Пайвандҳои дастрасӣ

Хабари нав

Хабарҳо

НАТО назорат бар ҳарими ғайрипарвозро ба даст гирифт

Андерс Фог Расмуссен
Имрӯз паймони НАТО гуфт, дар ҳоле, ки гурӯҳҳои шӯришӣ дар самти шарқ нируҳои вафодор ба Муаммар Қаззофиро водор ба ақибнишинӣ кардаанд, тибқи қатъномаи Шӯрои Амнияти СММ НАТО назорат бар минтақаи ғайрипарвозро ба даст гирифтааст. Субҳи имрӯз Андерс Фог Расмуссен-Дабири Кулли НАТО гуфт, ки ин паймон фармондеҳии ҳамаи амалиёт дар Либияро дар ихтиёр гирифтааст, то аз шаҳрвандон дифоъ кунад. Ҳамзамон ҳавопаймоҳо зодгоҳи Муаммар Қаззофӣ шаҳри Сиртеро бомбборон кардаанд.

Ҳамаи хабарҳои имрӯзро дар инҷо бихонед

Дабири кулли СММ: "40 млн нафар дар ҷаҳон қурбонии ғуломдории муосир ҳастанд"

Дабири кулли Созмони Милали Муттаҳид мегӯяд, набояд тасаввур кард, ки ғуломдорӣ ё бардадорӣ марбут ба замони гузашта аст, балки дар ҳоли ҳозир 40 миллион нафар дар ҷаҳон қурбонии ғуломдории муосир ҳастанд.

Антонио Гуттериш, дабири кулли Созмони Милали Муттаҳид рӯзи чаҳоршанбеи 2-юми декабр бо нашри як паём дар "Твиттер" гуфт, ғуломдории муосир воқеияте аст, ки набояд ҷаҳон нисбат ба он бетараф бошад.

Ӯ афзуд, беш аз 40 миллион нафар, шомили 25 миллион инсоне, ки водор ба кори маҷбурӣ шудаанд ва 15 миллион нафаре, ки ба зӯр издивоҷ кардаанд, қурбонии ғуломдории муосир ҳастанд. Антонио Гуттериш афзуд, "71 дарсади қурбониёни ғуломдории муосир занон ва духтарон ҳастанд".

Ба гуфтаи дабири кулли Созмони Милали Муттаҳид, бахши бузурги ин афрод аз табақаи фақир, махсусан ақалиятҳо, паноҳҷӯён ва кӯдакони коргар ҳастанд. Ҳамчунин дар ин гузориши дабири кулли СММ гуфта мешавад, ки қурбониёни қочоқи инсон ва тиҷорати ҷинсӣ, шомили ин гурӯҳ мешаванд.

Вай ҳамчунин аз истифодаи кӯдакон дар ҷангҳо изҳори нигаронӣ кард ва аз ҷомеаи ҷаҳонӣ хост, ки барои ҳимоят аз ин афрод талош кунанд.

Муҳоҷирати зиёди корӣ, марду зан ва кӯдаконро ҳам ҳарчӣ бештар дар баробари истисмору сӯистифода ва аз ҷумла истисмори ҷинсӣ осебпазир кардааст.

Дабири куллии Созмони Милали Муттаҳид аз кишварҳои узв, ҷомеаи шаҳрвандӣ ва бахши хусусӣ тақозо кардааст, ки барои аз байн бурдани ин падида талошҳои муштарак анҷом диҳанд.

Тоҷикистон дар гузашта барои муқовимат бо қочоқи инсон ҷазоҳои сахт таъйин карда буд. Масалан бар тибқи моддаи 101-уми Кодекси ҷиноӣ барои истисмори ҷинсӣ ва истисмори меҳнатӣ дар Тоҷикистон 15-соли зиндон ҷазо таъйин шудааст.

Ҳамчунин дар Тоҷикистон махсус барои "ғуломдорӣ" ҷазо таъйин кардаанд ва ҳам барои порнографияи кӯдакона. Солҳои гузашта дар Тоҷикистон чандин парвандаи ҷиноятӣ дар робита қочоқи инсон боз шуда, чанд нафар барои "ҷалби одамон" барои истисмор", зиндонӣ шуда буданд.

Ваксинаи русии зидди COVID-19 дар СММ муаррифӣ шуд

Дар Русия то ин замон бештар аз 100 ҳазор одамро ваксинаи зидди COVID-19 задаанд. Дар ин бора вазири тандурустии он кишвар Михаил Мурашко дар ҷаласаи махсуси Маҷмаи умумии СММ хабар дод.

Сокинони Русия ваксинаи "Спутник V" гирифтаанд. Ин нахустин ваксинае аст, ки дар Русия сабт шудааст. Рӯзи 2 декабр дар СММ муаррифии ваксинаи мазкур баргузор шуд. "Иттилои ҷамъоварда далолат мекунад, ки гирифтани ваксинаи "Спутник V" афзоиши подтан ва масуниятро ба бор меорад", - гуфт Мурашко.

Кирилл Дмитриев, раиси Бунёди русии сармоягузориҳои мустақил дар ҷаласаи Маҷмаи умумии СММ гуфт, ки бештар аз 40 кишвар ба миқдори зиёда аз 1 миллиарду 200 миллион вояи ваксинаи "Спутник V" фармоиш додаанд. Дмитриев гуфт, қарор аст, дар моҳи декабр Русия барои фармоишҳои хориҷӣ 2 миллион воя истеҳсол кунад.

Владимир Путин, президенти Русия пештар хабар дод, ки шуруъ аз ҳафтаи оянда дар Русия ваксиназании умумӣ оғоз мегардад.

Ба мансадорони Узбекистон тавсия доданд, дар ҳафта як бор дучархасаворӣ кунанд

Акс аз бойгонӣ.

Сар аз 1 декабри соли ҷорӣ ба ҳамаи мақомоти давлатӣ ва муассисаҳои Узбекистон, ҳамчунин ба раисони вилоятҳо ва вакилон тавсия доданд, ки на камтар аз 1 маротиба дар ҳафта то коргоҳ бидуни мошин рафту омад кунанд ва ба ин тартиб "намунаи ибрат шаванд".

Ин тавсия дар қарори ҳукумати он кишвар "Дар бораи чораҳои иловагии пуштибонӣ аз тарзи ҳаёти солим ва боло бурдани ҳаракати физикӣ" шомил шудааст.

Бино ба қарори мазкур, 22 сентябри ҳар сол дар саросари Узбекистон "Рӯзи бидуни мошин" унвон шудааст.

Ба ҷуз ин, шуруъ аз 1 апрели соли 2021 дар шаҳракҳо, деҳаҳо, ноҳия ва шаҳрҳои Узбекистон барои пиёдагардон ва дучархасаворон "Долонҳои сиҳатӣ" сохта мешавад.

Қазоқистон ваксинаи зидди коронавирус истеҳсол мекунад

Акс аз бойгонӣ.

Дар вилояти Ҷамбили Қазоқистон бо харҷи 7 миллиард танга (16,5 млн доллар) корхонаи истеҳсоли ваксинаи қазоқии зидди коронавирус бунёд карда мешавад. Мақомоти қазоқ мегӯянд, истеҳсоли ваксина моҳи марти соли оянда оғоз мешавад.

"То охири соли равон тамоми корҳои сохтмонӣ ба поён мерасад. Моҳҳои январу феврали соли 2021 васлкунии таҷҳизотҳо анҷом хоҳад шуд. Тибқи нақша, моҳи марти соли оянда, ки қарор аст марҳалаи севуми санҷиши клиникӣ ба поён бирасад, истеҳсоли ваксина оғоз мешавад", - изҳор дошт раиси вилояти Ҷамбил Бердибек Сапарбоев.

Барои кормандони пажӯҳишгоҳи миллии таҳқиқи мушкилоти амнияти биологии Қазоқистон, ки дар корхона кор хоҳанд кард, хона месозанд.

Дар ин корхона 65 нафар кор хоҳанд кард.

Сохтмони корхонаи истеҳсоли ваксина, аз ҷумла зидди коронавирус дар ноҳияи Кордайи Ҷамбил моҳи июни соли равон оғоз шуда буд. Ба гуфтаи раиси Ҷамбил, корхона бо наздики 7 миллиард танга бунёд мешавад. Он солона аз 30 то 60 миллион моя ваксина истеҳсол мекунад. Ваксинаи истеҳсолии ин корхона дар баробари коронавирус зидди зукоми паранда ва бемориҳои дигари сироятӣ низ истифода хоҳад шуд.

Путин аз роҳбарони СПАД даъват кард, сарвазири Арманистонро пуштибонӣ кунанд

Владимир Путин ва Никол Пашинян.

Владимир Путин, президенти Русия аз роҳбарони кишварҳои узви Созмони паймони амнияти дастаҷамъӣ (СПАД) даъват кард, ки сарвазири Арманистон Никол Пашинянро пуштибонӣ кунанд.

Путин дар ин бора рӯзи 2 декабр дар ҷараёни саммити СПАД изҳори назар кард, ки тариқи онлайн баргузор шуд. Путин дар шарҳи имзои созишномаи оташбас миёни Озарбойҷон ва Арманистон гуфт, ки сарвазири Арманистон маҷбур шуд, ин созишномаро имзо кунад.

Мухолифон дар Арманистон ин тасмими Пашинянро ҳамчун хиёнат ба манфиатҳои кишвар унвон карданд. Баъди имзои созишномаи сеҷониба дар нимаи аввали моҳи ноябр дар Арманистон сокинон ба кӯчаҳо рехта, истеъфои Пашинянро талаб карданд.

Ба ҷуз аз Русия ва Арманистон Белорус, Қазоқистон, Қирғизистон ва Тоҷикистон узви СПАД ҳастанд. Аъзои СПАД вазифадор ҳастанд, ки тамомияти арзӣ ва истиқлоли аъзои дигари созмонро ҳимоят кунанд.

Вазъ дар Қарабоғи Куҳӣ субҳи 27 сентябри соли равон якбора шиддат гирифта буд. Дар ин минтақа амалиёти низомӣ шуруъ гашт. Дар Арманистону Озарбойҷон вазъи низомӣ эълом карданд.

Низоъи Озарбойҷону Арманистон бар сари Қарабоғи Куҳӣ аз охирин солҳои мавҷудияти Иттиҳоди Шӯравӣ идома дорад. Минтақаи мазкур, ки бештари бошандагонаш арманӣ ҳастанд, дар соли 1991 эълом кард, ки аз Озарбойҷон ҷудо ва мустақил мешавад. Аммо ҳеч кадом давлати дунё ин минтақаро эътироф накард.

Муовини сарвазир сабаби маҳдудияти барқро дар Тоҷикистон норасоии об гуфт

Ҷаласаи ситоди омодагӣ ба зимистон дар Хатлон

Дар ҳоле ки масъулони ширкати "Барқи Тоҷик" беш аз як моҳ боз маҳдудияти нирӯи барқро ба таъмири дастгоҳу зеристгоҳҳо рабт медиҳанд, муовини сарвазир сабаби онро "кам будани об дар обанборҳо" номидааст.

Усмоналӣ Усмонзода рӯзи 2-юми декабр дар ҷаласае дар Хатлон инчунин гуфтааст, "зиёд шудани аҳолӣ" ва “аз меъёр зиёд истифода намудани нерӯи барқ" эҳтиёҷро ба нирӯи барқ пеш овард. Дар ин бора Шуъбаи иттилоотию таҳлилии дастгоҳи раиси вилояти Хатлон хабар дод.

Сокинони Тоҷикистон беш аз як моҳ инҷониб бо маҳдудият нирӯи барқ мегиранд.

Моҳи июли имсол ширкати “Барқи Тоҷик” аз камбуди об дар дарёи Вахш хабар дода буд. Силсилаи нирӯгоҳҳо дар рӯди Вахш аз тавлидкунандаҳои аслии нерӯи барқ дар кишваранд. Нерӯгоҳи барқи обии Роғун ҳам ба он дохил мешавад.

Ширкат он замон фурӯши барқро ба кишварҳои ҳамсоя муваққатан манъ кард, аммо масъулони “Барқи Тоҷик” бебарқиҳои ахирро ба камбуди оби дарё рабт намедиҳанд.

Масъулони ширкати "Барқи Тоҷик" аз оғози моҳи ноябр то ҳанӯз дар посух ба норозигии сокинон мегӯянд, дар кишвар лимити барқ ҷорӣ нашудааст ва ин вазъро ба таъмири дастгоҳҳо ва истгоҳу зеристгоҳҳо рабт медиҳанд.

Дар оғози моҳи октябр низ интиқоли барқ ба сокинон дар соатҳои муайян қатъ мешуд ва мақомот ин вазъро ба таъмири дастгоҳҳо рабт дода буданд. Дар моҳи апрел ҳам беш аз ду ҳафта бархе аз сокинон бо реҷа барқ гирифтанд, аммо “Барқи Тоҷик” боз ҳам мавҷудияти лимитро рад карда буд. Изҳороте, ки бисёриҳо ба он бо шубҳа менигаранд.

Марги як нафари дигар аз коронавирус дар Тоҷикистон тасдиқ шуд

Вазорати тандурустии Тоҷикистон дар бораи фавти боз як нафари дигар аз коронавируси нав хабар дод, аммо ному насабашро ошкор накард. Дар умум, ба иттилои расмӣ, аз охири моҳи апрел то 2-юми декабр 87 кас аз бемории ҳамагир фавтидаанд. Радиои Озодӣ дар охири моҳи ноябр рӯйхати тақрибан 230 касро тартиб дод, ки бино бар тасдиқи пайвандон, табибон ва навиштаи расонаҳо аз бемории COVID-19 ва илтиҳоби шуш ҷони худро аз даст додаанд. Вазорати тандурустӣ мегӯяд, дар шабонарӯзи охир 38 мавриди гирифтории сокинонро ба коронавирус таъйид кардааст. Ба иттилои манбаъ, дар ҳашт моҳ 12 ҳазору 269 кас бемор шуда, зиёда аз 95 дарсади онҳо шифо ёфтаанд. Мунтақидон ба омори расмӣ шубҳа доранд. Ба бовари онҳо, мумкин аст, омори воқеӣ бамаротиб бештар бошад.

Тафтиши  иттиҳоми эҳтимолии “пора бар ивази  афв” бо ширкати Кохи Сафед  

Додгоҳи таҷдиди назари ИМА

Як санади додгоҳии рӯзи 1 декабр мегӯяд, ки Вазорати адлияи ИМА ба тафтиши қазияе шурӯъ кардааст, ки ба нақшаи порагирии сиёсӣ ба хотири афви президентӣ марбут мебошад. Санадҳои додгоҳӣ хеле таҳрир хӯрда, исми гумонбарон сиёҳ карда шудааст. Дар ин санадҳо ҳеҷ ишорае ба номи президент Доналд Трамп ваё тими ӯ дида намешавад. Вале дар ариза гап дар бораи “як нақшаи пинҳонии тарафдорӣ” аз ду нафар меравад, ки дар Кохи Сафед “мақоми баланд” доранд ва ҳадафи ниҳоиаш “афв ваё таъхир дар ҳукми додгоҳ” барои шахси беном мебошад. Гумонбарон дар нақша, ки яке аз онҳо ҳуқуқшинос мебошад, ба “сармоягузории қаблии ҳангуфт ба интихобот” ва “хайрҳои ҳангуфти сиёсӣ дар оянда” бар ивази афв ё таъхир дар содир шудани ҳукми додгоҳ ваъда додаанд. Маълум нест, ки вокуниши мақомоти Кохи Сафед ба пешниҳоди эҳтимолии пора чӣ будааст.

Берил Ҳоувелл, додраси минтақавии Вашингтон санадҳои таҳриршударо нашр карда гуфт, ки таҳқиқот аз моҳи август ба ин сӯ идома дорад. Бар асоси ин таҳқиқот, вазорати адлия маълумот дар бораи телефон, почтаи электронӣ ва маводи компютерро санҷидааст, ки дар ҷараёни амалиёти сохторҳои ҳифзи қонун мусодира гардид. Президентон дорои салоҳиятҳои васеъ дар заминаи афву бахшиши гуноҳ ҳастанд ва ин таҷрибаи маъмулӣ мебошад. Интизор меравад, ки то хатми мӯҳлати раёсатҷумҳуриаш Трамп бисёриҳоро афв мекунад ва дар миёни онҳо бархе шарикони сиёсии ӯ ҳам хоҳанд буд.

Борис Ҷонсон аз дастрас шудани воксинаи Pfizer/BioNTech истиқбол кард

Борис Ҷонсон, ки худ аз коронавирус ҷон ба саломат бурдааст, роҳандозӣ шудани воксинаи нави зидди ин бемории ҳамагирро истиқбол кард

Бритониё аввалин кишвар дар ҷаҳон мешавад, ки воксинаи сохташудаи ширкатҳои амрикоиву олмонии Pfizer ва BioNTech-ро иҷоза дода аллакай аз ҳафтаи оянда онро дастрас хоҳад кард. Нахуствазири Бритониё Борис Ҷонсон аз ин хабар ҳамчун ҳодисаи “фавқулодда” ситоиш ва изҳори умед кард, ки ин қадами аввал барои ба ҳаёти маъмулӣ баргаштани зиндагӣ мешавад. Қарори қабулшуда дар Бритониёро худи ширкатҳои дорусоз ҳам истиқбол карданд, чун воксинаи онҳо пеш аз худи ИМА ва Иттиҳоди Аврупо барои истифода иҷоза дода шудааст. Ду воксинаи сохташуда аз ҷониби ширкатҳои Pfizer/BioNTech ва Moderna дар санҷишу озмоишҳои гузашта муассирияти беш аз 90-дарсадиро ба намоиш гузоштанд. Дар ҳамин ҳол, Оҷонсии дорувории Аврупо гуфт, ки барои онҳо фурсати бештар лозим мешавад, ки иҷозаи истифодаи воксинаи нави амрикоиву олмонӣ содир шавад. Дар ин ниҳод гуфтанд, ки барои додани чунин иҷозатнома мутахассисони онҳо бояд санҷишҳои худро барпо кунанд. Бар асоси ҳамин меъёрҳо ин оҷонсӣ гуфт, ки рӯзи 29-уми декабр дар ҷаласаи худ дар бораи воксинаи Pfizer/BioNTec тасмим гирифта мешавад.

146 парвози чартерӣ аз Русия ба Тоҷикистон. Нархи билет бетағйир аст

Акс аз бойгонӣ

Ширкати "Сомон Эйр" эълон кард, ки дар моҳи декабр ҳавопаймоҳояш аз Русия ба Тоҷикистон 146 парвози чартерӣ анҷом хоҳанд дод. Ширкат 2-юми декабр гуфт, ин парвозҳо аз Маскаву Санкт-Петербург, Новосибирск, Екатеринбург, Қазон, Красноярск, Краснодар, Сургут ва Иркутск ба Душанбе дар назар аст. Фурӯши билетҳо дар дувоздаҳ нуқта, аз ҷумла дар фурудгоҳи "Домодедово"-и Маскав имконпазир будааст. Нархи билети парвоз 395 еврост. Бисёре аз муҳоҷирони тоҷик ин нархро "хеле гарон" медонанд. Масъулони ширкат мегӯянд, ҳоло ҳавопаймоҳо аз Душанбе ба Русия холӣ рафта, аз онҷо муҳоҷиронро меоранд ва бино бар ин, нархи билету хадамот гаронтар аст. "Дар ҳолати иҷозати иҷрои парвозҳои дутарафа (интиқоли мусофирон аз самти Ҷумҳурии Тоҷикистон ба Федератсияи Россия) арзиши билет коҳиш меёбад. Баъзе аз муҳоҷирон мегӯянд, мунтазири он ҳастанд, ки парвозҳои доимӣ ҳарчи зуд аз сар гирифта шавад, вале Тоҷикистону Русия дар ин замина ҳанӯз ба тавофуқ нарасидаанд.

Коршиносони Бонки Ҷаҳонӣ: Дар бахши Интернет дар Осиёи Марказӣ ислоҳот зарур аст

Акс аз бойгонӣ

Пандемияи коронавирус мушкили хеле ҷиддии кишварҳои Осиёи Марказиро ошкор кардааст, ки сустии суръати Интернет яке аз онҳост. Ин мавзуъ рӯзи 2-юми декабр дар нишасти онлайни Бонки Ҷаҳонӣ мутахассисон ва иқтисоддонҳоро ба ҳам овард.

Мутахассисон мегӯянд, дар давраи пандемияи коронавирус аҳамияти пайвастшавӣ ба Интернет ва мухобироти рақамӣ авлавият пайдо кард, то ҳукуматҳову ширкатҳои хусусӣ ва шахсони алоҳида битавонанд кори худро фосилавӣ пеш баранд ё ба таҳсил идома диҳанд.

Вале ба гуфтаи Лилия Бурунчук, раиси минтақавии Бонки Ҷаҳонӣ, "бӯҳрони COVID-19 вуҷуди мушкилро дар иртибототи рақамӣ дар минтақа ба намоиш гузошт". Ӯ мегӯяд, ҳамин мушкил нобаробарии иҷтимоиро дар ҷомеаҳо афзоиш дода, рушди иқтисодиро дар минтақа суст мекунад.

Бино ба арзёбиҳои мутахассисон, кишварҳое, ки дорои зербиноҳои мустаҳкам ва амалкунандаи рақамӣ ҳастанд, тавонистанд зарбаҳои манфии пандемияро ба иқтисод то нисф кам кунанд. Вале зарбаи он ба кишварҳое, ки низоми заифи мухобироти рақамӣ доранд ва то ҳол натавонистанд хадамоти давлативу иқтисодро ба ин сатҳ бароранд, хеле амиқ ва густарда будааст.

Ба навиштаи Miragenews, дар конфронси Бонки Ҷаҳонӣ номи Тоҷикистон ба унвони давлате ёд шуд, ки мизони поини дастрасӣ ба хадамоти рушдёфтаи интернетӣ дар ҳама соҳаро дорад.

Дар муқоиса бо Қазоқистон, ки ин мизон 35 дарсадро ташкил медиҳад, дар Тоҷикистон 3,1 дарсад аст (арзёбиҳои TeleGeography). Ин ҷо манзур дастрасӣ ба Интернет, истифодаи васеъ аз он дар ҳама гуна хадамот, ҳаёти иҷтимоиву маишӣ ва ҳам суръати интернети мобилӣ мебошад.

Коршиносон таъкид карданд, ки барои минтақаи Осиёи Миёна дастрасӣ ба хатҳои васеи интернетӣ як мушкили ҷиддӣ мебошад ва бо ҳамин сабаб арзиши хадамоти интернетӣ, бахусус дар деҳот баланд асту нақши интернет дар иқтисод ҳанӯз пешбаранда нашудааст.

Ширкатдорони конфронс мегӯянд, дар Осиёи Марказӣ зарурат ба ислоҳоти соҳавӣ, бахусус дар масъалаи мухобироти байналмилалӣ, монополияи ширкатҳои давлатӣ, танзими номураттаби мухобирот, набуди сохторҳои мустақили танзимкунандаи соҳа ва сатҳи поини сармоягузорӣ ба ин соҳа зарур мебошад.

Михаил Бурунчук, мутахассиси калони Бонки Ҷаҳонӣ дар ин нишаст гуфтааст, "ислоҳот дар бахши мухобирот ё соҳаи телекоммуникатсияи кишварҳои Осиёи Миёна имкониятҳои васеъро барои аҳоливу иқтисоди ин кишварҳо фароҳам мекунад".

Бино ба арзёбиҳои ӯ, ҳатто то 10 дарсад афзоиш додани мизони паҳншавии хатҳои васеъмиқёси интернетӣ барои рушди якдарсадии иқтисоди ин кишварҳо мусоидат хоҳад кард.

СММ: 400 ҳазор маллоҳ бо сабаби коронавирус дар ҳолати сангин қарор доранд

СММ дар як муроҷиаташ хостори кӯмак ба 400 ҳазор маллоҳе шудааст, ки бо сабаби коронавирус дар обҳои баҳрҳо дармонда бо сабаби маҳдудиятҳои ҷорикардаи кишварҳо барои убуру мурури марз, наметавонанд ба хонаҳои худ баргарданд. Рӯзи 1 декабр дар як қатъномае, ки дар Маҷмаи кулл қабул шуд, вале хусусияти ҳатмӣ надорад, СММ аз ҳукуматҳо тақозо кард, ки дар бозгардони маллоҳони дар обҳо дармонда ва ба ҷои онҳо ба кор фиристодани дигар гурӯҳи ҳамкоронашон иқдом бикунанд. Аз миёни 2 миллион нафаре, ки дар ҷаҳон ба ҳайси маллоҳ кор мекунанд, 400 ҳазор нафарашон ҳоло дар баҳрҳо дармондаанд. Ба панҷгонаи кишварҳое, ки шаҳрвандонашон бештар аз ҳама дар обҳо дармондаанд, шаҳрвандони Чин, Филиппин, Индонезия, Русия ва Украина номбар мешаванд ва ин маллонҳон дар киштиҳои тиҷоратӣ кор мекунанд. Ин киштиҳо 90 дарсади тиҷорати ҷаҳониро таъмин мекунанд. Пегги Виссерс, як дипломати Иттиҳоди Аврупо, ки дар Маҷмаи кулл суханронӣ мекард, гуфт, давоми моҳҳои тӯлонӣ садҳо ҳазор маллоҳон маҷбур ҳастанд дар киштиҳои худ бимонанд. “Аксари онҳо хаставу ноумед шудаанд, чун моҳҳои тӯлонӣ аст, ки бетанаффус кор мекунанд”. Дар қатъномаи СММ инчунин тақозо шудааст, ки маллоҳон ба гурӯҳи “кормандони калидӣ” шомил шаванд, чун ин мақом ба онҳо ҳақи дар навбати аввал дарёфт кардани воксинаи зидди коронавирусро фароҳам мекунад.

Омодагии ИМА ва Аврупо ба таҳияи нақшаи эмкунӣ бар зидди COVID-19

Бо афзоиши шумори гирифторони коронавирус, бархе кишварҳои ҷаҳон аз паи тарҳрезии нақшаи эмкунии аҳолӣ аз COVID-19 мешаванд. Ба истифодаи ом пешниҳод шудани маҳсули кори ширкатҳои дорусозии Moderna (ИМА) ва BioNTech/Pfizer (Олмону ИМА), мақомотро дар ИМА ва Аврупо барои таҳияи нақшаи эмкунӣ омода кардааст. Ба ҷуз Бритониё, ки рӯзи 2 декабр истифодаи воксинаи ширкатҳои олмониву амрикоиро иҷоза дод, то ҳол ҳеҷ кишваре ин воксинаҳоро расман ба қайд нагирифтааст.

Айни замон, дар як овоздиҳӣ, ки 1 декабр дар Маркази ИМА оид ба назорат ва пешгирӣ аз бемориҳо анҷом шуд, машварат шудааст, ки 21 миллион корманди тиббиву 3 миллион сокини муассисаҳои иҷтимоӣ аз коронавирус эм карда шаванд. Ин аввалин қадамҳо барои шурӯи сартосарии эмкунии аҳолии ИМА мебошад ва интизор меравад, ки дар миёнаҳои соли 2021 дастрасӣ ба воксинаҳо фаротар хоҳад шуд. Боз ҳам фикри ҳукуматҳо ин аст, ки дар навбати аввал гурӯҳҳои оҷилан ба воксина ниёздошта эм карда шаванд ва танҳо баъд қишрҳои дигари аҳолӣ, ки метавонад моҳҳои апрел то июни соли ояндаро фаро бигирад. Дар Бразилия нақшаи эмкуние қабул шудааст, ки аз чор марҳила иборат хоҳад шуд. Дар навбати аввал, мардуми бумӣ, кормандони соҳаи тиб ва аҳолии синнашон аз 75-сола боло эм карда мешаванд. Покистон барои харидории воксинаҳои нав 150 миллион доллар ҷудо кард ва гуфт, ки дар навбати аввал 5 дарсади қишри осебпазиртарини кишвар ба воксинаҳои нав эм карда мешаванд.

Як шаҳрванди Узбекистон бо гумони фиристодани ҷавонон ба Сурия боздошт шуд

Ҷангиён аз Узбекистон дар Сурия. Акс аз бойгонӣ.

Вазорати умури дохилии Узбекистон аз боздошти марде хабар додааст, гӯё бо ҷалб ва сафарбар кардани шаҳрвандони ин кишвар ба сафи гуруҳи байналмилалии террористии "Тавҳид ва ҷиҳод катибасӣ" дар Сурия машғул будааст.

Ба огаҳии вазорат, зодаи вилояти Самарқанди Узбекистон О.Х., соли таваллудаш 1996, ҳангоми дар Миср таҳсил кардан дар соли 2019 зери таъсири ақидаҳои гуруҳи террористии мазкур қарор гирифта, дар ҷалб ва сафарбар кардани шаҳрвандон ба сафи он иштирок доштааст.

Дар рафти бозҷӯӣ аз телефони мобилии гумонбар маводи гуногуне пайдо карда шудааст, ки гӯё хусусияти экстремистӣ доранд. Вале вазорат дақиқ нагуфтааст, ки сокини Самарқанд киро кай ба Сурия фиристодааст.

Додгоҳи олии Узбекистон 26 сентябри соли 2016 ҷамоати "Тавҳид ва ҷиҳод катибасӣ"-ро созмони террористӣ эълом ва фаъолияти онро дар ҳудуди Узбекистон манъ карда буд.

Дар ғарби Қазоқистон соҳибкорон бекор кардани маҳдудиятҳоро талаб доранд

Соҳибкорон дар Қазоқистон лағви маҳдудиятҳоро талаб доранд. Акс аз бойгонӣ.

Моликони марказҳои савдои шаҳри Урал рӯзи 2 декабр дар назди Департаменти назорати сифати бехатарии маҳсулот ва хидматрасониҳои вилояти Қазоқистони Ғарбӣ ҷамъ шуда, аз идома ёфтани маҳдудияти фаъолияти фурӯшгоҳҳо нигаронӣ карданд.

Ҷамъшудаҳо - ҳудуди 30 соҳибкор аз мақомоти вилояти Қазоқистони Ғарбӣ талаб карданд, ки ба фаъолияти марказҳои савдо дар рӯзҳои истироҳат ва ҷашнҳо иҷозат дода шавад.

"Бисёри одамоне, ки солҳои тӯлонӣ бо тиҷорат машғул буданд, ҳоло маҷбур шуданд, тиҷорати худро қатъ кунанд. Барои пардохти қарз, ҳаққи иҷора ва зиндагӣ пул намондааст. Эҳтимол аст, ки мо низ рӯзҳои наздик дарҳои худро бандем. Мо мехоҳем, кор кунем. Чаро дар дигар шаҳрҳо ба тоҷирон имкони савдо медиҳанд ва маҳз сардухтури беҳдоштии мо чунин қарор қабул мекунад, ки хилофи ҳуқуқи конститутсионии мост",-изҳор дошт яке аз норозиён бо номи Аслан Утепов.

Ҷамъомадагон мулоқот бо сардухтури беҳдоштии вилоятро, ки фаъолияти фурӯшгоҳҳоро манъ кардааст, талаб карданд. Вале ба ҷои ӯ ба назди эътирозгарон сардухтури беҳдоштии Урал Мадениет Танауов баромад. Ӯ гуфт, вазъи тоҷиронро мефаҳмад, вале дар ҳоли ҳозир бекор кардани маҳдудиятҳои ҷорӣ номумкин аст.

Ба гуфтаи Танауов, дар ҳоли ҳозир дар ҳудуди Қазоқистони Ғарбӣ рӯзона ҳудуди 30-40 ҳолати нави мубталошавӣ ба коронавирус ошкор мешавад ва шумори умумии ҳолатҳо ба 8 106 расидааст.

Се фаъоли маъруфи ҳуқуқи башар дар Ҳонгконг ба зиндон маҳкум шуданд

23 ноябр. Ҷошуа Вонг, Агнес Чоу ва Иван Лам барои иштирок дар эътирозҳои тобистони соли 2019 дар додгоҳ посух медиҳанд

Фаъолони демократӣ дар Ҳонгконг Ҷошуа Вонг, Агнес Чоу ва Иван Лам рӯзи 2 декабр бо қарори додгоҳе барои ташкили намоишҳои эътирозии ғайриқонунии соли гузашта ба зиндон маҳкум шуданд. Дар паи чандин моҳи эътирозҳои мардумӣ, Чин назорат бар минтақаи нимамухтори Ҳонгконгро шадидтар кард. Дар ҷараёни эътирози сокинони маҳаллӣ ва фаъолон аз он ки озодиҳои нисбии ин минтақа боз ҳам маҳдудтар мешавад, задухӯрдҳои зиёде миёни эътирозгарону полис рух дод. Вонг барои ташкилу иштирок дар эътирозҳои моҳи июни соли гузашта ба 13,5 соли зиндон маҳкум шуд. Чоу, ки барои иштирок дар эътироз ва озори дигарон гунаҳгор номида шуд, ба 10 моҳи ҳабс ва Лам ба 7 моҳи ҳабс маҳкум шуданд.

Рӯзи 21 июни соли 2019 ҳазорҳо нафар атрофи қароргоҳи полиси Ҳонгконг ҷамъ омада, бекор шудани қонуни он замон қабулшударо талаб карданд. Қонун истирдоди гумонбарон аз Ҳонгконг ба Чинро иҷозат медод.

Бритониё аввал шуда воксинаи зидди COVID-19-и ширкатҳои Pfizer-BioNTech-ро иҷоза дод

Рӯзи 2 декабр Бритониё аввалин кишвар дар ҷаҳон шуд, ки истифодаи воксинаи зидди COVID-19-ро, ки аз ҷониби ширкатҳои амрикоиву олмонии Pfizer ва BioNTech таҳия шудааст, иҷоза медиҳад. Эмкунӣ бо истифода аз ин воксина аз ҳафтаи оянда имконпазир мешавад. Дар бораи дарёфти иҷозаи эмкунӣ дар Бритониё ин ду ширкати дорусозӣ дар шаҳрҳои Ню-Йорки ИМА ва Мейнси Олмон хабар доданд. Ин тасмим Бритониёро барои шурӯи ба кор бурдани воксинаи нав дар муқобили ИМА ва Иттиҳоди Аврупо пештоз мекунад. Раҳбари кулли ширкати Pfizer Алберт Боурла тасмими мақомоти бритониёиро “як лаҳзаи таърихӣ” номид. Ӯ гуфт, “Мо бо ҳамин суръати изтирорӣ пеш меравем, то ки воксинаи амн ва баландсифат дар саросари ҷаҳон дастрас шавад”. Воксинае, ки дарсади муассирият ё фоидааш 95 дарсад гуфта мешавад, умедвориҳоеро дар заминаи оддӣ шудани маҷрои зиндагии мардум бештар мекунад. То ҳол наздики 1,5 миллион аҳолии сайёра бар асари COVID-19 ҷон додаанд ва иқтисодҳои ҷаҳон ҳам аз пандемия осеби шадиде дидаанд. Ҳукумати Бритониё ҳам рӯзи 2 декабр бо пахши изҳороте тасдиқ кард, ки иҷозаи ба кор бурдани воксинаи нави ширкатҳои Pfizer-BioNTech содир шудааст.

Дар ҷаласаи НАТО мавзӯи ислоҳот дар ин паймони низомӣ баррасӣ мешавад

1 декабр, видео-конфронси НАТО дар Брюссел

Вазирони хориҷаи кишварҳои узви НАТО дар ҷаласаи рӯзи дуюми худ, ки тавассути конфронси онлайнӣ баргузор мешавад, фикру пешниҳодҳои ислоҳот ва тақвияти паймони низомиро баррасӣ мекунанд. Гузориши 67-саҳифагии тоза таҳияшуда аз 140 пешниҳод барои беҳбуди кори НАТО барои баррасӣ омода шудааст.

Рӯзи 1 декабр, ки аввалин рӯзи ҷаласа буд, мавзӯи паёмадҳои коронавирус ва ҳам масоили мисли “рафтори хашини Русия” ва “болоравии Чин” баррасӣ шуд. Қарор аст дар поёни ҷаласа дабири кулли НАТО Йенс Столтенберг кори онро дар як нишасти хабарӣ хулоса кунад. Рӯзи сешанбе як мавзӯи муҳими дигари вазирон – Афғонистон ва рисолати НАТО дар ин кишвар буд. Ӯ гуфт, ки моҳи феврал ин паймони низомӣ дар заминаи рисолати баъдии худ дар кишвари ҷангзадаи Афғонистон тасмимҳое хоҳад гирифт.

Аз 3 ба 1 моҳ. Муҳлати баррасии ариза барои дигар кардани ному насаб кам карда шуд

Яке аз Шӯъбаҳои сабти ҳолати шаҳрвандӣ.

Мақомоти тоҷик мегӯянд, ки пандемияи фарогири коронавирус ба раванди номгузории сокинон таъсир гузошта, шумораи муроҷиаткунандаҳо барои дигар намудани исмашон ба таври чашмрас коҳиш ёфтааст.

Дар ҷаласаи навбатии порлумон, вакилон бо ворид намудан ба "Қонун дар бораи бақайдгирии давлатии асноди ҳолати шаҳрвандӣ", муҳлати баррасии ариза барои иваз намудани ному насабро кам намуданд. То ҳол чунин мӯҳлат се моҳ пешбинӣ шуда буд ва бо қабули тағйиру иловаҳо ба қонун "Дар бораи бақайдгирии давлатии асноди ҳолати шаҳрвандӣ", он ба як моҳ кам карда шуд.

Музаффар Ашӯриён, вазири адлияи Тоҷикистон ҳангоми муаррифии тарҳ дар парлумон гуфт, "дар сурати ҷой доштани сабабҳои узрнок, мӯҳлати барраси намудани ариза понздаҳ рӯз дароз карда мешавад".

Ашуриён таъкид намуд, ки дар 10 моҳи соли равон 17 ҳазор нафар барои иваз намудани ному насабашон ба мақомоти сабти асндоди ҳолати шаҳрвандӣ муроҷиат кардаанд. Ин дар ҳолест, ки ба қавли ӯ, чунин омор дар соли гузашта 40 ҳазор нафарро ташкил медиҳад. Вазири адлия шарҳ дод, ки сабаби коҳиши муроҷиатҳо барои дигар намудани ному насаб, пандемияи коронавирус аст.

Вакилони Маҷлиси намояндагони Тоҷикистон моҳи апрели имсол дар номгузории миллии Тоҷикистон гузоштани пасвандҳои "ов"-у "вич" ва "ова"-ю "овна" дар насаби сокинон манъ карда буданд. Он замон ҳадаф аз чунин тағйиротро муаллифони қонун, боло бурдани эҳсоси худшиносӣ ва ҳифзи асолати миллии мардуми Тоҷикистон унвон карданд.

Масъалаи иваз намудани ному насаб дар гузашта борҳо боиси нигарониҳо шудааст. Аз ҷумла муҳоҷирони меҳнатӣ мегӯянд, бо гирифтани пасвандҳои "ов"-у "вич" ва "ова"-ю "овна" аз ному насабашон гоҳе дар Русия ба мушкилиҳо рӯ ба рӯ шудаанд.

Чин барои озмоиш аз Моҳ намунаи хок меорад

Дастгоҳи ковишгари чинии "Чанъэ-5" рӯзи сешанбе дар рӯи Моҳ фуруд омад. Давоми ду рӯз ин дастгоҳ намунаи хоки Моҳро барои ба кураи замин овардан ҷамъ мекунад.

Дар сурати муваффақона анҷому шудани ҷамъоварии хок ва ба замин расонидан, Чин севумин кишвари дунё хоҳад буд, ки аз Моҳ хок меорад.

Кайҳоннавардони НАСА дар охири солҳои 60 ва аввали солҳои 70-и асри гузашта чанд маротиба аз Моҳ хок оварда буданд. Соли 1976 ковишгари шӯравии "Луна-3" низ ба Моҳ рафта, хок оварда буд.

Аз он замон то кунун муҳақиқони чандин кишвар дар интизори намунаҳои нави хоки Моҳтоб буданд.

Дар Қирғизистон гирифтории мактабхонҳо ба COVID-19 афзудааст

Яке аз мактабҳои Бишкек. Акс аз бойгонӣ.

Дар Қирғизистон давоми се моҳи ахир 683 ҳолати мубталошавӣ ба коронавирус ё COVID-19 дар миёни хонандагони мактабҳои миёна ба қайд гирифта шудааст.

Ба огаҳии Вазорати тандурустии Қирғизистон, моҳи ноябр 320 хонанда, моҳи октябр 315 хонанда ва моҳи сентябр 48 хонанда ба коронавирус мубтало шудааст.

Бештари ин ҳолатҳо дар шаҳри Бишкек, вилоятҳои Чӯй ва Иссиқкӯл ошкор шуда, аз ҳама камтар дар вилояти Норин сабт гаштааст.

Дар 1489 мактаби Қирғизистон аз 11 ноябри соли равон хонандагони синфҳои 1-6 ва 9-11 ба низоми дарсии маъмулӣ баргаштанд.

Дари мактабҳои Қирғизистон моҳи марти соли равон ба далели пандемияи коронавирус баста шуда буд. Дарсҳо фосилавӣ ва дар шакли онлайн баргузор мешуданд.

Қазоқистон солона ба баҳсҳои додгоҳии байналмилалӣ то 13 млрд танга сарф мекунад

Марат Бекетаев, вазири адлияи Қазоқистон.

Вазири адлияи Қазоқистон Марат Бекетаев гуфт, ки кишвараш солона дар баҳсҳои додгоҳии байналмилалӣ чи қадар харҷ мекунад. "Мутаносибан 12 - 13 миллиард танга (то 31 миллион доллар) аст", - изҳор дошт Марат Бекетаев.

Бекетаев аз ифшои харҷҳо дар баҳси додгоҳӣ бо соҳибкорони хориҷӣ Анатолӣ ва Габриэл Статиҳо, ки Қазоқистонро ба додгоҳи байналмилалӣ кашида буданд, ба далели "сирри қарордодӣ бо ширкати машваратӣ" худдорӣ кард. Вале гуфт, вазорат дар мавриди харҷҳо "лимит" дорад.

"Агар ба ҳуқуқшиносон на бештар аз даҳ дарсади пули баҳс сарф шавад, корсоз шумурда мешавад. Фарз кардем, агар пули даъво 100 миллион доллар бошад ва харҷи ҳуқуқшиносон аз 10 миллион доллар гузарад, онро харҷи ғайрисамаранок меномем. Вале агар харҷ аз 10 миллион камтар бошад, мо онро кори самарабахш дар мавриди ҳимояти манфиатҳо меҳисобем", - афзуд вазири қазоқ.

Баҳси додгоҳии Статӣ бо ҳукумати Қазоқистон чандин сол аст, идома дорад. Анатол Статӣ ва писараш Габриэ, ки ба бахши нафту гази Қазоқистон сармоягузорӣ карда буданд, Остонаро ба кӯшиши ғасби рейдерии амволи худ айбдор ва беш аз чаҳор миллиард доллар ҷуброн талаб карданд.

Пештар Додгоҳи байналмилалии ҳакамӣ баҳсро ба нафъи соҳибкорони молдовӣ ҳал карда, аз Қазоқистон хост, ба онҳо беш аз 500 миллион доллар диҳад. Вале Қазоқистон барои лағви ҳукм талош дорад.

Дар Узбекистон зане, ки барои марги духтараш ҷуброн мехост, худро оташ зад

Андиҷон. Акс аз бойгонӣ.

Дар Узбекистон зане, ки барои марги духтараш ҷуброн мехост, худро оташ зад. Додситонии кулли Узбекистон мегӯяд, ин зан 30 ноябр дар назди бинои додситонии шаҳри Андиҷон худро оташ задааст.

"Корманди пулиси Андиҷон, ки вазъро назорат дошт, либосҳои оташгирифтаро аз тани С.Б. дур ва аз сӯхтагии шадид пешгирӣ мекунад. С.Б дар беморхона бистарӣ шуда, 15 дарсади рӯй, дастон ва гарданаш сӯхтааст. Парвандаро додситонии Андиҷон таҳқиқ дорад",-омадааст дар иттилоияи Додситонии кулли Узбекистон.

Ба огаҳии додситонӣ, сокини 21-солаи ноҳияи Марҳамати Андиҷон 24 июли соли равон духтари ноболиғеро, ки дустписарашро мунтазир буд, акс мегирад ва мегӯяд, онро ба волидонаш ва корманди пулис нишон медиҳад. Духтар аз тарс худро меовезад ва худкушӣ мекунад.

Дар робита ба ин ҳодиса бо банди "Нақзи ҳарими хусусӣ" парванда боз шуда буд.

Модари духтар 30 ноябр ба додситонии Андиҷон рафта, шикоят мекунад, ки айбдоршаванда бо вуҷуди марги фарзандаш ба ӯ ҳамчун ҷуброн мошини "Спарк"-ро намедиҳад. Вале баъди он ки кормандони пулис мегӯянд, салоҳияти ситонидани мошин аз айбдоршавандаро надоранд, зан худро оташ мезанад.

#CancelElbasy. Лавҳаи эътирозӣ дар хиёбони Нурсултон Назарбоев

Ташкилкунандагони ин лавҳа маълум нестанд

Дар шаҳри Алматои Қазоқистон 1-уми декабр лавҳае бо навиштаи "47 млрд танга барои ном" бо ҳештеги #qazaqkoktemi ва #cancelelbasy мушоҳида шуд. Ин лавҳа дар хиёбони Назарбоев (собиқ хиёбони Фурманов) насб шудааст.

Ташкилкунандагони ин лавҳа маълум нестанд, вале гуруҳи мухолифи "Rukh2k19" рӯзи якуми декабр дар бораи он дар Инстаграм хабар дод.

"Мо фаромӯш накардем, ки ҳукумати Қазоқистон чи гуна 23-юми марти соли 2019 номи пойтахт ва хиёбонҳои марказии кишварро тағйир дод. Бино ба арзёбиҳои гуногун, ба талошҳо барои абадӣ гардонидани номи Нурсултон Назарбоев (президенти нахустини Қазоқистон) беш аз 47,3 миллиард танга харҷ шудааст. Имрӯз, вақте ки Назарбоев ва ҳомиёнаш ин рӯзро ҳамчун ҷашн таҷлил мекунанд, як гуруҳи шаҳрвандон дар фикри хотима бахшидан ба ин шахспарастӣ ҳастанд. Конститутсияи Қазоқистон мегӯяд, ки манбаи асосии қудрат мардум аст. Ба назари мо, ҳар як қазоқистонӣ бояд имкони иштирок дар умури идораи давлатро дошта бошад ва озодии интихобу баёни мо бояд риоя шавад", - омадааст дар изҳороти ташаббускорони номаълуми "qazaqkoktemi".

Дар арафаи Рӯзи президенти Қазоқистон, ки ҳамасола якуми декабр таҷлил мешавад, корбарони шабакаи иҷтимоии Инстаграм навиштаҳоеро бо хештеги #cancelelbasy нашр менамоянд.

Дар Қазоқистон пойтахт, фурудгоҳи байналмилалии он, кӯчаҳои марказии вилоятҳо ба номи Нурсултон Назарбоев гузошта шудаанд. Яке аз хиёбонҳои марказии шаҳри Алмато низ номи ӯро гирифта, то ба ҳол дар ин кишвар чанд муҷассамаи Назарбоев қомат афрохтааст.

Назарбоев дар ҳоли ҳозир раиси ҳизби ҳокими "Нур Отан" ва Шӯрои амнияти Қазоқистон аст. Ҳамчунин аз унвони Элбаси ("Пешвои миллат") бархурдор мебошад, ки ӯро аз ҳама гуна таъқибҳо эмин нигаҳ медорад.

Об кам шуд: Қирғизистон аз Қазоқистон барқ мехарад

Обанбори Токтогул

Ҳаҷми об дар обанбори Токтогули Қирғизистон айни замон 13,7 миллиард метри мукаабро ташкил медиҳад. Як сол пеш дар ҳамин рӯз 16,2 миллиард метри мукаабро ташкил медод.

Дар ин бора ширкати "Пойгоҳҳои барқӣ"-и Қирғизистон хабар додааст.

Ба иттилои ширкат, ҳанӯз дар оғози соли 2020 дар обанбори Токтогул 14,9 млрд метри мукааб об мавҷуд буд, ки он нисбат ба нишондоди як сол қабл 1,8 млрд метр камтар буд.

Ба ин тартиб, ширкати "Пойгоҳҳои барқӣ"-и Қирғизистон бо ширкатҳои қазоқистонӣ дар бораи воридоти то 500 млн киловатт соат барқ бо арзиши 2,4 сент барои ҳар киловатт дар моҳҳои ноябр-декабр шартнома бастааст.

"Ҳангоми гуфтугӯҳо барои воридоти барқ ба Қирғизистон ҷониби Тоҷикистон ҳар киловатт соат нерӯи барқро 3 сент пешниҳод кард. Ҷониби Қазоқистон барои ҳар киловатт 2,5 сент хост. Ҷониби Қазоқистон ба Узбекистон ҳам бо ин қимат барқ мефурӯшад", - хабар додааст ширкати "Пойгоҳҳои барқӣ"-и Қирғизистон.

Ёфтҳои бештар

XS
SM
MD
LG