Ахиран маҷмаи умумии Созмони Милали Муттаҳид 47 аъзои ҳайъати Шӯрои нави ҳуқуқи башарро интихоб кард. Ин шӯро ҷойгузини комиссиюни пешини ҳуқуқи башар шуд, ки он пайваста мавриди танқид қарор дошт. Ба он хотир ки мамолики дорои собиқаи ваҳшатноки нақзи ҳуқуқи башар дар ҳайъати он комиссиюн шомил буданд ва ҳамеша монеъи кори комиссиюн мешуданд. Агарчӣ дар ҳайъати Шӯрои нави ҳуқуқи башар кишварҳои дорои собиқаи нақзи ҳуқуқи инсон ба мисли Русияву Озарбойҷон ва Чин ҳастанд, аммо гурӯҳҳои дидбони ҳуқуқи башар гуфтанд, изҳори умедворӣ кардаанд, ки фаъолияти ин шӯро беҳтар аз комиссиюни пешини ҳуқуқи башар хоҳад буд.

Дар миёни кишварҳое, ки натавонистанд раъйи заруриро барои ворид шудани ба ин шӯро ба даст оранд, Эрону Ироқу Қирғизистон ҳастанд. Либияву Судан, ки бо раъйи мухолифи худ намегузоштанд, эъломияҳои интиқодии шадидуллаҳни Комиссиюни ҳуқуқи башари СММ қабул шавад, ин дафъа аз ҳайъати шӯро берун мондаанд.
Аз ҳоло бархе кишварҳо, мисли Олмон, изҳори умедворӣ кардаанд, ки тағйирот дар ҳайъати Шӯрои ҳуқуқи башар барои фаъолияти пурмаҳсули он мусоидат хоҳад кард.

Ва аммо саволе, ки ҳоло матраҳ аст, ин аст, ки то куҷо бо ҳайъати нав ин ниҳоди Созмони Милал, метавонад дар роҳи татбиқи ормонҳои башарӣ муваффақ бошад, ба вижа дар шароите, ки бархе кишварҳои поймолкунандаи ҳуқуқи башар аъзои он шудаанд.
Хонум Мариет Гранд, ки аз созмони Дидбонии ҳуқуқи башар дар Женева гуфт, ки куллан аз натиҷаҳои интихоботи шӯро қаноатманд аст, ҳарчанд дар масъалаи баъзе аъзои нави он мешавад андеша кард:

"Пеш аз ҳама бояд гуфт, ки ба ҷуз аз чанд масъалаи хурд, мо куллан аз натиҷаҳои интихобот қаноатманд ҳастем. Ва бархе кишварҳое, ки дар гузашта ба таври ошкоро даст ба вайрон кардани ҳуқуқи инсон мезаданд мисли Зимбабве, Непал ё Судон, имсол ҳатто номзадии худро пешбарӣ накарданд. Дар мисоли Русия бояд гуфт, ки мо на танҳо ба масъалаи Чеченистон таваҷҷӯҳ мекунем, балки ба мушкили саркубкунии фаъолияти созмонҳои ғайридавлатӣ ва ё нақзи ҳуқуқи сарбозон дар артиш низ муроҷиат мекунем. Мо пайваста ба мавҷудияти ин масоил ишора намуда тақозои ҳал шудани онҳоро мекунем. Ва аз сӯи дигар бояд таъкид кард, ки мавҷудияти ҳодисаҳои нақзи ҳуқуқи инсон ин як маъсала аст. Масъалаи дигар хоҳиши мақомоти давлатӣ барои ҳалли ин мушкилот мебошад."

Хонум Гранд аз созмони Дидбони ҳуқуқи башар дар Женева гуфт, ки барои ҳалли масоили ҳуқуқ башар дар кишварҳои поймолкунандаи шадиди ин арзишҳо ва аъзои нави шӯрои СММ хоҳишу иродаи дигар аъзои ин ниҳод хеле муҳим аст:

"Ҳама чиз акнун аз дигар аъзои Шӯрои ҳуқуқи башар вобаста аст, ки кишварҳои дорои собиқаи бойи нақзи ҳуқуқи инсонро барои тағйири вазъ дар кишварашон водор намоянд. Як чизи мусбате, ки дар интихоботи мазкур ба чашм расид, ин тақозои тааҳҳуди ошкорои ин кишвар дар пойбанд будан ба арзишҳои ҳуқуқи башар мебошад. Ҳар яки ин кишварҳо дар дохил ниҳодеро созмон додаанд, ки аз вазъи ҳуқуқи инсон дар ин давлат ва иҷроиши таҳудоти кишварҳояшонро назорат мекунанд."

Таҳлилгари тоҷик Рашид Ғанӣ мегуяд, ки узвияти ҳама кишварҳо, бо шумули давлатҳои дорои собиқаи зиёди нақзи ҳуқуқи инсон ба чунин ниҳодҳо баръакс ба манфиати ин давлатҳост, то камбудиҳои худро ислоҳ кунанд.

Оқои Ғанӣ гуфт, ки дар аксар ҳолатҳо масоили ҳуқуқи башар ва нишондодҳои давлатҳои алоҳида дар ин заминаро ба як масъалаи сиёсӣ табдил медиҳанд ва онҳоро ҳамчун фишанги таъсиргузорӣ боло ин кишварҳо истифода мекунанд. Владимир Сотиров, намояндаи вижаи дабири кулли СММ дар Тоҷикистон ҳам мегуяд, ки набояд масъалаи мазкурро сирф аз диди сиёсӣ арзёбӣ кард.

Вай гуфт:
"Агар ба натиҷаҳои интихобот нигоҳ кунем, Русия бо раъйи орои 135 кишвари ҷаҳон ба ин шӯро роҳ ёфт, яъне ин давлатҳо фикр мекунанд, ки Русия ба унвони як узви Шӯрои ҳуқуқи башар ба иҷрои вазифаҳои худ қодир аст. Масоили ҳуқуқи башар барои рушди кишвар хеле муҳиманд, аммо онҳоро набояд зиёд сиёсӣ кард. Ва дар ҳамин ҳол бояд гӯям, ки Шӯрои ҳуқуқи башар батозагӣ таъсис ёфтааст ва бояд шароити фаъолияти худро танзим намояд. Мо умед дорем, ки Шурои ҳуқуқи башари СММ дар роҳи таъмини ҳуқуқи башар дар саросари олам саҳми босазо мегузорад."

Масъалаи қобили таваҷҷӯҳи дигар дар ин мавзуъ ин аст, ки аз оғоз Амрико гуфт, ки хоҳиши дар интихобот ширкат карданро надорад, чунки ин созмон баъзе давлатҳои поймолкунандаи ҳуқуқи башарро аз узвият ба ин созмон ҷилавгирӣ накард. Ҷон Болтон, сафари Амрико дар СММ гуфт, ки Вашингтон танҳо ба ҳайси нозир дар ин созмон буданд иктифо хоҳад кард:

"Аслан дар мавқеи берун будан аз ҳайати ин ниҳод мо метавонем таъсири бештар дошта бошем. Аслан ҳар гуна тасмими Иёлоти Муттаҳида оид ба ҳузури он дар ҳайати ин ниҳод аз он бастагӣ дорад, ки то куҷо фаъолияти ин шӯро назар ба кори комиссиюни пешина ба таври эҳсосшаванда беҳтар аст. "

Дар ин замина, хонум Мариет Гранд, раиси ваколати созмони Дидбонии ҳуқуқи башар дар Женева гуфт, ҳар кишвар аз хурд то бузург, мисли Амрикову Русияву Чин ва ё Швейтсария аз имтиҳони вазъи ҳуқуқ башар хоҳанд гузашт. Роҷеъ ба мавқеи Амрико дар ин масъала вай гуфт:

"Мо каме нигарон ҳастем ва умедворем, ки Амрико фурсати мазкурро барои ислоҳи баъзе камбудиҳояш дар масъалаи ҳуқуқи инсон истифода хоҳад кард. Ва вақте ки ин кишвар хоҳиши узвият дар Шӯрои ҳуқуқи башарро пайдо мекунад, бояд дар ин замина тааҳҳуд карда бошад. Бисёр муҳим аст, ки собиқаи шумо дар дохили кишвар аз лиҳози вазъи ҳуқуқи башар поку тоза бошанд, қабл аз он ки дигаронро дар ин замина омӯзиш бидиҳед."

Хонум Гранд мегӯяд, ки дар фаъолияти Шӯрои ҳуқуқи башари СММ як нишондидҳандаи мусбат ин аст, ки он ба фарқ аз комиссиюни пешина соле чандин бор, на се бор ҷамъ хоҳад омад. Ва ин маънои онро дорад, ки барои тасмимгириҳо ва ё арзёбиву дар сурати зарурӣ муҷозот кардани бархе давлатҳо фурсат ва имконияти бештар хоҳад дошт. Аъзои ин шӯро, ки дар Женева қароргоҳ дорад, соле як бор дар ҳузури 30 дар сади курсиҳо интихоб хоҳанд шуд. Ва нишасти аввалини он моҳи июни соли ҷорӣ дар назар гирифта шудааст.

Расонаҳои Австралия иттилоъ медиҳанд, ки узви панҷуми дастаи мунтахаби футболи занонаи Эрон, ки қаблан дархости паноҳандагӣ карда буд, фикри худро тағйир дода, тасмим гирифтааст ба ватанаш баргардад.

Вазири маорифи Австралия Ҷейсон Клер мегӯяд, ӯ ифтихор дорад, ки кишвараш ба варзишгарони эронӣ интихоб фароҳам овард, вале на ҳамаи онҳо пешниҳодро пазируфтанд.

"Ба фикрам, мо набояд, мутаассиф бошем. Ман бо кишварамон ифтихор мекунам. Мо ба ин хонумҳои ҷавон ҳаққи интихоб додем. Бо ин иқдом Австралия собит мекунад, ки беҳтарин кишвари олам аст. Мо ба онҳо имкон додем, ки визаи башардӯстона гирифта, дар Австралия бимонанд. Вале баъзеҳо қабул карданду дигарон не. Фарқи Австралия ва Эрон ҳамин аст!" – гуфт Ҷейсон Клер.

Ҳафтаи гузашта баъди мусобиқаи футбол шаш хонуми футболбози эронӣ ва як узви ҳайати ин кишвар хавф доштанд, ки дар Эрон мавриди таъқиб қарор мегиранд. Ин нигаронӣ баъд аз он пайдо шуда буд, ки онҳо ҳангоми садо додани гимни Эрон дар мусобиқаи Ҷоми Осиё хомӯш истоданд.

Рӯзи якшанбе се узви дастаи футболи Эрон дархости паноҳандагиро пас гирифтанд. Пеш аз он як узви дигари даста ҳам аз паноҳандагӣ дар Австралия даст кашид. Иттиҳоди футболи Эрон мегӯяд, ин афрод дар Малайзия ба дастаи Эрон пайваста, ҳамроҳи онҳо ба ватан бармегарданд.

Оғози мусобиқаи Ҷоми футболи Осиё ба ҳамон рӯзҳое рост омад, ки Амрико ва Исроил амалиёти низомиро дар Эрон шурӯъ карданд. Дастаи футболи занони эронӣ як ҳафта пеш аз идомаи ширкат дар мусобиқа маҳрум шуда буд.

Гузориши видеоӣ дар инҷост:

Дар Қазоқистон барои тағйири Конститутсия раъйдиҳӣ барпо шуд, ки амалан қудрати президентро қавӣ ва порлумонро суст мегардонад. Овоздиҳӣ рӯзи 15-уми март гузашт. Кумисюни марказии интихоботи Қазоқистон гуфт, беш аз 87 дарсади раъйдиҳандагон ба тарафдорӣ аз ислоҳоти конститутсионӣ овоз доданд. Наздик ба 10 дарсад бо ин тағйирот розӣ нестанд.

Дар як суҳбат бо сардабири вебсайти Free Eurasia Ислом Текушев, ки овоздиҳиро дар шаҳри Остона мушоҳида мекард, хостем, натиҷаҳои муҳимтарини ин раъйпурсиро хулоса кунад.

Ислом Текушев: "Дар овоздиҳӣ одамони зиёде иштирок карданд ва ман инро дар чандин нуқтаи раъйдиҳӣ дар шаҳри Остона дидам. Дар суҳбат ба ман чанд раъйдиҳанда гуфтанд, ки дар бораи овоздиҳӣ ва тағйирот ба Конститутсия аз шабакаҳои иҷтимоӣ, бахусус Инстаграм огаҳ шуданд. Хуб, муҳимтарин тағйирот ин гузаштан аз порлумони думаҷлиса ба як маҷлис хоҳад буд. Дар ин кишвар мақоми муовини президент эҷод мешавад ва инчунин ислоҳоти конститутсионӣ тағйирот дар салоҳиятҳои як қатор сохторҳои давлатиро пешбинӣ мекунад. Ин кор чӣ гуна амалӣ мешавад, вақт нишон медиҳад. Баъд аз нашри охирин натиҷаҳо бояд санаи баргузории интихоботи нави порлумонӣ эълон шавад. Ин кор базудӣ анҷом мешавад ва порлумони нав сари кор меояд."

Радиои Озодӣ: Дар бораи маҳдудият ва ҳам боздошти чандсоатаи хабарнигороне, ки хостанд овоздиҳии президент Қосимҷомарт Тоқаевро мушоҳида кунанд, гузориш расид. Бахши қазоқии Радиои Озодӣ гуфт, пеш аз овоздиҳӣ мунтақидони тағйироти конститутсионӣ зери фишори зиёд буданд. Шумо ҳамчунин чизеро мушоҳида кардед?

Ислом Текушев: "Дар як нуқтаи овоздиҳӣ бо раъйдиҳандагон ҳамсуҳбат шудам. Масалан, як зани нафақахӯр, ки омадаву мухолифи тағйироти конститусионӣ овоз дод, гуфт, тарҳи нави Конститутсия ба зиндагии ӯ ҳеч таъсире нахоҳад кард ва маблағи зиёде, ки барои овоздиҳӣ сарф шуд, метавонист бо мақсадҳои дигар харҷ шавад. Ӯ гуфт, махсус омада хост, норизоияти худро баён кунад ва ӯ аз чунин имконият истифода кард. Як духтари дигаре, ки дар овозодиҳӣ иштирок кард, гуфт, “барои ояндаи Қазоқистон” овоз медиҳад, вале дар бораи он ки он чӣ тағйироте меорад, чизе гуфта натавонист."

Видео дар инҷо:

Ба гузориши "Рейтерс”, баъди ҳамла болои бандари нафтии Фуҷайра дар Имороти Муттаҳидаи Араб ва як муддат боздошта шудани кори он, боркунӣ дар онҷо дубора сар шудааст.

Фуҷайра дар халиҷи Уммон дар берун аз гулӯгоҳи Ҳурмуз ҷойгир буда, макони содироти беш аз 1 миллион бушка нафт дар рӯз дониста мешавад.

Одатан аз ин гузаргоҳ нафти навъи “Мурбан”-и Имороти Муттаҳидаи Араб берун бурда мешавад ва он як дарсад аз талаботи ҷаҳонро ташкил медиҳад.

Барои хомӯш кардани сӯхтор хадамоти ёрии изтирорӣ дар ҷойи ҳодиса кор мекунанд. Ҳеч кас осеб надидааст.

Ҳамингуна, дар пайи ҳамлаи паҳподҳои эронӣ ба маҳаллаи наздик ба Фурудгоҳи Дубай ин нуқтаи муҳими парвозҳои байнулмилалӣ барои чанд соат аз кор монд.

Филми мустанади "Ҷаноби Ҳеҷкас зидди Путин" шоми 15-уми март ҷоизаи Оскарро ба даст овард. Онро коргардон Дэвид Боренштейн ва наворбардори ғайрикасбӣ аз шаҳри дурдасти Карабаши Русия Павел Таланкин сохтаанд.

Таланкин дар маросими ҷоизагирӣ гуфт, "давоми чор соли охир мо ба осмони пур аз ситора нигариста, фақат як орзу мекунем, як орзуи аз ҳама муҳим. Вале кишварҳое ҳастанд, ки аз осмони онҷо ба замин ситора неву бомбаву паҳпод мерезад. Ба хотири ояндаи ҳамаи мо, ба хотири фарзандони мо, биёед, ба ин ҷанг хотима мебахшем. Ҳамин ҳоло."

Коргардон Дэвид Боренштейн гуфт, "вақте ҳукумат одамонро дар кӯчаҳои шаҳрҳои калон мекушад; вақте мо дар муқобили он хомӯшем; олигархҳо матбуотро ба даст оварда, истеҳсол ва харҷи моро назорат мекунанд, мо дар муқобили як интихоби ахлоқӣ қарор мегирем. Вале боз ҳам хушбахтона, ҳатто "ҳечкас" метавонад аз он чи ки шумо фикр мекунед, қавитар бошад."

Павел Таланкин чанд сол дар мактаби рақами 1-и шаҳри Карабаш омӯзгор ва ташкилотчиву наворбардор будааст.

Ин шаҳр дар вилояти саноатии Челябинск ҷойгир аст. Вақте соли 2022 ҷанги зидди Украина сар шуд, ӯ бо супориши маъмурияти мактаб ва Вазорати маориф барои гузоришҳои расмӣ аз ҷамъомадҳову маҷлисҳои мактаб, маросими тантанавиву дарсҳо ва ҳам маҳфилҳои бо номи "Суҳбатҳои муҳим" сабт ҷамъ мекард.

Ҳамин сабтҳо ҳам асоси маводи хоми филми мустанад гардиданд. Тобистони соли 2024 Таланкин Русияро тарк карда, тавонист ҳамроҳаш наворҳои сабткардаашро берун барад. Каме дертар ӯ бо мустанадсози амрикоӣ Дэвид Боренштейн аз ин сабтҳо як филме сохтанд.

Худи Таланкин гуфт, тавонист ба истилоҳ филми дуюми "Фашизми одӣ"-ро наворбардорӣ кунад. Ин филми Михаил Ромм аз соли 1965 дар бораи таърихи ташаккулёбии идеологияи фашистӣ дар Аврупо ва ҷиноятҳои Олмони нозӣ қисса мекунад.

Дар матбуоти таблиғотии Русия ин филмро "зиддирусӣ" номиданд. Баъд аз нашри филм мактабе, ки Таланкин он ҷо кор мекард, мавриди тафтиши ходимони ҳифзи қонун қарор гирифт. Ба иттилои матбуоти маҳаллӣ, модари Таланкин, ки ба ҳайси китобдори мактаб кор кардаву гоҳе дар дарсҳо муаллимонро иваз мекард, маҷбур шуд аз кор равад.

Нахустнамоиши филм 25-уми январ дар ҷашнвораи филми мустақили "Сандэнс" барпо шуд. Матбуоти минтақавӣ навишт, ки ин филм дар шаҳри Карабаш мисли "таркиши бомба" гардид ва дар матбуоти таблиғотии Русия Таланкинро "як хоин" номиданд. Ин филм пеш аз "Оскар" ҷоизаи асосии Академияи кинову телевизиони Бритониё - BAFTA-ро сощиб гаштааст.

Адолат Ҳамидова, пизишки 54-солаи тоҷикро, ки рӯзи 12-уми март дар Афғонистон кушта шуд, дар зодгоҳаш шаҳри Кӯлоб дафн кардаанд.

Пайвандон ва ҳамкоронаш рӯзи 16-уми март ба Радиои Озодӣ гуфтанд, ки ӯ ҳашт соли охир дар як бемористони хусусӣ дар ноҳияи Имом Соҳиб пизишки занон буд. Ин ноҳияи Афғонистон дар наздикии марзи Тоҷикистон ҷойгир аст.

"Аз тарафи шахсони ношинос дар хонааш кушта шудааст. Як корд дар пушташ задаанд, ду зарбаи дигар дар тарафи дил," -- гуфт яке аз пайвандонаш.

Ба қавли мусоҳиби мо, ҳамсояҳо бо шунидани садои доду фарёд ба кумаки Адолат Ҳамидова шитофта, ӯро ба бемористон бурдаанд, вале наҷот дода натавонистаанд.

"Ният дошт, ки барои таҷлил аз Иди Фитр ва дидани духтару хонаводааш ба Тоҷикистон биояд, аммо рӯзи 13-уми март пайкарашро оварданд," – афзуд ӯ.

Адолат Ҳамидова як духтари чордаҳсола дорад ва ҳамроҳи хонаводааш дар шаҳри Кӯлоб аст.

Ҳамсари ин табиби тоҷик шаҳрванди Афғонистон аст ва гуё дар пайванд ба қатли Адолат Ҳамидова дар боздошт қарор доштааст.

Сабабҳои кушта шудани зан маълум нест.

Мақомоти Тоҷикистон ва намояндагони "Толибон" расман шарҳе надодаанд.

Хадамоти тандурустӣ дар Афғонистон бавижа дар бахши занон бо камбуди шадиди табибон рӯбарӯст. Вазорати тандурустии ҳукумати "Толибон" дар охири соли 2024 эълон кард, ки духтарон дигар иҷозаи таҳсил дар омӯзишгоҳҳои тиббиро надоранд.

Садҳо пизишки тоҷик дар ҷустуҷӯйи кор ва маоши муносиб ба Русия ва кишварҳои дигар, аз ҷумла минтақаҳои ноороме чун Яман ва Афғонистон мераванд. Дар ҳоле ки дар баъзе аз шифохонаҳои рустову ноҳияҳои дурдасти Тоҷикистон мутахассисон намерасанд.

Як зани пизишк аз Тоҷикистон дар вилояти Кундузи Афғонистон кушта шудааст. Дар ин бора телевизиони "Афғонистон интернешнл" ва рӯзномаи "Ҳашти субҳ"-и чопи Кобул рӯзи 15-уми март хабар доданд.

Ба гуфтаи ин манобеъ, ҳодиса се рӯз пеш рух дода, афроди ношинос Адолат Ҳамидиро дар манзилаш дар ноҳияи Имом Соҳиби вилояти Кундуз ба қатл расондаанд. Ин ноҳия дар наздикии марзи Тоҷикистон ҷойгир шудааст.

Дар хабар омадааст, ин зан давоми 15 соли ахир пизишки занон буд. Ин шаҳрванди Тоҷикистон бо як марди афғонистонӣ издивоҷ карда, як духтар ҳам доштааст.

Рӯзномаи "Ҳашти субҳ" гузориш додааст, ки ҷасади ин занро ба Тоҷикистон фиристодаанд.

Мақомоти Тоҷикистон дар ин бора расман хабар надодаанд.

Ҳанӯз сабабҳои кушта шудани ин зан ва номи қотилон маълум нест. Мақомоти ҳукумати Толибон дар ин бора сукут ихтиёр кардаанд.

Хабаргузории нимарасмии "Меҳр" ва расонаҳои дигари эронӣ аз шунида шудани чанд таркиш дар бахшҳое аз Теҳрон дар рӯзи 15-уми март хабар доданд.

Тибқи хабарҳое, ки дар шабакаҳои иҷтимоӣ чарх мезанад, сокинони бахшҳои гуногуни пойтахти Эрон гуфтанд, ки чанд таркиши сахтро шунидаанд ва баъзе аз онҳо ба андозае қавӣ буданд, ки боиси ларзиши биноҳо ва шишаҳо шуданд.

Бештари гузоришҳо аз ҷануб, ҷануб-ғарб ва маркази Теҳрон фиристода шудааст. Бархе шоҳидон ҳамчунин аз мушоҳидаи паҳподҳо ва ҷангандаҳои дар ҳоли парвоз дар осмони Теҳрон хабар додаанд. Тибқи гузоришҳо, дар баъзе аз минтақаҳо барқ хомӯш шудааст.

Бар пояи хабарҳои нашршуда дар шабакаҳои иҷтимоӣ, таркишҳо дар чандин макони дигар, аз ҷумла, Исфаҳон, Санандаҷ ва ҷазираи Кеш низ шунида шудааст.

Хабаргузории "Форс" ҳамчунин гузориш дод, ки як толори гуштингирӣ дар минтақаи Теҳронсер дар як ҳамлаи ҳавоӣ осеб дидааст. Ин хабаргузорӣ ҳамчунин иддао кард, ки беш аз 15 коргар дар ҳамла ба як минтақаи саноатӣ дар Исфаҳон кушта шудаанд.

Радиои Аврупои Озод/Радиои Озодӣ наметавонад ин гузоришҳоро ба таври мустақил тасдиқ кунад.

Дар ҳамин ҳол, хабаргузории "Форс" гузориш дод, ки 20 нафар ба иттиҳоми "фиристодани маълумот дар мавриди ниҳодҳои амниятӣ, низомӣ ва пулис" ба Исроил, боздошт шудаанд ва наворҳоеро аз ончӣ, эътирофи боздоштшудагон хонд, нашр кард.

Ин хабаргузорӣ, ки ба Сипоҳи посдорони инқилоби исломӣ наздик аст, ҳамчунин дар поёни рӯзи 14 март паёме нашр кард, ки дар он омадааст, "барои афзоиши шумори истҳои бозрасӣ ба довталабони бештаре ниёз аст".

Вебсайти хабарии Semafor рӯзи 14-уми март дар гузорише ба нақл аз мақомҳои амрикоӣ, ки ба номашон ишора накард, навишт, Исроил ҳафта гузашта ба Амрико дар бораи "коҳиш"-и муҳиммоти раҳгирӣ дар сомонаи дифои мушакии худ иттилоъ додааст.

Ин хабар дар ҳоле нашр мешавад, ки шаҳрҳои Исроил ҳамчунон ҳадафи мушакҳои баллистикии Эрон қарор мегиранд, ҳарчанд тибқи гузоришҳо, шумори мушакҳое, ки аз Эрон ба тарафи Исроил партоб шудаанд, нисбат ба ҳафтаи аввали ҷанг "ба шакли чашмгир" кам шудааст.

Як мақоми амрикоӣ ба Semafor гуфтааст, аз ин масъала огоҳӣ дошта, артиши Амрико худ бо ин рӯ ба рӯ нест.

Ин дар ҳоле аст, ки коршиносон пештар ишора кардаанд, ки дар сурати тӯлонӣ шудани ҷанг, ҳамеша пеш омадани камбуди захираи аслиҳаи кишварҳо, аз ҷумла Исроил ва Амрико вуҷуд дорад.

Semafor навиштааст, ки маълум нест Амрико камбуд дар анборҳои аслиҳаи Исроилро бартараф хоҳад кард ё не.

Вазорати дифои Арабистони Саудӣ эълон кард, ки шоми 14 март шаш мушаки баллистикиро бар фарози вилояти Ар-Харҷ раҳгирӣ ва аз байн бурдааст. Мақомҳо ҳачунин гуфтанд, чанд паҳбоди дигар соате пеш аз он, дар шарқи ин кишвар, раҳгирӣ шудаанд.

Пойгоҳи ҳавоии "Султон Шоҳзода", ки нерӯҳои Амрико низ аз он истифода мекунанд, дар минтақаи Ал-Харҷ қарор дорад ва аз оғози ҷанг борҳо ҳадафи ҳамла қарор гирифтааст.

Дар Кувайт Созмони ҳавопаймоии ин кишвар эълон кард, Фурудгоҳи байналмилалии ин кишвар шоми шанбе ҳадафи ҳамлаи чанд паҳбод қарор гирифт, ки ба системаи радарии он осеб зад, аммо аз захмӣ шудани афрод гузорише нашр нашуд. Кувайт ҳамчунин ба таври муваққат ҳарими ҳавоии худро баст.

Дар Имороти Муттаҳидаи Араб низ системаи дифои ҳавоӣ як паҳбодро дар Фуҷайра раҳгирӣ кард, аммо суқути пораҳои он боиси сӯхтор шуд.

Дафтари расонаҳои Фуҷайра эълон кард, амалиёти хомӯш кардани оташ ҳамчунон идома дорад ва як шаҳрванди Урдун ҷароҳати сабук бардоштааст. Бандари Фуҷайра яке аз марказҳои муҳими захирасозӣ ва интиқоли нафт ба минтақа ба шумор меравад.

Вазорати дифои Қатар низ эълон кард, ин кишвар рӯзи шанбе ҳадафи чаҳор мушаки баллистикӣ ва чанд паҳбод қарор гирифт, ки ҳамаи онҳо аз сӯи нерӯҳои мусаллаҳи Қатар раҳгирӣ ва аз байн бурда шуданд.

Вазорати мероси фарҳангии Эрон рӯзи 14 март дар баёнияе эълон кард, ки дар ду ҳафтае, ки аз оғози ҳамлаи муштараки Амрико ва Исроил мегузарад, "дастикам 56 музей, бинои таърихӣ ва ҷойҳои фарҳангӣ дар сароси кишвар дучори осеби ҷиддӣ шудааст".

Тибқи ин баёния, бештарин шумори биноҳои таърихӣ, ки дар бомбаборон осеб дидааст, дар Теҳрон ва Курдистон мебошанд.

Ба гуфтаи мақомоти Эрон, аз ҷумла дар Теҳрон 19 ва дар Курдистон 12 осори таърихӣ осеб дидаанд. Манбаъ ба биноҳои таърихие чун "Иморати Осиф", "Иморати солор Саид" ва "Иморати Хусравобод" дар шаҳри Санандаҷ, маркази Курдистони Эрон ишора кардааст.

Пештар низ аксҳое аз "Кохи Гулистон" дар маркази Теҳрон ва ҳамин тавр Кохи Оли Қопу дар Исфаҳон нашр шуда буд, ки мизони осеби воридшуда ба онҳоро нишон медод.

Расонаҳои озарбойҷонӣ бо такя ба маркази матбуоти Вазорати корҳои дохилӣ хабар доданд, ки Иқбол Солиев дар аввали моҳи марти имсол дар Боку ва баъди он дастгир шудааст, ки қабули муштариён аз сӯйи ӯ дар яке аз дармонгоҳҳои бонуфуз боиси бесарусомонӣ гаштааст.

Таҷаммуи мизоҷон ва табобат бо усулҳои баҳсбарангезу ғайриодӣ аз сӯйи ӯ таваҷҷӯҳи пулисро ҷалб карда, сабаби боздошташ шуд.

Аз ин пеш Иқбол Солиевро барои бе иҷозатнома пешниҳод кардани хидматрасонии тиббӣ дар Узбекистон ба ҷавобгарӣ кашида буданд. Назари Иқбол Солиев ба ин қазия маълум нест.

Дар миёни мизоҷони ин табиб узбек тоҷикистониҳо ҳам кам нестанд. Дар наворҳое, ки аз раванди қабули ӯ дар шабакаҳои иҷтимоӣ нашр шудааст, дида мешавад, ки сокинони Тоҷикистон ҳам барои гуиё ҳалли мушкилоти худ ва ё табобат ба назди Иқбол Солиев рафтаанд. Дар Тоҷикистон солҳои ахир чунин афрод боздошту муҷозот мешаванд.

Дар ин баёния, ки ба имзои 350 фаъоли маданӣ ва сиёсӣ интишор шудааст, онҳо хостори қатъи фаврии ҷанг дар Эрон шудаанд.

“Аз нигоҳи мо тарафдорони “на ҷанг ва на ҷумҳурии исломӣ ” ин ҷанг чун ҳама ҷангҳои харобиовар барои мардум на демократия ба армуғон меорад ва на амният.”- навиштаанд, муаллифони муроҷиатнома.

Фаъолон сиёсатҳои ҳукумати Эронро маҳкум карда, ба он таъкид намудаанд, ки “сарбкӯби шаҳрвандон, куштори муътаризон, ғарбситезӣ ва шиори маҳви Исроил” ба манофеи миллии эрониҳо рабте надорад” ва баръакс ин барои мардум ранҷу азоб меорад.

Дар муроҷиатнома фаъолон аз дигарон хостаанд, “ба ҷойи сукут ё ҳимояти мустақиму ғайримустақим аз ҷанг, барои хатми фаврии он ва поён додан ба ҳамлаҳои низомӣ талош кунанд”.

Вазорати корҳои дохилӣ рӯзи 11-уми март дар хабарномае навишт, ки сокини 36 солаи шаҳри Душанбе моҳи сентябри соли гузашта, бо роҳи фиреб ва ваъдаи кори сердаромад зани 33 солаи сокини шаҳри Ваҳдатро ба Дубай бурдааст.

Аммо ба гуфтаи мақомот дар он ҷо зан ба ҷойи кор ба истисмори ҷинсӣ ё танфурушӣ маҷбур шудааст. Дар робита ба ин қазия алайҳи сокини Душанбе бар асоси моддаи 130 ё одамрабоӣ парвандаи ҷиноятӣ боз шудааст.

Қонун барои ин амал аз 8 то 12 соли зиндонро пешбинӣ мекунад. Мавқеи зани гумонбар ва пайвандонаш дар робита ба ин қазия маълум нест.

Моҳи ноябри соли 2025 ҳам мақомоти интизомӣ аз боздошти ду зан бо гумони ҷалби духтарон ба истисмори шаҳвонӣ дар хориҷи кишвар хабар дода буданд. Ба гуфтаи мақомот ин занҳо, ки яке 37 ва дигари 46 сола будаанд, бо истифода аз тангдастии ҷавонзане ва бо ваъдаи кори хуб ӯро ба Русия бурда, ба танфурӯшӣ маҷбур кардаанд.

Бино ба иттилои расмӣ соли 2025 дар кишвар 177 ҳолати савдои одамон ошкор ва зидди 73 нафар парвандаи ҷиноятӣ боз шудааст.

Ин мусобиқа бо ибтикори мақомоти иҷроияи ҳокимияти давлатии шаҳри Душанбе ва Федератсияи миллии гуштигирии Тоҷикистон дар доираи чорабиниҳои варзишии Ҷашни байналмилалии Наврӯз ва эълон гардидани Рӯзи ҷаҳонии гуштигирӣ доир хоҳад шуд.

Дар мусобиқа дастаҳо аз Вилояти Мухтори Кӯҳистони Бадахшон, вилоятҳои Суғду Хатлон, шаҳри Душанбе, шаҳру ноҳияҳои тобеи марказ, минтақаи Рашт ва дастаи Федератсияи миллии гуштигирии Тоҷикистон ширкат меварзанд.

Мусобиқа аз рӯйи қоидаҳои варзиши суннатӣ доир гардида, ғолибони ҳар давр соҳиби туҳфаҳо мегарданд. Ба ғолиби мутлақи мусобиқа шоҳҷоиза - мошини сабукрав – тақдим хоҳад шуд.

Мардуми тоҷик анъанаҳои бостонӣ ва хеле бойи варзишӣ дорад. Ба навъҳои варзиши миллӣ ба ғайр аз гуштигирӣ, инчунин камонварӣ, чавгонбозӣ, бузкашӣ, асптозӣ, найзаандозӣ, пойгаи давандаҳо, тирандозӣ, дастхобонӣ ва ғайра шомиланд. Гуштии миллӣ дар байни ин намудҳо мақоми хос дорад ва баргузории сабқати паҳлавонӣ яке аз суннатҳои Наврӯзист.

Ҳамасола дар Тоҷикистон 22-юми март ҳамчун Рӯзи гуштигирӣ таҷлил карда мешавад. Бояд зикр намуд, ки соли 2022 ба гуштии миллӣ – «гуштигирӣ» - мақоми байналмилалӣ дода шуд. Ин мақом дар Вазорати адлияи Швейтсария ба қайд гирифта, гуштии миллии тоҷикӣ соҳиби сертификати байналмилалӣ гардид.

Чордаҳ рӯз инҷониб табодули оташ миёни Эрону Исроил идома дорад.

Рӯзи 12-уми март бар асари мушакборони манотиқи марказии Исроил якчанд манзили мардум зиён дидааст.

Дар ҳамин ҳол низомиёни исроилӣ иддао доранд, ки дар шаҳри Теҳрон посгоҳҳои гурӯҳи ниманизомии Басиҷро ҳадаф қарор додаанд. Ин гурӯҳ масъули таъқиби эътирозҳои мардумии моҳҳои гузашта дар Эрон эътироф шудааст.

Исҳоқ Ҳерсог, президенти Исроил, дар суҳбат бо Рей Фурлонг, хабарнигори Радиои Озодӣ, иброз дошт, ки ҳамлаҳои густарда барои маҳви имконоти ҷангии Эрон идома хоҳад кард.

Ӯ гуфт: "Рамла шаҳри таърихист, ки дар он яҳудиёну арабҳо, мусулмонон ва насрониҳо канори ҳам ба сар мебаранд. Бо ҳадафи ҳимоят аз зиндагии осоиштаи онҳо дар муқобили императории бади Теҳрон, ки мехоҳад сулҳу оромишро барҳам занад, мо маҷбурем ба онҳо зарба занем. Мо бояд имконоти низомии онҳоро маҳв кунем, то Ховари Миёна ояндаи наве дошта бошад."

Замоне, ки президенти Исроил ба суолҳои Радиои Озодӣ ҷавоб медод, барои аввалин бор изҳороте нашр шуд, ки ба раҳбари нави Эрон Муҷтабо Хоманаӣ иртибот дода мешавад.