Дар чанд ҷумла
Маккейн расман номзадӣ аз ҳизбашро қабул мекунад
Дар паёмаш ба вакилони ҳизби ҷмуҳурихоҳ Пейлин номзади ҳизби демократи ИМА сенатор Барак Обамаро танқид намуда, гуфт, ки ӯ таҷрибаи кофӣ барои раёсатҷумҳурии ИМА-ро надорад.
Ҳамаи хабарҳои имрӯзро дар инҷо бихонед
"Раҳбари Толибони Покистон дар як ҳамла захмӣ шудааст"
Муфтӣ Нурвалӣ Маҳсуд, раҳбари Толибони Покистон, дар як ҳамла захмӣ шудааст.
Манбаъҳои покистонӣ мегӯянд, як фарди ношинос, ки савори дучарха буд, дар Афғонистон бо партоби бомбаи дастӣ, ба Муфтӣ Нур Валӣ ҳамла кардааст. Гуфта мешавад, ки ҳоло ӯ дар бемористон бистарӣ аст.
Ин манбаъҳо дар бораи замон ва макони дақиқи ин ҳамла чизе нагуфтаанд.
Муфтӣ Нурвалӣ Маҳсуд дар соли 2018 пас аз кушта шудани раҳбари Таҳрики Толибони Покистон Мулло Фазлуллоҳ, раҳбарии ин гурӯҳро ба дӯш гирифт.
Таҳти раҳбарии Муфтӣ Нурвалӣ Маҳсуд, Таҳрики Толибони Покистон масъулияти чандин ҳамлаҳои террористии маргборро дар саросари Покистон ба ӯҳда гирифтааст.
Ҳалокати 5 нафар дар як садамаи нақлиётӣ дар Суғд
Бар асари бархӯрди ду мошини сабукрав дар ноҳияи Ҷаббори Расулови вилояти Суғд, панҷ нафар ҷон бохта, 4 тани дигар захмӣ шудаанд. Ҳодиса рӯзи 29 май рух додааст.
Вазорати корҳои дохилии Тоҷикистон хабар дод, ки ронандаи мошини "Опел-Комбо" ҳангоми ҳаракат дар ҳудуди ҷамоати деҳоти Гулхонаи ин ноҳия ба тарафи муқобили роҳ баромада, ба худрави "Опел-Зафира" бархӯрдааст.
Ба гуфтаи манбаъ, дар натиҷа ҳар ду худрав оташ гирифта, ронанда ва се мусофири худрави "Опел-Зафира" ва ҳамчунин як мусофири "Опел-Комбо" дар ҷойи ҳодиса ҷон бохтанд.
Манбаъ афзуд, ки ронандаи худрави "Опел-Комбо" ва се мусофири "Опел-Зафира" бо ҷароҳатҳои вазнин ба бемористон интиқол дода шуданд.
Вазорати корҳои дохилӣ мегӯяд, ки оид ба ин ҳодиса таҳқиқот идома дорад.
Тақрибан ҳар рӯз дар роҳҳои Тоҷикистон бар асари садамаҳои нақлиётӣ сокинон захмӣ ва ҳалок мешаванд.
Аз ҷумла, рӯзи 26-уми май дар пайи ба ҷарӣ сарозер шудани як мошин дар ноҳияи Варзоб, ду кас ба ҳалокат расида, се тани дигар маҷрӯҳ шудаанд.
Ҳафтаи гузашта як мошин дар ноҳияи Дарвоз ба дарёи Панҷ сарозер шуд. Ду нафар аз мусофирон наҷот ёфтанд ва се нафар ҳанӯз нопадид ҳастанд.
Ҳамлаҳои ҳавоии Исроил ба ғарби Сурия
Исроил шоми 30 май барои аввалин бор пас аз ҳудуди як моҳ, минтақаҳоеро дар ғарби Сурия ҳадафи ҳамлаҳои ҳавоӣ қарор дод.
Ба навиштаи хабаргузории расмии Сурия, дар пайи ин ҳамлаҳо як ғайринизомӣ кушта ва се нафари дигар захмӣ шудаанд. Манбаъ мегӯяд, ки Исроил ба се маҳал дар вилояти Лозиқия ва ҳамчунин атрофи бандари Тартус, ҳамла кард.
Артиши Исроил низ дар баёнияе эълон кард, ки "анборҳои дорои мушакҳоро, ки таҳдиде барои Исроил буданд", дар минтақаи Лозиқия ҳадаф қарор дод.
Артиши Исроил таъкид кардааст, ки ба амалиёти худ "барои ҳифзи озодии амал дар минтақа ба ҳадафи анҷом додани маъмурияташ", идома хоҳад дод ва "барои аз байн бурдани ҳар гуна таҳдид", иқдом хоҳад кард.
Дидбони ҳуқуқи башари Сурия қароргоҳаш дар Сурия, низ гузориш дод, ки дар ин ҳамлаҳо "пойгоҳҳои низомӣ дар атрофи Тартус ва Лозиқия", ҳадаф қарор гирифтанд.
Исроил дар солҳои гузашта борҳо минтақаҳоеро дар Сурия ҳадаф қарор додааст ва ба навиштаи хабаргузории "Рейтерз", бахшҳои зиёде аз зерсохтҳои низомии ин кишварро нобуд кардааст. Ин ҳамлаҳо аз оғози ҷанги Исроил дар Ғазза шиддат ёфт, аммо аз аввали апрели имсол мутаваққиф шуда буд.
Чанд ҳафта пеш Сурия аз музокироти ғайримустақим бо Исроил барои коҳиши танишҳо хабар дод.
Сурия ва Исроил аз соли 1948 дар ҷанг будаанд ва дар соли 1967 баландиҳои Ҷулон ба тасарруфи Исроил даромад.
Исроил аз замони сарнагунии ҳукумати Башор Асар дар 7 декабри соли 2024 то кунун садҳо ҳамла ба ин кишвар анҷом додааст.
Мулоқоти Раҳмон бо Мелонӣ ва ширкат дар ҳамоиши “Осиёи Марказӣ-Итолиё”
Шоми 30 май дар шаҳри Остона ҳайати ҳукумати Тоҷикистон ба раҳбарии президент Эмомалӣ Раҳмон дар доираи Ҳамоиши якуми “Осиёи Марказӣ ва Итолиё” бо нахуствазири Итолиё Ҷорҷиа Мелони мулоқот намуданд. Сомонаи президенти Тоҷикистон навишт, ки як сол баъди мулоқоти ин ду раҳбар дар Рум, ин навбат ҷараёни иҷрои барномаҳои ҳамкорӣ баррасӣ шудааст.
Апрели соли 2024 президенти Тоҷикистон Эмомалӣ Раҳмон дар як сафари расмӣ ба Рум бо нахуствазири Итолиё Ҷорҷиа Мелонӣ ҳафт санади ҳамкорӣ дар масоили амниятӣ, мубориза бо қочоқи маводи мухаддир ва сайёҳиро имзо карданд.
Рӯзи 30 май дар Остона Раҳмон ва Мелонӣ аз ҷумла “ба масоили ҳамкориҳои тиҷоратию иқтисодӣ, сармоягузорӣ, энергетика, саноат ва кишоварзӣ таваҷҷуҳи зиёд” зоҳир карданд. Дар миён дигар мавзӯъҳо - истихроҷ ва коркарди маъданҳои фоиданок, коркарди амиқи пахта ва содироти маҳсулоти тайёр, ҷалби сармоя ва воридоти технология ҳамчун дурнамои ҳамкориҳои байни ду тараф зикр шуд.
“Тавсеаи робитаҳо дар бахшҳои фарҳангиву гуманитарӣ, тандурустӣ, сайёҳӣ ва варзиш, маориф, ҷудо кардани бурсияҳои донишҷӯӣ барои шаҳрвандони Тоҷикистон, инчунин, кушодани филиалҳои мактабҳои таҳсилоти олии Италия дар кишвари мо аз мавзуъоти муҳими суҳбат буд”, гуфта шудааст дар иттилоияи матбуотӣ.
Дар паи ин ҳамоиши аввалини сарони кишварҳои “Осиёи Марказӣ ва Итолиё” ба кор оғоз кард. Дар ин ҷаласа инчунин президентони Қазоқистон, Қирғизистон, Узбекистон ва Туркманистон – Қосимҷомарт Тоқаев, Содир Ҷабборов, Шавкат Мирзиёев ва Сардор Бердимуҳаммадов бо нахуствазири Итолиё Ҷорҷиа Мелонӣ дидору гуфтугӯ мекунанд.
Пеш аз шурӯи нишаст муовини вазири корҳои хориҷии Қазоқистон Роман Василенко ба ТАСС гуфтааст, дар ин ҷаласа таваҷҷӯҳи асосӣ ба масоили рушди тиҷорат, сармоягузорӣ, металлҳои гаронбаҳо ва инчунин мубориза бо тундгароӣ ва муҳоҷирати ғайриқонунӣ равона мешавад.
Ба як мулоқот бо вазири корҳои хориҷии Итолиё дар Рум ду ҳафта пеш аз ҳамоиши Остона, Ҷамолиддин Убайдулло, сафири Тоҷикистон ба имкониятиҳои фаннии Тоҷикистон таъкид карда гуфтааст, ки дар сурати сармоягузории Итолиё мешавад барои “рушди соҳаҳои мисли гидроэнергетика, металлургия, маъдан, саноати хурокворй ва туризм дар Тоҷикистон ҳамкориҳои муваффақе ба роҳ монд”. Ӯ гуфтааст, ҳамоиши Остона метавонанад барои эҷоди шарикии қавӣ мусоидат кунад.
Феълан маълум нест, то куҷо ҳамкориҳои кишварҳои минтақаи Осиёи Марказӣ бо Итолиё расидагӣ ба масоили доғи мисли ҳуқуқи башар ва озодии баёнро дар бар мегирад.
Ҳамаи кишварҳои минтақа бо нишондодҳои бад дар ин бахш маъруфанд ва раҳбарони минтақаро барои саркӯби озодиҳо ва зиндонӣ кардани мухолифону мунаққидони ҳукумат, аз ҷумла дар Тоҷикистон интиқод мекунанд.
Боздошти корманди истихбороти ҳарбии ИМА барои кӯшиши ҷосусӣ барои як "давлати дӯст"
Дар ИМА як корманди ғайринизомии идораи истихбороти ҳарбӣ ҳангоми талоши ба дасти намояндаи давлати хориҷӣ додани маълумоти махфӣ боздошт шуд. Ин шахс давоми се рӯз аз ҷои кораш маълумоти комилан махфиро дуздида онро ба дасти як маъмури Бюрои федеролии тафтишоти ИМА, ки худро гӯё намояндаи истихбороти давлати хориҷӣ муаррифӣ кардааст, вогузор мекард.
Дар иттилоияи вазорати адлияи ИМА омадааст, Нэйтан Вилас Латчи 28-сола дар идораи истихборот аз соли 2019 ҳамчун як мутахассиси фанноварҳои компютерӣ кор мекард ва ба санадҳои комилан махфӣ дастрасӣ дошт. Моҳи марти соли 2025 ФБР иттилое дастрас кард, ки яке аз кормандони ин идора мехоҳад маълумотеро ба намояндаи «як давлати дӯст» бидиҳад.
Дар як номаи беимзо гумонбар гуфтааст, ки «бо арзишҳои Кохи Сафед розӣ нест ва онҳоро намеписандад», аз ин рӯ «омода аст маълумоти махфӣ»-ро берун барорад. Дар ихтиёри ӯ аз ҷумла, гузоришҳои идораҳои ҷосусӣ ва маълумоти аввалияи истихборотӣ қарор доштааст.
ФБР бо ӯ дар тамос шудааст. Дар маводи додгоҳӣ гуфта мешавад, ки Латч давоми се рӯз маълумоти махфиро ба дафтарчае навишта баъдан онро дар як махфигоҳ дар ҳудуи боғе пинҳон кардааст. Латч гуфтааст, ки ин намунаи корест, ки ӯ ба ҷо оварда метавонад ва дар сурати ҳамкории бештар, ӯ иттилои фаровони дигареро ҳам бар ивази шаҳрвандӣ пешкаш хоҳад кард. Гумонбар гуфтааст, ки бовар надорад, ки «вазъ дар дарозмуддат беҳтар шавад».
Беш аз 400 ҳазор нафар дар Русия дархости хидмат дар артишро кардааст
Соли 2024 беш аз 407 ҳазор нафар бо вазорати дифои Русия қарордод бастаанд. Нашрияи "Важные истории" менависад, ки чунин оморро дар паи таҳлили хароҷоти буҷаи федеролии Русия дар соли гузашта ба даст овардаанд.
Дар матлаби ин нашрия омадааст, ки 407,2 ҳазор нафар соли 2024 барои хидмат дар артиш қарордод имзо карданд. Сабабаш ин ки, менависад нашрия, августи соли 2024 президенти Русия Владимир Путин пардохти маблағ барои хидмат дар артишро аз 195 ҳазор рубл ба 400 ҳазор рубл афзоиш дод.
Ҳисоб шудааст, ки дар чормоҳаи охири соли 2024 рӯзона ба ҳисоби миёна 1700 нафар қарордод имзо мекард. Ин 1,3 баробар камтар назар ба соле аз он пеш будааст. Баҳори соли 2025 дубора омор поин омада, рӯзе ба ҳисоби миёна 1000 нафар барои хидмат дар артиш изҳори омодагӣ кардааст.
Боздошти кормандони "Клооп" аз ҷониби идораи амнияти Қирғизистон
Сардабири нашрияи «Клооп» Анна Капушенко гуфт, ки рӯзи 29 май дар хонаи корманди ин нашрия Абдил Айтпайтегин (Торобаев) мақомоти амниятии Қирғизистон кофтукоб анҷом дода, худи ӯро ба Сарраёсати амнияти миллӣ дар шаҳри Бишкек интиқол доданд. Сабаби боздошти ӯ гуфта намешавад.
Худи ҳамон рӯз Симбат Боймирзоева, собиқ мудири ин нашрия, ки ба гуфтаи ҳамкоронаш, мақола наменавишт, ҳамчунин ба идораи амният бурда шуд. Хешовандонаш гуфтанд, ки баъди он ки хонаи ӯ кофтукоб шуд, ӯро ба дафтари КДАМ интиқол доданд. Субҳи 30 май хабарнигорон огоҳ шуданд, ки шаби дери гузашта Айтпайтегинро ҷавоб дода, Боймирзоева ҳанӯз ҳам дар дохили бинои амният қарор дорад.
Аз ин пеш дар изҳороти фейсбукиаш Доирбек Орунбеков, мудири сиёсати иттилооти маъмурияти президент гуфт, ки хабарнигорони боздоштшудаи «Клооп»-ро рӯзноманигори таҳқиқгар Болот Темиров маблағгзуорӣ мекунад. Худи Темиров инро рад кард ва гуфт, ки «ҳеҷ тамосе бо онҳо надорад ва ҳатто аксарашонро шахсан намешиносад». Ӯ гуфт, ки ба касе супориш ва вазифае надодааст ва дар таҳқиқоти журналистиаш мустақилона пеш меравад.
Ҳанӯз хабарнигорони бозпурсишудаву вакилони дифои онҳо изҳороти Орунбековро шарҳ надодаанд ва худи КДАМ ҳам дар бораи ин ҳодиса изҳори назар накардааст.
Рӯзи 28 май дигар хабарнигорони нашрияи «Клооп» - Айдай Эркебаева, Зиёгул Болотқизӣ, инчунин корманди собиқ Зара Содиқалиева ба идораи шаҳрии амният бурда шуданд. Наворбардори ин расона Александр Александров ва собиқ корманди идора Ҷоомарт Давлатов ба мӯҳлати 48 соат боздошт шуданд.
Рӯзи 9 феврали соли гузашта додгоҳе дар Бишкек қарори аз байн бурдани бунёди ҷамъиятии «Клооп Медиа»-ро содир кард. Ин қарор дар паи шикояти додситонии Бишкек гирифта шуд, ки гуфт, «Клооп» «бисёр вақт маълумоти манфӣ ва танқидкунандаи сиёсати давлат»-ро нашр мекунад.
Сомонаи ин нашрия дар Қирғизистон масдуд шудааст.
Кумитаи байналмилалии дифоъ аз журналистон қарори бастани як расонаи мустақилро ҳамчун «доғи сиёҳе дар таърихи Қирғизистон» маҳкум кард.
Раҳмон барои ширкат дар ҳамоиши Итолиё ва Осиёи Марказӣ ба Остона рафт
Президенти Тоҷикистон Эмомалӣ Раҳмон бо мақсади иштирок дар нахустин ҷаласаи сарони давлатҳои Осиёи Марказӣ ва Итолиё ба шаҳри Остона - пойтахти Қазоқистон парвоз кард. Дар ин сафар ӯро вазири корҳои хориҷӣ, ёрдамчиёни президент оид ба масъалаҳои робитаҳои хориҷӣ ва оид ба масъалаҳои иқтисодӣ ва дигар мақомот ҳамроҳӣ мекунанд.
Дар ин бора сомонаи президенти Тоҷикистон нисфирӯзии 30 май хабар дод.
Ҳамоиши раҳбарони кишварҳои Осиёи Марказӣ ва Итолиё нахустин нишаст дар чунин чаҳорчӯб хоҳад буд, ки дар он ҳамкориҳои иқтисодию сиёсии миёни кишварҳои минтақа ва Итолиё баррасӣ мешавад.
Қарор аст дар ин ҳамоиш инчунин президентони Қазоқистон, Қирғизистон, Узбекистон ва Туркманистон – Қосимҷомарт Тоқаев, Содир Ҷабборов, Шавкат Мирзиёев ва Сардор Бердимуҳаммадов бо нахуствазири Итолиё Ҷорҷиа Мелонӣ дидору гуфтугӯ кунанд.
Ба иттилои хабаргузории итолиёии Agenza Nova, вазири корҳои хориҷии Итолиё Антонио Таянӣ дар остонаи ин сафар дар мулоқоте бо сафирони Осиёи Марказӣ дар Рум гуфтааст, ки ҳадаф тақвияти ҳамкориҳо дар масоили мисли энержӣ, иртиботот, зерсохторҳо, мудирияти захираҳо об мебошад.
Дар ин мулоқот, ки ду ҳафта пеш барпо шудааст, Ҷамолиддин Убайдулло, сафири Тоҷикистон дар Рум ба имкониятиҳои фаннии Тоҷикистон таъкид карда гуфтааст, ки дар сурати сармоягузории Итолиё мешавад барои “рушди соҳаҳои мисли гидроэнергетика, металлургия, маъдан, саноати хурокворй ва туризм дар Тоҷикистон ҳамкориҳои муваффақе ба роҳ монд”. Ӯ гуфтааст, ҳамоиши Остона метавонанад барои эҷоди шарикии қавӣ мусоидат кунад.
Ҷузъиёти аз ин беш феълан нашр намешавад, ҳамчунон ки феълан маълум нест, то куҷо хоҳиши пешбурди ҳамкориҳои бештар расидагӣ ба масоили доғи мисли ҳуқуқи башар ва озодии баёнро дар кишварҳои Осиёи Марказӣ пешбинӣ мекунад.
Ҳамаи кишварҳои минтақа бо нишондодҳои бад дар ин бахш маъруфанд ва раҳбарони минтақаро барои саркӯби озодиҳо ва зиндонӣ кардани мухолифону мунаққидони ҳукумат, аз ҷумла дар Тоҷикистон интиқод мекунанд.
Апрели соли 2024 президенти Тоҷикистон Эмомалӣ Раҳмон дар як сафари расмӣ ба Рум бо нахуствазири Итолиё Ҷорҷиа Мелонӣ дидору гуфтугӯ ва ҳафт санади ҳамкорӣ дар масоили амниятӣ, мубориза бо қочоқи маводи мухаддир ва сайёҳиро имзо карданд.
Як миллиард кӯдак дар ҷаҳон таъсири тағйирёбии иқлимро эҳсос мекунад - раҳбари ЮНИСЕФ
Кэтрин Рассел, директори иҷроияи Бунёди кӯдакони СММ (ЮНИСЕФ) мегӯяд, тақрибан як миллиард кӯдак дар саросари ҷаҳон зери таъсири буҳрони тағйирёбии иқлим қарор доранд.
Хонум Рассел 30-юми май зимни Ҳамоиши пешгирӣ аз обшавии пиряхҳо дар Душанбе гуфт, кӯдакон пеш аз ҳама таъсири тағйирёбии иқлимро ҳис мекунанд.
Намояндаи ЮНИСЕФ даъват кард, ки дар вақти амалӣ кардани барномаҳои муқобила бо тағйирёбии иқлим, бояд кӯдакон дар маркази диққат бошанд. Ӯ гуфт, бояд “ба ниёзҳои асосии кӯдакон диққат диҳем ва хизматрасонии калидӣ, ба монанди таъмини об ва таҳсил барои онҳо бояд таъмин гардад.
Кӯшиш кунем, ки ҳифзи иҷтимоии кӯдакон ва модарон ҳангоми сар задани ҳолатҳои фавқуллода таъмин шавад. Кӯдакони мо дар ҷаҳоне зиндагӣ мекунанд, ки аз мо ба онҳо мегузарад. Биёед онҳоро дастгирӣ кунем”, - афзуд директори иҷроияи ЮНИСЕФ.
Рассел яке аз ширкатдорони конфронси Душанбе аст, ки то 31 май идома мекунад.
Шаҳбоз Шариф дар Душанбе: ҳаёти миллионҳо нафар набояд гаравгони муомилаҳои сиёсӣ бошад
Шаҳбоз Шариф, нахуствазири Покистон зимни ҳамоише дар Душанбе аз тасмими Ҳинд барои яктарафа тарк кардани паймони рӯди Синд изҳори нигаронӣ кард. Шариф гуфт, ин кори Деҳлӣ ғайриқобили қабул аст, “чун ҳаёти миллионҳо нафар набояд гаравгони муомилаҳои сиёсӣ бошад.”
Охири моҳи апрели имсол баъди ҳамлаи террористӣ дар минтақаи Кашмири зери назорати Ҳиндустон, Деҳлӣ аз паймони рӯди Синд берун шуд. Ба гузориши расонаҳои маҳалии Покистон, 80 дарсади бахши кишоварзӣ ва энергетикии Покистон аз оби дарёи Ҳинд таъмин мешаванд.
Мақомоти Ҳинд Покистонро дар пуштибонӣ аз терроризм дар минтақаи баҳсноки Кашмир айбдор кард. Исломобод ҳамагуна даст доштан дар ин ҳодисаро рад карда, таҳқиқи байнулмилалиро талаб кардааст.
Рӯзи 22-юми апрел дар натиҷаи ҳамлаи террористӣ дар Кашмир, 25 сайёҳ, аз ҷумла шаҳрвандони Ҳинд кушта шуданд. Ин ҳодиса таниши миёни Деҳлӣ ва Исломободро зиёд кард ва ду тараф оғози моҳи май ба мавзеъҳои ҳамдигар ҳамла карданд.
Э.Раҳмон: Обшавии пиряхҳои Тоҷикистон ба ҳаёти миллионҳо кас дар минтақа таҳдид мекунад
Эмомалӣ Раҳмон, раиси ҷумҳури Тоҷикистон мегӯяд, кишвараш ба буҳрони обшавии босуръати пиряхҳо рӯбарӯ аст ва ин вазъ ба ҳаёти миллионҳо нафар дар минтақаи Осиёи Марказӣ таҳдид мекунад.
Президент 30-юми май дар Конфронси байналмилалии обшавии пиряхҳо дар Душанбе гуфт, аз 14 ҳазор пиряхи Тоҷикистон, 1300 пирях пурра об шудааст.
"Пиряхҳои Тоҷикистон манбаи ташаккули 60 дарсади оби тоза дар Осиёи Марказӣ аст ва талафоти пиряхҳо ба ҳаёти миллионҳо нафар дар минтақа таҳдид мекунад",-афзуд ӯ.
Раиси ҷумҳури Тоҷикистон дар ҳузури намояндагони баландмақоми Созмони Милали Муттаҳид ва даҳҳо кишвар, чанд маротиба аз офатҳои табиӣ нигаронӣ кард, ки дар пайи обшавии босуръати пиряхҳо ба миён омадааст. Аммо Эмомалӣ Раҳмон ягон оморе дар бораи офатҳои табиӣ ба забон наовард.
"Ҳифзи пиряхҳо танҳо мушкилоти кишварҳои дорои пиряхҳо нест, балки як бӯҳрони глобалии қобили таваҷҷуҳи фаврии ҷомеаи ҷаҳонӣ мебошад",-гуфт оқои Раҳмон.
Раиси ҷумҳури Тоҷикистон тасдиқ кард, ки имкониятҳои техникии кишвараш маҳдуд аст ва барои татбиқи чораҳои таъхирнопазир кӯмакҳои молию техникии шарикон зарур аст.
Эмомалӣ Раҳмон аз кишварҳои ҷаҳон даъват кард, ки барои омӯзиши пиряхҳои Тоҷикистон экспедитсияи фарогир ташкил шавад. "Тоҷикистон даъват мекунад, ки барои ҳифзи пиряхҳо тадбирҳои таъхирнопазири қатъӣ андешида шавад... Пешниҳод менамоям, ки Стратегияи глобалии ҳифзи пиряхҳо дар сатҳи ҷаҳонӣ таҳия карда шавад",-афзуд ӯ.
Раиси ҷумҳури Тоҷикистон дар ин ҳамоиш аз камбуди об дар кишвараш чизе нагуфт. Бо вуҷуди онки беш аз нисфи обҳои тозаи Осиёи Марказӣ дар Тоҷикистон ташаккул меёбад, то ҳол як қисми аҳолии кишвар бо оби тоза таъмин нестанд.
Тибқи иттилои расмӣ, танҳо 66 дарсади аҳолии Тоҷикистон бо оби ошомиданӣ таъмин аст ва ҳар сол дар пайи селу обхезиҳо, даҳҳо нафар зарар мебинанд.
Амина Муҳаммад, муовини аввали Дабири кулли СММ дар ҳамоиши обшавии пиряхҳо дар Душанбе аз кишварҳои ҷаҳон даъват кард, ки сармоягузорӣ барои пешгирӣ аз тағйирёбии иқлимро бештар кунанд. Хонум Амина гуфт, зиёд кардани сармоягузорӣ метавонад аз як буҳрони башарӣ пешгирӣ кунад. "Ҳозир вақти иқдом аст, мо дигар вақти ба таъхир гузоштани онро надорем".
Муовини аввали Дабири кулли Созмони Милал аз обшавии босуръати пиряхҳо ва оқибатҳои бади он барои зиндагии миллионҳо нафар дар ҷаҳон нигаронӣ кард.
Тибқи омори СММ, солҳои 1975-2024 башарият шоҳиди бузургтарин талафоти пиряхҳо будааст. Дар ин давра зиёда аз 9 триллион тонна ях нобуд гардидааст. "Аз се як ҳиссаи пиряхҳо аз даст рафтаанд ва агар чора наандешем, ин раванд идома меёбад,”-гуфт муовини Дабири кулли СММ.
Амина Муҳамммад дар ҳамоиши Душанбе аз он нигаронӣ кард, ки аз даст додани пирхҳо, амнияти ғизоӣ ва суботи ҷомеаҳоро ба хатар рубарӯ мекунад.
Хулосаи суҳбати аксар ширкатдорони ҳамоиши Душанбе ин буд, ки барои пешгирӣ аз селу обхезӣ ва муҳимтар аз ин барои таъмини одамон бо оби тоза, ҷаҳон бояд ба масъалаи пешгирӣ аз ақибнишинии босуръати пиряхҳо таваҷҷуҳи ҷиддӣ кунад.
Намояндагони СММ мегӯяд, бар пояи Созишномаи Париж, кишварҳои имзогузор ӯҳдадор шудаанд, ки партобҳои газҳои гулхонаиро дар ҷаҳон коҳиш диҳанд, то дар дарозмуддат ҳарорати миёна дар сатҳи замин дар муқоиса бо сатҳи то замони саноатисозӣ дар нишондоди пасттар аз 2 дараҷа Селсия нигоҳ дошта шуда, талошҳои то ба 1,5 дараҷаи Селсия маҳдуд кардани ҳарорат тақвият дода шавад.
Конфронси байналмилалии оид ба ҳифзи пиряхҳо то 31 май идома мекунад. Мақомот дар Тоҷикистон мегӯянд, дар ҳамоиши Душанбе беш аз 2200 намоянда аз 65 кишвари аъзои Созмони Милал ва 70 созмони байнулмилалӣ ширкат хоҳанд кард. Дар миёни онҳо - нахуствазирони чанд кишвар ва ноибони президентҳо ҳам мебошанд. Интизор меравад дар поёни ин ҳамоиш Эъломияи Душанбе дар бораи пиряхҳо қабул шавад.
Эрон ба садҳо муҳоҷири афғон дастур дод, ки ин кишварро тарк кунанд
Эрон ба беш аз 4 миллион муҳоҷири афғони бесанад дастур додааст, ки то 6 июл ин кишварро тарк кунанд.
Мақомоти Эрон эълон кардаанд, санадҳое, ки аз сӯи Идораи омор ба муҳоҷирони афғон дода шудааст, дигар эътибор надорад ва аз онҳо хоста шуд, ки қабл аз муҳлати эълоншуда, Эронро тарк кунанд.
Нодир Ёраҳмадӣ, раиси Маркази муҳоҷирон ва шаҳрвандони хориҷӣ дар Вазорати корҳои дохилии Эрон гуфтааст, ки дорандагони санадҳои Идораи омор аз ин баъд муҳоҷирони ғайриқонунӣ пиндошта мешавад.
Вай таъкид кард, ки танҳо шаш гурӯҳи хоси муҳоҷирони дорои санадҳои муваққат, метавонанд дар Эрон бимонанд.
Бар асоси омори расмӣ, дар ҳоли ҳозир ҳудуди 6 миллиону дусад ҳазор муҳоҷири афғон дар Эрон ба сар мебаранд, ки аз ҷумла, 4 миллиону сад ҳазор, санади иқомат доранд.
Нодир Ёраҳмадӣ ҳамчунин ҳушдор додааст, мактабхонҳое, ки сарпарасти онҳо танҳо санадҳои Идораи оморро доранд, дар соли ояндаи таълимӣ ҳаққи сабти ном дар мактабҳоро нахоҳанд дошт.
Боз як маҳдудият ба муҳоҷирони таксирон дар Маскав
Ронандагони муҳоҷир дар шаҳри Маскав акнун танҳо бо донистани мавқеият ва ҷойҳои пойтахт метавонанд дар ин шаҳр фаъолият кунанд ва ё ба кори худ идома бидиҳанд. Дар ин бора Сергей Собянин, шаҳрдори Маскав қарореро имзо кардааст.
Аз ин ба баъд, ронандагони муҳоҷир бояд донанд, ки истгоҳҳои метро, роҳи оҳан, беморхонаҳо, мактабҳо, муассисаҳои ҳукуматӣ ва фарҳангӣ дар куҷо ҷойгиранд ва чӣ тавр ба ин биноҳо метавон расид.
Бино ба муқаррароти нав, ронандагони кирокаш дар Маскав аз санҷиш мегузаранд ва барои надонистани маълумоти зикршуда, ронанда 5 ҳазор рубл ҷарима мешавад.
Расонаҳои русӣ хабар додаанд, ки ҳукумати шаҳри Санкт-Петербург ҳам нақша дорад, ки то охири соли 2025 фаъолияти хориҷиёнро ба ҳайси кирокаш ва колорасон, манъ кунад.
Александр Беглов, шаҳрдори Санкт-Петербург дар сомонаи ҳукумати ин шаҳр Лоиҳаи қарори мазкурро нашр кардааст. Дар он омадааст, ки аз 1-уми июли соли 2025 фаъолияти хориҷиён дар бахши кирокашӣ ва колорасонӣ дар ҳудуди ин шаҳр манъ карда мешавад.
Дар як соли охир Думаи давлатии Русия 34 тарҳу қонунеро қабул карда, ба вуруд, иқомат ва кори муҳоҷирон дар ин кишвар маҳдудиятҳои зиёде ҷорӣ намуд ва онҳоро ҳарчи бештар ба як қишри беҳуқуқ ва осебпазир табдил дод.
Дар Русия як зодаи Тоҷикистонро, ки дар ҷанги Украина кушта шуд, ба хок супурданд
Дар шаҳри Толяттии Русия як зодаи Тоҷикистонро ба хок супориданд, ки дар ҷанги Украина кушта шудааст. Маросими дафни Мират Раҳмонови 38-сола рӯзи 27-уми май сурат гирифт. Корбарони Радиои Озодӣ бо фиристодани видео аз ҷараёни видоъ бо муҳоҷири тоҷик гуфтанд, ки ӯро 8 моҳ пеш ба ҷанги Украина бурдаанд ва се моҳи пеш кушта шудааст. Ҷасадашро чанде пеш ба маҳалли иқоматаш ба шаҳри Толятти дар вилояти Самара овардаанд, ки онҷо бо ҳамсару фарзандонаш зиндагӣ мекардааст.
Фарде, ки видеоро сабт кардааст, мегӯяд, дар маросими дафн ду писари Мират Раҳмонов ҳузур доранд. Ҷавони тоҷик сокини ноҳияи Данғара будааст. Маълум нест, ки чӣ гуна ва дар кадом шаҳри Украина кушта шудааст. Ин танҳо хабари кушт шудани зодаи Тоҷикистон дар ҷанги Украина дар ҳафтаи ҷорӣ нест.
Ҷасади Ихтиёр Холов, як қурбонии дигари ҷанги Русия дар Украина чанд рӯз боз дар яке сардхонаҳои Русия мехобид. Рӯзе пештар бо мусоидати корбарон ва нашри акси ӯ дар шабакаҳои иҷтимоӣ падараш ӯро шинохт ва ҳоло зоҳиран дар садади гирифтану дафн кардани ҷасади фарзандаш аст.
Таҳлилгарон пайвастани тоҷикон ба ҷангро ба камбизоатӣ ва муҳоҷират ба Русия пайванд медиҳанд. Чанде пеш тарҳи "Зистан мехоҳам"-и Украина бо нашри як рӯйхат номи беш аз 900 тоҷикро эълон кард, ки ба ҷанги Украина рафтаанд ва 196 нафарашон кушта шудаанд. Мақомоти Тоҷикистон дар ин бора омору маълумоте намедиҳанд.
Нетаняҳу куштори раҳбари Ҳамос Муҳаммад Синворро тасдиқ кард
Нахуствазири Исроил Бенямин Нетаняҳу тасдиқ кард, ки рӯзи 13 май дар натиҷаи ҳамлаҳои ҳавоӣ раҳбари Ҳамос Муҳаммад Синвор кушта шудааст.
Jerusalem Post навишт, ки изҳороти Нетаняҳу дар ҷараёни ҷаласаи парлумон садо дод. Аввалин хабарҳо дар бораи кушта шудани Синвор дар матбуот рӯзи 18 май нашр шуданд. Телевизиони саудии Al-Hadath навишт, ки ҷасади раҳбари Ҳамосро дар нақби Хон Юнис дар ҷануби Ғазза пайдо карданд.
Ҳамроҳ бо ӯ даҳ ёвараш ҳам кушта шуд. Рӯзи 13 май артиши Исроил гуфт, ки ба фармондеҳии Ҳамос, ки дар зери беморхонаи аврупоии Хон Юнис ҷойгир аст, зарбаҳо задааст. Мақсади ин ҳамлаҳо ҳам Синвор буд, навиштааст The Times of Israel.
Муҳаммад Синвор бародаи хурдии раҳбари кушташудаи Ҳамос Яҳё Синвор буд, ки ӯро ташаббускор ва муаллифи ҳамлаи Ҳамос ба Исроил дар таърихи 7 октябри соли 2023 меноманд. Исроил дар бораи кушта шудани Яҳё Синвор 17 октябри соли 2024 хабар дода буд.
