Роҳбандӣ дар марзи Тоҷикистону Қирғизистон
Мақомоти Тоҷикистону Қирғизистон рӯзи 27-уми январ дар баёнияҳои алоҳида аз роҳбандӣ дар сарҳади ду кишвар хабар доданд. Ҷониби Тоҷикистон иддао кард, ки роҳи ҷамоати Ворух ва деҳаи Хоҷаи Аъло ба маркази Исфара "аз тарафи сокинони Қирғизистон баста шудааст".
Тарафи Қирғизистон вазъ дар сарҳад бо Тоҷикистонро муташанниҷ номид ва баръакс, нерӯҳои сарҳадбонии Тоҷикистонро ба бастани як қисми роҳи Бодканд-Исфана муттаҳам намуд. "Сарҳадбонони Кумитаи давлатии амнияти миллии Ҷумҳурии Тоҷикистон як қисми роҳи Бодканд-Исфанаро дар мавзеи Торт-Кочо ба таври якҷониба бастанд," – гуфта шудааст дар эъломияи Хадамоти марзбонии Қирғизистон.
Нерӯҳои марзбонии Тоҷикистон расман вокунише накарданд, аммо чанде аз сокинони ҷамоати Ворух ва деҳаи Хоҷаи Аълои Чоркӯҳ ба Радиои Озодӣ гуфтанд, ҷониби Қирғизистон роҳи онҳоро ба маркази Исфара бастааст. Яке аз онҳо гуфт, "сокинони Қирғизистон мошинҳои худро дар байни роҳ гузошта, ба гузаштан монеа мешаванд."
"Аз садои тиру тӯп хона меларзад"
Шоми 27-уми январ дар сарҳади Тоҷикистону Қирғизистон тирпаронӣ шуруъ шуд ва, ба қавли сокинони деҳаи наздимарзии Сомониёни Исфара, "ҳанӯз идома дорад".
Манобеи Радиои Озодӣ дар бораи кушта шудани дастикам як сокини деҳаи Сомониён хабар доданд. Созмони Паймони Амнияти Дастҷамъӣ гуфтааст, захмиҳо низ ҳастанд. Оҷонси "Азия-Плюс" бо такя ба манобеи худ дар бораи маҷруҳ шудани панҷ нафар аз шаҳрвандони Тоҷикистон гузориш дод.
Мақомоти Тоҷикистон ба таври расмӣ шарҳе надодаанд. Раиси вилояти Суғд Раҷаббой Аҳмадзода ва раиси шаҳри Исфара Баҳодур Баҳоваддинзода шаби 27-уми январ ба суолҳои Радиои Озодӣ дар бораи ҳодиса посух надоданд.
Як манбаъ дар идораи пулиси вилояти Суғд бе зикри ном гуфт, "тирпаронӣ аз ҷониби Қирғизистон сар шуд". Хабаргузории РИА Новости навишт, ки мақомоти Душанбе амалкарди марзбонони Қирғизистонро “таҷовуз ба қаламрави худ медонанд”.
Ин дар ҳолест, ки Хадамоти марзбонии Қирғизистон иддао дорад, тирпарониро нерӯҳои марзбонии Тоҷикистон оғоз карданд ва аз гранатомёту миномёт истифода намуданд.
Даргирӣ дар наздикии деҳаи Сомониёни ҷамоати Чоркӯҳи Исфара ҷараён дорад. Баъзе аз сокинони ҷамоат гуфтанд, садои тиру тӯпро мешунаванд ва аз онҳо талаб шудааст, ки аз хонаҳои худ берун набароянд.
“Аз ҳама намуди яроқ истифода мешавад. Аз садои тиру тӯп шишаи хонаҳо меларзад. Мардум дар таҳлука аст. Ба равони кӯдакон таъсир дорад, сахт тарсидаанд”, -- нақл кард ин сокини Чоркӯҳ.
СПАД хостори оташбаси фаврӣ шуд
Созмони Паймони Амнияти Дастҷамъӣ (ОДКБ) аз Тоҷикистону Қирғизистон хостааст, ки фавран ба оташкушоӣ дар сарҳад хотима диҳанд. Ҳарду кишвар узви иттиҳоди низомии зери назари Русия ҳастанд.
Созмон шоми 27-уми январ дар эъломияе гуфт, "задухӯрдҳои мусаллаҳонае, ки дубора дар марз рӯй дод ва дар натиҷаи он захмиҳо ҳастанд, боиси нигаронии ҷиддӣ аст."
"Муқовимати мусаллаҳона дар марзи Тоҷикистону Қирғизистон бояд фавран бас карда шавад. Низоъ бояд танҳо дар сари мизи музокирот ва бо роҳи сулҳомез ҳал гардад. СПАД омодааст, ба Қирғизистону Тоҷикистон дар ҳалли низоъ ёрии зарурӣ расонад. Бовар дорам, ки роҳбарони ҳарду кишвари узви СПАД роҳҳои барои ҳар ду тараф муносиби ҳалли ин мушкили сангини сарҳадиро пайдо хоҳанд кард," – гуфт дабири кулли СПАД Станислав Зас рӯзи 27-уми январ.
Изҳороти Зас пас аз мулоқоти телефонияш бо дабирони Шӯрои амнияти Тоҷикистон ва Қирғизистон нашр шуд.
Як кушта ва чанд захмӣ
Дар пайи задухӯрди мусаллаҳона дар сарҳади Тоҷикистону Қирғизистон як сокини деҳаи Хоҷаи Аълои Исфара кушта шудааст.
Раиси маҳаллаи Хоҷаи Аълои ҷамоати Чоркӯҳ рӯзи 27-уми январ ба Радиои Озодӣ гуфт, Обидҷон Тӯйчиев 36 сол дошт. "Вай шахси низомӣ набуд, фарди оддӣ буд. Дар наздикии Шуъбаи корҳои дохилии Хоҷаи Аъло аз тири нерӯҳои Қирғизистон кушта шудааст," -- нақл кард ӯ.
Хабаргузории "Азия-Плюс" аз қавли манбааш навишт, ки ин сокини Хоҷаи Аъло "дар натиҷаи афтодани мушак (снаряд) ба хонааш ҷон бохт."
Зубайдулло Шомадов, сухангӯйи ҳукумати Исфара, кушта шудани Обидҷон Тӯйчиевро тасдиқ кард, аммо тафсилот надод.
Хабаргузории "Азия-Плюс" мегӯяд, то кунун 6 захмӣ аз ҷониби Тоҷикистон дар бемористони марказии Исфара бистарӣ карда шудаанд. Ду нафари онҳо низомӣ будаанд.