Пайвандҳои дастрасӣ

Хабари нав

Хабарҳо

Гейтс: Ҷанги Ироқ ба марҳилаи ниҳоӣ расид

Вазири мудофиаи ИМА Роберт Гейтс мегӯяд, ба фикри вай ҷанги Ироқ ба марҳилаи ниҳоӣ расидааст. Дар сӯҳбат бо аъзои Кумитаи хадамоти низомии Маҷлиси намояндагони Конгресси ИМА Гейтс гуфт, ки дар Ироқ авҷи хушунат пушти сар шуд ва кишвар дар самти таҳкими назму суботи сиёсӣ ҳаракат дорад.
Дар айни замон вазири мудофиаи ИМА ҳушдор дод, ки вазъ устувор ва бебозгашт намебошад.
Ба қавли Гейтс қарорҳое, ки моҳҳои оянда мақомоти ИМА қабул мекунанд, барои амнияти минтақа ва манфиатҳои миллии ИМА аҳамияти бузург хоҳанд дошт.

Ҳамаи хабарҳои имрӯзро дар инҷо бихонед

Дабири кулли СММ гуфт, аз ҳаққи занону духтарони афғон ҳимоят мекунад

Антонио Гуттериш, дабири СММ

Дабири кулли Созмони Милали Муттаҳид гуфтааст, ба талошҳояш барои таҳсили духтарони афғон ва ҷалби занон ба кор дар Афғонистон идома медиҳад.

Антонио Гуттериш, дабири кулли СММ рӯзи 23-уми октябр дар саҳифаи Твитераш навишт, ки Созмони Милали Муттаҳид дар Афғонистон мемонад ва ба дифоъ аз ҳаққи занону духтарон пойфишорӣ мекунад.

Толибон, ки рӯзи 15-уми август Кобулро тасарруф карданд, ба занону духтарон иҷозаи кору таҳсил намедиҳанд.

Фишорҳо ба Толибон аз сӯи ҷомеаи Афғонистон ва ҷомеаи байналмилалӣ барои иҷозаи кору таҳсил ба занону духтарон давом дорад.

Толибон ба духтарони аз синфи 6 боло иҷозаи таҳсил надодаанд ва барои бозгашти занон ба кор низ мухолифат доранд.

Аксари кишварҳои дунё як шарти пазируфтани ҳукумати Толибонро дар иҷозаи кору таҳсил ба занону духтарон донистаанд.

Амрико аз Куриёи Шимолӣ хост, озмоиши мушакҳоро қатъ кунад

Охири моҳи сентябр Куриёи Шимолӣ мушакҳои нави худро озмоиш кард.

Як дипломати амрикоӣ аз Куриёи Шимолӣ хостааст, ки озмоиши мушакҳояшро қатъ кунад.

Сунг Ким, намояндаи Амрико дар умури Куриёи Шимолӣ аз ин кишвар хостааст, ки ба мизи музокирот баргардад. Ин дипломат, ки бо мақомоти Куриёи Ҷанубӣ гуфтугӯ дошт, аз Куриёи Шимолӣ хостааст, то аз фаъолиятҳои бесуботкунанда даст кашад.

Дар гузашта Доналд Трамп, президенти собиқи Амрико ва Ким Ҷонг Ун, раҳбари Куриёи Шимолӣ бо ҳам дидор доштанд. Дар ин дидорҳо масъалаи барномаҳои мушакии Куриёи Шимолӣ матраҳ шуда буд, вале ИМА муввафақ нашуд, то ин кишварро ба қатъи озмоиши мушакҳо водорад.

Куриёи Ҷанубӣ ва Куриёи Шимолӣ солҳост бо ҳам душманӣ доранд. Куриёи Ҷанубӣ роҳи демократиро пеш гирифтааст ва ба як кишвари пешрафта табдил ёфтааст. Куриёи Шимолӣ, ки низомаш диктотурӣ аст, як кишвари ақибмонда аст, вале бо озмоиши мушакҳо ҳамеша кишварҳои дигарро таҳдид мекунад.

Дар Олмон 1,2 миллион коргар намерасад

Яке аз хиёбонҳо дар Олмон

Агентии федеролии меҳнат дар Олмон аз норасоии 70 навъи мутахассисон дар ин кишвар хабар додааст. Ба навиштаи хабаргузории "Мавҷи Олмон", дар ин кишвар 1,2 миллион коргар намерасад.

Маркус Йергер, як мақомдори Олмон гуфтааст, ки норасоии коргарон ва мутахассисон ба иқтисод зиён мерасонад. Ӯ даъват кардааст, ки аз кишварҳои дигар бояд мутахассисонро бештар барои кор даъват кунанд.
“Дар Олмон омӯзонидани 390 касб ҷараён дорад, вале касбомӯзон кам ҳастанд”,--гуфтааст ӯ.

Ба иттилои Донишгоҳи иқтисодии Олмон, дар ин кишвар бештар коргарон дар соҳаи иҷтимоӣ намерасанд. Дар Олмон ба муҳандисони сохтмон, устоҳои таъмири таҷҳизоти хонаҳо ва ронандаҳои мошинҳои боркаш аз ҳама бештар ниёз будааст.

Дар Олмон феълан садҳо ҷавони тоҷик барои кор дар бахшҳои иҷтимоӣ, аз ҷумла хонаҳои пиронсолон ва мактаб-интернатҳо барои маъюбон барои кор ҷалб шудаанд, вале онҳо шикоят мекунанд, ки маоши зиёде барояшон пардохт намешавад.

Аксари шаҳрвандони Тоҷикистон барои корҷӯи ба Русия мераванд ва омори дақиқи муҳоҷирони тоҷик дар Олмон маълум нест.

Эрдуғон фармон дод, ки 10 сафири кишварҳои ғарбӣ аз Туркия хориҷ шаванд

Раҷаб Тайиб Эрдуғон, президенти Туркия

Раҷаб Тайиб Эрдуғон, президенти Туркия ба Вазорати корҳои хориҷӣ супориш додааст, ки сафирони даҳ давлати ғарбиро аз ин кишвар берун кунанд.

Ба навиштаи нашрияи “Daily Sabath”, дар ин миён сафирони ИМА, Олмон ва Фаронса низ ҳастанд.

Ин хабар дар ҳоле пайдо шуд, ки сафирони панҷ кишвари аврупоӣ ба озодии Осмон Кавал, тоҷири шинохтаи турк, ки бо иттиҳоми даст доштан дар табаддулоти давлатӣ дар боздошт аст, садо баланд карданд.

Додситонии Истамбул ӯро дар кушиши табаддулоти давлатӣ дар моҳи июли соли 2016 айбдор ва боздошт кардааст.

Озодии ӯро дар ҳафтаи гузашта сафирони ИМА, Олмон, Ҳоланд, Канада, Зеландияи Нав, Дания, Финландия ва Шветсия дархост карда буданд.

Туркия, кишвари узви НАТО аст ва барои шомил шудан ба Иттиҳоди Аврупо номзад аст. Соли 2016 ҳазорон нафар дар ин кишвар бо гумони даст доштан дар табаддулоти давлатӣ боздошт шуданд ва ҳанӯз боздоштҳо дар ин робита давом доранд.

Созмонҳои байналмилалӣ Туркияро барои саркуби мухолифон интиқод мекунанд.

Дар Узбекистон барои интихоби президенти оянда овоз медиҳанд

Яке аз ҳавзаҳои интихоботӣ дар Тошканд

Дар Узбекистон имрӯз, 24-уми октябр, маъракаи овоздиҳӣ ба интихоботи президентии ин кишвар оғоз ёфт.

Яке аз номзадҳои калидӣ ба мақоми прзидентӣ Шавкат Мирзиёев, президенти кунунии кишвар аст, ки бори дуюм дар ин маърака иштирок мекунад. Рақибони ӯ чандон чеҳраҳои шинохта нестанд ва бештар тарафдори президенти кунунӣ ҳастанд. Аз ин рӯ, ба гуфтаи коршиносон, онҳоро танҳо барои намоиши демократия вориди майдон кардаанд.

Узбекистон, ки 35 миллион аҳолӣ дорад, аз замони истиқлолият, дар сӣ соли пеш, бори шашум аст, интихоботи президентӣ баргузор мекунад. Барандаи чор интихоботи гузашта дар ин кишвар Ислом Каримов буд, ки соли 2016 даргузашт ва ба ҷояш Шавкат Мирзиёев раҳбари ин кишвар шуд.
Бо дарназардошти саркуби озодандешон, набуди рақиби ҷиддӣ дар интихобот, коршиносон пешгӯи мекунанд, ки эҳтимол дубора Шавкат Мирзиёевро пирӯз эълон кунанд.

Дар сӣ соли охир маъракаҳои интихобот дар Узбекистонро созмонҳои байналмилалӣ ношаффоф унвон кардаанд.

Раҳбари Қирғизистон имкони истиқрори пойгоҳи амрикоиро дар кишвар рад кард

6 марти соли 2014. Низомиёни амрикоӣ хаймаи худро дар фурудгоҳи Канти Қирғизистон ҷамъ мекунанд

Президенти Қирғизистон Содир Ҷабборов фикри дар хоки Қирғизистон ҷойгир кардани пойгоҳи низомии ИМА-ро рад кард ва гуфт, ки ин иқдом аз назари равобити Бишкек бо Вашингтону Русия кишварашро дар ҳолати монанд ба бозии “мушу губа” қарор медиҳад. Ҷабборов ин суханҳоро дар як нишасти хабарии солонааш баён кард, ки дар он намояндагони матбуоти дохиливу хориҷӣ иштирок карданд. Ба саволи ин ки оё баъди ҳафт соли танаффус имкони дар хоки Қирғизистон ҷойгир шудани пойгоҳи низомии амрикоӣ вуҷуд дорад ё на, ӯ гуфт, ки кишвараш аллакай мизбони пойгоҳи низомии Русия дар Канти вилояти Чуй мебошад. Ҷабборов гуфт, “як пойгоҳи низомӣ барои мо кофӣ аст”. Ӯ афзуд: “Мо намехоҳем, ки бо ҷойгир кардани ду пойгоҳ дар қаламрави худ ба бозии мушу гурба бозӣ кунем”. Бори нахуст дар декабри соли 2001 дар пойгоҳи Манаси Қирғизистон дар доираи амалиёти мубориза бо терроризм дар Афғонистон дар чаҳорчӯби амалиёти “Озодии шикастнопазир” пойгоҳи нирӯҳои байналмилалӣ таҳти раҳбарии ИМА ҷойгир шуда буд. Вале поёни соли 2014 парлумони ин кишвар дар як овоздиҳӣ қарор кард, ки Вашингтон ин пойгоҳро холӣ кунад. Ин таҳаввулот ҳамчун талоши мақомоти Бишкек ба хурсанд кардани Русия арзёбӣ шуд.

Телман Исмоилов дар Черногория паноҳанда шуд ва аз ҳабс озод гардид

Телман Исмоилов замоне моликдори бозори Черкизов буд

Соҳибкори озаритабори Русия ва собиқ моликдори бозори Черкизов Телман Исмоилов дар Черногория (Монтенегро) паноҳандагии сиёсӣ гирифтааст. Милош Вуксанович, вакили дифои Исмоилов рӯзи 22-юми октябр гуфт, ки баъди ин қарор зерҳимояи ӯ аз боздошт озод гардид ва парвандаи истирдоди ӯ ба Русия ҳам қатъ шуд. Маълум нест, ки бар кадом асос мақомоти Черногория ба Исмоилов ҳақи паноҳандагӣ додаанд. Худи мақомоти маҳаллӣ ин қазияро ҳанӯз шарҳ надодаанд. Исмоилов рӯзи 1 октябр бо талаби Русия дар шаҳри Подгоритсе – пойтахти Черногория боздошт шуд. Дар Русия ӯро дар ташкили куштори ду ё зиёда шахс гунаҳгор мекунанд. Вале аз соли 2009 кору даромади ӯ мавриди таваҷҷӯҳи тафтишот шуд, бозори Черкизов, ки мегӯянд, бо ҷинояти муташаккил рабт дошт, баста гардид. Соли 2015 Исмоиловро варшикаста ё банкрот эълон карданд.

Бародараш Рафиқ аз рӯи парвандаи куштори ду соҳибкори рус дар соли 2017 ба 17 соли зиндони низомаш сангин маҳкум шудааст ва худи ӯ ҳам маҳз аз рӯи ҳамин парванда дар ғайбаш ҳабс шудааст.

Рӯзи панҷуми "рекордӣ". Олудашавиҳо ба COVID-19 дар Русия афзоиш меёбад

Беморхонае дар Русия

Дар Русия мақомот рӯзи 23-юми октябр аз марги 1075 нафари дигар бар асари COVID-19 хабар доданд. Ин рӯзи панҷум аст, ки омори қурбониёни COVID-19 дар Русия рекордӣ мешавад. Мақомот қаблан эълон карданд, ки дар пешорӯи чунин вазъият маҳдудиятҳои навбатиро ҷорӣ мекунанд. Дар 24 соати гузашта дар Русия 37 ҳазор 678 нафари нав ба коронавирус олуда шудааст.

Мушкил ин аст, ки бо вуҷуди ин ки Русия аввал шуда дар бораи эҷоди воксинаи зидди COVID-19 хабар дод, то ҳол аҳолии ин кишвар барои эмшавӣ бар зидди коронавирус омода нест. Дарсади хеле ками мардум воксина гирифтаанд ва ҳамин чиз, ба назари мақомот, сабаби асосии афзоиши навбатии олудашавиҳо ба коронавирус дар Русия мебошад.

Низомиёни ИМА гуфтанд, дар Сурия як узви муҳими Ал-Қоида кушта шуд

Июли соли 2019. Ҷангиёни гурӯҳи марбут ба Ал-Қоидаи "Ҳаёт таҳрир аш-Шам" дар марзи Ҳамо ва Идлиби Сурия ҳаракат мекунанд

Як сухангӯи фармондеҳии марказии ИМА гуфт, ки дар натиҷаи ҳамлаи ҳавопаймои бесарнишини онҳо дар хоки Сурия як раҳбари калони гурӯҳи Ал-Қоида ба қатл расид. Ҷон Ригсби, сухангӯи фармондеҳии марказии артиши Амрико дар изҳороте гуфт, марги Абдлҳамид ал-Матар “тавони ин ташкилоти террористиро барои ташкил ва анҷоми ҳамлаҳои сартосарӣ зидди шаҳрвандони ИМА, шарикони он ва ҳам мардуми бегуноҳ ба ҳам мезанад”. Ригсби дар шарҳи худ навишт, “дар паи ҳамлае, ки бо истифодаи ҳавопаймои навъи MQ-9 анҷом шуд, нишонаҳо аз хисороти мулкӣ ба назар намерасад”. Ин ҳамла дар ҳоле сурат гирифт, ки ду рӯз пеш аз ин як қароргоҳи амрикоиҳо дар ҷануби Сурия мавриди ҳамла қарор гирифт.

Ҳафтаи ҷорӣ ИМА тасдиқ кард, ки рӯзи 20-уми октябр гарнизони “Ат-Танф” мавриди ҳамла қарор гирифт ва низомиёни амрикоӣ ҷароҳат бардоштанд.

Ригсби гуфт, ки Ал-Қоида Сурияро ба ҳайси паноҳгоҳи амн истифода бурда, ба ИМА ва муттафиқонаш таҳдид мекунад. Ба гуфтаи ӯ, ба ҳамин хотир ҳам ИМА муборизаашро зидди Ал-Қоидаву дигар созмонҳои террористӣ, ки ҳадафашон осеб расонидан ба ин кишвар аст, идома хоҳад дод.

Муқовимат ба ҷангҷӯёни шартӣ дар Ҳарбмайдони Тоҷикистон

Пойгоҳи Ҳарбмайдон, 20-уми октябр

Рӯзи 23-юми октябр дар Ҳарбмайдони воқеъ дар ҷануби Тоҷикистон ва 20-километрии марзҳои шимолии Афғонистон рӯзи дуюми машқҳои нирӯҳои Созмони паймони амнияти дастаҷамъӣ баргузор мешавад. ТАСС мегӯяд, ки “машқҳои амалии нирӯҳои муштараки узви СПАД аз омӯзиши фазо бо ҳавопаймоҳои Л-39-и нирӯҳои ҳавоии Тоҷикистон шурӯъ шуд”. Ривояти машқҳо ин аст, ки назорати ҳавоӣ ҳаракати ҷангҷӯни шартӣ бо ду корвони техникаи низомиро ба самти марзи Тоҷикистон ошкор мекунад ва бар асоси ин иттилои ҷосусӣ марзбонҳо ба муқовимат бо ҷангиён мепардозанд. Дар ин машқҳо инчунин нирӯҳои воҳидҳои махсус ҳам ҷалб шудаанд. Ба навиштаи манбаъ, дар ин машқҳо 4 ҳазор низомиву 500 адад техникаи ҳарбӣ истифода мешавад. Машқҳо дар Ҳарбмайдон ва ҳам пойгоҳи Мумирак дар ҷануби Тоҷикистон ҷараён доранд.

СПАД созмони низомии минтақавии зери назари Русия буда, баъди дар моҳи август аз ҷониби “Толибон” ишғол шудани аксар қаламраҳои Афғонистон, дар хоки кишварҳои узви ин паймони низомӣ, аз ҷумла Тоҷикистону Қирғизистон, чандин даври машқҳои низомӣ барпо шудааст.

Рейтерс: Мақомоти ИМА мехоҳанд "якбора ҳамаи пилотҳои афғонро" аз Тоҷикистон берун баранд

Халабонҳои афғон аз шароити нигаҳдориашон дар осоишгоҳи канори Душанбе шикоят кардаанд

Мақомоти ИМА изҳори умедворӣ карданд, ки базудӣ ҳамаи тахминан 150 халабони афғонистониеро, ки баъди сари қудрат омадани “Толибон” дар моҳи августи имсол дар Тоҷикистон паноҳ бурда, интизори кӯчидан ба ИМА мебошанд, интиқол медиҳанд.

Як мақоми департаменти давлатии ИМА ба шарти фош нашудани номаш дар сӯҳат бо хабаргузории Рейтерс гуфтааст, ки “мақомоти ИМА мехоҳанд ҳамаи халабонҳои нирӯҳои ҳавоии Афғонистонро дар як вақт ба ҷои дигар интиқол диҳанд”, вале аз додани ҷузъиёти нақша худдорӣ кард.

Дар як санатории Тоҷикистон беш аз ду моҳ аст, ки 143 халабон ё пилоти афғонистоние қарор доранд, ки дар ИМА таҳсил кардаанд. Илова ба онҳо 13 низомии дигари афғонистонӣ низ дар Тоҷикистон қарор доранд ва ҳамчунин мехоҳанд ба ИМА интиқол ёбанд. Ба навиштаи Рейтерс, ин нафарон "дар шароити сабуктар ба сар мебаранд".

Ба иттилои Радиои Озодӣ, гуруҳи 143-нафарии нозирону танзимгарони парвоз, муҳандисони ҳавопаймоҳо ва халабонҳои тамриндида аз ҷониби Амрико 15-уми августи имсол аз Афғонистон ба шаҳри Бохтари Тоҷикистон фирор карданд. Онҳоро 1-уми сентябр ба як осоишгоҳи канори Душанбе оварданд.

Яке аз халабонҳои фирории афғон, ки нахост, номаш бурда шавад, дар суҳбат бо Радиои Озодӣ гуфта буд, онҳо бо 17 ҳавопаймои низомии навъҳои Cessna 208, AC-208 ва Pilatus PC-12, ки ба онҳо тааллуқ доштанд, тавассути марзи шимолии Афғонистон ба Тоҷикистон расиданд.

Ин халабонҳо дар интизори интиқол ба Амрико ҳастанд. "Толибон" қаблан гуфта буданд, ки дар сурати бозгашт ба онҳо хатаре таҳдид нахоҳад кард, аммо халабонҳо ба ваъдаи онҳо бовар надоранд ва дигар Афғонистонро ҷойи амн намедонанд.

Халабони ҳомиладор аз ташхис гузашт

Таваҷҷӯҳ ба сарнавишти норӯшани халабонҳои касбии нирӯҳои ҳавоии Афғонистон баъди он бештар шуд, ки маълум гардид, яке аз ду бонуи халабоне, ки дар ин ҳайат қарор доранд, ҳомиладор буда, қарор аст моҳи ноябр нахустфарзандашро таваллуд кунад. Ӯ ба Радиои Озодӣ аз шароити нигаҳдорӣ дар осоишгоҳу кӯмаки нокофии тиббӣ дар Тоҷикистон шикоят карда буд.

Рӯзи 21-уми октябр Радиои Озодӣ хабар дод, ки халабони ҳомилаи афғонро, ки 6-уми октябри имсол ба як бемористони канори Душанбе бурда буданд, пас аз ташхису табобат дубора ба осоишгоҳ, макони нигаҳдории даҳҳо халабони фирорӣ, овардаанд. Ӯ 27-сола аст. Яке аз ҳамроҳони ин зан ба Радиои Озодӣ ба шарти ифшо нашудани номаш гуфт, ки баъди муоинаи ӯ дар як таваллудхонаи шаҳри Душанбе ӯро бозпас оварданд. Ӯ гуфт: "Пас аз он ки пизишкон мутмаин шуданд, ба ҷони зан ва тифли батнаш хатаре нест, ӯро ба назди мо оварданд. Ҳоло дар интизори ба дунё омадани тифлаш аст."

Макони нигаҳдории халабонҳои афғон ва номи онҳо бо далелҳои амниятӣ нашр намешавад. Ин халабонҳо гуфтанд, ки азбаски дар ИМА касби ихтисос карда, барои ҳукумати Афғонистон кор кардаанд, бо омадани режими "Толибон" аз ҷонашон хатар доранд.

Тафтиш: тири силоҳе, ки Алек Болдуин ба кор бурд, воқеӣ буд

Алек Болдуин, ҳунарпешаи ҷоизадор ва маъруфи амрикоӣ ҳамон замон дар додгоҳ ҳозир шуд ва гуфт, ки аз кушта шудаи ҳамкораш дилшикаста шудааст

Тафтиши пешакии қазияи кушта шудани наворбардори украинӣ Ҳалина Ҳатчинс нишон дод, ки силоҳи аз ҷониби ҳунарпешаи амрикоӣ Алек Болдуин истифодашуда бо тири воқеӣ пур карда шуда буд. Дар ин бора матбуот шоми 22-юми октябр бар пояи санадҳои додгоҳӣ хабар дод. Муовини коргардон ба дасти ҳунарпеша Болдуин силоҳро дода гуфт, ки он барои истифода бехатар мебошад, вале дар натиҷа боиси кушта шудани Ҳатчинс шуд. Хабаргузориҳо бо такя ба маводи додгоҳии шаҳри Санта Фе дар аёлати Ню Мексико навиштанд, ки ёвари коргардон ҳангоме силоҳро ба дасти Болдуин медод гуфт, “силоҳ сард аст”. Ин ба маънои амну бехатар будани он мебошад. Дар идомаи тафтиши пешакӣ муфаттиши идораи полиси Санта Фе навиштааст, ки ёвари коргардон хабар надошт, ки дар дохили силоҳ тирҳои воқеӣ ҷой дода шудаанд.

Тири силоҳ ба синаи Ҳатчинс зад, коргарон Ҷоел Соуса, ки дар пушти ӯ истода буд, ба китфаш тир хӯрд. Тафтиши ҳаматарфаи ин қазия, ки рӯзи 21-уми октяр ба ҳангоми наворгирии филме бо номи “Зангбаста” рух дод, шурӯъ шудааст.

CPJ аз Узбекистон хост, таҳдидҳоро ба хабарнигорони "Озодлик" бисанҷад

Кумитаи Дифоъ аз Журналистон (CPJ) аз мақомоти Узбекистон хостааст, ки гузоришҳоро дар бораи таҳдиди куштани хабарнигорони "Озодлик", бахши узбекии Радиои Озодӣ, фавран таҳқиқ кунанд.

Созмон мегӯяд, рӯзноманигорон дар остонаи интихоботи президентии Узбекистон таҳдидҳои бешумори онлайнӣ гирифтаанд. Интихобот 24-уми октябр баргузор хоҳад шуд.

Кумитаи Дифоъ аз Журналистон, қароргоҳаш дар Ню-Йорк, 21-уми октябр дар баёнияе гуфт, мақомот бояд ба таҳдидҳои "бесобиқа ва нафратангез" ба кормандони бахши узбекии Радиои Озодӣ дар рӯзҳои охир вокуниш кунанд.

Гулноза Саид, ҳамоҳангсози Барномаи Аврупо ва Осиёи Марказии CPJ гуфт: "Ҳукумати Узбекистон бояд сарчашмаи пайдо шудани ин таҳдидҳоро таҳқиқ карда, масъулонро ба ҷавобгарӣ кашад."

Рӯзи 16-уми октябр корбарони номаълуме дар Telegram ба кормандони бахши узбекии Радиои Озодӣ даҳҳо паёми таҳдид ба марг фиристоданд.

Ин арфод кормандон ва модарони онҳоро таҳқир карда, ба сар буридану таҷовузи ҷинсӣ таҳдид намуданд ва тасвирҳои порнографӣ ё шаҳвонӣ фиристоданд.

Чунин ба назар мерасад, ки аксари ин тасвирҳо аз ҷониби ҳамон афрод ё гурӯҳ сохта шудаанд, зеро дар онҳо навиштаҳои якхела вуҷуд дорад: "Ҳадафи асосии “Озодлик” сар задани ошӯб дар Узбекистон, халалдор кардани сулҳ ва бадном кардани президенти мост."

Қирғизистон аз Туркия ва Русия ҳавопаймои бесарнишин мехарад

Содир Ҷабборов, раиси ҷумҳурии Қирғизистон (байн)

Раиси Кумитаи амнияти миллии Қирғизистон рӯзи 21-уми октябр дар суҳбат бо рӯзноманигорон гуфт, ин кишвар аз Туркия ва Русия ҳавопаймоҳои бесарнишини навъи "Bayraktar" ва "Орлан-10Е" харидорӣ хоҳад кард.

"Мо ин техникаҳоро аз ҳисоби буҷаи давлат мехарем. Рӯзҳои наздик аз Туркия ҳавопаймои бесарнишини "Байрактар" оварда мешавад. Дар дунё танҳо 5 кишвар ин гуна силоҳ дорад, ки мо яке аз онҳо хоҳем шуд. Мутахассисони мо ҳоло дар онҷо истифодаи ҳавопаймои бесарнишинро меомӯзанд. Ҳамчунин мо аз Русия ҳавопаймои бесарнишини "Орлан-10Е" хоҳем харид. Барои ин аллакай аз буҷа пул ҷудо шудааст", - изҳор дошт раиси Кумитаи амнияти миллии Қирғизистон.

Вале Тошиев дақиқ нагуфт, ки Қирғизистон чанд то ҳавопаймои бесарнишин мехарад.

Расонаҳо моҳи июни соли равон, баъди сафари президенти Қирғизистон Содир Ҷабборов ба Туркия хабар доданд, ки Анқара ба Бишкек кумаки низомӣ менамояд.

Консерти зинда, аммо онлайни Ҷӯрабек Муродов дар YouTube

Ҷӯрабек Муродов

Ҷӯрабек Муродов, овозхони шинохтаи тоҷик, бори аввал шоми 22-юми октябр дар Ютюб консерти онлайн баргузор мекунад. Ӯ мегӯяд, ду соли охир ба сабаби бемории ҳамагир барномаи ҳунарӣ надошт ва аз дидори мухлисон маҳрум буд. Консерти зинда, аммо онлайн соати 8-и шом ба вақти Тоҷикистон дар Ютюб пахш мешавад. Ҷӯрабек Муродов, ҳунарманди мардумии Иттиҳоди Шӯравӣ, 79-сола аст. Соли 1942 дар ноҳияи Айнии вилояти Суғд ба дунё омада, аз соли 1963 то соли 1992 дар Филармонияи давлатии Тоҷикистон кор кардааст. Аз соли 1990 то 1995 вакили Шӯрои олии Тоҷикистон буд.

Навалний: Ҷоизаро ба муборизони фасод дар ҷаҳон мебахшам

Алексей Навалний

Алексей Навалний, пешвои зиндонии мухолифини Русия, тақдими ҷоизаи Сахаровро ба ӯ "масъулияти бузург" ва ҳамзамон ҳимояти ҷонибдорони мубориза бо коррупсия дар саросари ҷаҳон номид.

Вай рӯзи 21-уми октябр дар Твиттер навишт, "эҳсос мекунам, ки ин на танҳо шараф, балки масъулияти бузург аст."

"Ман танҳо яке аз онҳое ҳастам, ки бо коррупсия мубориза мебаранд. Ман коррупсияро на танҳо сабаби камбизоатӣ ва таназзули давлатҳо, балки таҳдиди асосӣ ба ҳуқуқи инсон мешуморам. Ҷоизаи худро ба ҳама муборизони фасод дар саросари ҷаҳон мебахшам", -- афзуд ӯ.

Қонунгузорони Аврупо 20-уми октябр Алексей Навалнийро барандаи ҷоизаи ба номи Сахаров эълон карданд. Сухангӯйи Кремлин гуфт, ба ин тасмим эҳтиром намегузоранд.

Ҷоизаи ба номи Сахаров аз соли 1988 ба онҳое тақдим карда мешавад, ки дар роҳи мубориза барои ҳуқуқи инсон ва озодиҳои бунёдӣ корнамоӣ кардаанд.

Дэвид Сассоли, раиси Порлумони Аврупо, дар эъломияе гуфт: "Навалний тавассути шабакаҳои иҷтимоӣ ва маъракаҳои сиёсӣ пайваста ба зидди фасоди режими Владимир Путин мубориза мебурд. Вай ба фош кардани қонуншиканиҳо кумак кардааст. Барои ҳамин, ӯро заҳролуд карданд ва ба зиндон партофтанд."

Алексей Навалнийи 45-сола моҳи январи имсол, ҳангоми бозгашт аз Олмон, дастгир ва ба дуним сол ҳабс маҳкум шуд.

Талаби занони саршиноси афғон аз СММ дар мавриди “Толибон” 

Бинои Созмони Миллал

Як гуруҳ аз занони шинохтаи афғон аз Созмони Милал хостаанд, ба "Толибон" фишор биоварад, то ваъдаҳояшро дар бораи риояи ҳуқуқи занон иҷро кунанд.

Дар миёни ин занон, ки 21-уми октябр аз қароргоҳи СММ дар Ню-Йорк дидан карданд, сиёсатмадори пешини Афғонистон ва узви ҳайати музокиракунандаи сулҳ бо "Толибон" Фавзия Куфӣ, сиёсатмадори собиқ Ноҳид Фарид, дипломати собиқ Асила Вардак ва рӯзноманигор Аниса Шаҳид буданд.

Фавзия Куфӣ ба хабарнигорон гуфт, "ҷаҳон бояд ёрӣ, пул ва ба расмият шинохтани "Толибон"-ро барои фарогирӣ ва эҳтироми ҳуқуқи занон истифода барад."

Созмони Милали Муттаҳид даъвоҳоро дар бораи он баррасӣ дорад, ки кӣ бояд дар Маҷмаи Умумӣ Афғонистонро намояндагӣ кунад.

"Толибон" сухангӯйи сиёсии худ Суҳайл Шоҳинро намояндаи Афғонистон дар Созмони Милал пешбарӣ кардаанд. Дар ҳоле, ки Ғулом Исҳоқзай, намояндаи ҳукумати барканоршудаи Афғонистон дар СММ мехоҳад, дар курсии худ бимонад.

Интизор меравад, кишварҳои узви Созмони Милал то охири имсол дар ин маврид тасмим бигиранд.

Қазоқистон гуфтугӯ бо "Толибон"-ро "оқилона" номид.

Даврон Абаев

Даврон Абаев, муовини аввали раиси дастгоҳи президенти Қазоқистон тамоси дипломатҳои ин кишвар бо намояндагони ҳукумати гуруҳи Толибон дар Афғонистонро шарҳ дод.

Ба гуфтаи ӯ, "дубора сари қудрат омадани "Толибон" дар Афғонистон сенарияи мувофиқтарин нест, вале ин гузина дар муқоиса бо баъзе гуруҳҳои дигар бадтарин ҳам намебошад".

"Толибон дасти кам ҳадафи ғасби кишварҳои ҳамсояро надоранд", - изҳор дошт Абаев дар як суҳбати телевизионии худ.

Муовини аввали раиси дастгоҳи президенти Қазоқистон гуфт, дар сурати сарнагун шудани ҳукумати Толибон дар Афғонистон дар натиҷаи мушкилиҳои иқтисодӣ касе кафолат намедиҳад, ки ба ҷои он гуруҳи ифротитар, ба монанди гуруҳи террористии "Давлати исломӣ" сари қудрат намеояд. "Агар аз ин нигоҳ назар кунем, пас гуфтугӯ бо "Толибон" оқилонатар аз онест, ки накунем", - афзуд Абаев.

Ҳайати Қазоқистон бо роҳбарии Ержан Қозихон, намояндаи махсуси президенти Қазоқистон нимаи дувуи моҳи октябр бо сафари расмӣ ба Кобул рафт. Қозихон бо намояндагони ҳукумати Толибон Абдулғанӣ Бародар ва Амирхон Муттақӣ мулоқот кард.

Қазоқистон ваъдаи кӯмаки панҷ ҳазор тонна ордро ба Афғонистон додааст. Ҷониби Қазоқистон ҳамчунин гуфтааст, омода аст, ки ба Афғонистон воксини зидди коронавирус - QazVac-и истеҳсоли Қазоқистон ирсол кунад.

Байден: ИМА дар сурати ҳамлаи Чин Тайванро ҳимоят мекунад

Ҷо Байден

Ҷо Байден, раиси ҷумҳури Амрико гуфт, агар Чин ба Тайван ҳамла кунад, Вашингтон тасмими қотеона дорад, ки аз он ҳимоят кунад.

Рӯзноманигорон дар вохӯрие дар Балтимор аз Байден пурсиданд, ки эҳтимоли кумаки Амрико ба Тайван дар сурати ҳамлаи Чин вуҷуд дорад? Раисҷумҳури Амрико дар посух гуфт, "бале, Иёлоти Муттаҳидаи Амрико вазифадор аст, ки ин корро анҷом диҳад".

Баъди он, ки эълом шуд Тайван ба як паймони тиҷорӣ пайвастааст, 24 ҳавопаймои ҷангии Чин вориди ҳарими ҳавоии ин кишвар шуданд.

Вазири дифои Тайван ҳушдор дод, ки таниш бо Чин дар минтақа ба болотарин ҳади худ дар 40 соли гузашта расидааст. Ӯ ҳамчунин ҳушдор дод, Чин метавонад дар соли 2025 ба таври комил Тайванро ишғол кунад.

Боздошти "тарафдорон"-и Рамазон Қодиров дар Туркия

Рамазон Қодиров аз чап

Мақомоти Туркия чаҳор шаҳрванди Русия, як украинӣ ва як шаҳрванди Узбекистонро бо иттиҳоми “ҷосусии низомӣ ва сиёсӣ” дастгир кардаанд.

Ба гуфтаи мақомот, ин афрод мехостанд, мунтақидони Рамазон Қодиров, раиси ҷумҳурии Чеченистонро аз байн бибаранд.

Додситони кулли Туркия 20-уми октябр гуфт, ин афрод 8-уми октябр дар шаҳрҳои Анталия ва Истанбул боздошт шуданд. Ба гуфтаи додситон, онҳо ҳамчунин мехостанд, дар Туркия силоҳ бихаранд.

Мақомоти Русия ҳанӯз ин хабарро шарҳ надодаанд.

Дар чанд соли гузашта чанд мухолифу мунтақидони Рамазон Қодиров дар хориҷа ҳадафи ҳамла қарор гирифтаанд.

Сарнавишти бештар аз 200 фирории афғон дар Узбекистон норушан аст

Сарнавишти бештар аз 200 афғонистонӣ, ки дар Узбекистон паноҳ бурдаанд, норӯшан боқӣ мондааст. Онҳо наметавонанд, дар Узбекистон монанд ва наметавонанд, ки ба кишвари худ баргарданд ё ба кишвари севум раванд.

Муҳаммадқосим Низомӣ, яке аз фирориён гуфт, миёни онҳо афроде ҳастанд, ки дар мақомоти қудратӣ, низоми додгоҳӣ ва додситонии ҳукумати пешини Афғонистон кор мекарданд.

Ҳамаи онҳо бо визаҳои муваққат вориди Узбекистон шуда, ҳамакнун муҳлати будубошашон ба поён расидааст.

Мақомоти расмии Узбекистон ин хабарро шарҳ надодаанд.

Бархе аз дигар афғонистониҳои фирорӣ мегӯянд, мақомоти Узбекистон ба онҳо паём додаанд, ки сарфи назар аз ба поён расидани муҳлати будубошашон, бидуни ташвиш дар Узбекистон боқӣ монанд.

Аммо дар ҳамин ҳол, афғонистониҳои паноҳбурда гуфтанд, яке аз фирориёнро ҳафтаи пеш мақомоти Узбекистон бо ҷурми вайрон кардани қоидаҳои будубош ҷарима ва аз он кишвар ихроҷ кардаанд.

Равуои фаъолонро дар Узбекистон маҳдуд кардаанд

Алексей Гаршин, блогнависи маъруфи узбекистонӣ ва фаъоли сиёсӣ, ки истироҳатгоҳи "Шоввозсой"-и марбут ба президент Шавкат Мирзиёевро ошкор карда буд, гуфт, муваққатан Узбекистонро тарк кардааст.

Вай гуфт, дар остонаи интихоботи президентӣ дар Узбекистон, ки қарор аст, 24-уми октябр баргузор шавад, мақомот фишор болои фаъолони сиёсӣ ва мунтақидони ҳукуматро бештар кардаанд.

Гаршин ягона фаъоле нест, ки аз фишорҳо шикоят мекунад. Елена Уралева, роҳбари Эътилофи ҳомиёни ҳуқуқ дар Узбекистон низ гуфт, ба вай ва ҳамкоронаш аз мақомот ҳушдор расидааст, ки дар остонаи интихобот ба кӯча набароянд.

Клара Сахарова, фаъоли дигар аз шаҳри Тошканд гуфт, сарфи назар аз он ки вай хилофи қонун амал намекунад, ӯро таҳдиди зиндон кардаанд.

Созмонҳои байналхалқӣ ахиран Узбекистонро барои "ислоҳоти нокомил"-и Шавкат Мирзиёев танқид карданд.

Русия эҳтимол "Толибон"-ро аз рӯйхати гуруҳҳои террористӣ берун кунад

Абдусалом Ҳанафӣ, муовини раиси ҳукумати Толибон дар Маскав

Президенти Русия Владимир Путин ҳангоми суханронӣ дар нишасти мубоҳисавии Валдай гуфт, Маскав барои хориҷ шудани номи гуруҳи Толибон аз рӯйхати созмонҳои террористӣ талош хоҳад кард.

Вале ӯ ҳамзамон қайд кард, ки ин корро нахуст бояд Шӯрои амнияти Созмони миллал анҷом диҳад.

Мақомоти рус ҳукумати гуруҳи Толибонро дар Афғонистон расман эътироф намекунанд, вале бо намояндагони он дар Маскав пайваста мулоқот мекунанд. Аз ҷумла, 20-уми октябр дар пойтахти Русия нишасте бо ҳузури Толибон баргузор шуд, ки дар он мақомоти Чину Покистон ва ҳашт кишвари дигар иштирок карданд

Вазири умури хориҷии Русия Сергей Лавров дар ин нишаст гуфт, сарфи назар аз мақоми ҳукумати гуруҳи Толибон дар арсаи байналмилалӣ бояд бо онҳо ҳамкорӣ кард.

Толибон, ки фаъолияташ дар аксар кишварҳо мамнуъ аст, ду моҳ пеш назорат бар Афғонистонро ба даст гирифт ва дар ин кишвари ҳамсояи Тоҷикистон "иморати исломӣ" ташкил дод. То ин дам ҳеч кишвар ҳукумати "Толибон"-ро ба расмият нашинохтааст.

Дар нишасти Маскав ин талаб садо дод, ки ҳукумати нави Афғонистон бояд "иборат аз намояндагони ҳама гуруҳҳои қавмиву динӣ ва сиёсӣ" бошад. Ин андешаро аз оғоз мақомот дар Тоҷикистон ҳам баён карда буданд.

Муҳокимаи як мард бо гумони таҷовуз ва қатли духтари 9-сола дар Хатлон

Дар вилояти Хатлон муҳокимаи марде оғоз шудааст, ки ба таҷовуз ва қатли як духтари 9-сола гумонбар аст.

Хабаргузории “Азия-Плюс” 20-уми октябр бо такя ба манобеи худ дар Додгоҳи вилояти Хатлон навишт, мурофиаи Рустам Болтахонов, сокини ноҳияи Хуросон, чанд рӯз боз идома дорад.

Дар хабар омадааст, марди муттаҳам 18-уми августи имсол дар ҳолати мастӣ духтари ноболиғро таҷовуз карда, сипас куштааст.

Таҷовузи ноболиғон дар Тоҷикистон аҳёнан расонаӣ мешавад. Дар ним соли охир бори дувум аст, ки чунин ҳодиса рӯй медиҳад.

Дар оғози ҳафтаи ҷорӣ як сокини ноҳияи Рӯдакиро бо гуноҳи таҷовуз ва қатли духтари 8-сола ба ҳабси якумрӣ маҳкум карданд.

"Чор моҳ аз хона набароед." Тартиби нав барои калонсолон дар Маскав

Русия ҳафтаҳои охир аз мавридҳои зиёди гирифторӣ ба коронавирус ва талафот аз он хабар медиҳад

Дар Маскав, ки коронавируси нав босуръат доман паҳн мекунад, раиси шаҳр амр додааст, ки шахсони аз 60-сола боло ва эмнашуда чаҳор моҳ аз хона берун наоянд.

Рӯзи 21-уми октябр дар тамоми Русия бештар аз 1000 нафар аз бемории COVID-19 фавтида, вирус ба бештар аз 36 000 нафар сироят кардааст.

Сергей Собянин, мири Маскав, гуфт, аз 28-уми октябр маҳдудиятҳои наве дар шаҳр эълон мешавад ва фақат фурӯшгоҳҳои хӯрокворӣ ва дорухонаҳо боз мемонанд.

Пештар аз ин, 20-уми октябр, Владимир Путин, раиси ҷумҳури Русия фармон дод, ки аз 30-юми октябр то 7-уми ноябр дар ин кишвар рӯзҳои ғайрикорӣ эълон шавад, вале ба коргарон музди корашонро бидиҳанд.

Ҳукумати Русия гуфтааст, ки сабаби зиёд шудани теъдоди гирифторони коронавирус маъракаи сусти эмкунӣ дар байни аҳолӣ аст.

Ёфтҳои бештар

XS
SM
MD
LG