Қирғизистон ба далели поин будани сатҳи об дар обанбори Токтогул ба воридоти нерӯи барқ аз Тоҷикистон оғоз кардааст.

Доскул Бекмурзоев, вазири энергетика ва саноати Қирғизистон, дар як нишасти хабарӣ гуфт, интиқоли барқ аз Тоҷикистон 30-юми сентябри имсол оғоз шуд. Мақомоти Тоҷикистон дар ин бора расман иттилоъ надодаанд.

"Ҳамкорони тоҷики мо муроҷиат карда, нерӯи барқи худро пешниҳод карданд. Интиқоли барқ ба минтақаҳои ҷанубӣ оғоз шуд. Дар як шабонарӯз як миллион киловат соат нерӯи барқ мегирем. Дар як моҳ аз 30 то 50 миллион киловат соат нерӯи барқ гирифтан мумкин аст", -- шарҳ додааст ӯ дар нишасти хабарӣ.

Сухани вазири энергетикаи Қирғизистон дар бораи Тоҷикистон дар дақиқаи 26-уми навор аст:

Бекмурзоев дар нишасти матбуотии 1-уми октябр гуфт, сухан дар бораи харидани нерӯи барқ меравад, вале аз ифшои арзиши он худдорӣ кард. Ҷониби Тоҷикистон то ҳол нагуфтааст, ки ба Қирғизистон чӣ миқдор нерӯи барқ медиҳад ва бо чӣ нарх.

Ҳамзамон Қирғизистон аз Қазоқистону Узбекистон ва Туркманистон нерӯи барқ мегирад. Муовини аввали раиси Девони вазирони Қирғизистон, Азиз Алиев, мегӯяд, Бишкек бо Русия низ дар бораи воридоти нерӯи барқ музокира дорад. Гап дар бораи таъмини 2-3 миллиард киловат соат нерӯи барқ меравад.

Қирғизистон ҳамасола тақрибан 15 миллиард киловат соат нерӯи барқ сарф мекунад.

Сардори Девони вазирони Қирғизистон, Улуғбек Марипов, ҳушдор дод, ки бидуни воридоти барқ ҳаҷми оби обанбори Токтогул ба "сатҳи бӯҳронӣ" мерасад. "Ҳадафи мо бо ворид кардани нерӯи барқ нигоҳ доштани ҳаҷми об аст", -- афзуд ӯ.

То 1-уми октябр дар обанбори Токтогули Қирғизистон назар ба соли гузашта 3 миллиард метри мукааб камтар об ҷамъ шудааст.

Тоҷикистон дар гузашта ба Қирғизистон барқ фурӯхтааст, вале соли гузашта барқро асосан ба Афғонистону Узбекистон додааст.

Интиқоли барқи Тоҷикистон ба Қирғизистон дар ҳолест, ки ду кишвар ним сол боз муносибати сард доранд. Душанбеву Бишкек якдигарро ба сар задани муноқишае дар марз гунаҳкор медонанд, ки аз ду тараф даҳҳо куштаву захмӣ ба ҷой гузошт.

Раиси ҷумҳури Чеченистон Рамазон Қодиров писари 20-солаашро иҷрокунандаи вазифаи муовини сарвазир таъйин кардааст. Ҳамзамон бо ин мансаб Аҳмад Қодиров мақоми вазири варзиши Чеченистонро ҳам ҳифз мекунад.

Ба гузориши "Кавказ.Реалии", Аҳмад Дудаев, вазири сиёсат, алоқаи беруна ва матбуот низ ба мақоми муовини сарвазир пешниҳод шудааст.

Рамазон Қодиров бо нашри хабари таъйини писараш ба мансаби нав дар Телеграм навишт, "тағйироти хурди кадрӣ гузарондем". Қодиров нагуфтааст, ки таъйини писараш ба мансаби болотар ба вазъи саломатии ӯ то куҷо рабт дорад. Дар остонаи соли нави мелодӣ расонаҳо гузориш доданд, ки Рамазон Қодиров дар яке аз беморхонаҳои шаҳри Маскав бистарӣ шудааст. Ин хабар расман тасдиқ нашуд.

Фарзандон ва наздикони Аҳмад Қодиров дар ҳукумати Чеченистон мансабҳои зиёд доранд. Хадича Қодирова, духтари Рамзан Қодиров дар 24-солагӣ муовини якуми раиси дастгоҳи ҳукумати Чеченистон таъйин гардид. Аҳмад Қодиров дар 18-солагӣ муовини вазири варзиш ва вазири кор бо ҷавонон шуд. Адам (Одам) Қодирови 18-сола, писари дигари Рамзан Қодиров, дабири Шӯрои амнияти Чеченистон аст. Ӯ ҳамчунин раёсати Хадамоти амнияти падарашро бар ӯҳда дорад.

Дар умум қариб 100 хешованди Рамазон Қодиров дар ҳукумати Чеченистон мансаб доранд.

Николас Мадуро, раиси ҷумҳури собиқи Венесуэла дар нахустин мурофиаи додгоҳиаш, ки шоми 5-уми январ баргузор шуд, иттиҳомоти нисбаташ эълоншударо рад кард ва гуфт, "ҳамоно раиси ҷумҳури кишвараш аст".

Мурофиа дар Додгоҳи федералии ноҳияи Манҳэттени Ню-Йорк, таҳти додрас Элвин Ҳеллерштейн доир шуд.

Мадуро, ки рӯзи 3-юми январ дар амалиёти неруҳои вижаи Амрико ҳамроҳи ҳамсараш дастгир ва ба ИМА интиқол ёфтанд, ба чор иттиҳом, аз ҷумла қочоқи маводи мухаддир муттаҳам аст.

Ба гузориши расонаҳои амрикоӣ, Мадуро бо дастбанд ба додгоҳ ҳозир шуд ва ба воситаи тарҷумон ба суолҳо посух дод. Президенти собиқи Венесуэла ва ҳамсараш иттиҳомҳои алайҳашон эълоншударо рад карда, худро бегуноҳ гуфтанд. Мадуро гуфт, то ҳол бо айбнома пурра шинос нашудааст.

Додгоҳ иҷозат дод, ки консули Венесуэла низ дар мурофиа ширкат кунад.

Дар назар аст, ки мурофиаи навбатӣ 17-уми март баргузор шавад. То он вақт Николас Мадуро ва ҳамсараш дар ҳабс хоҳанд буд. Пойгоҳи Bloomberg навиштааст, баррасии парванда дар додгоҳ шояд аввали соли 2027 оғоз шавад.

Милан Миланович, мутахассиси 63-солаи сербиягӣ, сармураббии дастаи "Хуҷанд"-и шаҳри Хуҷанд таъйин шуд. Ӯ дар ин вазифа Александр Крестинин, мутахассиси 47-солаи русиягиро, ки шартномааш бо бошгоҳи “Хуҷанд” моҳи декабри соли гузашта ба поён расид, иваз намуд.

Миланович хатмкардаи Донишгоҳи тарбияи ҷисмонии Белград буда, дорои муҷаввиз ё литсензияи UEFA PRO мебошад. Ӯ дар футболи ҳирфаӣ таҷрибаи ғанӣ дорад. Солҳои гуногун дастаҳояш дар мусобиқоти интихобии Лигаи қаҳрамонҳои УЕФА, Лигаи Аврупо ва Лигаи конференсияҳои УЕФА бозӣ кардаанд.

Дар мавсими 2013/2014 Миланович беҳтарин мураббии Суперлигаи Сербия эътироф шудааст.

Миланович солҳои мухталиф бошгоҳҳои футболи Сербия, Босния, Венгрия (Маҷористон), Ҷазираҳои Фарер, Арманистон, Молдова ва Қазоқистонро машқ додааст. Охирин ҷойи кори ӯ бошгоҳи футболи «Мезёкёвешд»-и Маҷористон дар соли 2024 буд.

Ба ғайр аз ин, бошгоҳи футболи «Ҳосилот»-и Фархор таъйин шудани сармураббии навро эълон намуд. Ин вазифа ба уҳдаи мутахассиси шинохтаи футболи тоҷик Шамсиддин Қосимови 33-сола гузошта шуд. Ӯ дар ин вазифа Зайниддин Раҳимов, мутахассии маъруфи 60-солаи тоҷикро, ки шартномааш бо бошгоҳи “Ҳосилот” охири мавсими гузашта ба охир расид, иваз кард.

Қосимов солҳои ахир сармураббии бошгоҳи Вазорати мудофиаи Тоҷикистон - КМВА (Клуби марказии варзишии артиш) – буд. Дар комёбии дастаи низомиён, ки соли 2025 барандаи медалҳои биринҷии мусобиқаи қаҳрамонии Тоҷикистон миёни дастаҳои лигаи олӣ гардид, саҳми Шамсиддин Қосимов калон аст.

Дар ҳамин ҳол қаҳрамони феълии Тоҷикистон – “Истиқлол”-и Душанбе – дар ҷустуҷӯи сармурабии нав мебошад. Ёдовар мешавем, дастпарвари футболи тоҷик Игор Черевченко, фарзанди бозигари маъруфи “Помир”-и Душанбе Геннадий Черевченко, аз вазифаи сармураббии дастаи “Истиқлол”-и Душанбе барканор шуд.

Мавсими нави футбол дар Тоҷикистон 6-уми март бо мусобиқаи дастаҳои лигаи олӣ оғоз меёбад. Дар ҳамин ҳол равзанаи гузариши футболбозон ҷараён дорад, ки то 5-уми март идома хоҳад кард. Дар ин муддат бошгоҳҳо метавонанд бозигарони навро ба қайд бигиранд.

Сайфиддин Одинаев, раиси ҷамъият ё диаспораи тоҷикон дар вилояти Перми Русия аз шаҳрвандии ин кишвар маҳрум ва вурудаш ба муддати 50 сол ба Русия манъ шудааст.

Хадамоти федералии амнияти Русия ё ФСБ дар вилояти Перм аз ихроҷи "як зодаи Осиёи Марказӣ" бо гумони "содир кардани амалҳое, ки ба амнияти Русия таҳдид мекунанд", хабар додааст.

Ин ниҳод дар бораи шахсияти нафари ихроҷшуда иттилои бештаре надодааст.

Бархе расонаҳои русӣ, аз ҷумла рӯзномаи "Коммерсант" навиштаанд, нафари ихроҷшуда Сайфиддин Одинаев, раиси ҷамъияти тоҷикони вилояти Перм ва зодаи Тоҷикистон аст. Назари Одинаев дар робита ба ин қазия маълум нест.

Ба навиштаи расонаҳои Русия, Сайфиддин Одинаев соли 2014 бо иттиҳоми “роҳзанӣ” 11 моҳ ҳабс шуда буд.

Ин бори аввал нест, ки роҳбари ҷамъияти тоҷикон дар Русия аз шаҳрвандӣ маҳрум ва аз ин кишвар ихроҷ мешаванд. Аз ин пеш Ҳокимшоҳ Таваров, раҳбари пешини диаспораи тоҷикон дар Округи мухтори Ямало-Ненетс ба се соли зиндон маҳкум шуда буд.

Ҳамчунин, Каромат Шарипов,роҳбари ҳаракати умумирусиягии "Муҳоҷирони меҳнатии тоҷик” ва Иззат Амон, раиси Маркази тоҷикон низ қаблан аз шаҳрвандии Русия маҳрум ва аз ин кишвар ихроҷ шуданд. Каромат Шарипов дар Тоҷикистон даргузашт ва Иззат Амон бо гуноҳи қаллобӣ ба 15 сол зиндон маҳкум шуд. Худаш ва наздиконаш иттиҳомро рад карданд.

Оҷонсии назорат дар соҳаи энергетика аз ошкор шудани боз як ҳолати дуздии барқ аз сӯйи корманди муассисаи тақсимоти барқ хабар додааст.

Ин ниҳод дар хабарномае навишт, як корманди идораи барқ дар ноҳияи Ҳамадонӣ аз зеристгоҳ то хонааш, ки дар наздикии иншоот ҷойгир будаас, хатти барқро пинҳонӣ кашида, бидуни пайвастшавӣ ба ҳисобкунак аз барқ истифода кардааст. Назари гумонбар ба дуздии барқ маълум нест.

Мақомот нисбати ин нафар санад тартиб додаанд, аммо маълум нест ӯро чӣ ҷазо додаанд.

Дар моҳҳои ахир ин ягона ҳолате нест, ки кормандони идораи барқ ба дуздии барқ муттаҳам мешаванд. Моҳи декабри соли гузашта ҳам як корманди идораи барқ дар минтақаи Кӯлоб ҳам ба дуздии барқ гумонбар шуда буд.

Мақомоти Тоҷикистон давоми як соли ахир мубориза бо дуздии барқро сахттар карданд. Аз ҷумла, ба Кодекси ҷиноӣ тағйирот ворид шуд, ки барои дуздӣ ё истифодаи ғайриқонунии нерӯи барқ аз 27 ҳазор сомонӣ ҷарима то 10 сол зиндонро пешбинӣ кардааст.

Фаромадани меғ (туман) -и сахт боиси қатъи муваққати парвозҳо дар фурудгоҳи Душанбе шудааст.

Бино ба маълумоти лавҳаи бархати фурудгоҳ, субҳи 6-уми январ шаш парвоз аз Русия ва Узбекистон ба таъхир афтода, як парвоз аз фурудгоҳи Домодедовои Маскав бекор шудааст.

Маълум нест, ки парвозҳои ба таъхир афтода кай барқарор мешаванд.

Пеш аз ин рӯзи 24-уми декабр ҳам дар пайи фаромадани туман парвозҳо ба фурудгоҳи Душанбе барои чанд соат қатъ шуда буд. Дар он рӯз ҳавопаймои раиси ҷумҳур Эмомалӣ Раҳмон ҳам, ки аз Маскав ба Душанбе меомад маҷбур шуд дар фурудгоҳи Хуҷанд фуруд ояд. Раиси ҷумҳур баъди пароканда шудани меғ ба пойтахт баргашт.

Ба ин тартиб, хабари марги Амонсаҳатов тасдиқ мешавад. Блогери 34-сола тавассути шабакаи TikTok вазъи иқтисодиву нархи баланди маҳсулоти озуқаро дар Туркманистон танқид мекард. Дидор Амонсаҳатов бо лақаби Hitrowski дар шабакаҳои иҷтимоӣ мавод нашр мекард ва поёни моҳи ноябри соли 2025 ногаҳон нопадид шуд. 18-уми декабр радиои “Азатлик” навишт, хабарҳое дастрас кардааст, ки Амонсаҳатовро ходимони амниятӣ боздошт карда, эҳтимолан то мурданаш шиканҷа кардаанд. Вале мақомот дар бораи будубоши ӯ ваё сабабҳои боздошташ аслан шарҳе надодаанд.

Як сокини Туркманистон дар суҳбат бо Радиои Озодӣ гуфтааст, вақте дар саҳифаи Hitrowski дар робита бо даргузашти блогер изҳори ҳамдардӣ кардааст, ӯро ба бозпурсӣ бурдаанд. Дар он ҷо як ходими амният ӯро таҳдид кардааст, ки сарнавишти ин блогер бояд барои ҳар як мунаққиди дигари ҳукумати Туркманистон дарс шавад.

Дар як изҳороти ахираш Hitrowski аз якбора афзудани нархи гӯшт танқид карда навишта буд, ки ин маҳсулот на барои ҳар як сокини Туркманистон дастрас аст. Мақомот дар Туркманистон мавзӯи нарху навои хӯрокворӣ, бекорӣ ё сатҳи пасти зиндагии мардумро ҳеҷ гоҳ матраҳ ё баррасӣ намекунанд. Созмонҳои ҳомии ҳуқуқи инсон Туркманистонро дар шумули бастатарин ва саркӯбгартарин давлатҳои ҷаҳон ёд мекунанд, ки озодиҳои сиёсию фардӣ ва матбуоти озодро таҳаммул намекунад.

Мақомоти Русия рӯзи 29-уми декабр иддао карда буданд, ки Украина ба қароргоҳи Путин дар Валдай талоши ҳамла кардааст.

Доналд Трамп рӯзи 4-уми январ дар суҳбат бо хабарнигорон гуфт, ки “ба чунин ҳамлае бовар надорад.” Ба гуфтаи ӯ, дуртар аз он макон чизе рух додааст, вале ҳеч ҳамлае ба қароргоҳ набудааст.

Ба ин суол, ки чаро ӯ пас аз суҳбат бо Путин ба ин ҳамла бовар карда буд, Трамп гуфт, “чун он замон касе чизе намдонист ва ӯ бори аввал шунида буд.”

Ӯ гуфт, пас аз тафтиш маълум шуд, ки чунин ҳамлае набудааст.

Талоши ҳамла ба қароргоҳи Путин дар Валдайро Сергей Лавров, вазири корҳои хориҷии Русия рӯзи 29-уми декабри соли гузашта эълон кард.

Мақомоти Русия гуфта буданд, ки бесарнишине, ки ба қароргоҳи Путин бояд ҳамла мекард, сарнагун кардаанд.

Владимир Зеленский, президенти Украина ин хабарро рад карда, онро дурӯғи навбатии Русия ба хотири ҷалби таваҷҷӯҳ унвон карда буд.

Неруҳои Русия шаби 4 ба 5-уми январ ба дармонгоҳи хусусие дар вилояти Киев бо паҳпод ҳамла карданд. Хадамоти ҳолатҳои фавқулодаи Украина гуфт, як марди 31-сола дар пайи ин ҳамла ҳалок шудааст.

Виталий Кличко, волии Киев аз захмӣ шудани чор каси дигар хабар дод. Ба гуфтаи ӯ, дар ин бемористон 26 кас табобат мегирифт, ки 16 нафарашон ба беморхонаи вилоятӣ интиқол дода шуданд.

Мақомоти вилояти Киев ҳамчунин гуфтанд, шаби гузашта ҳафт хонаи сокинон ва як баландошёна дар ҳамлаҳои неруҳои Русия осеб диданд. Дар вақти хомӯш кардани оташ аз дохили яке аз ин хонаҳо ҷасади марде пайдо шудааст.

Ба маълумоти неруҳои ҳавоии Украина, Русия шаби гузашта бо 9 мушаки “Искандар” ва 165 паҳпод ё ҳавопаймои бесарнишин ба шаҳрҳои Украина ҳамла кардааст. Низоми зиддиҳавоии Украина тавонистааст 137 паҳподро нобуд кунад.

Дар пайи амалиёти низомии Иёлоти Муттаҳида дар Венесуэла дастикам 40 нафар, аз ҷумла низомиён ва шаҳрвандони мулкӣ ҳалок шудаанд. Дар ин бора рӯзи New York Times бо такя ба мақомдорони баландпояи Венесуэла хабар додааст. Номи ин мансабдорон фош нашудааст.

Пештар президенти ИМА Доналд Трамп гуфта буд, дар амалиёти ин кишвар дар Венесуэла ягон сарбози амрикоӣ кушта нашудааст, танҳо чанд кас захмӣ шуданд.

New York Times менависад, амалиёти низомиёни амрикоӣ як соату 20 дақиқа давом кард. Ба гуфтаи манобеи ин нашрия, Николас Мадуро бо кумаки манбаъҳои Хадамоти иктишофии Амрико ё СРУ дар ҳукумати Венесуэла боздошт шуд. Ин афрод маконҳои будубоши Мадуроро дар рӯзҳои ахир назорат мекарданд.

Рӯзи шанбеи 3-юми январ неруҳои вижаи Амрико раиси ҷумҳури ҳамакнун собиқи Венесуэла Николас Мадуро ва ҳамсарашро дар шаҳри Каракас боздошт ва ба ИМА интиқол доданд. Мадуро дар аёлати Ню-Йорк ба қочоқи маводи мухаддир муттаҳам аст. Қарор аст аввалин мурофиа 5-уми январ баргузор шавад.

Мақомоти интизомии Тоҷикистон номи мардеро эълон карданд, ки ба қатли бераҳмонаи ҳамсари собиқ ва модари ду фарзанди худ муттаҳам мешавад.

Вазорати корҳои дохилии Тоҷикистон дар як барномаи телевизионии худ хабар дод, ки Наврӯзи Зафар ба он муттаҳам мешавад, ки дар заминаи хусумат ва рашк ҳамсари собиқи 27-солаи худро дар хонаи худи зан ва дар пеши чашми модараш 11 корд зада куштааст. Ба гуфтаи вазорат, ҳодиса рӯзи 16-уми декабр рух додааст.

Дар ин барномаи телевизионӣ гуфта мешавад: “Наврӯзи Зафар ҳамсари собиқи худро дашномҳои қабеҳ дода ва бо ин қонеъ нашуда бо бераҳмии махсус ба узвҳои ҳаётии зан 11 корд мезанад, ки ӯ дар натиҷа дар ҷойи ҳодиса ҷон додааст.” Назари худи муттаҳам ба ҷиноят ва ё вакили дифои ӯ ҳанӯз маълум нест. Ин ҷуфт як ҳафта пеш аз ҳодиса аз ҳам ҷудо шудаанд.

Ба қавли мақомот, Наврӯзи Зафар пас аз қатли ҳамсари собиқаш аз ҷойи ҷиноят фирор кардааст, вале ӯро баъди чанде дар қаламрави ноҳия дастгир кардаанд. Додситонии ноҳияи Мӯъминобод ба таҳқиқи парвандаи ин сокини 29-солаи деҳаи Ғеш идома медиҳад. Барои одамкушӣ бо бераҳмии хос дар Тоҷикистон на камтар аз 15 соли зиндон таъйин карда шудааст.

Дар Тоҷикистон омори алоҳидае дар бораи занкушӣ нест. Ҷустуҷӯи кӯтоҳи Радиои Озодӣ фақат дар вебсайти Вазорати корҳои дохилӣ нишон дод, ки соли 2024 ва дар даҳ моҳи соли 2025 зиёда аз даҳ мавриди занкушӣ сабт шудааст. Ин танҳо мавридҳоест, ки вазорат дар бораи онҳо расман хабар дода, парвандаи ҷиноӣ боз кардааст. Дар баёнияҳо гуфта шудааст, ки занони тоҷикро ё шавҳаронашон, ё мардони хешованд ва ё ҳамсарони собиқашон куштаанд.

Мақомоти интизомии Русия гуфтаанд, ки ихроҷи муҳоҷирони корӣ ва ё дар умум хориҷиён аз хоки ин кишвар дар соли 2025 тақрибан 25 ҳазор нафар камтар шудааст.

Хабаргузории русии “Интерфакс” бо такя ба иттилои додгоҳҳои Русия навиштааст: “Дар 11 моҳи соли 2025 аз қаламрави Русия 54.4 ҳазор хориҷӣ ва афроди бидуни шаҳрвандиро берун рондаанд, вале ин рақам дар 11 моҳи соли 2024-ум 79 000 нафарро ташкил медод.

Ба навиштаи “Интерфакс” фармони раиси ҷумҳури Русия барои тамдид кардани мӯҳлати қонунӣ кардани ҳузури хориҷиён, ки 10-уми сентябр ба поён расид, сабаби коҳиши ихроҷ ва ё депортатсияи муҳоҷирон шудааст. Дар Русия бино ба оморҳои гуногун тақрибан як миллион нафар аз аҳолии Тоҷикистон кору иқомат мекунанд.

Соли 2024 ба гуфтаи мақомоти расмӣ беш аз 30 ҳазор муҳоҷири тоҷикро аз Русия ихроҷ карданд. Гузориш дар бораи рондани муҳоҷирони тоҷик, беҳуқуқӣ ва бадрафтории маъмурони интизомии Русия бо онҳо тақрибан ҳар рӯз дар расонаҳои русӣ нашр мешаванд.

Дар Тоҷикистон сар аз имсол ҳар касе, ки барои “ҳалли мушкил” ба фолбин, ҷодугар ё соҳире муроҷиат мекунад, агар ба дасти мақомоти интизомӣ афтад, бештар аз 4500 сомонӣ ва ё тақрибанн 500 доллар ҷарима мешавад.

Матбуоти давлатии Тоҷикистон Қонун дар бораи ворид намудани илова ба Кодекси ҳуқуқвайронкунии маъмуриро нашр кард, ки раиси ҷумҳур Эмомалӣ Раҳмон, онро рӯзи 17-уми декабр ба имзо расонд. Ҳар қонун дар Тоҷикистон пас аз нашр дар расонаҳои давлатӣ ҳукми иҷро мегирад.

Дар ин санад омадааст: “Барои истифода аз хизматрасонии сеҳрдон, ҷодугар ва фолбин, ба андозаи аз панҷоҳ то шаст нишондиҳанда барои ҳисобҳо ҷарима таъин карда мешавад.” Як нишондиҳанда барои ҳисобҳо имсол 75 сомонӣ таъйин шудааст ва ҳар сол метавонад тағйир ёбад.

Маҳмадалӣ Ватанзода, узви Маҷлиси миллӣ ҳангоми баррасии ин қонун дар палатаи болоии порлумон гуфтааст ҳадаф аз қабули ин қонун "пешгирии густариши мафкураи ифротӣ ва болоравии хурофотпарастӣ" аст.

Мақомоти Тоҷикистон борҳо ба сокинон ҳушдор додаанд, ки аз рафтан ба назди фолбин ва ҷодугарҳо худдорӣ кунанд. Соли 2024 дар Тоҷикистон барои фолбинӣ ва соҳирӣ ҷазо таъйин шуда буд. Аз он замон то кунун гунаҳкоронро барои машғул шудан ба фолбинӣ ва ҷодугарӣ ҷаримаҳои бузург мебастанд ва ё аз 10 то 15 шабонарӯз паси панҷара ва ё ҳабси маъмурӣ мекарданд.

Дар сурати такрори қонуншиканӣ, ё фолбинӣ мумкин аст, гунаҳкорро то 2 сол ба зиндон маҳкум кунанд. Мақомоти интизомии Тоҷикистон як соли ахир пайваста аз боздошти фолбинону ҷодугарон ва ҷазо додани онҳо гузориш медиҳанд, ҳарчанд пайвандони бархе аз ин боздоштшудаҳо гуфтанд, хешовандонашон ҷодугар ё фолбин набуданд, балки танҳо дуохонӣ мекарданд.

Ба гуфтаи вазорати корҳои дохилӣ, дар нимаи аввали соли равон "495 ҳолати машғул шудан ба сеҳру ҷоду ва фолбинӣ" сабт шудааст. Раёсати корҳои дохилии Душанбе мегӯяд, имсол танҳо дар пойтахти кишвар 90 кас барои фолбинӣ ва ҷодугарӣ ҷазо гирифтанд.

Фатҳулло Абдуллоев ҳунарманди тоҷик маъруф бо тахаллуси саҳнавии Коно дар сини 67-солагӣ даргузашт.

Нарзулло Абдуллоев, бародари Фатҳулло Абдуллоев 4-уми январ дар як суҳбати кутоҳ ба Радиои Озодӣ гуфт, ки марҳум аз ду рӯз қабл аз зиёрати Ҳаҷ баргашта буд.

"Дар вақти зиёрати ҳаҷ бемор шуда дар шифохона бистарӣ шуданд. Дар он ҷо дар рагҳои дилашон найча (стент) гузоштанд ва ба ҳуш омаданд ва ду рӯз пеш ба ватан баргашта буданд", гуфт ӯ.

Фатҳулло Абдуллоев нахуст дар театрҳои "Ҷавонон", "Аҳорун" ва баъдан дар гуруҳи ҳаҷвии "Хандинкамон" фаъолият дошт.

Ӯ дар чандин филмҳо аз ҷумла "Хобҳои апрелӣ", "Ишқи ман –инқилоб", "Биҳишт фақат барои мурдагон", "Дарди ишқ" ва телеспектакли "Мактаби куҳна" нақш офаридааст.

Дар Тоҷикистон ӯро бештар бо нақшофариниаш дар саҳнаҳои ҳаҷвӣ бо тахаллуси Коно мешиносанд.

Муҳсин Муҳаммадиев, собиқ ҳамлагари маъруфи дастаи "Помир"-и Душанбе ва сармураббии пешини тими миллии футболи Тоҷикистонро дар оромгоҳи Лучоби пойтахт ба хок супориданд. Маросими видоъ бо Муҳаммадиев 3-юми январ дар масҷиди марказии Душанбе баргузор шуд.

Муҳсин Муҳаммадиев рӯзи 1-уми январ пас аз бемории вазнин дар синни 60-солагӣ дар шаҳри Маскави Русия аз олам даргузашт.

Ӯ дар оғози мавсими футболи соли 2025 ҳангоми сафар ба Туркия ба сактаи мағзӣ дучор шуд ва давоми қариб як соли ахир дар яке аз бемористони Маскав табобат мегирифт.

Муҳсин Муҳаммадиев, ки 21-уми октябри соли 1966 дар шаҳри Душанбе таваллуд шудааст, ҳамлагари моҳир буд ва ҳаводоронашро бо ҳунари воло мафтун мекард.

Дар бораи корномаи Муҳсин Муҳаммадиев дар инҷо бештар бихонед: