Ҳукумати Чин мегӯяд, Вен Ҷибао – нахуствазири ин кишвар, моҳи оянда дар ҳамоиши ҷаҳонӣ дар мавриди тағйири иқлим дар шаҳри Копенҳагени Дания ширкат хоҳад кард. Дар ин бора имрӯз Кин Ганг – сухангӯи вазорати умури хориҷаи Чин, хабар дод. Интизор меравад, ҳудуди 65 раҳбарони кишварҳои ҷаҳон дар ҳамоиши таҳти сарпарастии Созмони Милал дар пойтахти Дания ширкат варзанд, ки аз 7 то 18 декабр идома хоҳад кард. Онҳо мекӯшанд, тарҳи нави санадеро бирезанд, ки Аҳдномаи байналмилалии муқобила бо гармоиши курраи Замин, аҳдномаи Киоторо иваз хоҳад кард. Кохи Сафед гуфтааст, ки Барак Обама – раиси ҷумҳури Амрико, рӯзи 9 декабр дар ин ҳамоиш ҳузур хоҳад дошт. Чину Амрико бузургтарин ихроҷкунандагони газҳои гӯлхонаӣ дар ҷаҳон мебошанд ва ҳаргуна пешрафт дар ҳамоиши Копенҳаген аз ҳузури ин ду кишвар вобаста аст.
