Хабаргузории "Авеста" иттилоъ додааст, ки бо кӯмаки Созмони Ҷаҳонии Беҳдошт ва ЮНИСЕФ дар ин рӯзҳо 6,3 миллион ваксин ба Тоҷикистон оварда шудааст ва он барои ҷилавгирӣ аз бемории фалаҷи кӯдак ё полиомелит истифода мешавад. Бино ба гузориши ин манбаъ, вазорати тандурустии Тоҷикистон хабар додааст, ки дар ин кишвар беш аз 2,5 миллион кӯдак ва наврасони то 16-сола барои ҷилавгирӣ аз бемории фалаҷи кӯдак ваксин зада мешаванд. Ваксинзанӣ дар Душанбе ва 7 ноҳияи наздикии он дар ду марҳала анҷом мегирад. Марҳалаи аввал аз 1 то 5-ӯми июн ва марҳалаи дуввум аз 15 то 19-ӯми июни соли 2010 анҷом мегирад.