Валерий Турсунов, футболбози машҳур ва ҳамлагари пешини дастаи "Помир"-и Душанбе дар 72-солагӣ дар шаҳри Маскав даргузашт.
Ӯ рӯзи 23-юми августи соли 1954 дар шаҳри Кӯлоб таваллуд шуда, устоди варзиши Иттиҳоди Шӯравӣ (1982) ва Мураббии шоистаи Тоҷикистон (1989) буд.
Дар мактаби варзишии кӯдакону наврасони Кӯлоб тамрин мекард ва соли 1965 дар марҳилаи ниҳоии мусобиқаи “Тӯби чармин” ширкат варзид.
Сипас дар Душанбе дар давраи таҳсил дар ҳайати дастаи Донишкадаи политехникии Тоҷикистон бозӣ мекард. Вай таваҷҷуҳи мураббиёни бошгоҳи "Помир"-и Душанберо ба худ ҷалб намуд ва дар 18-солагӣ ба ҳайати эҳтиётии ин даста пайваст, дар ҳоле ки ҳамзамон тавозуни байни тамрину бозиҳо ва таҳсилро нигоҳ медошт.
Соли 1974 дар бозии сафарӣ бар зидди дастаи "Торпедо"-и Кутаисӣ бори аввал дар ҳайати асосии "Помир" ба майдон баромада, ду гол зад.
Турсунов тамоми фаъолияти варзишии худро (солҳои 1974–1988) дар дастаи "Помир"-и Душанбе, ки дар Лигаи якуми қаҳрамонии Иттиҳоди Шӯравӣ бозӣ мекард, сипарӣ намуда, дар 542 бозӣ 173 голро ба ҳадаф расондааст.
Ӯ дар соли 1988 ба “Помир” барои ба Лигаи олӣ роҳ ёфтан кумак кард, аммо соли баъдӣ бинобар ҷароҳат бардоштан бозигариро поён дод ва ба кори мураббигӣ дар ҳамин даста гузашт.
Дар нимаи соли 1990 ӯ ба дастаи "Аустрия Клагенфурт", ки дар дивизиони дуюми Австрия ҳунарнамоӣ мекард, даъват шуд. Дар давраи танаффуси зимистонаи мавсими 1990/91 Турсунов ба дастаи "Клопайнерзее" (аз дивизиони сеюм) гузашт. Тобистони соли 1991 фаъолияти варзишии худро ба поён расонд ва ба кори мураббигӣ ба дастаи "Помир" баргашт.
Валерий Турсунов аз соли 1996 то 2013 (бо танаффус) дар вазифаи ноиби президенти Федератсияи футболи Тоҷикистон кор карда, соли 2013 аз ин мақом истеъфо дод.