Пайвандҳои дастрасӣ

Хабари нав

Хабарҳо

Афғонистон ба интиқоли нерӯи барқи Тоҷикистон ризоият дод

Мақомоти расмӣ гуфтанд, ки Афғонистон рӯзи душанбе ризоият додааст, то ки нерӯи барқи Тоҷикистон таввасути он кишвар ба Покистон интиқол дода шавад. Аммо таҳти ин шароит, ки хати баландшиддати нерӯи барқ, ки қарор аст Тоҷикистону Покистонро васл кунад, на таввасути дараи Вахон, балки таввасути Кобул бигзарад ва барои тронзит ҳаққи Афғонистон пардохта шавад. Ҷонибҳо дар ин маврид дар як конфронси байналмилалӣ, ки дар Исломобод рӯзҳои 8 ва 9 май баргузор шуд, ба мувофиқа расидаанд.
Дар ин нишаст намояндагони Тоҷикистону Қирғизситон ва Афғонистону Покистон масоили судури нерӯи барқ ба Покистону Афғонистонро баррасӣ кардаанд. Дар конфронс гуфта шудааст, ниёзи Покистони ташнаи энержӣ ба нерӯи барқ солона то 8 дар сад афзоиш меёбад ва Афғонистон, ки ба тадриҷ аз бесарусомониҳо раҳо мешавад, солҳои наздик ба миқдори зиёди нерӯи барқ ниёз хоҳад дошт. Аммо ду кишвари Осиёи Марказӣ Тоҷикистону Қирғизистон, ки саршор аз захираҳои истифоданашудаи гидроэнержӣ ҳастанд, метавонанд, ниёзмандиҳои Покистону Афғонистонро бароварда созанд.
Тибқи иттилои вазорати обу энержии Покистон дар нишасти дурӯза мувофиқа шудааст, то ки ҷонибҳо нақшаи иҷрои ёддошти тафоҳум миёни Тоҷикистону Покистон дар мавриди хати баландшиддати нерӯи барқро таҳия кунанд. Соле пеш Душанбеву Исломобод дар робита ба бунёди як хати баландшиддати нерӯи барқ ба Покистон ёддошти тафоҳум имзо карданд. Ду тарҳи бунёди ин хати баландшиддати 1000 мегаватӣ таҳия шуда буд, ки мувофиқи аввалӣ хати баландшиддат бояд таввусти дараи Вахони Помир то ба Покистон бурда мешуд. Аммо намояндагони Афғонистон гуфтаанд, ки ин тарҳ мушкилофарину гаронаррзиш аст, чаро ки дараи Вахон роҳҳои мувофиқ надорад, зимистонҳо баста мешавад ва аз назари амниятӣ низ хуб нест. Тибқи арзёбиҳо барои бунёди ин хати баландшиддат тақрибан 500 миллион доллар лозим аст ва созмонҳои байналмилалии молиявӣ аз қабили Бонки Ҷаҳон, Бонки Осиёии Рушд ва Оҷонсии Рушди Байналмилалии Амрико гуфтаанд, ки барои иҷрои ин тарҳ кӯмак мекунанд.

Ҳамаи хабарҳои имрӯзро дар инҷо бихонед

Тазоҳуроти шинҷониҳо дар назди консулгарии Чин дар Алмато

Тазоҳуроти норозиён дар наздикии сафорати Чин дар шаҳри Нурсултон

Таҷаммуи ҳудуди даҳ нафар бо талаби раҳоии наздиконашон аз "урдугоҳҳои бозтарбияи сиёсӣ"-и минтақаи Шинҷон дар назди консулгарии Чин дар шаҳри Алматои Қазоқистон то нимашаб идома кард.

Фаъоли мадании қазоқ Байболат Кунболатулӣ 23-юми сентябр ба бахши қазоқии Радиои Озодӣ гуфт, таҷаммуъгарон дар аввал гуфтанд, шабро онҷо рӯз мекунанд, вале дертар ба далели сардии ҳаво тасмим гирифта шуд, ба хонаҳояшон баргарданд.

Ба қавли ӯ, рафти таҷаммуъро кормандони пулис ва чанд кас бо либоси мулкӣ назорат мекарданд. Ба назди эътирозгарон намояндаи шаҳрдории Алмато баромада, гуфтааст, гирдиҳамоӣ "ғайриқонунӣ" аст.

Фаъоли қазоқ мегӯяд, пештар муроҷиатномаеро ба Вазорати корҳои хориҷии Қазоқистон пешниҳод карда, дар он талабҳои худро зикр карда буданд. Талошҳо барои дарёфти назари вазорат бенатиҷа буданд.

Иқдоми қазоқтаборон дар паси дари консулгарии Чин дар шаҳри Алмато 8-уми феврали имсол шуруъ шуд. Бархе аз норозиён мегӯянд, пайвандони онҳоро дар Чин дар "урдугоҳҳои бозтарбияи Шинҷон нигаҳдорӣ мекунанд". Бархеи дигар иддао доранд, ки пайвандонашон дар Чин бе айбу асосе ба солҳои дароз зиндонӣ шудаанд. Гуруҳи севум даъво доранд, ки мақомоти Чин ҳуҷҷатҳои пайвандонашонро мусодира карда, ба онҳо иҷозаи тарки Чинро намедиҳанд.

Панҷ қудрати ҷаҳонӣ гуфтаанд, "Афғонистон ҳукумати фарогир дошта бошад"

Ҳукумати "Толибон"-ро дар Афғонистон барои фарогир ё ҳамашумул набудан танқид мекунанд

Антонио Гутерреш, дабири кулли Созмони Милали Муттаҳид, мегӯяд, ки панҷ узви доимии Шӯрои Амнияти созмон хоҳони як Афғонистони орому босубот ҳастанд.

Ӯ рӯзи 22-юми сентябр пас аз нишасти вазирони корҳои хориҷии Чину Фаронса, Русияву Амрико ва Бритониё гуфт, тамоми ин кишварҳо мехоҳанд, “Афғонистон орому босубот бошад, то дар он кумакҳои башарӣ бе ягон мушкил ва табъиз расонда шавад.”

Гутерреш дар шаҳри Ню Йорк ба хабарнигорон гуфт, панҷ қудрати ҷаҳонӣ дар пайи он ҳастанд, ки “дар Афғонистон ҳуқуқи занону духтарон риоят шавад. Афғонистон паноҳгоҳи террористон нашавад ва ҳукумате фарогире дошта бошад, ки аз тамоми аҳолии намояндагӣ кунад.”

Вазири корҳои хориҷии Амрико бо ҳамтоёнаш аз Фаронсаву Русия ва Бритониё дар ҳошияи нишасти Маҷмааи умумии Созмони Милал гуфтугӯ дошт. Вазири Чин дар он онлайнӣ ҳузур ёфт.

«Толибон» моҳи август Афғонистонро ишғол карданд ва ин нигаронӣ вуҷуд дорад, ки ин ҳамсоякишвари Тоҷикистон ба як паноҳгоҳи амни гуруҳҳои террористиву тундрав табдил меёбад.

Қирғизистон муҳоҷиронашро дар Русия рӯйхат мекунад

Нуқтаи овоздиҳӣ дар Қирғизистон. Акс аз моҳи апрели соли 2021

Мақомоти Қирғизистон ният доранд, аз 4 то 17-уми октябри имсол маълумоти биометрии ҳамаи муҳоҷирони кории ин кишварро дар Русия ҷамъ оварда, дар консулгариҳо сабт кунанд.

Ба иттилои бахши қирғизии Радиои Озодӣ, ин нукта дар мулоқоти аъзои Кумисюни марказии интихобот ва раъйпурсии Қирғизистон бо намояндагони ҷамъияти қирғизҳо дар Русия зикр шудааст. Ин мулоқот дар шаҳри Маскав гузашт.

Узви Кумисюни марказии интихоботи Қирғизистон, Анор Дубанбоева, гуфтааст, ҷамъоварии маълумоти биометрӣ ва сабтиноми муҳоҷирон дар консулгариҳо барои он анҷом дода мешавад, ки тавонанд дар интихоботи порлумонӣ иштирок кунанд.

Ба гуфтаи масъулони Кумисюн, дар Русия, аз ҷумла дар шаҳрҳои Маскав, Қазон, Краснодар, Самара ва Санкт-Петербург, 20 нуқтаи ройдиҳӣ ташкил карда мешавад.

Қирғизистон 28-уми ноябри имсол интихоботи порлумонӣ дорад. Порлумони нави ин кишвар аз 90 вакил иборат хоҳад буд.

"Толибон" қотилон ва қочоқчиёни мухаддирро озод карданд: додситонҳои пешин дар ташвишанд

Ҷангҷӯёни "Толибон" дар даромадгоҳи масҷиди Вазир Акбархон дар Кобул, 17-уми сентябри соли 2021

Додситонҳое, ки дар ҳукумати пешини Афғонистон фаъолият мекарданд, мегӯянд, онҳоро ҷинояткороне таҳдид мекунанд, ки дар давраи ҳукумати пешин зиндонӣ шуда буданд.

Ин таҳдидҳо замоне оғоз шуданд, ки ҷангҷӯёни "Толибон" ҳангоми ғасби Афғонистон дар моҳи августи имсол ҳамаи зиндониҳоро раҳо карданд.

Ҳумоюн, як додситон аз вилояти Ҳилманд солҳои дароз ҷиноятҳои вазнинро таҳқиқ мекард. Дар Ҳилманд маводи мухаддир парвариш ва коркард мешуд. Ҳумонюн касонеро таъқиб мекард, ки ба тиҷорати ғайриқонунии маводи мухаддир дар Афғонистон машғул буданд.

Акнун додситони пешин мегӯяд, ҷинояткороне ӯро таҳдид мекунанд, ки вай барои зиндонӣ шуданашон талош карда буд. Ба гуфтаи додситони пешин, ҷинояткорон ҷуброни ҷаримаҳои пардохта ва амволи аз сӯи давлат мусодирашудаашонро талаб доранд.

Додситонҳои пешин аз саросари Афғонистон ҳодисаҳои ба ин монандро нақл мекунанд.

Бисёрии аз зиндониҳое, ки аз сӯи ҷангҷӯёни "Толибон" озод шуданд, аъзои "Толибон" ва ё узви гуруҳҳои дигар, амсоли "Давлати исломӣ" ва "Таҳрики Толибони Покистон" буданд.

Аммо ҷинояткорони дигар низ "ба шарафи талошҳо"-и "Толибон" аз зиндон раҳо шуданд.

Вакилони мудофеъ хабар доданд, ки ҷинояткорони раҳошуда бо ҳадафи қасосоҷӯӣ ҳадди ақал ба 3 додситони пешин ҳамла ва онҳоро қатл кардаанд.

Номи Иззат Амон ба афв пешниҳод шудааст. Наздиконаш гуфтанд, пули даъвогаронро доданд

Иззат Амон, ҳомии боздоштшудаи муҳоҷирон

Номи Иззат Амон, ҳомии боздоштшудаи муҳоҷирони тоҷик, пас аз пардохтани пули даъвогарон, ба афв пешниҳод шудааст. Қонуни нави афв рӯзи даҳуми сентябри имсол ба иҷро даромад.

Котиботи Додгоҳи шаҳри Душанбе ба Радиои Озодӣ хабар дод, ки мурофиаи Иззат Амонро рӯзи 22-юми сентябр ба поён расонданд. "Қарзаш аз даъвогарон ба 1 миллиону 90 ҳазор рубл ва 1000 доллар баробар буд, ҳамаашро супориданд", -- афзуд манбаъ.

Саидбурҳон Шарифов, вакили мудофеи Иззат Амон, низ рӯзи 23-юми сентябр пурра пардохта шудани қарзи даъвогаронро тасдиқ кард.

Пайвандонаш гуфтанд, бо вуҷуди он ки бо ҳамаи даъво ба зидди Иззат Амон розӣ нестанд, ба хотири раҳоии ӯ пулро супурданд ва мунтазири озодияш ҳастанд. Моддаи "қаллобӣ ба миқдори махсусан калон" (қисми чаҳори моддаи 247-и Кодекси ҷиноӣ), ки бар асоси он алайҳи Иззат Амон парванда боз шуда буд, ба қонуни афв шомил мешавад.

Иззат Амон, раиси созмони "Маркази тоҷикон" дар Маскав, рӯзи 25-уми марти имсол аз шаҳрвандии Русия маҳрум ва аз қаламрави ин кишвар ронда шуд. Пас аз як рӯзи он мақомоти Тоҷикистон аз боздошти ӯ дар Душанбе хабар доданд.

Ба иттилои мақомот, ӯ бар асоси даъвои чанд нафар дастгир шуда, ба қаллобӣ муттаҳам аст. Наздиконаш аксар даъвоҳоро бепоя донистанд.

Тарафдоронаш бовар доранд, боздошти Иззат Амон ва иттиҳоми ба зидди ӯ дар асл дорои ангезаҳои сиёсӣ буда, ба танқидҳояш аз ҳукумати Тоҷикистон рабт мегирад. Ӯ дар баробари кумаки ҳуқуқӣ ба муҳоҷирон дар Русия, дар шабакаҳои иҷтимоӣ низ фаъол буд ва аз баъзе аз сиёсатҳои ҳукумати Тоҷикистонро зери тозиёнаи танқид мегирифт.

Нархи бензин дар Қирғизистон назар ба Русия гаронтар шуд

Қирғизистон. Акс аз бойгонӣ.

Дар Қирғизистон болоравии қимати бензин ҳамоно идома дорад. Дар рӯзҳои охири моҳи сентябр қимати бензини навъи Аи-92 ва Аи-95 дар Қирғзистон гаронтар аз қимати ҳамин навъи бинзин дар Русия шудааст.

Ба иттилои Оҷонси давлатии зиддимонополии Қирғизистон, гаронтарин бензин дар паҳнои Иттиҳоди иқтисодии Авруосиё дар Арманистон ва арзонтарин бензин дар Қазоқистон будааст.

Пештар аз ин Иттиҳоди воридкунандагони нафти Қирғизистон ҳушдор дода буд, ки дар моҳи сентябр қимати бензин гаронтар хоҳад шуд. Зеро, Русия шуруъ аз моҳи сентябр маводи сӯхтро ба Қирғизистон ба иловаи боҷи содиротӣ интиқол медиҳад.

Қирғизистон ҳамасола 1,1 млн тона маводи сӯхт масраф мекунад. Дар охири соли 2016 Русия боҷи нафт ва маводи нафтиро барои Қирғизистон бекор карда буд.

Фаъоли қазоқ баъди даъват ба таҳрими Назарбоев боздошт шуд

Фаъоли мадании қазоқ Алима Абдирова 22-юми сентябр дар шаҳри Оқтеппаи Қазоқистон дар ҷараёни ҳамоиши эътирозии инфиродӣ боздошт шуд. Кормандони пулис ҳомии ҳуқуқ Олга Климоноваро низ, ки рафти эътирозро ба навор мегирифт, бо худ бурданд.

Дар ин бора худи Абдирова хабар дод. Ӯ гуфт, барои баргузор кардани эътирози инфиродӣ дар рӯзҳои 21-23 сентябр иҷозат гирифта буд. Фаъоли мадании қазоқ дар рӯзи нахустини эътирози худ аз Иттиҳоди Аврупо даъват кард, ки зидди президенти пешини Қазоқистон Нурсултон Назарбоев таҳрим эълом кунад. Дар натиҷа 22-юми сентябр, дар рӯзи дувуми эътироз дастгир карда шуд.

Сардори пулиси вилояти Оқтеппа Айбек Копенов тасдиқ кард, ки Абдироваро боздошт кардаанд. Абдирова мегӯяд, 21-уми сентябр аз ҳукумати Оқтеппа занг зада, ӯро огаҳ карданд, ки "формати огоҳкуниро нақз кардааст" ва эҳтимол аст, пулис вайро боздошт кунад. Вале фаъоли маданӣ гуфтааст, қоидаеро вайрон накардааст.

Алима Абдирова дар эътирозҳои инфиродии 16-18 сентябри соли равон ҳам Иттиҳоди Аврупоро ба таҳрими Назарбоев даъват карда буд. Ба гуфтаи вай, таъқибҳои сиёсии шаҳрвандон ва нақзи ҳуқуқи инсон дар давраи раҳбарии Назарбоев ба як таҷрибаи маъмулӣ табдил ёфта буд.

Қирғизистон аз Узбекистон 15 оҳу меорад

Аскар Давлатбеков, як масъули Академияи миллии илмҳои Қирғизистон гуфт, қарор аст, аз Узбекистон ба он кишвар 15 оҳу оварда шавад

Ба гуфтаи ӯ, дар ин замина қарордоде ба имзо расида, раванди интиқоли ҳайвонҳо ба Қирғизистон оғоз шудааст.

"Оҳуҳо дар Қирғизистон пурра нобуд шуданд. Онҳо соли 2007 буданд, ман шахсан се оҳуро дида будам. Вале баъдан талошҳои мо барои пайдо кардани онҳо бенатиҷа буданд. Мо моҳи оянда оҳуҳоро меорем ва ҳар сол шумори онҳоро бештар мекунем", - гуфт вай.

Оҳу ба Китоби сурхи Қирғизистон шомил карда шудааст. Қонунгузории ин кишвар барои шикори оҳу як миллион сом ҷарима пешбинӣ кардааст.

Гузоришҳо: дар Ҷалолобод ба мошини "Толибон" ҳамла карданд

"Толибон" дар Ҷалолобод. 18 сентябри соли 2021

Бино бар гузоришҳо аз шарқи Афғонистон, мусаллаҳон ба мошинҳои «Толибон» ҳамла карда, чанд ҷангҷӯ ва ғайринизомиро куштаанд. Дар як ҳамла дар шаҳри Ҷалолобод афроди мусаллаҳ ба сӯи мошини «Толибон» оташ кушода, ду нафари онҳову дастикам як ғайринизомиро куштаанд. Дар ин бора рӯзи 22-юми сентябр шоҳидон хабар доданд. «Толибон» иддао кардаанд, ки ҳамаи кушташудаҳо мардуми осоишта буданд.

Як манбаъ ба Радиои Озодӣ гуфт, ки ҳамлагарон савори аробаҳои одамкашонӣ ё рикша буданд ва баъди тирандозӣ тавонистанд фирор кунанд.

Як соат баъди ин ҳодиса маркази вилояти Нангарҳор шаҳри Ҷалолобод шоҳиди таркиши бомбаи сарироҳӣ шуд. Дар ин ҳодиса, ба шаҳодати шоҳидон, як ҷангии «Толибон» ва як мулкӣ маҷрӯҳ шуданд. Дар таркиши дигаре, ки дар ҳамин шаҳр рух дод, як нафари дигар маҷрӯҳ шуд. Феълан маълум нест, ки оё ин нафар ҷангӣ буд ё мулкӣ.

Ҳанӯз ҳеч нафар ё гурӯҳе масъулияти ин ҳамлаҳоро ба дӯш нагирифтааст. Вале гуфта мешавад, ки дар ин минтақа аъзои гурӯҳи «Давлати исломӣ» ва шохаи «Хуросони Давлати исломӣ» фаъол аст ва ҳафтаи гузашта ҳам, тибқи гузоришҳо, дар куштори ҳашт нафар даст дошт. Нангарҳор паноҳгоҳи шохаи «Хуросон» аст ва ин гурӯҳ душмани мақомдорони нави Афғонистон ба ҳисоб меравад.

«Толибон» ва «Давлати исломӣ» дар гузашта ҳам бо ҳам задухӯрдҳое доштаанд.

Гуруҳе аз вакилон хостори лағви натиҷаҳои интихоботи Русия шуданд

Комиссиюни марказии интихоботҳои Русия, 19-уми сентябр

Дар Русия гурӯҳе аз депутатҳои мустақили маҷлисҳои маҳалливу вилоятӣ дар аризае талаб кардаанд, ки натиҷаҳои интихоботи парлумонии 17-19-уми сентябри имсол бо сабаби фиребу қонуншиканиҳои зиёдаш бекор карда шавад. Анҷумани вакилони мустақили маҳалливу вилоятӣ дар аризае ба номи раиси Комиссиюни марказии интихоботҳои Русия Элла Памфилова навиштанд, ки аз ӯ ташкили “интихоботи одилонаву шаффоф”-ро тақозо карда буданд, вале “дар асл амалҳои шумо натиҷаҳои баръакс дод”.

Дар аризае, ки ба интернет барои имзои бештари норозиёни натиҷаҳои интихобот роҳ ёфтааст, гуфта мешавад: “Сиёсатмадорони барҷастаи мухолифин бо баҳонаҳои ноодилона барои ширкат дар интихобот роҳ дода нашуданд” ва “овоздиҳии бисёррӯза имкони тақаллубҳои оммавиро афзоиш дод”.

Комиссиюни марказии интихоботҳо рӯзи 21-уми сентябр эълон кард, ки баъди ҳисоби ҳамаи баргаҳо ҳизби ҳокими “Русияи воҳид” бо 49,82 дарсади овозҳо баранда эълон мешавад. Рақиби он ҳизби коммунист 18,93 дарсади овозҳоро ба даст овардааст. Бар асоси ин натиҷаҳо, “Русияи воҳид” дар Думаи давлатӣ 112 курсиро тавассути феҳристи ҳизбӣ ва 198 курсиро тавассути номзадҳои инфиродӣ ба даст овардааст. Дар маҷлиси иборат аз 450 курсӣ “Русияи воҳид” бароҳат аксари курсиҳоро дар ихтиёр дорад ва бидуни мушкил ба конститутсияи кишвар тағйиру иловаҳо ворид карда метавонад.

Интихоботи гузашта барои тақвияти қудрати Владимир Путин ва ҳам ҳамвор кардани роҳи ӯ ба интихоботи президентии соли 2024 муҳим арзёбӣ мешавад.

Мунаққидони зиёд гуфтанд, ки Кремлин интихоботро аз оғоз хеле эҳтиёткорона идора кард, аксар мухолифони воқеӣ аз пешбарии номзадиву ширкат дар интихобот маҳрум шуданд ва ҳукумат аз саркӯби мухолифон кор гирифт.

Яке аз намунаҳои он рӯзи аввали овоздиҳӣ – 17-уми сентябр аз замимаҳои Apple ва Google нопадид шудани барномаи овоздиҳии ҳушманд буд. Ҷонибдорони Навалний ин кори мақомотро ҳамчун сензура интиқод ва ширкатҳои фанновариҳои азимро барои тоб овардан ба фишорҳои Путин маҳкум карданд.

Зери аризае, ки дар интернет чоп шуд, дар чанд соати аввали нашр 3700 нафар имзо гузоштааст. Муаллифон аз Элла Памфилова тақозо кардаанд, ки бо истифода аз салоҳиятҳояш “фазои қонунии интихоботиро барқарор кунад”.

Додгоҳи Русия писари Саидқиёмиддини Ғозиро озод кард. Ӯ бо дархости Душанбе дар боздошт буд

Баракатулло Ғозиев, писари Саидқиёмиддини Ғозӣ

Додгоҳи Русия писари Саидқиёмиддини Ғозӣ, як рӯҳонии шинохта дар давраи ҷанги дохилии Тоҷикистонро озод кардааст.

Баракатулло Ғозиеви 35-сола моҳи августи имсол бо талаби Тоҷикистон дар шаҳри Қазон дастгир шуд.

Хешовандони Баракатулло 22-юми сентябр гуфтанд, азбаски мақомоти Тоҷикистон бар асоси муқаррароти Русия дар муддати 40 рӯз дархости истирдодро нафиристоданд, ӯро аз боздошт раҳо кардаанд. Пештар онҳо аз имкони фиристода шудани ӯ ба Тоҷикистон ва эҳтимоли шиканҷа ва зиндонӣ шуданаш нигарон буданд.

Мавқеи ҷониби Тоҷикистон дар қазияи Баракатулло Ғозиев маълум нест. Кӯшиши мо барои тамос бо намояндаи консулгарии Тоҷикистон дар шаҳри Уфа то ин дам бенатиҷа буд.

Як манбаъ дар Додситонии кул бе зикри ном гуфт, "мақомот танҳо дар як ҳолат шахси мавриди ҷустуҷӯро суроғ намекунанд, агар қарори додгоҳ дар бораи кофтукоб ва ба ҳабс гирифтани ӯ бекор шуда бошад." Аммо мусоҳиби мо нагуфт, ки оё қарори ҷустуҷӯ ва ҳабси Баракатулло Ғозиев дар Тоҷикистон бекор шудааст ё не.

Ӯро мақомоти Тоҷикистон ба барангехтани кинаву адовати мазҳабӣ муттаҳам карда, дар ҷустуҷӯйи байнулмилалӣ қарор дода буданд. Мақомот ҳамчунин Баракатулло Ғозиевро ба хиёнат ба ватан муттаҳам карда, гуфта буданд, ӯ гуё дар шабакаи Инстаграм "ақидаҳои мазҳаби шиаро тарғиб мекард".

Пештар ду бародари Баракатулло Ғозиев бо гуноҳи тундгароӣ ва хиёнат ба давлат дар Тоҷикистон ба зиндон маҳкум шудаанд.

Худи Саидқиёмиддини Ғозӣ соли 2017 дар шаҳри Санкт-Петербурги Русия дастгир ва дар шароити мармуз ба Тоҷикистон оварда шуда, ба 25 сол зиндон маҳкум гардид. Ӯ дар ошӯби тобистони соли 2019 дар зиндони шаҳри Ваҳдат кушта шуд.

Навалний: натиҷаҳои интихобот аз роҳи таҳдиду саркӯб дуздида шуд

Июни соли 2021, Алексей Навалний дар мурофиаи додгоҳие аз утоқи зиндон иштирок мекунад

Сиёсатмадори зиндонӣ Алексей Навалний Кремлинро дар истифодаи “таҳдиду саркӯб” барои "дуздидани натиҷаҳои интихоботи парлумонӣ" интиқод кард. Бар асоси натиҷаҳои расмии интихоботи Думаи давлатии Русия, ҳизби ҳокими “Русияи воҳид” дар овоздиҳие, ки ба қавли нозирони бетараф, пур аз тақаллубу сохтакорӣ гузашт, баранда эълон шудааст. Дар паёме, ки рӯзи 21-уми сентябр дар саҳифаи Инстаграми Навалний нашр шуд, сиёсатмадори мунаққиди Кремлин гуфт, шеваи овоздиҳии ӯ “як муваффақият буд”, чун тавонист мавқеи ҳизби Владимир Путинро заъиф кунад, вале мақомот боз ҳам аз роҳи “кӯҳнаву содда” натиҷаҳоро сохтакорӣ карданд. Ӯ навишт: “Қаллобон натиҷаҳоро иваз мекарданд, то ки пирӯзии онҳо бештар қобили эътимод бошад”. Ба гуфтааш: “Дар девор натиҷаҳои тақаллубӣ навишта шудаанд. Нозирони моро аз дохили ҳавзаҳои овоздиҳӣ берун карданд. Тарсдоданҳову саркӯбҳо ихтиёри бисёриҳоро кам кард ва мардум аз баромадан ба кӯчаҳо ҳарос доштанд”.

Чанд соат пеш аз ин изҳорот комиссиюни марказии интихоботҳо гуфт, бар асоси натиҷаҳои ниҳоии интихоботи Думаи давлатии Русия, ҳизби “Русияи воҳид”, ки аз пуштибонии Кремлин бархурдор аст, аксари курсиҳои маҷлиси поёнии ин кишварро ба даст овардааст. Ғарб натиҷаҳои интихоботро интиқод ва як созмони нозири мустақил маъракаи серӯзаи овоздиҳиро “интихоботи ифлостарин” дар таърихи Русия унвон кард.

Байден гуфт, ба ҷои "ҷангҳои беохир" давраи "дипломатияи пойдор" расидааст

21-уми сентябр дар қароргоҳи СММ дар Ню-Йорк Ҷо Байден аввалин бор дар мақоми президенти ИМА суханронӣ кард

Президент Ҷо Байден зимни суханронии нахустинаш аз минбари Маҷмаи кулли СММ рӯзи 21-ми сентябр қарори хуруҷи нирӯҳои ИМА аз Афғонистонро дуруст номид ва гуфт, ки маъмурияти ӯ ҳамакнун дар фикри тақвияти дипломатия ба хотири муқобила бо чолишҳои ҷаҳонӣ мебошад. Байден дар СММ дар шаҳри Ню-Йорк гуфт, “мо ба даргириҳои 20-сола дар Афғонистон хотима дода, бо ҳамин давраи ҷангҳои беохирро анҷом медиҳем ва ба аҳди нави дипломатияи пойдор ворид мешавем”.

Байден, ки барои хуруҷи бебандубори нирӯҳои амрикоӣ аз Афғонистон мавриди интиқод мебошад, зоҳиран дар посух ба ин танқидҳо гуфт, ки низомиёни ИМА “набояд барои ҳар як мушкил дар нуқоти ҷаҳон истифода шаванд”. Байден гуфт, “рисолат бояд рӯшан ва қобили дастрасӣ бошад” ва, ба қавли Байден, ҷавобгӯи манфиатҳои мардуми ИМА ва ҳам ҳадди аксар ҳамоҳангшуда бо ҳампаймонҳои ин кишвар бошад.

Ӯ гуфт, “ба ҷои идомаи ҷангҳои гузашта, мо дида ба” чолишҳои ҷаҳонии мисли пандемияи COVID-19, тағйироти иқлим ва поймолшавии ҳуқуқи инсон дӯхтаем. Ӯ гуфт, ки ҷаҳон дар як “нуқтаи чархиш” қарор дорад ва расидагӣ ба чолишҳо имтиҳони тавони “эътирофи башардӯстии мо” хоҳад буд.

СММ: Ихроҷи паноҳҷӯёни Ҳаитӣ аз ИМА метавонад хилофи қонунҳои байналмилалӣ бошад

Техас, 19 сентябр. Афсари нирӯҳои марзбонии ИМА куртаи як паноҳҷӯи ҳаитиро мекашад. Ин саҳнаҳо боиси интиқодҳо дар шабакаҳо ва матбуот шуд

Дар ҳоле, ки маъмурияти президент Ҷо Байден талош дорад бо мавҷи азими паноҳҷӯёни Ҳаити муқобила кунад, як мақоми СММ аз чунин амали мақомоти амрикоӣ интиқод кард. Филиппо Гранди, раиси оҷонсии СММ оид ба умури паноҳандагон гуфт, ки аз дидани навору шароити будубоши беш аз 14 ҳазор паноҳҷӯ, ки давоми чанд рӯзи гузашта аз як кишвари воқеъ дар соҳилҳои Карриб ба хоки ИМА ворид шуда, зери пули Дел Риои Техас хайма задаанд, “таконзада” шудааст. Грандӣ рӯзи 21-уми сентябр дар як изҳороташ инчунин Моддаи 42-и қарори соли 2020 содиршуда дар ИМА-ро интиқод кард, ки мегӯяд, аксар паноҳҷӯёне, ки ба марзҳои ҷанубии ИМА мерасанд, бо сабабҳои ин ки метавонанд боиси паҳншавии коронавирус гарданд, ба кишвар роҳ дода намешаванд. Ӯ гуфт, ки вазъи паноҳҷӯёнро носанҷидаву танҳо бар асоси Моддаи 42 аз кӯмакву пуштибонӣ маҳрум кардани онҳо бо қонунҳои байналмилалӣ дар ихтилоф аст.

Вазорати умури дохилии ИМА рӯзҳои истироҳати гузашта ба бозпас фиристодани шаҳрвандон ба кишвари Ҳаити шурӯъ кард. Баъди моҳи гузашта кушта шудани президенти Ҳаити ва зилзилаи пуршиддати моҳи августи имсол мавҷи азими паноҳҷӯён аз Ҳаитӣ ба ИМА ҳаракат кард. Вазъият баъди он пуршиддат шуд, ки дар шабакаҳо ва матбуот саҳнаҳои бо шеваи бераҳмонаву дағалона ба сӯи Рио Гранде тела кардани паноҳҷӯён аз ҷониби ходимони полиси аспсавор намоиш дода шуд.

Ҷинпин: Дар хориҷа дигар корхонаҳое, ки бо ангиштсанг кор кунанд, намесозем

Суханронии раҳбари Чин Сӣ Ҷинпин дар Маҷмаи кулли СММ видеоӣ нашр шуд

Раҳбари Чин Сӣ Ҷинпин дар суханрониаш дар Маҷмаи кулли СММ рӯзи 21-уми сентябр ваъда дод, ки ин кишвар дигар дар хориҷа корхонаҳое намесозад, ки бо ангиштсанг кор кунанд. Чин ба хотири сохтмони чунин корхонаҳо, ки хилоф бо талаботи созишномаи муҳитзистии Париж мебошад, мавриди интиқод буд. Сӯҳбатҳои видеоии Ҷинпин аз пеш сабтшуда буданд ва ҷузъиёти ин барномаҳо феълан маълум нест. Раҳбари Чин танҳо гуфт, ки ин кишвар “ба давлатҳои дар ҳоли рушд барои истеҳсоли энергияи сабзу орӣ аз карбон ёрӣ мекунад ва аз сохтмони тарҳҳое, ки бар асоси истифодаи ангиштсанг бунёд шудааст, даст мекашад”. Ин паёми Ҷинпинро фиристодаи ИМА дар масоили иқлим Ҷон Керрӣ хуш пазируфт ва гуфт, чунин оғози хуб бояд дар конфронси тағйироти иқлим, ки СММ моҳи ноябр дар шаҳри Глазгоуи Шотландия ташкил мекунад, такмил шавад.

Антонио Гутерреш, дабири кулли СММ ҳам аз ин иқдоми раҳбари Чин ва ҳам аз ваъдаи президенти ИМА Ҷо Байден, ки каме пештар дар Конгресс гуфт, барои тарҳҳои марбут ба тағйироти иқлим то соли 2024 дар як сол то 11,4 миллиард доллар ихтисос медиҳад, истиқбол кард. Айни замон Гутерреш гуфт, барои он ки конфронси Глазгоу муваффақиятомез бошад, ҳанӯз “роҳи дарозе дар пеш аст”.

Озодии садҳо кас аз зиндонҳои Тоҷикистон. Қонуни нави афв ба иҷро даромад. ВИДЕО

Раҳоии зиндониён. Акс аз ноябри соли 2019

Гуруҳи аввалини маҳбусон бар асоси қонуни афв рӯзи 21-уми сентябр аз зиндони Ёвон ва маҳбаси занони Норак озод шудаанд. Қонун дар бораи афв бахшида ба 30-солагии истиқлоли Тоҷикистон қабул шуд. Дар назар аст, то ду моҳи оянда беш аз 10 ҳазор нафар аз зиндону боздоштгоҳҳо озод шуда, ҷазои қариб 6 ҳазор каси дигар кам карда шавад.

Масъулони ҳукумати ноҳияи Ёвон 22-юми сентябр ба Радиои Озодӣ гуфтанд, як рӯз пеш 605 нафарро аз зиндон раҳо карданд.

Як маҳбуси зиндони занонаи Норак гуфт, рӯзи гузашта ӯ ва даҳҳо зани дигарро бар асоси қонуни афв озод карда, дар шаҳри Душанбе ба дасти пайвандонаш супурданд.

Масъулони зиндони шаҳри Бохтар, маркази вилояти Хатлон, гуфтанд, рӯзи гузашта чанд нафар аз маҳбусонро озод карданд, вале шумораи онҳо дақиқ нест.

Гузориши видеоиро дар инҷо бинед:

Дар Тоҷикистон авф оғоз шуд, садҳо зиндониро озод карданд
лутфан мунтазир бошед

Феълан кор намекунад

0:00 0:02:30 0:00

Дар Сарраёсати иҷрои ҷазои ҷиноӣ ё Идораи зиндонҳои Вазорати адлия ба хабарнигори Радиои Озодӣ гуфтанд, то ду рӯзи оянда озод кардани зиндониён аз маҳбаси маъруф ба "Якум Советский"-и Душанбе ҳам оғоз мешавад.

Қонун дар бораи афв 6-уми сентябри имсол аз сӯи вакилони Маҷлиси намояндагон қабул шуд.

Абдуфаттоҳ Шарифзода, сухангӯи президенти Тоҷикистон, 22-юми сентябр ба Радиои Озодӣ гуфт, қонуни афв 8-уми сентябр аз сӯи раиси ҷумҳурӣ имзо шуда, 9-уми сентябр дар матуботи давлатӣ нашр ва аз он замон ба иҷро даромадааст.

Қонуни афв нисбат ба 16 ҳазор кас татбиқ хоҳад шуд. Аз ҷумла, беш аз 10 ҳазор нафар аз зиндону боздоштгоҳҳо озод шуда, гуноҳи қариб 6 ҳазори дигарро кам мекунанд.

Бар асоси қонуни афв, занон, шахсони ноболиғ, мардони аз 55-сола боло, маъюбони гуруҳҳои 1, 2, 3, шахсони дорои гирифтори бемориҳои вазнин, афроде, ки мукофоти давлатӣ доранд ва шахсони хориҷӣ аз адои ҷазо озод карда мешаванд. Вале дар ин миён онҳое, ки ҷурмҳои сангин содир кардаанд, аз ҷумла “хиёнат ба давлат” ва ё “бо зӯроварӣ ғасб намудани ҳокимият”, шомили қонуни афв нахоҳанд шуд.

Шарҳи пурраро дар бораи қонуни афв инҷо пайдо кунед

Соли 2019 ба муносибати 25-умин солгарди қабули Конститутсияи Тоҷикистон низ қонуни афв қабул шуда, 20 ҳазор нафарро фаро гирифта буд. Он замон иддае аз вуҷуди мавридҳои фасод ҳангоми татбиқи қонуни афв ва бархе аз зиндониёни озодшуда аз набудани ҷойи кор шикоят доштанд.

Байден нақшаҳои нави муқобила бо COVID-19-ро муаррифӣ хоҳад кард

Ҷо Байден, президенти ИМА

Президенти ИМА Ҷо Байден рӯзи 22-юми сентябр як ҷаласаи маҷозии бахшида ба масъалаи муқобила бо COVID-19-ро гардонандагӣ мекунад. Интизор меравад, ки раҳбари ИМА дар ин ҷаласа дар бораи ироаи воксинаҳои бештар ба кишварҳои дигари ҷаҳон ва ҳам ёриҳои иловагӣ хабар бидиҳад. Байден дар суханрониаш аз минбари Маҷмаи кулли СММ рӯзи 21-уми сентябр гуфт, ки ИМА ба барномаи ҷаҳонии мубориза бо COVID-19 - 15 миллиард доллари иловагӣ ҷудо мекунад, то ки ба кишварҳои дигар 160 миллион дона воксинаи дигар тақсим шавад. Ҷаласаи маҷозии зери раҳбарии Байден дар ҳоле ташкил мешавад, ки дар ИМА ҳолатҳои афзоиши олудашавӣ ба COVID-19 мушоҳида мешавад.

Мавзӯи дастрасии одилона ба воксина дар саросари ҷаҳон яке аз масъалаҳои калидии ҷаласаи сарони кишварҳои Гурӯҳи Ҳафтгона хоҳад буд.

Тоҷикистон яке аз кишварҳои қабулкунандаи воксинаҳои хайрияи ИМА мебошад. Рӯзи 20-уми сентябр сафорати ИМА дар Душанбе гуфт, тавассути Агентии ИМА оид ба рушди байналмилалӣ (USAID) 115 ҳазор воя ваксинаи Pfizer-ро ба Тоҷикистон ворид кард. Қарор аст дар фурсати кӯтоҳ шумори умумии воксинаи навъи Pfizer-и аз ҷониби ИМА тақдимшуда ба Душанбе 325 ҳазор 260 вояро ташкил диҳад. Ин воксина бахше аз кӯмакҳое мебошад, ки тавассути барномаи Маркази дастрасии глобалӣ ба ваксинаҳои зидди COVID-19 (COVAX) фиристода шудааст. Моҳи июли соли ҷорӣ ИМА 1,5 миллион вояи ваксинаҳои Moderna-ро ба Тоҷикистон фиристода буд.

Вазорат: То 40 дарсади тоҷикистониҳо бар зидди COVID эм шудаанд

10-уми сентябр тавассути СММ ба Тоҷикистон бастаҳои навбатии воксинаи AstraZeneca ворид шуд

Мақомоти вазорати тандурустии Тоҷикистон мегӯянд, дар ин кишвар то 40 дарсади афроди аз 18-сола боло бар зидди COVID-19 эм шудаанд. Тибқи иттилои Вазорати тандурустии Тоҷикистон, то 20 -уми сентябр беш аз 2 миллиону 307 ҳазор нафарро эм кардаанд. Аз ин миён, ба қавли мақомоти, тақрибан нисфашон вояи дуввуми ваксинаро ҳам гирифтаанд. Санҷидани дурустии ин омор тавассути манобеи мустақил имкон надорад, вале бино ба иттилои матбуот, дар миёни бархе сокинони ин кишвар шубҳа ва ҳарос аз гирифтани воксина эҳсос мешавад ва на ҳар калонсол омода аст, ки пурра эм карда шавад.

Барои моякубии сокинон дар муқобили коронвирус аз ваксинаҳо CoronoVac, AstraZeneca, Moderna, Pfaizer ва "Спутник-V" истифода мешавад.

Дар Тоҷикистон дастрасӣ ба воксинаҳо асосан бо ёрии барномаи COVAX-и Созмони ҷаҳонии тандурустии СММ имконазир шудааст.

Дар Ёвон аввалин гурӯҳи зиндониҳо бар асоси қонуни афв озод шуданд

Октябри соли 2019. Аввалин гурӯҳи зиндониҳо бар асоси қонуни афв ба озодӣ мебароянд

Тибқи ахбори расида, рӯзи 21-юми сентябр гурӯҳи аввалини зиндониёни афвшуда аз маҳбаси шаҳри Ёвон ба озодӣ баромаданд. Манбаъҳои Радиои Озодӣ аз мақомоти интизомӣ ва ҳукумати ноҳияи Ёвон бо тасдиқи ин хабар гуфтанд, ки шумори озодшудаҳо аз ин зиндон 605 нафар мебошанд. Ба қавли шоҳидон, рӯзи гузашта аз маҳбаси шаҳри Бохтар низ теъдоде аз зиндониён раҳо гардиданд. Дар Хатлон чор муассисаи ислоҳӣ фаъолият мекунад ва интизор меравад, ки аз ҳамаи ин зиндонҳо миқдори муайяни маҳбусон тиқби қонуни афв озод мегарданд. Парлумон қонуни афвро рӯзи 6-уми сентябр қабул кард ва бар асоси он қарор аст 16 ҳазор нафар афв шаванд. Аз ин шумор беш аз 10 ҳазор нафарашон аз зиндону боздоштгоҳҳои Тоҷикистон озод гардида муҳлати ҷазои қариб 6 ҳазор каси дигарро кам мекунанд. Афви имсолаи зиндониҳо ба 30-солагии истиқлолияти Тоҷикистон бахшида шудааст.

Вазири тоҷик дар нишасти Ню-Йорк хост, пеши "зулму шиканҷа дар Панҷшер"-ро бигиранд. АКС

Нерӯҳои "Толибон" дар Бозораки Панҷшер, 15-уми сентябри 2021

Вазири корҳои хориҷии Тоҷикистон аз созмону кишварҳои таъсиргузор хостааст, ҳарчи зуд пеши роҳи, ба гуфтаи ӯ, "зулму шиканҷа ва беқонуниву беназмӣ"-ро дар Панҷшер, минтақаи тоҷикнишини Афғонистон, бигиранд.

Сироҷиддин Муҳриддин 21-уми сентябр дар нишасте дар ҳошияи Маҷмаи умумии Созмони Милал дар Ню-Йорк гуфт: "Толибон" дар он ҷо на танҳо ба ҳуқуқвайронкунӣ ва нақзи ҳуқуқи инсон, балки ба зулму шиканҷаи мардум машғуланд."

Сироҷиддини Муҳриддин
Сироҷиддини Муҳриддин

Гуруҳи "Толибон" баъд аз тақрибан се ҳафтаи ишғоли Кобул гуфт, ки вилояти Панҷшерро ҳам зери назорат даровардааст.

Ҷабҳаи муқовимати миллии Афғонистон иддао дорад, Панҷшер пурра вожгун нашудааст ва мубориза байни размандагони онҳо ва нерӯҳои "Толибон" ҳанӯз идома дорад.

Дар ҳафтаҳои охир нигарониҳо аз бад шудани вазъ дар вилояти Панҷшери Афғонистон афзудааст.

Раиси ҷумҳурии Тоҷикистон 17-уми сентябри имсол дар ҳузури роҳбарони Созмони Ҳамкориҳои Шонгҳой (ШОС) дар Душанбе гуфт, Панҷшер дар муҳосира аст ва "Толибон" дастрасии ёриҳои башардӯстонаро ба онҷо қатъ кардааст.

Сироҷиддин Муҳриддин рӯзи 21-уми сентябр дар Ню-Йорк аз кишварҳои таъсиргузор ва созмонҳои байнулмилалӣ даъват кард, ки "ба кушодани роҳҳо ҷиҳати расонидани ёрии башардӯстона ба мардуми Панҷшер ва минтақаҳои дигари Афғонистон" мусоидат кунанд.

Гуруҳи "Толибон" ҳамагуна фишорро болои мардуми Панҷшер рад мекунанд. Ин дар ҳолест, ки бино ба гузориши чанде аз блогерони афғон аз дараи Панҷшер, дари бозорҳо дар онҷо баста ва сокинон аз набудани хӯроку дору, гаронӣ ва бекориву беназмӣ нигаронанд.

Нашрияи бритониёии Guardian дар оғози моҳи сентябр аз эҳтимоли фоҷиаи башарӣ дар дараи Панҷшер ҳушдор дода, навишт, ба иллати идомаи муҳосира аҳолии он ба камбуди хӯрок ва дору рӯбарӯ шудаанд.

Маҳбуба Ровӣ, раҳбари созмони хайрияи австралиягии "Ваъдаи Маҳбуба" ба нашрия гуфтааст, ҳазорон нафар дар тарсу бим ва номуайянӣ ба сар мебаранд. "Одамон дар дохили водӣ дармондаанд, на ғизо доранд, на барқ, на алоқа. Ин як буҳрони башарӣ аст ва хатари наслкушӣ вуҷуд дорад," - гуфтааст Ровӣ.

Таэквондочиёни афғон дар Австралия маскан гирифтанд

Ҳирот, соли 2019. Тими духтаронаи таэквондочӣ машқ мекунад

Ҳафт варзишгари таэквондочии афғон баъди фирор аз Афғонистони зери назари «Толибон» дар Австралия маскан гирифтанд. Дар як изҳороташ мақомоти таэквондои Австралия рӯзи 22-юми сентябр гуфтанд, ки ҳафт варзишкорзани таэквандочӣ роҳи пурхатари эвакуатсия аз Афғонистон тавассути Покистонро пуштисар карда дар Австралия паноҳ ёфтанд ва ҳоло марҳилаи ҳатмии карантинро ҳам гузаштанд. Гурӯҳи варзишгарон дар шаҳри Мелбурн, ки дар ҷанубушарқи Австралия аст, ҷой дода шуда ният доранд дар ҳамин ҷо таҳсилу кор ва машқи таэквондоро идома диҳанд. Ба онҳо визаҳои башарӣ дода шудааст.

Мақомоти таэквондои Австралия гуфтанд, барои берун бурдани варзишгари ҳаштум, ки ҳоло дар шаҳри Кобул, пойтахти Афғонистон аст, кор мекунанд.

Ҷудо аз таэквондочиёни афғон, Австралия ба даҳҳо варзишгари дигар, аз ҷумла даҳҳо футболбозон ҳам визаи зиндагӣ дар ин кишварро тақдим кардааст. Варзишгарон бахше аз даҳҳо ҳазор сокини дигари Афғонистонанд, ки аз тарси интиқомҷӯии Толибон бо сари қудрат омадани онҳо дар миёнаҳои моҳи август аз ин кишвар берун рафтанд. «Толибон» дар давраи аввали ҳукмрониашон дар солҳои 1996-2001 духтарону занонро аз ҳақи таҳсилу кор ва фаъолиятҳои иҷтимоӣ маҳрум карданд.

Туркманистон овозаҳоро дар бораи ба "кома" афтодани Бердимуҳаммадов рад кард

Қурбонгулӣ Берҳимуҳаммадов.

Сафорати Туркманистон дар Русия овозаҳоро дар бораи бад шудани сиҳатии президенти Туркманистон Қурбонқулӣ Бердимуҳаммадов рад кард.

"Иттилои баъзе аз расонаҳо дар бораи он ки гуё сиҳатии президенти Туркманистон бад шудааст, комилан беасос аст", -- хабар додааст сафорат.

Овозаи бад шудани вазъи саломати Бердимуҳаммадовро рӯзи сешанбе баъзе аз саҳифаҳои марбут ба корбарони Русия дар паёмрасони Telegram паҳн карданд.

Рӯзи 20-уми сентябр расонаҳои давлатии Туркманистон ҷаласаеро бо иштироки Бердимуҳаммадов нишон доданд.

Овозаҳо дар бораи бадшавии сиҳатии Бердимуҳаммадов борҳост, ки дар расонаҳо паҳн мешаванд. Ҳар дафъа баъди кампайдо шудани президент дар пардаи телевизион чунин овозаҳо паҳн мегарданд.

Ба ин тартиб, моҳҳои июл-августи соли 2019 Бердимуҳаммадов қариб як моҳ дар расонаҳо зоҳир нашуд ва ба ин далел дар бораи бемории вай ва ҳатто маргаш овозаҳо паҳн шуданд.

Узбекистон тасмим дорад, равуои нақлиётро бо Афғонистон ба роҳ монад

Як қатора дар Ҳайратон, Афғонистон.

Узбекистон рафтуои мошинҳо ва қатораҳоро бо Афғонистон барқарор мекунад. Дар ин бора Исматтуло Иргашев, намояндаи махсуси президенти Узбекистон дар умури Афғонистон рӯзи душанбе хабар дод.

"Албатта, мо равуои мошинҳо ва қатораҳоро бо Афғонистон барқарор мекунем. Нақлиёт ба Афғонистон ғизо ва дору мебарад, ки афғонҳо ҳоло ба он ниёз доранд", - гуфт Иргашев.

Ба гуфтаи вай, Узбекистон марзашро бо Афғонистон ба далели паҳншавии КОВИД-19 бастааст, на ба сабабҳои дигар.

Ҳоло маълум нест, ки марзҳо то кай баста мемонанд. Зеро, Иргашев мегӯяд, бозшавии марз бо Афғонистон на танҳо аз беҳшавии вазъи беҳдоштӣ, балки аз ташкили ниҳодҳои нави давлатӣ дар он кишвар вобаста аст.

"Бояд вазоратҳо ва дигар ниҳодҳо ташкил шаванд, зеро ниҳодҳои наве, ки аз сӯи Толибон ташкил шудаанд, муваққат ҳастанд", - гуфт Исматулло Иргашев.

Равуои нақлиёт байни Узбекистон бо Афғонистон дар моҳи марти соли 2020 ба далели паҳншавии вабои коронавирус қатъ шуда буд.

"Туркманпочта" шикоятҳоро ба номи президент намефиристад

Акс аз соли 2018

Сокинони вилояти Лебапи Туркманистон шикоят доранд, ки идораи почтаи вилоят монеи фиристодани муроҷиати шаҳрвандон ба унвонии президент, вазорат ва идораҳои давлатии ин кишвар мешавад.

Як сокини Лебап бо шарти фош нашудани номаш ба бахши туркмании Радиои Озодӣ гуфт, мақомоти маҳаллӣ ба шикояти ӯ расидагӣ накарданд ва бинобар ин, маҷбур шуд ба "боло" муроҷиат кунад. Аммо баъди чанд рӯзи супурдани нома дар бахши вилоятии "Туркманпочта" вайро ба маъмурияти вилояти Лебап даъват карданд.

"Ду ҳафта пеш ба унвонии президенти Туркманистон шикоят навиштам, ки чанд сол мешавад, барои гузаронидани Wi-Fi ба хона дар навбат ҳастам. Номаро дар идораи почта қабул карданд, аммо баъди ду ҳафта маро ба ҳукумати вилоят даъват намуданд", - изҳор дошт вай.

"Мансабдоре, ки бо ман суҳбат кард, аз муҳтавои нома огаҳ буд. Маълум буд, ки нома ба Ишқобод фиристода нашудааст. Мансабдор аз ман пурсид, ки "чаро ба президент шикоят менависӣ? Нанавис! Ту метавонӣ ба мо нависӣ ва мо онро баррасӣ мекунем". Сипас маро аз идора берун карданд", - афзуд сокини Лебап.

Ба гуфтаи ӯ, бо гузашти се ҳафта аз суҳбат бо мансабдори мазкур ҳанӯз ҳам мушкилаш ҳал нашудааст.

Дар Идораи почтаи Лебап аз шарҳи ин қазия худдорӣ карданд.

Аз Салоҳуддин Раббонӣ хостаанд, дар ёдбуди падараш дар Душанбе ширкат кунад, "аммо наомад". ВИДЕО

Дар Душанбе ёди Раббониро гиромӣ доштанд
лутфан мунтазир бошед

Феълан кор намекунад

0:00 0:02:45 0:00

Аз кушта шудани раисҷумҳури пешин ва раҳбари Шӯрои сулҳи Афғонистон, Бурҳонуддин Раббонӣ, 10 сол гузашт. Рӯзи 21-уми сентябр ба ин муносибат дар сафорати Афғонистон дар Душанбе аз ӯ ёд карданд ва аз корнамоиҳояш гуфтанд.

Қарор буд, дар маросим баъзе аз мансабдорони ҳукумати пешинаи Афғонистон, аз ҷумла Салоҳуддин Раббонӣ, писари Бурҳониддин Раббонӣ, иштирок кунанд. Дар сафорат гуфтанд, Раббонии хурдиро даъват карда буданд, вале далели наомаданашро шарҳ надоданд.

Салоҳиддин Раббонӣ
Салоҳиддин Раббонӣ

Бурҳониддин Раббониро, ки раиси Шӯрои олии сулҳи Афғонистон буд, моҳи сентябри соли 2011 як узви "Толибон", ки худро қосиди сулҳи онҳо муаррифӣ карда буд, дар хонааш дар шаҳри Кобул кушт. Намояндаи гуруҳи ифротие, ки ҳоло Афғонистонро дар даст дорад.

Муҳаммадалам Эзидёр, муовини раиси Сенати Афғонистон, гуфт, кишварҳои минтақа ва ҳамсоягони Афғонистон бояд таҳдиду хатарҳои “Толибон”-ро ҷиддӣ бигиранд, “зеро онҳо бо ишғоли Афғонистон ором намеистанд.”

Саидҷаъфар Усмонзода, узви порлумон ва раиси Ҳизби демократи Тоҷикистон, аз талошҳои Бурҳонуддин Раббонӣ дар барқарории сулҳи тоҷикон ситоиш кард ва аз афғонҳо даъват намуд, ки ноумед набошанд.

“Ҳеч кас бояд дилсард набошад, ки давлати Афғонистон бе ҳукумат аст. Ба таври расмӣ иҷрокунандаи президент ҳаст, ҷабҳаи муқовимат ҳаст”, -- афзуд ӯ.

Ҳукумати Тоҷикистон дар аввали сентябри имсол ба Бурҳонуддин Раббонӣ "Ордени Исмоили Сомонӣ" дод
Ҳукумати Тоҷикистон дар аввали сентябри имсол ба Бурҳонуддин Раббонӣ "Ордени Исмоили Сомонӣ" дод

Бурҳонуддин Раббонӣ соли 1993 президенти Афғонистон шуд. "Толибон" соли 1996 ҳукумати ӯро аз Кобул берун ронданд ва кишварро ба ҷанги давомдор кашонданд.

Раббонӣ дар Тоҷикистон ҳам аз маҳбубияти хос бархурдор аст. Ҳукумати Тоҷикистон дар аввали моҳи сентябри имсол ба ӯ ва низ Қаҳрамони миллӣ ва вазири собиқи дифои Афғонистон Аҳмадшоҳ Масъуд ордени дараҷаи аввали "Исмоили Сомонӣ" дод.

Вазорати таҳсилоти олии ҳукумати "Толибон" рӯзи 20-уми сентябр номи Бурҳонуддин Раббонӣ, раиси ҷумҳури пешини Афғонистонро аз унвони Донишгоҳи давлатии таълим ва тарбияи ин кишвар бардошт.

Ёфтҳои бештар

XS
SM
MD
LG