Пайвандҳои дастрасӣ

Хабари нав

Хабарҳо

Тасвиби барномаи 10-солаи рушди CAREC дар Боку

Кишварҳои узви CAREC – Ҳамкории иқтисодии минтақаи Осиёи Марказӣ- дар Боку стротежии рушди ин паймон то соли 2020-умро тасвиб карданд. Мудири Бонки Осиёии рушд Харухито Курода гуфт, аз ин барнома ҳамаи 10 кишвари узви паймон ҳимоят карданд. Ба хутути иқтисодӣ табдил додани хутути нақлиётӣ, таъмини роҳҳои мӯътамаду амни содироти маҳсулоти энержӣ, ташвиқи тиҷорат, сабук кардани ҳамлу нақли молу коло тавассути марзҳо аз ҷумлаи муҳимтарин нукоти стротежии нави CAREC гуфта мешавад. Ҳазинаи 27 тарҳи ҷадиди ин паймон 50 миллиард доллар баровард шудааст, ки назар ба даҳаи қаблӣ 3 маротиба бештар аст. Ин паймон 5 кишвари Осиёи Марказӣ, Озарбойҷон, Афғонистону Покистон ва Чину Муғулистонро муттаҳид мекунад.

Ҳамаи хабарҳои имрӯзро дар инҷо бихонед

Шаҳрвандони бандмондаи Русия дар "Фотеҳобод" ҳанӯз иҷозаи сафар надоранд

Акс аз бойгонӣ

Мақомоти Русия гуфтанд, садҳо шаҳрванди бандмондаи ин кишвар дар гузаргоҳи "Фотеҳобод", дар марзи Тоҷикистону Узбекистон, ҳанӯз иҷозаи сафар надоранд.

Сафорати Русия дар Душанбе рӯзи 13-уми июл дар Фейсбук навишт, ҳанӯз дар ин замина ризояти ҳукуматҳои Узбекистону Қазоқистон ба даст наомадааст. Қаблан сафорат гуфта буд, ки Тоҷикистон ба гузаштани шаҳрвандони Русия иҷоза додааст.

"Ҳамкорони мо дар Тошканду Нурсултон ҷузъиёти сафари шаҳрвандонро бо дарназардошти вазъи пешомада аз коронавирус дар Узбекистону Қазоқистон баррасӣ доранд", -- омадааст дар хабари сафорат.

Мақомоти намояндагии расмии Русия дар Тоҷикистон гуфтаанд, ба онҳое, ки майли бозгашт бо ҳавопайморо доранд, кумак карда метавонанд. Садҳо шаҳрванди Русия ва шаҳрвандони Тоҷикистон, ки ҳамзамон шиносномаи ин кишварро доранд, мехоҳанд бо мошинҳои худ ба Русия бираванд. Онҳо ҳафтаҳо боз дар марзи Тоҷикистону Узбекистон мунтазир истодаанд.

Ба сабаби густариши бемории коронавируси нав кишварҳои Осиёи Марказӣ марзҳои худро бастаанд. Убури шаҳрвандон танҳо бо ризояти ҳукуматҳо имконпазир ҳаст.

То ин дам Тоҷикистон садҳо шаҳрванди бандмондаи худро дар Қазоқистон бо ёрии Созмони Ҷаҳонии Муҳоҷират, Амрикову Норвегия ва ЮНИСЕФ ба ватан баргардонд.

Даҳҳо захмӣ ва кушта дар ҳамла ба раёсати амнияти Самангон

Сарбозони афғон дар Самангон

Абдулатиф Иброҳимӣ, волии Самангон, гуфт, чаҳор ҳамлавари интиҳориро, ки баъд аз таркиши мошини бобмгузоришуда вориди раёсати амнияти миллӣ шуда буданд, куштаанд ва даргирӣ поён ёфтааст. Вай афзуд, дар ин ҳодиса, ки 13-уми июл рӯй дод, 43 фарди мулкӣ, аз ҷумла занону кӯдакон захмӣ ва даҳ нирӯи амниятӣ кушта шуданд. Забеҳуллоҳ Муҷоҳид, сухангӯи гуруҳи Толибон, дар паёме ба расонаҳо иддао кардааст, ки дар ин ҳамла беш аз ҳафтод нирӯи амниятии Самангонро куштаву захмӣ кардаанд. Волии Самангон ин иддаои Толибонро рад намуд. Ҳамлаварон аввал мошини бомбгузоришударо дар Ойбек, дар наздикии биноҳои давлатӣ, тарконданд. Волии Самангон ба Радиои Озодӣ гуфт, инфиҷор ба ҳадде нирӯманд буд, ки ба хонаҳои атроф осеб расондааст. Ҳафтаҳои ахир бар асари ҳамлаҳои ҷангҷӯёни Толибон дар саросари Афғонистон садҳо нирӯи амниятӣ ва афроди мулкӣ кушта шудаанд.

Cабти IMEI-и телефонҳои мобилӣ дар Тоҷикистон аз август оғоз мешавад

Илҳомҷон Атоев

Сабти дастгоҳҳои электронӣ дар Тоҷикистон аз моҳи август шуруъ хоҳад шуд. Дар ин бора Илҳомҷон Атоев, муовини раиси Хадамоти алоқаи Тоҷикистон, рӯзи 13-уми июл дар нишасти матбуотӣ хабар дод.

Ҳукумати Тоҷикистон сабти рақами IMEI-и ҳама гуна телефонҳои мобилӣ, планшет ва ноутбукҳоро моҳи марти ҳамин сол ҳатмӣ кард. Шакли кӯтоҳшудаи IMEI - Рақами байнулмилалии дастгоҳи мобилӣ аст, ки ҳар телефони мобилии истеҳсолшуда дар ҳар гӯшаву канори ҷаҳон новобаста ба навъу тамғааш онро дорад.

Мақомот ва ширкатҳои мобилӣ тавассути ин рақам як телефони мобилиро аз дигар фарқ мекунанд. "Феълан мақомоти масъули давлатӣ ҳамроҳ бо ширкатҳои мобилӣ шеваи сабти IMEI-ро баррасӣ доранд", -- гуфт Атоев.

Қарор аст, шаш моҳи аввали сабтиноми дастгоҳҳо ройгон сурат гирад. Ҳанӯз маълум нест, кадом ширкат бо чӣ сармоя вориди кор мешавад ва ин хидматрасонӣ чӣ кадар арзиш дорад.

Илҳомҷон Атоев ваъда дод, ки дар ин бора мардумро ба зудӣ хабардор мекунанд. Ҳарчанд мақомот ҳадафи тасмимро "таъмини амният ва таҳкими иқтидори мудофиавии давлат" номидаанд, баъзе огоҳони умур чунин иқдомро роҳи дигари назорати сокинон маънидод мекунанд. Онҳо таъкид мекунанд, ин тасмим ҳаққи шаҳрвандонро барои дастрасӣ ба иттилоъ маҳдуд месозад.

Дар ИМА аз мардум хостанд, дар ҷойҳои ҷамъиятӣ ниқоб пӯшанд

Акс аз бойгонӣ

Мақомоти тандурустии Амрико бори дигар шаҳрвандони он кишварро ташвиқ мекунанд, ки дар ҷойҳои ҷамъиятӣ ниқоби тиббӣ бипӯшанд ва тавсияҳои беҳдоштиро риоя кунанд. Ин кор дар пайи афзоиши мавридҳои нави гирифторӣ ба коронавирус ва маргумир аз бемории ҳамагир дар чанд аёлати Амрико сурат мегирад. Адмирал Бретт Гроир, як узви гуруҳи мубориза бо коронавирус дар Кохи Сафед, рӯзи якшанбе пӯшидани ниқобро “комилан зарурӣ” донист ва гуфт, бе он вирусро зери контрол гирифтан мушкил аст. Мавридҳои нави гирифторӣ ба коронавирус дар Амрико, бахусус дар ҷанубу ғарби он кишвар дар ҳоли афзоиш аст. Созмони Ҷаҳонии Тандурустӣ рӯзи якшанбе боз ҳам аз афзоиши мавридҳои мусбати коронавирус дар ҷаҳон хабар дод ва гуфт, дар як шабонарӯзи ахир беш аз 230 ҳазор ҳолати нав сабт шудааст. Ба қавли масъулони созмон, Амрико бо сабт кардани беш аз 66 ҳазор мавриди нави вирус бори дигар дар садри феҳраст қарор дорад. То ҳол дар Амрико беш аз 135 ҳазор нафар аз ин вирус ҷон бохтаанд. Сабти марвидҳои нави гирифторӣ ба коронавирус дар баъзе аз кишварҳои Аврупои Шарқӣ низ дар ҳоли афзоиш аст. Венгрия ё Маҷористон бори дигар маҳдудиятҳоро дар марз ҷорӣ кардааст. Хорватия эълом кард, ки аз рӯзи душанбе истифода аз ниқоби тиббӣ дар фурӯшгоҳҳо ҳатмӣ аст ва Булғористон низ маҳдудиятҳоро аз сар гирифтааст.

Раиси ҷумҳури Косоворо дар бораи ҷиноятҳои ҷангӣ мепурсанд

Ҳошим Тачи

Ҳошим Тачи, раиси ҷумҳури Косово, рӯзи 13-уми июл дар шаҳри Ҳейги Ҳолланд ба суолҳои додситони умури ҷиноятҳои ҷангӣ посух хоҳад дод. Додгоҳи вижа барои Косово рӯзи 24-уми июн ба таври ғайримунтазира эълом кард, ки Тачи ва чеҳраҳои дигари саршиноси Косово ба даст доштан дар ҷиноятҳои вазнин, ба шумули “наздики 100 мавриди қатл”, нопадид шудани иҷбории одамон ва шиканҷа муттаҳам ҳастанд. Тачи пештар фармондеҳи баландпояи артиши озодибахши Косово буд. Ин артиш дар солҳои 1990 барои гирифтани истиқлоли Косово аз Сербистон вориди ҷанги чирикӣ шуда буд. Раиси ҷумҳури Косово Ҳошим Тачи иттиҳомҳоро рад карда, рӯзи 8-уми июл дар Фейсбук навишта буд, ки бо даъвати додгоҳи вижа барои Косово ба Ҳейг меравад. Косово вилояти пешини Сербистон аст, ки дар соли 2008 истиқлолашро эълом кард, вале Белград онро рад кардааст. Панҷ кишвари узви Иттиҳоди Аврупо низ истиқлоли Косоворо ба расмият нашинохтаанд.

Эрон хулосаи таҳқиқи худро дар бораи суқути ҳавопаймои Украина эълон кард

Мақомоти Эрон натиҷаи таҳқиқи худро дар бораи суқути ҳавопаймои мусофирбари Украина дар наздикии фурудгоҳи Теҳрон нашр карданд. Ин фоҷиа 8-уми январи соли ҷорӣ рух дода, дар дар натиҷаи суқути ҳавопаймо 176 кас ҷон бохтанд.

Муфаттишони эронӣ ба ин натиҷа расидаанд, ки танзими нодурусти пойгоҳи радар боис ба ин фоҷиа шудааст. Гуфта мешавад, пойгоҳи радар ба низоми зиддимушакӣ паёми ғалат додааст.

Ба гуфтаи муфаттишон, танзимгарон аз фармондеҳии низоми зиддимушакӣ иҷозаи партоби мушакро нагирифтаанд.

Мақомоти Теҳрон дар аввал мегуфтанд, ки "нуқси фаннӣ" боис ба суқути ҳавопаймо шудааст, вале баъди чанд рӯзи фоҷиа эътироф карданд, ки иштибоҳан ҳавопайморо задаанд.

Дар гузориши Раёсати авиатсияи шаҳрвандии Эрон омадааст, танзимгарони низоми зиддимушакӣ дар наздикии Теҳрон фурсат наёфтанд, ки дастгоҳҳоро ба танзим дароранд. Субҳи рӯзи фоҷиа артиш дар ҳолати "омодабоши қатъӣ" қарор дошт. Ин омодабош дар робита ба таҳдиди Амрико ба Эрон дар пайи мушакборон шудани пойгоҳҳои амрикоӣ дар Ироқ, эълом шуда буд.

Сандуқҳои сиёҳи ҳавопаймо ҳанӯз ҳам дар ихтиёри мутахассисони эронӣ аст, сарфи назар аз он ки дар Эрон дастгоҳҳои хондани сабти сандуқҳо мавҷуд нест. Интизор меравад, сандуқҳои мазкур рӯзи 20-уми июл ба ихтиёри Фаронса супорида шаванд.

Дар фоҷиаи рӯзи 8-уми январ даҳҳо шаҳрванди Эрон, Канада, Украина, Бритониё, Афғонистон ва Олмон кушта шуданд.

Дар Қазоқистон ёди қурбониёни коронавирусро гиромӣ доштанд

Раиси ҷумҳур ва мансабдорони дигари Қазоқистон ҳангоми лаҳзаи сукут дар шаҳри Нурсултон. 13-уми июли 2020

13-уми июл дар Қазоқистон Рӯзи мотами миллӣ ба хотири қурбониёни коронавируси нав баргузор шуд.

Дар ин рӯз чорабиниҳо ва барномаҳои тафреҳӣ бекор гардида, дар саросари кишвар, инчунин, дар намояндагиҳои дипломатии Қазоқистон дар хориҷа парчами Қазоқистон поин оварда шуд.

Соати 12-и рӯз ба вақти Нурсултон дар саросари Қазоқистон дақиқаи хомӯшӣ эълом гардид. Дар ҳамаи масҷидҳои калони Қазоқистон дуои дастаҷамъӣ баргузор шуд.

Ба иттилои расмӣ, теъдоди гирифторони вируси корона дар Қазоқистон ба 60 ҳазор наздик шудааст. Дар як рӯзи охир дар он кишвар 1646 ҳолати нави гирифторӣ сабт шудааст. Вазорати тандурустии Қазоқистон гуфт, ки аз 7 то 12-уми июл 111 ҳолати марг аз вируси корона сабт гардидааст.

Ин вазорат мегӯяд, дар Қазоқистон дар шаш моҳи соли 2020 1772 ҳолати марг аз илтиҳоби шуш ба қайд гирифта шудааст, 628 ҳолати он ба моҳи июн рост меояд.

Раҳбари католикҳои ҷаҳон гуфт, аз тасмими Туркия "ғамгин аст"

Поп Франсис

Поп Франсис, раҳбари католикҳои ҷаҳон, гуфт, аз тасмими Туркия барои табдили музей ё осорхонаи Аёсуфияи Истанбул ба масҷид "ғамгин аст". Изҳороти ӯ рӯзи 12-уми июл дар ҷараёни маросими ҳафтагии дуохонӣ дар Ватикан садо дод. Як додгоҳи Туркия ҳафтаи гузашта қарор кард, ки осорхонаи таърихии Аёсуфия ба масҷид табдил дода шавад. Раиси ҷумҳури Туркия Раҷаб Таййиб Эрдуғон гуфт, рӯзи 24-уми июл намози аввалини ҷамоат дар он ҷо баргузор хоҳад шуд. Шӯрои калисоҳои ҷаҳон аз раиси ҷумҳури Туркия хостааст, тасмимашро дигар кунад. Калисои 1500-солаи Аёсуфия дар як лашкаркашии усмониҳо дар соли 1453 ба масҷид табдил ёфта буд. Эрдуғон гуфтааст, дари бино ба рӯйи мусулмонҳову насрониҳо кушода хоҳад буд.

Дуда дар даври дувуми интихобот дар Лаҳистон "баранда шудааст"

Рафал Тшасковский ва Анджей Дуда

Кумисюни миллии интихоботи Лаҳистон (Полша) рӯзи 13-уми июл эълон кард, ки раиси ҷумҳурии муҳофизакор Анджей Дуда дар даври дувуми интихобот бо дарёфти беш аз 51 дар сади ройи мардум баранда шудааст. Даври дувуми интихобот 12-уми июл баргузор шуд. Рафал Тшасковский, шаҳрдори либероли Варшава, зиёда аз 48 дарсади ороро соҳиб шудааст. Кумисюни миллии интихоботи Лаҳистон гуфт, дар интихоботи рӯзи якшанбе тақрибан ҳафтод дар сади афроди қобили рой иштирок карданд. Интихобот зери чораҳои сахти беҳдоштӣ баргузор шуд. Сокинон дастпӯшу ниқоби тиббӣ доштанд ва фосилаи ҷисмониро риоят карданд. Дар ҳоле ки Ҳизби Қонун ва Адолат аз раиси ҷумҳур Дуда пуштибонӣ мекунад, Тшасковский, узви пешини порлумони Аврупо, номзади созмони мухолифини "Эътилофи шаҳрвандӣ" аст. Анджей Дуда дар даври аввали интихобот, ки ду ҳафта пеш баргузор шуд, 43,5 дарсад ва Рафал Тшасковский 30,5 дарсади ройи интихобкунандаҳоро соҳиб шуда буданд. Интихоби дубораи Дуда барои Ҳизби Қонун ва Адолат, ки барномаи ҷанҷолии ислоҳоти додгоҳиро рӯйи даст дорад, бисёр муҳим аст. Иттиҳоди Аврупо аз ин ислоҳот интиқод карда, гуфтааст, ин барнома додгоҳҳои Лаҳистонро "сиёсӣ" хоҳад кард.

Дар зиндонҳои Тоҷикистон 11 кас аз "илтиҳоби шуш" фавтидаанд

Яке аз зиндонҳои Душанбе.

Вазорати адлияи Тоҷикистон мегӯяд, баъд аз оғози пандемияи коронавирус, дар зиндонҳои кишвар даҳҳо нафар гирифтори бемории илтиҳоби шуш ё пневмония шудаанд ва беш аз 10 тан бар асари ин беморӣ фавтидаанд. Илтиҳоби шуш ба бемории COVID-19 хеле монандӣ дорад.

Музаффар Ашӯриён, вазири адлия рӯзи 13-уми июл гуфт, мавҷудияти бемории COVID-19-ро дар зиндонҳо тасдиқ накард ва гуфт, дар ин давра танҳо 98 маҳбус ба илтиҳоби шуш гирифтор шудаанд. Вазири адлия гуфт, 11 маҳбус аз бемори илтиҳоби шуш фавтидаанд.

Аммо бархе наздикони маҳбусон ба ин гуфтаҳои мақомот дар бораи набудани коронавирус дар зиндонҳо аз оғоз шубҳа доштанд. Аз ҷумла, афроди наздик ба Абдулфайз Раҷабов, маҳбуси 47-сола қаблан гуфтанд, ки ӯ аз бемории COVID-19 дар зиндон вафот кардааст. Раҷабов рӯзи 9-уми май дар маҳбаси рақами яки шаҳри Душанбе фавтид.

Мақомот сабаби марги ӯро ҳам илтиҳоби шуш ё пневмония гуфта буданд.

Иттилоъ дар бораи вазъи зиндонҳои Тоҷикистон дар шароити коронавирус асосан аз суҳбатҳои мақомот ва тамосҳои маҳбусон бо наздиконаш мерасад. Ба ин хотир, дақиқан гуфтани онки дар дохили зиндонҳо дар шароити пандемия чӣ мегузарад, мушкил аст.

Вазорати адлия гуфт, ҳисоботи ҳизби Зоировро ба маъмурони милиса надодааст

Раҳматилло Зоиров, раиси ҲСДТ.

Вазорати адлияи Тоҷикистон мегӯяд, ҳисоботи пешниҳодкардаи Ҳизби сотсиал-демократро ба ягон ниҳоди дигар, аз ҷумла ба дасти маъмурони милиса надодааст. Моҳи июн Раҳматилло Зойиров, раиси Ҳизби сотсиал-демократи Тоҷикистон гуфт, ҳисоботи ба Вазорати адлия додаашро дар дасти маъмурони милиса дидааст ва бар асоси ин ҳисобот аъзои ҳизб таъқиб мешаванд.

Аммо Асадулло Ҳакимзода, муовини вазири адлия рӯзи 13-уми июл зимни нишасти хабарӣ дар посух ба суоли Радиои Озодӣ гуфт, ҳисоботи Ҳизби сотсиал-демократро Вазорати адлия ба ягон мақоми давлатӣ пешниҳод накардааст.

Ба гуфтаи ҷаноби Ҳакимзода, ҳисоботи пешниҳодкардаи ҳизбҳо, аз ҷумла Ҳизби сотсиал-демократ барои истифодаи худи вазорат аст ва он ба дигар ниҳодҳои давлатӣ пешниҳод намешавад. Ин масъули Вазорати адлия афзуд, ҲСДТ ба онҳо дар бораи таъқиби аъзои ҳизб ва пешниҳоди ҳисоботи онҳо ба дигар ниҳод ягон муроҷиат накардааст.

Моҳи июн Раҳматилло Зойиров, раиси Ҳизби сотсиал-демократи Тоҷикистон аз он нигаронӣ кард, ки таъқиби аъзоёни ҳизб бар асоси ҳисоботе сурат мегирад, ки ҳизб ба Вазорати адлия дода буд.

Ба гуфтаи Зойиров, ҳисоботеро, ки дар бораи ҳизб ва аъзои он ба Вазорати адлия пешниҳод мекунад, дар дасти як маъмури милиса дидааст ва гӯё аз рӯйи он бо тарафдорон ва аъзои ҳизб "кор мекунанд".

Дар он ҳисобот, ба гуфтаи ӯ, ному насаби аъзо, ҷойи зист ва ҷойи корашон навишта шудааст.

Ҳизбҳои сиёсӣ дар Тоҷикистон бар асоси қонун бояд ҳар сол дар бораи фаъолияти худ ва теъдоди аъзо б Вазорати адлия бояд ҳисобот диҳанд.

Тирпаронӣ дар марзи Озарбойҷон бо Арманистон

Қарабоғи Кӯҳӣ. Акс аз бойгонӣ.

Мақомоти Озарбойҷону Арманистон дар тирпарронии марз ҳамдигарро айбдор карданд.

Вазорати мудофиаи Озарбойҷон гуфт, неруҳои мусаллаҳи Арманистон "низоми оташбасро дар марзи Озарбоҷону Арманистон вайрон карда", "ба мавқеҳои мо оташ кушоданд".

"Ҳар ду ҷониб талафот додаанд", - хабар дод вазорати мудофиаи Озарбойҷон.

Мақомоти мудофиаи Арманистон дар навбати худ ҷониби Озарбойҷонро дар оташкушоӣ айбдор карданд.

"Неруҳои мусаллаҳи Озарбойҷон бо сабабҳои барои мо номаълум бо мошин талош карданд, ки марзи Арманистонро ғайриқонунӣ убур кунанд ва ҷониби минтақаи Тавуш раванд. Баъди огоҳии неруҳои Арманистон неруҳои Озарбойҷон мошинро гузошта, ба мавқеи худ баргаштанд. Баъди ин ҳодиса неруҳои Озарбойҷон дубора талош карданд, ки мавқеҳои Арманистонро ғасб кунанд ва аз артиллерия оташ кушоданд", - омадааст дар изҳороти мақомоти Арманистон.

Мақомоти Арманистон дар бораи талафот хабар надодаанд.

Баҳси марзӣ байни Арманистон ва Озарбойҷон атрофи Қарабоғи куҳӣ аз охирҳои соли 1980 ба ин тараф идома дорад. Дар даврони ҷанги мусаллаҳонаи солҳои 1988-1994 дар минтақаи ҷудоихоҳи Қарабоғ 30 ҳазор кас кушта, бештар аз 100 ҳазор фирорӣ шудаанд.

Низоъи Қарабоғи куҳӣ тӯли ин солҳо бо роҳҳои дипломатӣ ҳал нашудааст.

СҶТ гуфт, авҷгирии илтиҳоби шуш дар Қазоқистон эҳтимолан ба коронавирус рабт дорад

Яке аз бемористонҳои Қазоқистон.

Дар Созмони ҷаҳонии тандурустӣ (СҶТ) гуфтанд, авҷгирии бемории илтиҳоби шуш, ки ҳафтаҳои ахир дар Қазоқистон мушоҳида мешавад, эҳтимол дорад, ҳамон коронавирус бошад.

Майкл Райан, роҳбари барномаҳои СҶТ дар умури ҳолатҳои фавқулодаи марбут ба тандурустӣ рӯзи ҷумъа дар як нишасти хабарӣ дар Женева гуфт, авҷгирии илтиҳоб дар Қазоқистон ба эҳтимоли зиёд, ҳамон шакли коронавирус аст, ки ташхиси нодуруст гузошта шудааст.

Майкл Райан ҳамзамон гуфт, ки СҶТ дар якҷоягӣ бо мақомоти тиббии Қазоқистон кор мекунад, то ҳолатҳои гирифторӣ ба коронавирусро шиносоӣ кунад.

Қазоқистон аз оғози тобистон ба авҷгирии COVID-19 ва илтиҳоби шуш рӯ ба рӯ аст. Аммо бисёре аз ташхисҳои коронавирус мавҷудияти ин уфунатро нишон намедиҳанд. Дар ҳамин ҳол, пизишкони Қазоқистон гуфтанд, дар солҳои гузашта чунин теъдоди зиёди гирифторӣ ба илтиҳоби шуш мушоҳида намешуд.

Дар Қирғизистон нисбати чанд доруфурӯш парвандаи ҷиноӣ боз шуд

Акс аз бойгонӣ.

Хадамоти давлатии мубориза бо ҷиноятҳои иқтисодӣ (пулиси молӣ)-и Қирғизистон нисбати чанд тоҷири "ҳаннот"-е парвандаи ҷиноӣ боз кард, ки ба хариду фурӯши дору машғул ҳастанд.

Аз ин хадамот иттилоъ доданд, дар ҷараёни як рейд "чанд тане шиносоӣ шуд, ки доруҳоро ба қимати гарон ба фурӯш бароварда, аз ҳисоби ба роҳ андохтани ҳангома ва камбуди чанд номгӯи дору маблағи зиёд даромад кардаанд".

Дар ҷараёни як хариди озмоишӣ кормандони пулиси молӣ доруи "Клексан"-ро дар чанд дорухона бо қимати бештар аз 100 доллари ИМА пайдо карданд. "Айни замон нисбати ҳаннотон парванда боз шуда, тафтишот идома дорад", - хабар доданд аз пулиси молии Қирғизистон.

Узбекистон бинобар паҳншавии коронавирус маҳдудиятҳои нав ҷорӣ мекунад

Шаҳри Тошканд.

Дар Узбекистон сар аз 13 июл то 1 август ба далели паҳншавии коронавирус маҳдудиятҳои нав ҷорӣ мешавад.

Дар рӯзҳои истироҳати 18-19 июл ва 25-26 июл ҳаракати нақлиёт, аз ҷумла кирокашҳо (таксӣ) манъ мешавад. Ба афроде аз 65-сола боло тавсия мешавад, ки хонашинӣ кунанд.

Комисияи вижа мубориза бо коронавирус дар Узбекистон хабар дод, ки ҳамзамон аз 13 июл парвозҳо ва равуои қатораҳо дар дохили кишвар манъ мешавад. Вазорати нақлиёти Узбекистон пештар аз ин хабар дода буд, ки аз 10 июл то 1 август 5 900 билети қатора ва 330 билети ҳавопаймо фурӯхта шуда буд. Мақомот ваъда кардаанд, ки пули билети мусофиронро бармегардонанд.

Дар Узбекистон сар аз имрӯз ҳамчунин сартарошхонаҳо ва кошонаҳои ҳусн баста мешаванд.

Дар Узбекистон шумори гирифторони вируси корона расман ба 12,4 ҳазор расид, 56 кас аз ин уфунат фавтидаанд.

Сабти 46 мавриди нави гирифторӣ ба коронавирус дар Тоҷикистон

Дар як шабонарӯзи гузашта дар Тоҷикистон 46 мавриди нави гирифторӣ ба COVID-19 сабт шудааст. Вазорати тандурустии Тоҷикистон дар хабарномаи расмӣ гуфт, то 12-уми уми июл шумори умумии беморон ба 6552 нафар расид.

То ин дам аз бемории ҳамагир 5228 кас ё тақрибан 80 дар сади беморон шифо ёфтаанд. Омори фавтидагон бетағйир аст. Ба иттилои расмӣ коронавирус дар Тоҷикистон боис ба марги 55 нафар шудааст.

Вазорати тандурустӣ мегӯяд, 190 нафари дигар зери назорати пизишкон ҳастанд. Аммо мутахассисон ба омори расмӣ шубҳа доранд ва мегӯянд, бинобар набудани ташхиси дурусту муносиби коронавируси нав, мумкин аст, теъдоди воқеии гирифтор ва талафот аз беморон ба маротиб зиёдтар бошад.

Тоҷикистон танҳо 30-юми апрел мавҷудияти коронавируси навро тасдиқ кард. То он замон афзоиши беморон дар шифохонаҳо ва марги пайиҳами чанде аз сокинонро ба “илтиҳоби шуш” рабт медоданд.

Матолиби бештарро дар бораи бӯҳрони коронавируси нав дар Тоҷикистон дар ин ҷо бихонед

Парвозҳо аз Дубай ба Душанбе. Натиҷаи ташхиси COVID-19 зарур аст

Акс аз бойгонӣ

Консулгарии генералии Тоҷикистон дар шаҳри Дубай эълон кард, ки рӯзи 21-уми июл парвози як ҳавопаймои ширкати Fly Dubai ба самти Душанбе ба нақша гирифта шудааст. Мақомоти дипломатӣ гуфтанд, харидани билет ба таври онлайн аз ширкат имконпазир ҳаст.

Ба иттилои расмӣ, ба сабаби он ки ин парвози маъмулист, зарурати сабтином дар консулгарӣ вуҷуд надорад. Аммо гуфта шудааст, шаҳврандони Тоҷикистон, ки мехоҳанд аз кишварҳои минтақа ба Дубай рафта, аз онҷо ба Душанбе баргарданд, "бояд пеш аз харидани билет натиҷаи ташхиси тиббии COVID-19 ва кафолати фиристодани бағоҷро дақиқ кунанд".

Ситоди ҷумҳуриявии муқобила бо коронавируси нав дар Тоҷикистон аз 1-уми июл ба парвозҳои байналмилалӣ аз Тоҷикистон ба Узбекистону Дубай иҷозат дод.

Тоҷикистон бо нигаронӣ аз эҳтимоли сирояти коронавирус парвози ҳавопаймоҳоро ба қаламраваш аз рӯзи 19-уми март ба таври ногаҳонӣ қатъ кард.

Баъд аз қатъи парвозҳо танҳо чанд парвози махсус барои овардани шаҳрвандони Тоҷикистон аз хориҷ ва интиқоли ёриҳои башардӯстона ба кишвар анҷом шудааст.

Мақомот мегӯянд, ҳоло азсаргирии парвозҳои маъмулиро бо Русияву Чин ва кишварҳои дигар баррасӣ доранд. Дар Русия ҳазорҳо шаҳрванди Тоҷикистон мунтазири бозгашт ба кишвар ҳастанд. То 30-юми июл чанд парвози ғайринақшавӣ ё чартерӣ аз Русия ба Тоҷикистон дар назар гирифта шудааст.

Тоҷикистон 145 навъи маҳсулотро ба рӯйхати маводи "таҳти карантин" ворид кард

Акс аз бойгонӣ

Ҳукумати Тоҷикистон 145 номгӯйи маҳсулоти воридотиву содиротӣ ва ҳашаротро "таҳти карантин" қарор дод. Ин ба он маъност, ки ин маҳсулот дар гузаргоҳҳои марзӣ аз тарафи мутахассисони Хадамоти назорати давлатии фитосанитарӣ ҷиддан санҷида мешаванд.

Қарори ҳукумат охири моҳи июни имсол ва дар рӯзҳое ба тасвиб расидааст, ки кишвар бо бемории коронавируси нав дастбагиребон аст.

Ин феҳраст 12-уми июл дастраси Радиои Озодӣ шуд ва он аз шири хушку тарбузу харбуза то банану меваҳои ситрусӣ, картошкаву помидор, қаҳва, чойи Парагвай ва равғани офтопарасту орди гандумӣ ва чӯбу сатилро дар бар мегирад. Ба рӯйхат "кирми комсток, сафедболаки ситрусӣ, гамбусаки колорадоӣ"-ро ҳам ворид кардаанд.

Ҳукумати Тоҷикистон далели тасмимашро шарҳ надодааст, вале дар эзоҳи қарор гуфтааст, бештар маҳсулотеро ҳадаф мегиранд, ки имкон дорад "паноҳгоҳи организмҳои зараррасон" ҳастанд ва ё барои паҳншавии онҳо мусоидат мекунанд.

Бархе аз тоҷироне, ки ба воридоти маҳсулот машғуланд, мегӯянд, ин роҳи пешгирӣ аз эҳтимоли ворид шудани "моддаҳои зарарнок" ба кишвар аст, вале баъзан санҷиши маҳсулот метавонад тӯл кашад ва ба бекор шудани онҳо сабаб гардад.

Бино ба қонуни Тоҷикистон "Дар бораи карантин ва муҳофизати растаниҳо", маводи таҳти карантинро дар гузаргоҳҳои марзӣ ташхис мекунанд.

Дар банде аз ин қонун гуфта шудааст, агар "маводи таҳти карантин... бо организмҳои зараррасони карантинӣ сироят ёфтаанд, дар гузаргоҳҳои Сарҳади давлатии Ҷумҳурии Тоҷикистон ё дар ҷойҳои таъинот, пас аз ташхиси хатари фитосанитарӣ бо истифодаи усулҳои кимиёвӣ (фумигатсия) безарар гардонида мешаванд..."

Тоҷикистон рӯзи 30-юми апрел мавҷудияти коронавируси навро эътироф кард ва барои пешгирӣ аз густариши он маҳдудиятҳои муваққатӣ ҷорӣ кард. Ҳоло бозору кошонаҳои ҳусн ва тарабхонаву нуқтаҳои фурӯши телефон кушодаанд, вале пӯшидани ниқоби тиббӣ ҳатмӣ шудааст. Барои надоштани ниқоб аз 116 сомонӣ то 290 сомонӣ ҷарима мекунанд.

Вазорати тандурустии Тоҷикистон бо нашри як баёнияи расмӣ гуфт, дар умум то 11-уми июл 6505 нафар дар Тоҷикистон ба бемории COVID-19 гирифтор шудаанд ва аз ин миён то ҳол 5176 нафар ё тақрибан 80 дар сади беморон шифо ёфтаанд. Талафот аз беморӣ, ба гуфтаи мақомот, зиёд нашудааст ва 55 нафарро ташкил медиҳад.

Аммо мутахассисон ба омори расмӣ шубҳа доранд ва мегӯянд, бинобар набудани ташхиси дурусту муносиби коронавируси нав мумкин аст, теъдоди воқеии гирифтор ва талафот аз беморон ба маротиб зиёдтар бошад.

Назарбегим Муборакшоева, раиси пешини шаҳри Хоруғ даргузашт

Назарбегим Муборакшоева

Назарбегим Муборакшоева, раиси пешини шаҳри Хоруғ, маркази Вилояти Мухтори Кӯҳистони Бадахшон, дар 68-солагӣ даргузашт. Сабаби марги ӯ гуфта нашудааст. Ҳукумати вилояти Бадахшон рӯзи 12-уми июл дар таъзияномае марги ӯро "нобаҳангом" хонд. Ёдгор Файзов, раиси вилоят гуфтааст, аз марги Назарбегим Муборакшоева "сахт андӯҳгин" ҳастанд. Муборакшоева дар гузашта дар мансаби раиси ноҳияи Рӯшон ва муовини раиси ВМКБ ҳам кор кардааст. Аз соли 2000 то 2005 узви Маҷлиси Миллӣ, палатаи болоии порлумони Тоҷикистон буд. Моҳи декабри соли 2006 иҷрокунанда ва моҳи марти соли 2007 раиси шаҳри Хоруғ таъйин шуд. Дар ин мақом як сол кор кард. Донишкадаи кишоварзии Тоҷикистонро хатм кардааст.

Даври дувуми интихоботи президентӣ дар Лаҳистон

Овоздиҳӣ дар даври дувуми интихоботи президентӣ дар Лаҳистон. 12-уми июли 2020

Рӯзи якшанбе ройдиҳии даври дувуми интихоботи президентӣ дар Лаҳистон ё Полша ҷараён гирифт. Дар ин интихобот, ки сарнавишти равобити Лаҳистонро бо Иттиҳодияи Аврупо барои чанд соли оянда мушаххас хоҳад кард, раиси ҷумҳури кунунӣ Анджей Дуда бо Рафал Тшасковский рақобат дорад. Дар ҳоле ки ҳизби Қонун ва Адолат аз раиси ҷумҳур Дуда пуштибонӣ мекунад, Рафал Тшасковский, узви пешини порлумони Аврупо, номзади созмони мухолифини “Эътилофи шаҳрвандӣ” аст. Анджей Дуда дар даври аввали интихобот, ки ду ҳафта қабл баргузор шуд, 43.5 дарсад ва Рафал Тшасковский 30.5 дарсади раъйи интихобкунандаҳоро соҳиб шуда буданд. Интихоби дубораи Дуда барои ҳизби Қонун ва Адолат, ки барномаи ҷанҷолии ислоҳоти додгоҳиро рӯйи даст дорад, бисёр муҳим аст. Иттиҳодияи Аврупо аз ин ислоҳот интиқод карда, гуфтааст, ин барнома додгоҳҳои Лаҳистонро сиёсӣ хоҳад кард.

Ба зудӣ афзоиши истеҳсоли нафтро дар ҷаҳон баррасӣ мекунанд

Акс аз бойгонӣ

Кишварҳои содиркунандаи нафт ин ҳафта дар бораи афзоиши истеҳсоли "тилои сиёҳ" бо ҳам гуфтугӯ хоҳанд кард. Ин дар ҳолест, ки дида мешавад тақозо ба нафт дар ҷаҳон ба сатҳи пеш аз паҳншавии коронавируси нав баргаштааст. Рӯзномаи The Wall Street Journal ва Bloomberg гузориш доданд, ки тавлидкунандагони умдаи нафт чун Арабистони Саудӣ ва кишварҳои содиркунандаи умдаи дигаре чун Русия, ки узви созмони ОПЕК нест, қарор аст, дар нишасти онлайн рӯзи чаҳоршанбеи оянда дар бораи тавлидоти кунунӣ ва ояндаи созмон суҳбат кунанд. Арзиши нафт, ки дар авҷи паҳншавии коронавируси нав бисёр коҳиш ёфт, баъд аз кам шудани тавлидот дар ин авохир дубора устувор гардид.

Шӯрои амнияти СММ роҳи расондани ёрӣ ба Сурияро ёфт

Нишасти Шӯрои амнияти Созмони Милал. Акс аз моҳи сентябри 2019

Шӯрои амнияти Созмони Милали Муттаҳид расондани кумакҳоро ба Сурия аз тариқи як гузаргоҳи марзии Туркия тасвиб кард. Ин тасмим бо пешниҳоди Русия сурат гирифт, аммо чанд рӯзи пеш Шӯрои амният натавониста буд, аз он пуштибонӣ кунад. Ройгирӣ рӯзи шанбе баргузор шуд. Идораҳои кумакрасон як рӯз пештар аз он гуфта буданд, ки салоҳиятҳои онҳо барои дастрас кардани ёрӣ ба Сурия ба поён расидааст. Матни қатъномаи кушодани як гузаргоҳи марзӣ аз сӯи Олмону Белгия пешкаш шуд. Акнун ин роҳи марзии миёни Туркияу Сурия барои 12 моҳи дигар боз хоҳад буд.

Трамп бори аввал дар макони умумӣ ниқоби тиббӣ пӯшид

Доналд Трамп

Доналд Трамп, раиси ҷумҳури Амрико, рӯзи 11-уми июл ҳангоми боздид аз як шифохона бори аввал ниқоби тиббӣ пӯшид. Вай дар шифохона аз ҳоли сарбозони маҷруҳ ва шахсоне, ки аз бемории COVID-19 муолиҷа мегиранд, хабар гирифт. Қаблан Трампро барои он танқид карда буданд, ки ҳангоми дидор бо мақомҳои Кохи Сафед ва рафтан ба маконҳои умумӣ ниқоби тиббӣ намепӯшад. Раиси ҷумҳури Амрико дар дидораш аз шифохонаи низомии Мэриленд рӯзи шанбе гуфт, ҳеч гоҳ бо пӯшидани ниқоб мухолиф набудааст. Бар асоси омори Донишгоҳи Ҷон Ҳопкинс, беш аз 3 миллиону 240 ҳазор кас дар Амрико ба коронавируси нав мубтало шудаанд.

Теъдоди мубталоёни СОVID-19 дар Тоҷикистон 6505 нафар шуд

Вазорати тандурустии Тоҷикистон гуфт, дар як шабонарӯзи гузашта 49 мавриди собитшудаи сирояти бемории COVID-19-ро сабт кардааст, ки дар муқоиса ба омори рӯзи 10-уми июл ду нафар бештар аст. Вазорат бо нашри як баёнияи расмӣ гуфт, дар умум то рӯзи 11-уми июл 6505 нафар дар Тоҷикистон ба бемории COVID-19 гирифтор шудаанд ва аз ин миён то ҳол 5176 нафар ё тақрибан 80 дар сади беморон шифо ёфтаанд.

Талафот аз беморӣ дар як шабонарӯзи гузашта ба гуфтаи мақомот зиёд нашудааст ва 55 нафарро ташкил медиҳад. Ба гуфтаи мақомоти вазорат , 196 нафари дигар зери назари табибон қарор доранд ва муоина мешаванд. Аммо мутахассисон ба омори расмӣ шубҳа доранд ва мегӯянд, бинобар набудани ташхиси дурусту муносиби коронавируси нав мумкин аст, теъдоди воқеии гирифтор ва талафот аз беморон ба маротиб зиёдтар бошад.

Ҳукумати Тоҷикистон рӯзи 30-уми апрел ва як рӯз пеш аз омадани ҳайати Созмони Ҷаҳонии Беҳдошт эътироф кард, ки коронавирус ба 15 нафар дар Тоҷикистон сироят кардааст.

Дар Сребренитса ёди ҳазорон кушташударо гиромӣ доштанд

Дафни боқимондаҳои 6 нафар, ки ҳуввияташон маълум шуд.

Пандемияи коронавирус маросими 25-умин солгарди ёдоварӣ аз куштори дастаҷамъӣ дар шаҳри Сребренитсаи Босния ва Ҳерзеговинаро маҳдуд кард. Дар ин маросим, ки рӯзи 11-уми июл сурат гирифт, меҳмонони зиёди даъватӣ аз ҷумла Чарлз шоҳзодаи Бритониё ширкат накарданд.

Моҳи июли соли 1995 нерӯҳои серби Босния бештар аз 8 ҳазор наврасу мардони мусулмонро дар як маҳалли Сребрентиса ҷамъ карда ва куштанд. Ин фоҷиа бадтарини куштори дастаҷамъӣ баъди Ҷанги Ҷаҳонии Дуввум дар қаламрави Аврупо ба ҳисоб меравад.

Додгоҳҳои байналмилалӣ гуфтаанд, ки ин қатл наслкушӣ буд, аммо мақомоти Сербия ва Сербҳои боснӣ чунин гуфтаро қабул надоранд. Фоҷиа дар поёни ҷанги сесолаи сербҳо ба зидди босниҳо ва хорватҳо сурат гирифт, ки аз соли 1992 то соли 1995 идома кард ва ҷони 100 ҳазор нафарро гирифт. Бахшида ба 25-умин солгарди ёдоварӣ аз қурбониёни ҳодиса дар Босния ва Ҳерзеговина, чорабиниҳои гуногун сурат мегиранд, аз ҷумла боқимондаҳои ҷасади 9 нафарро дар оромгоҳи Потокари дафн мекунанд.

Дар ин бештар аз 6640 нафарро дафн кардаанд, ҷасади 1000 каси дигарро наёфтаанд. Умдатан дар маросими ёдоварӣ дар оромгоҳи Потокари ҳазорон нафар ҷамъ меомаданд, вале ба сабаби пандемияи коронавирус имсол мардум зиёд набудааст.

Ёфтҳои бештар

XS
SM
MD
LG