Пайвандҳои дастрасӣ

Хабари нав

Хабарҳо

«Вахш»-и Қӯрғонтеппа бар «Регар ТадАЗ» 1:0 пирӯз шуд

Дастаи «Вахш»-и Қӯрғонтеппа дар майдони худ бар дастаи «Регар ТадАЗ» бо ҳисоби 1:0 пирӯз шуд. Ин дар ҳолест, ки дастаи «Регар ТадАЗ» дар сабқати қаҳрамонии футболи Тоҷикистон дар ҷои аввал қарор дорад. Тӯби ягона дар бозӣ 10 дақиқа пеш аз итмоми он аз тарафи бозингари дастаи «Вахш» Назиршо Ризоев ба ҳадаф расонида шуд.

Ҳамаи хабарҳои имрӯзро дар инҷо бихонед

Тимановская: Хушбахтам, ки дар Полша, дар ҷойи амн ҳастам

Кристина Тимановская ба суолҳои журналистон посух дод

Кристина Тимановская, варзишгари беларусӣ, ки дар Лаҳистон ё Полша паноҳгоҳ ёфт, мегӯяд, "дар ҷойи амн" қарор дорад ва "хушбахт" аст.

Тимановскаяи 24-сола шаби 4-уми август бо роҳи Токио-Вена ба шаҳри Варшава расид ва бо дархости паноҳандагӣ зери ҳимояти дипломативу сиёсии Полша гузашт.

Ӯ дар изҳороти матбуотиаш рӯзи 5-уми август гуфт, ки аз ёрии Полша бисёр миннатдор аст ва изҳори умед кард, ки рӯзе ҳатман метавонад ба Беларус баргардад. "Ман ба кишвар хиёнат накардаам, ин ватани ман мемонад", -- афзуд ӯ.

Баъд аз он ки Тимановская қарорҳои раҳбарияти варзишии кишварро танқид кард, таҳти ҳамлаву маҳкумияти матбуоти давлатии Беларус қарор гирифта, раҳбарони тими олимпӣ хостанд, маҷбурӣ ӯро ба ватан баргардонанд. Вале Тимановская аввал аз полиси Ҷопон ва сипас аз ҳукумати Полша дархости кумак кард. Тимановская гуфт, қарор аст, базудӣ ҳамсараш ҳам ба ӯ бипайвандад.

Ба эътирозгарон дар Панҷакент иҷозат додаанд, ки ба Узбекистон бираванд. ВИДЕО

Гурӯҳе аз сокинони Панҷакент талаб доранд, ки марз бо Узбекистон боз шавад
лутфан мунтазир бошед

Феълан кор намекунад

0:00 0:02:52 0:00

Ба даҳҳо сокини Панҷакент, ки рӯзи 4-уми август дар назди бинои ҳукумати шаҳр ҷамъ омада буданд, иҷозаи гузаштан аз сарҳад бо Узбекистонро додаанд.

Ин гуруҳи мардум шикоят доштанд, ки бояд тавассути Узбекистон ба Русия бираванд, аммо шаби 3-юми август ба таври ногаҳонӣ гузаргоҳи "Саразм" (байни Панҷакенту Самарқанд) баста шудааст. Онҳо аз эҳтимоли "сӯхтан"-и билеташон нигарон буданд.

Мақомот далели баста будани гузаргоҳро нагуфтанд, вале рӯзи 5-уми август хабар доданд, ки "мушкили сокинон ҳал шуд". Дар ҳукумати Панҷакент ба Радиои Озодӣ гуфтанд, шахсоне, ки дар даст билет доштанд, ба хотири насӯхтани пулашон тавассути гузаргоҳи "Саразм" ба Узбекистон рафтанд.

Аммо пайвандони баъзе аз онҳо мегӯянд, "масъалаи насӯхтани пули билет шарҳи ноҷои мақомот аст". Дар асл, ба иддаои онҳо, сафари наздиконашон баъд аз "ҳақситонӣ" дар гузаргоҳ имконпазир шудааст. Мақомоти нерӯҳои марзбонӣ расман ба чунин иддаоҳо дар чанд ҳафтаи охир расман ҷавоб нагуфтаанд.

Вақте бо мақомоти Панҷакент, аз ҷумла бо раиси шаҳр ва муовини аввалу намояндаҳои дигар дар тамос шудем, гуфтанд, "масъала ба онҳо иртибот надорад". Афзалшо Дӯстзода, як масъули ҳукумати Панҷакент, 5-уми август ба Радиои Озодӣ гуфт, "барои рӯшанӣ бахшидан ба ин масъала ба марказ ва ба мақомоти Қӯшунҳои сарҳадӣ тамос гиред."

Талошҳои мо барои фаҳмидани асли қазия аз мақомоти марзбонӣ то ин дам бенатиҷа буд. Пештар мақомоти Оҷонси зиддифасод дар вилояти Суғд гуфтанд, ки як гуруҳ масъалаи "ҳақситонӣ" дар гузаргоҳҳои сарҳадӣ бо Узбекистонро таҳқиқ мекунад, вале расман касе шикояту даъвое накардааст.

Дар ҳамин ҳол, баъзе аз корбарон бо фиристодани акс аз гузаргоҳи "Саразм" гуфтанд, ҳанӯз ҳам гуруҳе аз шаҳрвандон дар онҷо мунтазир истодаанд. Мақомот мегӯянд, танҳо ба шахсоне, ки билети сафар доштанд, иҷозаи гузаштан аз сарҳадро доданд.

Пас аз баста шудани роҳҳои Қирғизистон, муҳоҷирон асосан тавассути Узбекистон ба Русия мераванд. Онҳо мегӯянд, билети сафар тавассути кишвари ҳамсоя дар муқоиса ба билети парвоз аз Тоҷикистон арзонтар аст.

Садҳо нафар рӯзи 28-уми июл дар гузаргоҳи дигари марзии Тоҷикистону Узбекистон – “Фотеҳобод” (Ойбек) – низ ҷамъ омада, хоҳони гузаштан аз сарҳад шуданд. Мақомот ба сокинон гуфтаанд, сарҳад бастаасту барои гузаштан аз он иҷоза ё даъвати расмӣ аз Узбекистон зарур аст. Ин дар ҳолест, ки ба иддаои баъзе аз хоҳишмандони убури сарҳад, "то кунун гуруҳе бидуни ҳеч санад аз марз гузаштанд".

Бо оғози ҳамагирии коронавируси нав дар моҳи марти соли гузашта Узбекистону Тоҷикистон марзҳои худро бастанд. Бо коҳиши беморӣ борҳо аз эҳтимоли боз шудани марзҳо сухан рафт, аммо масъала ҳал нашуд. Рӯзи 11-уми июни имсол дар Хуҷанд низ раҳбарони ду кишвар дар ин бора ба таври рӯшан чизе нагуфтанд. Роҳи ҳавоӣ байни ду кишвар боз аст.

Президенти нави Эрон ба рушди муносибатҳо бо Тоҷикистон таъкид кард

Иброҳим Раисӣ, президенти нави Эрон

Президенти нави Эрон барои беҳтар кардани муносибатҳо бо Тоҷикистон таъкид кардааст. Ду кишвар аз соли 2015 боз равобити чандон хуб надоранд.

Иброҳим Раисӣ 4-уми август дар суҳбат бо раиси Маҷлиси Намояндагони Тоҷикистон, Маҳмадтоҳир Зокирзода, гуфтааст, "равобити Теҳрону Душанбе фаротар аз равобити одии ду кишвар аст ва ... барои боло бурдани сатҳи ин равобит бояд қадамҳои ҷиддӣ бардошт."

Маҳмадтоҳир Зокирзода барои иштирок дар маросими савгандёдкунии президенти нави Эрон ба Теҳрон рафтааст. Сомонаи раиси ҷумҳурии Эрон навишт, ӯ рӯзи чаҳоршанбе дар мулоқот бо Иброҳим Раисӣ гуфтааст, "равобити Эрону Тоҷикистон бар асоси дину забон, фарҳанг, таъриху тамаддуни муштарак бино шуда, зарфиятҳои зиёде барои густариш дорад."

Ба иттилои сомонаи президенти Эрон, дар ин суҳбат мавзӯи Афғонистон низ баррасӣ шудааст.

Иброҳим Раисӣ рушди равобити Эрону Тоҷикистон ва Афғонистонро “ба унвони се кишвари форсизабон” дорои аҳамияти зиёд номида, гуфтааст, “ноамниҳои имрӯзи Афғонистон... ба нафъи ҳеч кас нест. Эрону Тоҷикистон бояд барои рафъи нигаронии муштарак ... ҳамкориҳои наздиктаре дошта бошанд.”

Тафсилоти аз ин бештари мулоқот дастрас нест. Аммо суҳбатҳо дар мавриди рушди муносибатҳо дар ҳолест, ки ду кишвар ба камияш аз соли 2015 ба ин тараф равобити хубе надоранд.

Тоҷикистон Эронро барои пуштибонӣ аз мухолифини сиёсияш ва даст доштан дар қатли шахсиятҳои шинохта дар солҳои 90-ум муттаҳам кард. Эрон Тоҷикистонро дар “гум шудани” пулҳои Бобаки Занҷонӣ, миллиардери эронӣ, муқассир донист. Ҳарду кишвар даъвои якдигарро инкор карданд.

Иброҳим Раисӣ, ки ҳоло ба курсии президенти Эрон нишаст, дар гузашта дар мақоми раиси Додгоҳи олӣ кор карда, аз ҷониби Амрико барои нақзи ҳуқуқи инсон, аз ҷумла содир кардани ҳукми қатли зиндониҳои сиёсӣ таҳрим шудааст.

Apple гуфт, ки чаро хадамот ва маҳсулоташ дар Тоҷикистон гарон аст

Ширкати Apple худро ҳамчун молиётдиҳанда дар Тоҷикистон сабт кардааст

Сомонаи Apple Developer рӯзи 3-юми август навишт, дар ҳоле ки дар қитъаҳои дигари олам арзиши хидматрасониву маҳсулоти ширкати Apple поин меравад, дар Гурҷистону Тоҷикистон рӯ ба болост. Сабаби афзоиши нархро ба гаронии андоз ё молиёт дар ин ду кишвар рабт доданд.

Дар изҳороти ширкат, ки бо телефонҳои ҳушманду планшет ва компютерҳояш машҳур аст, омадааст, нархи хидматрасонӣ дар Африқои Ҷанубӣ, Бритониё ва кишварҳои ҳавзаи пулии евро коҳиш меёбад.

Айни замон, ба иттилои ширкат, дар Гурҷистон ва Тоҷикистон бо сабаби 18 дарсад таъин шудани андоз аз арзиши изофашуда (НДС), хадамот гаронтар аст. Мутобиқ ба ин, баробари нав кардани хадамоти дастгоҳи Apple, арзиши хидматрасонӣ ҳам бо нархҳои нав пешниҳод мешавад.

Зимнан, мавзӯи молиётсупории ширкати амрикоии Apple дар нишасти матбуотии раиси Кумитаи андози Тоҷикистон ҳам садо дод.

Нусратулло Давлатзода дар нишасти хабарии 30-юми июл гуфт, аз моҳи январи имсол “18 ширкати хориҷӣ дар шакли электронӣ сабт шуданд”.

Ба гуфтаи ӯ, аз ҳисоби онҳо дар шаш моҳи аввали имсол ба буҷаи Тоҷикистон 391 ҳазор сомонӣ ворид гардид. Давлатзода ба унвони мисол аз ширкати Google, Apple ва Amazon ёдовар шуд ва гуфт, “аввалин ширкате, ки (андозро) пардохт кард, Apple буд. Бовар дорем, ширкатҳои дигар низ пардохт мекунанд”.

То кунун Facebook ва ширкатҳои мухобиротии Doodle inc, Novatech IT ltd ва Xsolla-и Амрико низ худро дар Кумитаи андози Тоҷикистон сабт кардаанд. Меъёри андоз аз арзиши изофашуда, ки ин ширкатҳо бояд ба Тоҷикистон диҳанд, феълан 18 дарсад аст.

Қатли Нозанини 21-сола. Толибон гуфтанд, кори онҳо набуд

Акс аз бойгонӣ

Пулиси вилояти Балхи Афғонистон мегӯяд, Толибон як хонуми ҷавонро барои он ба қатл расонданд, ки дар тан либоси танг дошт ва бидуни маҳрам (марде аз наздиконаш) аз хона берун шуда буд.

Рӯзи 3-юми август раиси пулиси вилояти шимолии Балх Зиёулҳақ ба Радиои Озодӣ гуфт, ҳодиса дар деҳае рӯй дод, ки зери назорати Толибон аст.

Сухангӯи пулиси Балх рӯзи 4-уми август иброз дошт, ки номи ин хонуми 21-сола Нозанин буд ва ӯ мехост савори мошин шуда, ба шаҳри Мазори Шариф биравад.

Ба гуфтаи ӯ, зан дар сар бурқа кашида буд. Сӯхангӯйи Толибон Забеҳулло Муҷоҳид айбномаро рад кард ва афзуд, ҳамла мавриди тафтиш қарор гирифтааст.

Тимановская дар Полша суханронӣ хоҳад кард

Тимановская рӯзи 3 август ба саволҳои хабаргузории Associated Press посух дод

Кристина Тимановская, варзишгари беларусӣ, ки дар Лаҳистон ё Полша паноҳгоҳ ёфт, шоми 5-уми август дар Варшава бо хабарнигорон суҳбат мекунад.

Ин варзишгари 24-сола таҳти фишори раҳбарони риштаи варзиши Беларус қариб буд, маҷбурӣ аз Токио ба Минск бурда шавад, вале аз нишастан ба ҳавопаймо худдорӣ кард. Ҳамсараш низ кишварро тарк карда, қарор аст, ба ӯ ҳамроҳ шавад.

Лаҳистон, ҳамсояи Беларус, вале узви Иттиҳоди Аврупо ба ҳамсарон визаи гуманитарӣ ва ваъдаи таъмини амният додааст.

Саргузашти Тимановская дар бозиҳои имсолаи олимпӣ як моҷарои калоне барпо кард ва бори дигар таваҷҷӯҳи ҷомеаи ҷаҳониро ба фазои саркӯбгаронаи режими Александр Лукашенко равона намуд.

Писари Лукашенко – Виктор раҳбарии Кумитаи олимпии Беларусро ба ӯҳда гирифт, вале ин қарорро Кумитаи байналмилалии олимпӣ напазируфт.

Озан Севимли -- намояндаи нави Бонки Ҷаҳонӣ дар Тоҷикистон ва Туркманистон

Озан Севимли шаҳрванди Олмон буда, солҳои дароз дар сохторҳои гуногуни Бонки Ҷаҳонӣ кор кардааст

Бонки Ҷаҳонӣ гуфт, аз 2-юми август иқтисодшиноси ботаҷриба Озан Севимли мудири нави барномаҳои ин ниҳоди байналмилалии молӣ дар Тоҷикистону Туркманистон таъин шудааст.

Дар ин мақом ӯ Ян-Петер Олтерсро иваз кард, ки чаҳор соли охир раҳбари дафтари Бонки Ҷаҳонӣ дар ин ду кишвари Осиёи Марказӣ буд.

Ба иттилои дафтари матбуоти Бонки Ҷаҳонӣ, Озан Севимли аз соли 2005 ба ин сӯ дар вазифаҳои гуногун ва дар кишварҳои Аврупо, Осиёи Марказӣ, Африқо, Амрикои Лотин ва минтақаҳои Кариб кор кардааст.

Ӯ то ин дам намояндаи Бонки Ҷаҳонӣ дар Ямайка ва Гайана (ҳарду дар Амрикои Ҷанубӣ) буда, буҷаи кориаш ним миллиард долларро ташкил медод. Худи Озан Севимли гуфтааст, аз таъиноти наваш хушнуд аст ва "бартарии кори БҶ дар моҳҳои оянда расондани беҳтарин ёрии мумкин ба ду кишвар дар заминаи эҳёи пасоковидӣ ва ҳалли мушкилоти иқтисодию тандурустӣ хоҳад буд."

Бонки Ҷаҳонӣ мегӯяд, аз аввали соли 2020 ин ниҳод барои мубориза бо пандемияи COVID-19 ва ҳимоят аз қишрҳои нодор 32,5 миллион доллар, аз ҷумла 8,63 миллион доллар барои эмгузаронӣ ҷудо кардааст. Ба Туркманистон кумаки ин ниҳод 20 миллион доллар қарзро ташкил додааст.

Ба иттилои Бонки Ҷаҳонӣ, ёриҳои молӣ ва таҳлилии ин ниҳод ба Тоҷикистон аз соли 2017 ба ин сӯ се баробар афзуда, аз 366 миллион ба 1,2 миллиард доллар расидааст.

Қоидаҳои нави сафар дар Амрико ва Бритониё дар шароити пандемия

Як фурудгоҳи Амрико. Тирамоҳи соли 2020

Маъмурияти Ҷо Байден талош дорад, ба ҳама хориҷиёне, ки вориди Иёлоти Муттаҳида мешаванд, талаботи эмкунӣ ба зидди коронавирусро ҷорӣ кунад. Дар ин бора масъулони Кохи Сафед 4-уми август хабар доданд.

Дар ҳамин ҳол, Бритониё гуфтааст, қоидаҳои сафарро ба ин кишвар сабуктар мекунад.

Маъмурияти Байден маҳдудиятҳои марбут ба сайру сафарҳои байналмилалӣ ба Амрикоро тағйир надодааст, вале ҳоло мегӯяд, барои хориҷиҳое, ки пурра эм карда шудаанд, шароити "бехатар"-и ворид шудан ба кишварро фароҳам мекунад. Мақомот ҷузъиёти бештар надоданд.

Бритониё баъзе аз қоидаҳои вурудро тағйир додааст. Аз ҷумла, барои онҳое, ки аз Фаронса ворид мешаванд, ҳатто агар пурра эм шудаанд, карантини ҳатмӣ талаб мешавад.

Дар ҳамин ҳол, баъди дар Чин ошкор шудани ҳодисаҳои зиёди гирифторӣ ба навъи “Делта”-и коронавирус, сафар аз ин кишвар ба берун маҳдуд мешавад.

Ҷопон, ки бозиҳои олимпиро мизбонӣ мекунад, бо сабаби афзоиши мавридҳои гирифторӣ маҳдудиятҳои иҷтимоиро дар ҳашт минтақаи дигари кишвар дароз хоҳад кард.

Хонаводаии Сомон Маҳмадбеков дар Хоруғ мактаби гӯштӣ месозад

Истиқболи гарми Сомон Маҳмадбеков дар фурудгоҳи Душанбе баъди бурдани ҷоми ҷаҳон оид ба ҷудо. 24-уми октябри соли 2019

Хонаводаи Сомон Маҳмадбеков, паҳлавони тоҷик ният дорад дар вилояти мухтори кӯҳистони Бадахшон толор ва мактаби гӯштиро бунёд карда, онро бо устодони варзида таъмин намояд. Дар ин бора Сомон Маҳмадбеков ҳамроҳ бо бародар ва падараш - Моёншо Маҳмадбеков, мураббии ҷудо дар мулоқот бо раиси вилоят Ёдгор Файзов хабар додааст. Сафари Сомон ба вилоят баъди баргаштанаш аз бозиҳои олимпии Токио сурат гирифт. Ёдгор Файзов оилаи варзишгарони тоҷикро барои сӯҳбат пазируфта аз ташаббуси онҳо дастгирӣ кардааст.

Хонаводаи Маҳмадбековҳо, дар вилояти Иркутски Русия ба сар мебарад ва Сомон дар сабқатҳои байналмилалӣ Тоҷикистонро намояндагӣ мекунад. Ӯ дар бозиҳои олимпии Токио дар риштаи гӯштини дзюдо ба ду рақиби худ ғолиб омада, аз намояндаи Озарбойҷон шикаст хӯрд.

АП: Дар Панҷакент мусофиронро нагузоштанд ба марзи Узбекистон гузаранд

2 августи соли 2019. Гузаргоҳи марзии Узбекистону Тоҷикистон воқеъ дар шаҳри Панҷакент он замон ба таври маъмулӣ кор мекард

Хабаргузории Азия-Плюс менависад, дирӯз даҳҳо тан дар назди бинои ҳукумати шаҳри Панҷакент ҷамъ омаданд. Онҳо мусофироне мебошанд, ки мебоист тариқи гузаргоҳи “Саразм” – “Ҷартеппа” ба Ӯзбекистон рафтаву аз он ҷо ба Русия парвоз мекарданд. Аммо аз шаби 3-юми август гузаргоҳи марзӣ баста шуда, мусофироне, ки аксарият сокинони Панҷакент мебошанд, ҳайрон мондаанд. Сабаби баста шудани марзро мақомот тавзеҳ надодаанд, аммо раиси шаҳр ба назди ҷамъомадагон баромада, ваъда додааст, ки мушкилашонро баррасӣ мекунанд. Бинобар баланд будани нархи билет аксари муҳоҷирони тоҷик моҳҳои охир Узбекистонро ба ҳайси кишвари транзитӣ истифода мебаранд. Аз ин пештар онҳо шикоят карда буданд, ки марзбонони тоҷик барои убури сарҳад ришва мегиранд.

Рейдҳои зидди муҳоҷирон дар Русия дар давраи пандемия ҳам бас нашуд

Муҳоҷирони корӣ дар давраи пандемия

Дар Санкт-Петербург намояндагони ҳифзи ҳуқуқ дар даҳҳо нуқтаҳои хӯроки умумӣ ва 30 макони истиқоматии шаҳрванди хориҷӣ рейд гузаронда, иҷрои қонунгузории муҳоҷиратро тафтиш кардаанд. Хадамоти давлатии муҳоҷирати ин шаҳр мегӯяд, дар натиҷа беш аз 250 нафар ба шӯъбаҳои пулис бурда шуда, дар ҳуҷҷатҳои 176 нафарашон камбудӣ ёфтаанд. Ҳамаи онҳо ба ҷавобгарии маъмурӣ кашида шудаанд. Ҳамчунин даҳҳо нафари дигарро барои майдаавбошӣ ва нӯшидани машруботи спирӣ дар маконҳои манъшуда ҷарима бастанд. Бар илова, кормандони пулис дар роҳҳо низ мошинҳоеро, ки сари чанбараш муҳоҷирон менишастанд, тафтиш кардаанд. Ин мошинҳо асосан "Жигули" ва "Газел"-ҳои қадимӣ буданд. Дар пайи рейд ду мошини мушкилдор мусодира ва ҳамчунин як нафаре, ки дар ҷустуҷӯ қарор доштааст, боздошт гардид.

Баргузории рейдҳои зидди муҳоҷирон, ки бисёр вақт бо таҳқиру поймолкунии ҳуқуқи онҳо ҷараён мегирад, дар ҳолест, ки бо пандемияву маҳдудиятҳои сафар ва кор, Русия ба нирӯи арзони корӣ дар бахшҳои мухталифи иқтисодаш ниёз дорад.

Русия макони кору зиндагии даҳҳо ҳазор шаҳрвандони Тоҷикистон аст, вале муқаррароти сангини ин кишвар нисбати муҳоҷирони кории хориҷӣ ҳамеша мавриди интиқоди ҳомиёни ҳуқуқ мебошад.

Қатли Нозанини 21-сола. Толибон гуфтанд, кори онҳо набуд

Ин духтарак мисли садҳо сокини дигари Мазори Шариф бо юриши Толибон аз маконҳои зисти худ фирор кардааст

Полиси вилояти Балхи Афғонистон мегӯяд, Толибон як хонуми ҷавонро барои он ба қатл расонданд, ки дар тан либоси танг дошт ва бидуни ҳамроҳии марде аз хона берун шуда буд. Рӯзи 3-уми август раиси полиси вилояти шимолии Балх Зиё-ул-ҳақ ба Радиои Озодӣ гуфт, ҳодиса дар деҳае рӯй дод, ки зери назорати Толибон аст. Сухангӯйи полиси Балх дирӯз иброз дошт, ки номи ин хонуми 21-сола Нозанин буд ва ӯ мехост савори мошин шуда, ба шаҳри Мазори Шариф сафар кунад. Ба гуфтаи Одил, зан дар сар бурқа кашида буд. Сӯхангӯйи Толибон Забиҳулло Муҷоҳид айбномаро рад кард ва афзуд, ки ҳамла мавриди тафтиш қарор гирифтааст.

Президенти нави Эрон дар парлумон савганд ёд мекунад

3-ми август, Теҳрон. Президенти пешин Ҳасани Рӯҳонӣ ба раиси ҷумҳурии нави Эрон Иброҳим Раисӣ дафтари кории худро месупорад

Иброҳим Раисӣ, президенти нави Эрон рӯзи 5-уми август дар баробари маҷлиси ин кишвар маросими савгандёдкунии дузинаиро ба охир мерасонад. Раисӣ дар ҳоле ба кор шурӯъ мекунад, ки Ҷумҳурии Исломӣ бо сабаби таҳримҳои ИМА ғарқи мушкилоти сангини иқтисодӣ, бӯҳрони беҳдоштӣ ва дар байни муколамаи бисёр печидаи ҳастаӣ бо қудратҳо барои барқарории созиши соли 2015 қарор дорад.

Раисӣ дар гузашта дар мақоми раиси додгоҳи олӣ кор карда, аз ҷониби ИМА барои нақзи ҳуқуқи инсон, аз ҷумла, содир кардани ҳукмҳои қатли зиндониҳои сиёсӣ таҳрим шудааст.

Рӯзи 3-юми август мақоми президентии ҳуқуқшиноси собиқи баҳсбарангезро раҳбари олии Эрон Оятулло Алии Хоманеӣ тасдиқ кард. Раисии муҳофизакор дар ин мақом президенти нисбатан мӯтадил Ҳасани Рӯҳониро иваз мекунад, ки дастоварди азимтарини ӯ дар ин мақом имзои созишномаи ҳастаӣ бо шаш қудрати ҷаҳонӣ будааст. Ин созиш ҳамкориҳои наздики Эронро дар масоили марбут ба барномаи ҳастаиаш бо ҷомеаи ҷаҳонӣ бар ивази бекор кардани таҳримҳои иқтисодӣ пешбинӣ мекард. Вале соли 2018 президенти ИМА Доналд Трамп ба таври якҷониба ин созишномаро тарк карда, таҳримҳои иқтисодиро болои Эрон барқарор намуд.

Ҳалли масоили иқтисодӣ ва ҳам эҳёи дубораи созишномаи ҳастаӣ яке аз муҳимтарин чолишҳои Раисӣ хоҳад буд. Зоҳиран, бо ҳадафи таъкид ба зарурати идомаи муколамаҳои ҳастаӣ, Энрике Мора, дипломат ва музокиракунандаи Иттиҳоди Аврупо дар умури ҳастаӣ дар маросими савгандёдкунӣ иштирок хоҳад кард.

500 сомонӣ ба ҳар оилаи камбизоат дар Тоҷикистон

Дар Тоҷикистон ҳар сокини сеюм камбизоат шумурда мешавад

Мақомоти Тоҷикистон хабар доданд, ки додани кӯмакпулӣ ба оилаҳои камбизоат дар кишвар оғоз шудааст. Тибқи иттилои Вазорати тандурустӣ ва ҳифзи иҷтимоии аҳолӣ, ба 165 ҳазор оила дар ҳаҷми 500 сомонӣ кӯмакпулӣ дода мешавад. Ин маблағҳо дар доираи кӯмаки Бонки ҷаҳонӣ аст, ки моҳи май ба Тоҷикистон дода буд.

Ба навиштаи хабаргузории давлатии “Ховар”, додани кӯмакпулӣ ба оилаҳои камбизоат моҳи август оғоз шуда, то охири сол давом мекунад. Дар марҳилаи аввал дар моҳи август ба 84 ҳазор оилаҳои камбизоат, ки дар хона кӯдакони то 7-сола доранд 500 сомонӣ пул медиҳанд. Баъдан моҳҳои сентябр-октябр ба 56 ҳазор хонавода ва моҳҳои ноябр-декабр ба 25 ҳазор оила чунин кӯмакпулиҳо дода мешавад.

Файзиддин Қаҳҳорзода, вазири молияи Тоҷикистон моҳи июн ба Радиои Озодӣ гуфт, аз ин кӯмакҳо се гуруҳи аҳолӣ баҳраманд хоҳанд шуд, оилаҳои камбизоате, ки кӯдакони то 7-сола доранд, оилаҳои камбизоате, ки кӯдакони маъюби то 18-сола доранд ва оилаҳое, ки саробонаш занонанд ва кӯдакони то 16-сола доранд.

Тақсими кӯмакҳо барои камбизоатон ҳамеша дар Тоҷикистон интиқодҳоро ба вуҷуд меорад. Бархе сокинон мегӯянд, бо вуҷуди шароити вазнин онҳоро ба рӯйхати шахсони камбизоат ворид намекунанд ва ҳамин тавр онҳо аз дарёти кӯмакҳо маҳрум мемонанд.

Дар хабари расмии Ховар омадааст, “интихоби оилаҳои камбизоат барои расонидани кумакпулии якдафъаинаи иҷтимоӣ дар заминаи механизми амалкунандаи кумакҳои унвонии иҷтимоӣ” амалӣ мегардад. Ин бори дувум аст, ки Тоҷикистон дар замони пандемиия бо пули созмонҳои ҷаҳонӣ ба хонаводаҳои камбизоат кумак мекунад.

Пеш аз ин, дар чаҳорчӯби як тарҳи ёрии иҷтимоии Бонки Ҷаҳонӣ ба 50 ҳазор оилаи нодор ёрии якдафъаина расонда буд. Он вақт низ ба оилаҳои камбизоат 500 сомонӣ доданд. Мақомоти Тоҷикистон мегӯянд, 30 дарсади аҳолӣ ҳанӯз дар ҳоли тангдастӣ ба сар мебаранд.

Дар давраи пандемияи коронавирус ва аз кор маҳрум шудани садҳо нафар дар Тоҷикистону Русия эҳтимол шумораи чунин хонаводаҳо бештар шуда бошад

Halyk Bank дар Тоҷикистон баста мешавад

Шаҳри Шимкент, Қазоқистон. Навбатпоӣ дар назди банкомати Halyk bank

Бонки халқии Қазоқистон эълон кард, ки бонки зертобеашро дар Тоҷикистон барҳам медиҳад. Намояндагии ин бонк дар Тоҷикистон бо номи «Халиқ бонк Тоҷикистон» фаъолият мекунад ва аз бонкҳои фаъоли кишвар аст. Вале Бонки халқии Қазоқистон рӯзи 4-уми август хабар дод, ки бо қарори Шӯрои директорон бонки зертобеашро дар Тоҷикистон ихтиёран барҳам медиҳад.

«Мутобиқи стратегияи рушди соҳаҳои ояндадори тиҷорат, Halyk Group тасмим гирифт, ки аз лоиҳа дар Тоҷикистон даст кашад то тамоми захираҳо ва саъю кӯшиши Гурӯҳро ба лоиҳаҳои самаранок ва фоидаовар равона созад,”-омадааст дар хабари расмии Бонки халқии Қазоқистон.

Масъулини Бонки миллии Тоҷикистон ҳанӯз дар ин бора расман шарҳе надодаанд. «Халиқ бонк Тоҷикистон» яке аз 15 бонки Тоҷикистон мебошад, ки тибқи маълумоти расмӣ 34 миллион сомонӣ сармояи оинномавӣ дорад.

Дар соли равон ин сеюмин бонки Тоҷикистон аст, ки барҳам мехӯрад. Пештар бо қарори Бонки миллии Тоҷикистон, «Агроинвестбонк» ва «Тоҷиксодиронбонк» низ барҳам хӯрданд.

Дар Русия ду расонаи мунаққиди Кремлин баста шуд

Эътирози зидди фишорҳои сиёсӣ дар Русия

Чанд ҳафта пеш аз интихоботи парлумонӣ ва дар идомаи фишор болои матбуот, Идораи танзимкунандаи кори матбуоти Русия ду вебсайти хабарии мунаққиди Кремлинро баст. Шурӯъ аз 3-уми август барои корбарони интернет дар Русия дастрасӣ ба “Открытые медиа” ва “МБХ медиа” масдуд шудааст. Ин ду расона гуфтанд, ки дар бораи сабабҳои баста шудани вебсайтҳояшон аз мақомот ҳеҷ огаҳии қаблӣ дарёфт накардаанд. Ин ду расона аз ҷониби мунаққиди Кремлин Михаил Ходорковский пуштибонӣ мешаванд. Соҳибкор ва сарватманди маъруф, ки барои ба чолиш кашидани президент Владимир Путин 10 солро дар зиндон пуштисар кард, дар Лондон зиндагӣ мекунад. Ба иттилои “МБХ медиа”, вебсайт аз ҷониби Роскомнадзор баста шудааст. “Открытые медиа” ҳам дар изҳороташ гуфт, ки Роскомнадзор ин вебсайтро ба феҳристи расонаҳое ворид кардааст, ки ба шӯриш ва фаъолиятҳои тундгароёна даъват мекунад.

Дар чанд соли охир идораи танзимкунандаи кори матбуоти Русия чандин журналист ва расонаро ба ҳайси “агенти хориҷӣ” ва созмони “номатлуб” ба қайд гирифтааст, ки ҳадафаш таҳти фишори иловагӣ қарор додани ин расонаҳо мебошад.

Тоҷикистон аз САҲА хост, "шахсони ҷиноятпеша"-ро дар чорабиниҳояш роҳ надиҳад

Додситони кулли Тоҷикистон аз Созмони амният ва ҳамкории Аврупо хостааст, ки "шахсони ҷиноятпеша"-ро дар чорабиниҳои ин созмон роҳ надиҳад. Дар хабарномаи Додситонии кулли Тоҷикистон аз ин афрод ё гурӯҳҳо ба таври мушаххас ном бурда нашудааст. Аммо дар гузашта Душанбе аз иштироки намояндагони Ҳизби дар Тоҷикистон фаъолияташ мамнуи наҳзати исломӣ ва "Гурӯҳи 24" дар чорабиниҳои Созмони амният ва ҳамкории Аврупо, норозигӣ карда буд.

Юсуф Раҳмон, Додситони кулли Тоҷикистон ин мавзуъро рӯзи 2-юми август дар мулоқот бо мудири Маркази пешгирии низоъҳои САҲА - ҳамзамон муовини раҳбари Котиботи САҲА Туула Юреля ва роҳбари Раёсати хатарҳои фаромиллии САҲА Купчина Елена Николаевна, матраҳ кардааст. Ба иттилои Додситонии кулли Тоҷикистон, Юсуф Раҳмон дар сафари аврупоии худ ҳамчунин масъалаи истирдоди "ҷинояткорони дар кофтукови байналмилалӣ қарордошта ва хавфи онҳо ба Иттиҳоди Аврупо"-ро дар миён гузоштааст.

Ҳануз маълум нест, ки посухи САҲА ба ин дархости ҷониби Тоҷикистон чӣ ҳаст. Аммо Додситонии кулли Тоҷикистон хабар додааст, ки дар оянда сафари корӣ ва тахассусии раҳбарияти САҲА ба Тоҷикистон сурат хоҳад гирифт.

Додситони кулли Тоҷикистон дар ин сафари аврупоии худ аз Олмон, Лаҳистон ва Австрия ҳам дидан намуд ва бо мақомоти додситонии ин кишварҳо гуфтугӯ кард.

Дар нишасти САҲА аз даҳҳо кишвари узви созмон намояндагони мухолифин, ҷомеаи шаҳрвандӣ, ҳукумат иштирок ва мавзуъҳои ҳуқуқи башару озодиҳои сиёсиро баррасӣ мекунанд. Нишастҳои байналмилалӣ бо ширкати намояндагони давлат ва мухолифонашон, ки дар Аврупо паногоҳи сиёсӣ ёфтаанд, аксаран зимни моҷароҳо расонаӣ мешаванд.

Панҷ соле пеш ҳайати ҳукумати Тоҷикистон ба нишони эътироз аз ширкати мухолифин толори нишасти САҲА дар Варшаваро тарк кард. Пас аз он хабаргузории давлатии “Ховар” ҳушдор дод, ки дафтари ин созмон дар Тоҷикистон баста мешавад ва намояндагони давлат бо мухолифон сари як миз намешинанд.

Аз соли 2015 ба ин тараф садҳо шаҳрванди Тоҷикистон барои паноҳҷӯйӣ ва кору иқомат ва таҳсил ба кишварҳои аврупоӣ рафтаанд. Дар миёни онҳо ҷонибдорони ҳизби ҳоло дар кишвар мамнӯи наҳзати исломӣ, "Гуруҳи 24", хабарнигорону тоҷирон, ҳомиёни ҳуқуқ ва пайравони равияҳое ба монанди салафия низ ҳастанд.

Аксари ин афрод далели паноҳҷӯйӣ дар кишварҳои аврупоиро ба таъқибу саркӯб ва фишори афзоянда болои дигарандешон дар Тоҷикистон ва парвандаҳои сохта ба зидди онҳо рабт медиҳанд. Мақомоти Тоҷикистон баъзе аз онҳоро расман ба терроризму ифротгароӣ ва ҳамкорӣ бо созмонҳои фаъолияташон мамнуъ дар кишвар муттаҳам кардаанд.

Коршикании кормандони як ширкати хусусӣ дар Қазоқистон идома дорад

Коршикании кормандони ширкати хусусии "АBUEV GROUP".

Коршикании кормандони ширкати хусусии "АBUEV GROUP" дар шаҳри Жанаозени Қазоқистон рӯзи шашум аст, ки идома дорад.

Ошпаз, фаррош ва боркашҳои ширкат аз рӯзи 30 июл ба ин сӯ ба кор намебароянд. Онҳо талаб доранд, ки кормандони зан низ ба ҳайси корманди расмӣ сабтином ва шароити корияшон беҳтар карда шавад.

"Раиси Жанаозен Максат Ибагаров 3 август омада, гуфт, ки наметавонад ин мушкилро ҳал кунад. Аз мо хостанд, шартномаеро имзо кунем, ки на сана гузошта шудааст ва на номи ширкат дар он омадааст. Мо розӣ нашудем. Мо то талабҳоямон иҷро нашавад, аз эътироз даст намекашем",- гуфт яке аз эътирозгарон 4 август.

Кормандони норозӣ бо нашри муроҷиатномаи видеоӣ аз раиси Иттиҳодияи ширкатҳои нафткаши Қазоқистон Асхат Дуйсалиев ва раиси вилояти Мангистау Серикбой Трумов хостаанд, ба қазия дахолат кунанд.

Ин бори аввал нест, ки дар Қазоқистон нафткашҳо бо талаби маоши бештар коршиканӣ мекунанд. Танҳо дар давоми як моҳи ахир кормандони беш аз 10 ширкат дар Жанаозен корпартоӣ кардаанд.

Сарвазири пешини Қирғизистон Темир Сариев 2 моҳ ҳабс шуд

Темир Сариев, нахустивазири пешини Қирғизистон.

Додгоҳи Якуми майи шаҳри Бишкек сарвазири пешини Қирғизистон Темир Сариевро, ки дар доираи парвандаи кони тилои "Қумтор" дастгир шуда буд, ду моҳ ҳабс кард. Кумитаи давлатии амнияти миллии Қирғизистон 3 август хабар дод, ки Темир Сариев ҳам боздошт шудааст.

"Сариев ҳангоми вазири иқтисод ва ҳамзамон раиси комиссияи дахлдор буданаш ҳаҷми хисороти зистмуҳитиро дар пайи коркарди кони "Қумтор" чандин миллиард сом кам нишон додааст", - омада буд дар иттилоияи Кумитаи давлатии амнияти миллии Қирғизистон.

Дар доираи парвандаи кони тилои "Қумтор" то ин замон даҳҳо мансабдори баландпояи пешин ва кунунии Қирғизистон, аз ҷумла вакилони порлумон Асилбек Ҷеенбеков ва Торобой Зулфиқоров, вакилони пешин Исҳоқ Пирматов ва Талантбек Узакбоев, инчунин сарвазири пешини Қирғизистон Омурбек Бабанов боздошт шудаанд. Ахиран президенти нахустин ва фирории Қирғизистон Аскар Оқоев низ дар доираи ин парванда ба ватан оварда шуд.

Порлумони Қирғизистон рӯзи 17 май ба девони вазирон дастур дод, ки дар ширкати "Қумтор Голд Компани" мудирияти муваққат ҷорӣ кунад.

Қумтор калонтарин кони тилои Қирғизистон ба ҳисоб меравад. Онро ширкати канадагии Centerra Gold Inc. коркард мекард.

САҲА ба интихоботи Русия нозиронашро намефиристад

Созмони Амният ва Ҳамкорӣ дар Аврупо дар сӣ соли охир бори аввал ҳайаташро барои назорат аз интихоботи қарибулвуқӯи Русия нахоҳад фиристод.

Масъулони созмон 4-уми август ин тасмимро ба “маҳдудиятҳо”-е вобаста донистанд, ки ҷониби Русия дар аҳди пандемия ҷорӣ кардааст.

"Хеле таассуфовар аст, ки интихоботи қарибулвуқӯи Русияро назорат карда наметавонем", -- гуфт Маттео Мекаччи, мудири Дафтари ниҳодҳои демократӣ ва ҳуқуқи башари САҲА (ODHIR). Вай афзуд, "пойфишориҳои мақомоти Русия дар бораи маҳдуд кардани шумори нозирон" ба ин кор сабаб шуд.

САҲА яке аз ниҳодҳои муҳими ҷаҳонӣ дар мавриди назорат аз интихоботҳо аст. Созмон бо ҳадафи озоду одилона гузаштани маъракаҳои сиёсӣ нозиронашро ба 57 кишвари узв мефиристад.

Шаҳрвандони Русия рӯзи 19-уми сентябри имсол вакилони палатаи поёнии порлумон (Думаи давлатӣ), инчунин, аъзои 39 маҷлиси минтақаӣ ва 9 волии вилоятро интихоб хоҳанд кард.

Кремлин дар остонаи интихобот бисёре аз чеҳраҳои сиёсии мухолифин ва расонаҳои мустақилро саркӯб намуд. Ба чанде аз намояндагони мухолифин, ки бо Алексей Навалний, сиёсатмадори зиндонӣ иртибот доштанд, иҷозаи иштирок дар интихоботро надоданд.

Шумори гирифторони COVID-19 дар Эрон аз 4 миллион кас гузашт

Танҳо дар як шабонарӯзи гузашта дар Эрон фавти беш аз 400 кас аз коронавирус сабт шудааст

Вазорати тандурустии Эрон рӯзи 4-уми август гуфт, ки шумори расмии гирифторони коронавирус дар ин кишвар аз 4 миллион кас бештар шуд.

Танҳо дар шабонарӯзи охир тақрибан чиҳил ҳазор мавриди сирояти бемориро сабт кардаанд. Ба иттилои расмӣ, дар умум, дар Эрон беш аз 92 ҳазор кас бар асари COVID-19 ҷони худро аз даст додаанд.

Гумон меравад, шумори воқеии беморону қурбониён дар ин кишвари 83-миллионнафарӣ ба маротиб бештар аст.

Афзоиши теъдоди беморону қурбониён дар ҳолест, ки маъракаи эмкунӣ ба зидди коронавирус дар Эрон суст пеш меравад.

Раҳбари олии ин кишвар, Оятуллоҳ Алии Хоманаӣ, рӯзи 2-юми август барои андешидани "чораҳои зарурӣ" дастур дод. Аз он пеш, Саид Намакӣ, вазири тандурустии Эрон, хоҳони ҷорӣ кардани маҳдудиятҳо барои ду ҳафта шуд.

Сафари гузоришгари СММ дар умури озодиҳои мазҳабӣ ба Узбекистон

Аҳмад Шаҳид

Аҳмад Шаҳид, гузоришгари хоси Созмони Милали Муттаҳид дар умури озодиҳои мазҳабӣ, моҳи сентябри имсол ба Узбекистон сафар хоҳад кард.

Дар ин бора дар поёни мулоқоти сафири Узбекистон дар Амрико Ҷавлон Ваҳҳобов ва Аҳмад Шаҳид хабар дода шудааст.

Бино ба иттилои расонаҳои Узбекистон, Аҳмад Шаҳид изҳори омодагӣ кардааст, ки аввалҳои моҳи сентябри имсол барои роҳандозии барномаи кумаки фаннӣ бо дастгирии Пажӯҳишгоҳи таҳқиқоти байналмилалии ба номи Ралф Банч ба Узбекистон биравад.

Дар доираи сафари гузоришгари махсуси СММ барои намояндагони идораҳои дахлдори давлатӣ, ҷомеаи шаҳрвандӣ ва иттиҳодияҳои динии Узбекистон давраҳои омӯзишӣ баргузор карда мешавад.

Аҳмад Шаҳид ҳамчунин гуфта, ки омодааст моҳи декабри соли равон низ барои иштирок дар Конфронси байналмилалии "Муколамаи эъломияҳо" ба Узбекистон биравад.

Тоҷикистону Туркманистон 19 санади нави ҳамкорӣ имзо карданд

Эмомалӣ Раҳмон (рост) ва Қурбонқулӣ Бердимуҳаммадов (чап)

Мақомоти Тоҷикистону Туркманистон 19 санади нави ҳамкорӣ, аз ҷумла дар мавриди интиқоли маҳсулоти нафтӣ ва гази моеи карбогидридӣ, имзо карданд.

Маросим 4-уми август дар маркази Туркманистон, пас аз мулоқоти раҳбарони ду кишвар сурат гирифт. Эмомалӣ Раҳмон, раиси ҷумҳурии Тоҷикистон, бо сафари расмӣ дар Ишқобод аст.

Тоҷикистону Туркманистон дар бораи ҳамкории тиҷоративу иқтисодӣ дар солҳои 2021-2023; дар бахши нақлиёти роҳи оҳан; ҳамлу нақл, интиқоли мол ва мусофирон низ созишнома қабул карданд.

Ҷузъиёти санадҳо дастрас нест, аммо мавзӯи интиқоли маҳсулоти нафтӣ ва гази моеъ дар ин шабу рӯз барои Тоҷикистон муҳим дониста мешавад. Туркманистон кишвари саршор аз нафту газ аст. Тоҷикистон ин маҳсулотро аз хориҷа меорад ва моҳҳои охир нархи он дар дохил башиддат боло рафта, боис ба норозигии сокинон шудааст.

Санадҳои дигар аз ёддошту ҳамкории байни ниҳодҳо ва минтақаҳои ду кишвар иборат аст.

Тоҷикистону Туркманистон ба камияш се сол боз муносибати хуб надоранд. Равобити ду кишвар пас аз он ба мушкил печид, ки мақомоти Туркманистон соли 2018 ба мошинҳои Тоҷикистон иҷоза надоданд, аз қаламрави Эрон вориди ин кишвар шаванд. Мошинҳо аз Туркияву Эрон молу маҳсулот меоварданд.

Баъди баста шудани роҳи Туркманистон, мақомоти Тоҷикистон аз ронандагон хостанд, тавассути Озарбойҷон ба самти Тоҷикистон ҳаракат кунанд. Вале ронандаҳо мегӯянд, ҳангоми убур аз Озарбойҷон роҳи онҳо дароз ва харҷашон бештар мешавад.

Абдуфаттоҳ Шарифзода, сухангӯйи президент, рӯзи 4-уми август ба Радиои Озодӣ гуфт, масъалаи кушодани роҳи Туркманистон барои мошинҳои Тоҷикистон баррасӣ шуд. "Инчунин, президентҳои ду кишвар истифода аз бандари байналмилалии "Туркманбошӣ"-ро ба манфиати ҷонибҳо донистанд", -- афзуд ӯ.

Равобити Тоҷикистону Туркманистон на ҳамеша чунин сарду то ҷое дучори мушкил будааст. Солҳои 90-ум Туркманистон аз аввалин кишварҳое будааст, ки барои садҳо ҳазор фирории ҷанги шаҳрвандӣ паноҳгоҳ ва шароити кору зиндагӣ фароҳам овардааст.

Сатҳи камбизоатиро дар Тоҷикистон беш аз 26% гуфтанд

Акс аз бойгонӣ

Сатҳи камбизотӣ дар Тоҷикистон беш аз 26 дарсадро ташкил медиҳад. Ин рақамро вазири рушди иқтисод ва савдо ҳангоми нишасти хабарӣ рӯзи 2-юми август эълон кард.

Ба гуфтаи Завқӣ Завқизода, тибқи стратегияи миллии рушд то соли 2030 шумори камбизоатон аз ҳисоби рушди иқтисод, шуғл ва афзоиши соҳаи иҷтимоӣ тадриҷан (оҳиста-оҳиста) кам хоҳад шуд.

Вале Бонки Ҷаҳонӣ соли гузашта гузориш дода буд, ки Тоҷикистон дар тӯли ду даҳсолаи охир суръати заифтарини иқтисодро аз сар мегузаронад ва интизор меравад суръати коҳиши фақр низ суст шавад.

Қабл аз пандемия дар Душанбе, навоҳии тобеи ҷумҳурӣ ва вилояти Суғд коҳиши сатҳи камбизоатӣ ба мушоҳида расида буд. Вале дар вилоятҳои Хатлон ва Мухтори Куҳистони Бадахшон баръакс сатҳи камбизоатӣ афзоиш ёфт.

Бонки Ҷаҳонӣ шахсеро, ки дар як рӯз камтар аз 20 сомонӣ барои худ харҷ мекунад, "сахт фақир" мешуморад

Идомаи ҷанги артиши Афғонистон бо Толибон. СММ аз “пайомади фоҷеабор” гуфт

Нерӯҳои ҳукуматии Афғонистон

Рӯзи 3-юми август бархӯрдҳои мусаллаҳона дар маркази вилояти Ҳилманди Афғонистон – шаҳри Лашкаргоҳ – сабт шуданд.

Созмони Милали Муттаҳид ҳушдор дод, ки мардуми зиёд дар миёни оташи артиши Афғонистон ва Толибони силоҳбадаст мондаанд, ки метавонад пайомади фоҷеабор дошта бошад.

Ҳафтаҳои охир Толибон ноҳияҳои бисёреро ишғол намуданд ва акнун ҳадафи ҳамлаҳои онҳо се маркази вилоят – шаҳрҳои Ҳирот, Лашкаргоҳ ва Қандаҳор – мебошад.

Артиши Афғонистон аз сокинони мулкии Лашкаргоҳ талаб кард, ки аз шаҳр берун шаванд, зеро эҳтимол ҳукумат ҳамлаи ҷавобӣ раҳандозӣ кунад.

Феълан Толибон маҳбас, қароргоҳи полис ва чанд бинои дигареро ишғол намуда, қароргоҳи раёсати амнияти миллиро ҳадаф қарор додаанд.

Идораи СММ мегӯяд, дар давоми 24 соати охир бар асари бархӯрдҳои мусаллаҳона дар Лашкаргоҳ камаш 40 фарди осоишта ба ҳалокат расид.

Ёфтҳои бештар

XS
SM
MD
LG