Пайвандҳои дастрасӣ

Хабари нав

Хабарҳо

Истад Қурбонова бозбинии ҳукми додгоҳро тақозо кард

Истад Қурбонова, зани 68-солае, ки бо ҳукми додгоҳи шаҳри Хуҷанд дар моҳи апрел барои ғасби замин шартан ба як соли ҳабс маҳкум шудааст, бозбинии ин қарорро талаб кард.

Файзулло Насруллоев, вакили дифои ӯ гуфт, шикоятро ҳамин ҳафта ба додгоҳи вилоятӣ супурда бозбинӣ шудани ҳукмро дархост кардаанд. Ӯ рӯзи 7 май дар суҳбат бо Радиои Озодӣ афзуд: “Дар шикоят пуле, ки зерҳимояам барои харидани он қитъаи замин ба ширкати “Сохтмон СТД” додааст, 32 ҳазор сомонӣ, бекор кардани 17,5 ҳазор сомонӣ ҷуброни зарари гӯё ӯ ба корхонаи мазкур расонидааш ва ба ҷои ҳодиса рафта таҳқиқ кардани қазияро талаб кардем.”

Додгоҳи Хуҷанд 24 апрел Қурбоноваро ба "ғасби замин" ва “қасдан нобуд кардани молу мулк”-и ширкати “Сохтмон СТД”-и ноҳияи Айнӣ гунаҳкор донист ва ҷазои як сол ҳабси шартиву пардохти 17 ҳазору 500 сомонӣ ҷуброни зарар ба ширкати мазкур таъин кард.

Истад Қурбонова: "Бояд ҳақ ба ҳақдор бирасад"
лутфан мунтазир бошед

Феълан кор намекунад

0:00 0:03:29 0:00

Истад Қурбонова мегӯяд, бо қарори додгоҳ розӣ нест ва ба гуфтааш, ба ширкат ҳеҷ осебе нарасонидааст. Қурбонова рӯзи 7 май ба Радиои Озодӣ гуфт, “Фақат як ошхонаи корхонаи хурди корхонаро, ки ба мо гузашт, ду ба ду метр, қариб 20 ҳазор нарх монданд. Он ошхонаро ба 100 сомонӣ сохтан мумкин. Ман бекор кардани ин ҷубронро талаб дорам.”

Ин дар ҳолест, ки ширкати “Сохтмон СТД” ҳанӯз аз даъвояш алайҳи Қурбонова нагузаштааст ва мегӯяд, танҳо баъди ҷуброни моликият домани ӯро раҳо хоҳад кард. Амон Худоёров, муовини раиси ширкати мазкур дар суҳбат бо Радиои Озодӣ рӯзи 7 май гуфт: “Талаби мо ин ки ҷубронро пардохт кунанд. Ғайр аз ин девореро, ки назди корхонаи мо сохтаанд, кананд. Он вақт аз даъвоямон мегузарем ва қарори судро қабул мекунем.”

Ӯ дар посух ба саволи Радиои Озодӣ, ки ширкаташ дар шахси худи ӯ он қитъаи заминро ба Истад Қурбонова бар ивази 32 ҳазор сомонӣ фурӯхта, вале ҳуҷҷатгузорӣ накардааст, гуфт : “Аз мурдани худ хабар дораму аз ин муомила – не. Ин ҳамааш туҳмату буҳтон дар ҳаққи ман аст. Пештар прокуратураи ноҳия ин даъвии ӯро тафтиш кард, тасдиқ нашуд”.

Баҳси замин миёни Истад Қурбонова ва “Сохтмон-СТД” беш аз як сол боз идома дорад. Додситонии ноҳияи Айнӣ бори аввал Қурбоноваро моҳи октябри соли 2018 бо даъвои масъулони ҳамин корхона ба ҷавобгарӣ кашид. Ин ширкат иддао карда буд, ки Қурбонова дар 6 сотих замини корхона анбору ҳоҷатхона сохтааст.

Сипас, рӯзи 2-юми январи имсол ин зани 68-соларо ба далели ҳозир нашудан барои бозпурсӣ дастгир ва ба боздоштгоҳ бурданд. Қазияи Истад Қурбонова баъди он сари забонҳо шуд, ки ӯ рӯзи 11-уми январ аз боздоштгоҳи пулиси Айнӣ бо бадани сӯхта ба бемористон бурда шуд.

Мақомоти Вазорати корҳои дохилии Тоҷикистон баъди ин ҳодиса се маъмури пулиси ноҳияи Айниро аз кор озод карданд. Истад Қурбонова мегӯяд, боздошташ ва ба қавли ӯ бадрафтории маъмурони милисаро ба боди фаромӯшӣ супурданӣ нест ва барои ба ҷавобгарӣ кашидани онҳо талош хоҳад кард.

Эътилофи зидди шиканҷа дар Тоҷикистон ҳам аз Додситонии кул хостааст, он маъмурони милисаро, ки Истад Қурбонова дар ҳузури онҳо қасди худсӯзӣ карда буд, ба ҷавобгарии ҷиноӣ кашад. Фаъолони ҳуқуқ мегӯянд, ходимони милисаи ноҳияи Айнии вилояти Суғд "ҷони ин сокини 68-соларо дар хатар гузоштанд".

Ҳушдори Помпео ба Русия ва кишварҳои узви Шӯрои Қутби Шимол

Котиби давлатии ИМА Майк Помпео гуфтааст, ки Амрико ҳузури худро дар Қутби Шимол пурзӯр мекунад, то аз рафтори ба гуфтааш “пархошгарона”-и Русия ва Чин дар ин минтақаи ғанӣ аз сарватҳои табиӣ пешгирӣ шавад. “Минтақа як майдони қудрат ва мусобиқа шудааст ва ҳашт аёлати Қутби Шимол бояд ба ин ояндаи нав мутобиқ шаванд”, гуфт Помпео рӯзи 6 май дар суханрониаш дар Филандия, пеш аз вохӯриаш бо вазирони корҳои хориҷии Шурои Қутби Шимолӣ.

Шурои Қутби Шимол кишварҳои мисли ИМА, Русия, Канада, Дания, Финляндия, Исландия, Норвегия, Шведсия ва сокинони бумиро дар бар мегирад.

Ҷараёни гармоиши иқлим ва обшавии ях дастрасиро ба захираҳои табии мисли нафту газ, канданиҳои фоиданоки сайёра афзоиш медиҳад ва боис мешавад, ки кишварҳои ҳамсоя, ҳамчунин қудратҳои ҷаҳонӣ ба монади Чин, барои ин қаламрав даъво кунанд ва ё ҳузури худро дар инҷо афзоиш диҳанд.

Помпео дар суханрониаш дар шаҳри шимолии Рованиемии Финляндия гуфт: “Фақат ба сабаби он ки Қутби Шимол ҷои табиати ваҳшист, ин маънои онро надорад, ки ҷои беқонунӣ бошад. Ва мо омадагӣ дорем, то бовар пайдо кунем, ки чунин нест.”

Ба гузориши Ройтерз, Помпео дар Филандия пас аз нишасташ бо вазири корҳои хориҷии Русия Сергей Лавров дар бораи Эрон гуфтааст, ки фаъолиятҳои Эрон сабаби шиддат ёфтани вазъ мешавад ва Амрико онро зери назар дорад.

Сафари Помпео ба Олмон лағв шуд. Русия аз мулоқоти нав бо Лавров хабар дод

Котиби давлатии ИМА Майк Помпео ногаҳон ва чанд соат пеш аз сафараш ба Берлин бо далели, ба гуфтаи сухангӯяш “масоили муҳим” барномаи боздид аз Олмонро бекор кард. Морган Ортагус, сухангӯи Департаменти давлатӣ гуфт, ки “мутаассифона, ба хотири бархе масоили муҳим, мо бояд нақшаи сафари Берлинро бозбинӣ кунем”.

Ортагус гуфт, ки нақшаи дидору гуфтугӯҳо бо садри аъзам Ангела Меркел ва вазири хориҷии Олмон Ҳейко Маас бознигарӣ мешавад.

Помпео феълан дар Финляндия буда, дар ҷаласаи Шӯрои Қутби Шимол иштирок мекунад. Қарор буд ӯ рӯзҳои 5 то 9 май аз Лондон ва Гринландия дидан кунад, вале феълан маълум нест, ки ин сафарҳояш бетағйир боқӣ мемонад ё на.

Дар ҳамин ҳол сухангӯи вазорати хориҷаи Русия Мария Захарова гуфт, ки Русия ба мулоқоти вазири хориҷаи ин кишвар Сергей Лавров ва Помпео омодагӣ мебинад, ки қарор аст 14 май дар шаҳри соҳилии Сочӣ баргузор шавад. Ин мулоқоти дуюми раҳбарони сиёсатҳои хориҷии Русияву ИМА дар давоми як ҳафта хоҳад буд. Мулоқоти ахири онҳо 6 май дар ҳошияи Шӯрои Қутби Шимол баргузор шуд.
Помпео шоми 6 май гуфт, ки бо Лавров “гуфтугӯи хубе” дошт. Ӯ гуфт:

“Мо манфиатҳои худро дорем, ки табъан мухталиф ҳастанд. Ин хоҳиш баён шуд, ки роҳҳали пешрафте дар масоиле пайдо шавад, ки дар он манфиатҳои ҷонибҳо бо ҳам бархӯрд мекунанд ва ин бархӯрд ҳадди аксар камтар шавад. Умедворем, ки мо ба ин ҳадаф даст меёбем”.

Лавров ин мулоқотро “созанда” арзёбӣ кардааст. Гуфтугӯҳо дар пасманзари бӯҳрони сиёсии Венесуэла баргузор мешавад, ки дар ин баҳс Русия аз президент Николас Мадуро ва ИМА аз раҳбари мухолифон Ҳуан Гуайдо ҷонибдорӣ мекунанд.

Эрдуғон аз бекор шудани натиҷаҳои интихоботи шаҳрдори Истамбул истиқбол кард

Президенти Туркия Раҷаб Таиб Эрдуғон рӯзи 7 май як амри ниҳоди аршади интихоботии ин кишварро ситоиш кард, ки баъди пирӯзии ғайримунтазираи мухолифон дар моҳи март ба баргузории дубораи интихоботи мири шаҳри Истамбул амр додааст. Эрдуғон гуфт, ки ин амр ба тақвияти демократия дар ҷомеаи Туркия нигаронида шудааст. Ҳизби ҳокими Адолат ва тараққиёти Эрдуғон пирӯзии номзади мухолифонро аз ҳизби Ҷумҳуриявии мардумии Туркия зери суол бурда иддао кардааст, ки дар ҳисобу китоби натиҷаҳо “нақзи қонун ва коррупсия” ҷой дошт. Ниҳоди олии интихоботӣ рӯзи 7 май натиҷаҳои раъйдиҳиро бекор карда амр дод, ки овоздиҳии нав рӯзи 23 июн баргузор шавад. Як намояндаи ҳизби ҳоким гуфт, баъзе масъулоне, ки сандуқҳои раъйро назорат мекарданд, ходимони ҷамъиятӣ набуданд ва бархе санадҳои интихоботӣ бо натиҷаҳои овоздиҳӣ бидуни имзо супурда шудаанд. Акрам Имомоғлу, намояндаи ҳизби Ҷумҳуриявии мардумии Туркия, ки дар интихоботи мири шаҳри Истамбул пирӯз шуд, қарори мақомоти интихоботиро ҳамчун тасмими “хоинона” маҳкум кард. Гузоришҳо ҳокист, ки дар паи тасмими ниҳоди интихоботӣ, садҳо мардуми норозӣ ба хиёбонҳо рехта шиорҳои зиддиҳукуматӣ ба забон оварданд.


Сафари Попи Рум ба Македонияи Шимолӣ

Попи Рум Франсис рӯзи 7 май бо сафари нахустини таърихаш вориди Македонияи Шимолӣ шуд. Франсисро дар пойтахти ин кишвар президенти рафтаистода Гиорги Иванов ва мақомоти дигари давлативу чеҳраҳои ҷамъиятӣ пазироӣ карданд. Сафари нахустини раҳбари католикҳои ҷаҳон ба Скопйе дар шароите баргузор мешавад, ки баъди даҳсолаҳо баҳсу ихтилоф бо Юнон кишвар тоза тағйири ном кард ва роҳи худро ба узвияти НАТОву Иттиҳодияи Аврупо боз намуд. Қарор аст попи Рум дар майдони марказии Скопйе намози ҷамъӣ баргузор кунад. Македонияи Шимолӣ, ки аз 2,1 миллион ҷамъият иборат аст, макони зисти аксар провославҳо мебошад. Дар ин кишвар ҷомеаи азими мусалмонони албанитабор ҳам зиндагӣ мекунад ва шумори католикҳояш тақрибан 15 ҳазор нафар гуфта мешавад. Дар як мулоқот бо раҳбарияти кишвар, попи Рум фазои бисёрмиллатаи Македонияи Шимолиро ситоиш карда ин кишварро намунаи ҳамзистии сулҳомез ва ҳам пуле миёни Шарқу Ғарб номидааст.

Сафири ИМА дар Киев пеш аз мӯҳлат мақомашро тарк мекунад

Сафири ИМА дар Украина моҳи май ва ду моҳ пеш аз анҷоми мӯҳлати расмии кораш мақомашро тарк мекунад. Чор нафари огоҳ аз ин тасмим рӯзи 6 май ба Радиои Озодӣ гуфтанд, ки Мери Йованович дар миёнаҳои моҳи май аз мақом канор меравад. Бар асоси иттилое, ки тавассути имейли ирсолшуда ба Радиои Аврупои Озод/Радиои Озодӣ нашр шудааст, Йованович қарор аст 20 май аз мақом канор равад. Вале чор мусоҳиби Радиои Озодӣ сабаби тарки мақом кардани сафири Амрикоро фош накарданд. Зоҳиран то таъин шудани сафири нав дар ин мақом кордоре раҳбарии намояндагии дипломатиро ба ӯҳда хоҳад дошт, ки маъмулан ин мақомро афсари аршади амалкунанда ба ӯҳда мегирад. Чор нафар, аз ҷумла кормандони сафорат ва дигарҳо ба шарти ифшо нашудани номашон сӯҳбат мекарданд, ба он хотир, ки салоҳияти сӯҳбат бо матбуотро надоранд.

Дар изҳороти департаменти давлатии Амрико, ки рӯзи 6 май аз ҷониби сухангӯи ин ниҳод ба Радиои Озодӣ ирсол шуд, гуфта мешавад, ки Йованович “ҳамонгуна ки ба нақша гирифта шуда буд, рисолати сесолаашро дар Киев соли 2019 ба анҷом расонидааст”. Сухангӯ гуфт, ки “таърихи тасдиқшудаи хатми салоҳиятҳояш дар моҳи май бо мӯҳлати интиқоли қудрат дар Украина мувофиқ омадааст”. Сухангӯ гуфт, ки “тими сафорати ИМА дар Киев ва Вашингтон ҳамкории худро бо ҳукумати Украина ва ҷомеаи шаҳрвандӣ ба хотири тақвияти шарикӣ идома меёбад”. Ҷузъиёти бештар аз ин нашр намешавад.

Йованович, ки августи соли 2016 ба вазифаи сафири ИМА дар Киев таъин шуд, дар хатти пеши талошҳо барои ба эътидол овардани иқтисоди заъиф ва суръат бахшидан ба ислоҳот дар самти мубориза бо коррупсия қарор дошт. Йованович инчунин пуштибони ҳукумати Украина дар муқовимати нирӯҳои ҳукуматии ин кишвар бо ҷангиёни ҷудоиталаб дар шарқи Украина аз соли 2014 буд.

Йованович оғози моҳи марти соли ҷорӣ ва дар остонаи интихоботи президентӣ таваҷҷӯҳро ба худ ҷалб кард. Ӯ аз Киев тақозо кард, ки додситони вижаи зидди коррупсияро аз мақомаш барканор кунад ва ин изҳороти як дипломати ғарбӣ аз назари матубот дур намонд.

Президент Петро Порошенко, ки барои беамалӣ дар муқобили коррупсия интиқод шудааст, рӯзи 21 апрел дар даври дуюми интихобот дар баробари ҳаҷвнигори маъруф Владимир Зеленский мағлуб шуд.

Йованович инчунин моҳи марти соли ҷорӣ мавриди ҳадафи додситони кулли Украина Юрий Лутсенко қарор гирифт, ки иддао кард, ки гӯё сафири Амрико дар мулоқоти аввали рӯбарӯяш ба ӯ “феҳристи афродеро додааст, ки набояд мавриди пайгард қарор гиранд”.

Ин иддао дар як мусоҳиба бо нашрияи The Hill, мақарраш дар Вашингтон нашр шуд, ки баъдан мавриди вокуниши ғайримаъмулии Департаменти давлатӣ гардид. Дар изҳороте, ки ин ниҳод нашр кард, гуфта шуд, “иттиҳомоти додситони кулли Украина дуруст нест ва бо ҳадафи ба ҳам задани обрӯи сафир Йованович карда шудааст”.


Изҳороти Лутсенко дертар ҳам мавриди таваҷҷӯҳи бештар шуд, вақте писари президенти ИМА Доналд Трамп онро дар саҳифаи худ дар Твиттер бознашр кард.

Хабарнигорони Reuters аз зиндони Мянмар озод шуданд. ВИДЕО

Ду хабарнигори зиндонии оҷонии Reuters, ки барои пӯшиши бӯҳрони мардуми роҳинҷа дар Мянмар муҷозот шуданд, рӯзи 7 май бар асоси афви президентӣ ва дар паи маъракаи сартосарӣ бо даъвати раҳоии онҳо ба озодӣ баромаданд. Хабарнигорон Ва Лони 32 ва Сое Оои 28-сола баъди 16 моҳи ҳабс аз зиндони Инсейни воқеъ дар шаҳри Янгони Мянмар озод шуданд.

Онҳо моҳи сентябри соли 2018 бо иттиҳоми фош кардани асрори давлатӣ ба ҳангоми гузориш додан аз маъракаи зиддишӯришиён ба 7 соли ҳабс маҳкум шуданд. Амалиёти артиши Бирма, ки мавриди маҳкумияти ҷомеаи ҷаҳонӣ шуд, 700 ҳазор мусалмони роҳинҷаро маҷбур кард, ки аз Мянмар ба самти Бангладеш фирор кунанд.

Низомиён гуфтанд, ки амалҳои онҳо вокуниш ба ҳамлаҳои шӯришиёни мусаллаҳи роҳинҷа буд.

Хабарнигорони Рейтерс аз зиндони Мянмар раҳо шуданд
лутфан мунтазир бошед

Феълан кор намекунад

0:00 0:01:41 0:00

Мақомоти СММ ва дигар ҷонибҳо ҳодисаҳои Мянмарро поккориҳои қавмӣ ва ҳатто наслкушӣ унвон карданд.

Ҳабси ду хабарнигор маҳкумият ва интиқодҳои созмонҳои ҳомии ҳуқуқ, ҳукуматҳои ғарбӣ ва созмонҳои ҳомии журналистонро ба бор овард. Моҳи апрел ба журналистони зиндонӣ ҷоизаи Пулитсер барои гузоришҳои байналмилалӣ тақдим шуд, ки баландтарин ҷоиза дар бахши журналистика ба шумор меравад.
Рӯзи 23 апрел Додгоҳи олии Мянмар муроҷиати ахири журналистонро, ки зидди ҳукми 7 соли зиндон ариза дода буданд, рад кард, вале ниҳоят президент Вин Мин дар қатори 6520 зиндонии афвшуда исми ин ду хабарнигорро ҳам ворид кард.

Ҳарду хабарнигор гуфтанд, ки ба хотири норизоияти мақомот бо гузоришҳои онҳо пушти зиндон рафтанд.

Дар Қазоқистон тадобири амниятӣ пурзӯр шуд

Вазорати умури дохилии Қазоқистон эълом кард, ки аз 6 то 12-уми майи соли равон тадобири амниятӣ дар ин кишвар пурзӯр хоҳад шуд.

"Пулис ба хотири таъмини амният ҳангоми баргузории роҳпаймоии "Полки абадӣ" дар шаҳрҳои кишвар чора хоҳад андешид. Дар робита ба ҳама гуна навъи нақзи тартибот ва амалҳое, ки ба иштирокчиёни роҳпаймоии мазкур нороҳатӣ эҷод мекунанд, дар доираи қонунгузорӣ вокуниши сареъ карда мешавад",-омадааст дар иттилоияи вазорат.

Ба огаҳии манбаъ, шумори кормандони пулис дар кӯча ва ҷойҳои ҷамъиятӣ афзоиш дода шудааст.

Пештар, дар ҷараёни ҳамоишҳои осоиштаи эътирозии 1-уми май дар шаҳрҳои Нурсултон ва Алмаато 80 кас боздошт карда шуд. Бештари онҳо дар "нақзи тартиботи баргузории ҷамъомади осоишта" айбдор гаштанд. Додгоҳ даҳҳо фаъоли маданиро аз 5 то 15-рӯзӣ ҳабс ё ҷарима кард.

Вакили дифои пешини Трампро ба зиндон бурданд

Вакили дифои пешини президенти ИМА Доналд Трамп -- Майкл Коэн рӯзи 6-уми май ба зиндони Отисвилл, воқеъ дар 100-километрии шаҳри Ню-Йорк интиқол ёфт. Ӯ дар онҷо се соли муҳлати ҷазояшро адо мекунад.

Коэн дар як суҳбати кутоҳ ба рӯзноманигорон гуфт, "рӯзеро, ки метавонад ҳақиқатро ифшо кунад, бесаброна мунтазир аст". Вай ҳамчунин афзуд, бадбинии нажодӣ, фиребгарӣ ва ноадолатиеро, маҳкум мекунад, ки дар раҳбарияти кишвараш дида мешаванд.

Додгоҳ моҳи декабри соли гузашта Коэнро дар нақзи қоидаҳои сармоягузории маъракаи интихоботӣ ва саркашӣ аз андоз айбдор кард. Коэн моҳи феврал ҳангоми суханронӣ дар Конгресс Трампро "қаллоб" ва "нажодпараст" номид.

Ба гуфтаи ӯ, Трамп дар ҷараёни маъракаи пеш аз интихоботии худ бо ҷониби Москва дар бораи сохтмони биноҳое гуфтугӯ мекард. Ҳарчанд бар асоси қонун ин ҳақро надошт. Трамп дар посух Коэнро ба дуруғгӯӣ айбдор кард.

Тирандозӣ ба сӯи хабарнигори "Настояшее Время" дар Киев

Владимир Рунетс.

Як иштирокчии задухурдҳои мусаллаҳонаи Донбасси Украина хабарнигори "Настояшее Время" дар Киев Владимир Рунетсро шаби 5-уми май паронд. Рӯзноманигор аз ноҳияи пояш захмӣ шуда, ба беморхона интиқол ёфт. Ба гуфтаи табибон, дар ҳоли ҳозир ҷони ӯ дар хатар нест, вале бояд ду ҷарроҳиро паси сар кунад.

Аз нафари ҳамлагар ихтиёрии артиши Украина Владимир Регеши 45-сола ном бурда мешавад. Ба гуфтаи Рунетс, низомӣ аз духтаре, ки шиноси рӯзноманигор аст, қарздор буда, пайваста ӯро таҳдид мекардааст. Регеш шаби 5-уми май бо силоҳ ба майхонае, ки рӯзноманигор ҳамроҳи духтару чанд дӯсти дигараш нишаста буданд, ҳамла кардааст.

"Дар даст тапонча омад ва ба осмон тир андохт ва таҳдид кард, ки духтарро мепаронад",-афзуд рӯзноманигор.

Рунетс талош кардааст, то мардро ба гап дарорад, ки силоҳро канор гузорад, вале дар натиҷа захмӣ шудааст. Регеш пас аз ҳодиса нахуст ба ҷои номаълум паноҳ бурда, вале дертар худро ба пулис таслим кард.

Ба огаҳии Вазорати умури дохилии Украина, зидди низомӣ бар пояи банди "авбошӣ бо истифода аз силоҳ" парвандаи ҷиноӣ боз шуда, ба ӯ аз се то ҳафт соли маҳрумият аз озодӣ таҳдид мекунад.

Владимир Рунетс яке аз рӯзноманигорони маъруфи украин буда, борҳо аз маҳалли задухурдҳои мусаллаҳонаи Донбасс гузориш додааст. Аз соли 2017 ба ин сӯ хабарнигори "Настояшее Время" аст.

Манзили ҳомии ҳуқуқи зиндонӣ дубора ба ҳабс гирифта шуд

Манзили ҳомии ҳуқуқ Азимҷон Аскаров, ки ба зиндони якумрӣ маҳкум шудааст, дубора ба ҳабс гирифта шуд. Дар ин бора вакили мудофеи вай Валерян Вахитов хабар дод. Ба гуфтаи вакил, бори нахуст манзили Аскаровро дар соли 2010 ба ҳабс гирифтанд, аммо бо талошҳои ҳомиёни ҳуқуқ ва вакилони мудофеъ, манзил аз ҳабс раҳо шуд. Соли 2012 додгоҳ Аскаровро вазифадор кард, ки ба ҳамсари пулиси кушташуда бештар аз 2400 доллар ҷуброн пардозад.

"Манзил ба Азимҷон Аскаров мерос мондааст. Дар робита ба он ки Аскаров ба ҳабси якумрӣ маҳкум шудааст, ҳамсари вай мехост, хонаро ба номи худ сабт кунад. Аммо додгоҳи вилоятӣ қарори ҳафт соли пешро ёдовар шуда, манзилро дубора ба ҳабс гирифт. Дар ин манзил ҳамсари куҳансоли Аскаров бо фарзандонаш зиндагӣ мекунад", - хабар дод вакили мудофеъ.

Азимҷон Аскаров, яке аз ҳомиёни ҳуқуқи ноҳияи Бозор-Қурғони вилояти Ҷалолобод баъди даргириҳои қавмии байни қирғиз ва ӯзбекҳо дар моҳи июни соли 2010 бо гумони ташкили бетартибиҳо ва ширкат дар куштори корманди пулис боздошт шуд. Бо қарори ҳамаи зинаҳои додгоҳӣ вай ба ҳабси абад маҳкум гардид.

Моҳи апрели соли 2016 Кумитаи ҳифзи ҳуқуқи инсони СММ аз мақомоти Қирғизистон даъват кард, ки ҳукми Аскаров бозбинӣ шавад.

Мақоми аввали Узбекистон дар раддабандии фурӯши тилло

Дар 3-моҳаи аввали соли ҷорӣ Узбекистон дар ҷаҳон аз рӯи фурӯши ҳаҷми тилло дар мақоми аввал қарор гирифт. Дар ин бора дар ҳисоботи World Gold Council (Шӯрои ҷаҳонии тилло) зикр шудааст.

Бино бар ин ҳисобот, Узбекистон аз моҳи январ то март 6 тонаву 200 кило тило фурӯхтааст. Мақоми дувумро Муғулистон бо 3,4 тона ва мақоми севумро Тоҷикистон бо фурӯши 1 тона тилло касб кардааст.

Русия - бузургтарин кишвари харидори тилло унвон шуд. Аз моҳи январ то марти соли ҷорӣ Бонки марказии Русия 55,3 тона тилло харидааст. Мақоми дувумро Туркия (40 тона) ва севумро Чин (33 тона) ишғол карданд.

Моҳи апрел Бонки марказии Узбекистон хабар дод, ки то охири соли ҷорӣ тасмим дорад, 80 тона тило фурӯшад. Ин нишондод нисбат ба соли гузашта 10 тона бештар аст.

Ба иттилои Бонки марказии Узбекистон, буҷаи давлатӣ аз ҳисоби фурӯши 80 тона тило 3,4 миллиард доллар даромад мебинад.

Раисони Кӯлобу Истаравшан нав шуданд

Хайрулло Амонулло

Бо фармонҳои президенти Тоҷикистон аз рӯзи 6 май, раисони як қатор шаҳру навоҳӣ нав шуданд. Аз ҷумла, дар мақоми раиси шаҳри Кӯлоб ба ҷои Хайрулло Амонулло – Баҳром Иноятзода, раиси шаҳри Истаравшан, дар шаҳри Истаравшан ба ҷои Иноятзода – Амирхон Қурбонзода иҷрокунандаи раиси шаҳр таъин шуданд. Санавбар Самизода аз вазифаи раиси шаҳри Левакант озод шуда, Зарина Давлатзода иҷрокунандаи ин вазифа таъин шуд.

Бо фармони дигари президент Абдуҷаббор Баҳодурзода аз мақоми раиси ноҳияи Ҷомӣ озод шуда, Ёқуб Саид иҷрокунандаи раиси ноҳия таъин шудааст. Ҳамаи барканоршудаҳо бо сабаби ба вазифаи дигар гузаштан аз мақомҳои худ озод карда шудаанд.

Бо фармони дигари президент Султон Раҳимзода сафири Тоҷикистон дар Ҳиндустон таъин шуд. Вазифаи сафир аз моҳи октябри соли гузашта баъди аз ин мақом озод шудани Мирзошариф Ҷалолов холӣ буд. Ҷалолов он замон ба мақоми сафири Тоҷикистон дар Япония таъин шуда буд.

Рӯзи 6 май инчунин Султон Раҳимзода бо сабаби ба кори дигар гузаштанаш аз вазифаи муовини якуми Вазири энергетика ва захираҳои оби Тоҷикистон озод карда шуд.

Дар Тоҷикистон вазифаҳои раисони ҳукуматҳои маҳаллӣ ва вазирон интихобӣ нест ва танҳо бар асоси фармони президент таъин шуда, баъдан ин номзад дар маҷлисҳои маҳаллӣ тасдиқ мешаванд.

Майк Помпео гуфт, русҳо бояд аз Венесуэла бираванд

Майк Помпео

Майк Помпео, вазири корҳои хориҷии Амрико аз Русия хостааст, ки аз Венусеэла берун шавад, дар ҳоле ки Сергей Лавров ҳамтои руси ӯ “аз Вашингтон даъват кард, ки аз “барномаҳои бемасъулиятона”-и худ дар Амеркои Лотинӣ даст кашад.

Помпео ва Лавров рӯзи 5 май, ва дар замоне суҳбат карданд, ки кашмакашҳо миёни Маскав ва Вашингтон доир ба бӯҳрони Венесуэла авҷ мегирад. Интизор меравад ду вазир ҳафтаи оянда дар Финландия мулоқот кунанд.

Хуан Гуайдо роҳбари мухолифон моҳи январ худро раҳбари давраи гузариш эълон кард. Ӯ ҳамчун раиси Шурои миллии таҳти назорати мухолифони кишвар аз қонуни асоси истифода кард ва бо тасдиқи он ки интихоботи президентии Николас Мадуро дар соли гузашта ғайри қонунӣ буд, худро президенти муваққатӣ эълон кард.

Гуайдоро беш аз 50 кишвар ҷонибдорӣ мекунанд, аз ҷумла Русия, Эрон, Чин дар миёни кишварҳое мебошанд, ки Мадуроро дастгирӣ мекунанд.

“Русҳо бояд бароянд,” гуфт Помпео ба телевизиони ABC. “Ман рӯзҳои наздик бо вазири корҳои хориҷии Русия Лавров вохӯрӣ мекунам. Ин рушан аст. Мо мехоҳем, Русҳо берун шаванд, мо мехоҳем Эрониҳо берун шаванд, мо мехоҳем Кубоиҳо ҳам берун раванд ва ин хеле рушан” аст, илова кардааст Помпео.

Имрӯз Сергей Лавров Иёлоти Муттаҳидаро ба роҳбарии “як маъракаи бемонанде” муттаҳам кард, ки ба гуфтаи ӯ барои сарнагунии мақомоти Венусеэла ба роҳ монда шудааст.

Музокироти сулҳи намояндагони ИМА ва Толибон ба таъхир афтод

Музокираҳои сулҳи миёни намояндагони ИМА ва Толибон дар пойтахти Қатар шаҳри Давҳа бо шурӯи моҳи Рамазон дар таърихи 6 май ба таъхир гузошта шуд. То ин замон мушкили аслии ду ҷониб бар сари мушаххас кардани замони тарки Афғонистон кардани нирӯҳои хориҷӣ буд. Дар давоми чандин ҳафтаи ахир амрикоиҳову Толибон аз наздик музокира мекунанд ва ин даври шашуми музокироти сулҳи миёни ИМА ва Толибон мебошад. Ҳадафи ниҳоӣ – хатми ҷанги 18-сола дар Афғонистон аст, вале Толибон мегӯянд, ки ҷараёни музокираҳо дучори мушкил шудааст.

Сухангӯи сиёсии Толибон Суҳайл Шоҳин дар Твиттери худ навишт, ки музокираҳои сулҳ дар рӯзи аввали моҳи Рамазон боздошта шуда, қарор аст дар рӯзҳои баъдӣ идома ёбад. Шоҳин рӯзи 5 май ба хабаргузории AFP гуфт, ки дар марҳилаи баррасии замони хориҷ шудани нирӯҳои хориҷӣ аз Афғонистон музокираҳо вориди “бунбаст” шуд. Пеш аз расидан ба созиш дар заминаи хуруҷи нирӯҳо, Вашингтон талаб дорад, ки гурӯҳҳои ҷангӣ амниятро таъмин ва оташбасро риоя кунанд ва дигар ӯҳдадориҳои муҳимро дар музокираҳои миёни ҳукумат ва мухолифон ба ӯҳда бигиранд.

Толибон мегӯянд, то замоне, ки ИМА фурсати замонии тарки хоки Афғонистон карданро эълон накунад, онҳо ба ҳеҷ як амале даст намезананд. Дар поёни ҷаласаи чоррӯзаи Лоя Ҷирга дар Кобул охири ҳафтаи гузашта президенти Афғонистон Ашраф Ғанӣ ба Толибон пешниҳоди оташбас дар моҳи шарифи Рамазон кард, вале ҷангиён ин пешниҳодро рад карданд.

Дар Узбекистон даромадан ба маҷмааи Ичан-Қалъаро пулакӣ карданд

Дар шаҳри Хиваи Узбекистон даромадан ба маҷмааи таърихии "Ичан Қалъа"-ро пулакӣ карданд. Аз ин ба баъд ҳар як нафар барои ворид шудан ба он бояд 10000 сӯм (беш аз $1) пардохт кунад.

Мудири маҷмаа гуфт, тасмим ба хотири афзоиши даромад аз ҳисоби сайёҳон гирифта шудааст. Вале сокиноне, ки дар атрофи маҷмаа зиндагӣ мекунанд, мегӯянд, тасмими мазкур зиндагии онҳоро мушкил кардааст.

"Дар як рӯз ман маҷбурам, ба воситаи дарвозаи маҷмаа ду бор гузарам. Агар ҳар бор 10000-сӯмӣ диҳам, аз пули нафақаам чизе намемонад", - мегӯяд як сокини 69-солаи маҳаллӣ бо номи Ҷуманазар.

Як донишҷӯй аз Хива бо номи Равшанбек мегӯяд, ҳар рӯз ҳангоми баргашт ба хона маҷбур аст, ҳудуди маҷмааро давр бизанад. "Агар шумо ба воситаи "Ота дарвоза" гузаштан хоҳед, бояд 10000 сӯм пардохт кунед. Равуои сокинони атрофи маҷмаа хеле мушкил шудааст. Роҳ ба сӯи хонаҳои худамонро пулакӣ кардаанд",-афзуд ӯ.

Раҳбарияти маҷмааи давлатии таърихии Ичан-Қалъа мегӯяд, ба хотири афзоиши даромад аз ҳисоби ҷаҳонгардон ворид шудан ба шаҳракро пулакӣ кардаанд. "Сокинон метавонанд ҳудуди маҷмааро давр бизананд. Дар оянда ният дорем, ки барои сокинони атрофи Ичан-Қалъа корти махсус ҷорӣ кунем",-изҳор дошт яке аз масъулони маҷмаа.

Хиваи Узбекистон ба Рӯйхати мероси фарҳангии ғайримодии ЮНЕСКО ҳамчун яке аз қадимитарин шаҳрҳои Осиёи Марказӣ ворид шудааст.

Дар мактабҳои Қирғизистон таҷлили "Занги охир" манъ шуд

Гулмира Худойбердиева, вазири маориф ва илми Қирғизистон фармоне содир кард, ки дар асоси он, мудирон ва омӯзгорони мактабҳо аз дарёфти туҳфа ва ҷамъоварии маблағ барои баргузории занги охир манъ шудаанд. Ташкили чорабиниҳо дар марказҳои дилхушӣ бо иштироки хатмкунандагон ҳам манъ шудааст.

Сардорони шуъбаҳову раёсатҳои маорифи шаҳриву ноҳиявӣ дар остонаи хатми мактаб навбатдории шабонарӯзӣ ташкил ва аз истифодаи маводи оташангез, мушакҳои маҷруҳсозанда ва дигар василаҳои ба сиҳатии хатмкунандагон зараррасон пешгирӣ мекунанд. Барои риоя накардани фармони мазкур мудирон аз мақом барканор хоҳанд шуд.

Занги охир дар мактабҳои Қирғизистон соати 9-и субҳи рӯзи 25-уми май садо медиҳад.

"Ҳомии қазоқтаборон" як моҳи дигар дар ҳабси хонагӣ мемонад

Серикҷон Билаш.

Дар шаҳри Нурсултони Қазоқистон рӯзи 5-уми май додгоҳе ҳабси хонагии роҳбари созмони сабтиномнашудаи "Атажурт ериктилерӣ" Серикҷон Билашро, ки ҳомии ҳуқуқи қазоқтаборон ҳам ном бурда мешавад, то 10 июн тамдид кард.

Айман Умарова, вакили мудофеи Серикҷон аз додгоҳ хост, ки ӯро аз Нурсултон ба Алмато фиристад ва вай ҳабси хонагиро дар маҳалли зисташ пушти сар кунад.

Серикҷон Билаш дар додгоҳ гуфт, ки баъди интиқол ёфтанаш ба Нурсултон ба вай фишор овардаанд, ки зидди сиёсатмадори мухолиф Мухтор Аблязов изҳорот диҳад ва аз хизмати вакили мудофеъ Аймар Умарова даст кашад. Билаш мегӯяд, парвандааш сиёсӣ аст.

Серикҷон Билаш дар "роҳбарӣ ва ширкат дар фаъолияти созмони сабтиномнашуда" айбдор мешавад. Билаш - қазоқтаборест, ки аз Чин ба Қазоқистон кӯч бастааст.

Билаш дар гузашта гуфта буд, ки бо айбнома розӣ нест. Вай афзуд, гуруҳи таъсисдодаи вай дар шабакаҳои иҷтимоӣ ба касоне кумак мерасонад, ки дар Шинҷони Чин зери фишор буданд. Аъзои гуруҳ ҳеҷ гуна ҳуҷҷат паҳн намекунанд ва муҳру имзо надоранд.

Билаш гуфт, гуруҳи онҳо танҳо дафтари корӣ дорад.

Серикҷон Билаш дар моҳҳои охир дар шаҳри Алмато чанд нишасти хабарӣ анҷом дода, аз саргузашти қазоқтабороне нақл кард, ки дар Чин иҷборан нигаҳ дошта мешаванд.

Натиҷаҳои муқаддамотӣ: Стево Пендаровски президенти Македонияи Шимолӣ шуд

Стево Пендаровски, номзади Иттиҳоди сотсиал-демократҳои Македонияи Шимолӣ бар асоси натиҷаҳои муқаддамотӣ, барандаи интихоботи президентӣ шуд. Пендаровски бо ваъдаи ба узвияти НАТО ва Иттиҳодияи Аврупо шомил кардани кишвараш дар интихобот пешгом буд. Дар паи шумориши 100 дарсади раъйҳои интихобот, ки 5 май баргузор шудки Пендаровски 51,66 дарсади овозҳоро бурда, аз рақиби ӯ Гордана Силяновска-Давкова 44,73 дарсади мардум пуштибонӣ кардаанд. Силяновска-Давкова аз ҷониби ҳизби муҳофизакори мухолифи ҳукумат намояндагӣ мекард. Комиссиюни марказии интихоботҳои Македонияи Шимолӣ гуфт, ки дар интихобот 46,6 дарсади шаҳрвандони қобили раъй ширкат карданд. Барои баргузоршуда эътироф шудани интихобот ширкати 40 дарсади мардум кифоят мекунад. Комиссиюни интихоботҳо гуфт, ки интихобот бидуни кадом ҳодисае баргузор шуд, вале як ҳизби мухолифин ҳукуматро дар “дасткориҳои интихоботӣ” айбдор карда гуфт, ки дар ҷараёни ин маърака хилофкориҳое мушоҳида шудааст.

Дар Ишқобод "шикор"-и мошинҳои сиёҳ қатъ шудааст

Пулиси шаҳри Ишқобод боздошт ва ҷаримаи ронандагони мошинҳои сиёҳро қатъ кардааст. Чандин манбаъ гуфтанд, ки қарори манъи истифодаи мошинҳои ғайрисафед барои сокинони пойтахти Туркманистон бекор карда шуд.

"Аз ибтидои ҳафтаи гузашта боздошт ва ба ҷаримагоҳ бурдани мошинҳое, ки рангашон сафед нест, қатъ шудааст. Ҳоло танҳо барои санҷиши ҳуҷҷатҳо боз медоранд", - иттилоъ дод хабарнигори Бахши туркмании Радиои Озодӣ 5 май.

Дар Туркманистон беш аз як сол буд, ки истифодаи мошинҳои ғайрисафед барои сокинон манъ гашта буд. Нозирони роҳ бо истинод ба дастури шифоҳии раҳбарияти худ ронандагони чунин мошинҳоро боз дошта, ҷарима мекарданд.

Ба гуфтаи хабарнигори мо, аз ҳафтаи гузашта ба ин сӯ дар кӯчаву хиёбонҳои пойтахти Туркманистон мошинҳои дорои ранги ғайрисафед пайдо шудаанд.

"Хабар хеле тез ба воситаи телефон ва паёмакрасонҳо паҳн шуд. Манъи истифодаи мошинҳои ғайрисафед яке аз мавзуъҳои доғ дар ҷомеа буд", - мегӯяд хабарнигор.

Талошҳо барои дарёфти назари мақомот дар ин замина бенатиҷа буданд.

Радиои "Гранд" робитаи худро бо шавҳари пешини Гулнора Каримова рад кард

Рустам Мадумаров.

Раҳбарияти нахустин радиои хусусӣ ва тиҷории Узбекистон – Радиои "Гранд" робитаи худро бо шавҳари пешини Гулнора Каримова рад карда, қарори ба нафъи давлат мусодира шудани радиоро шарҳ дод. Дар шаҳри Тошканд ахиран саҳмияҳои ширкати "EDEL VEYS-ALI"-ро, ки молики Радиои "Гранд" аст, ба фурӯш гузоштанд.

Масъулони радио бо нашри баёнияе дар шабакаи иҷтимоии "Фейсбук" гуфтанд, "пас аз 20 соли фаъолият ба назди раҳбар ва муассиси мо Светлана Хон омада, гуфтанд, ки ин радиои шумо нест. Ҳамаи санадҳое, ки аз соли 2002 молик будани Хон С. Н.-ро тасдиқ мекунанд, мавҷуданд. Ба тамоми ниҳодҳо муроҷиат кардем, вале бенатиҷа буд".

Ҳамчунин қайд шудааст, ки дар ягон санад номи шавҳари пешини Гулнора Каримова -- Рустам Мадумаров оварда нашудааст ва он ҳеч робитае бо радио надорад.

"Додгоҳ қарор кард, ки радио ба нафъи давлат мусодира шавад. Ягон корманди моро ба мурофиа даъват накарданд. Танҳо охири соли гузашта Светлана Хонро аз содир шудани чунин қарор огаҳ карданд. Мо бовар дорем, ки инҷо иштибоҳи бузурге шудааст, вале бо сабабҳое он ислоҳ намешавад",-афзудаанд масъулони радио.

Пештар расонаҳо хабар доданд, ки ширкати мазкур гӯиё ба шавҳари пешини духтари калонии президенти нахустини Узбекистон тааллуқ дорад. Онро 8-уми май дар музояда ба фурӯш гузошта, нархашро 4,1 миллиард сӯм муайян кардаанд.

"Тавре аз хабарҳо маълум шуд, арзиши радио ду баробар поин бурда шудааст ва шахсе аллакай тасмим гирифтааст, ки онро бихарад ва танҳо рӯзи музоядаро мунтазир аст", - омадааст дар баёния.

Зиёиёни узбекистонӣ мехоҳанд, ба забони русӣ мақоми расмӣ дода шавад

Дар остонаи сафари вазири корҳои хориҷии Русия Сергей Лавров ба Узбекистон, наздики 20 тан аз намояндагони зиёиёни русзабон пешниҳод карданд, ки дар Узбекистон ба забони русӣ мақоми расмӣ дода шавад.

Ин муроҷиати зиёиён, ки дар саҳифаҳои расонаҳои интернетӣ нашр шуд, таблиғоти Кремл унвон гирифт. Ташаббуси мазкур дар чорабинии бахшида ба 25-солагии Маркази фарҳанги русӣ дар шаҳри Тошканд рӯ зад ва масъулияти ҷамъоварии имзоҳоро рӯзноманигор Аъло Хоҷаев ба дӯш гирифт.

"Дар рӯзи нашри мақола оиди додани мақоми расмӣ ба забони русӣ ҳамагӣ се имзо дида мешуд. Вале баъдтар имзои зиёиёни дигар пайдо гардид", - гуфт рӯзноманигор Сардор Салим.

21 октябри соли 1989 Шӯрои олии Узбекистони Шӯравӣ ба забони ӯзбекӣ мақоми давлатӣ дод.

Ҳалокати 41 нафар ҳангоми сӯхтори ҳавопаймо дар Шереметево. ВИДЕО

Як ҳавопаймои ширкати "Аэрофлот" ҳангоми нишасти изтирорӣ дар фурудгоҳи "Шереметево"-и Маскав оташ гирифт. Ҳодиса рӯзи 5 май рӯй дод.

Хабаргузории ТАСС навишт, ки дар дохили ҳавопаймо 73 мусофир ва 5 узви экипаж буданд. Кумитаи тафтишотии Русия шаби якшанбе дар баёнияи расмӣ гуфт, аз 78 нафар 37 нафар зинда мондааст. Қаблан ин ниҳод ҳалокати сездаҳ нафарро тасдиқ карда буд.

Ҳавопаймои "Суперҷет"-и истеҳсоли Русия дар хатсайри Маскав-Мурманск парвоз дошт. Баъди чанд дақиқаи парвоз сарнишинон нишасти изтирорӣ талаб кардаанд.

Хадамоти “Flight Radar” гузориш дод, ки ин ҳавопаймо 45 дақиқа дар ҳаво буда, пеш аз нишасти изтирорӣ ду дафъа дар атрофи Маскав чарх задааст.

Ширкати "Аэрофлот" гуфт, ҳангоми нишасти изтирорӣ муҳаррики ҳавопаймо оташ гирифтааст. Ҳамин манбаъ афзуд, ҳавопаймо бо мушкили фаннӣ ё техникӣ ба фурудгоҳи “Шереметево” баргашта буд. Таҳқиқи ҳодиса оғоз шудааст.

Ҳалокати камаш 13 нафар дар фурудгоҳи Шереметевои Маскав
лутфан мунтазир бошед

Феълан кор намекунад

0:00 0:01:06 0:00

СММ: миллионҳо нафар дар Куриёи Шимолӣ гуруснагӣ мекашанд

Зиёд аз 10 ё наздики 40 дарсади аҳолии Курёи Шимолӣ ҳамарӯза бо камбуди ғизо рӯбарӯяянд ва вазъият дар ин кишвар ба иллати бадтарин хушксоли даҳаи охир бадтар мешавад.

Ин хабар аз гузориши нави СММ бармеояд, ки зимни кори ҳайатҳои Барномаи ҷаҳонии озуқа ва кишоварзӣ дар Курёи Шимолӣ омода шудааст. Коршиносон аз аввали моҳи апрел дар ни кишвар вазъиятро меомӯзанд.

Созмонҳои байнулмилалӣ ба ҳазорон нафаре кумак мекунанд, ки дар бадтарин шароит қарор доранд. Тибқи маъмул инҳо асосан занон ва кӯдаконанд, ки аз тариқи боғчаи бачагон ва бемористонҳо хӯрок ба даст меоранд.

Попи Рум хост, булғорҳо дили худро бар рӯи муҳоҷирон боз кунанд

Попи Рум дар София

Попи Рум аз мардуми Булғористон хост, дилу хонаҳои худро ба рӯи муҳоҷирон боз кунанд. Ӯ гуфт, Булғористон, ки ба сабаби муҳоҷират аҳолиаш кам мешавад, бояд хуб бидонад, ки чӣ мардумро ба тарки сарзаминҳояшон водор мекунад.

Поп Франсис дар ин бора рӯзи 5-уми май ва ҳангоми мулоқот бо гуруҳе аз масеҳиёни католик суҳбат кард. Ӯ ҳамчунин ба як маркази паноҳҷӯён дар наздикии шаҳри София меравад ва сипас ба Македонияи Шимолӣ сафар мекунад.

Боздиди Попи Рум аз Булғористон дорои аҳамияти зиёд аст, чун ба муносибати Калисои Католик ва Калисои Православӣ бармегардад. Поп Франсис саъй дорад, фосила байни ду шохаи умдаи дини насрониро камтар кунад.

Булғористон танҳо кишвари православӣ аст, ки дар комиссиёне ҳузур надорад, ки ҳадафи кори он беҳтар кардани муколама байни ду калисо аст. Дар Булғористон 44 ҳазор пайрави дини католик зиндагӣ мекунанд.

Ёфтҳои бештар

Гуфтугӯ бо Умед Бобохонов, муассис ва сардабири "Азия-Плюс"
лутфан мунтазир бошед

Феълан кор намекунад

0:00 0:16:08 0:00
Гузоришҳои радиоӣ
ПОДКАСТ
Гуфтугӯ бо Умед Бобохонов, муассис ва сардабири "Азия-Плюс"
Гузоришҳои радиоӣ

Гузоришҳои видеоӣ

Тарс аз вируси нав дар Тоҷикистон
лутфан мунтазир бошед
Embed

Феълан кор намекунад

0:00 0:02:18 0:00
XS
SM
MD
LG