Пайвандҳои дастрасӣ

Хабари нав

Дар чанд ҷумла

Додситони кулли Тоҷикистон мунтазири истирдоди Сайвалӣ Содиров аст

Бино ба иттилоъи додситонии кулли Тоҷикистон, Сайвалӣ Содиров, бародари Ризвон Содиров фармондеҳи опозитсиюни пешини тоҷик дар шаҳри Иркутски Русия аз тарфи мақомоти амнияти ин кишвар боздошт ва бар асоси дархости додситoнии кулли Тоҷикистон дар садади интиқол ба Душанбе мебошад.
Сайвалӣ Содиров, ки аслан бо номи Валӣ маълум буд аз соли 1997 ба ин тараф аз суи мақомоти интизомии Тоҷикистон ҷустуҷу мешуд. Бар асоси хабари додситони кулл, вай яке аз аъзои гуруҳи мусаллаҳи худсари Ризвон ба шумор меравад, ки дар амалҳои куштору таъқиб ва одамрабоӣ ин гуруҳ ҳамдастӣ кардааст. Додситонии кулл мегуяд, то замони интиқоли у аз Русия, аз шарҳи бештар дар робита ба сарнавишти Сайвалӣ Содиров худдорӣ мекунад.
Ва аммо бар асоси хабари ҳалқаҳои мухолифини пешини тоҷик, Сайвалӣ бародари чоруми Ризвон Содиров будааст, ки дар баҳори соли 1997, ҳангоме, ки Ризвон бо гуруҳи худ дар минтақаи Оби гарм 70 километрии шарқи пойтахти кишвар дар мухолифат бо Иттиҳодияи оппозитсиюни пешин қарор дошт, бо гаравгонгирии ду намояндаи комиссияи оташбаси сулҳи тоҷикон Юсуф Ҳакимов ва Иззатуллои Дарё, ки узви иттиҳоди опозитсиюн буданд, тавонист бародари худ Сайвалиро, ки дар асорати Мирзо Зиёев, фармондеҳи пешини оппозитсиюн дар ҷабҳаи Тавилдара, ҳоло вазири ҳолатҳои изтирории Тоҷикистон ба сар мебурд, иваз кунад.
Пас аз кушта шудани Ризвон Содиров дар пайи як амалиёти вазоратҳои амният ва умури дохилаи Тоҷикистон моҳи декабри соли 1997 дар шаҳри Душанбе, Сайвалӣ ба Русия паноҳ бурдааст. Аммо рузи 7 апрел хабаргузории "Интерфакс" иттилоъ дод, ки Сайвалӣ Содиров, аз вилояти Иркутск ба Душанбе истирдод карданд. Дар ин вилоят Сафаралӣ Содиров таҳти номи Саид Алиев дар як бозор тиҷорат мекардааст.
Мирзонабии Холиқзод

Ҳамаи хабарҳои имрӯзро дар инҷо бихонед

Зеленский гуфт, кишвараш шоҳиди "натиҷаҳои мусбат" аст.

Владимир Зеленский

Владимир Зеленский, раиси ҷумҳури Украина, рӯзи 25-уми сентябр гуфт, дар ҷабҳаи ҷанг бо Русия набардҳои сахте идома доранд, вале кишвараш шоҳиди “натиҷаҳои мусбат” аст.

Ӯ дар муроҷиати шабонаи видеоиаш гуфт, ки нерӯҳои Украина дар вилоятҳои Донетск, Харков, Миколаев ва Запорожйе пешравӣ доштаанд.

Мақомоти дастнишондаи Русия дар вилоятҳо барои ҳамроҳ шудан ба қаламрави Русия ба истилоҳ раъйпурсӣ баргузор мекунанд.

Ҷомеаи байнулмилалӣ ин раъйпурсиро “сохта” хондаанд.

Айни замон Ҷейк Салливан, мушовири амнияти миллии ҳукумати Амрико, гуфтааст, агар Русия дар Украина аслиҳаи атомӣ ба кор барад, ба “посухи қотеона”-и Амрико ва “пайомадҳои фалокатбор” рӯ ба рӯ хоҳад шуд.

Тазоҳуроти зиддиҳукуматӣ дар Эрон идома кард

Эътирозгарон дар кӯчаҳои Теҳрон

Тазоҳуроти зиддиҳукуматӣ дар Теҳрон ва дигар шаҳрҳои Эрон шаби гузашта ҳам идома кард ва бо вуҷуди онки мақомот гуфтаанд, саркӯби тазоҳургаронро сахттар мекунанд.

Тазоҳурот 10 рӯз пеш ва баъди он сар зад, ки як духтари эронӣ дар натиҷаи латукӯби пулис, ки ӯро барои ба гуфтаи онҳо “бадҳиҷобӣ” боздошт кард, даргузашт.

Шоми 25-уми сентябр донишҷӯён дар Донишгоҳи Теҳрон ҷамъ омада ва бо шиори “озодӣ, озодӣ” тазоҳурот карданд.

Раҳбари Қувваи қазоӣ ё Вазорати адлияи Эрон гуфт, ки ба тазоҳургарон амон намедиҳанд ва онҳоро саркӯб хоҳанд кард.

Дар натиҷаи тазоҳуроти 10-рӯза то кунун ба гуфтаи мақомот 41 нафар кушта шудаанд, вале ҳомиёни ҳуқуқ мегӯянд, теъдоди қурбониён зиёдтар аст, зеро эътироз ба 80 шаҳру маҳаллаҳои кишвар доман задааст.

Истеъфои Равшанбек Собиров: "Шарҳҳои манфӣ" ё "ҷанҷоли марзӣ"?

Равшанбек Собиров (аз тарафи чап)

Равшанбек Собиров, вакили пешин ва раиси ҷомеаи тоҷикони Қирғизистон, дар бораи истеъфояш аз мансаби раиси Оҷонси миллии сармоягузории он кишвар изҳори назар кард.

Сомонаи президенти Қирғизистон рӯзи 26-уми сентябр навишт, ки ӯ “бо хоҳиши худ” аз мақом рафт. Худаш ба бахши қирғизии Радиои Озодӣ гуфт, ки баъди як силсила “шарҳҳои манфӣ” дар шабакаҳои иҷтимоӣ тасмим гирифт, мақомашро тарк кунад.

“Вақтҳои охир дар шабакаҳои иҷтимоӣ маълумоти манфии зиёд паҳн мешавад. Намехоҳам, бо айби ман ба кори роҳбарияти кишвар соя афтад. Аз ин рӯ, тасмим гирифтам, ихтиёрӣ аз вазифаи раиси Оҷонси миллии сармоягузорӣ истеъфо диҳам,” – гуфт Равшанбек Собиров. Вале тафсилот надод, ки дар бораи чӣ гуна шарҳҳои манфӣ гап мезанад.

Тасмими сиёсатмадор дар пасманзари муноқиша дар марзи Тоҷикистону Қирғизистон эълон шуд, вале худаш гуфтааст, истеъфои ӯ ба даргирии мусаллаҳона дар марз рабт надорад. “Ман то ҳадди мумкин кор кардам. Ҳоло мехоҳам, саломатиамро беҳбуд бахшам,” – илова кардааст ӯ.

Равшанбек Собирови 52-сола, раиси созмони тоҷикони Қирғизистон, дар оилаи тоҷик дар ноҳияи Қаросуи вилояти Уш ба дунё омадааст.

Дар соли 2011 аввалин вазири тоҷик дар ҳукумати Қирғизистон буд, аммо дар соли 2013 боздошт ва бо гуноҳи ришваситонӣ ба зиндон маҳкум шуд. Собиров, ки ҳамеша парвандаашро сохтакорӣ ва дорои ангезаҳои сиёсӣ донистааст, моҳи марти соли 2014 бар асоси қонуни афв раҳо гардид.

Аз 11-уми марти соли 2022 дар мансаби раиси Оҷонси миллии сармоягузории Қирғизистон кор мекард. Пештар аз ҷониби ҳизби "Ота Ҷурт" вакили порлумон интихоб шуда, пас аз ҳаводиси моҳи октябри соли 2020 ва то замони таъини ҳукумати нав дар Қирғизистон дар соли 2021 дар вазифаи муовини нахуствазир кор кардааст.

13 кушта дар тирпарронӣ дар як мактаби Ижевск

Маҳалли ҳодиса

Бар асари тирпарронӣ дар як мактаби миёна дар Ижевски Русия 13 нафар, аз ҷумла 7 хонандаи мактаб, ду маъмури амният ва ду омӯзгор кушта шудаанд.

Ҳодиса рӯзи 26-уми сентябр рӯй дод. Ҳамлавар худкушӣ кардааст. Вазорати корҳои дохилии вилояти Ижевск дар бораи 20 осебдида хабар дод.

Дар саҳифаи "Baza" дар Телеграм иттилоъ доданд, ки ҳамлагар аз ду туфангчаи Макаров тир холӣ кардааст.

Дар минтақа мотами серӯза эълон карданд. Ҳодисаро Сарраёсати тафтишотии Кумитаи тафтишот дар Маскав таҳқиқ мекунад.

Сабабҳои тирпарронӣ дар мактаб маълум нест.

Пас аз чанд ҳамла ба мактабҳои Русия, хадамоти амниятии он кишвар пайваста дар бораи боздошти шахсони гумонбар ба тарҳрезии ҳамлаҳои монанд гузориш медиҳанд.

Сокинон аз зарбаи мушакӣ ва захмӣ шудани як нафар дар Чоркӯҳ хабар доданд

Исфара, марзи Тоҷикистону Қирғизистон

Сокинони деҳаи Сомониён дар ҷамоати Чоркӯҳи Исфара, ҳаммарз бо Бодканди Қирғизистон, гуфтанд, ки рӯзи 26-уми сентябр бар асари зарбаи мушакӣ як нафар захмӣ шудааст.

Мақомоти Тоҷикистону Қирғизистон ҳанӯз ҳодисаро шарҳ надодаанд. Сокинони деҳаи Сомониён мегӯянд, "аз тарафи Қирғизистон се мушак омад."

Хадамоти марзбонии Қирғизистон шаби 25-уми сентябр вазъро дар сарҳад бо Тоҷикистон муътадил арзёбӣ карда буд, вале дар бораи ҳодисаи рӯзи душанбе ҳанӯз чизе нагуфтааст. Дар гузашта ду тараф якдигарро барои таҳрик додану тирпаронӣ гунаҳкор кардаанд.

Се ҳамсуҳбати Радиои Озодӣ дар деҳаи Сомониён гуфтанд, мушакҳо соати даҳи рӯзи душанбе афтоданд. "Бахтиёр, писари омӯзгор Олимҷон Орифов, захмӣ шуд ва ӯро ба шифохона бурданд," – гуфт яке аз мусоҳибони мо.

Ба нақли ӯ, мушак замоне партоб шудааст, ки "мардуми Чоркӯҳ барои ба тартиб овардани мавзеъҳои зарардида ҷамъ омада буданд."

Вай гуфт, "се рӯз боз дар маҳаллаи Сомониён ҳашар идома дошт ва баъди мушакпаронӣ мардум пароканда шуданд."

Манбаи дигар дар мақомоти вилояти Суғд низ мушакпарониро тасдиқ кард, вале тафсилот надод. "Ҳоло низомиён ва маъмурони милиса ба ҷои ҳодиса рафта, пайи баррасии воқеа ҳастанд. Ҳашарчиёнро муваққатан аз минтақа берун бурданд," – афзуд ӯ.

Ҳодиса пас аз он рӯй дод, ки Тоҷикистону Қирғизистон рӯзи 25-уми сентябр санади қатъи муноқишаро дар марз имзо карда, барои бардоштани ҳашт посгоҳи ба гуфтаашон "дардисарсоз" аз ду тараф розӣ шудаанд.

Ҳамчунин, ҷонибҳо созиш кардаанд, ки дар қитъаҳои марзие, ки бештари вақт низоъ онҷо рух медиҳад, дурбинҳои назоратӣ насб кунанд.

  • Қирғизистону Тоҷикистон тақрибан 1000 километр марз доранд ва баъди ба даст овардани истиқлол дар солҳои 90-ум то кунун натавонистаанд, садҳо километри онро таъйину аломатгузорӣ кунанд.
  • Афзоиши аҳолӣ, кам шудани манобеи табиӣ ба мисли обу чарогоҳу замин сабаби аслии муноқиша дар марз бахусус вилояти Суғду Бодканд аст. Ҳар сол мардуми рустоҳои марзӣ барои обу чарогоҳу замин баҳсу даъво мекунанду гиребони ҳамро мегиранд ва ин даъвоҳо гоҳо ба хунрезӣ мепечад.
  • Дар даргириҳои 14-17-уми сентябри имсол аз ду тараф даҳҳо нафар кушта ва захмӣ шуданд. Тоҷикистону Қирғизистон якдигарро ба таҷовузи низомӣ муттаҳам мекунанд.

Тоҷикистону Қирғизистон барои насби дурбинҳо созиш кардаанд

Марзи Тоҷикистону Қирғизистон

Хадамоти марзбонии Кумитаи давлатии амнияти миллии Қирғизистон нуктаҳои дигари санадеро шарҳ дод, ки рӯзи 25-уми сентябр миёни раиси КДАМ-и Тоҷикистон ва раиси КДАМ-и Қирғизистон Қамчибек Тошиев имзо шуд.

Ҷонибҳо ба созиш расидаанд, ки на танҳо марзбононро аз баъзе посгоҳҳо берун оранд, балки нигаҳдории марзро ба дӯши нерӯҳое гузоранд, ки дар сарҳад рафту омад кунанд.

Ҳамчунин ҷонибҳо созиш кардаанд, дар қитъаҳои марзие, ки бештари вақт низоъ онҷо рух медиҳад, дурбинҳои назоратӣ насб кунанд.

"Мақомоти маҳаллии ҳокимияти давлатӣ ба сокинони Тоҷикистону Қирғизистон дар амалисозии фаъолияти кишоварзӣ дар заминҳои пештар истифодашавандаи Тамдиқ (Қирғизистон) - Бедак (Тоҷикистон) ва Булак-Бошӣ" (Қирғизистон), Кех "Тоҷикистон" мусоидат хоҳанд кард. Кори гуруҳи муштарак барои берун бурдани неруҳо ва техникаи низомии изофӣ идома хоҳад кард", - омадааст дар хабарномаи КДАМ Қирғизистон.

Ахиран мақомоти Тоҷикистон гуфтанд, бо ҷониби Қирғизистон санади "қатъи муноқишаи марзиро" имзо карданд, вале тафсилоташро ошкор накарданд. Вохӯрии ҷонибҳо рӯзи 25-уми сентябр дар гузаргоҳи "Қизилбел" баргузор шуд.

Дар иттилоияи ҷудогонаи ҳукумати Суғд танҳо дар бораи берун бурдани техникаҳои иловагии ҳарбӣ аз марз суҳбат шудааст. Ҷонибҳо рӯзи 19-уми сентябр низ барои берун бурдани нерӯҳои изофӣ ва техникаҳои ҳарбӣ аз марз ба созиш расида буданд, вале маълум нест, чаро иҷро нашуд.

Қирғизистону Тоҷикистон тақрибан 1000 километр марз доранд ва баъди ба даст овардани истиқлол дар солҳои 90-ум то кунун натавонистаанд, садҳо километри онро таъйину аломатгузорӣ кунанд.

Афзоиши аҳолӣ, кам шудани манобеи табиӣ ба мисли обу чарогоҳу замин сабаби аслии муноқиша дар марз бахусус вилояти Суғду Бодканд аст. Ҳар сол мардуми рустоҳои марзӣ барои обу чарогоҳу замин баҳсу даъво мекунанду гиребони ҳамро мегиранд ва ин даъвоҳо гоҳо ба хунрезӣ мепечад.

Дар даргириҳои 14-17-уми сентябри имсол аз ду тараф даҳҳо нафар кушта ва захмӣ шуданд. Тоҷикистону Қирғизистон якдигарро ба таҷовузи низомӣ муттаҳам мекунанд.

Ҳашт медали варзишгарони тоҷик дар қаҳрамонии Осиёи Марказӣ

Варзишгарони тоҷик дар мусобиқаи IV бози қаҳрамонии Осиёи Марказӣ оид ба варзиши сабук, ки рӯзҳои 23-25-уми сентябр дар маҷмааи варзишии “Афросиёб Арена”шаҳри Самарқанди Узбекистон баргузор шуд, ҳашт медал (ду тило, се нуқра ва се биринҷӣ) ба даст оварданд.

Дар ин мусобиқаи байналмилалӣ беш аз 300 варзишгар аз шаш кишвари Осиёи Марказӣ - Афғонистон, Қазоқистон, Қирғизистон, Туркманистон, Тоҷикистон, Узбекистон, инчунин Филиппин, Тайланд ва Малайзия ширкат варзиданд.

Варзишгарон дар давидан ба масофаҳои мухталиф, ҷаҳиш ба баландӣ, ҷаҳиш бо ходачӯб, ҷаҳиш ба дарозӣ, ҷаҳиши секарата, партоби диск, ҳаво додани найза, гулӯлапартоӣ ва гурзандозӣ рақобат карданд.

Ба ҳайати дастаи мунтахаби Тоҷикистон бо роҳбарии сармураббӣ Ғайрат Неъматов 15 варзишгар дохил буд.

Фаворис Музрапов дар давидан ба масофаи 200 метр бо натиҷаи 21,75 сония мақоми аввалро касб кард ва бо медали тило сарфароз гашт.

Илдар Аҳмадиев дар ҷаҳиш ба дарозӣ бо натиҷаи 7 метру 73 сантиметр ҷойи аввалро гирифт ва бо медали тило мукофотонида шуд.

Се медали нуқраро Илдар Аҳмадиев дар давидан ба масофаи 200 метр бо натиҷаи 21,97 сония, Леонид Пронженко дар давидан ба масофаи 110 метр бо монеа бо натиҷаи 15,29 сония, инчунин дастаи мардонаи Тоҷикистон дар эстафетаи 4Х100 метр бо натиҷаи 41,50 сония соҳиб шуданд.

Се медали биринҷиро бошад, Александр Пронженко дар давидан ба масофаи 200 метр бо натиҷои 22,17 сония, Зуҳуршоҳи Наҷмиддин дар давидан ба масофаи 3000 метр бо монеа бо натиҷаи 9 дақиқаю 44,32 сония ва дастаи мардонаи Тоҷикистон дар эстафетаи 4Х400 метр бо натиҷаи 3 дақиқаю 20,42 сония ба даст оварданд.

Равшанбек Собиров, мансабдори тоҷиктабор дар Қирғизистон, аз мақомаш барканор шуд

Равшанбек Собиров

Равшанбек Собиров, мансабдори тоҷиктабор дар ҳукумати Қирғизистон, аз мақомаш барканор шудааст.

Сомонаи президенти Қирғизистон рӯзи 26-уми сентябр хабар дод, ки Собиров “бо хоҳиши худ” аз мақоми мудири Оҷонси миллии сармоягузорӣ рафт.

Эълони рафтани ӯ пас аз муноқиша дар сарҳад бо Тоҷикистон ва хабарҳо дар мавриди фишор ба тоҷикон дар Қирғизистон нашр шуд.

Вазорати корҳои хориҷии Тоҷикистон ҳафтаи гузашта аз азияту озори тоҷикон дар Қирғизистон хабар дода буд. Мақомоти Қирғизистон инро рад карда, баръакс, аз фишор ба қирғизҳо дар Тоҷикистон мегӯянд.

Равшанбек Собиров 52-сола аст ва дар оилаи тоҷик дар ноҳияи Қаросуи вилояти Уш ба дунё омадааст. Аз моҳи августи соли 2008 раҳбарии созмони тоҷикони Қирғизистонро ба уҳда дорад.

Ӯ дар соли 2011 нахустин вазири тоҷик дар ҳукумати Қирғизистон буд, вале дар соли 2013 боздошт ва бо ҷурми ришваситонӣ ба зиндон маҳкум шуд. Собиров, ки ҳамеша парвандаашро дорои ангезаҳои сиёсӣ ва сохаткорӣ донистааст, моҳи марти соли 2014 бар асоси қонуни афв раҳо гардид.

Дар Қазоқистон беш аз 1,5 ҳазор гумонбарро афв мекунанд

Додситонии кулли Қазоқистон рӯзи 23-юми сентябр дар чаҳорчӯби тарҳи қонуни афви гумонбарон дар ҳодисаҳои моҳи январи ин кишвар санадеро таҳия ва барои баррасии умум пешниҳод кардааст.

Ба иттилои манбаъ, қонуни афв нисбати беш аз 1,5 ҳазор ҳазор сокини Қазоқистон татбиқ хоҳад шуд.

Аз ҷумла, ба гуфтаи додситонҳои қазоқ, 383 гумонбар ва 1035 айбдоршуда, ки 93 нафарашон ба муҳлатҳои тӯлонӣ равонаи зиндон шудаанд, афв карда мешаванд.

Додситонии кулли Қазоқистон пешниҳод кардааст, ҳамаи онҳое, ки ҷиноятҳои вазнин содир накардаанд, афв шаванд.

Президенти Қазоқистон Қосимҷомарт Тоқаев қаблан барои иштирокдорони ҳодисаҳои моҳи январ афви якдафъаина ваъда кард. Ӯ низ гуфт, афв ба шаҳрвандоне дахл хоҳад дошт, ки ба содир кардани ҷиноятҳои вазнин, аз ҷумла хиёнат ба давлат ва кушиши ғасби қудрат аз роҳи хушунат айбдор намешаванд.

Беш аз 80 ҳазор сокини Бодканд ба хонаҳои худ бармегарданд

Марзи Тоҷикистон ва Қирғизистон.

Беш аз 80 ҳазор сокини вилояти Бодканди Қирғизистон, ки дар пайи низои ахири марзӣ бо Тоҷикистон ба ҷои амн кӯчонида шуда буданд, ба хонаҳои худ бармегарданд.

Ба иттилои Вазорати ҳолатҳои фавқулодаи Қирғизистон, дар умум 136 ҳазору 770 сокини Бодканд ба ҷойҳои бехавф кӯчонида шудааст.

Манбаъ афзуд, ки то имрӯз 1 ҳазору 435 тонна кумаки башардӯстона ба сокинони ин вилоят фиристода шудааст.

Дар натиҷаи низои ахири марзӣ бо Тоҷикистон 613 хонаи шаҳрвандони Қирғизистон осеб дидааст. Мақомоти қирғиз ваъда додаанд, ки ин хонаҳоро дар давоми 2-3 моҳ барқарор мекунанд.

Мақомоти Қирғизистон қаблан хабар дода буданд, ки 16 сентябр дар пайи тирпарронии навбатӣ дар марзи ин кишвар бо Тоҷикистон ҳудуди 140 ҳазор сокини вилояти Бодкандро ба ҷои амн кӯчониданд.

Басиҷсозӣ дар Русия меҳмонхонаҳои Тошкандро сермуштарӣ кардааст

Меҳмонхонаи "Узбекистон" дар Тошканд.

Ҳамаи билетҳои парвозҳои мустақим аз шаҳри Москва ба шаҳрҳои Боку, Тошканд ва Ереванд 21 сентябр баъди эъломи президенти Русия Владимир Путин дар бораи басиҷсозӣ харидорӣ шудаанд. Нархи билети парвоз аз Москва ба Тошканд рӯзи 22 сентябр то ба 9 ҳазор доллари амрикоӣ расида буд.

"Агар мехоҳед, аз фурудгоҳи "Внуково" ба Тошканд парвоз кунед, нархи билет 603 ҳазору 50 рубл аст. Довталабони сафар ба Тошканд хеле зиёд аст. Аз субҳ то ҳол беш аз 200 кас барои билет занг задааст", - изҳор дошт блогери узбек Фарҳод Темиртирнаков, ки дар Русия бо фурӯши билет машғул аст.

Арзиши хидматрасонӣ дар меҳмонхонаҳои шаҳри Тошканди Узбекистон ҳам якбора гаронтар шудааст. Дар баъзе аз меҳмонсаройҳо ҳуҷраҳои холӣ намондааст. Корманди яке аз меҳмонхонаҳои Тошканд дар суҳбат бо бахши узбекии Радиои Озодӣ гуфт, "ҳама ҳуҷраҳо то охири моҳи сентябри имсол фармоиш шудаанд".

Владимир Путин 21 сентябр фармон дар бораи басиҷсозии низомиро имзо кард. Бино ба фармони имзошуда, шаҳрвандоне басиҷ мешаванд, ки хидмати низомӣ кардаанд. Вазири мудофиаи Русия Сергей Шойгу гуфт, дар маҷмуъ 300 ҳазор низомӣ аз ҳисоби неруҳои захиравӣ басиҷ карда мешаванд.

Навбатпоиҳо барои тарки Русия дар марзи Қазоқистон

Марзи Русия ва Қазоқистон.

Ихтиёриёни ҳаракати минтақавӣ барои ҳарчи зудтар гузаштан аз марзи Русия автобусҳо, таксиҳои дастаҷамъӣ ва ҳатто иҷораи дучархаҳоро ташкил кардаанд.

Бахши тоторӣ-бошқирии Радиои Озодӣ бо истинод ба онҳое, ки марзи Русия ва Қазоқистонро убур мекунанд, навиштааст, "се рӯз мешавад, одамон барои гузаштан аз марзи Русия ва Қазоқистон дар гузаргоҳи "Караозек" дар вилояти Астрахан соатҳо навбат мепоянд".

Дар гузаргоҳҳои марзии Русия бо кишварҳои дигаре, ки бо онҳо низоми бидуни раводид амал мекунад, вазъи ҳамсон мушоҳида мешавад. Ин навбатпоиҳо барои тарки Русия баъди эъломи басиҷсозӣ ба миён омадаанд.

Президенти Русия Владимир Путин 21 сентябр фармон дар бораи басиҷсозиро имзо кард. Бино ба фармони имзошуда, шаҳрвандоне басиҷ мешаванд, ки хидмати низомӣ кардаанд.

Мунтахаби Тоҷикистон барандаи “King’s Cup 2022” дар Тайланд шуд

Дастаи мунтахаби футболи Тоҷикистон дар бозии ниҳоии мусобиқаи 48-уми байнулмилалии “King’s Cup 2022” тими миллии Малайзияро аз рӯи силсилаи пеналти ё зарбаҳои 11-метрӣ бо ҳисоби 3:0 (замони асосӣ 0:0) шикаст дод ва барандаи “Ҷоми Шоҳ-2022" шуд.

Мусобиқа шоми 25-уми сентябр дар варзишгоҳи “The 700th Anniversary of Chiang Mai” дар шаҳри Чиангмайи Тайланд ва зери борон гузашт.

Дар нимаи аввали дидор, ки чандон ҷолиб набуд, футболбозони ҳарду даста натавонистанд, маҳорати баланд нион диҳанд ва вазъиятҳои голзаниро ба вуҷуд биёранд. Дар нимаи дувуми бозӣ футболбозони тоҷик фаъол шуданд ва пайваста ҳуҷум мекарданд, вале зарбаҳояшон нишонрас набуд.

Ҳамин тариқ, замони асосии бозӣ бо натиҷаи мусовӣ ва бидуни гол ба поён расид. Барои муайян кардани дастаи ғолиб силсилаи пеналтӣ ё зарбаҳои 11-метрӣ таъйин гардид.

Аз чаҳор зарбаи футболбозони тоҷик сетоашро Ваҳдат Ҳанонов, Комрон Турсунов ва Рустам Соиров ба ҳадаф расонданд. Вале капитани мунтахаби Тоҷикистон Аҳтам Назаров, ки нахустин шуда зарба зад, натавонист тӯбро вориди дарвоза намояд.

Аз се зарбаи футболбозони Малайзия дутоашро дарвозабони мунтахаби Тоҷикистон Рустам Ятимов баргардонд. Баъди зарбаи сеюми онҳо тӯб ба тири дарвоза бархӯрд.

Ба ин тартиб, маҳорати баланди Рустам Ятимов, ки беҳтарин бозигари ин дидор эътироф шуд, ба мунтахаби Тоҷикистон пирӯзӣ овард.

Барои ҷойи сеюм 25-уми сентябр дар Чиангмай, дар варзишгоҳи “The 700th Anniversary of Chiang Mai”, дастаи Тайланд бо тими миллии Тринидад ва Тобаго мубориза бурд. Бозӣ бо пирӯзии мизбонон – футболбозони Тайланд - бо ҳисоби 2:1 хотима ёфт.

Дастаи мунтахаби Тоҷикистон дар бозии ниманиҳоии ин мусобиқаи байнулмилалӣ, ки рӯзи 22-юми сентябр дар шаҳри Чиангмай баргузор шуд, тими миллии Тринидад ва Тобагоро бо ҳисоби 2:1 шикаст дод ва ба финал роҳ ёфт.

Дар маросими супурдани ҷоизаҳо, ки баъди анҷоми бозии ниҳоӣ барпо гардид, дастаи мунтахаби Тоҷикистон бо Ҷоми Шоҳи Тайланд ва медалҳои тилло мукофотонида шуд. Ба мунтахаби Малайзия медалҳои нуқра ва ба дастаи мизбон – Тайланд – медалҳои биринҷӣ тақдим гардид.

Ба гуфтаи сармураббии мунтахаби Тоҷикистон Петр Сегрт, мутахассиси хорватӣ, иштирок дар “Ҷоми Шоҳ-2022” дар Тайланд як давраи омодагии даста ба марҳилаи ниҳоии Ҷоми Осиё-2023 маҳсуб мешуд.

Мусобиқаи байнулмилалии “King’s Cup 2022”

Финал

Малайзия – Тоҷикистон – аз рӯи силсилаи пеналти 3:0 (замони асосӣ – 0:0).

Голҳои мунтахаби Тоҷикистон аз пеналти ё зарбаҳои ёздаҳметрӣ: Ваҳдат Ҳанонов, Комрон Турсунов ва Рустам Соиров.

Тоҷикистон: Рустам Ятимов, Ваҳдат Ҳанонов, Манучеҳр Сафаров, Табрез Исломов (Далер Эмомназаров, 87), Зоир Ҷӯрабоев, Аҳтам Назаров, Амирбек Ҷӯрабоев, Муҳаммадҷон Раҳимов (Комрон Турсунов, 79), Шервонӣ Мабатшоев, Эҳсони Панҷшанбе, Шаҳром Самиев (Рустам Соиров, 79).

25-уми сентябр. Чиангмай, Тайланд. Варзишгоҳи «The 700th Anniversary of Chiang Mai».

Бозӣ барои ҷойи сеюм

ТайландТринидад ва Тобаго – 2:1

Голҳо: Чанаронг Промсрикаев, 21 (1:0), Критсада Каман, 61 (1:1), Супачок Сарачат, 72 (2:1).

25-уми сентябр. Чиангмай, Тайланд. Варзишгоҳи «The 700th Anniversary of Chiang Mai».

Дар Русия тақрибан 800 норозии "басичсозӣ"-ро дастгир кардаанд

Маскав, 21-уми сентябри 2022

Дар ҳоле ки тазоҳурот алайҳи “басичсозӣ” дар шаҳрҳои Русия идома дорад, мақомоти он кишвар тақрибан 800 нафарро дастгир кардаанд.

Ба гузориши созмони “ОВД-Инфо”, то 25-уми сентябр дар 33 шаҳри Русия, асосан Маскав, камаш 796 нафар боздошт шудаанд.

Ин созмони ҳомии ҳуқуқи башар, ки боздошти одамонро дар Русия назорат мекунад, гуфт, баъзе аз онҳо ноболиғ ҳастанд.

Тазоҳурот пас аз эълони қисман сафарбаркунии нерӯҳои эҳтиётӣ ба артиш бо пуштибонии гурӯҳи мухолифи "Весна" ва тарафдорони сиёсатмадори зиндонӣ Алексей Навалний шуруъ шуд.

Фармони “басичсозӣ”-ро раиси ҷумҳури Русия Владимир Путин рӯзи 21-уми сентябр имзо кард. Тибқи он барои тақвияти нерӯҳои низомии Русия, ки дар Украина меҷанганд, даъвати 300 000 нерӯи эҳтиётӣ ва ё захиравии Русия пешбинӣ шудааст.

Тасвирҳо дар расонаҳои Русия баёнгари истифодаи зӯр алайҳи норозиён аст. Гуфта мешавад, бисёре аз ҷавонони боздоштшуда барои сабти ном ба хидмати ҳарбӣ даъват шудаанд.

Путин рӯзи 24-уми сентябр ба зидди шаҳрвандони Русия, ки аз фармони “басичсозӣ” сарпечӣ мекунанд ва ё ихтиёрӣ ба нерӯҳои Украина таслим мешаванд, ҷазои сахттар таъин кард.

Мақомоти кишварҳои ғарбӣ мегӯянд, аз оғози ҷанги беасос дар Украина дар моҳи феврали имсол аз 70 000 то 80 000 сарбозу афсари Русия кушта ва захмӣ шудаанд.

Таркиш дар маркази Бадахшони Афғонистон

Акс аз бойгонӣ

Мақомҳои маҳаллии Толибон рӯзи 25-уми сентябр аз вуқӯи таркиш дар Файзобод, маркази вилояти Бадахшони он кишвар, хабар доданд.

Маъзуддин Аҳмадӣ, раиси иттилоот ва фарҳанги Толибон дар Бадахшон, рӯзи якшанбе дар паёме ба расонаҳо гуфтааст, як шахси мулкӣ кушта ва се ғайринизомӣ захмӣ шудаанд.

Масъулияти инфиҷорро то ҳанӯз ҳеч гуруҳе ба уҳда нагирифтааст.

Душанбе аз "қатъи муноқиша" хабар дод, Тошиев аз "бардоштан"-и 8 посгоҳ

Саймуъмин Ятимов ва Қамчибек Тошиев

Мақомоти Тоҷикистон гуфтанд, ки бо ҷониби Қирғизистон санади "қатъи муноқишаи марзиро" имзо карданд, вале тафсилоташро ошкор накарданд. Вохӯрии ҷонибҳо рӯзи 25-уми сентябр дар гузаргоҳи "Қизилбел" баргузор шуд.

Дар иттилоияи ҷудогонаи ҳукумати Суғд танҳо дар бораи берун бурдани техникаҳои иловагии ҳарбӣ аз марз суҳбат шудааст. Ҷонибҳо рӯзи 19-уми сентябр низ барои берун бурдани нерӯҳои изофӣ ва техникаҳои ҳарбӣ аз марз ба созиш расида буданд, вале маълум нест, чаро иҷро нашуд.

Ҳукумати вилояти Суғд рӯзи якшанбе гуфт, "таъкид карда шуд, ки бояд тамоми техникаҳои ҳарбӣ ба маҳалли доимии худ баргардонида шуда, ҷонибҳо мушкилоти пешояндаро бо ҳусни тафоҳум ҳал кунанд.”

Илова бар ин, тарафҳо зарур шумурдаанд, ки “мардуми наздисарҳадӣ бояд равуо дошта бошанд ва муносибатҳои дӯстона миёни ду халқ чун пештара ба роҳ монда шавад.”

Дар ҳоле ки мақомоти Тоҷикистон тафсилот надоданд, раиси Кумитаи давлатии амнияти миллии Қирғизистон гуфтааст, ду тараф кори ҳашт посгоҳро дар сарҳад бозмедоранд. Бахши қирғизии Радиои Озодӣ навишт, Қамчибек Тошиев дар ин бора 25-уми сентябр ва баъди мулоқоти ҳайатҳои Душанбеву Бишкек дар гузаргоҳи "Қизилбел" ба хабарнигорон иттилоъ додааст.

Ӯ гуфтааст, бахши аввали санад ба қатъи фаъолияти посгоҳҳое рабт дорад, ки "ҳамеша манбаи низоъ ҳастанд": "Аввал, посгоҳи марзии "Бедак" аз ҷониби Тоҷикистон ва "Тамдиқ" аз тарафи Қирғизистон. Дар онҷо на сарбозон хоҳанд буд, на мардуми одӣ. Дувум, посгоҳи "Булоқбошӣ" аз Қирғизистон ва посгоҳи "Кех" аз Тоҷикистон. Сипас гузаргоҳи "Қарочиқум" ва "Шаршен" аз Тоҷикистон ва "Катта-Туз" ва "Дача" аз Қирғизистон."

Мақомоти Тоҷикистон дар ин бора шарҳе надодаанд.

Қирғизистону Тоҷикистон тақрибан 1000 километр марз доранд ва баъди ба даст овардани истиқлол дар солҳои 90-ум то кунун натавонистаанд, садҳо километри онро таъйину аломатгузорӣ кунанд.

Афзоиши аҳолӣ, кам шудани манобеи табиӣ ба мисли обу чарогоҳу замин сабаби аслии муноқиша дар марз бахусус вилояти Суғду Бодканд аст. Ҳар сол мардуми рустоҳои марзӣ барои обу чарогоҳу замин баҳсу даъво мекунанду гиребони ҳамро мегиранд ва ин даъвоҳо гоҳо ба хунрезӣ мепечад.

Дар даргириҳои 14-17-уми сентябри имсол аз ду тараф даҳҳо нафар кушта ва захмӣ шуданд. Тоҷикистону Қирғизистон якдигарро ба таҷовузи низомӣ муттаҳам мекунанд.

Ҳамлаи нерӯҳои Эрон ба пойгоҳи "як гуруҳи ҷангҷӯ" дар Ироқ

Нерӯҳои Сипоҳи посдорони инқилоби исломии Эрон

Ба хабари расонаҳои Эрон, Сипоҳи посдорони инқилоби исломӣ рӯзи 24-уми сентябр ба пойгоҳи як “гурӯҳи ҷангҷӯ” дар шимоли Ироқ ҳамла кардааст.

Хабаргузории расмии ИРНА гуфт, ҳамлаи нерӯҳои заминии Сипоҳ аз вилояти Озарбойҷони Ғарбӣ ва бо истифода аз тӯпхонаҳо сурат гирифт.

Хабаргузории "Тасним", вобаста ба Сипоҳ, гуфтааст, нерӯҳои Эрон пойгоҳи гурӯҳи ҷудоиталаби курдро дар шимоли Ироқ заданд.

Дар гузориш омадааст, ҳамлаҳои Сипоҳ дар ҷавоб ба ҳимояти гурӯҳи ҷудоихоҳ аз нооромиҳои охир дар Эрон ва ҳамчунин талоши ворид кардани силоҳ ба ин кишвар будааст.

Эрон дар робита ба марги Маҳсо Аминӣ аз 17-уми сентябри имсол бо эътирозҳо ва нооромиҳо рӯ ба рӯ аст. Аминии 22-сола пас аз боздошт аз сӯи пулиси ахлоқи Теҳрон ба таври мармуз даргузашт.

Эътирозҳо аввал дар зодгоҳи Маҳсо Аминӣ, вилояти Курдистони Эрон, оғоз ва сипас ба даҳҳо шаҳри ин кишвар паҳн шуд.

Тихановская: “Бе Украинаи озод Беларуси озод нахоҳад буд”

Светлана Тихановская

Раҳбари мухолифини Беларус гуфт, Русия на Беларус ва на Украинаро ҳамчун кишварҳои соҳибистиқлол ҳисоб намекунад ва ду кишвар бояд барои ҳифзи мавҷудияти худ якҷоя мубориза баранд.

Светлана Тихановская пас аз интихоботи баҳсбарангези президентии соли 2020 ба Литва кӯчид. Бисёриҳо ӯро пирӯз мешуморанд, аммо Кумисюни марказии интихобот Александр Лукашенкоро баранда эълон кард.

Тихановская дар мусоҳиба ба хабаргузории "Ассошиэйтед Пресс" гуфт, "бе Украинаи озод Беларуси озод вуҷуд нахоҳад дошт."

Лукашенко аз ҳампаймони наздики раиси ҷумҳури Русия Владимир Путин аст ва аз таҷовузи беасоси Маскав ба Украина пуштибонӣ мекунад.

Раҳбари мухолифини Беларус ҳангоми суханронӣ дар ҳошияи иҷлоси Маҷмааи Умумии СММ дар Ню-Йорк гуфт, то даме ки Путин дар қудрат аст, таҳдидҳои амниятӣ ба Украина ва марзҳои ғарбии Беларус хоҳанд монд.

"Ҳеч кишвар намехоҳад, бахше аз империяи дигари Русия бошад. Беларус бахше аз ин мушкилот аст ва ин бӯҳрон бояд ҳал карда шавад," – афзуд ӯ.

Тоҷикистон мехоҳад, узви Шӯрои Амнияти СММ шавад

Вазири умури хориҷии Тоҷикистон. Маҷамааи Умумии СММ, 24-уми сентябри 2022

Тоҷикистон мехоҳад, барои узвияти муваққатӣ дар Шӯрои амнияти Созмони Милал дар солҳои 2028-2029 номзадии худро пешбарӣ кунад.

Дар ин бора Сироҷиддин Муҳриддин, вазири умури хориҷии Тоҷикистон, рӯзи 24-уми сентябр дар Маҷмааи Умумии СММ хабар дод.

Ӯ далели тасмимро ба “иштироки фаъол дар маъракаҳо ва равандҳои Созмони Милал, инчунин, таҷрибаи беназири сулҳпарварӣ ва дониши амиқ дар бораи Афғонистон” рабт дод.

Маълум нест, ки оё Тоҷикистон ба ин хостааш хоҳад расид ё не. Созмонҳои байнулмилалӣ солҳои охир Тоҷикистонро барои нодида гирифтани саҳми як ҷониби сулҳ дар кишвар танқид мекунанд.

“Тоҷикистон ҷиддан муътақид аст, ки давлатҳои хурд низ бояд имкони бештаре дошта бошанд, то ҷиҳати дарёфти роҳҳалҳо барои масъалаҳои марбут ба таъмини сулҳу амният саҳмгузор бошанд,” – афзуд Сироҷиддин Муҳриддин.

Дипломати баландпояи тоҷик гуфт, бесаброна мунтазири ҳамкории зич бо ҳама кишварҳои узви Созмони Милали Муттаҳид ҳастанд, “то эътимод ва дастгирии заруриро барои ин корзори басо муҳим ба даст оранд”.

Шӯрои Амният яке аз аркони Созмони Милал аст ва вазифаи посдорӣ аз амният ва сулҳи байнулмилалиро бар уҳда дорад. Ба узвияти Шӯрои Амният 15 узв, панҷ узви доимӣ ва даҳ узви муваққатӣ, шомиланд.

Зеленский ба мардуми Русия: "Даъватномаро ба артиш нагиред"

Владимир Зеленский

Президенти Украина, Владимир Зеленский, дар пайванд ба фармони "басичозӣ" дар Русия бори дувум ба забони русӣ ва ба шаҳрвандони он кишвар муроҷиат кард.

Ӯ ба мардуми Русия тавсия дод, ки бо ҳар роҳе аз рафтан ба артиш худдорӣ кунанд. "Аз онки дар замини бегона ҳамчун ҷинояткори ҳарбӣ бимиред, беҳтар аст, даъватномаро нагиред," – афзуд ӯ.

Раиси ҷумҳури Украина аз онҳое, ки аллакай ба артиши Русия бурда шудаанд, хост, худро таслим кунанд ва ба онҳо муносибати хубу мутамаддинро ваъда дод.

"Басичсозӣ" дар Русия рӯзи 21-уми сентябр эълон шуд. Мақомоти Русия гуфтанд, қисме аз нерӯҳои эҳтиётиро ба артиш хоҳанд бурд.

Владимир Путин, раиси ҷумҳури Русия, рӯзи 24-уми сентябр қонунеро имзо кард, ки барои ихтиёрӣ таслим шудан то даҳ сол зиндонро пешбинӣ мекунад.

Зеленксий ва раҳбарони дигари Украина таъкид мекунанд, ки фармони "басичсозӣ" дар Русия стратегияи Киевро барои пирӯзӣ дар ҷанг дигар намекунад.

Артиши Украина гуфт, Русия ҷануби ин кишварро тирборон кард

Украина. Ҳамлаи мушакӣ

Дар ҳоле ки чор минтақаи қисман ишғолкардаи Русия ба ҳамапурсии сохта барои пайвастан ба Маскав идома доданд, Русия ҷануби Украинаро тирборон кардааст.

Артиши Украина рӯзи 25-уми сентябр гуфт, дар 24 соати гузашта ба ҳадафҳои низомӣ ва ғайринизомӣ дар ҷануби ин кишвар, аз ҷумла 35 шаҳрак, даҳҳо ҳамлаи мушакӣ ва ҳавоӣ анҷом шуд.

Ҳамапурсие, ки Украина, Ғарб ва Созмони Милали Муттаҳид ғайриқонунӣ ва қалбакӣ медонанд, то 27-уми сентябр идома хоҳад кард.

Овоздиҳӣ дар минатқаҳои зери назорати Русия дар вилоятҳои Луҳанск, Донетск, Херсон ва Запорожйеи Украина ҷараён дорад.

Ин дар ҳолест, ки дар аввали ҳафта раиси ҷумҳури Русия дар бораи қисман басичсозии нерӯҳои эҳтиётӣ ба артиш фармон дод.

Бар асоси он, метавонанд, садҳо ҳазор сарбози навро ба ҷанги зидди Украина, ки Маскав дар моҳи феврали имсол оғоз кард, бифиристанд.

Даъват пас аз он сурат гирифт, ки нерӯҳои Русия дар шарқи Украина талафоти зиёд доданд. Киев ба ҳамлаи ҷиддии ҷавобӣ шуруъ кард.

Мақомоти Украина гуфтанд, то анҷоми райъдиҳии сохта мардум иҷозаи берун рафтан аз қаламравҳои ишғолкардаи Русияро надоранд. Гурӯҳҳои мусаллаҳ вориди хонаҳо шуда, мардумро ба овоздиҳӣ маҷбур мекунанд.

"Қассоби Мариупол" муовини вазири дифои Русия шуд

Дмитрий Булгаков аз соли 2008 дар мақоми муовини вазири дифоъ кор кардааст

Вазорати дифои Русия рӯзи 24-уми сентябр гуфт, ки муовини вазир Дмитрий Булгаков “бо сабаби ба вазифаи дигар гузаштан” аз ин мақом сабукдӯш мешавад. Ба ҷои ӯ ба ин мақом генерал-полковник Михаил Мизинтсев таъин шуд, ки пештар дар мақоми раиси Маркази назорати дифои миллии Русия кор мекард.

Низомиёни украинӣ гуфтанд, ки Мизинтсев раҳбарии ҳуҷум ба бандарҳои баҳри Азови Украинаро дар Мариупол ба ӯҳда дошт ва дар он ҷо лақаби “қассоби Мариупол”-ро гирифт. Мариуполро Русия дар охири моҳи май ишғол кард ва аксар қаламравҳои ин шаҳрро ба харобаҳо табдил дод ва ҳазорҳо сокинони мулкӣ кушта шуданд.

Дар ин охирҳо раҳбарияти низомии таҳти раёсати вазири дифоъ Сергей Шойгу, ки аз доираи наздик ба Кремлин дониста мешавад, мавриди интиқод аст. Тахминан ду ҳафта пеш артиши Русия аз минтақаҳои шарқии Харкиви Украина ронда шуд.

34 кушта. Раисӣ гуфт, бо мухолифони низоми Эрон "қотеона амал кунанд"

Теҳрон, 21-уми сентябр

Президент Иброҳим Раисӣ рӯзи 24-уми сентябр гуфт, ки Эрон “бояд бо онҳое, ки зидди амният ва оромии кишвар баромад мекунанд, қотеона амал кунад”. Ин изҳорот дар ҳоле садо дод, ки матбуоти давлатӣ навишт, дар эътирозҳои як ҳафтаи ахир бо сабаби марги духтари 22-солаи боздоштшуда барои ҳиҷоби нодуруст 35 нафар кушта шуд. Раисӣ ин суханҳояшро зимни як сӯҳбати телефонӣ бо оилаи ходими амнияти дар ҷараёни эътирозҳои зиддиҳукуматӣ кушташуда баён кардааст.

Эътирозҳову раҳпаймоиҳо аз он ҷо шурӯъ шуд, ки рӯзи 16-уми сентябр се рӯз баъди боздошти полиси ахлоқ барои гӯё нодуруст пӯшидани ҳиҷоб Маҳсо Аминии 22-сола бо нишонаҳои латукӯбу шиканҷа даргузашт. Эътирозҳо аз зодгоҳи духтар – вилояти Курдистон шурӯъ шуда ба дигар минтақаҳои кишвар то Теҳрон паҳн шуд. Рӯзи 23-юми сентябр мақомот ба кӯчаҳо тарафдорони режими исломиро бароварданд. Рӯзи 24-уми сентябр хадамоти иктишофии Эрон иддао кард, ки аз чандин нақшаи таркиши бомба дар ҷараёни эътирозҳо пешгирӣ кардааст. Иддао мешавад, ки ин нақшаро собиқ тарафдорони шоҳ ва ниманизомиёни сокини Табрез ташкил карданӣ буданд, вале санҷидани дурустии ин иддао тавассути манобеи мустақил имон надорад.

Фаъолон мегӯянд, ки Аминӣ дар идораи полис аз сараш зарба хӯрдааст, вале полис инро рад мекунад. Аҳмад Ваҳидӣ, вазири корҳои дохилии Эрон рӯзи 23-юми сентябр гуфт, ки “таҳқиқи тиббию судӣ нишон дод, ки латукӯб ҷой надошт”. Қаблан полис гуфт, ки ин духтар аз сактаи қалбӣ даргузашт, вале наздиконаш бо ишора ба захмҳои сангини бадани духтар ба шиканҷа шудани ӯ пойфишорӣ мекунанд.

Қирғизистон аз афзоиши қурбониҳои муноқишаи марзӣ гуфт

Тоҷикистон Қирғизистонро дар ҳамлаи дроне ба масҷиди деҳаи Овчӣ Қалъача гунаҳгор кард, ки боиси марги беш аз даҳ нафар шуд. Қирғизистон ин иттиҳомро шарҳ надод

Мақомоти Қирғизистон гуфтанд, ки шумори қурбониёни муноқишаи марзӣ бо Тоҷикистон дар ин кишвар то 62 нафар афзудааст. Дар ин бора рӯзи 24-уми сентябр Вазорати беҳдошти Қирғизистон хабар додааст.

Мақомоти Тоҷикистон дар бораи кушта шудани 41 нафар гузориш дода, рӯйхати пурраи қурбониёнро надоданд. Вале Радиои Озодӣ бо истифода аз манобеи худ, хешовандон, шабакаҳои иҷтимоӣ ва мақомоти маҳаллӣ то ин дам номи 70 нафареро гирд овард, ки ҳангоми даргириҳои мусаллаҳонаи 14-17-уми сентябр дар сарҳади Тоҷикистон бо Қирғизистон кушта шудаанд. Ин рӯйхат ғайрирасмӣ аст ва ниҳоӣ нест. Дар миёни қурбониҳои муноқишаи хунин аз ҳарду тараф кӯдакон ҳам ҳастанд.

Рӯзҳои 14-17-уми сентябри имсол сарҳади Тоҷикистону Қирғизистон шоҳиди муноқишаи мусаллаҳонаи бесобиқае шуд, ки дар сар задани он ва истифодаи силоҳҳои сангини низомӣ ҳарду тараф ҳамдигарро айбдор карданд. Бар асоси протоколи хатми низоъ дар марз, ки 19-уми сентябр имзо шуд, мақомоти ду ҳамсоя ӯҳдадор шуданд, ки шартҳои сулҳро риоя кунанд. Равобити сиёсиву маишии байни ду ҳамсоя, ки 970 км марзи муштарак доранду беш аз нисфи он аломатгузорӣ нашудааст, мушкил ва печида боқӣ мемонад.

Мавҷи эътирозҳо дар Эрон баъд аз марги Маҳсо Аминӣ

Эътирозҳо на танҳо дар дохили Эрон, балки дар хориҷа, аз ҷумла дар Туркия ҳам барпо мешаванд. Дар акс Маҳсо Аминӣ

Дар муқобили мавҷи эътирозҳои мардумие, ки баъди даргузашти хушунатбори духтари 22-солаи эроние дар полис барои гӯё ҳиҷоби нодуруст буруз кард, ҳукумат раҳпаймоиҳои тарафдорони низомро дар шаҳру манотиқи Эрон ташкил кард. Хабаргузории давлатии ИРНА гуфт, ки мардуми рӯзи 23-юми сентябр ба хиёбонҳо баромада зидди “таҳқири Қуръон, оташ задани масҷидҳо ва ҳам вайрон кардани қоидаи пӯшидани либоси исломӣ” шиор мезананд.

Ин нафарон эътирозгарони зиддидавлатиро чун “сарбозони Исроил” маҳкум карданд. Онҳо инчунин шиорҳои “марг ба Амрико” ва “марг ба Исроил”-ро ба забон меоварданд, ки як одати маъмулии рӯҳониён дар таҷаммӯъҳои давлатии Эрон мебошад. Қаблан мақомот дар Эрон таҳдид карданд, ки ба “душманон” муқовимат мекунанд. Ин ишора ба садҳо ҳазор эътирозгарони марги пурхушунати Маҳсо Аминӣ дар ҳодисаҳои 16-уми сентябр аст, ки баъди боздошт шуданаш аз ҷониби полиси ахлоқ бо иттиҳоми “ҳиҷоби нодуруст” бо захмҳои шадиде дар бемористон ҷон дод.

Полис иддао кардааст, ки ӯ аз сактаи қалбӣ даргузашт, вале фаъолон полисро дар шиканҷаи ин духтар айбдор мекунанд, ки боиси марги ӯ шудааст. Эътирозҳо аз зодгоҳи Маҳсо Аминӣ дар вилояти Курдистон шурӯъ шуда ба дигар қисматҳои Эрон доман паҳн кард ва ба Теҳрон ҳам расид.

Марги Аминӣ боиси баландтар садо додани даъватҳо ба бекор кардани қоидаи ҳиҷобпӯшии занҳо ва ҳам манъи кори полиси ахлоқ шуд. Дар видеоҳое, ки сокинони Эрон дар шабакаҳои иҷтимоӣ нашр мекунанд, саҳнаҳои эътирози занону духтарон аз роҳи оташ задани ҳиҷобҳояшон нашр мешавад. Бархе эътирозгарон ба хатми режими исломӣ дар Эрон даъват мекунанд.

Ёфтҳои бештар

XS
SM
MD
LG