Пайвандҳои дастрасӣ

Хабари нав

Хабарҳо

Киштии низомии Канада сӯи Либия раҳсипор мешавад

Канада як киштӣ бо чархбол ва беш аз 200 низомиро ба соҳилҳои Либия мефиристад. Дар ин бора сарвазири кишвар Стивен Харпер хабар дод.

Ба гуфтаи ӯ, тавассути ин киштӣ, ки имрӯз бандари Канадаро тарк мекунад, шаҳрвандони хориҷӣ аз Либия берун карда мешаванд. Питер Маккей, вазири дифоъи Канада, гуфт, эҳтимолан ин киштӣ барои татбиқи таҳримҳо алайҳи Либия низ истифода шавад.

Аз ин пеш Роберт Гейтс, вазири дифоъи Амрико ахиран тайид кард, ки киштиҳои низомии ИМА сӯи соҳилҳои Либия равонаанд ва аммо афзуд, ки ҳанӯз НАТО дар мавриди амалиёти низомӣ дар Либия ба созише нарасидааст.

Сарвазири Бритониё Дэвид Камерон гуфт, ки ӯ истифодаи нерӯи низомӣ алайҳи Қаззофиро байид намедонад.

Русия ва Фаронса изҳор намуданд, ки амалиёти низомӣ фақат баъди дарёфти мандати Шӯрои амнияти СММ имконпазир хоҳад буд.

Ахиран Маҷмааи кулли СММ узвияти Либия дар Шӯрои ҳуқуқи башари ин созмонро мутаваққиф кард. Қатънома дар ин бора рӯзи сешанбе қабул шуд ва он вокуниш ба саркӯбсозии бераҳмонаи мухолифин аз сӯи режими раҳбари Либия Муаммар Қаззофӣ аст.

Ҳамаи хабарҳои имрӯзро дар инҷо бихонед

Дар соҳилҳои як ҷазираи Зеландияи Нав ҷасади 100 наҳангу делфин пайдо шуд

Як соҳили Ҷазираи Ҷанубӣ, Зеландияи Нав, 10-уми феврали соли 2017. Анбӯҳи наҳангҳоро мавҷи об ба соҳил задааст. Ихтиёриён талош доранд ҷони онҳоро наҷот дода дубора ба об баргардонанд

Мақомот дар Зеландияи Нав гуфтанд, ки анбӯҳи ҷасадҳои наҳангу делфинҳо дар соҳилҳои ҷазираи Чатемро ошкор кардаанд. Раёсати ҳифзи ҷонварон рӯзи 25-уми ноябр гуфт, ки наҳангу делфинҳо дар соҳилҳои ҷазира дар натиҷаи ба ҳам бисёр наздик шино ва ба ҳам бархӯрд карданашон ҷон додаанд. Азбаски макони ҷойгиршавии ҷазираи Чатем дар 800-километрии Ҷазираи Ҷанубӣ аст, гурӯҳҳои ёрирасон натавонистанд сари вақт ба ёрии ҷонварон бирасанд. Маълум нест, ки сабаби дар як анбӯҳ ё издиҳоме ба ҳам омадани ҷонварон чӣ будааст, вале зоҳиран онҳоро мавҷи об ба соҳил партофтааст. Донишмандон мегӯянд, ки сабабҳои рӯй додани издиҳом дар об дар миёни ҷонварон то охир омӯхта нашудааст.

Марҳилаи пешбарии номзадҳо ба мақоми президентии Қирғизистон ба охир расид

Бинои Комиисияи марказии интихобот ва раъйпурсии Қирғизистон.

Комисияи марказии интихоботӣ ва раъйпурсии (КМИР) Қирғизистон марҳилаи пешбарии номзадҳоро ба мақоми президентии он кишвар ба анҷом расонид ва рӯйхати 47 даъвогари курсии президентиро нашр кард.

То рӯзи 14 ноябр КМИР аризаи 65 шаҳрвандро дарёфт кард, ки 64 тани онҳо даъвогарони худпешбар буданд.

Ба иттилои КМИР, 30 тан аз даъвогарон кормандони созмонҳои ғайритиҷорӣ ҳастанд. 24 тан аз даъвогарон муваққатан бекоранд, 5 тан корманди давлатӣ, 3 тан вакили порлумон ва 3 тани дигар нафақахӯранд. Бештари даъвогарони курсии президентӣ аз 35 то 45 сол доранд.

Пештар расонаҳо хабар дода буданд, ки 9 тан аз онҳо санади донистани забони давлатиро пешкаш накардаанд ва 3 тани дигар доғи судӣ доштаанд. Рӯзи 19 ноябр КМИР ҳуҷҷатҳои ин 12 даъвогари курсии президентиро баргардонид.

КМИР ҳамчунин хабар дод, то рӯзи 24 ноябр 6 тани дигар аз даъвогарон изҳор доштаанд, ки аз ширкат дар интихобот худдорӣ меварзанд. То субҳи 24 ноябр ҳамагӣ 47 даъвогар боқӣ мондааст.

Дариға Назарбоева аз ҳизби падараш ба мақоми вакилии порлумон номзад шуд

Дариға Назарбоева.

Дариға Назарбоева, духтари калонии президенти пешини Қазоқистон Нурсултон Назарбоев ба мақоми вакилии порлумон аз ҳизби "Нур Отан" номзад шуд. Ин ҳизбро падари вай роҳбарӣ мекунад.

Рӯйхати 126 номзад ба мақоми вакилӣ аз сӯи ҳизби "Нур Отан" рӯзи 25 ноябр дар анҷумани онлайнии ҳизби мазкур тасдиқ шуд.

Дариға Назарбоева дар рӯйхат дар мақоми 49 қарор дорад. Раиси кунунии порлумони Қазоқистон Нурлан Нигматулин ва сарвазири кунунии он кишвар Аскар Мамин низ дар рӯйхати номзадҳои ҳизби "Нур Отан" шомил шудаанд.

Дариға Назарбоева узви шӯрои сиёсии "Нур Отан" аст.

Баъди рафтан аз мақоми раиси сенати порлумони Қазоқистон дар моҳи майи соли ҷорӣ Дариға Назарбоева ба нудрат дар мазҳари ом пайдо мешавад.

ФСБ аз боздошти афроди марбут ба "Давлати исломӣ" хабар дод. Як нафараш аз ОМ аст

Саҳнаи боздошти нафароне, ки ба қавли ФСБ, марбут ба гурӯҳи "Давлати исломӣ" мебошанд. 25-уми ноябр

Дар миёни панҷ боздоштшуда бо гумони узвият дар “Давлати исломӣ” дар ҳудуди шаҳри Владимири вилояти Маскав як шаҳрванди кишварҳои Осиёи Марказӣ ҳам мебошад, мегӯяд ФСБ. Ин Хадамоти амнияти федеролии Русия рӯзи 25-уми ноябр гуфт, ки аз фаъолияти як гурӯҳи минтақавии марбут ба созмони мамнӯи “Давлати исломӣ” пешгирӣ кардааст. Дар изҳороти расмии ин ниҳод гуфта мешавад, ки ширкатдорони ин гурӯҳ мехостанд дар метрои Маскав “харобкорӣ” кунанд. Инчунин, ба навиштаи ин ниҳод, ҳадафи онҳо ҷалби нафарони бештар ба “Давлати исломӣ” ва маблағгузории терроризм буд. ТАСС менависад, ки яке аз боздоштшудаҳо иқрор шудааст, ки узви “Давлати исломӣ” мебошад.

ФСБ инчунин аз ошкор ва мусодира шудани як бомбаи худсохт хабар медиҳад. Дар Русия гурӯҳи “Давлати исломӣ” аз соли 2014 мамнӯъ ва террористӣ эълон шудааст.

Модари духтаре, ки "фавқулода шабеҳи Путин" аст, миллионер шудааст

Соли 2011. Президенти Русия Владимир Путин аз як зоишгоҳи шаҳри Калининград дидан мекунад

Як шиноси деринаи президенти Русия Владимир Путин – Светлана Кривоногих саҳмияҳои бонки “Россия”-ро дар ихтиёр дорад, ки моликаш яке аз дӯстони Путин мебошад. Ба ҷуз ин, Кривоногих соҳиби як осоишгоҳи лижаронӣ аст, ки дар он соли 2013 тӯи арӯсии Катерина Тихонова баргузор шудааст. Ин зан ҳамчунин соҳиби як маркази фарҳангӣ дар маркази шаҳри Санкт-Петербург мебошад. Соли 2003 Кривоногих соҳиби духтарчае шуд, ки ба навиштаи тарҳи таҳқиқотии “Проект”, “фавқулода ба Путин монанд аст”. Дар ин бора Радио Свобода хабар медиҳад.

“Проект” менависад, ки Кривоногих бо Путин дар охири солҳои 1990-ум шинос шуда, ҳамон давра аз як хонаи коммуналӣ ба ҷои дигар кӯчид ва ба бонки “Россия” ба кор даромад. Ин бонк ба Юрий Ковалчук, дӯсти деринаи Путин марбут аст. Соли 2007 Криновогих 3,6 дарсади саҳмияҳои бонкро ба даст оварда, яке аз соҳибони он шуд. Оғози соли 2019 моликияти ӯро дар бонк дар ҳаҷми 800 миллион рубл ҳисоб кардаанд.

Осоишгоҳи лижаронии “Игора”, ки дар 40-километрии гузари бӯстонсароҳои “Озера” ҷойгир аст, ҳамчунин моли Кривоногих мебошад. Ин маҳалларо Путин ва дӯстонаш дар миёнаҳои солҳои 1990-ум ташкил кардаанд. Путин дар ин осоишгоҳ истироҳат карда дар маросими ифтитоҳи он ҳам иштирок карда буд. Ҳамон ҷо соли 2013 духтари Путин – Катерина Тихонова ҳам базми арӯсии худро барпо кардааст. “Проект” менависад, 25 дарсади осоишгоҳ ба Ковалчук ва ҳамсараш марбут аст, ҳарчанд бонки ӯ сармоягузори аслии ин осоишгоҳ буд.

Тамоми моликияти оилаи Кривоногихро журналистон дар ҳаҷми 7,7 миллиард рубл (муодили 100 миллион доллар) ҳисоб кардаанд. Моликияти Кривоногих, бино ба таҳқиқи журналистон, ба дӯсти дигари Путин – Сергей Ролдугин, ректори донишгоҳи кӯҳӣ Владимир Литвиненко (президент он ҷо рисолаи илмӣ ҳимоя кардааст) ва ҳам дӯсти дигари қадимаи Путин – Олег Руднев рабт мегирад.

Дӯстони Путин аз солҳои 1990 нахостанд ба саволҳои “Проект” дар бораи Кривоногих посух диҳанд. Сабаби пинҳонкории онҳо метавонад духтари ӯ Елизавета бошад, менависанд журналистон. Ӯ соли 2003, замоне таваллуд шудааст, ки Путин барои ширкат дар интихоботи президентӣ омодагӣ мегирифт. Дар нусхаҳои санадҳои марбут ба Елизавета фамилия ё исми падар зикр нашудааст, вале номи падар Владимир зикр шудааст.

“Проект” мегӯяд, дар аксҳое, ки ба дасти онҳо расид, шабоҳати “фавқулодаи Елизавета ба Путин” дида мешавад. Таҳлили компютерии акс шабоҳати Елизавета ва Путинро аз 70 дарсад боло нишон медиҳад. Акси духтари ноболиғро журналистон нашр намекунанд.

Сухангӯи Кремл Дмитрий Песков ба “Проект” посух дод, ки исми Кривоногихро бори аввал мешунавад. Худи зан нахост бо журналистон сӯҳбат кунад. Дар бонки “Россия” ба номаи журналистон посух надоданд.

Попи Рум гуфт, "ҳуқуқи уйғурҳо дар Чин поймол мешавад"

Поп Франсис

Попи Рум Франсис бори аввал дар маҳзари ом аз уйғурҳои Шинҷон ҳамчун қавми бумие дар Чин ёдовар шуд, ки мавриди таъқиб қарор доранд ва ҳуқуқашон поймол мешавад.

Франсис дар як китоби наваш бо номи “Биёед, орзу бикунем: Роҳи ояндаи беҳтар”, ки 23-юми ноябр чоп шуд, мегӯяд: “Ҳамеша дар бораи одамоне фикр мекунам, ки таҳти таъқиб ҳастанд: дар Роҳинҷа, уйғурҳои бечора, язидиҳо – коре, ки гурӯҳи “Давлати исломӣ” кард, як ваҳшоният аст, ва ё масеҳиён дар Миср ва Покистон ҳангоми намозхонӣ дар калисо бо бомба кушта шудаанд”.

Созмони Милал ҳисоб кардааст, ки дар Шинҷон 1 миллион уйғурҳо ва мусалмонҳои дигар дар “қароргоҳҳои зиддиифротгароӣ” нигаҳдорӣ мешаванд. СММ инчунин мегӯяд, як миллион аҳолии дигар маҷбуран ба "марказҳои бозтарбия" андохта шудаанд.

Вазорати корҳои хориҷии Амрико ҳам гуфтааст, тахминан 2 миллион уйғурҳову намояндагони дигари қавму миллатҳои бумии Шинҷон ба муассисаҳои бо номи "марказҳои бозтарбия" дар қаламрави ин вилоят бурда шудаанд.

Чанд нафар аз онҳое, ки дар чунин муассисаҳо нигаҳдорӣ шудаанд, ба Радиои Озодӣ нақл карданд, ки онҳо ва ҳам наздиконашон мавриди шустушӯи мағзӣ ё идеологӣ қарор гирифта, нисбат ба онҳо зӯроварии ҷисмонӣ раво дидаанд ва занҳо гуфтанд, ки онҳоро аз амалиёти безурёткунӣ гузарониданд.

Чин пойфишорӣ мекунад, ки ин муассисаҳо “марказҳои тарбиявӣ” буда, барои аз терроризму ифротгароӣ поккорӣ шудани инсонҳо ва ба ҷомеаи маҳаллӣ мутобиқ кардани онҳо амал мекунанд.

Жао Лиян, сухангӯи Вазорати корҳои хориҷии Чин дар вокуниш ба изҳори назарҳои Попи Рум андешаҳои ӯро “беасос” номид. Ӯ рӯзи 24-уми ноябр дар изҳороте гуфт: “Мардуми ҳама гурӯҳҳои миллӣ аз ҳуқуқи пурра барои рушд, озодӣ ва эътиқоди динӣ бархӯрдор ҳастанд”.

Баъди дар соли 1949 сари қудрат омадани коммунистҳо дар Чин, дар ин кишвар рӯҳониёни католик боздошт шуданд ва Чину Ватикан ҳеч гоҳ бо ҳам равобити расмии дипломатӣ надоштанд.

Уйғурҳо гурӯҳи азимтарини туркзабон дар вилояти Шинҷони Чин ҳастанд ва дар ҷойи дуюм аз назари шумора қазоқҳо мебошанд. Дар ин минтақа ҳамчунин қирғизҳо, тоҷикҳо ва намояндагони қавми ҳуй ва ё дунганҳо зиндагӣ мекунанд.

Ҳанҳо, ки дар Чин қавми аксарият ба шумор мераванд, дар Шинҷон баъди уйғурҳо дуюмин қавми серҷамъият ба шумор мераванд.

Пайомадҳои COVID-19 дар суҳбати вазирони корҳои хориҷии Кореяи Ҷанубӣ ва ОМ

Форуми ҳамкориҳои Кореяи Ҷанубӣ ва Осиёи Марказӣ аз соли 2007 баргузор мешавад ва ҳадафаш тақвияти ҳамкориҳои иқтисодӣ, фарҳангӣ ва маърифатӣ мебошад

Вазирони хориҷаи Кореяи Ҷанубӣ ва кишварҳои Осиёи Марказӣ масоили марбут ба рушди устуворро дар пасманзари пандемияи коронавирус баррасӣ карда ва дар ҷаласаҳои ҷудогона мавзӯъҳои марбут ба “стандартизатсия, тандурустии ҷамъиятӣ, муҳити зист ва таҳсилоти фосилавӣ”-ро матраҳ намуданд. Ҳамоиши 13-уми ҳамкориҳои Ҷумҳурии Корея ва Осиёи Марказӣ бо ҳузури вазирони хориҷаи кишварҳои минтақа рӯзи 25-уми ноябр дар шаҳри Сеул ҷараён гирифт. Дар кори он вазири хориҷаи Тоҷикистон Сироҷиддин Муҳриддин ҳам иштирок кард.

Оҷонсии Yonhap гуфт, ки таъсири пандемия ба кишварҳои ОМ ва паёмадҳои он яке аз масоили калидии ин ҳамоиш буд. Айни замон, вазири хориҷаи Кореяи Ҷанубӣ Кан Ген Хва кишварҳои ОМ-ро ба идомаи пуштибонӣ аз сулҳи нимҷазираи Корея даъват карда гуфтааст, ки тақвияти сулҳ гарави субот дар минтақаи Авруосиё мебошад. Ҳамсоякишвари Кореяи Ҷанубӣ - Кореяи Шимолӣ аст, ки давлати дорои силоҳи ҳастаӣ мебошад ва баъди ҷанги солҳои 1950-ум дар нимҷазира равобити ду кишвар мушкил боқӣ мемонад.

Вазорати хориҷаи Тоҷикистон рӯзи 25-уми ноябр хабар дод, ки ҳамоиш ё форуми баъдии Осиёи Марказиву Кореяи Ҷанубӣ дар шаҳри Душанбе баргузор шавад. Ҷузъиёти дигари дидору гуфтугӯҳои дипломатҳои баландпояи кишварҳои ширкатдори ҷаласа нашр намешавад. Форуми ҳамкориҳои Кореяи Ҷанубӣ ва Осиёи Марказӣ аз соли 2007 баргузор мешавад ва ҳадафаш тақвияти ҳамкориҳои иқтисодӣ, фарҳангӣ ва маърифатӣ мебошад.

Ҳамоиши Сеул дар ҳоле бо ширкати вазирони хориҷаи кишварҳои ОМ баргузор мешавад, ки пандемияи коронавирус ба нақшаву барномаҳои кории бисёр ҳукуматҳо таъсиргузор шуда, аксар ҷаласаву ҳамоишҳои муҳим ба таври фосилавӣ барпо мешаванд.

Форуми ОМ ва Кореяи Ҷанубӣ инак бори 13-ум баргузор мешавад ва ҳадафи аслии он пешбурди ҳамкориҳои иқтисодиву тиҷоратӣ аст.

Кореяи Ҷанубӣ – кишваре дар Осиёи Шарқӣ ва мустақар дар нимҷазираи Корея яке аз давлатҳои босуръат пешраванда ба ҳисоб меравад ва дар даҳсолаҳои охир ба макони кору муҳоҷирати хориҷиҳои зиёд, аз ҷумла тоҷикистониҳо табдил шудааст. Садҳо тоҷикистонии муқими Корея бештар ҷавонону донишҷӯён ваё муҳоҷирони кориро ташкил медиҳанд. Тоҷикистон бо ин ки соли 1992 бо Кореяи Ҷанубӣ ҳамкориҳои дипломатӣ барпо кардааст, ҳамкориҳои наздиктари миёни ду кишвар тарҳо дар чанд соли охир эҳсос мешавад.

Умеди Тоҷикистон аз ин ҳамкориҳо пеш аз ҳама сармоягузорӣ ба иқтисоди кишвар ва фаъол шудани созишномаи муҳоҷирати корӣ аст. Созишномаи фароҳамкунандаи шароити кор барои шаҳрвандони Тоҷикистон дар Кореяи Ҷанубӣ, ки сӯҳбаташро мақомот чанд соли пеш шурӯъ карданд, то ҳанӯз ниҳоӣ нашудааст ва шаҳрвандони Тоҷикистон ҳамоно вобастаи бозори кори Русия мемонад.

Иқтисодшиносон мегӯянд, мизони додугирифти молу коло ҳам миёни ду кишвар дар сатҳи поин аст – 25,5 миллион доллар, ки бештар аз ҳисоби маҳсулоти аз Корея ба Тоҷикистон воридшаванда ҳисоб шудааст. Тобистони соли ҷорӣ раҳбари Кумитаи сармоягузорӣ ва амволи давлатии Тоҷикистон гуфт, ки бо сабаби пандемияи коронавирус мувофиқаҳои қаблан ҳосилшуда миёни Тоҷикистону Кореяи Ҷанубӣ барои сармоягузорӣ дар ҳафт тарҳ бо маблағи умумии 320 миллион доллар муаллақ мемонад. Яке аз ин тарҳҳо бунёди корхонаи истеҳсоли мошинҳои барқиро дар назар мегирад.

Русия: нархи воксинаи Sputnik V дар бозори ҷаҳонӣ камтар аз $20 хоҳад буд

Раиси маркази миллии Гамалея Александр Гинтсбург шишачаи воксинаи Sputnik V-ро намоиш медиҳад

Пуштибонҳои моливу муаллифони воксинаи зидди коронавируси русии Sputnik V мегӯянд, ки дар бозорҳои ҷаҳонӣ қимати як дафъа эмкунӣ “аз 20 доллар камтар” нарх хоҳад дошт ва барои шаҳрвандони Русия ройгон тақсим мешавад. Нархи ҷаҳонии воксинаи сохти русии Sputnik V рӯзи 24-уми ноябр нашр шуд ва қимати он назар ба воксинаҳои хориҷии мисли Pfizer ба маротиб камтар аст. Вале айни замон, воксинаи русӣ аз воксинаи сохтаи ширкати AstraZeneca гаронтар аст. Ин воксина дар Аврупо бо нархи 3 доллар барои як дафъа эмкунӣ пешниҳод мешавад. Фонди сармояҳои мустақими Русия гуфт, ки Маскаву шарикони хориҷиаш метавонанд воксинаро барои беш аз 500 миллион нафар истеҳсол кунанд. Дар Русия вазорати беҳдошт ва маркази миллии Гамалея гуфтанд, ки воксинаи сохти русӣ дар санҷишҳо нишон дод, ки дар рӯзи 28-ум воксина 91,4 дарсад ва дар рӯзи 42-юм 95 дарсад муассир будааст. Русия аввалин кишваре буд, ки воксинаи зидди коронавирусро барои истифодаи ҷамъӣ пешниҳод кард. Дар пасманзари пандемияву афзоиши ҳодисаҳои олудашавӣ умедвориҳо барои дастрас шудани воксинаҳои зидди вирус то соли оянда бештар мешавад.

Ду таркиш дар Бомиёни Афғонистон 14 касро кушта 15 нафарро маҷрӯҳ кард

24-уми ноябр. Мурдахонаи бемористони Бомиён. Қурбониҳои таркишҳои хунинро дар ин ҷо мегузоранд

Дар паи ду таркише, ки рӯзи 24-уми ноябр дар вилояти марказии Бомиёни Афғонистон рух дод, дастикам 14 нафар кушта ва 45 тан захмӣ шуданд. Таркиши ду бомбае, ки дар роҳи марказӣ ба сӯи бозори маҳаллӣ ҷойгузорӣ шуда буд, боиси кушта шудани 12 мулкӣ ва ду ходими полиси роҳ шуд. Дар ин бора Забардаст Сафоӣ, раиси полиси вилояти Бомиён ба матбуот хабар дод ва гуфт, онҳое, ки маҷрӯҳ шуданд, аксарият муштариёни тарабхонаву фурӯшгоҳҳое буданд, ки дар назди маҳалли таркиш қарор доштанд. Бомиён макони зисти аксар ҳазораҳои шиамазҳаб аст ва то ҳол ҳеҷ гурӯҳе масъулияти ин ҳодисаро ба дӯш нагирифтааст. Толибон даст доштани худ дар ин ҳодисаро рад карданд. Ториқ Ориён, сухангӯи вазорати умури дохилии Афғонистон шумори қурбониҳо дар ин ду таркишро тасдиқ кард. Ӯ гуфт, ки ин ҳодиса таҳқиқ мешавад.

Соли 2001 дар Бомиён Толибон пайкараҳои азими Буддоро тарконданд, ки давоми чанд ҳазор сол дар девори кӯҳе нигаҳдорӣ мешуданд. Баъди он ҳодисаҳо минтақа нисбатан ором буд. Ҳодиса дар рӯзе рух дод, ки дар Женева донорҳои байналмилалӣ ваъда доданд, ки ба Афғонистон барои барқарории баъдиву истиқрори сулҳ миллиардҳо доллар ёрӣ мекунанд.

Гузоришҳо: Трамп мехоҳад Майкл Флиннро афв кунад

Декабри соли 2018. Майкл Флинн додгоҳи ноҳиявии Вашингтонро тарк мекунад

Матбуоти амрикоӣ мегӯяд, ки президент Доналд Трамп мехоҳад собиқ мушовири амнияти миллӣ Майкл Флиннро, ки соли 2017 ба дурӯғгӯӣ дар бораи тамосҳояш бо Русия гунаҳгор шуд, афв кунад. Axios, нашрияи New York Times ва чанд матбуоти дигари амрикоӣ рӯзи 24-уми ноябр навиштанд, ки дар миёни зиндониҳое, ки Доналд Трамп мехоҳад дар рӯзҳои охири президентиаш афв кунад, исми Майкл Флинн ҳам зикр мешавад. Сӯҳбатҳои пинҳонии Флинн бо сафири Русия дар Вашингтон дар моҳи декабри соли 2016 барои роҳандозии таҳқиқот дар заминаи мудохилаи Маскав ба интихоботи президентии Амрико далели калидӣ шуд. Флинн дар он муттаҳам шуд, ки ҳангоми бозпурсиҳои Бюрои федеролии тафтишот ду дафъа дурӯғ гуфт ва мулоқотҳои худ бо сафири Русия дар ИМА-ро дар охири соли 2016 ва оғози соли 2017 пинҳон кард.

Худи Флинн баъдан шикоят крад, ки додситонҳо ҳуқуқи ӯро нақз карда маҷбур карданд, ки гуноҳро эътироф кунад. Моҳи маи соли ҷорӣ, дар як иқдоми ногаҳонӣ, вазорати адлия шикоят алайҳи Флиннро бозпас хонд ва гуфт, ки иттиҳоми дурӯғгӯии ӯ чандон ҷиддӣ нест, вале додраси федеролӣ, ки қазияи Флиннро таҳқиқ кардааст, ба идомаи тафтишот пойфишорӣ кард. Афви Трамп парвандаи Флиннро аз додгоҳҳо халос мекунад.

Раиси Бонки Миллӣ гуфт, ки чаро нархи маҳсулот дар Тоҷикистон гарон шуд

Акс аз бойгонӣ

Раиси Бонки Миллии Тоҷикистон сабабҳои афзоиши нархи маҳсулотро, ки дар моҳҳои ахир боис ба нигаронии сокинон шудааст, шарҳ дод.

Ҳоким Холиқзода рӯзи 25-уми ноябр дар порлумон гуфт, болоравии нархи маҳсулоти ниёзи аввал дар моҳҳои марту апрел ва октябри имсол мушоҳида шудааст.

Вай афзуд: "Нархи маҳсулот дар ин давра 5,6 дарсад афзоиш ёфт. Ба ин раванд асосан нархи орду биринҷ, шакар, равған, картошка, пиёз ва ғайра дохил мешаванд."

Ҳоким Холиқзода
Ҳоким Холиқзода

Раиси Бонки Миллӣ иддао кард, ки ба болоравии нархҳо сабабҳои гуногун, "аз ҷумла, фишорҳои берунӣ дар пайи авҷ гирифтани бемории коронавирус, маҳдуд шудани ҳамлу нақл, кам гардидани баъзе аз маҳсулоти асосии хӯрокворӣ ва ба таҳлука афтодани мардум таъсир расондааст."

Соҳибкорон мегӯянд, сабаби болоравии якбораи нархҳо бинобар поин омадани қурби пули миллӣ дар баробари доллари амрикоӣ аст. Асъоре, ки воридот асосан бо он сурат мегирад.

Дар чанд моҳи ахир сокинон аз болоравии чашмраси нархи хӯрокворӣ дар Тоҷикистон нигаронанд. Онҳо мегӯянд, дар давраи пандемия даромадҳояшон кам шудааст, аммо арзиши маҳсулот, баръакс, боло рафтааст.

Дар пайи чунин нигарониҳо баъзе аз иқтисоддонҳо таъкид карданд, ки паҳншавии коронавирус пойбандии иқтисоди Тоҷикистонро аз хориҷа нишон дод ва бояд ба масъалаи тавлиди маҳсулоти ватанӣ таваҷҷӯҳи бештар шавад.

Додгоҳи Русия 15 шаҳрванди Тоҷикистонро ихроҷ кард. Муҳоҷирон норозиянд

Муҳоҷирони боздоштшудаи тоҷик.

Маъмурони пулис дар шаҳри Маскав 15 муҳоҷири тоҷикро дастгир кардаанд ва додгоҳ қарори ихроҷи онҳоро аз Русия содир намуд.

Бобоҷон, яке аз муҳоҷирони боздоштшуда, рӯзи 25-уми ноябр ба Радиои Озодӣ гуфт, пулис онҳоро дар ҷараёни як амалиёт боздошт кард. Ба қавли ӯ, қисме аз муҳоҷирон патент ё иҷозаи кор доштанд ва баъзеи дигар барои дароз кардани муҳлати он ба мақомот ариза дода буданд.

Ба қавли Бобоҷон, онҳоро рӯзи 23-юми ноябр ба идораи пулис бурда, як шаб нигоҳ доштаанд. "Субҳи дигар ба додгоҳ бурданд. Дар онҷо моро 5 ҳазор рублӣ ҷарима баста, қарори ихроҷи моро аз Русия содир карданд. Ба мо панҷ рӯз муҳлат доданд, ки аз Русия берун равем", -- иброз дошт ӯ.

Ин дар ҳолест, ки бар асоси қарори раиси ҷумҳури Русия, муҳоҷирони корӣ то 15-уми декабр аз сабти номи маҳалли зист озоданд ва бе гузаштан аз марз ҳақ доранд, муҳлати патентро дароз кунанд.

Бобоҷон, муҳоҷири боздоштшуда, гуфт, барои дарёфти кумаки ҳуқуқӣ ба намояндагии дипломатии Тоҷикистон занг заданд, аммо то кунун ёрие нагирифтанд. Имомуддин Сатторӣ, сафири Тоҷикистон дар Русия, дар суҳбатҳои қаблии худ гуфта буд, шумораи муҳоҷирони корӣ дар Русия хеле зиёд аст ва ёрии ҳуқуқӣ расонидан ба ҳама аз имкон берун аст.

Пулиси Маскав сабабҳои ихроҷи муҳоҷиронро шарҳ намедиҳад.

Даъват аз амрикоиҳо: иди "Шукргузорӣ"-ро боэҳтиёт таҷлил кунед

Наққошии "Аввалин рӯзи "Шукргузорӣ" бо қалами рассоми амрикоӣ Жан Леон Ҷероме Феррис (1863–1930). Аз рӯи анъанаи амрикоиҳо, дар ин рӯз дар рӯи дастурхони идона бояд гӯшти мурғи марҷон гузошта шавад

Аз шаҳрвандони ИМА дар остонаи иди “Шукргузорӣ” бори дигар батаъкид дархост шуд, ки тадбирҳои эҳтиёткории ҳадди аксарро ба роҳ монанд, то таҷлили ид боиси паҳншавии бештари коронавирус нашавад. Рӯзи 24-уми ноябр мақомоти амрикоӣ аз мардум хостанд, ки дар хонаҳо бимонанд, меҳмон даъват накунанд ва бо ин кори худ дар таъмини назорати паҳншавии вирус саҳмгузор бошанд. Таҷлили ид 26-уми ноябр дар назар аст ва маъмулан дар ин рӯз миллионҳо амрикоиҳо ба хонаҳои волидону наздиконашон сафар карда, сари дастурхони калони оилавӣ идро ҷашн мегиранд. Мақомот мегӯянд, афзоиши ҳодисаҳои бистаришавии мардум бар асари COVID-19 фишори ходимони тибро хеле зиёд кардааст. Дар беморхонаҳои ИМА ҳоло 88 ҳазор нафар бо ҳамин беморӣ муолиҷа мешаванд ва ин як рақами рекордӣ аст.

Дар нуқоти дигари ҷаҳон ҳам омори сабти ҳамарӯзаи бемории ҳамагир баланд боқӣ мемонад ва Ҳинд, Русия, Испания ва Итолиё дар садри аввали феҳристи ҷаҳонӣ қарор доранд. Ҳоло дар Аврупо сӯҳбатҳо аз баста шудани осоишгоҳҳои лижаронӣ шурӯъ шудааст, чун ин навъи истироҳатҳои зимистона дар миёни аврупоиҳо хеле маъруфу маъмул аст.

Нирӯҳои озарӣ ба ноҳияи дуюми дар гузашта зери назари арманитаборҳои Қаробоғ ворид шуданд

23-юми ноябр. Низомиёни арманӣ пеш аз тарки Калбаҷар акси хотиравӣ мегиранд

Аз се ноҳияи собиқи зери назари арманитаборҳо дар минтақаи Қаробоғи Кӯҳӣ нирӯҳои озарбойҷонӣ ба ноҳияи дуюмаш ворид шуданд. Ин кор дар чаҳорчӯби созиши 10-уми ноябр имзошудаи миёни раҳбарони Арманистону Озарбойҷон бо ҳадафи хатми ҷангҳо дар ин минтақаи ҷудоиталаб анҷом мешавад. Вазорати дифои Озарбойҷон рӯзи 25-уми ноябр гуфт, воҳидҳои артиши Озарбойҷон ба ноҳияи Карвачар (ба озарӣ Келбаҷар) ворид шуданд. Қарор буд ин ноҳия 15-уми ноябр ба ихтиёри озарбойҷониҳо дода мешуд, вале бо сабабҳои гуманитарӣ аз ҷониби Озарбойҷон ба таъхир гузошта шуд. Вазорати дифои Озарбойҷон гуфт, корҳои муҳандисӣ барои ҳаракати мошинҳои низомӣ ва поккории роҳҳо аз мина хотима дода шудааст. Арманистон розӣ шуд, ки се ноҳияи атрофи Қаробоғ – Ағдам, Карвачар ва Лочинро дар чаҳорчӯби созиши имзошуда дар поёни ҷанги шашҳафтаинаи ахир ба озариҳо баргардонад. Ағдам рӯзи 20-уми ноябр ва Лочин то 1-уми декабр супурда мешавад.

Кремл рӯзи 24-уми ноябр хабар дод, ки ҷараёни иҷрои созиши бо миёнҷигии Русия ҳосилшуда дар сӯҳбатҳои ҷудогонаи телефонии президентони Русияву Озарбойҷон – Владимир Путин, Илҳом Алиев ва нахуствазири Арманистон Никол Пашинян баррасӣ шудааст. Дар изҳорот омадааст, ки дар ин гуфтугӯҳо инчунин масъалаи ёриҳои башардӯстона ҳам баррасӣ шудааст.

Ҷо Байден дар ҷараёни интиқоли қудрат ба гузоришҳои амниятӣ дастрасӣ пайдо мекунад

Ҳамарӯза президент Доналд Трамп гузоришҳои амниятиро бо номи  “Иттилоияи ҳамарӯзаи президент” дастрас мекунад ва ин гузоришҳо мӯҳри махфӣ дорад

Кохи Сафед ба президенти тозаинтихоби ИМА Ҷо Байден иҷоза дод, ки гузоришҳои махфии амниятиеро, ки ҳамарӯза ба номи президент омода мешаванд, дастрас бикунад. Гузоришҳо бо номи “Иттилоияи ҳамарӯзаи президент” вазъи бехатариву амниятӣ дар саросари ҷаҳонро гунҷоиш медиҳад. Иҷозати дастрас шудани ин гузоришҳо аз ҷониби Байден рӯзи 24-уми ноябр дода шуд ва ин як рӯз баъди он буд, ки маъмурияти Трамп гуфт, ҷараёни интиқоли қудрат ба тими Байден шурӯъ мешавад. Байден ба журналистон дар шаҳри Вилмингтони аёлати Делавар гуфт, дар ҳоле, ки иҷоза ба дарёфти гузоришҳои амниятӣ дода шудааст, то ҳол ҳеҷ матлабе ба дасташ нарасидааст. Ӯ гуфт, шояд аз фардо ба ин гузоришҳо дастрасӣ пайдо кунад. На Байден ва на аъзои тимаш баъди эълони пирӯзии ӯ дар интихоботи раёсатҷумҳурии 3-юми ноябр ҳамчун муқаррароти давраи гузариш аз як президент ба президенти нав ба маъмуриятҳои раёсатҷумҳурӣ роҳ дода нашуданд. Танҳо рӯзи 23-юми ноябр раиси Хадамоти умумӣ, ки ташкили корҳои давраи гузор ҳам дар ихтиёри он аст, гуфт, ки ҷараёни интиқоли умур расман шурӯъ мешавад. То он замон Байден аллакай исми бархе мақомдоронро ба унвони аъзои тими худ дар Кохи Сафед муаррифӣ кард. Байден гуфт, тими ӯ барои кор омода аст ва ба фарқ аз шиори Трамп, ки мегуфт, “Амрико аввал аст”, гуфт, омода аст дубора нақши пешбарандаи кишварро дар умури байналмилалӣ барқарор кунад.

Сӯхтор дар як кӯдакистони шаҳри Бохтар. ВИДЕО

Сӯхтор дар як кӯдакистони шаҳри Бохтар.

Як боғчаи кӯдакона дар шаҳри Бохтар ба коми оташ рафтааст. Сабабҳои ин ҳодиса то кунун маълум нест.

Як масъули Идораи оташнишонии вилояти Хатлон гуфт, сӯхтор субҳи 25-уми ноябр сар зад. Ҳанӯз маълум нест, ҳангоми сухтор кӯдакон дар он ҷо будаанд ё на.

Ба гуфтаи манбаъ, ошёнаи якум ва дувуми кӯдакистон оташ гирифтааст. Дар бораи хисорот ва талафоти сӯхтор хабари расмӣ нашр нашудааст.

Дар наворҳоее, ки корбарон ба Радиои Озодӣ фиристоданд, дида мешавад, ки оташ дар ошёнаи дувум ва боми кӯдакистон аланга мезанад ва кормандони интизомӣ дар маҳал ҳузур доранд.

Боғчаи рақами ду дар Бохтар яке аз кӯдакистонҳои кӯҳна дар ин шаҳр буда, дар назди Коллеҷи тиббӣ ва Идораи молияи вилоят ҷойгир аст.

Гуруҳи кории СММ боздошти Билашро дар Қазоқистон ғайриқонунӣ номид

Серикҷон Билаш, фаъоли маданӣ дар Қазоқистон.

Гуруҳи кории СММ оид ба боздоштҳои худсарона дастгир кардани фаъоли маданӣ ва раҳбари созмони сабтиномнашудаи "Нағыз Атажұрт" (Атажурти воқеӣ) Серикҷон Билашро дар моҳи марти соли 2019 дар Қазоқистон ғайриқонунӣ номид.

Дар ин бора созмони ғайридавлатии амрикоии Freedom Now, ки бо ҳимояти ҳуқуқи маҳбусони эътиқодӣ машғул аст, хабар дод.

Гуруҳи кории СММ 18 ноябр дар изҳороти худ гуфтаанд, "мақомоти қазоқ Билашро "барои истифода аз ҳуқуқи озодии баён" мавриди таъқиб қарор доданд ва банди 174-и Кодекси ҷиноии Қазоқистон наметавонист барои боздошти фаъоли маданӣ асос бишавад.

Ба навиштаи Freedom Now, гуруҳи кории СММ бори нахуст парвандаеро баррасӣ кард, ки дар он банди 174-и Кодекси ҷиноии Қазоқистон (ангехтани бадбинии миллӣ, қавмӣ, нажодӣ ва динӣ) истифода шудааст.

"Боздошти бидуни асоси Билаш аз он шаҳодат медиҳад, ки одамон барои изҳори осоиштаи назари худ дар Қазоқистон ба ҷавобгарии ҷиноӣ кашида мешаванд", - гуфтааст ҳуқуқшиноси Freedom Now Адам Ледмат.

Серикҷон Билаши 46-сола қазоқтабор ва зодаи минтақаи Шинҷони Чин буда, шаҳрвандии Қазоқистонро дарёфт кардааст. Билашро моҳи марти соли 2019 дар шаҳри Алмато дастгир карда, сипас ба шаҳри Нурсултон интиқол доданд ва дар онҷо 5 моҳ дар ҳабси хонагӣ буд.

Мақомоти Қазоқистон ӯро дар "роҳбарӣ ва ширкат дар фаъолияти созмони сабтиномнашуда" айбдор мекарданд, вале худи вай ин иттиҳомро рад карда, ҳабси худро сиёсӣ меномид.

Дар Қирғизистон пешниҳод доранд, бар ивази $100 ҳазор ба хориҷиҳо шаҳрвандӣ дода шавад

Шиносномаи қирғизӣ. Акс аз бойгонӣ.

Вакили порлумони Қирғизистон Достон Бекешев пешниҳод кардааст, ба афроде шаҳрвандии ин кишвар дода шавад, ки барои пардохти қарзи давлатӣ пул медиҳанд.

Ба шаҳрвандони хориҷӣ пешниҳод шудааст, ки бо гузаронидани 100 ҳазор доллар ба ҳисоби махсус барои пардохти қарзи давлатии Қирғизистон метавонанд, шаҳрвандии ин кишварро дарёфт кунанд. Ин нукта дар лоиҳаи қонуне зикр шуда, ки аз сӯи вакилони порлумон таҳия ва барои баррасӣ пешниҳод гаштааст.

Ба гуфтаи Бекешев, дар сурати қабули қонун Қирғизистон "нахустин кишвари Осиёи Марказӣ хоҳад шуд, ки бар ивази сармоягузорӣ шаҳрвандӣ медиҳад".

Маҳдуд шудани муҳлати иҷрои қонун ҳам зикр гаштааст. Иҷрои он баъди сармоягузории шаҳрванди 50000-умин манъ мешавад. Вакили порлумони Қирғизистон дар шарҳи пешниҳодаш гуфтааст, ки аз ин роҳ мешавад 5 миллиард доллар қарзи давлатии кишварашро пардохт кард.

Иҷрокунандаи вазифаҳои президент ва сарвазири Қирғизистон Содир Ҷабборов хабар дод, ки барои ҷамъоварии маблағ ва пардохти қарзи давлатии ин кишвар аз Чин ҳисоби махсуси бонкӣ боз мешавад.

Ӯ 4 ноябр дар вохӯрӣ бо сокинони вилояти Ҷалолободи Қирғизистон дар посух ба суолҳо дар бораи қарзҳои хориҷӣ изҳор дошт, "соҳибкорон ва муҳоҷироне, ки ба ман бовар мекунанд, барои пардохти қарз аз Чин ҳисоби махсуси бонкӣ боз менамоянд. Ин масъала дар давоми ду-се ҳафта ҳал мешавад. Мо шаффофияти ҳисобҳоро таъмин мекунем".

Ба огаҳии Вазорати молияи Қирғизистон, қарзи хориҷии ин кишвар то 30 июни соли равон 4 миллиарду 169,6 миллион долларро ташкил медод, ки 1 миллиарду 776,29 миллион доллари он аз "Эксимбонк"-и Чин гирифта шудааст.

Шаҳрдории Тошканд ҳудуди 5 ҳазор акси Шавкат Мирзиёевро харидорӣ кардааст

Шавкат Мирзиёев ҳини суҳбат бо мардум. Акс аз бойгонӣ.

Дастгоҳи шаҳрдории Тошканд моҳи майи соли равон бо баргузории озмуне 4965 акси президенти Узбекистон Шавкат Мирзиёевро ба маблағи 999 млн сӯм (зиёда аз $96,4 ҳазор) харидорӣ намудааст.

Ба огаҳии сомонаи харидҳои давлатӣ дар Узбекистон, таҳиягари аксҳо ширкати Kolorpak эълом шудааст. Ширкат барои фармоишгар ду навъи акс - 2894 дона акси 59×71- сантиметрӣ (ҳар кадоме 200 ҳазор сӯм ё $19) ва 2071 донаи дигар ба андозаи 49×42 сантиметр (ҳар кадоме 140 ҳазор сӯм ё $13,5) омода мекард.

Тибқи иттилои сомонаи Gazeta.uz, Kolorpak қаблан низ дар озмуни нашри 6 миллион дона китоби дарсии "Тарбия" ва 2 миллион китоби дарсии дигар баранда эълом шуда буд. Ширкати мазкур қарордоди нашри китобҳои дарсиро дувуним моҳ пеш аз оғози соли нави хониш ба даст оварда, созишномаҳо бо нашриётҳои дигар тағйир дода шудааст.

Раёсати умури президент ва ҳукумати Қирғизистон ҳам соли 2018 хабар дода буд, ки 800 дона акси расмии президент Соронбой Ҷеенбековро чоп кардааст. Ҳар як акс беш аз ҳафтдолларӣ нашр шуда буд.

Сабти 39 мавриди дигари гирифторӣ ба коронавирус дар Тоҷикистон. ВИДЕО

Акс аз бойгонӣ

Ба иттилои расмӣ, дар шабонарӯзи ахир дар Тоҷикистон 39 мавриди дигари гирифторӣ ба коронавируси навро сабт кардаанд. Намояндагони Вазорати тандурустӣ гуфтанд, аз охири моҳи апрел то 24-уми ноябр дар умум 11971 нафар бемор шуд, 94,8 дарсади онҳо шифо ёфтаанд. Тасдиқи дурустии иттилоъ аз манобеи мустақил ғайриимкон аст. Мақомот талафот аз бемориро дар кишвар 86 нафар шумурдаанд. Аммо баъзе аз сокинону мутахассисон ба омори расмӣ дар бораи беморони коронавируси нав ва маргу мир аз он дар Тоҷикистон шубҳа доранд. Онҳо мегӯянд, миқёси беморӣ ва фавти одамон метавонад аз маълумоти расмӣ ба маротиб бештар бошад.

Радиои Озодӣ рӯйхати қурбониёни коронавирус ва илтиҳоби шушро барои нашр омода кард
лутфан мунтазир бошед

Феълан кор намекунад

0:00 0:03:49 0:00

Дидори Рустами Эмомалӣ бо Валентина Матвиенко дар Маскав

Рустами Эмомалӣ ва Валентина Матвиенко

Дар Маскав мулоқоти раиси Маҷлиси Миллии Тоҷикистон ва шаҳрдори Душанбе Рустами Эмомалӣ бо раиси Шӯрои Федератсияи Русия Валентина Матвиенко баргузор гашт. Ин сафари нахустини ӯ дар ин мақом ба Русия аст.

Дар мулоқоти рӯзи 24-уми ноябр зикр шуд, ки ду кишвар бояд робитаҳоеро, ки дар асари ҳамагири КОВИД-19 ба мушкил рӯбарӯ шудаанд, барқарор кунанд ва густариш диҳанд.

Бино бар маълумоти сомонаи расмии Шӯрои Федератсияи Русия, мулоқот бо ширкати ҳайатҳои ду ҷониб баргузор шуда, дар он тарафҳо ҳамкориҳои дуҷонибаро коршарикии стратегӣ унвон кардаанд. Раиси палатаи болоии порлумони Русия рушди ҳамкориҳоро “начандон бад” номидааст. Рустами Эмомалӣ гуфтааст, Тоҷикистон ба ҳамкории гуногунсамт бо Русия таваҷҷуҳи зиёд медиҳад ва “ҳамкориҳои порлумонӣ як бахши бунёдии ин равобит” аст.

Хабаргузориҳои Русия дар бораи ин дидор ҷузъиёти зиёд наовардаанд. Аз ҷумла, маълум нест, раиси Маҷлиси Миллии Маҷлиси Олии Тоҷикистон ва шаҳрдори Душанбе Рустами Эмомалӣ бо раиси Шӯрои Федератсияи Русия Валентина Матвиенко масъалаҳои марбут ба муҳоҷирони тоҷикистониро баррасӣ кардааст ё на.

Матвиенко хабар додааст, ки Рустами Эмомалӣ рӯзи 25-уми ноябр бо шаҳрдори Маскав Сергей Собянин, раиси Думаи давлатӣ Вячеслав Володин ва ноиби сарвазири Русия, ҳамраиси кумиссияи байнидавлатии Тоҷикистон ва Русия Алексей Оверчук дидору гуфтугӯ хоҳад дошт. Ҳамчунин қарор аст, ҷаласаи комиссияҳои байнипорлумонии ду давлат ҷараён гиранд.

Ҳарчанд Матвиенко ба "арзишмандии амалии ин комиссия дар тӯли солҳои мавҷудияташ" ишора кард, дар ин солҳо ҳайати мазкур ба ҳалли мушкилоти асосии байни ду давлат, яъне вазъи муҳоҷирон даст наёфта, таъсири он ба рушди ҳамкориҳои иқтисодӣ бузург арзёбӣ намешавад.

Узбекистон тасмим дорад, барои ҳар шаҳрвандаш ваксина бигирад

Санҷиши сокинон дар гузаргоҳи "Достук", марзи Узбекистону Қирғизистон

Узбекистон барои ҳар шаҳрвандаш як моя (доза)-и ваксинаи зидди COVID-19 супориш додааст. Дар ин бора нашрияи The Economist хабар дод.

Нашрия ҳамзамон рӯйхати кишварҳоеро нашр кард, ки мояи ваксинаи зидди COVID-19 супориш додаанд. Дар ин рӯйхат номи Ҳинд, Бразилия ва кишварҳои дигари Амрикои Лотинӣ, Индонезия ва Узбекистон зикр шудаанд. Ҳамаи ин кишварҳо барои тамоми шаҳрвандонашон як мояӣ супориш додаанд.

Канада, ба фарқ аз кишварҳои дигар, барои ҳар кадом шаҳрвандаш 10 мояи ваксина дархост додааст. Австралия ва Бритониё ба ҳисоби миёна барои ҳар кадом шаҳрванд 6 моя, Амрико ва кишварҳои аврупоӣ 3-мояӣ, Ҷопону Непал 2-мояӣ супориш додаанд.

Дар ҳоли ҳозир дар Узбекистон озмоиш ё санҷиши марҳилаи севуми ваксинаи Чин ба зидди коронавирус идома дорад. Пештар хабар расида буд, ки Узбекистон тасмим дорад, то моҳи июни 2021 ҳудуди 60 дарсади аҳолиашро ваксин занад.

Норозиёни ислоҳи Қонуни асосӣ дар Қирғизистон имзо ҷамъ меоранд

Қонуни асосии Қирғизистон

Дар Қирғизистон ба зидди қабули тарҳи нави Конститутсия имзо ҷамъ меоранд. Дар ин бора рӯзи 23-юми ноябр ташаббускорони ҷамъоварии имзо хабар доданд. Ҷамъоварии имзо дар сомонаи www.stop-referendum-kg.com сурат мегирад.

Ташаббускорон гуфтанд, тасмим доранд, ҳадди ақал 500 ҳазор имзо ҷамъ оваранд ва ба ин тартиб, қонун дар бораи баргузории ислоҳот ва интихоботи порлумониро бозхонд кунанд.

"Агар ҳоло мо ба ислоҳоти конститутсионӣ роҳ диҳем, пас, баъди чанд сол дубора ба ин масир бармегардем. Ва Қирғизистон бори дигар вориди табаддулоти давлатӣ мешавад", - гуфт Сония Токтоғозиева, ҳуқуқшинос ва коршиноси қонунгузории конститутсионӣ дар Қирғизистон.

Порлумони Қирғизистон рӯзи 17-уми ноябр тарҳи нави Қонуни асосиро ба баррасии умум гузошт. Тарҳи ислоҳот ба Конститутсияро 80 вакили порлумон пешниҳод кардаанд, аммо муаллифи тарҳи қонун то кунун номаълум аст.

Бино ба тарҳи нави Конститутсияи Қирғизистон салоҳиятҳои президент васеътар шуда, қурултойи мардумӣ ҳамчун шохаи ҳокимият ба эътибор гирифта шудааст. “Президент раиси давлат буда, ҳукумати иҷроияро идора мекунад ва сиёсати дохиливу хориҷиро муайян месозад”, -- омадааст дар тарҳи нав. Президент метавонад, ду давраи панҷсола интихоб шавад ва сохтору ҳайати ҳукуматро муайян кунад. Дар тарҳи нави Қонуни асосии Қирғизистон шумораи вакилон аз 120 нафар ба 90 кас оварда шудааст.

Ҷомеи Қирғизистон аз ин тарҳ розӣ нест ва онро ҷамъоварии қудрат дар дасти як нафар унвон мекунад. Рӯзи 22-юми ноябр садҳо сокини Бишкек ба кӯча баромада, ба зидди тарҳи нав эътироз карданд.

Раиси Бунёди иҷтимоии Қирғизистон бо гумони тамаъҷӯӣ ҳабс шуд

Медер Ирсалиев, раиси Бунёди иҷтимоии Қирғизистон.

Додгоҳи ноҳияи Якуми майи шаҳри Бишкек 20 ноябр раиси Бунёди иҷтимоии Қирғизистон Медер Ирсалиевро то 17 январи соли 2021 ҳабс кард.

Дар хадамоти матбуотии Додгоҳи олии Қирғизистон гуфтанд, ки Ирсалиев ду моҳ дар боздоштгоҳи муваққатии Кумитаи давлатии амнияти миллии ин кишвар нигаҳдорӣ мешавад.

Ирсалиевро 18 ноябр дар доираи парвандаи тамаъҷуии мунтазам аз воҳидҳои Бунёди иҷтимоӣ дастгир карданд.

Пештар хабар дода шуд, ки як гуруҳи мансабдорони баландпояи Бунёди иҷтимоии Қирғизистон ба таври мунтазам ва иҷборӣ аз мудирони воҳидҳои ин ниҳод маблағ талаб мекардаанд.

Медер Ирсалиев моҳи майи соли 2018 бо қарори сарвазири вақти Қирғизистон Муҳаммад Абилғозиев раиси бунёди мазкур таъйин шуда буд. Ӯ то ин дам муовини аввали раиси бунёд буд.

Таркиш дар наздикии Тошканд ба сабаби таъмири бесифати лӯлаи газ

Яке аз маҳаллаҳои шаҳри Тошканд. Акс аз бойгонӣ.

Таркиш дар ноҳияи Қибрайии вилояти Тошканди Узбекистон, ки дар натиҷаи он падару писаре фавтиданд, ба далели таъмири бесифати лӯлаи газ рух додааст.

Рӯзи 23 ноябр Додситонии кулли Узбекистон дар пайи ин ҳодиса парвандаи ҷиноӣ боз кардааст.

"Дар натиҷаи тафтишот муайян шуд, ки таъмири лӯлаи газ дар наздикии манзилҳои зист бе сифат сурат гирифта ва ин боиси таркиш шудааст", - хабар медиҳад Додситонии кулли Узбекистон.

Мақомоти он кишвар мегӯянд, лӯлаи газ сурох ва дар таҳхонаи манзили баландошёна газ ҷамъ шуда, дар натиҷа боиси таркиш шудааст.

Пештар аз ин расонаҳо хабар дода буданд, ки дар кӯчаи Гулистон-3, дар ноҳияи Қибрайии вилояти Тошканд падару писаре дар натиҷаи таркиш фавтидаанд.

Ёфтҳои бештар

XS
SM
MD
LG