Русия мегӯяд, аз оғози ҷанг дар Украина 1351 сарбозаш кушта шудаанд.
Омори талафоти Маскав аз маълумоти Украина ва кишварҳои ғарбӣ хеле поинтар аст.
Мақомоти баландпояи низомии Русия рӯзи 25-уми март гуфтанд, 3850 сарбози дигар захмӣ шудаанд. Онҳо бори охир рӯзи 2-юми март дар бораи кушта шудани 498 сарбоз хабар дода буданд.
Як мақоми НАТО рӯзи 24-уми март ба хабаргузории "Ассошиэйтед Пресс" гуфт, эҳтимол аз 7 то 14 ҳазор сарбози Русия кушта шудаанд. Тасдиқи мустақилонаи омор ғайриимкон аст.
Нашрияи "The New York Times" рӯзи 16-уми март ба нақл аз мақомоти Амрико шумораи сарбозони кушташудаи Русияро тақрибан 7000 нафар арзёбӣ кард.
Ситоди кулли нерӯҳои мусаллаҳи Украина рӯзи 23-юми март дар Твиттер навишт, ки беш аз 15 000 сарбози рус дар ҷангҳо кушта шудаанд.
