Пайвандҳои дастрасӣ

Хабари нав

Хабарҳо

Нигарониҳо аз ташаннуҷи авзоъ дар Кишинёв

Ҳазорон нафар аз тазоҳуркунандагон, ки дар маркази Кишинёв, пойтахти Молдова, ба натиҷаҳои интихоботи порлумонии Молдова эътироз мекарданд, баъди ба хушунат пайвастани гирдиҳамоии осоишта ба кохи раёсатҷумҳурӣ ва бинои порлумони ин кишвар ҳамла карданд. Тибқи хабарҳо дар ин ҳодиса ба камияш 40 нафар, аз ҳарду ҷониб, ҳам эътирозгарон ва ҳам полис, захмӣ шудаанд. Ҳавиер Солана, масъули сиёсатҳои хориҷии Иттиҳоди Аврупо аз ҳамаи тарафҳо даъват кард, ба иғво дода нашаванд ва аз хушунат худро нигаҳ доранд. Вай аз тазоҳуркунандагон хост, ба зӯроварӣ роҳ надиҳанд ва аз мақомот хост ба намоиши осоишта дахолат накунанд. Ноиби вазири умури хориҷии Русия, Григорий Карасин гуфтааст, Маскав вазъиятро бо нигаронӣ думбол мекунад. Мақомоти Руминия, ҳамсояи Молдова ва узви Иттиҳоди Аврупо, низ гуфтаанд, аз таҳаввулоти ахир дар Кишинёв нороҳатанд.

Ҳамаи хабарҳои имрӯзро дар инҷо бихонед

Фаъолони “Гурӯҳи 24” аз Русия дар бораи дар куҷо будани Шобудин Бадалов маълумот хостаанд

Шобудин Бадалов

Фаъолони созмони дар Тоҷикистон мамнӯи “Гурӯҳи 24” дар назди бинои сафорати Русия дар Олмону Бритониё тазоҳурот кардаанд. Тазоҳурот рӯзҳои 24 ва 28-уми сентябр баргузор шуд.

Мегӯянд, аз қазияи, ба иддаои онҳо, рабуда шудани фаъоли гуруҳ Шобудин Бадалов дар Русия ва эҳтимоли ба дасти мақомоти Тоҷикистон супурда шудани ӯ нигаронанд.

Дафтари матбуоти “Гуруҳи 24” дар изҳороте гуфт, Шобудин Бадалов дар Русия ҳаққи паноҳандагӣ дошт, вале ӯро рӯзи 1-уми сентябр дар шаҳри Нижний Новгород дастгир кардаву ба самти номаълум бурдаанд.

Пештар масъулони Вазорати корҳои дохилии Тоҷикистон истирдод шудани Шобудин Бадаловро аз Русия ба Душанбе рад карда буданд. Ниҳодҳои дигари қудратии Тоҷикистон дар бораи қазияи ӯ то ҳанӯз изҳори назар накардаанд.

Маълум нест, ӯ дар ҳудуди Русия аст, ё ба Тоҷикистон оварда шудааст. Мақомоти Русия дар ин замина расман чизе намегӯянд.

“Гурӯҳи 24” мегӯяд, бори аввал нест, ки аъзову тарафдоронаш дар ҳудуди Русия дастгир ва бархе аз онҳо ба ҷониби Тоҷикистон супурда шудаанд. Дар ин миён сарнавишти Эҳсон Одинаев, ки соли 2015 дар шаҳри Санкт-Петербург дастгир шудааст, то ҳанӯз номаълум аст.

Бори дувум аст, ки Шобудин Бадалов, намояндаи "Гуруҳи 24" дар Русия боздошт мешавад. Пеш аз ин моҳи июни имсол ӯро баъд аз пикети эътирозӣ дар ҷараёни сафари раиси ҷумҳури Тоҷикистон Эмомалӣ Раҳмон ба Маскав дастгир ва ба 15 рӯз ҳабс маҳкум карда буданд.

"Гурӯҳи 24", ки соли 2012 таъсис ёфтааст, соли 2014 бо қарори Додгоҳи олии Тоҷикистон як созмони экстремистӣ ва мамнуъ эълон шуд. Дар пайи он даҳҳо нафар дар Тоҷикистону Русия ва кишварҳои дигари пасошӯравӣ бо иттиҳоми тарафдорӣ аз "Гурӯҳи 24" боздошту зиндонӣ шуданд.

Дар таркиши мошине дар Афғонистон 14 нафар ҷон дод

Кобул, баъди таркиши маргталабе. Акс аз бойгонӣ

Мақомот дар Афғонистон гуфтанд, ки дар паи таркиши бомбаи сарироҳӣ дар вилояти марказии Дайкундӣ дастикам 14 мулкӣ кушта шуд. Бо ин ки дар Қатар ҳукумат ва Толибон музокироти сулҳ барпо кардаанд, хушунат дар саросари кишвар кам намешавад. Сухангӯи волии Дайкундӣ Насрулло Ғӯрӣ дар сӯҳбат бо бахши Афғонии Радиои Озодӣ гуфт, ки ҳафт зан, панҷ кӯдак ва ду мард ҳангоме ҷон доданд, мошинашон ба як маводи сарироҳии тарканда бархӯрд. Дар ҳодисаи рӯзи 29-уми сентябр инчунин се мусофир маҷрӯҳ шудааст. То ҳол ҳеҷ гурӯҳ ё нафаре масъулияти ин ҳодисаро ба дӯш нагирифтааст, вале сухангӯи вазорати дифои Афғонистон Тариқ Ориён гуфт, ки ин кори Толибон аст.

Помпео Арманистону Озарбойҷонро ба хатми низоъ даъват кард

Майк Помпео, котиби давлатии ИМА

Котиби давлатии ИМА Майк Помпео рӯзи 29-уми сентябр аз Арманистону Озарбойҷон, ки ҳамоно дар минтақаи ҷудоиталаби Қаробоғи Кӯҳӣ даргир ҳастанд, тақозо кард, ки низоъҳоро хотима бидиҳанд. Қаробоғи Кӯҳӣ, ки аксар сокинонаш арманитабор мебошанду аз ҷониби Арманистон пуштибонӣ мебинанд, дар дохили қаламрави Озарбойҷон ҷойгир аст. Соли 1990 ин минтақа истиқлолияти худро эълон кард, вале ҳеҷ кишваре инро ба расмият нашинохт. Помпео, ки бо як сафари корӣ дар ҷазираи Крит қарор дорад, мавзӯи Қаробоғи Кӯҳиро бо вазири хориҷаи Юнон Никос Дендиас ҳам баррасӣ кард. Ӯ дар нишасти матбуотӣ гуфт:

“Вазири хориҷа ва ман ба мавзӯи Қаробоғи Кӯҳӣ муроҷиат кардем. Ҳарду ҷониб бояд хушунатро хотима дода бо Гурӯҳи Минск ҳамкорӣ бикунанд, то ки ҳарчи зудтар сари мизи гуфтугӯ баргарданд”.

Гурӯҳи Минск дар оғози солҳои 1990-ум бо талоши САҲА ташкил шуд ва ҳадафаш ҳам ҳалли низои Қаробоғи Кӯҳӣ мебошад. Ба ин гурӯҳ Фаронса, Русия ва ИМА ҳамраисӣ мекунанд.

Ду сокини Беларус барои занозанӣ бо полис ба беш аз 3 соли зиндон маҳкум шуданд

23 август, шаҳри Молодечно. Мардум ба намоиши эътирозӣ мераванд

Додгоҳе дар Беларус ду мардро, ки ҳангоми ширкат дар намоишҳои эътирозии зидди Александр Лукашенко бо полис занозанӣ карданд, ба зиндон маҳкум кард. Рӯзи 29-уми сентябр додгоҳе дар шаҳри Молодечно, ки дар наздикии Минск қарор дорад, ҳукм кард, ки Павел Песков ва Владислав Евстигнеев барои ба таври хушунатомез итоат накардан ба полис маҳкум ба зиндон мешаванд. Додрас Виктория Полошук ҳукм кард, ки Песков ба 3 солу 3 моҳи зиндон ва Евстигнеев ба 3 соли зиндон маҳкум мешаванд. Ин нафарон дар он гунаҳгор шуданд, ки дар намоишҳои эътирозии рӯзи 19-уми сентябр дар шаҳри Молодечно, ки истеъфои Лукашенкоро талаб мекарданд, бо полис заноназанӣ карданд. Дар ҷараёни ин эътирозҳо ширкатдорон, аз ҷумла Песков ва Евстигнеев полисро маҷбур карданд, ки як эътирозгари боздоштшударо озод бикунанд. Саркӯби эътироз аз ҷониби полис, ки видеояш ба шабакаҳо роҳ ёфт, хашми зиёди мардумро овард, чун яке аз кормандони ОМОН бо тапончае дар даст ба эътирозгарон таҳдид мекард. Дар Беларус рӯзи 9 август интихоботи президентӣ барпо ва Александр Лукашенко бо 80 дарсади раъйҳо баранда эълон шуд, вале ин натиҷаҳоро на мухолифон ва на садҳо ҳазор сокинони Беларус ҳамчун тақаллубшуда эътироф накарда, аз роҳи ширкат дар намоишҳои эътирозӣ ба чолиш кашиданд.

Ширкати байналмилалии ҳавоии Украина парвозаш ба Арманистонро боздошт

An-225, ҳавопаймои борбари украинӣ

Дар паи даргириҳои нав дар минтақаи ҷудоиталаби Қаробоғи Кӯҳӣ ширкати байналмилалии ҳавоии Украина парвози нақшавӣ ба Ереванро боздошт. Ширкати ҳавоӣ дар изҳороте гуфт, бо нигарониҳои амниятӣ аз парвоз бар фарози Арманистону Озарбойҷон худдорӣ мекунад. Парвоз ба Ереван, пойтахти Арманистон дар таърихи 2 ва 3 октябр ва ба пойтахти Озарбойҷон – шаҳри Боку 4 октябр ба нақша гирифта шудааст. Дар изҳорот омадааст, ки тасмим дар бораи ин парвозҳо дертар гирифта мешавад. Арманистон рӯзи 27 сентябр гуфт, баъди, ба қавли Ереван, ҳамлаҳои Озарбойҷон ба минтақаи Қаробоғи Кӯҳӣ, муқаррароти низомӣ ва сафарбаркунии оммавиро ҷорӣ кард. Дар низоъҳои се рӯзи ахир ҳавопаймоҳои бесарнишин, чархболу тонкҳо истифода шуд. 8-уми январ як ҳавопаймои ширкати украинӣ дар авҷи ихтилофҳои Теҳрону Вашингтон тасодуфан аз ҷониби нирӯҳои мусаллаҳи Эрон суқут дода шуд. Ин ҳавопаймо бо даҳҳо мусофир мавриди ҳамлаи ду мушаки эронӣ қарор гирифт. Он замон Эрон дар посух ба куштори генерали нирӯҳои Қудс хост ба самти пойгоҳи низомии амрикоиҳо дар Ироқ мушак партоб кунад, вале, тавре баъдан эътироф кард, тасодуфан ба ҳавопаймои мусофирбаи украинӣ расид.

Дар Будапешт гулгаште бо номи Чингиз Айтматов бунёд мешавад

Будапешт, пойтахти Маҷористон

Дар шаҳри Будапешт бо ширкати ҳайати Қирғизистон маросими кушоиши боғи ба номи нависандаи маъруф Чингиз Айтматов баргузор мешавад. Дар ин бора хадамоти матбуотии президенти Қирғизистон иттилоъ медиҳад.

Сооронбой Ҷеенбеков рӯзи 28 сентябр бо сафари расмӣ ба Маҷористон (Венгрия) рафт.

Ҷеенбеков дар ин сафар бо сарвазири Венгрия Виктор Орбан мулоқот мекунад. Ду мақомдор эъломияи шарикии стратегӣ, тафоҳумномаи бунёди рушди Қирғизистону Маҷористон ва дигар санадҳои ҳамкории дуҷонибаро ба имзо мерасонанд.

Ҷеенбеков ҳамзамон бо президенти Маҷористон Янош Адер ва раиси порлумони он кишвар Ласло Кёвер мулоқот хоҳад кард.

Пеш аз сафар ба Маҷористон президенти Қирғизистон ба Русия рафт ва бо ҳамтои руси худ Владимир Путин мулоқот кард.

COVID-19 дари мактабҳои Москваро барои ду ҳафта баст

Шаҳрдории Москва Сергей Собянин эълом кард, ки дар робита ва авҷгирии вабои COVID-19 хонандагони мактабҳо аз 5 октябр то 18 октябр ба таътил фиристода мешаванд. Дар ин бора сомонаи шаҳрдории Москва хабар додааст.

Одатан таътили тирамоҳӣ дар мактабҳои Русия як ҳафта идома мекунад. "Бо тавсияи пизишкон ва бо назардошти авҷгирии бемориҳои хоси мавсими тирамоҳ ва афзоиши сабти ҳолатҳои нави гирифторӣ ба вабои коронавирус тасмим гирифта шуд, ки таътили тирамоҳӣ ду ҳафта эълом шавад", - омада аст дар изҳороти Собянин. Аммо ин таътил ба боғчаҳои кӯдакон рабт надорад.

Собянин аз волидон даъват кардааст, ки дар ин муддат кӯдаконро бештари вақт дар хона нигаҳ доранд ва барои қадам задан танҳо ба наздиктарин боғ ё гулгашти назди хона бароранд. "Дар ин рӯзҳо бештари гирифтороне, ки ҳеч нишонае надоранд - кӯдакон ҳастанд. Онҳо аз кӯча ба хона меоянд ва ба содагӣ бемориро ба аъзои калони хонавода интиқол медиҳанд",-омадааст дар хабар.

Рӯзи 25 сентябр мақомоти Москва расман аз сокинони 65-сола боло хостанд, ки бидуни зарурат аз хона набароянд. Ин хоҳиш ба касоне, ки бемории музмин доранд ва ҳамчунин занони ҳомила дахл дошт. Ба ин тартиб, амалан "низоми худинзиво", ки баҳори имсол дар Москва эълом шуда буд, дубора барқарор гардид. Ба илова, ба ширкатҳои бузург тавсия шуд, ки ба кори фосилавӣ гузаранд.

Ба навиштаи расонаҳо, мақомоти Русия эҳтимоли барқарории карантинро баррасӣ доранд. Расонаҳо менависанд, ин эҳтимол ба афзоиши шуморfи гирифторони вабои коронавирус рабт дорад.

Мавзӯи андозсупориҳои Трамп дар меҳвари дебати интихоботиаш бо Байден қарор мегирад

Ҷо Байден аз чап ва Доналд Трамп аз рост

Рӯзи 29-уми сентябр қарор аст нахустин музоҳираи интихоботии Доналд Трамп ва Ҷо Байден баргузор шавад. Нашрияи New York Times дар як таҳқиқот андозсупориҳои президент Доналд Трампро таҳқиқ кард ва ҳоло интизор меравад, ки дар ҷараёни баҳси 90-дақиқагии ду номзад ҳамин масъала авлавият хоҳад дошт. Нашрия гуфт, ки давоми 17 соли охир Трамп аз роҳи гузориш додани ин ки даромадашро аз даст додааст, ба давлат андози хеле кам пардохт кардааст ваё аслан андоз надодааст. Таҳқиқоти журналистӣ мегӯяд, ки барои кам кардани масъулиятҳои андозсупориаш Трамп даромадашро ночиз нишон додааст. Нашрия гуфт, ки солҳои 2016 ва 2017, ки тоза президент интихоб шуд, ба давлат ҳамчун андози федеролӣ танҳо дар ҳаҷми 750-долларӣ маблағ супурдааст ва дар давоми 15 соли аз ин пеш давоми 10 солаш аслан андози федеролӣ насупурдааст. Дар як видеои таблиғотии тими Байден, ки билофосила баъди нашри таҳқиқоти New York Times таҳия шуд, нишон дода шудааст, ки чӣ гуна амрикоиҳои қаторӣ соле ба маротиб бештар назар ба Трамп андоз месупоранд. Трамп дар Твиттери худ навишт, ки “миллионҳо доллар андоз супурдааст ва мисли ҳар як нафари дигар ба сабукиҳои молиётӣ ҳақ дорад”. Интизор меравад, ки музоҳираи интихоботии Трамп ва Байденро дар шаҳри Кливланди аёлати Оҳайо 100 миллион амрикоӣ тамошо бикунанд.

ВКД: "Раҳматилло Зойировро сагаш ба ҷӯй афтонд". Раиси ҲСДТ: "Ду нафари ношинос заданд." ВИДЕО

Раҳматилло Зойиров дар назди хонааш. Рӯзи 24-уми сентябри 2020

Мақомоти Вазорати корҳои дохилии Тоҷикистон рӯзи 29-уми сентябр дар баёнияи расмӣ гуфтанд, ки Раҳматилло Зойиров, раиси Ҳизби сотсиал-демократро касе назада, балки сагаш ба даруни ҷӯйбор афтондааст.

Раҳматилло Зойиров дар вокуниш ба баёнияи Вазорати корҳои дохилӣ гуфт, "чунин назар бепоя ва пур аз иштибоҳ аст. Дар зудтарин фурсат дар ин замина баёнияи расмӣ нашр мекунем”.

Вай пештар гуфта буд, ки шоми 22-юми сентябр шахсони ношинос дар наздикии хонааш дар шаҳри Душанбе ба ӯ ҳамла карда, ба сару чашмаш осеб расонданд. Ба қавли Зойиров, ҳамлаварон ду нафар буданд ва "аз пушт зарба заданд".

Масъулони ВКД мегӯянд, бино ба ташхиси тиббиву додгоҳӣ "дар сари ӯ ягон осеби ҷароҳат ёфт нашуд". Вазорат аз қавли Қобилҷон Давлатхоҷаев, ҳамчун шоҳиди ҳодиса, овардааст: "Санаи 22-юми сентябри соли 2020 бегоҳирӯзӣ ҳамсояаш Зойиров Р.Ҳ.-ро вохӯрд, ки номбурда бо сагаш сайругашт менамуд. Дар ин маврид саг Зойиров Р.Ҳ.-ро ба як тараф кашид ва дар натиҷа номбурда ба дохили ҷӯйбори бетонӣ афтид."

Раҳматилло Зойиров рӯзи 29-уми сентябр гуфт, воқеан мавриди ҳамла қарор гирифтааст ва дар ин замина ба ташхиси тиббиву додгоҳӣ муроҷиат кардааст. "ВКД як нусхаи ин ташхисро дастрас кардааст, аммо чунин хулосаи ВКД комилан бепоя аст", -- афзуд ӯ.

Раҳматилло Зойиров дар суҳбат бо Радиои Озодӣ гуфт, "шоми 22-юми сентябр, соати шашуними бегоҳ, як-ду одамро гусел карда, каме дар сари кӯча истодам. Рафтанӣ будам, ки аз пушти сар ва гарданам заданд. Ҳамон лаҳза касе бо тамоми ҷуссааш маро тела дод. Бо китфи чапам ба роҳрав зада, ба дохили ҷӯй афтодам."

Дар се соли ахир бори дувум аст, ки раиси ҲСДТ мавриди ҳамлаи шахсони ношинос қарор мегирад. Зоиров мегӯяд, ҳамлаи ахир баъд аз бозгашти ӯ аз баъзе шаҳру ноҳияҳои кишвар сурат гирифт. Ҷое, ки ба қавли худаш дар бораи "тақаллубкорӣ"-и раисони баъзе аз шаҳру ноҳияҳои кишвар ҳангоми пешвози раиси ҷумҳурии Тоҷикистон маълумоти зиёде ҷамъ оварда буд.

Ҳодисаи ахир дар ҳоле сурат гирифтааст, ки Тоҷикистон дар остонаи интихоботи президентӣ қарор дорад ва Ҳизби сотсиал-демократ онро таҳрим ё бойкот кардааст. Шӯрои сиёсии ҳизб гуфт, таъини интихоботи президентӣ дар санаи 11-уми октябр "ғайриқонунӣ" аст ва раиси ҷумҳур Эмомалӣ Раҳмон ҳақ надорад, раиси ҳизби сиёсӣ бошад.

Видеои суҳбат бо Раҳматилло Зойировро дар инҷо бинед:

Зойиров гуфт, ки афроди ношинос ӯро задаанд
лутфан мунтазир бошед

Феълан кор намекунад

0:00 0:04:51 0:00

Президенти Фаронса Эммануэл Макрон бо Светлана Тихановская мулоқот кард

Светлана Тихановская баъди мулоқот бо президенти Фаронса Эммануэл Макрон ба саволҳои журналистон посух дод

Президенти Фаронса Эммануэл Макрон баъди мулоқот бо раҳбари мухолифони Беларус Светлана Тихановская дар Литва ваъда дод, ки Аврупо дар бӯҳрони сиёсии Беларус миёнҷигӣ мекунад. Ӯ гуфт, ки “мо, аврупоиҳо, беҳтарин талошамонро барои миёнҷигӣ ба харҷ медиҳем”. Тихановская баъди ин дидор ба хабарнигорон гуфт, ки президенти Фаронса “ба мо ваъда дод, ки барои барпо кардани музокирот дар ин давраи бӯҳрони сиёсии кишварамон кӯмакашро дареғ намедорад ва ӯ инчунин барои озод кардани ҳама зиндониҳои сиёсӣ мусоидат хоҳал кард”. Манобеъ гуфтанд, ки музокироти ду ҷониб 35 дақиқа идома дошт. Тихановская қаблан гуфт, ки худи ӯ дархости баргузории мулоқот ва миёнҷигии Макрон дар бӯҳрони сиёсии Беларусро кардааст. Ӯ дар мусоҳиба бо AFP гуфт, ки Беларус ҳоло ба барпо кардани муколамаи миёни ҳукумат ва мухолифон бисёр ниёз дорад, то ки пеши роҳи “хунрезии бештар” гирифта шавад. Макрон рӯзи 28-уми сентябр зимни суханронӣ дар Вилнюс пойфишорӣ кард, ки Аврупо бояд бо Русия дар амри бунёди сулҳ дар Аврупо ҳамкорӣ кунад. Ӯ инчунин аз САҲА хост, ки дар масъалаи Беларус миёнҷигӣ барпо кунад ва гуфт, ки Париж “тамоми талошашро ба харҷ медиҳад, то ки ин миёнҷигӣ шурӯъ шавад”. Ӯ афзуд, ки президенти Русия Владимир Путин аз ин ташаббус пуштибонӣ кардааст. Тихановская, ки дар интихоботи президентии Беларус иштирок карду мағлубшуда эълон шуд, баъди он ба Литва рафт ва фаъолияти худро ба унвони раҳбари мухолифон аз он ҷо идома медиҳад. Тихановская гуфтааст, ки натиҷаҳои интихоботи президентиро, ки Лукашенкоро баранда эълон кардааст, эътироф намекунад.

Рӯзи сеюми даргириҳо дар Қаробоғи Кӯҳӣ

Харитаи Қаробоғи Кӯҳӣ

Даргириҳои миёни нирӯҳои Арманистону Озарбойҷон дар қаламрави минтақаи баҳсии Қаробоғи Кӯҳӣ рӯзи сеюм – 29-уми сентябр ҳам идома дошт ва бо вуҷуди даъватҳои байналмилалӣ барои хатми ҷанг, ҳарду ҷониб ҳамдигарро дар доман задани низоъ гунаҳгор карданд. Дар ҷараёни даргириҳои ахири миёни ду ҷумҳурии Қафқози Ҷанубӣ даҳҳо нафар ҷон додааст. Вазорати дифои Озарбойҷон гуфт, ки низомиёни арманӣ минтақаи Дашкесянро ҳадаф қарор доданд, ин иттиҳомро Ереван ҳамчун “дурӯғи маҳз” рад кард. Дар изҳороти вазорати дифои Озарбойҷон гуфта шуд, ки “шаби 28 ба 29-уми сентябр дар тамоми хати ҷанг даргириҳои тунд идома дошт”. Манзури вазорат хати тамос дар марз аст, ки Арманистону Озарбойҷонро аз ҳам ҷудо мекунад. Вазорати дифои Арманистон гуфт, ки “низоъ бо шиддати гуногун идома дошт”. Қарор аст шоми 29-уми сентябр Шӯрои амнияти СММ ҷаласаи изтирориро барои баррасии ин низоъ барпо кунад, чун хатари ҷалби қудратҳои минтақавии Русияву Туркия ҳам ба миён омадааст. Дар изҳороти муштараки вазирони хориҷаи Бритониёву Канада рӯзи 28-уми сентябр аз “амалиёти васеъмиқёси низомӣ” дар Қаробоғи Кӯҳи изҳори нигаронӣ шудааст.

Полша панҷ шаҳрванди Тоҷикистонро истирдод кард

Варшава, пойтахти Полша

Аз кишвари аврупоии Полша ахиран панҷ шаҳрванди Тоҷикистон бо гумони иртибот бо гурӯҳи тундрави “Давлати исломӣ” истирдод шуданд. Radio Poland навиштааст, ки ин нафарон дар ҷалби шаҳрвандони Полшаву Украина ба амалҳои террористӣ дар қаламрави Полша гумонбар мешуданд. Исми ин шаҳрвандон нашр намешавад.

Вале гуфта мешавад, ки чор шаҳрванди Тоҷикистонро моҳи маи соли ҷорӣ боздошт карданд. Нафари панҷумро дар чаҳорчӯби як амалиёти байналмилалии зиддитеррористӣ дастгир карданд. Ин нафар моҳи декабри соли 2019 аз хоки Полша фирор карда буд. Оҷонсии амнияти дохилии Полша гуфт, ки ин шахс мехост ба Сурия барои ширкат дар ҷиҳод ва барпо кардани робитаҳои хуб бо аъзои созмони террористии марбут ба “Ал-Қоида” сафар кунад. Панҷ шаҳрванди истирдодшудаи Тоҷикистон аз Полша баъди ин ҳақ надоранд, ки ба кишварҳои ҳавзаи Шенген ворид шаванд.

Ин хабар дар ҳолест, ки моҳи апрели соли 2020 полис дар Олмон гуфт, ки чаҳор шаҳрванди Тоҷикистонро бо гумони омодагӣ ба анҷоми амали террористӣ боздошт кард. Тафтишот гуфт, ки нафарони боздоштшуда январи соли 2019 ба узвияти “Давлати исломӣ” шомил шуданд. Дар хабар гуфта шуд, ки онҳо бо раҳбарони созмони террористӣ дар Сурия ва дигар кишварҳо дар тамос буданд. Тафтиши қазияи ин шаҳрвандони Тоҷикистон ҳанӯз анҷом нашудааст.

Сафари сарвазири Узбекистон ба Тоҷикистон

Абдулло Орипов, нахуствазири Узбекистон.

Абдулло Орипов, нахуствазири Узбекистон қабл аз зуҳри сешанбе дар раъси як ҳайати баландпоя вориди пойтахти Тоҷикистон шуд.

Қарор аст имруз дар қароргоҳи ҳукуматӣ дар шаҳри Душанбе ҷаласаи 7-уми Комиссияи байниҳукумати Тоҷикистон оид ба ҳамкориҳои тиҷоратӣ ва иқтисодӣ баргузор шавад. Тибқи иттилои расмӣ, ҳайати Тоҷикистонро дар ин гуфтугӯҳо сарвазир Қоҳир Расулзода раҳбарӣ хоҳад кард.

Рушди ҳамкориҳои иқтисодӣ, тиҷоратӣ, нақлиёт, энерживу кишоварзӣ ва низ фарҳангӣ аз масоили мавриди гуфтугӯи ҷонибҳо хоҳанд буд. Дар назар аст, ки дар чаҳорчӯбаи сафари ҳайати Узбекистон ҳамоишҳои тиҷоратӣ низ баргузор шаванд.

Тоҷикистону Узбекистон ду даҳсолаи ахир ва дар замони раёсати Ислом Каримов муносибати чандон хуб надоштанд. Баъди ба қудрат расидани Шавкат Мирзиёев дар соли 2016 яхи муносибатҳо об шуд ва ҳоло ду ҷониб аз беҳбуди равобит сухан мегӯянд.

Соли 2018 ва пас аз сафари Шавкат Мирзиёев ба Душанбе миёни Тоҷикистону Узбекистон низоми раводид миёни ду кишвар бекор шуда, парвозҳои мустақим оғоз шуд.

Академик Мӯсо Диноршоев даргузашт

Мӯсо Диноршоев.

Мӯсо Диноршоев, файласуфи маъруфи тоҷик, рӯзи 29-уми сентябр дар 86-солагӣ дар шаҳри Душанбе даргузашт. Яке аз наздиконаш ба Радиои Озодӣ гуфт, маросими видоъ бо ӯ соати 12-и рӯзи сешанбе дар маҳаллаи маъруф ба "7-ум километр"-и пойтахт баргузор мешавад.

Мӯсо Диноршоев 7-уми ноябри соли 1934 ба дунё омада, доктори илмҳои фалсафа, академики Академияи илмҳои Тоҷикистон ва дорандаи Ҷоизаи давлатии ба номи Абуалӣ ибни Сино буд.

Ӯ хатмкардаи Донишгоҳи давлатии Тоҷикистон буда, солҳо дар Фарҳангистони улуми Тоҷикистон кор кард ва то мақоми мудири Пажӯҳишгоҳи фалсафа ва муовини президенти Академия расид. Фарзанди ӯ Зарина Диноршоева ҳам аз пайи падар рафта, рисолаи докториашро дар фалсафа дифоъ кардааст.

Ҷазо барои хушунати хонаводагӣ дар Қазоқистон сахттар мешавад 

Хушунати хонаводагӣ. Акс аз бойгонӣ.

Ба иттилои вазорати корҳои дохилии Қазоқистон, дар ҳашт моҳи соли ҷорӣ ниҳодҳои ин вазорат 130 ҳазор ариза дар бораи хушунати хонаводагӣ дарёфт кардаанд.

Дар асоси ин аризаҳо 2,5 ҳазор парвандаи ҷиноӣ ва наздики 30 ҳазор парвандаи маъмурӣ боз шудааст.

Айни замон порлумони Қазоқистон дар садади таҳияи қонунест, ки ҷазои сахттаре барои хушунати хонаводагӣ пешбинӣ мекунад. Вакилон ният доранд, гунаҳкорони хушунати хонаводагиро ба корҳои ҷамъиятӣ ва то 20 рӯзи ҳабс ҷалб кунанд. Бино ба ин қонун, пулис вазифадор мешавад, ки ҳатто дар асоси хабарҳои шабакаҳои иҷтимоӣ ба хушунати хонаводагӣ вокуниш нишон диҳад.

Эҳтимол дорад, қонун ҳамчунин иҷозат диҳад, ки пулис омилони хушунатро барои 30 рӯз аз дидор бо ҳамсарону фарзандон маҳрум кунанд. Ин меъёр барои касоне қабул шудааст, ки аз тарси cабабгор ё омили хушунат, наметавонанд ба мақомоти қудратӣ муроҷиат кунанд

Узбекистон маҳдудияти содироти тилоро бекор кард

Аз ин ба баъд шахсони воқеӣ метавонанд, бидуни маҳдудият аз Узбекистон хишт ва тангаҳои тилову дигар металҳои гаронбаҳоро ба берун баранд.

Вазорати адлияи Узбекистон хабар дод, ки президенти он кишвар рӯзи 27 сентябр фармон "Дар бораи такмили танзими гардиши металҳои гаронбаҳо"-ро имзо кард.

Бино ба ин фармон, шахсони воқеӣ метавонанд, бидуни маҳдудияти миқдор аз Узбекистон хишт ва тангаҳои тилову дигар металҳои гаронбаҳои Бонки марказиро ба хориҷ баранд.

Барои ин амал танҳо санади Бонки миллӣ, вазорати молия ва Кумитаи давлатии гумруки Узбекистон лозим аст.

Фармони президенти Узбекистон ҳамзамон барҳамдиҳии Оҷонсии металҳои гаронбаҳо ва таъсиси Хадамоти ҳифз ва кор бо металҳои гаронбаҳоро пешбинӣ мекунад.

Эрдуғон гуфт, Арманистон бояд "фавран" Қарабоғро тарк кунад

Раҷаб Таййиб Эрдуғон, раиси ҷумҳури Туркия.

Президенти Туркия Раҷаб Эрдуғон 28 сентябр аз Арманистон талаб кард, ки "заминҳои ишғолкардаи Озарбойҷонро фавран тарк кунад". Зеро ба гуфтаи ӯ, ин амал роҳро ба сӯи сулҳу субот дар минтақа боз мекунад.

"Замони ҳалли буҳрони минтақа, ки бо ишғол шудани Қарабоғи Куҳӣ аз сӯи Арманистон оғоз шуд, фаро расидааст. Сабри Озарбойҷон низ лабрез шуда, Боку бо нерӯи худ ба ишғоли арманӣ нуқта мегузорад", - иқтибос овардааст хабаргузории расмии Туркия -- "Anadolu" аз сӯханҳои Раҷаб Эрдуғон.

Вай афзуд, ки "Туркия дастгирии Озарбойҷони дӯсту бародарро идома медиҳад".

Пештар Вазорати умури хориҷӣ ва президенти Арманистон низ гуфтанд, ки Туркия дар баробари фишори дипломативу "таблиғотӣ" дар низои Қарабоғи Куҳӣ ба Озарбойҷон кӯмаки низомӣ мерасонад.

"Узви НАТО -- Туркия ба Озарбойҷон тавассути дронҳо, ҳамлаҳои киберӣ, мушовирон, зархаридон ва ҳатто зарбазанҳои F-16 кӯмак мекунад", - изҳор дошт президенти Арманистон Армен Саркисян дар конфронси онлайнии форуми Cybersec 2020, ки дар шарикӣ бо НАТО баргузор мешавад.

Раҳбари Қарабоғи Куҳии ҷудоиталаб Араик Арутюнян низ дар бораи ҷалб шудани Туркия ба низои минтақа хабар дода буд.

Арманистон баъди изҳороти Арутюнян Туркияро ба он айбдор кард, ки "ҳудуди 4 ҳазор ҷангиро аз ноҳияҳои шимолии Сурия ба Озарбойҷон интиқол додааст". Мақомоти турк ин хабарро тасдиқ накарданд.

Ба гузориши хабаргузории "Ройтерз", мақомоти Қаробоғи Куҳӣ рӯзи якшанбе эълом карданд, ки бар асари ҳамлаҳои ҳавоӣ ва мушакборони Озарбойҷон, 16 хизматчии ҳарбӣ кушта ва беш аз 100 нафар захмӣ шудаанд. Озарбойҷон ҳам мегӯяд, ки бар асари ҳамлаҳои ҷониби Арманистон панҷ узви як хонавода ҷон бохтаанд. Ҳам дар Арманистону Қарабоғи Кӯҳӣ ва ҳам дар Озарбойҷон ҳолати ҷангӣ эълон шудааст.

Сафирони Тоҷикистон дар Афғонистон, Украина ва Ҳинд нав шуданд

Бинои Вазорати умури хориҷии Тоҷикистон.

Эмомалӣ Раҳмон бо судури чанд фармон, сафирони Тоҷикистон дар се кишварро аз мақом барканор намуда, афроди навро ҷойгузини онҳо намудааст.

Дафтари матбуоти раёсати ҷумҳури Тоҷикистон рӯзи 28-уми сентябр иттилоъ дод, ки Саъдӣ Шарифӣ, Давлаталӣ Назризода ва Луқмон Бобокалонзода сафирони Тоҷикистон дар Афғонистон, Украина ва Ҳиндустон таъйин шуданд.

Ба асоси фармонҳои дигари президент, Шарофиддин Имом, Файзулло Холбобоев ва Султон Раҳимзода аз симати сафирӣ дар Афғонистон, Украина ва Ҳиндустон озод шудаанд.

Дар фармонҳо сабаби барканории Шарофиддин Имом "баромадан ба нафақа" ва аз Файзулло Холбобоев ва Султон Раҳимзода "ба кори дигар гузаштан", гуфта шудааст. То ба ҳол маълум нест, ки Файзулло Холбобоев ва Султон Раҳимзода дар кадом мақом ба фаъолияти худ идома хоҳанд дод.

Дафтари матбуоти раёсати ҷумҳури Тоҷикистон ҳамчунин иттилоъ додааст, ки полковник Ҳасан Сатторзода сардори Раёсати разведкаи Горди миллии Тоҷикистон таъйин шудааст. Горди миллӣ ниҳоди низомие аст, ки тобеи раёсати ҷумҳурӣ мебошад ва муҳофизати иншоотҳои муҳими кишвар аз ҷумлаи масъулиятҳои он ба шумор меравад.

ВКХ Тоҷикистон ба  ҳалли дипломатии низоъ дар Кӯҳистони Қаробоғ даъват кард

Ҳамлаҳои низомӣ ба самти Қаробоғи Кӯҳӣ

Вазорати умури хориҷаи Тоҷикистон бо пахши изҳороте аз “задухӯрди низомӣ байни Озарбойҷон ва Арманистон амиқан изҳори нигаронӣ” кард. Изҳороти вазорат шоми 28-уми сентябр дар вебсайти расмии ин ниҳод нашр шуд.

Дар он аз ҳама ҷонибҳои даргир даъват шудааст, ки амалиёти низомиро хотима бидиҳанд. Мақомоти тоҷик гуфтаанд, ки “ҳалли низоъ дар Кӯҳистони Қаробоғ танҳо бо роҳҳои сиёсиву дипломатӣ имконпазир аст”. Дар идома омадааст, ки “Тоҷикистон аҳамияти истисноии ҳалли мусолиматомези ихтилофоти мавҷударо дар чаҳорчӯби меъёрҳои пазируфтаи байналмилалӣ таъкид менамояд”.

Ду рӯзи охир дар минтақаи баҳсии Қаробоғи Кӯҳӣ задухӯрди мусаллаҳонаи нирӯҳои Озарбойҷону Арманистон идома дорад. Ҳарду ҷониб ҳамдигарро дар истифодаи силоҳҳои сангин ва даҳҳо кушта, аз ҷумла талафот дар миёни афроди мулкӣ гунаҳгор карданд. Баҳси атрофи Қаробоғи Кӯҳӣ решаҳои амиқу дерина дорад, вале дар чор соли ахир ин низоъ сангинтарин ба ҳисоб меравад ва эҳтимоли ба баҳс кашида шудани қудратҳои минтақавии мисли Туркия ва Русия низ ба вуҷуд омадааст. Рӯзи аввали низоъ 27-уми сентябр ҳарду ҷониб чархболу ҳавопаймоҳои бесарнишин, тонку тӯпхонаҳоро ҷалб карданд.

Рӯзи 28-уми сентябр президенти Озарбойҷон Илҳом Алиев ҳолати ниманизомӣ ҷорӣ кард. Боку гуфт, ки дар ду рӯзи гузашта дар маҷмӯъ шаш шаҳрванди мулкии Озарбойҷон, аз ҷумла панҷ узви як хонавода кушта ва 19 нафар маҷрӯҳ шуданд. Мақомот дар Қаробоғи Кӯҳӣ, минтақаи ҷудоиталабе, ки аксар сокинонаш арманитабор мебошанд, гуфтанд, ки дар низоъҳои рӯзи 27-уми сентябр дар маҷмӯъ ду мулкӣ ва 32 низомиаш кушта шуданд. Онҳо гуфтанд, ки дар ҳамлаҳои заминиву ҳавоӣ беш аз 100 нафари дигар маҷрӯҳ шуданд.

Ереван гузориш дод, ки шаби гузашта ҳам оташи силоҳ хомӯш нашуд ва Боку гуфт, ки нирӯҳои арманӣ шаҳраки Тертерро ҳадаф қарор доданд. Вазорати дифои Арманистон дар изҳороте гуфт, ки “шабонгоҳ даргирии шадиде” гузашт. Вазорати дифои Озарбойҷон рӯзи 28-уми сентябр бо пахши изҳороте гуфт, “нирӯҳои мусаллаҳи Арманистон шаҳри Тартарро гулӯлаборон карданд”. Тартар дар ҳамсоягии Қаробоғи Кӯҳӣ ҷойгир аст.

Светлана Алексиевич бо ҳадафи муолиҷа ба Олмон сафар кард

9-уми сентябр, Светлана Алексиевич дар ҳалқаи сафирони Иттиҳоди Аврупо дар Минск

Барандаи ҷоизаи сулҳи Нобел нависандаи беларусӣ Светлана Алексиевич, ба қавли як дӯст ва ёвараш, бо ҳадафи муолиҷа ба Олмон сафар кард. Сафари ӯ дар пасманзари эътирозҳои идомаёбанда бар зидди Александр Лукашенко сурат мегирад. Алексиевич як узви президиуми Шӯрои ҳамоҳангсози мухолифони Беларус аст, ки бо ҳадафи барпо кардани муколама бо ҳукумат барои интиқоли сулҳомези қудрат баъди интихоботи, ба қавли мухолифон, тақаллубшудаи президентӣ ташкил шудааст. Мария Войтешонок, як дӯсти Алексиевич ба AFP гуфт, ки ӯ дар чаҳорчӯби як сафари аз пеш барномарезишуда сафар кард. “Ӯ давоми як моҳ ба Беларус бармегардад. Ӯ фаъолиятҳои худро ба ҳайси як узви Шӯрои ҳамоҳангсоз канор нагузошааст”, гуфт Войтешонок. Ӯ афзуд, ки қарор аст Алексиевич инчунин ба Итолиё сафар кунад, ки дар он ҷо ба ӯ як ҷоизаи адабиро тақдим кардаанд. Як ёвари нависандаи маъруф ба Reuters гуфт, ки сафари ӯ ба сиёсат ҳеҷ рабте надорад ва ӯ нақша дорад, ки ба ватан баргардад. Ӯ гуфт, ки бо ҳадафи муолиҷа ба Олмон рафтааст. Баъди шаш ҳафта эътирозҳо аз натиҷаҳои интихоботи президентии Беларус Алексиевичи 72-сола ягона узви Шӯрои ҳамоҳангсоз буд, ки дар Беларус дар озодӣ ба сар мебурд. Рӯзи 27-уми сентябр ҳам садҳо ҳазор сокини Беларус ба хиёбонҳо рехта аз Лукашенко талаб карданд, ки ба истеъфо равад.

Маҳбуси фирории тоҷик дар Русия боздошт шудааст

Як боздоштшуда дар яке аз зиндонҳои Русия. Акс аз бойгонӣ

Як ҷавони 23 солаи зодаи Тоҷикистон, ки аз зиндони рақами 17‑уми шаҳри Сургути Русия фирор карда буд, боздошт шудааст.

Дар ҳафтаи охир бори дуввум аст, ки шаҳрвандони Тоҷикистон аз зиндонҳои Русия фирор мекунанд.

Рӯзи 28-уми сентябр дар маъмурияти маҳбаси 17-уми шаҳри Сургут дар суҳбат ба Радиои Озодӣ гуфтанд, шаҳрванди Тоҷикистон ҳангоми гаштугузор дар мавзеи ҳавохӯрӣ, оҳани панҷараи болои онро қаҷ карда ва аз сӯрохии ба вуҷуд омада фирор кардааст.

Ҳамсуҳбати Радиои Озодӣ дар маъмурияти ин зиндон аз ифшои ному насаби шаҳрванди Тоҷикистон худдорӣ варзид ва танҳо гуфт, ӯ ҷавони 23 сола буда, бо ҷурми "ғоратгарӣ" маҳкум шудаааст. Дар ин маҳбас ҳамагӣ ду ҳафта қарор доштааст.

Ба навиштаи расонаҳои маҳалии шаҳри Сургут ӯро пас аз як рӯзи фирор аз зиндон дар наздикии бозори "Аскания"-и ин шаҳр боздошт намуданд.

Бар зидди ӯ бо ҷурми фирор аз зиндон парванда боз шуда то чор соли зиндон таҳдид мекунад.

Рӯзи 22-уми сентбяр Вазорати корҳои дохилии Доғистони Русия хабар дода буд, ки ду нафар аз зиндониёни фирорӣ аз маҳбаси мавзеи Шамхали шаҳри Махачқалъа шаҳрвандони Тоҷикистон будаанд. Аз онҳо Шамил Бойматов ва Маҳмадрасул Машрабов ном бурда мешавад. Амалиёти ҷустуҷӯи зиндониёни фирорӣ идома дорад ва мақомот барои маълумоте дар бораи макони будубоши ин нафарон 1 миллион рубл подош ваъда карданд.

Ҳомиёни ҳуқуқи муҳоҷирон боздошти муҳоҷирони тоҷик бо ҷурмҳои гуногунро ҳамеша зери суол мебаранд. Онҳо мегӯянд, парвандаи онҳо одилона таҳқиқ намешавад.

Аз ҷумла, Каримҷон Ёров, ҳуқуқшиноси тоҷик дар Русия гуфта буд, ки бештари муҳоҷирон ба адвокат дастрасӣ надоранд ва додгоҳҳо бидуни далелҳои собит нисбати онҳо ҳукм содир мекунанд.

Зиндониёни тоҷик аз шароити сахти зиндонҳои Русия низ шикоят мекунанд. Соли гузашта чанд маҳбуси тоҷик дар зиндони Мордовияи Русия даст ба худкушӣ зада буданд. Пайвандонашон ба Радиои Озодӣ гуфта буданд, ки шиканҷа ва фишор боиси қасди худкушӣ шудааст.

Ҳомиёни ҳуқуқ мегӯянд, эҳтимол далели фирори зиндониёни тоҷик низ ноадолатӣ дар баррасии парвандаҳо ва фишор бошад.

Тибқи омори Сарраёсати иҷрои ҷазои ҷиноии Русия ё ФСИН дар ин кишвар то оғози соли 2020 беш аз 7 ҳазор шаҳрванди Тоҷикистон адои ҷазо мекардаанд. Аз миёни шаҳрвандони хориҷӣ, ки дар Русия дар зиндон афтодаанд, шумораи тоҷикон аз ҳама зиёд аст.

Ангела Меркел бо Алексей Навалний дар беморхона дидор кардааст

Ангела Меркел, садри аъзами Олмон

Нашрияи олмонии Der Spiegel навишт, ки садри аъзами Олмон Ангела Меркел дар беморхона дар шароити махфӣ аз ҳоли раҳбари мухолифони Русия Алексей Навалний хабар гирифтааст. Хабарнигорон навиштанд, ки бо чунин амалаш Меркел пуштибонии ҳукумати Олмонро аз ин раҳбари мухолифон баён намуд. Ҷузъиёти ин дидор нашр намешавад ва дар дафтари нахуствазири Олмон ҳам хабарро шарҳ надоданд. Рӯзи душанбе худи Навалний ҳам тасдиқ кард, ки Меркел ба дидани ӯ омада буд. Ӯ дар Твиттераш бо изҳори сипос аз Меркел навишт: “Мулоқот барпо шуд ва намешавад гуфт, ки он махфӣ буд. Ин мулоқот бештар хусусияти сӯҳбати оилавиро дошт”. Навалний давоми 32 рӯз дар беморхонаи “Шарите”-и Берлин муолиҷа шуд ва таҳқиқоти озмоишгоҳҳои аврупоӣ гуфтанд, ки ӯро бо заҳри навъи “Новичок” заҳролуд кардаанд. Ғарбу Аврупо гуфт, ки дар пушти ин ҳодиса метавонад Кремлин истода бошад, вале Маскав ин ҳама иттиҳомотро рад карда аз роҳандозии тафтишоти ҷиноии ҳодиса худдорӣ кард.

Натиҷаҳои экзит-поли Руминия аз пирӯзии Ҳизби миллии либералии нахуствазир гувоҳӣ медиҳад

Тибқи пешбиниҳо, Никусор Дан дар интихоботи ахири маҳаллии Руминия ғалаба карда шаҳрдори нави Бухарест мешавад

Ҳизби ҳокими марказгаро бо номи Ҳизби миллии либералии Руминия иддао кард, ки дар интихоботи маҳаллии ин кишвари аврупоӣ пирӯз шудааст. Дар ин бора натиҷаҳои экзит-пол ё натиҷаҳои овоздиҳии ҳамзамони баъдиинтихоботии рӯзи 27-уми сентябр гувоҳӣ медиҳад. Дар интихоботи рӯзи якшанбе 19 миллион шаҳрванди қобили раъйи Руминия 43 ҳазор мақомдорони ҳукуматҳои маҳаллии кишварро интихоб карданд. Нахуствазир Людовик Орбан интихоботи гузаштаро “пирӯзии тоза” дар муқобили сотсиал-демократҳои рақибашон номид. Агар натиҷаҳои назархоҳӣ дуруст бошад, пас барои сотсиал-демократҳо, ки аз соли 2008 бартарӣ доштанд, аз даст додани Бухарест як шикасти ҷиддӣ ба ҳисоб меравад. Дар ин овоздиҳӣ математик ва фаъоли ҷамъиятӣ Никусор Дан аз шаҳрдор Габриэла Фиреа пеш гузашт.

Оилаи Пёрл бо ҳукми додгоҳи Покистон розӣ нест

Аҳмад Умар Саидшайх дар беруни додгоҳи Карочӣ. Марти соли 2020

Додгоҳи олии Покистон қарор аст дар мурофиаи рӯзи 28-уми сентябр шикояти оилаи журналисти соли 2002 кушташудани амрикоӣ Даниэл Пёрлро ба баррасӣ гирад. Оилаи журналисти нашрияи "Wall Street Journal” бо қарори сафед кардани марди гумонбар дар куштор розӣ нест. Моҳи апрели соли ҷорӣ додгоҳе дар Покистон ҳукми Аҳмад Умар Саидшайх, як покистонии таваллудшуда дар Бритониёро, ки барои қатли Пёрл ба мӯҳлати тӯлонии зиндон маҳкум шуд, то 7 сол коҳиш дод. Вашингтон он замон ҳукми бозбинишудаи Саидшайхро “таҳқири қурбониҳои терроризм” номид. Оилаи Пёрл дар остонаи мурофиаи додгоҳӣ гуфт, ки ҳукми додгоҳи Покистон ҷангҷӯёнро дар саросари ҷаҳон дилгарм мекунад. Пёрл 38 сол дошт ва раиси бюрои Осиёи Ҷанубии нашрияи Wall Street Journal буд. Ӯ соли 2002 дар Карочӣ, замоне, ки дар бораи ҷангҷӯёни исломӣ гузориши таҳқиқотӣ анҷом медод, рабуда шуд.

Абдулло Абдулло бо сафари серӯза ба Покистон рафт

Покистон, доктор Абдуллоҳро мақомоти покистонӣ пешвоз гирифтанд

Абдулло Абдулло, раҳбари калони гурӯҳи музокиротии ҳукумати Афғонистон бо Толибон рӯзи 28-уми сентябр бо як сафари серӯза вориди Покистон шуд. Музокирот бо Толибон, ки дар шаҳри Давҳаи Қатар шурӯъ шудааст, бо сабаби номуайян будани чаҳорчӯби музокираҳо дар амри хатми ҷанги 19-солаи Афғонистон масдуд шудааст. Покистон як ҳамсояи Афғонистон ва бозигари калидии минтақавӣ ба ҳисоб меравад. Доктор Абдулло бо нашри изҳороте дар Твиттер гуфт, ки ният дорад бо раҳбарияти Покистон ҷараёни сулҳи Афғонистонро баррасӣ кунад. Муносибатҳои Афғонистону Покистон ҳамвору осон набуд, чун Кобул ва Вашингтон Исломободро дар паноҳ додан ба раҳбарияти Толибон гунаҳгор кардаанд, вале Покистон ин иттиҳомҳоро ҳамеша рад кардааст. Покистон мегӯяд, ки нуфузи ин кишвар ба Толибон бисёр вақт аз буда бештар нишон дода мешавад, вале мегӯяд, ки омода аст барои сулҳи Афғонистон ҳама талошро ба харҷ диҳад. Музокира бо Толибон дар чаҳорчӯби созиши сулҳи Вашингтон ва гурӯҳи шӯришӣ ҷараён мегирад, ки моҳи феврали имсол имзо шуд.

Ёфтҳои бештар

XS
SM
MD
LG