Пайвандҳои дастрасӣ

Хабари нав

Дар чанд ҷумла

Нишасти вазирони молияи G-8 оғоз шуд

Раиси ҷумҳури Амрико Ҷорҷ Буш ва вазирони ҳафт кишвари санъатии пешрафтаи ҷаҳон имрӯз дар шаҳри Вашингтон гуфтугӯҳо барои раҳоӣ аз бӯҳрони молии ҷаҳониро оғоз карданд. Пеш аз ин мулоқот вазирони молияи кишварҳои узви гурӯҳи G-7, ки, Фаронса, Амрико, Канада, Ҷопон, Олмон, Итолиё ва Бритониёнро ба ҳам меорад, қавл доданд, ки бо андешидани «иқдомоти қотеъ ва истифодаи тамоми имконоти мавҷуд” муассисаҳои азими молиро ҳимоят ва гардиши қарзро эҳё мекунанд, то тӯфони молӣ ва вазъи иқтисодии ҷаҳонӣ бадтар нашавад. Ҷорҷ Буш, ки дар паҳлӯи вазирони молия меистод, ба хабарнигорон гуфт, тамоми кишварҳои ҳозир дар нишаст, талошҳои қотеъашон барои бозгардонидани иқтисодҳояшон ба роҳи субот ва рушди дарозмуддати иқтисодӣ идома хоҳанд дод: "

Мо медонем, ки талотум дар бозорҳои молӣ ба тамоми шаҳрвандони мо осеб мерасонад. Дуруст аст, ки шаҳрвандони мо аз ин бӯҳрон дар ташвишанд. Мо инро дарк мекунем ва дар расидагӣ ба бӯҳрони молӣ, мо воқеъан ба мардум кӯмак мекунем, то ояндаи беҳтаре дошта бошанд. Ва ҳамаи мо дар мекунем, ки ин бӯҳрони ҷиддии ҷаҳонист ва аз ин рӯ ба хотири хубии мардуми ҳамаи мо вокуниши ҷиддии ҷаҳонӣ мехоҳад."

Нишасти вазирони кишварҳои узви Гурӯҳи Ҷи 7 дар остонаи ҳамоиши солонаи Сандуқи байналмилалии пул ва Бонки Ҷаҳонӣ баргузор шуд, ки аз 11 то 13 октябр дар Вашингтон идома мекунад.


Ҳамаи хабарҳои имрӯзро дар инҷо бихонед

Вокунишҳо аз берун ба ҳодисаҳои Хоруғ

Хоруғ, 16-уми майи 2022

Намояндаи Кумитаи норвежии Ҳелсинкӣ аз мақомоти Тоҷикистон хостааст, эътирозҳои сулҳомезро дар Вилояти Мухтори Кӯҳистони Бадахшон саркӯб накунанд.

Мариус Фассум рӯзи 17-уми май дар саҳифааш дар Твиттер навишт, “мақомот дар Тоҷикистон бояд ҳуқуқ ба гирдиҳамоии осоиштаро эҳтиром карда, амнияти тазоҳургарони осоиштаро дар Хоруғ замонат бидиҳанд ва саркӯби шадиди ҳаракати эътирозии осоиштаро фавран қатъ кунанд.”

Ду созмони мухолифини тоҷик дар Аврупо низ бархурди намояндагони мақомотро бо эътирозгарон дар Хоруғ накӯҳиш кардаанд.

Паймони миллӣ, эътилофи чаҳор созмони мухолифин, ки фаъолияташ дар Тоҷикистон мамнуъст, бо нашри изҳороте истифода аз силоҳ ва саркӯби тазоҳургаронро дар Хоруғ шадидан маҳкум намуд.

Кумитаи шаҳрвандии наҷоти гаравгонҳо ва зиндониёни сиёсии Тоҷикистон, қароргоҳаш дар Варшава, низ 17-уми май дар пайванд ба вазъияти Бадахшон “нигаронии амиқи худро” изҳор дошт.

Ҳарду созмон аз “кишварҳои дӯст ва созмонҳои таъсиргузор” хостаанд, “аз куштор ва саркӯби мардум дар Бадахшон пешгирӣ ва барои расидан ба хостҳои қонунии онҳо мусоидат кунанд”.

Рӯзи 16-уми май дар шаҳри Хоруғ гуруҳе аз сокинон эътироз карданд. Мақомот онро бидуни иҷоза ва ғайриқонунӣ дониста, бо истифода аз гази ашковару тирҳои резинӣ пароканда карданд.

Дар ин ҳодиса як сокини маҳаллӣ кушта ва ба иттилои арсмӣ се афсари милиса захмӣ шудаанд. Сокинон мегӯянд, дар миёни мардуми одӣ низ маҷруҳон ҳастанд.

Президенти Радиои Озодӣ ҳамла ба хабарнигоронро дар Душанбе маҳкум кард

Ҷейми Флай

Президенти Радиои Аврупои Озод/Радиои Озодӣ ҳамлаҳои ҷудогона ба хабарнигорони Радиои Озодӣ ва телевизиони “Настояшее Время”-ро дар Душанбе шадидан маҳкум кард.

Ҷейми Флай рӯзи 17-уми май дар изҳороте гуфт, “борҳо аз мақомоти Тоҷикистон хостем, ки фишорро алайҳи расонаҳои озод бас кунанд.”

“Бори охир, моҳи феврали имсол, дар номае ба вазири корҳои хориҷии Тоҷикистон Сироҷиддин Муҳриддин дар бораи ҳолатҳои аз парвонаи кор маҳрум шудан, озор ва таҳдидҳо ба зидди хабарнигорони Радиои Озодӣ муфассал навишта будам,” – афзудааст ӯ.

Президенти Радиои Озодӣ мегӯяд, “вақти он расида, ки ҳукумати Тоҷикистон кӯшиши халалдор кардани гузоришдиҳии мустақилро, ки ба нафъи мардуми тоҷик аст, бас кунад.”

Шахсони ношинос рӯзи 17-уми май ба хабарнигорону наворбардорони Радиои Озодӣ ва телевизиони "Настояшее Время" дар Душанбе ҳамла карда, дастгоҳи наворгирӣ ва телефонҳояшонро кашида гирифтанд.

Ҳодиса баъди он рӯй дод, ки хабарнигорон барои гирифтани шарҳи Улфатхонум Мамадшоева, яке аз фаъолони ҷомеаи мадании Бадахшон, ба хонааш дар пойтахт рафтанд.

Вазорати корҳои дохилии Тоҷикистон 17-уми май ӯро дар қатори Маҳмадбоқир Маҳмадбоқиров ва Алим Шерзамонов ба ташкили эътирози 16-уми май дар Хоруғ, ки дар натиҷа як нафар кушта ва чандин кас захмӣ шуданд, айбдор кард.

Ҳамлаварон нагуфтаанд, кӣ ҳастанд ва чӣ мехоҳанд, аммо ба қавли ҳамкорони мо, “журналистонро хуб мешинохтанд ва ҳадафмандона дурбину телефонҳоро мехостанд”.

Дар умум, ба иттилои хабарнигорони Радиои Озодӣ ва “Настояшее Время” аз онҳо ҳафт телефон ва як дастгоҳи наворгириро гирифтаанд. Мақомот то ҳанӯз дар ин бора хабаре надоданд.

Пас аз як рӯзи эътироз. Дар маркази Бадахшон чӣ гузашт? ВИДЕО

Хоруғ пас як рӯзи эътироз
лутфан мунтазир бошед
Embed

Феълан кор намекунад

0:00 0:02:58 0:00

Бино ба хабарҳои дарёфтӣ, гуруҳе аз занон рӯзи 17-уми май хостаанд, дар майдони марказии Хоруғ ҷамъ шаванд, аммо низомиён бо истифода аз гази ашковар пароканда кардаанд.

Ба сабаби он ки пас аз эътирози 16-уми май интернет дар вилояти Бадахшон дастнорас шуда, хатти телефон мушкил пайдо кардааст, гирифтани аксу навор муяссар нашуд. Мақомот чизе намегӯянд.

Манобеи Радиои Озодӣ гуфтанд, 17-уми май дари аксар идораву мактабҳо баста буда, Далер Ҷумъа, вазири энергетика ва захираҳои оби Тоҷикистон, дар раъси як ҳайат ба Хоруғ рафтааст. Ӯ дар нооромиҳои моҳи ноябри соли гузашта дар Роштқалъаву Хоруғ низ дар мулоқот бо мардум иштирок дошт.

“Низомиён мошинҳоеро, ки имрӯз аз Душанбе ба Хоруғ расиданд, дар назди фурудгоҳ дошта, ба дохили шаҳр роҳ надоданд,” – гуфт як ҳамсуҳбати мо дар Хоруғ, ки нахост номаш зикр шавад.

Мақомот дар Бадахшон ба зангҳои мо посух намедиҳанд. Вазорати корҳои дохилии Тоҷикистон рӯзи 17-уми май гуфт, дар эътирози як рӯз пеш дар Хоруғ як сокини маҳаллӣ кушта ва се маъмури милиса захмӣ шудаанд.

Сокинон мегӯянд, дар бархӯрди мақомот бо эътирозгарон, ки аз гази ашковару тирҳои резинӣ истифода шудааст, чандин нафар маҷруҳ шуданд, вале мақомот чизе нагуфтанд.

Ин ҳодиса пас аз он рӯй дод, ки мақомот баррасии чанд талаби сокинони норозӣ, аз ҷумла дар бораи истеъфои ду мансабдори маҳаллиро напазируфтанд.

Вазъият дар Бадахшон аз моҳи ноябри соли 2021 ба ин сӯ печида аст.

Тоқаев ба Путин гуфт, Нурсултон ҳампаймони Маскав мемонад

Қосимҷомарт Тоқаев ва Владимир Путин

Президенти Қазоқистон Қосимҷомарт Тоқаев рӯзи 16-уми май дар мулоқот бо президенти Русия Владимир Путин дар Кремл гуфт, “ҳеҷ асосе барои нигаронӣ дар мавриди ҳамкориҳои тиҷориву иқтисодӣ ва сиёсӣ миёни кишварҳои мо вуҷуд надорад".

"Русия барои Қазоқистон шарики калидӣ дар бахши тиҷорату иқтисод аст. Бинобар ин, ман дар назди ҳукумати Қазоқистон вазифа гузоштам, ки на танҳо ин сатҳи ҳамкорӣ, табодули мол ва сармоягузорӣ нигаҳ дошта шавад, балки сарфи назар аз ҳама мушкилот ва воқеиятҳои муосири геополитикӣ ҳамкориҳо тавсеа бахшида шаванд", - изҳор доштааст Тоқаев.

Ба огаҳии Кремл, Путин дар вохӯрӣ бо Тоқаев хабар додааст, ки ширкатҳои русӣ дар Қазоқистон 17 миллиард доллари амрикоӣ сармоягузорӣ кардаанд.

Ба гуфтаи ӯ, вазъ дар умум сарфи назар аз мушкилоти пешомада дар ҳоли рушд аст, “аммо бо вуҷуд, “миёни ду кишвар дар бахши амният масъалаҳое ҳастанд, ки бояд дар доираи Созмони Паймони Амнияти Дастаҷамъӣ баррасӣ шаванд.

Улфатхонум Мамадшоева ба изҳороти ВКД вокуниш кард

Улфатхонум Мамадшоева

Улфатхонум Мамадшоева, яке аз фаъолони ҷомеаи шаҳрвандии Вилояти Мухтори Кӯҳистони Бадахшон, ки мақомот ӯро ба ташкили эътирозҳо дар Хоруғ айбдор донистанд, вокуниш кард.

Ӯ рӯзи 17-уми май дар изҳороти кӯтоҳе дар Фейсбук навишт, "ҳомии ҳуқуқ ва рӯзноманигори мустақил аст" ва афзуд, "ба ҷуз виҷдони пок ва дилсӯзӣ нисбат ба мардуми кӯчаки худ – помириҳо – гуфтании дигар надорам."

Вазорати корҳои дохилии Тоҷикистон дар нооромиҳои 16-уми май дар Хоруғ дар баробари Маҳмадбоқир Маҳмадбоқиров, яке аз сарони ғайрирасмии Бадахшон ва Алим Шерзамонов, муовини раиси созмони дар Тоҷикистон мамнӯи Паймони миллӣ, Улфатхонум Мамадшоева, фаъоли ҷомеаи шаҳрвандиро низ айбдор кард.

Изҳороти вазорат дар шабакаҳои иҷтимоӣ бо вокунишҳои зиёд рӯбарӯ шуд. Хабарнигори тоҷик, Рамзия Мирзобекова, дар Фейсбук навишт, Улфатхонум Мамадшоева бештар ҷонибдори муколама аст ва гузашта аз ин "беш аз як ҳафта боз дар Душанбе аст".

Дар ҳодисаи 16-уми май дар Хоруғ, ба иттилои расмӣ, як сокини маҳаллӣ кушта ва се афсари пулис захмӣ шудаанд. Сокинон мегӯянд, аз ҳисоби мардуми одӣ низ чандин нафар маҷруҳ шудаанд, вале мақомот аз онҳо ном набурданд.

Нооромӣ пас аз он сар зад, ки як гуруҳ аз эътирозгарон баъди иҷро нашудани талабҳояшон (аз мансаб рондани раиси вилояти Бадахшону раиси шаҳри Хоруғ, таҳқиқи одилонаи марги Гулбиддин Зиёбеков ва раҳоии боздоштшудаҳо) аз сӯи мақомот аз маҳаллаи Бархоруғ ба маркази шаҳри Хоруғ раҳсипор буданд. Онҳо дар роҳ, дар маҳаллаи Чинак, бо сафи нерӯҳои интизомӣ рӯбарӯ гаштанд. Дар ин ҳодиса аз гази ашковар ва тирҳои резинӣ истифода шудааст.

Як шаҳрванди Австралия дар Тоҷикистон марафони дав баргузор мекунад

Мина Гули, шаҳрванди Австралия, тасмим гирифтааст, дар Тоҷикистон бахшида ба Даҳсолаи байналмилалии амал “Об барои рушди устувор” (солҳои 2018-2028) ва Конфронси Созмони Милали Муттаҳид оид ба об дар соли 2023 марафони дав баргузор кунад, хабар медиҳад сомонаи Кумитаи миллии олимпии Тоҷикистон.

Ба иттилои манбаъ, муҳлати марафони дав дар Тоҷикистон аз 15-ум май то 10-уми июнро дар бар мегирад. Дар ин муддат Мина Гули дар 11 марафони дав 458,2 километрро тай карда, аз захираҳои оби Тоҷикистон, аз ҷумла кӯли Сарез, пиряхи Федченко, неругоҳҳои барқи обии “Роғун” ва “Норак” ва маконҳои сайёҳии Тоҷикистон дидан мекунад ва дар Конфронси 2-юми байналмилалии сатҳи баланд оид ба Даҳсолаи байналмилалии амал “Об барои рушди устувор”, солҳои 2018-2028 (6-8-уми июн) ширкат меварзад.

Мина Гули ва ҳамроҳонашро 15-уми май дар сарҳади Тоҷикистон бо Узбекистон дар шаҳри Панҷакент масъулони Вазорати энержӣ ва захираҳои об, Вазорати нақлиёт, Кумитаи миллии олимпии Тоҷикистон, Кумитаи рушди сайёҳӣ ва мақомоти иҷроияи ҳокимияти давлатӣ дар шаҳри Панҷакент истиқбол карданд.

Субҳи 16-уми май марафони аввали шаҳрванди Австралия дар Тоҷикистон дар самти Панҷакент – Айнӣ – Душанбе, дар масофаи 42 километр, оғоз гардид.

Мина Гули як зани тоҷири австралиягӣ буда, дар бахши муҳити зист фаъол аст. Мудири кулли Бунёди “Thirst” («Ташнагӣ») мебошад, ки дар самти таблиғи сарфаи об фаъолият мекунад.

Мина Гули дар канори шаҳри Мелбурни Австралия таваллуд шудааст ва дар Донишгоҳи Мелбурн таҳсил кардааст. Соли 1993 президенти Иттифоқи донишҷӯёни Донишгоҳи Монаш интихоб шудааст.

Пас аз хатми мактаб дар бахши хусусии соҳаҳои энержӣ ва инфрасохтор ба ҳайси ҳуқуқшинос кор кардааст. Соли 1999 дар биржаи фючерсҳои Сидней, дар рушди бозорҳои партобҳои карбон дар Австралия иштирок кардааст. Соли 2002 аз ӯ хоҳиш карданд, ки ба Бонки ҷаҳонӣ ҳамроҳ шавад ва дар таҳияи лоиҳаҳои тиҷорати карбон дар Чин, Ҳиндустон, Непал ва Индонезия кӯмак кунад. Соли 2005 ба бахши хусусӣ баргашт ва кори худро дар бахшҳои энержии барқароршаванда ва тағирёбии иқлим дар Чин идома дод.

Мина Гули соли 2012 Бунёди “Thirst”-ро таъсис дод, ки ба ҷавонон сарфаи обро тарғиб мекунад.

"Хатлон" дар мусобиқаи лигаи олии футболи Тоҷикистон пешсафи ягона шуд

Дастаи «Хатлон»-и Бохтар, ки дар даври ҳафтуми мусобиқаи лигаи олии футболи Тоҷикистон дар меҳмонӣ тими «Регар-ТадАЗ»-и Турсунзодаро бо ҳисоби 1:0 мағлуб кард, дар ҷадвали мусобиқа пешсафи ягона шуд.

Дар ин бозӣ, ки 15-уми май дар варзишгоҳи «ТАЛКО - Арена»-и шаҳри Турсунзода бо ҳузури 2 ҳазор тамошобин баргузор шуд, голи ягонаро Нуриддин Ҳамроқулов дар охири бозӣ (90+3) аз пеналти ба ҳадаф расонд.

Ҳамин тариқ, футболбозони шаҳри Бохтар бо роҳбарии сармураббӣ Аслиддин Ҳабибуллоев дар чаҳор бозӣ пирӯз шуда, се бозиро мусовӣ карда, бо 15 имтиёз дар ҷадвали мусобиқаи қарамонии Тоҷикистон мақоми аввалро касб кардаанд.

Дар бозии дигари даври ҳафтуми мусобиқа КМВА (Клуби марказии варзишии артиш)-и Душанбе ғайричашмдошт дар майдони худ аз тими “Эсхата”-и Хуҷанд бо ҳисоби 1:4 шикаст хӯрд. Бо вуҷуди бохт низомиён дар ҷадвал бо 12 имтиёз дар ҷои дуюм қарор доранд.

Дастаи «Равшан»-и Кӯлоб, ки тими меҳмон - «Истаравшан»-и шаҳри Истаравшанро бо ҳисоби 1:0 шикаст дод, дар ҷадвали мусобиқа бо 11 имтиёз ҷои сеюмро азони худ кардааст.

Дастаи «Истиқлол»-и Душанбе дувумин бозиашро дар мусобиқаи имсолаи лигаи олии футболи Тоҷикистон боз ҳам бо натиҷаи мусовӣ анҷом дод. Бозии қаҳрамони Тоҷикистон дар Варзишгоҳи марказии Душанбе бо «Хуҷанд»-и шаҳри Хуҷанд бо ҳисоби 1:1 ба поён расид.

Дар бозии дигар “Файзканд”-и ноҳияи Восеъ бар тими мизбон - “Равшан”-и Зафаробод - бо ҳисоби 3:1 ғолиб омад.

Бозиҳои даври ҳаштуми мусобиқаи қаҳрамонии футболи Тоҷикистон миёни дастаҳои лигаи олӣ рӯзҳои 18-ум ва 22-юми май баргузор мешаванд: Рӯзи чоршанбе “Хуҷанд” бо “Истаравшан”, «Хатлон» бо «Равшан» (Зафаробод), «Файзканд» бо КМВА ва «Истиклол» бо «Регар-ТадАЗ» бозӣ мекунанд. Рӯзи якшанбе бозӣ миёни дастаҳои «Эсхата» ва «Равшан» (Кӯлоб) барпо мегардад.

Мусобиқаи қаҳрамонии Тоҷикистон-2022

Лигаи олӣ. Даври 7-ум

«Равшан» (Зафаробод) – «Файзканд» – 1:3

Голҳо: Амирҷон Сафаров, 4 (0:1). Шавкати Ҳотам, 73 (0:2). Шавкати Ҳотам, 85 (0:3). Бахтовар Зокиров, 90+2 (1:3).

14-уми май. Хуҷанд. Варзишгоҳи «Спартак». 800 тамошобин.

КМВА – «Эсхата» – 1:4

Голҳо: Дилшод Бозоров, 9 (0:1). Дилшод Бозоров, 55 (0:2). Шарафҷон Солеҳов, 72 (1:2). Санҷар Рихсибоев, 77 – аз пеналти (1:3). Дилшод Бозоров, 83 (1:4).

14-уми май. Душанбе. Варзишгоҳи КМВА-и Вазорати мудофиаи ҶТ. 500 тамошобин.

«Равшан» (Кӯлоб) – «Истаравшан» – 1:0

Гол: Коуасси Инносент, 27.

15-уми май. Кӯлоб. Варзишгоҳи марказӣ. 7000 тамошобин.

«Регар-ТадАЗ» – «Хатлон» – 0:1

Гол: Нуриддин Ҳамроқулов, 90+3 – аз пеналти.

15-уми май. Турсунзода. Варзишгоҳи «ТАЛКО-Арена». 2000 тамошобин.

«Истиқлол» – «Хуҷанд» – 1:1

Голҳо: Ҷаҳонгир Эргашев, 26 (0:1). Манучеҳр Ҷалилов, 81 (1:1).

15-уми май. Душанбе. Варзишгоҳи марказии ҷумҳуриявӣ. 2700 тамошобин.

Мавқеи дастаҳо дар ҷадвали мусобиқа

Ҷ

ДАСТАҲО

Б

Ғ

М

Б

Т/Т

И

1

«Хатлон» (Бохтар)

7

4

3

0

9-4

15

2

КМВА (Душанбе)

6

4

0

2

9-8

12

3

«Равшан» (Кӯлоб)

6

3

2

1

6-5

11

4

«Файзканд» (Восеъ)

6

3

1

2

8-9

10

5

«Регар-ТадАЗ» (Турсунзода)

7

2

1

4

7-8

7

6

«Эсхата» (Хуҷанд)

6

2

1

3

11-12

7

7

«Хуҷанд» (Хуҷанд)

7

1

4

2

5-4

7

8

«Равшан» (Зафаробод)

7

1

3

3

8-14

6

9

«Истаравшан» (Истаравшан)

6

1

1

4

7-6

4

10

«Истиқлол» (Душанбе)

2

0

2

0

2-2

2

Рӯйхати голзанҳои пешқадам: Дилшод Бозоров, Шарафҷон Солеҳов (КМВА) – 5-тӯбӣ, Мбеке Сиябатчу Деудони («Истаравшан»), Санҷар Рихсибоев («Эсхата») – 4-тӯбӣ, Фатҳулло Фатҳуллоев («Регар-ТадАЗ»), Абдухалил Боронов («Равшан» Кӯлоб), Бахтиёр Зарипов («Равшан» Зафаробод), – 3-тӯбӣ.

Даври 8-ум

18-уми май (чоршанбе)

Оғози бозиҳо – соати 17:00

«Хуҷанд» – «Истаравшан»

«Хатлон» – «Равшан» (Зафаробод)

«Файзканд» – КМВА

Оғози бозӣ – соати 18:00

«Истиқлол» – «Регар-ТадАЗ»

22-юми май (якшанбе)

Оғози бозӣ – соати 18:00

«Эсхата» – «Равшан» (Кӯлоб)

"Азия-Плюс" зери фишор аз бозтоби рӯйдодҳои Хоруғ даст кашид

Хабаргузории “Азия-Плюс” эълон кард, ки бино бар фишори мақомот аз бозтоби воқеаҳои ахир дар Вилояти Мухтори Кӯҳистони Бадахшон худдорӣ мекунад. Он рӯзи 17-уми май дар изҳороте гуфт, нашри хабарҳо аз Бадахшон метавонанд, сабаби баста шуданаш гарданд.

"Қабл аз ин, "Азия-Плюс" огоҳиномаи расмии Прокуратураи генералӣ ва огоҳиҳои ғайрирасмӣ аз ниҳодҳои дигарро дар мавриди он дарёфт карда буд, ки идораи мо ҳаводиси ВМКБ-ро "якҷониба" инъикос мекунад ва "вазъи кишварро ноором месозад". Ба "Азия-Плюс" дастур шуда буд, ки "камбудиҳо бартараф карда шаванд", дар ғайри сурат идораи моро хатари бастан таҳдид мекунад,”-омадааст дар изҳороти "Азия-Плюс".

Назари мақомот дар ин бора маълум нест ва дақиқ нест, ки манзури онҳо аз "ислоҳи камбудиҳо" чист.

Мақомоти Тоҷикистонро борҳо ба хотири маҳдуд кардани озодии баён ва фишор ба расонаҳои мустақил танқид мекунанд. Мақомот ҳамвора ин танқидҳоро рад кардаанд.

Шоми 16-уми май шаҳри Хоруғ дигарбора шоҳиди эътирози сокинон шуд. Ба гуфтаи Вазорати корҳои дохилӣ, дар ин ҳодиса як сокини мулкӣ ба ҳалокат расида, 3 афсари пулис ҷароҳат бардоштанд.

Хабаргузории "Азия-Плюс" яке аз маъруфтарин расонаҳои маҳаллии Тоҷикистон аст, ки бо забонҳои русӣ, тоҷикӣ ва англисӣ хабару гузоришҳо пахш мекунад. Пештар хабарҳо расида буд, ки мақомоти Тоҷикистон бозтоби вазъи ВМКБ ва Украинаро барои расонаҳои маҳаллӣ манъ кардаанд.

Эътирозҳо дар шаҳри Хоруғ пас аз он сар зад, ки мақомот гуфтанд, талабҳои ду рӯз пеши норозиёнро баррасӣ намекунанд. Даҳҳо сокини Вилояти Мухтори Кӯҳистони Бадахшон талаб карданд, ки раиси вилоят ва раиси шаҳри Хоруғ аз мақомашон барканор карда шаванд. Мақомот ин талабҳоро ғайриқонунӣ донистанд. Дар талоши баргузории як тазоҳурот як нафар кушта ва даҳҳо тан захмӣ шуданд.

Дар Ереван бештар аз 90 иштирокчии роҳпаймоии мухолифинро боздошт карданд

Ереван. 16 май, 2022.

Дар шаҳри Еревани Арманистон 91 тан аз иштирокдорони роҳпаймоии мухолифинро боздошт карданд. Дар ин бора расонаҳо иттилоъ медиҳанд.

Дар Ереван аз миёнаҳои моҳи апрел гирдиҳамоии мухолифон бо талаби истеъфои сарвазир Никол Пашинян идома дорад. Ин эътирозҳо баъди он шуруъ шуданд, ки Пашинян гуфт, ҷомеаи ҷаҳонӣ аз Арманистон интизор дорад, талабҳояшро дар мавриди мақоми Қарабоғи Куҳӣ коҳиш диҳад. Ба бовари мухолифин, ҳукумати Арманистон тасмим дорад, ба Озарбойҷон гузашт кунад.

Роҳпаймонии мухолифон дар чаҳор ноҳияи Ереван шуруъ шуд. Қатори мошинҳо мебоист, ба маркази шаҳр мерафт ва танбашавӣ ё роҳбандиро ба бор меовард. Аммо пулис ҳамаи роҳҳои ҳаракати қатори мошинҳои эътирозгаронро баст ва иштирокчиёнро боздошт кард.

Собиқ вазири мудофиаи Қазоқистонро то 15 сол зиндон таҳдид мекунад

Мурод Бектанов, собиқ вазири дифои Қазоқистон.

Мурод Бектанов, вазири пешини мудофиаи Қазоқистон, ки баъди ҳаводиси моҳи январи соли ҷории он кишвар боздошт шуд, мумкин аст, аз 7 то 15 сол зиндонӣ гардад.

Бино ба иттилои Додситонии кулли Қазоқистон, нисбати Бектавон бо моддаи "Берун рафтан аз ҳадди салоҳиятҳои хидматӣ дар вазъияти ҷангӣ" парванда боз шудааст.

Қосимҷомарт Тоқаев, президенти Қазоқистон пештар гуфта буд, ки неруҳои мусаллаҳ ҳангоми ҳодисаҳои моҳи январ "ба далели нобоварӣ ва беамалии роҳбарон натавонистанд, вазифаҳои дар наздашон гузошташударо ба дурустӣ анҷом диҳанд".

"Вазир Бектанов ташаббуси фармондеҳӣ надошт. Бо доштани артише, ки ҳангоми машқҳо натиҷаҳои хуб нишон дода буд, мо натавонистем, аз зарфияти он дар ҳолати изтирорӣ истифода барем ва маҷбур шудем, ки аз хориҷ кӯмак дархост кунем", - гуфта буд Тоқаев.

Мурод Бектанови 56-сола 20 феврали соли ҷорӣ боздошт шуд. Вай моҳи августи соли 2021 ба мақоми вазирӣ таъйин гардида буд.

Дар Узбекистон бо пешниҳоди президент мехоҳанд Конститутсияро тағйир диҳанд

Шавкат Мирзиёев, раиси ҷумҳури Узбекистон.

Ҷиноҳи Ҳизби либерол-демократии Узбекисистон дар Палатаи қонунгузории Шӯрои олии он кишвар пешниҳод кард, ки ҷараёни воридсозии тағйирот ба Конститутсия шуруъ шавад. Ин масъала дар ҷаласаи рӯзи 16 майи Шӯро баррасӣ гардид.

Дар ҷиноҳи Ҳизби либерол-демократӣ аз пешниҳоди президенти Узбекистон ёдовар шуданд, ки "дар Рӯзи Конститутсия аз зарурати ислоҳи Конститутсия" гуфта буд.

Дар изҳороти расмии ҳизби мазкур омадааст, баъди ислоҳот дар Узбекистон зарурати воридсозии тағйирот ба Қонуни асосӣ пайдо шудааст.

Конститутсияи Узбекистон 8 декабри соли 1992 қабул ва то кунун ба он 16 тағйирот ворид шудааст. Баъди сари қудрат омадани Шавкат Мирзиёев низ ба Конститутсия тағйироту иловаҳо ворид карданд.

Аз ҷумла соли 2017 барои таҷдиди низоми додгоҳӣ ва соли 2019 барои "демократисозии ҳукумат ва ҳисоботдиҳанда будани он" ба Конститутсияи Узбекистон тағйирот ворид шудааст.

Манобеъ: Дар ҳодисаи маркази Бадахшон "як кас кушта шуд"

Хоруғ, 16-уми майи 2022

Бино ба хабарҳои расида, дар пайи эътирози сокинону тирандозии нерӯҳои интизомӣ дар Хоруғ, Замир Назаршоев, соли таваллудаш 1992, бошандаи маҳаллаи Гулакен, кушта шудааст. Ҳодиса 16-уми май рӯй дод.

Дастикам чаҳор манбаъ хабарро ба Радиои Озодӣ тасдиқ карданд.

Маҳмадбоқир Маҳмадбоқиров, яке аз чеҳраҳои маъруф дар минтақа, ки мақомот ӯро ба ташкили эътирозҳо айбдор медонанд, шоми 16-уми май гуфт, "Назаршоев ҳангоми тазоҳурот кушта шудааст". Тафсилоти дигар дар даст нест.

Мақомот ба таври расмӣ чизе нагуфтаанд.

Издиҳоми ҷавонон рӯзи 16-уми май, пас аз он ки мақомот гуфтанд, талабҳои ду рӯз пеши норозиёнро баррасӣ намекунанд, хостори баргузории тазоҳурот дар назди бинои ҳукумат шуд, вале дар роҳ, дар маҳаллаи Чинак, бо сафи нерӯҳои интизомӣ рӯ ба рӯ гашт.

Сокинони норозӣ ду рӯз пеш, 14-уми май, истеъфои раиси вилояти Бадахшону раиси шаҳри Хоруғ, таҳқиқи одилонаи ҳодисаҳои моҳи ноябр ва озодии боздоштшудаҳоро тақозо карда, гуфта буданд, дар сурати беэътиноии мақомот дубора тазоҳурот мекунанд. Мақомот онҳоро ғайриқонунӣ дониста, баррасӣ накарданд.

Бино ба наворҳое, ки дастраси Радиои Озодӣ шуданд, рӯзи 16-уми май ба зидди ҷавонон аз воситаҳои парокандакунӣ истифода шудааст. Сокинон гуфтанд, ки аз гази ашковар ва тирҳои резинӣ истифода шудааст.

Ду манбаъ дар шаҳри Хоруғ рӯзи 16-уми май ба Радиои Озодӣ гуфтанд, се нафари захмиро ба шифохонаи Оқохон, дар маҳаллаи Бархоруғ, бурдаанд. Баъзе аз манобеъ шумораи захмиёнро бештар мегӯянд.

Дар ҳоле ки эътирози сокинон дар Хоруғ ҷараён дошт, телевизиони Бадахшон изҳороти додситони вилоятро гаштаву баргашта пахш кард, ки дар он аз сокинон хостааст, ба тазоҳурот ҳамроҳ нашаванд, чун ҷавобгарӣ дорад.

Вазъият дар Вилояти Мухтори Кӯҳистони Бадахшон аз моҳи ноябри соли 2021, кушта шудани сокини Роштқалъа Гулбиддин Зиёбеков ва эътирози чаҳоррӯза дар Хоруғ, ба ин сӯ печида аст. Эътирозгарон он замон пас аз мувофиқати "Комиссияи 44" (иборат аз намояндагони ҷомеаи шаҳрвандӣ) бо ҳукумат пароканда гаштанд.

Шартҳо ин буд, ки ҳукумат дастрасиро ба интернет дар Бадахшон дубора барқарор мекунад, эътирозгаронро ба ҷавобгарӣ намекашад ва омилони қатли Гулбиддин Зиёбековро ба ҷавобгарӣ мекашад. Танҳо пас аз чор моҳ интернет бо суръати суст дар Бадахшон барқарор шуд, вале масъулони "Комиссияи 44" мегӯянд, мақомот ваъдаҳои дигари худро иҷро накарданд.

Вазири тандурустии Қирғизистон гуфт, ки амниятиҳо аз ӯ чӣ пурсиданд

Вазири ҳифзи тандурустии Қирғизистон

Олимқодир Бейшеналиев, вазири ҳифзи тандурустии Қирғизистон, рӯзи 16-уми май гуфт, ки кормандони Кумитаи давлатии амнияти миллии Қирғизистон ду маротиба ӯро бозпурсӣ кардаанд.

Рӯзи 12-уми май кормандони КДАМ як гумонбарро ба порагирӣ боздошт ва вазирро ҳам бозпурсӣ кардаанд.

Вазир гуфт, пизишкони ноҳияи Ҷет-Оғузи вилояти Иссиқкӯл барои як чорабинӣ довталабона 1200 доллар ҷамъ овардаанд. Кумитаи

"Бигзор маро боздошт кунанд, агар мехоҳанд. Ман гуноҳе надорам. Барои чӣ зиндонӣ мекунанд - барои он ки духтаракро ба волидонаш расонидам? Ё барои он ки он 1200 долларро нагирифтам?" - гуфт вазир.

Бейшеналиев афзуд, кормандони кумита дар ноҳияи Ҷети-Оғуз ӯро дар назди мардум таҳқир кардаанд.

Вазир гуфт, ки айни замон дар Олмон дар як сафари хидматӣ қарор дорад ва то рӯзи 1 июн барнамегардад.

Украина ба ҳамлаи нави Русия дар Донбасс омода мешавад

Мақомоти Украина гуфтанд, ки нерӯҳои русиро дар минтақаи Харков то марз ақиб ронданд ва ин нишонаи муваффақияти афзояндаи нерӯҳои украинӣ дар шимол-шарқи ин кишвар аст. Харков дувумин шаҳри калони Украина ба шумор меравад.

Владимир Зеленксий, раисҷумҳури Украина, шаби 15-уми май дар паёми худ гуфт, кишвараш барои ҳамлаи нави Русия дар Донбасс омода мешавад.

Вай афзуд, "ишғолгарон то ҳанӯз намехоҳанд бипазиранд, ки ба бунбаст расидаанд". Ба гуфтаи Зеленский, ончӣ Русия "амалиёти вижа" мехонад, бо шикаст рӯбарӯ шудааст.

Мушовири президенти Украина Алексей Арестович гуфт, нерӯҳои русӣ пас аз хуруҷ аз Харков роҳашонро ба тарафи Донбасс тағйир додаанд. Ба гуфтаи ӯ, Русия дар пайи ҳамлаи нерӯҳои украинӣ маҷбур шуданд, роҳи худро дигар кунанд.

Дар ҳамин ҳол, мақомоти ғарб гуфтаанд, ҳамлаи бедалали Русия бо муқовимати сахт дар Украина рӯбарӯ шудааст ва акнун сарбозони русӣ бо камбуди шадиди таҷҳизот рӯбарӯ шудаанд.

Дабири кулли НАТО рӯзи якшанбе дар нишасте дар Берлин гуфт, ҷанг дар Украина бар асоси ончи, ки Русия тарҳрезӣ карда буд, пеш намеравад.

Вай афзуд, Украина метавонад дар ин ҷанг баранда шавад. Ҳамзамон аз муттаҳидони Украина хост, ба ҳимояти низомӣ аз Украина идома диҳанд.

Рӯзи 16-уми май вазирони корҳои хориҷии 27 кишвари узви Иттиҳоди Аврупо дар Брюссел ҷамъ меоянд, то вазъи Украина ва масъалаи таҳримҳоро зидди Русия баррасӣ кунанд. Дар ин нишаст вазири корҳои хориҷии Украина Дмитро Кулеба ҳам иштирок мекунад.

Пирӯзии бародарон аз Тоҷикистон дар мусобиқае дар Маскав

Пирӯзии ду наврас аз Тоҷикистон дар мусобиқае дар Маскав

Ду бародари наврас аз Тоҷикистон дар мусобиқаи "Eurasia 2022 Jiu-Jitsu Gi+No-Gi" дар Маскав медали тилло ба даст овардаанд.

Ин мусобиқа дар навъи варзиши ҷиу-ҷитсу бо ширкати даҳҳо варзишгар аз кишварҳои осиёӣ рӯзи 15-уми май баргузор шуд.

Бародарон, Муниси 10-сола дар вазни 27-30 кило ва Абубакри 9-сола дар вазни 24-27 кило ба рақибони худ пирӯз шуданд.

Аваз Каримов, падари ин ду наврас, ба Радиои Озодӣ гуфт, дар ин мусобиқа Мунис 60-умин медали тилои худ ва Абубакр 47-умин медали тилои худро ба даст оварданд.

Ба гуфтаи падар, писаронаш то кунун дар ягон мусобиқа шикаст нахӯрдаанд.

Хонаводаи ин ду варзишгари наврас солҳост, дар Русия зиндагӣ мекунанд, аммо дар ҳама мусобиқаҳо бо парчами Тоҷикистон ширкат мекунанд.

Ин ду наврас дар назди Расул Боқиев, варзишгари шинохтаи тоҷик тамрин мекунанд.

Раҳмон ва Путин навсозии артиши Тоҷикистонро баҳс карданд

Владимир Путин ва Эмомалӣ Раҳмон дар нишасти сарони кишварҳои узви СПАД. Маскав, 16-уми майи 2022

Эмомалӣ Раҳмон, раисҷумҳури Тоҷикистон, бо ҳамтои русаш Владимир Путин, ки се моҳ боз даргири ҷанг дар Украина ва дучори таҳримҳои зиёди байнулмилалист, дар Маскав мулоқот кардааст.

Бино ба хабари Кремлин, ӯ 16-уми май гуфтааст, мехоҳад, ҷараёни иҷрои таҷдид ё азнавсозии нерӯҳои мусаллаҳи Тоҷикистон ва вазъ дар сарҳади Афғонистонро баррасӣ кунад.

Русия соли 2012, пас аз дароз кардани муҳлати истодани Пойгоҳи 201-ум навсозии артиши Тоҷикистонро ба уҳда гирифта буд.

"Ҳамчунин тайёрам, дар бораи масъалаҳои муҳими байнулмилалӣ ва минтақаӣ суҳбат кунам," – гуфтааст Раҳмон ба Путин, вале тафсилоташ дастрас нест, ки ду ҷониб ба чӣ натиҷа расиданд.

Хадамоти матбуоти президенти Тоҷикистон дар бораи мулоқот кӯтоҳ гуфтааст, ки тарафҳо "авзои сиёсии ҷомеаи ҷаҳонӣ ва минтақа, вазъи сиёсии кишвари ҳамсоя – Афғонистон, ҳамкорӣ дар соҳаи амният ва масъалаҳои дигари мавриди таваҷҷуҳро баррасӣ намуданд."

Раисҷумҳури Русия кишварашро ҳамоно шарики муҳими Тоҷикистон номида, аз афзоиши додугирифту Душанбеву Маскав ситоиш намудааст.

Путин ҳамзамон гуфтааст, "албатта, чанде пеш телефонӣ дар бораи вазъи минтақа суҳбат доштем. Вазъ мураккаб мемонад. Мехоҳам, фикри Шуморо донам, ки дар ояндаи наздик барои таҳкими амният дар минтақа чӣ кор кардан зарур аст."

Суҳбат дар ҳошияи нишасти сарони кишварҳои узви СПАД (ОДКБ) ва ҳафтае баъд аз он сурат гирифт, ки шохаи "Хуросон"-и гуруҳи тундрави "Давлати исломӣ" ё ДОИШ эълон кард, ба хоки Тоҷикистон ҳафт мушак сар додааст.

Мақомоти расмӣ гуфтанд, тирҳо тасодуфан ба хоки Тоҷикистон гузаштаанд, аммо нерӯҳои марзбониро ба ҳоли омодабоши пурраи ҷангӣ дароварданд.

Дар як ҳамлаи маргталабона дар Покистон 6 нафар кушта шуд

Вазиристони Шимолӣ. Акс аз бойгонӣ

Бар асари ҳамлаи маргталабона ба мошини низомиён дар Вазиристони Шимолӣ, минтақаи ноороми Покистон ва ҳаммарз бо Афғонистон, дастикам шаш кас кушта шудаанд.

Низомиёни Покистон рӯзи 15-уми май дар баёнияе гуфтанд, се сарбоз ва се кӯдак ҷон бохтанд.

Ба гузориши расонаҳои маҳаллӣ, маргталаб худро дар бозори хурди Мироншоҳ замоне тарконд, ки сарбозон ин минтақаро посбонӣ мекарданд.

Нахуствазири Покистон, Шаҳбоз Шариф, ҳамларо маҳкум кард.

Масъулияти ҳамларо гурӯҳе ба уҳда нагирифтааст. Таҳрики Толибони Покистон дар гузашта дар минтақа чанд ҳамла анҷом дода буд.

Расонаҳо: Толибон нагузоштанд, ки Карзай ба берун равад

Ҳомид Карзай

Расонаҳо рӯзи 15-уми май гузориш доданд, ки Толибон монеи сафари Ҳомид Карзай, раисҷумҳури собиқи Афғонистон, ба Имороти Муттаҳидаи Арабӣ шудаанд.

Карзай бояд барои иштирок дар маросими дафни Халифа бин Зоид ал-Наҳён, раҳбари пешини Иморот, ба он кишвар мерафт.

Манобеи наздик ба Ҳомид Карзай ба баъзе аз расонаҳо тасдиқ кардаанд, ки Толибон ба ӯ иҷозаи сафар надоданд.

Забеҳуллоҳ Муҷоҳид, сухангӯи ҳукумати Толибон, гуфт, хабарро таҳқиқ мекунанд.

Абдулло Абдулло, раиси пешини иҷроияи ҳукумати Афғонистон, ки то чанде пеш дар Кобул мезист, дар аввали моҳи май ба назди хонаводааш ба Ҳиндустон рафт. Вай то ҳанӯз ба Афғонистон барнагаштааст.

Ду медали варзишгарони тоҷик дар Ҷоми Осиё миёни ҷавонон дар Алмато

Ҷоми Осиё миёни наврасон ва ҷавонон дар Алмато.

Гуштигирони тоҷик дар Ҷоми Осиё миёни наврасон ва ҷавонон ба хотираи Бакет Маҳмудов, варзишгари маъруфи қазоқ, ки рӯзҳои 13-15 май дар шаҳри Алматои Қазоқистон баргузор шуд, ду медал - як тилло ва як биринҷӣ ба даст оварданд.

Абубакр Шеров, гуштигири тоҷик, дар Ҷоми Осиё миёни ҷавонон медали тилло гирифт. Ӯ дар вазни то 66 кило бо шикаст додани ҳамаи рақибонаш ба финал роҳ ёфт. Паҳлавони ҷавон дар қувваозмоии ниҳоӣ Азизбек Ортиқови узбекистониро мағлуб кард ва бо медали тилло сарфароз гашт.

Гуштигири дигари тоҷик Парвиз Абдураҳмонов дар вазни то 100 кило дар даври якум бар Динассил Таттимбеки қазоқ ғолиб омад, вале дар чорякфинал аз Муҳаммадқодир Мансуров аз Узбекистон шикаст хӯрд. Дар даври тассалобахш Темирлан Кайролдаи қазоқро мағлуб кард. Паҳлавони тоҷик барои нишони биринҷӣ бар Габдулманап Ерассил (Қазоқистон) ғолиб шуд.

Дар мусобиқа миёни ҷавонон Тоҷикистонро боз шаш нафар - Саидашраф Лоиқов, Абуҳанифа Қурбонбозор (ҳарду -66 кг), Ҳоҷибек Мухтодов (-73 кг), Суннатулло Лоиқов, Мизробшо Лоиқов (ҳарду -8 1кг), Мӯҳсин Малаев (-90 кг) - намояндагӣ карда, бе медал монданд.

Тоҷикистонро миёни наврасон Фотимахон Гадоева (-52 кг), Ҷасур Лутфишоев (-55 кг), Худодод Шанбиев (-60 кг), Ҷаъфари Ҷаъфар ва Мусо Саъдуллоев (ҳарду -66 кг) муаррифӣ карданд, вале онҳо натавонистанд медал бигиранд.

Ба иттилои сомонаи Федератсияи байнулмилалии ҷудо (IJF), дар ин мусобиқа миёни наврасон ҳудуди 300 варзишгар ва байни ҷавонон беш аз 200 варзишгар аз панҷ кишвари Осиёи Марказӣ, инчунин аз Иёлоти Муттаҳидаи Амрико иштирок карданд.

Шавкат Мирзиёев бо президенти нави Иморот мулоқот кардааст

Раисҷумҳури Узбекистон

Шавкат Мирзиёев, президенти Узбекистон, рӯзи 15-уми май ба Имороти Муттаҳидаи Араб рафта, дар пайванд ба марги амири Абузабӣ(Абудабӣ) Халифа бин Зоид ал-Наҳён изҳори ҳамдардӣ кард.

Мирзиёев бо президенти нави Иморот Муҳаммад бин Зоид ал-Наҳён ва шахсони дигари расмӣ мулоқот кард.

Дар маросими дафни Халифа Муҳаммад бин Зоид президенти Фаронса Эммануэл Макрон, сарвазири Бритониё Борис Ҷонсон, президенти Қазоқистон Қосимҷомарт Тоқаев, президенти Миср Абдуфаттоҳ Сисӣ, сарвазири Покистон Шаҳбоз Шариф ва роҳбарону намояндагони кишварҳои дигар иштирок карданд.

Парванда ба зидди як қирғизистонӣ барои иштирок дар ҷанги Украина

Идрис Қодирқулов, сафири Қирғизистон дар Украина

Сафири Қирғизистон дар Украина Идрис Қодирқулов ҷузъиёти парвандаеро, ки аз сӯи Кумитаи амнияти он кишвар зидди як қирғизистонӣ бо гумони иштирок дар ҷангҳои Украина боз шудааст, ошкор кард.

Ба гуфтаи дипломат, масъулони сафорати Қирғизистон ҳанӯз дар оғози ҳамлаҳои мусаллаҳона дар Украина ба ин шаҳрванди кишварашон пешниҳод карданд, ки метавонанд ӯро бепул ба ватан баргардонанд ва чандин бор ҳам ҳушдор доданд, ки иштирок дар ин ҷанг ғайриқонунӣ аст.

"Ӯ нахост ба Қирғизистон баргардад. Дертар маълум шуд, ки ба кормандони беҳдоштие, ки дар дифои минтақавӣ хидмат мекунанд, мадад мерасонад. Ин иттилоъ фавран ба мақомоти дахлдори Қирғизистон расонида шуд", - афзудааст сафир.

Кумитаи давлатии амнияти миллии Қирғизистон 14-уми май гуфт, саҳифаи як шаҳрванди ин кишвар дар шабакаҳои иҷтимоиро ошкор кардааст, ки дар он аксу видеоҳо аз ҷанг дар Украина нашр карда мешаванд.

Соҳиби саҳифа шаҳрванди Қирғизистон К.А. мебошад, ки моҳи декабри соли 2021 барои муҳоҷирати корӣ ба Украина рафтааст.

Дар робита ба ин ҳодиса бар асоси моддаи 256-уми Кодекси ҷиноии Қирғизистон (Иштирок кардани шаҳрванди Ҷумҳурии Қирғизистон дар даргириҳои мусаллаҳона ё амалиёти ҷангӣ дар қаламрави давлати хориҷӣ ё омодагӣ ба анҷоми амали террористӣ) парванда боз шудааст.

Раиси Ситоди кулли нерӯҳои мусаллаҳи Эрон ба Тоҷикистон меояд

Раиси Ситоди кулли нерӯҳои мусаллаҳи Эрон, генерал-майор Муҳаммад Боқирӣ, рӯзи 16-уми май дар раъси як ҳайати баландпояи низомӣ ба Тоҷикистон меояд.

Ба иттилои расонаҳои эронӣ, сафари Боқирӣ бо даъвати расмии вазири дифои Тоҷикистон Шералӣ Мирзо сурат мегирад.

Хабаргузории эронии "Меҳр" навишт, Муҳаммад Боқирӣ дар ростои амалӣ намудани созишномаҳои ҳосилшуда дар аввалин нишасти комиссияи муштараки ҳамкориҳои низомии дуҷонибаи Эрон ва Тоҷикистон, ба Душанбе сафар мекунад.

Бар асоси ин хабар, дидор бо мақомҳои баландпояи низомӣ ва музокира дар бораи ҳамкориҳои дуҷониба ва минтақаӣ ва ҳамчунин боздид аз марказҳои низомии нерӯҳои мусаллаҳи Тоҷикистон, аз барномаҳои раиси Ситоди кулли нерӯҳои мусаллаҳи Эрон хоҳад буд.

Иштироки беш аз 320 ҳазор кас дар рӯзи дав дар Тоҷикистон

Мақомоти Тоҷикистон мегӯнд, дар рӯзи дав, ки 15-уми май дар саросари кишвар баргузор шуд, беш аз 320 ҳазор нафари син ва касбашон гуногун иштирок кардаанд. Ин маърака ба Рӯзи ҷавонони Тоҷикистон, ки 23-юми май таҷлил мегардад, бахшида шуд.

Дави миллӣ бори аввал 20-уми майи соли 2007 баргузор шуда буд.

Дар дави имсола, ки бори 15-ум доир гашт, дар шаҳри Душанбе беш аз 45 ҳазор нафар ширкат варзиданд. Инчунин, дар марафони велосипедронӣ ё дучархасаворӣ беш аз 1300 нафар иштирок карданд.

Рӯзи дав ва марафони велосипедронӣ дар масири маҳаллаи Чорбоғ – "Наврӯзгоҳ"-и пойтахт, ки масофаи 10 километрро ташкил медиҳад, баргузор шуд.

Тазоҳуроти занон дар чаҳор шаҳри Қазоқистон

Тазоҳуроти занон дар Қазоқистон. 14 май,2022.

Сокинони Қазоқистон рӯзи 14-уми май якбора дар чаҳор шаҳри он кишвар - Нурсултон, Алмато, Оқтеппа ва Костанай бо талаби поин бурдани синни нафақа барои занон, тазоҳурот карданд.

Тазоҳуротҳоро намояндагони созмони "Ҳаракати бонувони Қазоқистон барои поин бурдани синни нафақаи занон" дар мувофиқа бо мақомот баргузор кардааст.

Тазоҳургарон талаб карданд, ки синни баромадан ба нафақа барои занон то ба 58-солагӣ муайян карда шавад.

Қарор аст, то соли 2027 синни ба нафақа баромадани занону мардон ба 63-солагӣ баробар карда шавад. Ҳоло ҳар соле синни ба нафақа баромадани занонро 6 моҳ тамдид мекунанд. Занон талаб доранд, ки онҳоро дар 58-солагӣ ба нафақа фиристанд.

Ба иттилои расмӣ, дар Қазоқистон бештар аз 2 миллион нафақахӯр мавҷуд аст.

Даъвати "Ҳафтгонаи бузург" аз Чин ва Белорус

"Ҳафтгонаи бузург" 14-уми май, баъди ба поён расидани мулоқоти серӯзаи худ дар Олмон изҳоротеро нашр кард.

Ин гуруҳи кишварҳои аз ҷиҳати иқтисодӣ пешрафта, аз Чин даъват карданд, ки соҳибихтиёрии Украинаро ҷонибдорӣ намуда, ба Русия кумак накунад ва ҳушдор доданд, ки ҷанги беасоси Москва алайҳи Киев тамоми ҷаҳонро таҳдид карда, бӯҳрони ҷиддии ғизоӣ ва энержиро дар пай дорад.

"Ҳафтгонаи бузург" ҳамчунин аз Пекин хостанд, ки “аз истифодаи тақаллуби иттилоотӣ, маълумоти бардурӯғ ва дигар василаҳо барои қонунӣ кардани ҷанги таҷовузкоронаи Русия алайҳи Украина худдорӣ кунад”.

Ба ҷуз ин, аз ҳампаймони Русия - Белорус даъват шудааст, то "ҳамаи уҳдадориҳои байналмилалияшро иҷро ва ҷонибдории амалиёти низомии Москваро дар Украина қатъ кунад".

Нишасти кишварҳои “ҳатфгонаи Бузург” аз соли 2014 баргузор мешавад ва дар он Канада, Фаронса, Олмон, Италия, Ҷопон, Британия Кабир ва Иёлоти Муттаҳидаи Амрико мавзуҳои байналмилалиро баҳс мекунанд.

Ёфтҳои бештар

XS
SM
MD
LG