Пайвандҳои дастрасӣ

Хабари нав

Хабарҳо

RWB аз Тоқаев хост, ки роҳи Назарбоевро идома надиҳад

Созмони Хабарнигорони бидуни марз "сензураи сартосарии Интернет"-ро дар Қазоқистон маҳкум кард. Масъулони созмон рӯзи 10 май аз президенти муваққати Қазоқистон Қосимҷомарт Тоқаев хостанд, ки аз шеваҳои таъқибгароёнаи раисиҷумҳури пешин Нурсултон Назарбоев даст кашад.

Дар изҳороти созмон омадааст, ки субҳи 9 май дастрасӣ ба шабакаҳои иҷтимоӣ, аз қабили Facebook, Instagram, YouTube, паёмакрасони Telegram ва чанд сомонаи дигари хабарӣ дар Қазоқистон маҳдуд карда шуданд.

Ба гуфтаи масъулони Хабарнигорони бидуни марз, "сабаби маҳдудияти навбатӣ эътирози осоиштае гашт, ки мухолифи қазоқ Мухтор Аблязов аз хориҷ ба он даъват карда буд".

"Мақомоти Қазоқистон агар мехоҳанд, воқеӣ будани раванди ислоҳоти худро нишон диҳанд, бояд аз таҷрибаҳои таъқибгароёнаи пешин даст бикашанд. Сензураи дастрасӣ ба Интернет яке аз омилҳое ҳаст, ки Қазоқистонро дар раддабандии ҷаҳонии озодии баён дар миёни 180 кишвар дар мақоми 158-ум қарор додааст. Ин нишондод ба имиҷи кишвар дар арсаи байналмилалӣ таъсир хоҳад расонд", -- гуфтааст раҳбари бахши созмон дар Аврупо ва Осиёи Марказӣ Йоҳанн Бир.

Хабарнигорони бидуни марз мегӯяд, маълум аст, мақомоти Қазоқистонро мавҷи эътирозҳое ба ғазаб овардааст, ки дар пайи истеъфои Нурсултон Назарбоев дар миёнаҳои моҳи март оғоз шуданд.

Ба назари масъулони созмон, мақомоти Қазоқистон солҳои ахир батадриҷ сензураро дар расонаҳо ва Интернет сахттар карда, "нашрияҳои миллии мухолифи асосиро дар соли 2012 бастанд".

9 май дар Қазоқистон дастрасӣ ба сомонаи бахши қазоқии Радиои Озодӣ ва чанд сомонаи хабарии маҳаллӣ маҳдуд шуд. Давоми рӯз дар чанд шаҳри Қазоқистон сокинонро дастгир карданд. Боздоштҳо баъди он сурат гирифтанд, ки Мухтор Аблязов - мухолифи қазоқ - аз сокинон хост, бо нишони эътироз ба кӯча бароянд.

Расонаҳо: Абдуллоев мехост, сиёсати давлатро зери назорат гирад

Ихтиёр Абдуллоев

Ихтиёр Абдуллоев, раиси пешини Хадамоти амнияти давлатии Узбекистон талош дошт, ки бо роҳи таъйин кардани шахсони боэътимоди худ дар ниҳодҳои қудратӣ фаъолияти сиёсии давлатро зери назорат гирад. Дар ин бора нашрияи интернетии Xabar.uz иттилоъ дод.

"Вай ба он айбдор мешавад, ки ҳаваси фармонфармоӣ дошт ва аз доираи қонун берун рафта, дар фасод фурӯ рафта буд. Дар чунин ҳолат президент маҷбур буд, ки ба вай изҳори беэътимодӣ эълом кунад", - навишт Xabar.uz.

Ба навиштаи ин расона, генерали ҳамакнун пешин дастур додааст, ки "сомонаҳои мустақил баста ва дастрасӣ ба шабакаҳои иҷтимоӣ маҳдуд шавад ва ҳамчунин фармон додааст, ки аз ҳисоби бархе аз шаҳрвандони ҳассос ҳаракати маснуии мухолифин таъсис дода шавад".

Вай бо ин амалаш ислоҳоти демократии президентро бадном сохтааст, менависад нашрия.

Ихтиёр Абдуллоев 31 январи соли 2018 раиси Хадамоти амнияти давлатӣ таъйин шуд. Вай то он замон додситони кулли Узбекистон буд.

11 феврали соли ҷорӣ бархе аз расонаҳои Узбекистон хабар доданд, ки Ихтиёр Абдуллоев ихтиёран аз мақом канор рафтааст. Вале сомонаҳои дигар навиштанд, ки Абдуллоев дар доираи як парванда бозпурсӣ мешавад.

Ҳаммуассиси Facebook: Шабакаҳо ба демократия хатар доранд

Крис Хюз, ҳаммуассиси Facebook, шабакаи иҷтимоиро инҳисорталаб ё монополист номид ва даъват кард, ки он ба далели хатар доштанаш ба демократия, тақсим карда шавад.

Дар ин бора Хюз дар як матлабаш дар нашрияи The New York Times зикр кард.

Ӯ мегӯяд, молики Facebook Марк Сукерберг бештар аз ҳар каси дигари аҳли тиҷорат ва ё ҳукуматдор нуфуз дорад.

"Танҳо Марк метавонад, тасмим гирад, ки алгоритмҳои Facebook-ро тағйир диҳад. Вай қоидаҳоро муқаррар мекунад, муайян месозад, ки ин ва ё он навишта таҳдидомез аст ё барангезандаи адоват ва метавонад, даҳони рақибонро бандад... Қудрати Марк нотакрор ва ғайриамрикоист", - навишт Хюз.

Крис Хюз пешниҳод кард, Instagram ва WhatsApp, ки ба Facebook тааллуқ доранд, ба ширкатҳои ҷудогона табдил дода шаванд. Ба гуфтаи Хюз, Комисияи федеролии тиҷорат набояд ба ҳамроҳшавии ин ширкатҳо иҷозат медод.

Вай афзуд, ки Facebook бояд давоми чанд соли оянда аз харидани ширкатҳои дигар манъ карда шавад, зеро Facebook бо харидан ва ё нусхабардории идеяҳои ширкатҳои дигар онҳоро маҳв месозад.

Хюз ҳамчунин аз Конгресс даъват кард, ки барои ҳифзи иттилои маҳрамонаи корбарони интернет оҷонсии нав таъсис диҳад.

Корманди "Амонатбонк" 25 моҳ нафақаи зани мурдаро гирифтааст

Президент Эмомалӣ Раҳмон рӯзи 10 май дар ҷараёни мулоқот бо намояндагони бахши молияву бонкдорӣ аз қонуншиканӣ дар сохторҳои бонкӣ махсусан ёдовар шуд ва гуфт, ки санҷиши кори «Амонатбонк», як бонки давлатӣ дар даҳ соли гузашта (2009-2018) даҳҳо ҳолати азонихуд кардани нафақаҳои афроди фавтидаро ошкор кардааст. Ба гуфтаи президент, дар паи «беназоратӣ ва фориғболии шахсони масъул» бархе кормандони бонк ва Агентии суғуртаи иҷтимоӣ ва нафақа «дар 211 ҳолат нафақаи шахсони фавтидаро ба маблағи 360 ҳазор сомонӣ тасарруф кардаанд».

Яке аз ин қазияҳо – марбут ба парвандаи маъюби гурӯҳи дуюм, нафақахӯр Надежа Лебедева будааст, ки 1-уми ноябри 2012 вафот кардааст. Ба гуфтаи президент, дар давоми 25 моҳи баъди марги ин зан ҳам ба суратҳисоби нафақаи ӯ зиёда аз 20 ҳазор сомонӣ пардохт шуда, аз ҷониби корманди “Амонатбонк” Э. Алифбеков бо истифодаи корти бонкии қалбакӣ тасарруф шудааст. Дар маҷмӯъ давоми даҳ соли гузашта дар «Амонатбонк» 235 тафтишу санҷишҳои молиявӣ гузаронида шуда, ба маблағи 151 миллион сомонӣ зарари молиявӣ ва қариб 2 миллион сомонӣ истифодаи ғайримақсадноки маблағҳои буҷетӣ ошкор шуд.

Дар робита ба озодии Батукоев се табиби қирғиз боздошт шуданд

Азиз Батукоев.

Дар робита ба ғайриқонунӣ озод шудани яке аз афроди маъруф дар олами ҷиноии Қирғизистон Азиз Батукоев се табиби кунунӣ ва пешини Хадамоти зиндонҳои ин кишварро боздошт карданд.

Раҳбари Маркази миллии ҳушдор аз шиканҷа Нуриддин Сулайманов гуфт, гумонбарон ба боздоштгоҳ интиқол ёфта, масъалаи ба ҳабси пешакӣ гирифтанашон дар ҳоли баррасӣ аст. Вазорати умури дохилии Қирғизистон дар ҳоли ҳозир аз шарҳи қазия худдорӣ мекунад.

Додгоҳи шаҳри Норин соли 2013 дар асоси хулосаи табибон Батукоевро пеш аз муҳлат озод кард. Ӯ худи он рӯз аз Бишкек ба Русия сафар кард. Озодии пеш аз муҳлати вай баҳсҳои тундеро дар ҷомеаи Қирғизистон ба бор овард.

Додситони кулли Қирғизистон Откурбек Ҷамшедов рӯзи 17-уми апрели соли равон дар порлумон гуфт, ки роҷеъ ба парвандаи озодии пеш аз муҳлати Батукоев тафтишот дубора шуруъ шудааст. Дертар табиб Эмил Макимбетовро боздошт карданд. Ӯ дар додани маълумотнома дар бораи он ки Батукоев ба бемории табобатнашаванда гирифтор аст, айбдор мешавад.

Раиси Додгоҳи олии Қирғизистон Гулбар Калиева рӯзи 1-уми май гуфт, ҳукми озодии Батукоев бозбинӣ хоҳад шуд.

Мудири ТВ-и давлатӣ дар Туркманистон барои "камбудҳои ҷиддӣ" сабукдуш шуд

Президенти Туркманистон Қурбонгулӣ Бердимуҳаммадов рӯзи 7-уми май мудири телевизиони давлатии "Мирас"-ро аз мақом барканор карда, раиси Кумитаи радио ва телевизиони ин кишварро бори охир огоҳӣ додааст.

Бино ба иттилои расмӣ, Бяшима Атаева ба хотири роҳ додан ба "камбудии ҷиддӣ" аз мақоми раҳбари телевизиони "Мирас" барканор шудааст. Қувватбердӣ Хеззиева иҷрокунандаи муваққати вазифаи раҳбари телевизиони мазкур таъйин гаштааст.

Бердимуҳаммадов ҳамчунин ба раиси Кумитаи радио ва телевизиони Туркманистон Нурмаммет Гарлиев барои "вазифаҳои худро дуруст анҷом надодан ва назорати сусти фаъолияти телевизионҳо" охирин огоҳиро додааст.

​Аз раиси Кумитаи радио ва телевизион талаб шудааст, ки камбудҳои мавҷударо дар зудтарин муҳлат ислоҳ кунад. Дар хабарҳои расмӣ гуфта нашудааст, ки сухан аз кадом камбудҳо меравад.

"Мирас" яке аз телевизионҳои маъруф ва сербинандаи Туркманистон шумурда мешавад.

NetBlocks аз "сайтбандии саросарӣ" дар Қазоқистон хабар дод

Провайдер ё фароҳамкунандагони Интернет дар Қазоқистон рӯзи 9-уми май дастрасӣ ба шабакаҳои иҷтимоӣ, амсоли Facebook, Instagram ва YouTube, инчунин паёмакрасони Telegram ва чанд сомонаи хабариро масдуд карданд.

Дар ин бора гуруҳи NetBlocks хабар дод, ки озодии Интернетро мониторинг мекунад. Муаллифон мегӯянд, бархе аз шабакаҳо комилан аз кор монданд. "Масдудсозӣ субҳи рӯзи панҷшанбе ё шаби чаҳоршанбе роҳандозӣ шудааст",-хабар медиҳад гуруҳи NetBlocks.

"Маҳдудсозии мазкур ба эҳтимоли зиёд баъди он роҳандозӣ шуд, ки гуруҳи дигарандешон тасмим гирифтанд, 9-уми май иқдоми эътирозӣ ба роҳ монанд",-омадааст дар хабар. Ба иттилои ин гуруҳ, масдудсозии рӯзи 9-уми май камсобиқа будааст.

Рӯзи 9-уми май дар Қазоқистон дастрасӣ ба сомонаи бахши қазоқии Радиои Озодӣ ва чанд сомонаи хабарии маҳаллӣ низ маҳдуд буд. Давоми рӯз дар чанд шаҳри Қазоқистон сокинонро боздошт карданд. Боздоштҳо баъди он сурат гирифтанд, ки Мухтор Аблязов - мухолифи қазоқ - аз сокинон хост, бо нишони эътироз ба кӯча бароянд.

Қирғизистон 4 осоишгоҳро дар Иссиқкӯл ба Узбекистон барнагардонд

Ҳукумати Қирғизистон хабар дод, ки баҳси ба Узбекистон додани 4 истироҳатгоҳ дар соҳили Иссиқкӯл дар додгоҳ баррасӣ мешавад. Сарвазири вақти Қирғизистон Сафар Исҳоқов дар соли 2017 истироҳатгоҳҳои мавриди назарро дар ивази сармоя ва қатъи даъвоҳои додгоҳӣ ба Тошканд дод.

Ҳукумати Қирғизистон ахиран хабар дод, ки баҳси истироҳатгоҳҳо дар Додгоҳи байналхалқии ҳакамӣ баррасӣ мешавад. Соли 2016 ҳукумати Қирғизистон бо роҳбарии сарвазир Темир Сариев тасмим гирифт, истироҳатгоҳҳои марбут ба Узбекистонро дар соҳили Иссиқкӯл миллӣ гардонад.

Аммо Узбекистон ба додгоҳи ҳакамии байналхалқӣ шикоят бурд. Тошканд даъво дорад, ки Қирғизистон созишномаи байни давлатҳои пешини шӯравиро аз соли 1992 вайрон кардааст. Созишномаи мазкур истифодаи иншоотеро ба танзим медарорад, ки баъди пошхӯрии СССР дар ҳудуди ҷумҳурии дигар боқӣ мондаанд.

Моҳи декабри соли 2017 сарвазири вақти Қирғизистон Сафар Исҳоқов хабар дод, Бишкек истироҳатгоҳҳоро ба Узбекистон медиҳад, аммо заминро дар ихтиёри худ нигаҳ медорад. Дар иваз Узбекистон уҳдадор шуда буд, ки дар истироҳатгоҳҳо сармоягузорӣ кунад ва даъвои додгоҳиашро пас гирад.

Аммо рӯзи 8-уми майи соли 2019 ҳукумати феълии Қирғизистон хабар дод, ки созишномаи Сафар Исҳоқов бо ҷониби Узбекистон дар ниҳоят имзо нашуда буд.

Дар Тошканд бонкдорони "Давр" баъди дуздии пули муштариҳо ҳабс шуданд

Дар шаҳри Тошканди Узбекистон кормандони бонки "Давр" бо гумони дуздӣ боздошт шуданд. Ба иттилои мақомоти Узбекистон, як сокини вилояти Сирдарё шикоят кардааст, ки 9 ҳазор доллари вай ба суратҳисоби бонкиаш интиқол дода нашудааст. Ба ҷуз ин, 20 сокини дигар ҳам ба мақомот айни ин шикоятро бурдаанд. Бо гумони содир кардани ҷинояти дуздӣ кормандони бонки "Давр" Ю.Ж. ва М.Б. боздошт шудаанд. Нисбати онҳо бо моддаи "Қаллобӣ" парванда боз шудааст.

Эрон иҷрои бархе уҳдадориҳои ҳастаиро қатъ мекунад

Эрон қудратҳои ҷаҳониро дар бораи қарори хатми иҷрои “бархе ӯҳдадориҳояш” аз рӯи созиши ҳастаии соли 2015 огоҳ кардааст.

Рӯзи 8 май аз хуруҷи расмии ИМА аз созиши ҳастаӣ бо Эрон як сол сипарӣ шуд ва матбуоти Ҷумҳурии Исломӣ навишт, ки номаҳои президент Ҳасани Рӯҳонӣ дар бораи қисман хориҷ шудани Эрон аз ин созиш ба сафирони ИМА, Фаронса, Олмон, Чин ва Русия таслим шуд.

Бо вуҷуди аз созиш хориҷ шудани Амрико, дигар ҳама ҷонибҳо ширкатдори ин санад боқӣ мемонад. Таҳаввулот дар ҳолест, ки чанде пеш Эрон гуфт имкон дорад ғанисозии уранро дубора аз сар бигирад ва ин тасмим бахши муҳими созиши маҳдудкунандаи фаъолиятҳои ҳастаии Эрон буд.

Котиби давлатии ИМА Майк Помпео рӯзи 7 май ғайриинтизор сафарашро ба Аврупо қатъ кард ва ба Ироқ рафт. Помпео гуфт, дар пайи фаъолшавии Эрон чунин тасмим гирифтааст. Пентагон мегӯяд, мумкин аст, Теҳрон ба низомиҳои амрикоӣ дар минтақа ҳамла кунад.

Созиши Теҳрон бо абарқудратҳои ҷаҳонӣ дар мавриди маҳдудсозии барномаи ҳастаӣ дар ивази бекорсозии таҳримҳои иқтисодӣ соли 2015 ҳосил шуда буд. ИМА соли 2018 эълом кард, ки аз ин созиш хориҷ мешавад. Доналд Трамп, президенти ИМА он замон гуфт, ки созиш ноодилона аст. Баъди он Вашингтон таҳримҳои зидди Теҳронро густариш дод.

Шаҳрдори Қазон ба депутатҳои маҷлис: як моҳ дар ошхонаҳои мактабӣ ғизо мехӯред

Вакилони маҷлиси шаҳри Қазон бояд барои истеъмоли ғизо дар мактаб на бештар аз 1 доллар сарф кунанд

Шаҳрдор Илур Метшин қароре имзо кард, ки бар асоси он давоми моҳи май аъзои думаи шаҳри Қазон рӯзона дар ошхонаҳои мактабӣ ва танҳо дар ҳудуди 69 рубл (муодили 1 доллар) дар рӯз хӯрок хоҳанд хӯрд. Қарори шаҳрдор баъди он содир шуд, ки охири моҳи апрел дар як ҷаласаи назди раиси шаҳр ҷаласае барпо ва дар он мушкилоти ғизои мактабиёни Қазон баррасӣ шуд.

Илур Метшин гуфт, “мо корро хеле содда ҳал мекунем: ҳамаи 162 мактабро байни худ рӯйхат карда, тамоми ҳафта, яъне аз рӯзи душанбе то шанбе дар ошхонаҳои мактабӣ ғизо хоҳем хӯрд. Ҳар нафар, бидуни огаҳӣ, ба ошхона рафта бо арзиши 69 рубл дар киса аз он ҷо ғизо мегирад. Ба ман нозирон лозим нестанд. Ман бояд бидонам, ки дар куҷо мушкил вуҷуд дорад, дар куҷо шароит намерасад, ҷои нишаст нест, кадом муқаррарот вайрон шудааст”, гуфт Метшин.

Чанде пеш дар матбуот хабар дода шуд, ки нархи ғизо дар мактабҳои Қазон гарон шудааст. Бар асоси иттилои TatCenter, барои атфоли синфҳои ибтидоӣ, арзиши ғизои нисфирӯзӣ барои як нафар 66 рубл, арзиши ду дафъа ғизо 92 рубл ва барои шогирдони синфҳои 5 то 11 - 69 рубл муқаррар шудааст.

Дар шабакаҳои иҷтимоӣ қаблан хабари дар ошхонаи як мактаб ду дафъа истифода шудани лӯлакабоб ё котлет ҳам баррасӣ шуд. Санҷиши ин қазия аз ҷониби додситонӣ идома дорад. Вале раёсати ғизои иҷтимоӣ, ки масъули таъмини хӯрок дар мактабҳо мебошад, гуфт, хабари “истифодаи чандинкаратаи лӯлакабоб” дар ошхонаи мактаб тасдиқ нашуд.

BBC хабарнигорро баъди нашри акси маймун ва ишора ба таваллуди шоҳзода барканор кард

Ширкати садову симои Бритониё BBC як хабарнигори радиои худро аз кор пеш кард. Хабарнигор дар саҳифааш дар шабакаи иҷтимоии Твиттер акси як маймуни навъи шимпанзеро нашр карда, шарҳе дар бораи таваллуди тифл дар хонаводаи Маликаи Бритониё навишт.

Хабаргузории Reuters навишт, ки хабарнигор дар саҳифааш акси маймуни шимпанзеро бо либоси марбут ба тифли хонаводаи шоҳӣ нашр карда зераш навишт, ки “Шоҳзода зоишгоҳро тарк мекунад”.

Меган, ҳамсари шоҳзода Ҳаррӣ, субҳи душанбе писари нахустини худ - Арчиро таваллуд кард. Ин тифл аввлин кӯдак дар хонаводаи шоҳӣ аст, ки аз волидони гуногуннажод чашм ба дунё кушодааст.

Деннӣ Бейкер, хабарнигори BBC Radio 5 Live баъдан дар Твиттераш навишт, ки аз кор барканор шуд. Навиштаҷоти ӯро бисёриҳо ҳамчун нишонаи нажодпарастӣ интиқод карданд ва худи ӯ маҷбур шуд дар як паёми дигараш барои ин амалаш узр хоҳад. Ширкати BBC, ки ба навиштаи Reuters мавзӯъро шарҳ намедиҳад, хабари барканор шудани журналистро дар барномаҳояш пахш кард.

Сафири Тоҷикистон дар Ҷопон қабри Риҳард Зоргеро зиёрат кард

Дар зодгоҳи Зорге шаҳри Боку ба хотири ӯ санги ёдбуд гузошта шудааст

Сафири Тоҷикистон дар Ҷопон аз қабри Риҳард Зорге, як ҷосуси Иттиҳоди Шӯравӣ дар Ҷопон зиёрат карда, рӯйи он гул гузоштааст. Мирзошариф Ҷалолов, сафири Тоҷикистон дар Ҷопон, рӯзи 9-уми май ба Радиои Озодӣ гуфт, "ин анъана аст, ки сафирони кишварҳои Иттиҳоди Давлатҳои Мустақил ҷамъ омада, хотири қурбониёни ҷангро пос медоранд."

Дар маросими зиёрат аз қабри Риҳард Зорге сафири Узбекистону Қирғизистон, Аманистону Қазоқистон ва Беларусу Русия низ иштирок кардаанд.

Ин маросим ба хотири 74-умин солгарди анҷоми Ҷанги дуввми ҷаҳон ва гиромидошти қурбониёни он сурат гирифт. Риҳард Зорге, ҷосуси Иттиҳоди шӯравӣ дар Ҷопон, аз аввалинҳо шуда, аз нияти Олмон ҷиҳати ҳамла ба Иттиҳоди Шӯравӣ ва санаи дақиқи он ба мақомот хабар дода буд.

Таърихнигорон мегӯянд, он замон Сталин ба ин иттилои ҷосуси Шӯравӣ бовар накард. Ӯ бо номи мустаори “Рамзай” ва “Инсон” дар Ҷопон зери ниқоби хабарнигор фаъолият мебурд.

Яке дигар иттилои махфие, ки Зорге ба Иттиҳоди Шӯравӣ тавонист фиристад, ин буд, ки “Ҷопон нияти ҳамла ба Иттиҳоди Шӯравиро надорад”. Бар асоси ин иттилоъ, Артиши сурх бахши аъзами нерӯҳояшро аз Шарқи Дур ба Маскав овард ва дар натиҷа артиши Олмонро дар наздикиҳои Маскав шикаст дод.

Моҳи октбяри соли 1941 фаъолияти ҷосусии Зорге аз сӯи хадамоти истихбороти Ҷопон кашф шуд ва пас аз се сол - 7-уми ноябри соли 1944 ӯро дар зиндони Сугамо ба дор овехтанд.

Заҳматҳои Зоргеро ҳукумати Шӯравӣ танҳо соли 1964 эътироф ва қадрдонӣ карда, дар ҷои қабраш дар Ҷопон санге гузошт.

ИА гуфт, ки шартгузориҳои Эронро қабул надорад ва аз таҳримҳои ИМА мутаассиф аст

Иттиҳодияи Аврупо ва се қудрати дигари аврупоӣ аз Эрон тақозо карданд, ки созиши ҳастаӣ бо қудратҳои ҷаҳониро эҳтиром кунад, чун бо вуҷуди таҳримҳои ИМА, ин санад аз ҳамкориҳои тиҷоратӣ бо Эрон пуштибонӣ мекунад. Раиси сиёсати хориҷии Иттиҳодияи Аврупо Федерика Могеринӣ ва вазирони хориҷаи Бритониё, Фаронса ва Олмон бо пахши изҳороти муштараке рӯзи 9 май гуфтанд, ки онҳо ҳамоно аз созиши калидии соли 2015 пуштибонӣ мекунанд.

Вале, ба таъкиди онҳо, ин кишварҳо ҳама гуна ултиматум ваё шартгузориҳои Теҳронро қабул надоранд. Теҳрон рӯзи 8 май гуфт, ки дигар ба маҳдудиятҳои фаъолиятҳои ҳастаӣ, ки дар созиш муқаррар шудааст, нигоҳ намекунад, то замоне, ки роҳҳали фирор аз таҳримҳои аз нав таҳмилшудаи ИМА пайдо нашавад. ИМА мегӯяд, ки Эрон дубора ба “харобкорӣ” дар минтақаи Ховари Миёна пардохтааст. “Мо ҳама гуна ултиматумро рад мекунем ва ҳама гуна шикоятҳои Эронро бар асоси тарзи рафтораш дар нисбати ӯҳдадориҳои ҳастаиаш арзёбӣ хоҳем кард”, омадааст дар изҳороти Иттиҳодияи Аврупо.

Эрон дирӯз гуфт, ки дар посух ба дубора ҷорӣ шудани таҳримҳои иқтисодӣ аз ҷониби Вашингтон дар соли гузашта, тасмим гирифт аз иҷрои қисме аз ӯҳдадориҳояш бар асоси созиши ҳастаии чор соли пеш канорагирӣ кунад. Таҳримҳои ҷоришуда ба иқтисоди Эрон зарбаи сахте шудааст. Қудратҳои аврупоӣ гуфтанд, ки аз дубора ҷорӣ шудани таҳримҳо “мутаассиф” ҳастанд ва ба қавлашон дар заминаи идомаи ҳамкориҳои қонунии тиҷоратӣ бо Эрон ӯҳдадор мемонад.

Маҳкумияти 14 нафар дар Монтенегро барои талоши анҷоми ҳамлаҳои террористӣ

Подгоритса, Додгоҳи олии Монтенегро ҳукми муттаҳамонро баррасӣ мекунад

Додгоҳе дар Монтенегро (Черногория) 14 нафарро барои талоши терроризм ва ташкили як созмони ҷиноӣ дар моҳи октябри соли 2016 гунаҳгор эълон кард ва гуфт, ки ҳадафи ин нафарон аз қудрат дур кардани ҳукумат ва баҳам задани талошҳои он дар амри расидан ба узвияти НАТО мебошад. Дар миёни маҳкумшудаҳо ду раҳбари Ҷабҳаи оппозитсионии демократии Монтенегро, як шаҳрванди Монтенегро ва нӯҳ шаҳрванди Сербияву ва эҳтимолан ду афсари хадамоти иктишофии Русия мебошанд. Дар ин бора рӯзи 9 май бахши Балкании Радиои Озодӣ хабар дод. Мақомоти Монтенегро гуфтаанд, ки миллатгароҳои сербу рус нақшаи ишғоли бинои парлумонро дар замони баргузории интихоботи парлумонӣ кашида, мехостанд дар сӯиқасде нахуствазири оянда Мило Ҷукановичро ба қатл расонида як раҳбари рӯ ба Русияро сари кор оваранд.

Дар ҳоле, ки мақомот ду гумонбарро дар кор ба манфиати ГРУ-и Русия муттаҳам кардаанд, Кремлин ин иттиҳомотро рад кардааст.

Июни соли 2017 Монтенегро узви 29-уми паймони низомии НАТО шуд ва ин ҳодиса мавриди интиқоди шадиди Маскав гардид. Русия талош кардааст, ки ин кишвар аз назари самтгириҳои сиёсӣ ба Маскав наздик бошад.

Шумори қурбониҳои ҳамлаи Толибон афзоиш ёфт

Мақомот дар Афғонистон гуфтанд, ки шумори қурбониёни ҳамлаи Толибон ба дафтарҳои созмонҳои имдодрасони байналмилалӣ дар Кобул то ба 9 нафар расид. Ба гуфтаи мақомот, дар ҳамла ба дафтари Counterpart International дар Кобул панҷ ходими полис, як муҳофизи амниятӣ ва се шаҳрванди мулкӣ ҷон доданд. Ин созмони ғайридавлатӣ бо USAID ҳамкорӣ мекунад. Нусрат Раҳимӣ, сухангӯи вазорати дохилии Афғонистон рӯзи 8 май ба Радиои Озодӣ гуфт, ки ҳамлаи мусаллаҳон соати 11:40-и вақти маҳаллӣ шурӯъ шуд. Нахуст дар дафтари Counterpart International таркиши пурқудрате рух дод ва баъдан ба задухӯрди миёни муҳофизону ҳамлагарон бадал шуд. Вазорати дохилӣ гуфт, ки ҳамлагарон панҷ нафар буданд ва дар паи ҳамлаи онҳо чандин соат задухӯрди мусаллаҳона барпо шуд. Дар ин ҳодиса инчунин тахминан бист нафар маҷрӯҳ шуда тахминан 200 нафар аз ин минтақа ба ҷои дигар интиқол дода шуданд.

Латту кӯби хонандагон дар Узбекистон барои иҷро накардани вазифаи хонагӣ

Дар наворе, ки 6-уми май нашр шуд, дида мешавад, чи гуна омӯзгоре хонандагонро қатор монда, латту кӯб мекунад. Ин ҳодиса 30-юми апрел дар яке аз мактабҳои шаҳри Ҷиззахи Узбекистон рух додааст.

Модари яке аз хонандагони латтукӯбшуда гуфт, писари ӯро барои иҷро накардани вазифаи хонагӣ задаанд.

"Бори аввал нест, ки ин омӯзгор чунин мекунад. Мудири мактаб латту кӯб кардани омӯзгорро рад мекунад. Билохира яке аз хонандагон ин ҳолатро сабт карду воқеият ошкор шуд",-гуфт модари яке аз хонандагон.

Мақомоти маорифи вилояти Ҷиззах ваъда доданд, ки ҳодисаро таҳқиқ мекунанд.

Баррасии роҳҳои ҳамоиши оилаҳои ҷангҷӯён бо ҷомеа дар Душанбе

Ҳамоиши хонаводаҳои ҷангиёну террористон бо ҷомеа – мавзӯи нишастест, ки 16-17 май қарор аст дар Душанбе бо ташаббуси Иттиҳодияи Аврупо дар шаҳри Душанбе баргузор шавад. Дар ин бора рӯзи 8 май дафтари матбуоти ин сохтор дар Душанбе хабар дод. Ин нишаст дар ҳошияи конфронси байналмилалии “Ҳамкориҳои байналмилаливу минтақавӣ дар амри мубориза бо терроризм ва манобеи маблағгузори он” ташкил хоҳад шуд. Ин конфронсро ҳукумати Тоҷикистон, СММ ва Иттиҳодияи Аврупо муштаракан барпо хоҳанд кард.

Нишасти мазкур дар шароите барпо мешавад, ки охири моҳи апрел ҳукумати Тоҷикистон аз Ироқ бо як ҳавопаймо 84 кӯдаки то 18-сола - фарзандони ҷангиёни тоҷикро ба ватан баргардонид. Модарони ин кӯдакон, ки 43 нафар гуфта мешавад, дар зиндонҳои шаҳри Бағдоди Ироқ ба ҳукмҳои тӯлонии зиндон маҳкум шудаанд.

Мақомоти тоҷик мегӯянд, ки баргардони кӯдакон ба ватан баъди он имкон дод, ки вазорати хориҷаи Тоҷикистон бо ҳукумати Ироқ ҳамкориҳои наздику ҳамаҷонибаи дипломатӣ барпо кард. Дар навбат нақшаи бозгардони ин занон ба Тоҷикистон аст, ки бояд бар асоси созишномаи истирдоди зиндониҳо сурат гирад. Фаъолон дар Тоҷикистон мегӯянд, ки ба ҷомеа ҳамоиш ёфтани ин шаҳрвандон хеле муҳим аст, ба он хотир, ки ояндаи хубу бидуни хушунат дошта бошанд. Аксари занону кӯдакон, ки баъди соли 2014 ба манотиқи ҷангзадаи Ховари Миёна зери парчами “Давлати исломӣ” рафтаанд, қурбонии тасмимҳои харобкоронам ҳамсару бародаронашон меноманд. Аз Тоҷикистон ба ин ҷангҳо беш аз 1900 шаҳрванд рафтааст.

Сафорати ИМА: Шикоят аз баста будани вебсайти гринкорт ба мо ҳам расид

Навиштае дар як хадамоти кумак дар аризаи гринкорт дар Душанбе

Сафорати ИМА дар Тоҷикистон мегӯяд, аз он ки муштариҳои зиёд аз дирӯз натавонистанд ба вебсайти https://www.dvlottery.state.gov ворид шуда натиҷаҳои ширкати худ дар лотереяи гринкорти Амрикоро бисанҷанд, огаҳ аст. Ҷефф Райденауер, як масъули сафорати Амрико дар Тоҷикистон рӯзи 8 май ба Радиои Озодӣ гуфт, ки воқеан ҳам ба унвонии онҳо имрӯз шикояти муштариёни зиёди лотереяи тақдимкунандаи ҳақи иқомат дар ИМА расид, ки мегӯянд, дастрасӣ ба вебсайт имкон надорад. Ӯ гуфт, ба корбарони ин саҳифа машварат дода мешавад, ки санҷидани онро идома диҳанд.

Айни замон, дар нуқтаҳои вижаи кӯмак ба сокинони Душанбе дар пур кардани аризаи ширкат дар гринкорт субҳи 8 май гуфтанд, ки зоҳиран бо сабаби зиёд будани хосторони бурдани лотерея дар саросари ҷаҳон, дастрасӣ ба ин сайт имрӯз имкон надорад. Дар бархе нуқот навишта шудааст, “баъди 10 май муроҷиат кунанд”. Бино ба шаҳодати сокинони Ҷумҳурии Чех ва худи ИМА ҳам дастрасӣ ба ин вебсайт имрӯз имконпазир набуд.

Ҳар сол ҳукумати ИМА 50 ҳазор гринкортро барои сокинони саросари ҷаҳон пешкаш мекунад ва интихоби барандаи он аз роҳи лотереяи интернетӣ сурат мегирад. Довталабони ширкат дар ин лотерея аз Тоҷикистон ҳам соле ба даҳҳо ҳазор наффр мерасад.

Сафорати ин кишвар гуфтааст, ки дар солҳои 2014-2018 беш аз 115 ҳазор шаҳрванди Тоҷикистон барои ширкат дар ин лотерея ариза дода, аз ин шумор 3 ҳазор нафар интихоб шудаанд. Ҳақи иқомат дар Амрико шонси зиндагии қонунӣ дар ин кишвар, имкони кору таҳсил ва дарёфти шаҳрвандии ин давлатро фароҳам меорад.

Шаш соли зиндон барои фиреби "Бурҷҳои нафти Норвегия"

Акс аз бойгонӣ

Додгоҳе дар Душанбе як узви Ҳизби Халқии Демократӣ, ҳизби ҳоким дар Тоҷикистонро барои фиреби 7 нафар бо ваъдаи фиристодани кор ба Норвегия ба 6 соли зиндон маҳкум кардааст.

Додгоҳи Исмоили Сомонӣ рӯзи 8 -уми май бо эълони як баёнияи расмӣ гуфт, Нуралӣ Назриев, раиси собиқи Иттифоқи хоҷагиҳои деҳқонӣ ва соҳибкорони Тоҷикистон барои ин ҷиноят се соли умрашро дар зиндони низомаш сахт сипарӣ мекунад.

Назари вакили дифои Назриев ҳануз ба Радиои Озодӣ дастрас нашудааст, аммо додгоҳ мегӯяд, иттиҳомоти тақаллуб ва фиреби 7 нафар собит гашт. Ба гуфтаи додгоҳ, Назриев ба 7 сокини вилояти Хатлон ваъда додааст, ки онҳоро барои кор дар манораҳои нафткаш ба Норвегия мефиристад ва аз онҳо дар маҷмуъ 30 ҳазор сомонӣ гирифта ва ба ваъдааш вафо накардааст ва ба ин талабгорони кор зарари иқтисодӣ расонидааст.

Ҷабрдидагон аз моҳи октябр мунтазири рафтан барои кор ба Норвегия будаанд, вале ба орзуяшон нарасидаанд. Парвандаи ӯро моҳи январ Оҷонси мубориза бо коррупсия баъди таҳқиқ ба додгоҳ фиристод. Додгоҳ ҳукми Нуралӣ Назриев, сокини 59-солаи ноҳияи Вахшро моҳи апрел эълон кардааст ва гуфтааст, ки ӯ дар гузашта ҳам барои 14 сол аз озодӣ маҳрум шудааст.

Таркиш дар ибодатгоҳи сӯфиёни Покистон ҷони 8 нафарро гирифт

Дар паи таркиши пурқудрате дар як ибодатгоҳи сӯфиён дар Покистон, дасти кам 8 нафар кушта ва 25 нафар маҷрӯҳ шуданд. Ҳодиса дар шаҳри Лоҳур рух дод. Навоз Хон, як афсари аршади полиси Покистон рӯзи 8 май гуфт, ки ин таркиш ҳамлаи интиҳорӣ буд, ки мошини афсарони полисро ҳадаф қарор дода буд. Ин мақом гуфт, ки дар миёни кушташудаҳо панҷ афсар ҳам буд, ки ба ҳангоми таркиш дар беруни ибодатгоҳи Дото Дарбар буданд. Ибодатгоҳи сӯфиён макони дафни Алии Ҳаҷверӣ, яке аз орифони маъруфи қарни 11 мебошад. Полис гуфт, ки ҳангоми рух додани таркиш дар дохил ва беруни ибодатгоҳ садҳо зоирон қарор доштанд. Нирӯҳои амниятӣ тамоми минтақаро иҳота кардаанд.

Сафари Помпео ба Бағдод ва нигарониҳо аз Эрон

Лаҳзаҳои вуруди Помпео ба Бағдод

Котиби давлатии ИМА Майк Помпео бо як сафари ғайримунтазира вориди Бағдод, пойтахти Ироқ шуд. Дар Бағдод қарор аст Помпео бо мақомоти ин кишвар фаъолиятҳои мавриди нигаронии, ба гуфтааш, “тавсеаёбандаи” амниятии Эронро матраҳ кунад. Ин дар ҳолест, ки ИМА дар оғози ҳафтаи ҷорӣ эълон кард, ки як ҳавопайморо бо гурӯҳи низомиён дар дохилаш ба Ховари Миёна интиқол дод ва ба гуфтаи мақомоти амрикоӣ, ин тасмим дар посух ба таҳдидҳо ба нирӯҳои амрикоӣ ва муттафиқонаш аз ҷониби Эрон гирифта шуд. Помпео дар Бағдод гуфт, ки маълумоти иктишофии амрикоиҳо “хеле дақиқ” мушаххас карда буд, ки “вуқӯи ҳамлаҳо ногузир” аст. Вале ӯ ҷузъиёти бештар надод. Дар як изҳороташ аз дохили ҳавопаймо Помпео гуфт:

“Сафари ману тадбирҳое, ки аз тарафи вазорати дифо гирифта шудаанд ва паёмҳое, ки ба эрониҳо фиристодем, умедворам, моро дар ҳолате мегузоранд, ки метавонем эрониҳоро водор кунем, ки ду дафъа андеша карда аз ҳамла ба манифитаҳои Амрико худдорӣ кунанд”.

Теҳрон гузоришҳо дар бораи таҳдиди “ҷангҳои равонӣ”-ро рад кард. Таниши миёни Теҳрон ва Вашингтон аз замони сари қудрат омадани президент Доналд Трамп ва як сол пеш аз созиши ҳастаии соли 2015 берун шудани Амрико шиддат ёфт. ИМА дубора нисбати Эрон таҳрим ҷорӣ кард.

Номаи Рӯҳонӣ ба сафирон: Эрон бархе ӯҳдадориҳои ҳастаиро канор мегузорад

Эрон қудратҳои ҷаҳониро дар бораи қарори хатми иҷрои “бархе ӯҳдадориҳояш” аз рӯи созиши ҳастаии соли 2015 огоҳ кардааст. Рӯзи 8 май аз хуруҷи расмии ИМА аз созиши ҳастаӣ бо Эрон як сол сипарӣ шуд ва матбуоти Ҷумҳурии Исломӣ навишт, ки номаҳои президент Ҳасани Рӯҳонӣ дар бораи қисман хориҷ шудани Эрон аз ин созиш ба сафирони ИМА, Фаронса, Олмон, Чин ва Русия таслим шуд. Бо вуҷуди аз созиш хориҷ шудани Амрико, дигар ҳама ҷонибҳо ширкатдори ин санад боқӣ мемонад. Таҳаввулот дар ҳолест, ки чанде пеш Эрон гуфт имкон дорад ғанисозии уранро дубора аз сар бигирад ва ин тасмим бахши муҳими созиши маҳдудкунандаи фаъолиятҳои ҳастаии Эрон буд.

ОSCE аз Тоҷикистон хост, бастани сайтҳоро бас кунад

Ҳарлем Дезир

Як масъули баландпояи Созмони Амният ва Ҳамкории Аврупо аз давлати Тоҷикистон хост, дастрасӣ ба вебсайтҳои хабарӣ, шабакаҳои иҷтимоӣ ва хадамоти Гуглро барқарор кунад.

Ҳарлем Дезир, намояндаи созмон дар умури озодии матбуот рӯзи 7-уми май дар як баёнияи расмӣ гуфт: “Ман аз мақомот дархост мекунам, ки дастрасии комил ва номаҳдуди шаҳрвандон ба расонаҳои интернетӣ, чӣ миллӣ ва чӣ байналмилалӣ ва ҳамчунин, шабакаҳои иҷтимоӣ ва ҷустӯҷугарони интернетиро фароҳам кунад.”

Ҳарлем Дезир афзудааст, бидуни дастрасии бемамониат ба интернет озодии баён вуҷуд надорад.

Дар ду ҳафтаи гузашта дар Тоҷикистон дастрасӣ ба шабакаҳои иҷтимоӣ ба мисли Фейсбук, Твиттер, Ютуб, Вотсапп, Вайбер ва Телеграмм баста буд. Корбарон ҳамчунин шикоят доранд, ки онҳоро аз ҳаққи дастрасӣ ба вебсайтҳои хабарӣ ба мисли Радиои Озодӣ, Азия Плюс ва Авесто маҳрум кардаанд.

Созмони Амният ва Ҳамкории Аврупо мегӯяд, ки масъули созмон дар умури озодии матбуот борҳо масъалаи бастани вебсайтҳо ва дигар манобеи хабарӣ дар кишварҳои Осиёи Марказиро бо мақомоти кишварҳои минтақа дар миён гузоштааст.

Узбекистону Туркманистон: таъйини марз дубора мавзуи меҳварӣ шуд

Ҳайатҳои ҳукуматии Узбекистон ва Туркманистон масъалаи таъйин ва аломатгузории хати марзи давлатии ду кишварро дубора баррасӣ карданд.

Мулоқоти навбатии гуруҳҳои кории ду кишвар оид ба таъйин ва аломатгузории хати марз аз 29 апрел то 5 майи соли равон дар шаҳри Урганҷи Узбекистон баргузор шудааст.

Гуфтугӯҳои марзии Узбекистону Туркманистон моҳи марти соли 2017 дубора аз сар гирифта шуда, то ба ҳол ҷонибҳо чандин мулоқот анҷом доданд. Дарозии марзи ду кишвар 1621 километрро ташкил дода, аз вилоятҳои Дашоғус ва Лебап мегузарад.

Тавре хабарнигори Бахши туркмании Радиои Озодӣ дар минтақа рӯзи 7-уми май хабар дод, ҳамарӯза садҳо одам ба умеди гузаштан ба ҷониби Узбекистон дар гузаргоҳи марзии Дашоғус ҷамъ мешаванд. Раванди гузаштан аз марз ба ҳисоби миёна 5 соатро ташкил медиҳад.

Ёфтҳои бештар

Гуфтугӯ бо Умед Бобохонов, муассис ва сардабири "Азия-Плюс"
лутфан мунтазир бошед

Феълан кор намекунад

0:00 0:16:08 0:00
Гузоришҳои радиоӣ
ПОДКАСТ
Гуфтугӯ бо Умед Бобохонов, муассис ва сардабири "Азия-Плюс"
Гузоришҳои радиоӣ

Гузоришҳои видеоӣ

Тарс аз вируси нав дар Тоҷикистон
лутфан мунтазир бошед
Embed

Феълан кор намекунад

0:00 0:02:18 0:00
XS
SM
MD
LG