Заминларзаи ҳафтаи гузашта дар ноҳияи Тоҷикобод 4 мактабро пурра хароб кардааст. Дар ин бора Маҳмадюсуф Имомзода, вазири маориф рӯзи 16-уми июл хабар дод. Имомзода гуфт, ин 4 мактаб дар ноҳияи Тоҷикобод ҳастанд ва бояд аз нав сохта шаванд.
"Мушкил он аст, ки деҳаҳое, ки мактабашон аз байн рафтааст, имкони ба дигар минтақа рафта дарс хондан надоранд. Барои ҳамин моро лозим аст, ки дар кӯтоҳтарин муҳлат ин мактабҳоро созем. 4 мактаби дигар таъмирталаб ҳастанд, ки то 1-уми сентябр онҳоро таъмир мекунем. Мактабҳои вайроншударо дар кутоҳтарин муддат сохта медиҳем",-афзуд вазири маориф.
Заминларзаи сахт дар минтақаи Рашт рӯзи 10-уми июл рух ва боиси харобии даҳҳо манзил ва ҳалокати 5 нафар шуд. Чор нафар аз қурбониён наврасон мебошанд, ки онҳоро аз ҷойи хобашон ёфтаанд. Ҳамчунин 16 нафар дар пайи ин ҳодиса маҷруҳ шудаанд.
Намояндагони Идораи ҳолатҳои фавқулода дар ноҳияи Тоҷикобод гуфтанд, ки ба мардуми осебдида аз заминларза маводи зарурӣ дастрас карданд, аммо сокинон онро нокофӣ мехонанд. Баъзе аз зарардидаҳо шикоят доранд, ки феълан зери хаймаҳо ҳастанд ва ҳанӯз намедонанд, манзилҳои вайроншудаашонро чӣ гуна аз нав месозанд.
