаи рӯзи 15 июн бо президенти ин кишвар Илҳом Алиев имзошударо аз эҳтимол дур надонист. Аҳдномаи Шуша оид ба равобити шарикии миёни Озарбойҷон ва Туркия рушди ҳамкориҳои низомии миёни Анкара ва Бокуро пешбинӣ мекунад. Дар нишасти матбуотие, ки рӯзи 18 июн дар Маскав аз ҷониби Сергей Лавров ва вазири хориҷаи Беларус Владимир Макей барпо шуд, аз дипломати баландпояи рус пурсиданд, ки то куҷо ин эҳтимол воқеӣ аст. Лавров гуфт, ки ин мавзӯъ баррасӣ нашудаст ва афзуд, ки “мо овозаҳоро шарҳ намедиҳем”. Дмитрий Песков, сухангӯи Кремлин рӯзи ҷумъа гуфт, ки Маскав таҳаввулоти атрофи эҳтимоли эҷоди пойгоҳи туркӣ дар хоки Озарбойҷонро пайгирӣ мекунад. Песков гуфт, ки Русия замони ба субут овардани вазъ дар Қафқози Ҷанубӣ баъди ҷанги шашҳафтаинаи миёни Арманистону Озарбойҷон бар сари минтақаи ҷудоиталаби Қаробоғи Кӯҳӣ бо Туркия дар тамоси наздик қарор дошт.

Мулоқоти Муҳриддин ва Боррел: аз ҳуқуқи башар то мубориза бо терроризму Афғонистон

Вазири хориҷаи Тоҷикистон Сироҷиддин Муҳриддин ва раиси сиёсати хориҷии ИА Жозеп Боррелл дар мулоқоти 17 июн дар Анталия. Акс аз mfa.tj

Мақомоти Иттиҳоди Аврупо ва Тоҷикистон ҷараёни иҷрои стратегияи нави ИА дар Осиёи Марказиро баррасӣ карданд. Вебсайти ВКХ Тоҷикистон менависад, рӯзи 17 июн дар ҳошияи Форуми дипломатӣ дар шаҳри Анталияи Туркия вазири корҳои хориҷии Тоҷистон Сироҷидин Муҳриддин ва масъули сиёсати хориҷии ИА Жозеп Боррел ҷараёни ҳамкориҳои дуҷониба, стратегияи нави ИА барои ОМ ва ҳам тарҳҳои дуҷонибаро баррасӣ карданд. Дар хабар омадааст, ки инчунин “гуфтугӯи судманд перомуни масоили марбут ба амнияту суботи минтақа, вазъ дар Афғонистон, хатари терроризму ифротгароӣ” ва дигар масъалаҳо сурат гирифт.

Ҷузъиёти бештари ин гуфтугӯҳо нашр намешавад.

Стратегияи нави ИА барои ОМ моҳи июни соли 2019 дар Люксембург қабул шуд. Бар асоси ин санад роҳандозии ҳамкориҳои наздики ИА бо кишварҳои минтақа дар масоили мисли ислоҳоти сиёсиву ҳуқуқи башар, кӯмак дар рушди иқтисодӣ ва ҷалби сармояҳо, мустақилияти додгоҳӣ ва тақвияти иқтисоди бозаргониро дар назар аст. Дар матни стратегияи ИА барои ОМ гуфта шудааст, ки мизони кӯмакҳои ИА ба Тоҷикистон солона аз 20 миллион еврои оғози солҳои 2000-ум то 33 миллион евро дар солҳои охир афзоиш ёфтааст. ИА дар солҳои 2014-2020 ба Тоҷикистон дар маҷмӯъ 227 миллион евро кӯмак кардааст.

Яке аз масоили мавриди таваҷҷӯҳи ИА дар Тоҷикистон риоя шудани ҳуқуқи башар мебошад. Дар хабари ВКХ Тоҷикистон ҳам мухтасар омадааст, ки дипломатҳои тоҷику аврупоӣ «тақвияти муносибатҳои Иттиҳоди Аврупо ва Тоҷикистонро дар чаҳорчӯби …муколамаҳои сиёсӣ ва амниятӣ ва ҳуқуқи инсон муҳим хонданд».

Дар солҳои ахир дар ҳар як ҷаласаи машваратии дуҷониба мақомоти Брюссел талош мекунанд, аз ҷумла, шароити мусоиди кор барои матбуоти мустақил ва озод шудани зиндониҳои сиёсии мисли ҳуқуқшиносон Бузургмеҳр Ёровро матраҳ кунанд. Маъмулан ин баррасиҳо пушти дарҳои баста мегузарад. Мақомоти тоҷик пайваста иддао кардаанд, ки дар Тоҷикистон «маҳсубони сиёсӣ» нестанд ва ҳамаи онҳое, ки пушти панҷара рафтаанд, «барои нақзи Кодекси ҷиноӣ» маҳкум шудаанд. Вале кишварҳои ҳамкори Тоҷикистон дар Ғарбу Аврупо ва ҳам ҳомиёни ҳуқуқ таъқиби дигарандешону мухолифони ҳукумати Тоҷикистонро бахусус баъди дар соли 2015 манъ шудани фаъолияти Ҳизби наҳзати исломии Тоҷикистон яке аз намунаҳои барҷастаи саркӯби озодиҳо дар ин кишвар меноманд. Даҳҳо шаҳрванди Тоҷикистон баъди ин ҳодисаҳо дар кишварҳои Аврупо паноҳанда шудаанд.

Сироҷиддин Муҳриддин, ки дар Анталияи Туркия ба сар мебарад, рӯзҳои 18 ва 19 июн Тоҷикистонро дар Форуми дпломатӣ намояндагӣ мекунад, ки аз ҷониби ВКХ Туркия ташкил шудааст. Ин нишаст, ба навиштаи оҷонсии русии ТАСС, ба баррасии нақши дипломатия дар давраи муосир бахшида шуда, дар кори он беш аз 40 раҳбари давлату намояндаҳои дипломатии кишварҳои мухталиф, кормандони созмонҳои байналмилалӣ ва муҳаққиқону матбуот иштирок мекунанд.

Идомаи муҳокимаи гумонбари қатли Ҳувайдо

Ҳувайдо Тиллозода фарзанди муҳоҷирони тоҷик буд, ки дар шаҳри Серпухово зиндагиву кор мекарданд

Интизор меравад, ҳафтаи оянда баррасии парвандаи Александр Сёмин, фарди муттаҳам дар таҷовуз ва қатли Ҳувайдо Тиллозода, шаҳрванди панҷсолаи Тоҷикистон аз сар гирифта шавад. Абдусалом Саидов, падари Ҳувайдо 18 июн дар сӯҳбат бо Радиои Озодӣ гуфт, аз онҳо даъват кардаанд, ки рӯзи 22 юми июн ба додгоҳи вилояти Маскав барои ширкат дар муҳокима ҳозир шаванд. Ҳамин додгоҳ рӯзи 9-уми апрел қарор карда буд, ки Александр Сёмин бемори рӯҳӣ нест ва ин навбат на ба беморхонаи рӯҳӣ, балки ба боздоштгоҳи муввақатӣ интиқол дода шавад. Аз соли 2018, замони содир шудани куштор Сёмин дар Беморхонаи бемориҳои рӯҳӣ нигаҳдорӣ мешуд. Масъулони сафорати Тоҷикистон мегӯянд, мурофиаро зери назорат доранд, то одилона баррасӣ шавад. Куштори бераҳмонаи духтари муҳоҷирони тоҷик ва давоми се сол бенатиҷа будани талошҳо барои ҷазо додани гумонбари асосӣ мояи нороҳатии бисёр афроди огоҳ аз ин қазияи мудҳиш шудааст.

$329 млн дар семоҳаи 2021 - пули фиристдаи муҳоҷирони тоҷик

Гурҷистон ҳам яке аз кишварҳоест, ки шаҳрвандони зиёдаш дар хориҷа кор карда ба оилаҳояшон пул мефиристанд

Бонки Марказии Русия омори сармояеро нашр кард, ки шахсони воқеӣ дар семоҳаи аввали имсол ба берун аз кишвар фиристодаанд. Тибқи он, Тоҷикистон аз лиҳози ҳаҷми интиқоли пул аз Русия байни кишварҳои ИДМ дар ҷойи сеюм мебошад. Тавре аз рақамҳо бармеояд, муҳоҷирони тоҷик дар ин давра ба ватан 329 миллион доллар фиристодаанд, ки дар қиёс ба соли гузашта 9 дарсад камтар будааст. Имсол аз ҳама бештар зодагони Узбекистон аз Русия ба кишвари худ пул фиристоданд. Ҷойи дуввумро дар ин амал Қирғизистон гирифтааст. Ин омори Бонки марказии Русия дар ҳоле нашр мешавад, ки равуои мунтазами ҳавоӣ байни Душанбеву Маскав аз 1-уми апрел оғоз шуд ва шаҳрвандони Тоҷикистон баъди тақрибан як соли баста будани марзҳо имкон ёфтанд, ба Русия сафар кунанд. Соли гузашта муҳоҷирони кории тоҷик аз Русия 1 миллиарду 741 миллион доллар фиристода буданд. Бисёре аз онҳо дар авҷи паҳншавии коронавирус бино бар ҷорӣ шудани карантин бекор ва бемаош монданд ва натавонистанд ба оилаҳояшон пул фиристанд. Мақомоти Тоҷикистон, ки аз эълони миқдори ин маблағҳо худдорӣ мекунанд, иқрор намудаанд, ки дар ин давра расидани пули муҳоҷирон ба кишвар ба маротиб кам шудааст.

Баррасии интиқоли нирӯи корӣ ба Русия тавассути қаторҳои чартерӣ

Русия мехоҳад то нимаҳои моҳи июл тариқи поездҳои чартерӣ муҳоҷиронро ба ин кишвар интиқол бидиҳанд. Нашрияи “Коммерсант” менависад, ки Вазорати кишоварзӣ ва ширкати Роҳи оҳани Русия масъалаи ташкили хатсайрҳои чартерӣ барои овардани коргарон аз кишварҳои ҳамсояро матраҳ доранд. Ба бовари мақомоти рус, аз ин тариқ метавон мушкили камбуди нерӯи кориро дар бахши кишварзӣ ҳал кард. Тибқи нақша дар соли ҷорӣ ба корҳои мавсимии кишоварзӣ дар Русия ҷалб кардани беш аз 38 ҳазор коргар дар назар аст. Ба гуфтаи вазорати кишоварзии Русия феълан муҳоҷирон танҳо тариқи ҳавопаймо имкони сафар ба Русияро доранд, ки интиқол аз ин роҳ 80 ҳазор рублро ташкил медиҳад. Овардани нерӯи корӣ тавассути Роҳи Оҳан 12 ҳазор рубл харҷ хоҳад дошт.

АП: Мусофирони ҳавопаймои Челябинск ва Барнаул дар Хуҷанд дармонданд

Фурудгоҳи Хуҷанд. Акс аз соли 2017

Рӯзи 17 июн садҳо мусофире, ки тариқи ширкати “Уралские авиалинии” ба шаҳрҳои Челябинск ва Барнаули Русия сафар доштанд, дар фурудгоҳи Хуҷанд дармонданд. Як масъули намояндагии ин ширкати ҳавоӣ ба хабаргузории “Азия-плюс” гуфтааст, ки парвозҳо ба далели мушкилоти техникии ҳавопаймо ба таъхир афтодаанд. Дар натиҷа тақрибан 440 мусофир сари вақт парвоз накарда, гурӯҳе аз онҳо маҷбур шуданд шабро дар фурудгоҳ рӯз кунанд. Дар ҳамин ҳол ширкати ҳавоии Тоҷикистон “Сомон Эйр” ба Радиои Озодӣ гуфт, ки ҷорӣ шудани маҳдудияти вобаста ба пандемия дар пойтахти Русия ба ҷадавали парвозҳои онҳо таъсир нарасондааст. Ба қавли ширкат, айни замон ҳавопаймоии "Сомон Эйр" парвозҳои мунтазамро ҳафтае ду маротиба, яъне рӯзҳои сешанбе ва ҷумъа бо хатсайри Душанбе-Маскав-Душанбе иҷро менамояд. Вақти парвоз аз Душанбе соати 8 ва аз Москва 11:50 дақиқа ба вақти маҳаллӣ мебошад.

Дар Амрико Рӯзи озодии ғуломон ҷашни сартосарӣ эълом шуд

Ҷо Байден, раиси ҷумҳури Амрико.

Ҷо Байден, президенти ИМА рӯзи панҷшанбе тарҳи қонунеро дар бораи эътирофи 19 июн ҳамчун ҷашни саросарии бекоршавии ғуломдорӣ дар Амрико имзо кард.

Ҳангоми муҳокимаи тарҳи қонун дар Маҷлиси намояндагони ИМА, Шейла Ҷексон Лӣ, вакил аз аёлати Техас гуфт, "ғуломдорӣ гуноҳи аслии Амрико буд".

Техас расман 19 июнро дар соли 1980 ҳамчун Рӯзи бекоршавии ғуломӣ эълом карда буд. Ин рӯз дар солҳои баъдӣ дар иёлоти дигари ИМА қабул шуд. Бино ба қонуни нав, 19 июнро дар Амрико "Рӯзи истиқлоли миллии 19 июн" унвон карданд.

19 июн 11-умин ҷашн дар ИМА аст, ки дар сатҳи ҷумҳурӣ таҷлил мешавад. Дар ин рӯйхат ҷашнҳое амсоли Таваллуди Масеҳ, Соли нав, Рӯзи хайрхоҳӣ, Рӯзи истиқлол ва ғайра шомил ҳастанд.

Ёфтҳои бештар

XS
SM
MD
LG