Пештар Амрико ва Иттиҳоди Аврупо низ аз чораи мушобеҳ хабар дода буданд.

Дэвид Лэммӣ, вазири корҳои хориҷии Бритониё, рӯзи 9-уми декабр гуфт, "саҳнаҳои ҳавлноки хушунат алайҳи эътирозгарон ва хабарнигорон аз ҷониби мақомоти Гурҷистон қобили пазириш нест ва бояд бас карда шавад."

"Бо таваҷҷуҳ ба идомаи ин рӯйдодҳо, Бритониё ҳама гуна барномаҳои пуштибонӣ аз ҳукумати Гурҷистонро фавран қатъ ва ҳамкориҳои дифоиро маҳдуд мекунад," – афзуд ӯ.

Танишҳо дар Гурҷистон пас аз эъломи пирӯзии ҳизби ҳокими "Орзуи гурҷӣ" дар интихоботи порлумонии 26-уми октябр боло гирифт. Мухолифони ғарбгаро ва раисҷумҳури Гурҷистон, Саломе Зурабишвили, гуфтанд, ки дар ин маърака бо мадади Маскав тақаллуб сурат гирифтааст.

Баъди он ки ҳукумати Гурҷистон рӯзи 28-уми ноябр музокиротро бо Брюссел дар бораи пайвастани Гурҷистон ба Иттиҳоди Аврупо то соли 2028 боздошт, эътирозгарони зиёд ба хиёбонҳои пойтахт, Тбилиси, баромаданд. Мақомот барои пароканда кардани онҳо аз зӯр ва обу гази ашковар истифода карданд.

Иёлоти Муттаҳида рӯзи 4-уми декабр аз ҳукумати Гурҷистон талаб кард, ки бо мардуми норозӣ боэҳтиромона муносибат кунад.

Хабаргузории "ТАСС" рӯзи 9-уми декабр аз қавли Песков навишт, ки "чунин тасмимгирӣ бе ширкати сарвари давлат имконпазир нест."

Расонаҳои давлатии Русия шаби 8-уми декабр гузориш доданд, ки Башор Асад "дар Маскав аст ва дар Русия ҳаққи паноҳандагӣ гирифтааст".

Сухангӯи Кремл нагуфт, ки ҳоло Башор Асад дар куҷост, вале афзуд, дар ҷадвали мулоқоти Путин суҳбат бо ӯ дар назар нест.

Ҳукумати Башор Асад 8-уми декабр, баъд аз ёздаҳ рӯз ҳамлаи ғофилгиронаи шӯришиён, суқут кард ва бо ҳамин 53 сол ҳукуматдории хонадони ӯ дар Сурия поён ёфт.

Мақомоти Русия Асадро расман раисҷумҳури пешини Сурия номида, иддао доранд, ки ӯ дар пайи гуфтушунид бо намояндагони мухолифини мусаллаҳ розӣ шудааст, курсии президентӣ ва ҳамин тавр кишварро тарк кунад. Худи ӯ дар бораи суқути режимаш изҳори назар накард.

Русия ҳампаймони деринаи Сурия буд ва дар замони ҷанги дохилии ин кишвар (дар соли 2011 оғоз шуд) ба ҳукумати Башор Асад ёриҳои муҳими низомӣ ва сиёсӣ кардааст. Кишварҳои ғарбӣ ва мухолифонаш Башор Асадро ба ҷиноятҳои зиёд, аз ҷумла куштани ғайринизомиён дар Сурия муттаҳам мекунанд.

Ин шумора дар моҳи феврал ба 31 ҳазор нафар баробар буд.

Зеленский рӯзи 8-уми декабр дар Телеграм навишт, ки дар ин муддат 370 ҳазор сарбози украинӣ захмӣ шуда, ниме аз онҳо пас аз табобат ба майдонҳои даргирӣ баргаштаанд.

Шумори сарбозони кушташуда ва захмии Украинаву Русия бештар аз омори расмӣ пиндошта мешавад.

Доналд Трамп, раисҷумҳури мунтахаби Иёлоти Муттаҳида, дар шабакаи иҷтимоии Truth навишт, ки дар ин ҷанг 600 ҳазор сарбози Русия кушта ва захмӣ шуданд.

Трамп ва Зеленский рӯзи 7-уми декабр дар Порис (Париж) мулоқот карданд.

Иёлоти Муттаҳида ва Иттиҳоди Аврупо гурӯҳи фаластинии “Ҳамос”-ро созмони террористӣ медонанд.

Омори нав рӯзи 8-уми декабр нашр шуд.

Дақиқ нест, ки чӣ қадар аз кушташудаҳо низомӣ ва чӣ қадар ғайринизомӣ ҳастанд.

Танҳо гуфта шудааст, ки беш аз нисфи қурбониён занону кӯдакон мебошанд.

Тибқи ҳамин омор, дар набардҳо зиёда аз 106 ҳазор кас маҷрӯҳ шудаанд

Ҷанг дар Ғазза пас аз он оғоз шуд, ки “Ҳамос” рӯзи 7-уми октябри соли 2023 ба Исроил ҳамла карда, дастикам 1200 нафарро кушт ва тақрибан 250 нафарро гаравгон гирифт.

Бахши “Мигрант Медиа”-и Радиои Озодӣ охири ҳафтаи гузашта навишт, ки замон ва макони сабти навор маълум нест.

Саҳифаи “Тсарград” дар Телеграм, ки пайваста наворҳои зидди муҳоҷирон ва таблиғи ҷангро нашр мекунад, ин видеоро 5-уми декабр гузоштааст.

“Муҳлати шартнома аз як то панҷ сол аст. Баъди он ки муҳлат ба охир расид, ба шумо шиносномаи Русияро медиҳанд. Дигар ба шумо иҷозатномаи кор ва ягон санади дигар даркор намешавад,” – мегӯяд яке аз низомипӯшон дар видео.

Муҳоҷироне, ки дар навор сабт шудаанд, ин пешниҳодро напазируфтаанд.

Низомипӯшҳо ба муҳоҷирон хабар доданд, ки аз Русия ронда хоҳанд шуд.

Мақомоти Русия хабар доданд, ки дар натиҷаи амалиёти “Нелегал - 2024” 20 ҳазор хориҷиро аз ин кишвар берун кардаанд.

Бори аввал нест, ки муҳоҷиронро дар Русия барои ширкат дар ҷанги зидди Украина даъват мекунанд.

Дар баёнияи ин ниҳод, ки рӯзи 7-уми декабр нашр шуд, аз Тоҷикистон хоста шудааст, ки ба ӯҳдадориҳои байналмилалии худ барои муҳофизат аз касоне, ки аз озор ва азият фирор кардаанд, пойбанд бимонад.

Ба гуфтаи UNHCR ихроҷи паноҳандагон ба ҳар кишваре, ки мумкин аст бо осеби ҷиддӣ рӯбарӯ шаванд, нақзи конвенсияи СММ аст, ки Тоҷикистон онро имзо кардааст.

Радиои Озодӣ ҳафтаи гузашта хабар дод, ки мақомоти Тоҷикистон даҳҳо муҳоҷир ё паноҳҷӯйи афғонистониро аз Тоҷикистон ихроҷ (берун) карданд.

Комиссариати олии СММ дар умури гурезаҳо ҳам дар ин баёнияи худ гуфтааст, ки байни рӯзҳои 3 то 5 декабр мақомоти Тоҷикистон 41 шаҳрванди Афғонистонро, ки ҳадди ақал 37 тани онҳо паноҳҷӯ буданд, ихроҷ карданд.

Комиссарияти СММ дар умури гурезаҳо мегӯяд, дар мавриди амнияти ин афрод, ки аксаран мардон ва саробони хонаводаҳояшон буданд, нигарон аст. Ба гуфтаи UNHCR, ин амр "осебпазирии занон ва кӯдакони онҳоро, ки дар Тоҷикистон мондаанд, бештар мекунад".

Манобеи Радиои Озодӣ дар консулгарии Афғонистон дар Хоруғ ҳафтаи гузашта гуфтанд, ки ин муҳоҷирон ба воситаи гузаргоҳи "Шерхон Бандар" ба Афғонистон гузаштанд. Ба иттилои манбаъ, "муҳоҷирони ихроҷшуда дар шаҳри Ваҳдат, ноҳияи Рӯдакӣ ва шаҳри Душанбе кору зиндагӣ доштанд".

"Санадҳояшон дуруст буд, аммо сабаби ихроҷро намедонам. Бештари ихроҷшудаҳо аз тарафи пулиси Ваҳдат бозҷӯйӣ ва сипас ронда шудаанд. Як бор 16 ва дафъаи дигар беш аз 40 нафар, яъне дар ду ҳолат, ихроҷ карда шудаанд", афзуд ӯ.

Мақомоти тоҷик то кунун ба хабарҳо дар мавриди ихроҷи паноҳандагони афғон ва низ баёнияи UNHCF вокуниш нишон надодаанд. Нусратулло Маҳмадзода, сухангӯйи Вазорати корҳои дохилии Тоҷикистон ҳафтаи гузашта дар суҳбат бо Радиои Озодӣ гуфта буд, ки аз ихроҷи муҳоҷирони афғонистонӣ хабар надорад. Вале ҳамзамон афзуд, "бар асоси муқаррарот, вақте қоидаҳои будубошро риоят намекунанд, сабаби ихроҷашон мешавад."

Дар солҳои 2021 ва 2022 зиёда аз 80 муҳоҷири афғонистониро аз Тоҷикистон ронда буданд. Мақомот далели рондани онҳоро нақзи қоидаи иқомат номиданд.

Дар Тоҷикистон беш аз 10 ҳазор паноҳандаи афғонистонӣ ба сар мебаранд. Аксари онҳо то ба сари қудрат омадани "Толибон" дар Афғонистон ба Тоҷикистон омадаанд.

Ӯ рӯзи 8-уми декабр аз Владимир Путин, раиси ҷумҳури Русия хост, ки ба ҷанги тақрибан сесола дар Украина поён диҳад.

Трамп ин изҳоротро замоне баён кард, ки ҳукумати беш аз 50-солаи хонадони Асад, ки мавриди ҳимояти Русия ва Эрон буд, фурӯ пошид ва қудрат ба дасти мухолифон афтод.

Башор Асад, раиси ҷумҳури Сурия рӯзи 8-уми декабр дар пайи фишори мухолифони мусаллаҳаш тарки Димишқ кард ва ба Русия фирор намуд.

Трамп гуфт, Русия бинобар ҷанги Украина ва заъфи иқтисод ва Эрон бинобар ҷанг бо Исроил, заъиф шудаанд.

Ҷо Байден рӯзи 8-уми декабр дар паёми телевизионӣ аз Кохи Сафед гуфт: "Чун онҳо масъулияти бештарро бар дӯш мегиранд, мо на танҳо сухан, балки амали онҳоро низ арзёбӣ хоҳем кард".

Ба қавли ӯ, Иёлоти Муттаҳида фаъолияти гурӯҳи тундрави "Давлати исломӣ" ё ДОИШ-ро, ки метавонад аз холигоҳи бавуҷудомада дар Сурия истифода кунад, бодиққат назорат хоҳад бурд. Байден гуфт, Амрико рӯзи 7-уми декабр ба мавқеъҳои ДОИШ дар Сурия даҳҳо зарбаи дақиқ зад.

Шӯришиён ба раҳбарии гурӯҳи "Таҳрир аш-Шом" рӯзи ҳаштуми декабр аз суқути давлати Башор Асад дар Сурия хабар доданд. Башор Асад аз соли 2000-ум раисҷумҳури Сурия буд. Пеш аз он, падараш Ҳофиз Асад, 29 сол дар ин кишвари Ховари Миёна фармонравоӣ кардааст

Ошӯбгарони мусаллаҳ дар ҳамлаи ғофилгирона, ки 27-уми ноябр сар шуд, аввал Ҳалаб ва сипас Ҳамову Ҳумсро гирифта, ҳаштуми декабр вориди Димишқ, пойтахти Сурия, шуданд.

Амрико, Иттиҳоди Аврупо ва чанде аз кишварҳои дигар "Таҳрир аш-Шом"-ро созмони террористӣ медонанд. Ин гурӯҳи низомии исломгаро дар солҳои охир иртиботашро бо "Ал-Қоида" бас карда, талош намудааст, худро алтернативаи шоистаи ҳукумати Сурия нишон диҳад.

Бо вуҷуди он ки Абумуҳаммад Ҷулонӣ, раҳбари "Таҳрир аш-Шом", кӯшидааст, шиаҳои алавӣ ва камшуморони дигари Сурия, аз ҷумла насрониҳоро итминон диҳад, ки ба онҳо чизе нахоҳад шуд, нигарониҳо дар бораи пайванди эҳтимолии "Таҳрир аш-Шом" бо гурӯҳҳои террористӣ ва поймоли ҳуқуқи инсон аз тарафи он боқӣ мондааст.

Хабаргузории расмии "ТАСС" шаби 8-уми декабр навишт, ки "Асад бо аъзои хонаводааш ба Маскав расид. Русия ба далели башардӯстона ба онҳо паноҳандагӣ дод."

Ин расона Башор Асадро "раисҷумҳури собиқ"-и Сурия ном бурд. Вазорати корҳои хориҷии Русия рӯзи якшанбе дар изҳороте иддао кард, ки Асад дар пайи гуфтушунид бо намояндагони мухолифини мусаллаҳ розӣ шудааст, курсии президентӣ ва ҳамин тавр кишварро тарк кунад. "Русия дар ин музокирот ширкат накард", - гуфта шудааст дар эъломияи вазорат.

Русия ҳампаймони деринаи Сурия буд ва дар замони ҷанги дохилии ин кишвар (дар соли 2011 оғоз шуд) ба ҳукумати Башор Асад ёриҳои муҳими низомӣ ва сиёсӣ кардааст.

Изҳороти Вазорати умури хориҷии Русия дар ҳоле садо дод, ки шӯришиён ба воситаи телевизиони давлатии Сурия гуфтанд, "Димишқ аз Асад озод шуд". Хонадони Асад аз соли 1971 то 8-уми декабри соли 2024 бо панҷаҳои оҳанин бар Сурия ҳокимият доштанд.

Кишварҳои ғарбӣ ва мухолифонаш дар Сурия Башор Асадро ба ҷиноятҳои зиёд, аз ҷумла куштани ғайринизомиён муттаҳам мекунанд. Саркӯби тазоҳурот дар соли 2011 ба ҷанги дохилӣ дар Сурия табдил ёфт. Артиши Русия дар паҳлӯи Башор Асад ба мавқеъҳои мухолифони ӯ зарба зад.

Хабаргузории “ТАСС” бо такя ба як манбаъ иттилоъ дод, ки мақомоти Русия бо намояндагони мухолифин дар Сурия дар тамос ҳастанд. Гурӯҳе, ки назоратро дар пойтахт ва шаҳрҳои дигари муҳим ба даст гирифт ва гуё амнияти пойгоҳҳои низомӣ ва намояндагиҳои дипломатии Русияро замонат додааст.

Дар расонҳаои Русия ба наздикӣ мухолифони мусаллаҳи Асадро "террорист" меномиданд, аммо рӯзҳои охир лаҳни расонаҳо ва идораҳои давлатӣ то андозае тағйир ёфтааст.

Нерӯҳои Башор Асад ҳанӯз дар моҳи ноябр тақрибан тамоми шаҳрҳои бузурги Сурия ва аксар қаламравҳои онро зери назорат доштанд. Аммо аз 27-уми ноябр ба ин сӯ шӯришиён ба раҳбарии гурӯҳи “Таҳрир аш-Шом” аввал вилояти Ҳалаб ва сипас Ҳамову Ҳумсро тасарруф карда, рӯзи 8-уми декабр вориди Димишқ шуданд.

Амрико, Иттиҳоди Аврупо ва чанде аз кишварҳои дигар “Таҳрир аш-Шом”-ро созмони террористӣ медонанд. Ин гурӯҳи низомии исломгаро дар солҳои охир иртиботашро бо “Ал-Қоида” бас карда, талош намудааст, худро ҷойгузини шоистаи ҳукумати Сурия нишон диҳад.

Бо вуҷуди он ки Абумуҳаммад Ҷулонӣ, раҳбари “Таҳрир аш-Шом”, кӯшидааст, шиаҳои алавӣ ва камшуморони дигари Сурия, аз ҷумла насрониҳоро итминони хотир диҳад, ки ба онҳо чизе нахоҳад шуд, нигарониҳо дар бораи пайванди эҳтимолии “Таҳрир аш-Шом” бо гурӯҳҳои террористӣ ва поймоли ҳуқуқи инсон аз тарафи он боқӣ мондааст.

Ҳанӯз маълум нест, ки пас аз суқути режими Асад Сурияро кӣ ва чӣ гуна идора хоҳад кард. Сарвазир Муҳаммад Ҷалолӣ гуфтааст, бо ҳар раҳбаре, ки мардум бипазиранд, ҳамкорӣ ва ҳукуматро таслим мекунанд. Раҳбарони бузургтарин гурӯҳҳои мухолифин таҳияи Қонуни асосӣ ва интихоботи навро зарур донистаанд.

Соли 2014 Виктор Янукович, раисҷумҳури барканоршудаи Украина, дар Русия ҷойгир шуд. Маскав ӯро баъди фирор аз Украина, баръакси Башор Асад, муддате раисҷумҳури қонунӣ медонист, аммо дертар эътирофи ӯро дар ин мақом бас кард.

Ӯ ҳамчунин таҳаввулоти Сурияро баёнгари суст шудани пуштибонҳои Асад – Русия ва Эрон – донист.

Кая Каллас рӯзи 8-уми декабр дар шабакаи “Х” навишт, авлавияти онҳо таъмини амниятдар минтақа аст ва ӯ бо ҳама шарикони созанда дар Сурия ва минтақа кор хоҳад кард.

Ин нерӯҳо таҳти ҳимояти Амрико ва зери раҳбарии курдҳо буда, бахшҳои зиёдеро дар шимолу шарқи Сурия назорат мекунанд.

Фармондеҳи нерӯҳои “Сурияи демократӣ дар баёнияе дар Телеграм эълом кард, ки дар ҳоли таҷрибаи лаҳзаҳои таърихӣ ҳастанд. Чун, ба гуфтаи ӯ, суқути “режими истибдодӣ”-ро дар Димишқ диданд.

Вай афзудааст, ин тағйир фурсатеро барои сохтани Сурияи нав, демократӣ ва одил фароҳам мекунад, то ҳуқуқи ҳама суриягиҳо кафолат дода шавад.

Шӯришиён ба раҳбарии гурӯҳи "Таҳрир аш-Шом", ки Амрико ва кишварҳои дигар созмони террористӣ медонанд, рӯзи ҳаштуми декабр аз суқути давлати Башор Асад хабар доданд. Башор Асад соли 2000 ба қудрат расида буд. Пеш аз падараш, Ҳофиз Асад, 29 сол бар ин кишвар раҳбарӣ мекард.

Муҳаммад Ҷалолӣ, сарвазири Сурия, гуфтааст, бояд интихоботи озод баргузор шавад, то мардуми ин кишвар битавонанд раҳбари худро интихоб кунанд.

Бино ба наворҳои нашршуда дар шабакаҳои иҷтимоӣ, шӯришиён дар дохили кохи раёсати ҷумҳурӣ ва назди дарвозаҳои он дида шудаанд. Манобеъ мегӯянд, Башор Асад, раисҷумҳури Сурия аз Димишқ фирор кардааст.

Ҳодиса рӯзи 3-юми декабр рӯй додааст.

Мавқеи маъмурони амниятӣ дастрас нест.

Дар Идораи милиса дар ҷамоати Қалъаи Ҳисор рӯзи 4-уми декабр ба Радиои Озодӣ гуфтанд, ки қазия дар ҳоли баррасист.

"Бадриддин Сафаралиев ва маъмурони амниятӣ ба пурсиш даъват ва рӯ ба рӯ карда шуданд. Ҳуҷҷатҳоро барои баррасӣ ба Додситонии шаҳри Ҳисор фиристодем. Мунтазири хулоса ҳастем," – гуфт Илҳом Назруллоев, сардори Идораи умури дохилии ҷамоати Қалъаи Ҳисор.

Бадриддин Сафаралиев мегӯяд, ҳама чиз ба таври ногаҳонӣ рух дод: "Ду кас мошини маро дар роҳ дошта, бе муаррифӣ гуфтанд, ки бояд ҳамроҳашон равам. Гуё ба онҳо дар бораи ман ариза расидааст, ки дар гузашта узви ҲНИТ будаам. Шиноснома пурсиданд. Гуфтам, дар хона аст. Ягон ҳуҷҷат нишон надоданд, ки корманди мақомот ҳастанд. Вақте ба манзил расидем, аз болои девор парида рафтам."

Ба нақли Сафаралиев, сипас маъмурони амниятӣ ба ҳамсару писаронаш фишор оварда, "аз даруни ҷевон шиноснома ва 40 ҳазор сомониро гирифтаанд. Ба ҳамсарам гуфтаанд, ки биёяд, пулу паспортро медиҳем. Пулро барои тӯйи духтарам ҷамъ оварда будам."

Радиои Озодӣ барои суҳбат бо маъмурони амниятӣ талош кард, вале то ин дам натиҷа надод. Ҷузъиёти аризае, ки дар бораи Бадриддин Сафаралиев ба мақомот расидааст, барои мо рӯшан нест.

Илҳом Назруллоев, сардори Идораи умури дохилии ҷамоати Қалъаи Ҳисор, дар суҳбати телефонӣ гуфт, "гуё касе аз наздикони хонаводаи Сафаралиевҳо ба Идораи амният ариза навиштааст ва онҳо барои санҷидан ба манзилашон рафтаанд." Ӯ ҳам муҳтавои шикоятро нагуфт.

Бадриддин Сафаралиев рӯзи 4-уми декабр ба Радиои Озодӣ гуфт, ҳеч вақт узви ҳизби дар Тоҷикистон мамнӯи наҳзати исломӣ набуд. Баръакс, ба гуфтааш, аз соли 2018 шомили Ҳизби коммунист аст.

Вай нусхаи шаҳодатномаи ҳизбиашро ба Кумитаи давлатии амнияти миллӣ фиристода, ҳамзамон дар бораи рафтори маъмурони амниятӣ ба Дастгоҳи иҷроияи президент ва Додситонии кул нома навиштааст.

Номи Бадриддин Сафаралиев ва баъзе аз пайвандони дигараш дар гузашта борҳо расонаӣ шудааст. Аз ҷумла, дар пайванд ба марги падари ин хонадон, Абдураҳмон Сафаралиев. Панҷ сол пеш Додгоҳи олии Тоҷикистон бародари ӯ, Бурҳониддин Сафарилиевро бо гуноҳи "барангехтани кинаву адовати миллӣ" маҳкум кард. Худаш нодуруст дониста буд.

Ширкатҳои амрикоӣ дар феҳристи 100 ширкати тавлидкунандаи калони аслиҳаи ҷаҳон ҳастанд ва даромади 41-тои онҳо дар соли гузашта ба таври миёна 2,5 дарсад афзудааст.

Мизони афзоиши даромад ва фурӯши ширкатҳои аврупоӣ, ки 27 маврид аз бузургтарин тавлидкунандагони аслиҳа дар ҷаҳонро ташкил медиҳанд, ба таври миёна фақат 2 дарсад буд. Вале чун ин ширкатҳо ҳанӯз машғули тавлиди супоришҳои қаблӣ ҳастанд, рушди андаки даромадашон инъикосунандаи афзоиши қарордодҳо ва супоришҳо дар соли гузашта нест.

Гузориши SIPRI меафзояд, ки даромади шуморе аз ширкатҳои аврупоӣ бинобар ҷанг дар Украина, бахусус тақозои чашмрас барои муҳимоти ҷангӣ ва сомонаҳои зиддиҳавоӣ дар соли 2023 афзоиши қобили мулоҳизае дошт.

Оморҳои вобаста ба Русия ҳарчанд комил нестанд, нишон медиҳанд, ки иқтисоди ин кишвар ҳарчӣ бештар рӯйи ҷанг ва тавлиди аслиҳа таваҷҷуҳ дорад. Даромади ду ширкати русӣ, ки дар феҳристи 100 ширкати калони ҷаҳон ҳастанд, ҳудуди 40 дарсад афзоишро нишон медиҳад.

Ҳаҷми фурӯши ширкатҳои исроилӣ, ки дар феҳристи 100 ширкати калони ҷаҳон ҳастанд, дар соли 2023 бо 15 дарсад афзоиш ба 13,6 миллиард доллар расид.

Даромади ширкати туркии "Байрактар" (Байрақдор), тавлидкунандаи паҳпод низ бинобар фурӯши ин ҷангафзорҳо ба Украина ва афзоиши сармоягузории артиши Туркия дар ин замина 24 дарсад афзоиш ёфтааст.

Изҳороти Доналд Трамп дар ин бора рӯзи 8-уми декабр дар шабакааш, Truth Social, нашр шуд.

Вай навишт, ки "Башор Асад дигар нест. Аз кишвараш гурехтааст. Русия ба раҳбарии Владимир Путин дигар майли ҳимоят аз ӯ надорад."

Ба қавли Доналд Трамп, Маскав ба сабаби ҷанг дар Украина, ки "600 ҳазор сарбози рус кушта ё захмӣ шудаанд", таваҷҷуҳашро ба Сурия аз даст дод.

Ӯ хоҳони созиши Владимир Зеленский, президенти Украина, бо Русия шуд, "то ба ин девонагӣ поён бахшад".

"Ман Владимир Путинро хуб медонам. Ҳоло вақти амал аст. Чин ёрӣ карда метавонад. Ҷаҳон мунтазир аст!", -- таъкид кард Трамп.

Доналд Трамп рӯзи 7-уми декабр бо Эммануэл Макрон, президенти Фаронса ва Владимир Зеленский, раисҷумҳури Украина дар Порис (Париж) мулоқот дошт. Суҳбати онҳо беш аз ним соат идома кард, аммо аз натиҷааш ба хабарнигорон чизе гуфта нашуд.

Раҳбарони се кишвар ба маросими бозкушоии калисои Нотр-дам дар Порис (Париж) рафтанд. Қисме аз ин калисо соли 2019 сӯхта буд.

Хабари мухтасари КДАМ Тоҷикистон рӯзи 7 декабр дар сомонаи хабаргузории расмии “Ховар” нашр шуд. Дар он гуфта шудааст, ки давоми рӯзҳои 1 то 7 декабр дар шашҳри Ботканди Қирғизистон “вохӯрии навбатии гурӯҳҳои кории топографӣ ва гурӯҳҳои корӣ оид ба масъалаҳои ҳуқуқии ҳайатҳои ҳукуматии Тоҷикистон ва Қирғизистон” оид ба аломатгузории сарҳади давлатӣ баргузор шуд.

Натиҷаҳои мувофиқаҳои ҳосилшударо ҳайатҳо ба протоколи поёни нишаст ворид кардаанд, омадааст дар ин хабар. Айни чунин хабарро дафтари матбуоти ҳукумати Қирғизистон ҳам 7 декабр нашр кард.

Ҷузъиёти аз ин беш нашр намешавад.

Аз ин пеш, рӯзи 4 декабр дар шаҳри Ботканд раҳбарони КДАМ-и ду кишвар гуфтанд, ки Тоҷикистон ва Қирғизистон марзнигорӣ ё кашидани хати сарҳади ду кишварро ба поён расондаанд.

Саймуъмин Ятимов, раиси Кумитаи давлатии амнияти миллии Тоҷикистон ва ҳамтои ӯ аз Қирғизистон, Қамчибек Тошиев, дар паёми кӯтоҳ гуфтанд, ки мушкили марзии байни ду кишвар ба пуррагӣ ҳал шуд ва акнун он дар як созишномаи байнидавлатӣ барои имзо ба президентҳои ду кишвар пешниҳод хоҳад гашт. Дар гузашта ин хатти сарҳад сабаби ҷанҷолу хунрезӣ шудааст.

Ятимов дар назди хабарнигорон он замон гуфт, дар масъалаи делимитатсияи сарҳади давлатии байни Тоҷикистон ва Қирғизистон гуфтушуниди фарогире баргузор гашт.

"Ба зеркомиссияҳои масъалаҳои топографӣ ва ҳуқуқӣ супоришҳои дахлдор дода шуданд, ки ин масъаларо то охир кор карда, ба поён расонанд. Дар давоми кор навбат ба масъалаи созмондиҳии ҳуқуқӣ мерасад ва мо тадриҷан ба созишномаи байнидавлатии таъйини сарҳади давлатӣ байни Ҷумҳурии Тоҷикистон ва Ҷумҳурии Қирғизистон ноил мешавем," -- афзуд ӯ.

Қамчибек Тошиев, раиси Кумитаи давлатии амнияти миллии Қирғизистон, ин лаҳзаро таърихӣ номид.

Вай гуфт, "дар ин ҷаласа масъалаҳои вобаста ба марз ҳаллу фасл ва тамоми тӯли сарҳад мувофиқа карда шуд.

Ман бо тамоми масъулият гуфта метавонам, ки ин лаҳзаи таърихӣ аст. Қадами боқимонда таҳияи ҳуҷҷатҳои ҳуқуқӣ, қабули он аз тарафи порлумон ва имзои сарварони давлатҳост.

Фикр мекунам, дар чанд моҳи наздик марзи давлатии худро ниҳоӣ хоҳем кард."

Тарафҳо дар бораи он ки хати нави марз кадом қаламравҳоро ба кадом кишвар вогузор мекунад, ҷузъиёте надоданд.

Ҳамаи давраҳои гуфтушуниди топографҳо ва ҳайатҳои давлатӣ паси дарҳои баста ҷараён гирифта, ҳеч гуна тафсилоте дар бораи минтақаҳои баҳснок расонаӣ нашудааст.

Тоҷикистон ва Қирғизистон тақрибан ҳазор километр марз доранд.

Номуайянӣ дар сарҳад дар солҳои 2021 ва 2022 сабаби муноқишаи хунин шуд ва аз ҳарду тараф даҳҳо куштаву захмӣ бар ҷой гузошт.

Бо муаллифони ин таҳқиқот шабакаи телевизионии ABCNews ҳамсӯҳбат шуд. Донишмандон мегӯянд, ки намунаҳои равғани зери пӯсти 83 делфини зиндаву шаш делфини мурда санҷида шуд ва ҳадди аққал дар бофтаҳои сӣ делфил яке аз маводҳои дорувори мисли фентанил, миорелаксант ва транквилизатор ошкор шудааст.

Ҳамин намуди дорувор дар соли 2013 ҳам ба даст омада буд ва, ба гуфтаи олимон, ин маънои онро дорад, ки як мушкили дерина то ҳол ҳалли худро пайдо накардааст. Фентанил як намуди маводи мухаддир аст, ки онро дар бадани 24 делфин пайдо кардаанд.

Донишмандон мегӯянд, делфинҳо об намехӯранд ва маводи дорувор дар моҳӣ ва ҷонварҳои бесутунмӯҳраи дарёии дигаре вуҷуд доштааст, ки делфинҳо онҳоро истеъмол мекунанд. Эҳтимолан маводи нашъаоварро ё киштисаворон ба об партофтаанд ваё ин мавод бо роҳи оби корез ва обҳои кишоварзӣ ба хариҷ роҳ ёфтааст.

Таъсири дарозмуддати маводи мухаддир ба бадани ҷонварҳои обӣ пурра омӯхта нашудааст. Вале делфинҳо хусусияти нодире доранд, ки аз рӯи чарби зери пӯсти онҳо мешавад вазъи сиҳҳатии тамоми муҳити зисти зериобиро баҳогузорӣ кард.

Қарори додгоҳ 6 декабр баъди изҳороти додситонҳои Руминия содир шуд, ки гуфтанд, дар ҷараёни овоздиҳӣ ҷиноятҳои компютерие содир шудааст, ки ба дахолати Русия ба интихобот ишора мекунанд.

Дар интихобот ногаҳон барои ҳама номзади ростгаро Келин Ҷорҷеску баранда гардид. Феълан маълум нест, ки оё бо бекор шудани натиҷаҳо иштироки номзадҳо дар интихоботи нав чӣ гуна сурат мегирад ва то куҷо Ҷорҷеску барои мубориза барои курсии аввал роҳ дода мешавад ё на.

Дар остонаи даври аввали овоздиҳӣ номзад Диана Шошоакэ барои таблиғи ифротгароӣ ва дидгоҳҳои зиддияҳудӣ аз ҳақи ширкат дар интихобот маҳрум шуд. Додгоҳи конститусионии Руминия рӯзи ҷумъа гуфт, ки санаи баргузории интихоботи навро ҳукумат бояд эълон кунад.

Президенти амалкунанда Клаус Йоҳаннис, ки мӯҳлати раҳбариаш 21 декабр ба анҷом мерасад, гуфт, то замони маълум шудани президенти нав дар сари кор мемонад. Ғалабаи ногаҳонии Ҷорҷеску ҳолати шокро дар ҷомеаи Руминия эҷод кард ва Шӯрои олии дифои миллии Руминия баъди таҳқиқке гуфт, ошкор намудааст, ки дар ҷараёни интихобот бо истифода аз шабакаи TikTok як ҳамлаи густурда ва ҳамаҷонибаи интернетӣ аз ҷониби Маскав сурат гирифт ва ба ҷараён ва натиҷаҳои интихобот таъсиргузор шуд.

Хабаргузории "Рёнхап" бо такя ба муроҷиате аз дафтари президенти Кореяи Ҷанубӣ навишт, ӯ гуфтааст: “Маъзарат мехоҳам. Аз одамоне, ки бисёр тарсиданд, узр мепурсам”. Юн гуфтааст, ки эълони ҳолати ҷангӣ дар кишвар натиҷаи “як ҳолати ноилоҷии президент буд, ки масъули умури давлатӣ дониста мешавад”. Ӯ ваъда дод, ки омода аст барои рафтораш масъулияти сиёсӣ ва ҳуқуқӣ нишон диҳад ва, ба навиштаи KBS, таъкид намуд, ки ҳолати ҷангии дуюм “ҳеҷ гоҳ эълон намешавад”.

7 декабр қарор аст парлумон барои қабули тарҳи эълони нобоварӣ ё импичмент ба президенти Кореяи Ҷанубӣ овоздиҳӣ барпо кунад. Ин тарҳро мухолифон пешниҳод кардаанд, чун мегӯянд, ки Юн мехост табаддулоти давлатӣ барпо кунад. Дар ҳизби ҳоким гуфтанд, ки истеъфои президент амри ногузир мебошад.

Рӯзи 3 декабр Юн эълон кард, ки, ба гуфтааш, “ба хотири мубориза бо ҷонибдорони дохилии Кореяи Шимолӣ” дар кишвараш ҳолати ҷангӣ ҷорӣ мекунад. Қароре, ки шаш соат умр дид, фаъолияти ҳизбҳои сиёсӣ, ташкили эътирозҳо, корпартоиро манъ карда, дар кишвар сензура ва кори додгоҳҳои низомиро фаъол мекард, ки ҳақи содир кардани ҳукмҳои маргро доранд.

Мухолифон гуфтанд, ки дар назди парлумон беш аз 5 ҳазор эътирозгар ҷамъ шудааст. Депутаҳои парлумон дар лаҳзаҳое, ки низомиён талош доштанд бинои парлумонро ишғол кунанд, қарори президентро бекор карданд. Чандин мақомдори калидӣ, аз ҷумла вазири мудофеа Ким Ён Хён ба истеъфо рафтанд.

Хосторони гирифтани шаҳрвандӣ ва шиносномаи Русия бояд барои ҳар як имтиҳон 2950 рубл – ҷамъ 5900 рубл супоранд.

Нархи имтиҳонҳо барои гирифтани иҷозатномаи зисти муваққатӣ дар Русия 5900 рубл ва иҷозатномаи кор 3800 рубл таъин шудааст.

Қарори дигаре, ки Мишустин рӯзи 6 декабр имзо кард, дар бораи идораҳои давлатии масъули гирифтани имтиҳон аз хориҷиҳо мебошад. Рӯйхати чунин идораҳоро вазорати илм дар ҳамоҳангӣ бо ВКД ва Рособрнадзор таҳия мекунанд ва кормандони ин идораҳо бояд мутахассиси соҳаҳои филология, лингвистика ё забоншиносӣ ва ҳуқуқ бошанд.

Баъди ҳамла ба толори консертии “Крокус” марти соли ҷорӣ, дар Русия бозбинӣ ва тағйири бисёр қонунҳои вобаста ба муҳоҷирон ва коргарони хориҷӣ шурӯъ шуд, ки хусусияти маҳдудкунанда, табъйизомез ва ҳам поймолкунии ҳуқуқи инсонро дорад. Бисёр муҳоҷирон, аз ҷумла аз Тоҷикистон, ки одат доранд Русияро макони асосии кору даромади худ ва оилаҳояшон арзёбӣ кунанд, гирифтани шаҳрвандии ин кишварро амри муҳим барои будубоши осону қонунӣ дар ин кишвар арзёбӣ мекунанд.

Ин маҳдудиятҳо, аз ҷумла ба бахшҳои марбут ба воситаҳои нақлиёту маориф, тандурустӣ, савдои чаканаву яклухт, хадамоти иҷтимоиву маъмурӣ ва хоҷагии ҷангал дахл дорад.

Раиси вилоят гуфтааст, ин ташаббус ба хотири бо ҷойи кор таъмин кардани шаҳврандони Русия гирифта шудааст.

Зимнан, ба Думаи давлатӣ тарҳи қонуне ворид гардид, ки тибқи он корфармоён муваззаф мешаванд, аввал шаҳрвандони Русия ва танҳо баъди он муҳоҷиронро ба кор қабул кунанд.

Яке аз ташаббускорони лоиҳаи қонун - раиси ҳизби либерал-демократитӣ Леонид Слутский исрор меварзад, ки бо сабаби муҳоҷирон ҳазорон нафар аз шаҳрвандони Русия бекор ҳастанду аз маоши муносиб маҳрум шудаанд.

Маълум нест ин нафарон бо чӣ сабаб дар ин муассиса нигаҳ дошта мешаванд, вале ба иттилои мақомот, дар мулоқот бо онҳо рӯзи 5 декабр кормандони Хадамоти консулии сафорати Тоҷикистон масъалаи бо чиптаи бозгашт ба ватан таъмин кардани 11 нафари онҳоро ҳал кардаанд. Илова ба ин, ба шаҳрвандони Тоҷикистон хӯроку об ва дигар кӯмакҳои ниёзи аввал ироа карда шудааст.

Дар хабари расмӣ гуфта мешавад, ки бо шаҳрвандони боздоштшуда оид ба дигаргуниҳо дар қонунгузории Русия дар самти муҳоҷират ҳам сӯҳбате анҷом шудааст.

Ин хабар дар ҳолест, ки Русия баъди ҳамла ба толори консертии “Крокус” қонунҳои муҳоҷираташро ба шиддат маҳдуд ва сахттар кард ва ҳазорҳо муҳоҷирон, аз ҷумла тоҷикистониҳоро боздошту истирдод намуд. Ҳодисаҳои поймолшавии ҳуқуқи муҳоҷирони тоҷик дар Русия ҳамарӯза расонаӣ мешавад.

Ба иттилои Радиои Азаттик, муассиси ширкати сохтмонии KG Group Имомиддин Ташов, ки барои даъватҳои оммавӣ ба ғасби қудрат муҳокима мешавад, рӯзи 6 декабр дар додгоҳи ноҳияи Первомайскии шаҳри Бишкек бо кадом маводи ношиносе гарданашаро буридааст.

Ташовро муҳофизони додгоҳ нигоҳ доштанд. Ёрии таъҷилӣ Ташовро аз додгоҳ ба беморхона бурд ва аз он ҷо ӯро ба боздоштгоҳ интиқол доданд. Вазъи саломатии ӯ маълум нест.

Бо ҳукми додгоҳи имрӯза, ҳабси Ташовро то 8 феврали соли 2025 тамдид каданд. Ташов моҳи апрел боздошт ва аз рӯи ду моддаи Кодекси ҷиноӣ гумонбар эълон шуд. Худи ӯ гуфтааст, ки ӯро поёни соли 2023 ходимони КДАМ боздошт карда аз ӯ пул талаб кардаанд.

Дар ин бора ВКД Гурҷистон хабар додааст. Нисбати 13 нафар аз рӯи иттиҳоми ташкили хушунати гурӯҳӣ ваё иштирок дар он ва авбошӣ парванда боз шудааст.

Як нафарро дар ташкили таркиш гумонзад кардаанд. Исми гумонбаршудаҳо маълум нест, вале аз пеш маълум аст, ки дар миёни онҳо хориҷиҳо ҳам мебошанд.

Ба ҳамаи онҳо то 9 соли зиндон таҳдид мекунад. Дигар гумонбарон барои вайрон кардани моликияти давлатӣ ва ҳамла ба ходимони полис ба ҷавобгарӣ кашида шудаанд.

Рӯзи 5 декабр ҳам эътирозҳо идома кард:

Дар Тифлис, Батуми ва дигар шаҳрҳои Гурҷистон ҳашт шабонарӯзи ахир намоишҳои эътирозӣ ҷараён доранд.

Полис зидди эътирозгарон бо шеваи бераҳмона рафтор карда, дар маҷмӯъ рӯзи 4 декабр беш аз 300 нафарро боздошт кардааст.

Дар ин бора 6 декабр сомонаи РБК хабар додааст. Аз моҳи январ даромади курйерҳо ба ҳисоби миёнаи як корхона дар Русия 15 дарсад зиёд шуда аз марзи 115 ҳазор рубл дар моҳ гузаштааст.

Ин пул аз маоши таҳлилгарони иттилоотӣ як каме зиёд бошад, аз маоши духтуру муаллимону журналистон қариб 2,5 баробар бештар будааст.

Сабаби инро бо якбора кам шудани шумори коргарони курйер рабт медиҳанд. Пешниҳоди кор ба курйерҳое, ки пиёда фармоишро иҷро мекунанд, қариб ду баробар зиёд шудааст.

Шаби 6-уми декабр ҳавопаймоҳои бесарнишини украинӣ ба шаҳри Керчи нимҷазираи ишғолшудаи Қрим ҳамлаҳо анҷом доданд. Дар шаҳр садоҳои таркиш шунида шудааст. Телеграм-канали "Крымский ветер" гуфт, таркишҳо дар маҳалли ҷойгиршавии корхонаи киштисозии «Залив» мушоҳида шудааст.

Хонандагони сомонаи Крым.Реалии таркишҳо дар Керчро тасдиқ карда гуфтанд, ки садои се таркишро бо фосилаи 10-20 дақиқа шуниданд. Вазорати мудофеаи Русия гуфт, ки шаби 6-уми декабр нирӯҳои зиддиҳавоӣ дар фазои Қрим як паҳподи украиниро нобуд карданд. Ба илова, дар фазои Баҳри Сиёҳ ду паҳподи баҳрӣ ҳам хунсо карда шуааст.

Ин хабарро ҷониби украинӣ ҳанӯз шарҳ надодааст. Русия гуфт, ки дар давоми шаби гузашта нирӯҳои зиддиҳавоӣ 33 паҳпод, аз ҷумла 14-тоашро дар фазои вилояти Воронеж, 11-тоашро дар фазои Курск ва 7 ададашро дар фазои вилояти Белгород нобуд кардаанд.

Мақомоти Воронеж гуфтанд, дар ин ҳодиса касе осеб надидааст, мақомоти вилоятҳои дигар хабарро шарҳ намедиҳанд.