Пайвандҳои дастрасӣ

Хабари нав

Задухӯрд дар марз. Аҳмадзода: Оташбас эълон шуд. Жапаров: Бо гуфтушунид ҳал мекунем

  • Задухӯрди мусаллаҳона дар сарҳади Тоҷикистону Қирғизистон шоми 27-уми январ, пас аз он рӯй дод, ки мақомоти ду кишвар якдигарро ба роҳбандӣ гунаҳкор карданд. Дар муноқиша аз ҳарду ҷониб чандин нафар захмӣ шуда, аз тарафи Тоҷикистон дастикам як кас кушта шудааст. Ду тараф якдигарро ба тирборон ва кашондани техникаву нерӯ ба сарҳад гунаҳкор донистанд. СПАД хоҳони оташбаси фаврӣ шуд. Ду тараф ба қатъи тиркушоӣ созиш кардаанд.

Хадамоти марзбонии Қирғизистон рӯзи 28-уми январ тасдиқ кард, ки мақомоти Қирғизистону Тоҷикистон дар бораи оташбаси комил дар марз ба мувофиқа расиданд. Ба иттилои ин ниҳод, тасмим гирифта шудааст, "ҳарду ҷониб нерӯ ва техникаҳои изофиро аз марз берун баранд, шоҳроҳи Бодканд-Исфанаро пурра бикушоянд ва дар марз посбонии муштарак ташкил кунанд."

Содир Жапаров, раиси ҷумҳури Қирғизистон, дар паёме дар Фейсбук навишт, "вазъият дар сарҳад аз дақиқаҳои аввал пурра таҳти назорати ман аст. Худо хоҳад, ҳама чизро бо гуфтушунид ва бо роҳи осоишта ҳал мекунем. Нигарон набошед."

"Тоҷикистону Қирғизистон дар марз оташбас эълон карданд." Дар ин бора Раҷаббой Аҳмадзода, раиси вилояти Суғд, шаби 28-уми январ ба Радиои Озодӣ хабар дод.

Ӯ гуфт: "Музокироти мо бо раиси вилояти Бодканди Қирғизистон, Абдукарим Алимбоев, ба анҷом расид. Оташбас эълон гардид. Роҳҳо боз шуданд ва низомиён ба қафо кашида мешаванд. Комиссияи муштарак субҳи 28-уми январ таҳқиқро оғоз мекунад."

Нерӯҳои марзбонии Кумитаи давлатии амнияти миллии Тоҷикистон ҷониби Қирғизистонро ба сар кардани ҳамлаи мусаллаҳона дар сарҳад гунаҳкор карда, ҳамзамон талафот миёни сокинон ва марзбонҳои Тоҷикистонро тасдиқ намуд. Вале он шумораи муайянеро зикр накард.

Мақомот шаби 27-уми январ гуфтанд: "Айни замон аз ҷониби Ҷумҳурии Қирғизистон ба самти Ҷумҳурии Тоҷикистон ба сӯйи сокинони маҳаллӣ, воситаҳои нақлиёт ва иншооти гуногуни инфрасохторӣ тирборони шадид идома дорад. Дидбонгоҳои наздисарҳадӣ аз миномётҳо тирборон карда мешаванд."

Ёфтҳои бештар

Шарҳҳоро бинед (15)

Корбарони азиз! Ҳангоми навиштани шарҳ аз истифодаи таҳқиру тӯҳмат нисбат ба якдигар, намояндагони қавму миллатҳо ва динҳои гуногун худдорӣ кунед. Шарҳҳое, ки дорои туҳмату таҳқир, дашном ва иттилооти дурӯғанд ё гурӯҳеро таблиғ мекунанд, нашр карда намешаванд!
Ин баҳс баста шудааст.
XS
SM
MD
LG