Пайвандҳои дастрасӣ

Хабари нав

Дар чанд ҷумла

Тоҷикистон барои поин овардани нархи парвозҳои чартерӣ ба Русия ду рӯз муҳлат додааст

Икром Субҳонзода

Оҷонси авиатсияи шаҳрвандии Тоҷикистон ба 4 ширкати ҳавопаймоии Русия, ки парвозҳои чартерӣ анҷом медиҳанд, барои поин овардани нархи билет ду рӯз муҳлат додааст.

Икром Субҳонзода, раиси Оҷонсӣ, рӯзи 22-юми апрел дар суҳбат бо хабаргузории "Азия-Плюс" гуфтааст, ин талабро дар ҷаласае вижа бо намояндагони ширкатҳои "Уралские авиалинии", UTair, "Сибирь" ва "Северный ветер" дар миён гузошт.

Ба қавли ӯ, санҷиш маълум кардааст, ки "ҳатто нархи ибтидоии парвозҳои чартерии ширкатҳои русӣ, ки аз 10 ҳазор сомонӣ оғоз меёбад, беасос баланд буда, қимати он тавассути миёнравҳо боз ҳам бештар шудааст".

"Аҳолии мо барои харидани билети гарон аз бонкҳо қарз мегиранд ва ин вазъияти молиявии бе ин ҳам душвори онҳоро душвортар мекунад. Илова ба ин, дар расонаҳо сару садо ва норозигии шаҳрвандони кишвар нисбат ба баланд будани нархи билет бениҳоят зиёд мешавад", -- гуфтааст Субҳонзода.

Вай дар суҳбат бо "Азия-Плюс" афзудааст, "ширкатҳои ҳавопаймоиро зарур аст, ба ҷойи баланд кардани нархи билет теъдоди парвози ҳавопаймоҳоро зиёд кунанд. Дар ин самт, Агентии авиатсияи гражданӣ омодааст, ҷиҳати иҷозати саривақтии парвозҳо дар асоси қарорҳои дахлдори Ситоди ҷумҳуриявӣ чораҳои дахлдор андешад."

Тамосҳои батакрори мо ба Икром Субҳонзода барои посух гирифтан ба чанд суоли дигар то ин дам бенатиҷа буд.

Бо вуҷуди оғози парвозҳои мунтазам миёни Тоҷикистону Русия парвозҳои чартерӣ ҳанӯз амал мекунанд. Мақомот мегӯянд, ба сабаби кам будани парвозҳои мунтазам, ки дар ҳафтае ду бор дар назар аст, парвозҳои чартерӣ мондаанд.

Русия моҳи марти соли гузашта бо ҳадафи пешгирӣ аз густариши коронавирус марзи худро баст. Ин вазъ боис шуд, ки даҳҳо ҳазор шаҳрванди Тоҷикистон аз сафар ба ин кишвари муҳоҷирпазир маҳрум шуда, даромади хонаводаҳо низ кам гардад. Тибқи иттилои Вазорати меҳнату муҳоҷират, дар соли 2020 тақрибан 130 ҳазор кас аз Тоҷикистон ба муҳоҷират рафтаанд ва ин рақам дар муқоиса ба соле аз он пеш 76 дарсад камтар аст.

Мувофиқи маълумоти Бонки Миллии Тоҷикистон, мизони пулҳои фиристодаи шахсони воқеӣ аз хориҷа ба кишвар дар соли 2020 6,3 дарсад кам шудааст. Ба маълумоти Бонки Марказии Русия, муҳоҷирон соли гузашта ба Тоҷикистон 1 миллиарду 741 миллион доллар фиристодаанд ва ин рақам дар муқоиса ба соли қаблӣ 759 миллион доллар камтар аст.

Ҳамаи хабарҳои имрӯзро дар инҷо бихонед

Эҳтимол Қазоқистон қарордоди иҷораи киштияшро ба ширкати русӣ бекор кунад

Вазири саноат ва рушди зербиноии Қазоқистон Кайрбек Ускенбоев 5-уми июл баъди ҷаласаи ҳукумат гуфт, эҳтимол Нурсултон қардодро бо ширкати русие бекор кунад, ки киштии "Жибек Жолӣ"-ро ба иҷора гирифтааст.

"Агар киштӣ ба фаъолиятҳое машғул шавад, ки хилофи қонунҳои Қазоқистон ва байнулмилалӣ мебошад, шартнома бекор ва киштӣ бозпас гирифта мешавад", - изҳор доштааст Ускенбоев.

Рӯзи 3-юми июл маълум шуд, як киштии борбари Русия бо гандуми рабудашудаи Украина дар Туркия боздошт шудааст.

Сафири Украина дар Туркия Василий Боднар гуфт, ҷониби Киев барои рӯшан кардани вазъ бо мақомоти гумруки Туркия ҳамкорӣ мекунад.

Киштии "Жибек Жолй" бо парчами Русия дар Туркия қарор дорад. Он ба як ширкати қазоқӣ тааллуқ дорад ва иддао мешавад, ки дар фурӯши гандум як ширкати эстонӣ ва туркӣ даст доранд.

Пештар Украина аз Туркия хоста буд, киштии марбут ба соҳибкори қазоқро, ки бо парчами Русия аз бандари баҳри "Азов" берун шудааст, боз дорад.

Русия маҳдудиятҳои вобаста ба COVID-ро дар марз бекор мекунад

Русия аз 15-уми июл маҳдудиятҳои воридшавӣ ба он кишварро, ки моҳи марти соли 2020 дар пайванд ба коронавируси нав ҷорӣ шуда буд, бекор мекунад.

Маҳдудиятҳои вуруд ба Русия аз тариқи роҳҳои баҳрӣ ва ҳавоӣ аз 14-уми июн бекор шуда буд ва ҳоло шаҳрвандони хориҷӣ имкон пайдо мекунанд, ки тавассути роҳҳои заминӣ низ ба Русия раванд.

Мусофирон, ба ҷуз аз шаҳрвандони Беларус, ҳангоми вуруд ба Русия бояд санҷиши коронавирус супоранд.

Роспотребнадзор 1-уми июл маҳдудиятҳои марбут ба коронавирусро, аз ҷумла пӯшидани ниқоб, манъи хӯрокхӯрии шабона ва чорабиниҳои оммавиро бекор карда буд.

Дар Роспотребнадзор гуфтанд, ки маҳдудиятҳо дар пайи коҳиши шумори мубталоёни коронавирус гирифта шудааст

Дар робита ба бетартибиҳо дар Қароқалпоқистон парванда кушоданд

Додситонии кулли Узбекистон дар робита ба бетартибиҳои оммавӣ дар шаҳри Нуқуси он кишвар бо банди "Маслиҳат бо мақсади ғасби қудрат ё сарнагун кардани сохти конститутсионии кишвар" парванда боз кардааст, ки аз 10 то 20 сол зиндонро пешбинӣ мекунад.

Аброр Маматов, як масъули Додситонии кулли Узбекистон, 4-уми июл дар нишасти хабарие гуфт, парвандаро гурӯҳи тафтишотӣ, ки ба ҳайати он намояндагони Хадамоти амнияти давлатӣ, Додситонии кул, Вазорати корҳои дохилӣ ва Горди миллӣ шомиланд, тафтиш мекунад.

"Тафтишот ва корҳои оперативӣ-ҷустуҷӯӣ тибқи муқаррароти қонунгузорӣ анҷом шуда, барои таъмини волоияти қонун ва ногузирии ҷазо тамоми чораҳо андешида мешаванд", - афзудааст Маматов.

Бетартибиҳо дар Қароқалпоқистон баъди он баргузор шуд, ки мақомоти Узбекистон рӯзи 26-уми июн тарҳи нави Конститутсияро ба баррасии умум гузоштанд.

Бар асоси он, “мустақилӣ”-и Ҷумҳурии мухтор аз байн рафтааст. Дертар ва баъди тазоҳуроти хунин порлумони Узбекистон гуфт, мақоми мухтори Қароқалпоқистон нигоҳ дошта хоҳад шуд.

Ҳамла ба мошини сарбозони Толибон дар Ҳирот

Акс аз бойгонӣ

Дар натиҷаи тирандозӣ ба як мошини сарбозони Толибон дар шаҳри Ҳироти Афғонистон ду нафар кушта ва даҳҳо сарбози дигар захмӣ шудаанд.

Як мақоми шифохонаи Ҳирот ба Радиои Озодӣ гуфт, дар тирандозӣ 20 Толиб ҷароҳат бардоштааст.

Дар мошин сарбозони воҳиди низомии “Ал-Форуқ”-и Вазорати дифои Толибон нишаста будаанд.

Як мақоми ин гуруҳи тундрав ба Радиои Озодӣ гуфт, ҳамларо ду марди рикшасавор анҷом додаанд ва яке аз онҳо дар маҳалли ҳодиса кушта шуда, дигарӣ фирор кардааст.

Ҳеч касе масъулияти ҳамларо бар дӯш нагирифтааст.

Зеленский қавл дод, ки Луганскро пас мегиранд

Владимир Зеленский

Баъд аз ишғоли шаҳри Лисичанск дар шарқи Украина, Владимир Путин, раиси ҷумҳури Русия, ба нерӯҳои кишвараш амр додааст, ки ҳамлаҳоро дар ин қисмати Украина идома диҳанд.

Бо ишғоли Лисичанск, нерӯҳои Русия тамоми қаламрави вилояти Луганскро тасарруф карданд.

Владимир Путин рӯзи 4-уми июл гуфт, “нерӯҳои Русия бояд иҷрои вазифаҳояшонро бар асоси барномаи қаблан тасдиқшуда идома диҳанд” ва дар минтақаи Донбас онгуна ки дар Луганск иттифоқ афтод, пешравӣ кунанд.

Нерӯҳои Украина рӯзи 3-юми июл аз шаҳри бомбабороншудаи Луганск ақибнишинӣ карданд, вале раиси ҷумҳур Владимир Зеленский қавл дод, ки сарбозони кишвараш дигарбора ин вилоятро пас мегиранд.

Дигар ин ки дар як нишасти байнулмилалӣ дар Женева мақомоти Украина гуфтанд, барои барқарор кардани кишвари харобшудаашон 750 миллиард доллар зарур аст. Онҳо гуфтанд, қисми зиёди ин пулро метавон аз ҳисоби пули мусодирашудаи шахсони сарватманди Русия ба даст овард, ки аз 300 то 500 миллиард долларро ташкил медиҳад.

Дар Қирғизистон истеъфои вазири корҳои дохилиро талаб карданд

Тазоҳурот дар Бишкек

Як гуруҳ аз сокинони Қирғизистон рӯзи 5-уми июл дар назди бинои Вазорати корҳои дохилии он кишвар дар Бишкек бо талаби қатъи хушунат нисбат ба духтарон ва бонувон гирдиҳамоӣ карданд.

Эътирозгарон, ки дар миёни онҳо ҳомиёни ҳуқуқ ва фаъолони маданӣ низ ҳастанд, ҳамзамон истеъфои вазири корҳои дохилии Қирғизистонро хостанд.

Ҳамоиши эътирозӣ дар пайи нашри хабари гумонбар шудани ду корманди пулис ба таҷовузи як духтари 13-сола баргузор шуд.

Ба иттилои Кумитаи омори Қирғизистон, соли гузашта дар он кишвар 3034 мавриди хушунат нисбат ба кӯдакон сабт шудааст.

Парвандаи як вакилро дар Суғд ба додгоҳ фиристоданд

Оҷонси мубориза бо фасод дар Тоҷикистон таҳқиқи парвандаи як вакили дифоъро аз вилояти Суғд, ки ба қаллобӣ муттаҳам мешавад, барои баррасӣ ба додгоҳ фиристодааст.

Оҷонсӣ рӯзи 4-уми июл дар баёнияи расмӣ гуфт, Баҳром Маъруфов аз як сокини вилоят барои беэътибор кардани ақди никоҳи ӯ бо ҳамсараш 4 ҳазор сомонӣ гирифтааст ва ӯро ҳангоми гирифтани ин пул боздошт кардаанд.

Назари Баҳром Маъруфов маълум нест ва дигар инки адвокатҳо барои ҳимоят аз ҳаққи касе дар додгоҳ бар асоси қонун пул мегиранд.

Шикоят аз фишор ба адвокатҳо дар Тоҷикистон зиёд аст ва созмонҳои ҳомии ҳуқуқ борҳо аз ҳукумати Тоҷикистон хостаанд, ин корро бас кунад.

Дар роҳи Душанбе – Бадахшон нақб сохтаанд. ВИДЕО

Сохтмони нақб дар роҳи Душанбе - Хоруғ

Дар як гӯшаи хатарноку осебпазири роҳи Душанбе-Бадахшон нақби 356-метрӣ сохтаанд.

Ин қитъаи роҳ дар ҳудуди ноҳияи Дарвоз ҷойгир аст ва ҳар сол зери об монда, равуо имконнопазир мешавад.

Роҳсозон мегӯянд, нақбро то охири имсол мавриди баҳрабардорӣ қарор хоҳанд дод.

Вадуд Қурбонов, яке аз онҳо охири моҳи июни имсол ва дар суҳбат ба Радиои Озодӣ гуфт, "сохмтони туннели Ширговад барои соли гузашта оғоз шуд ва ҳоло дар арафаи анҷомёбист."

Видеоро инҷо бинед:

Дар Тоҷикистон нақби нав сохтанд
лутфан мунтазир бошед
Embed

Феълан кор намекунад

0:00 0:01:15 0:00

Роҳи мошингард тавассути Ширговадро дар соли 1961 бунёд кардаанд. Аз инҷо то маркази Дарвоз 23 километр роҳ аст. Ҳар тобистон ва дар фасли гармо маҷрои дарёи Панҷ баланд ва равуо дар ин қитъа мушкил мешавад.

Рӯзҳои 8 ва 9-уми июли соли 2017 борони зиёд ва сел дар ҳудуди деҳаҳои Хостав ва Ширговади ноҳияи Дарвоз тақрибан як километр роҳи Душанбе – Бадахшонро баст. Сокинон як муддат бо пайроҳаҳои хавфноки кӯҳӣ равуо карданд.

Сохтмони нақб дар роҳи Душанбе - Хоруғ
Сохтмони нақб дар роҳи Душанбе - Хоруғ

Зиёни офатҳои табиӣ дар Хатлон 725 ҳазор сомонӣ ҳисоб шуд

Мақомоти Хатлон зарари ҳодисаҳои табииро дар ин вилоят дар шаш моҳи охир беш аз 725 ҳазор сомонӣ ҳисоб кардаанд.

Ҷамшед Холиқзода, як масъули Идораи ҳолатҳои фавқулода дар Хатлон, ба Радиои Озодӣ гуфт, сел рӯзи 4-уми май танҳо дар ноҳияи Ҷайҳун 300 метр роҳи байнулмилалиро вайрон кард.

Ҳамчунин, ба гуфтаи ӯ, сел рӯзи 20-уми июн дар ноҳияи Хуросон се хонаро пурра вайрон кард ва хатҳои обгузару дастгоҳҳои обкашониро хароб намуд.

Ба иттилои масъулони Идораи ҳолатҳои фавқулодаи Хатлон, "офатҳои табиӣ имсол дар вилоят талафоти ҷонӣ дар пай надоштанд".

Рустам Саидаҳмадзодаро ба ду моҳ ҳабси пешакӣ гирифтаанд

Рустам Саидаҳмадзода

Пайвандонаш гуфтанд, мақомот Рустам Саидаҳмадзода, додраси Додгоҳи ноҳияи Бобоҷон Ғафуровро ба ду моҳ ҳабси пешакӣ гирифтаанд. Ӯ 29-уми июн дар Душанбе дастгир шуд.

Мурофиа рӯзи 1-уми июл дар боздоштгоҳи муваққатии Раёсати корҳои дохилии Душанбе гузаштааст.

Яке аз наздкиони Саидаҳмадзода рӯзи 4-уми июл гуфт, ӯ барои "баромадан аз ҳадди ваколатҳои мансабӣ" ва "расондани хабари бардурӯғ" гумонбар аст, аммо худро гунаҳкор намедонад.

Мақомот парвандаи ӯро шарҳ надодаанд ва ҷузъиёти айби ӯ ҳам маълум нест.

Номи Рустам Саидаҳмадзода дар сомонаи расмии Додгоҳи ноҳияи Бобоҷон Ғафуров истодааст. Фармони раисиҷумҳур дар бораи барканории ӯ содир нашуда.

Саидаҳмадзода соли 2017 додраси Додгоҳи ноҳияи Бобоҷон Ғафуров таъин шуд. Пеш аз он дар Додгоҳи ноҳияи Шаҳристон кор мекард.

Рустам Саидаҳмадзода соле пеш ва баъди онки як сокини вилояти Суғдро дар муҳокима бегуноҳ эълон кард, дар сархати расонаҳо қарор гирифт. Дар Тоҷикистон, ки мақомот додгоҳҳоро озоду мустақил мешуморанд, аммо созмонҳои байнулмилалӣ пойбанди ҳукумат медонанд, "ҳукми сафед" хеле кам содир мешавад.

Он замон Коллегияи тахассусии Додгоҳи олии Тоҷикистон Саидаҳмадзодаро ба вайрон кардани интизоми корӣ гунаҳкор донист. Кумисюни байнулмилалии ҳуқуқшиносон ё ICJ баръакс аз мақомот хост, фишорро ба додрасҳо бас кунанд.

Дар Тоҷикистон беш аз чаҳорсад додрас фаъоланд. Дар даҳ соли охир тақрибан сӣ нафари онҳо ба иттиҳоми "кирдоре, ки шаъну эътибори судяро паст мезанад", аз мансаб рондаву дастгир ва ба зиндон маҳкум шудаанд. Мақомот ошкоро намегӯянд, ки додрасҳо чӣ гуноҳ кардаанд, аммо баъзе аз манобеъ қазияи онҳоро бештар ба ришваситонӣ пайванд медиҳанд.

Ба даҳҳо қазоқистонӣ иҷозат намедиҳанд, Қароқалпоқистонро тарк кунанд

Ҳудуди 80 шаҳрванди Қазоқистон рӯзи севум аст, ки наметавонанд марзи Узбекистонро гузашта, Қароқалпоқистонро тарк кунанд.

"Вазъ таҳти назорати махсуси дипломатҳои мо дар Узбекистон қарор дошта, гуфтугӯҳо бо кишвари ҳамсоя идома доранд. Мо тамоми кӯшишро мекунем, то мушкил зудтар ҳал шавад. Қазоқистониҳо дар як рӯз се вақт бо хӯрок таъмин карда мешаванд", - гуфт намояндаи расмии Вазорати корҳои хориҷии Қазоқистон Айбек Смадияров.

Ба гуфтаи вай, дар сарҳад тақрибан 80 шаҳрванди Қазоқистон ҳузур дорнад, вале баъзе аз онҳо дубора ба шаҳри Нуқус, пойтахти Қароқалпоқистон, баргаштанд.

Тазоҳурот дар Қароқалпоқистон баъди он баргузор шуд, ки мақомоти Узбекистон рӯзи 26-уми июн тарҳи нави Конститутсияро ба баррасии умум гузоштанд. Бар асоси он, “мустақилӣ”-и Ҷумҳурии мухтор аз байн рафтааст. Дертар ва баъди тазоҳуроти хунин порлумони Узбекистон гуфт, мақоми мухтори Қароқалпоқистон нигоҳ дошта хоҳад шуд.

Ҷумҳурии мухтори Қароқалпоқистон дар ҳудуди Узбекистон тақрибан ду миллион аҳолӣ дорад ва чиҳил дарсади қаламрави ин кишвари Осиёи Марказиро ташкил медиҳад.

Қароқалпоқистониҳои муқими Алматоро ба бозпурсӣ даъват мекунанд

Нооромиҳо дар Қароқалпоқистони Узбекистон.

Сокинони Қароқалпоқистон, ки дар шаҳри Алматои Қазоқистон кору зиндагӣ мекунанд, барои бозпурсӣ ба мақомоти ҳифзи ҳуқуқ даъват шудаанд.

Корманди Бюрои ҳомии ҳуқуқи Алмато Андрей Гришин 4 июл гуфт, фаъолони қароқалпоқистонӣ нишасти хабариеро, ки бояд дар шаҳр баргузор мекарданд, ба таъхир гузоштанд. Ба гуфтаи Гришин, 4 созмондиҳандаи ин нишастро ба бозпурсӣ даъват карданд.

"Имрӯз ба ман аз Департаменти пулиси Алмато занг зада, ба бозпурсӣ даъват карданд. Ман аз онҳо пурсидам, ки чӣ мехоҳанд, ман ягон қонунро поймол накардаам ва ҳоло намедонам, ки меравам ё не. Онҳо гуфтанд, ки тавони иҷборан ҳозир кардан ба бозпурсиро доранд. Ин даъват баъди изҳоротҳои ман дар робита ба Қароқалпоқистон сурат гирифт", - изҳор дошт як зодаи Қароқалпоқистон, ки дар Алмато аст.

Ба гуфтаи ҳамсуҳбати бахши қазоқии Радиои Озодӣ, кормандони пулиси Алмато гуфтаанд, ки ӯро дар робита ба банди панҷи Конститутсияи Узбекистон даъват мекунад.

Сарони Осиёи Миёна дар Қирғизистон ҷамъ мешаванд

Акс аз бойгонӣ.

Мулоқоти навбатии сарони кишварҳои Осиёи Миёна 21-уми июл дар Қирғизистон баргузор хоҳад шуд.

Ба иттилои дафтари матбуотии президенти Қирғизистон, раисҷумҳур Содир Ҷабборов 4-уми июл дар як суҳбати телефонӣ бо ҳамтои узбекаш Шавкат Мирзиёев масъалаҳои марбут ба омодагиҳо ба нишаст ва рӯзномаи онро баррасӣ кардааст.

Манбаъ афзудааст, "тамоми раҳбарони кишварҳои Осиёи Марказӣ аллакай даъватро пазируфтанд".

Мусобиқаи ғайриодии Дилрабо ва ҳамтақдиронаш дар Душанбе

Сабқати шахсони маълул дар Душанбе

Дар як мусобиқаи ғайриодӣ дар Душанбе рӯзи 4-уми июл шахсони маъюб ё имконияташон маҳдуд байни ҳам қувва озмуданд.

Дилрабо Эрматова, маъюби гуруҳи дуюм, дар дастхобонӣ миёни духтарон пирӯз шуд. Ӯ мегӯяд, баргузории чунин маъракаҳо барояшон нерӯ мебахшад.

Тақрибан сад ҳамтақдири Дилрабо дар баробари дастхобонӣ дар мусобиқаи баскетбол бо аробача ва бадминтон низ нерӯи худро санҷиданд.

Ғайрат Тухтасунов, мураббии баскетбол бо аробаи маъюбӣ, аз он изҳори ташвиш кард, ки бо вуҷуди талошҳои зиёд шахсони маълул мушкилҳои ҳалношудаи зиёде доранд.

Ӯ мегӯяд, шаш сол пеш гурӯҳеро таъсис дод, ки бо ароба баскетбол мебозанд, вале ба сабаби набудани ёрии кофӣ дар ҳоли аз байн рафтан аст.

"Ҳоло ба ароба ниёз дорем. Варзишгарон барои тамрин ва мусобиқаҳо аз он истифода мекунанд. Агар онҳо хоҳанд, ки оянда ин навъи варзиш рушд кунад, ба мо кумак кунанд, вагарна аз байн меравад," -- афзуд ҳамсуҳбати мо.

Ҳар сол ҳаштуми июл рӯзи шахсони маълул таҷлил карда мешавад. Ин қишри ҷомеа умед доранд, ки бо баҳонаи ҷашн масъулон ба мушкили онҳо расидагӣ ва ё ҳадди ақал таваҷҷуҳ хоҳанд кард.

Дар Тоҷикистон беш аз 150 ҳазор нафар ҳамчун маъюб ё шахсони дорои имкониятҳои маҳдуд сабт шудаанд. Зиёда аз 27 ҳазори онҳо то 18-сола ҳастанд.

Баъзе аз маъюбон мегӯянд, бо шароиту нафақае, ки ҳоло доранд, зиндагӣ кардан душвор аст. Мақомот мегӯянд, онҳо аз имтиёзҳое чун ҳаракати ройгон дар нақлиёти иҷтимоӣ, пардохти нисфи пули телефони хонагӣ баҳравар буда, андози заминро ҳам намедиҳанд, вале маъюбон онро нокофӣ медонанд.

Суҳбати Раҳмон ва Мирзиёев дар бораи Қарақалпоқистон. ВИДЕО

Эмомалӣ Раҳмон ва Шавкат Мирзиёев. Акс аз бойгонӣ

Раиси ҷумҳури Тоҷикистон дар пайванд ба ҳодисаи Қарақалпоқистон, ки даҳҳо куштаву захмӣ барҷой гузошт, ибрози назар кардааст.

Эмомалӣ Раҳмон рӯзи 4-уми июл дар суҳбати телефонӣ бо президенти Узбекистон, Шавкат Мирзиёев, гуфтааст, "аз талошҳои роҳбарияти Узбекистон барои ба эътидол овардани вазъ дар Қарақалпоқистон" ҷонибдорӣ мекунад.

Дафтари матбуоти президенти Тоҷикистон мегӯяд, тарафҳо "амнияти минтақаӣ ва ҳамкории ду кишварро дар чаҳорчӯби созмонҳои байнулмилалӣ" низ баррасӣ карданд. Тафсилоти суҳбат маълум нест.

Мақомоти Узбекистон мегӯянд, дар ҷараёни нооромиҳои 1 ва 2-юми июл дар Ҷумҳурии мухтори Қарақалпоқистон 18 кас кушта, беш аз 243 нафар захмӣ ва зиёда аз 500 тан дастгир шуданд.

Мардум мегӯянд, ба зидди ислоҳи Конститутсияи Узбекистон, ки мустақилии онҳоро аз байн мебурд, тазоҳурот карданд. Мақомот онро ғайриқонунӣ ва кӯшиши ғасби идораҳои давлатӣ номиданд. Тарҳи нави Конститутсияи Узбекистон 26-уми июн ба баррасии умум гузошта шуд.

Иттиҳоди Аврупо дар изҳороте рӯзи 4-уми июл хост, тазоҳуроти олуда ба хушунат дар Қарақалпоқистон мустақилона таҳқиқ шавад. Дар изҳорот аз "ҳамаи ҷонибҳо" хостаанд, ки хештандорӣ нишон дода, аз хушунатҳо дар оянда пешгирӣ кунанд.

Иттиҳоди Аврупо аз мақомоти Узбекистон даъват кардааст, тибқи масъулиятҳои байнулмилалии худ риояи ҳуқуқи одамон ва бахусус ҳуқуқи бунёдӣ ба озодии баёну гирдиҳамоиро замонат бидиҳанд.

Дар Қарақалпоқистон чӣ гузашт? Инҷо бинед:

18 кушта ва 243 захмӣ дар Қароқалпоқистон
лутфан мунтазир бошед

Феълан кор намекунад

0:00 0:01:37 0:00

Ҷумҳурии мухтори Қарақалпоқистон дар ҳудуди Узбекистон тақрибан ду миллион аҳолӣ дорад ва чиҳил дарсади қаламрави ин кишвари Осиёи Марказиро ташкил медиҳад.

Ҷанги Русия дар Украина ба Донетск "кӯчид"

Словянск

Баъд аз як рӯзи ишғоли шаҳри Лисичанск ва тамоми вилояти Луганск дар Украина, нерӯҳои Русия ҳамла ба Словянск – шаҳри муҳим дар вилояти Донетскро идома доданд.

Вадия Лях, шаҳрдори Словянск, дар Фейсбук навишт, ки шаҳр зери мушакборон қарор гирифтааст ва дар натиҷа камаш 6 нафар кушта ва 15 тани дигар маҷруҳ шудаанд.

Дар байни кушташудагон як кӯдак низ будааст.

Русия ишғоли шаҳри Словянскро, ки қабл аз ҷанг 107 ҳазор нафар аҳолӣ дошт, бисёр муҳим мешуморад, чун онро ҷудоиталабони таҳти ҳимояти Русия соли 2014 ишғол карданд, вале се моҳ пас украиниҳо онро дигарбора гирифтанд.

Русия баъди нокомӣ дар ишғоли Киев ба тассаруфи минтақаи саноатии Донетск дар шарқи Украина тамаркуз кардааст.

Иттиҳоди Аврупо хост, ҳодисаи Қароқалпоқистон таҳқиқ шавад

Шаҳри Нуқус, Қароқалпоқистон

Иттиҳоди Аврупо дар изҳороте рӯзи 4-уми июл хост, тазоҳуроти олуда ба хушунат дар Қароқалпоқистон, Ҷумҳурии мухтор дар Узбекистон, мустақилона таҳқиқу арзёбӣ шавад.

Мақомоти Узбекистон мегӯянд, дар ҷараёни нооромиҳои 1 ва 2-юми июл дар ин ҷумҳурии мухтор 18 кас кушта, беш аз 243 нафар захмӣ ва зиёда аз 500 тан дастгир шуданд.

Мардум мегӯянд, ба зидди ислоҳи Конститутсияи Узбекистон, ки мустақилии онҳоро аз байн мебурд, тазоҳурот карданд. Мақомот онро ғайриқонунӣ ва кӯшиши ғасби идораҳои давлатӣ номиданд.

Дар изҳороти Иттиҳоди Аврупо аз талафоти ҷонӣ дар ҳодисаи Қароқалпоқистон ибрози таассуф шудааст. “Мо таҳаввулотро бодиққат пайгирӣ мекунем," – гуфтаанд дар изҳорот.

Иттиҳоди Аврупо аз “ҳамаи ҷонибҳо” хостааст, хештандорӣ нишон диҳанд ва аз хушунатҳо дар оянда пешгирӣ кунанд.

“Иттиҳоди Аврупо аз мақомот даъват мекунад, ҳуқуқи инсон, аз ҷумла ҳуқуқи бунёдӣ ба озодии баён ва озодии гирдиҳамоиро тибқи масъулиятҳои байнулмилалии Узбекистон кафолат бидиҳанд,” – омадааст дар изҳорот.

Тазоҳурот дар Қароқалпоқистон баъди он баргузор шуд, ки мақомоти Узбекистон рӯзи 26-уми июн тарҳи нави Конститутсияро ба баррасии умум гузоштанд. Бар асоси он, “мустақилӣ”-и Ҷумҳурии мухтор аз байн рафтааст. Дертар ва баъди тазоҳуроти хунин порлумони Узбекистон гуфт, мақоми мухтори Қароқалпоқистон нигоҳ дошта хоҳад шуд.

Ҷумҳурии мухтори Қароқалпоқистон дар ҳудуди Узбекистон тақрибан ду миллион аҳолӣ дорад ва чиҳил дарсади қаламрави ин кишвари Осиёи Марказиро ташкил медиҳад.

Қазоқистон иҷозат намедиҳад, қароқалпоқистониҳо ба ватан баргарданд

Сарҳади Қазоқистону Узбекистон

Шаҳрвандони Қароқалпоқистон, ки 3-юми июл хостаанд, аз вилояти Мангистауи Қазоқистон ба ватани худ раванд, гуфтанд, пулис аз онҳо дар назди марз талаб кардааст, дубора ба маҳалли зисташон баргарданд.

Пештар хабар дода шуд, ки беш аз 100 шаҳрванди Қароқалпоқистон натавонистанд аз ноҳияи Бейнеуи Мангистау ба ватан баргарданд.

"Шаби якшанбе кормандони пулиси Бейнеу моро дар роҳ боз дошта, гуфтанд, ки ба маҳалли зисти худ баргардед, марз ҳоло боз намешавад", - изҳор дошт як сокини Қароқалпоқистон ба шарти ифшо нашудани номаш.

Ба гуфтаи вай, маъмурони пулис ҳамчунин аз онҳое, ки дар назди марз барои баргаштан ба Қароқалпоқистон ҷамъ шуда буданд, хостанд, пароканда шаванд.

"Барои кор ба Қазоқистон омадаам. Падару модарам дар Нуқус зиндагӣ мекунанд. Ҳоло марз бастааст ва майли кор кардан ҳам дигар нест. Намедонем, чӣ кор кунем. Дар бораи он чи ки дар Қароқалпоқистон мегузарад, ба ҷаҳониён хабар диҳед", - изҳор дошт як ҳамсуҳбати Радиои Озодӣ. ​

Тазоҳуроти бемуҳлат бо талаби пайвастан ба Иттиҳоди Аврупо дар Гурҷистон

Гурҷистон

Даҳҳо ҳазор сокини минтақаҳои гуногуни Гурҷистон баъди ба поён расидани муҳлати иҷрои шартҳои гузошташуда ба мақомот дубора дар назди бинои порлумони он кишвар дар шаҳри Тифлис (Тбилиси) ҷамъ шуданд.

Бар асоси шартҳои гузошташуда, бояд сарвазири Гурҷистон Ираклий Гарибашвилӣ то рӯзи якшанбе аз мақомаш истеъфо медод. Ҳамчунин ӯ ва ҳизби ҳокими "Орзуи гурҷӣ" ризояти худро ба таъсиси "ҳукумати фаннӣ"-и эътимоди мардумӣ барои иҷрои дувоздаҳ шарти Иттиҳоди Аврупо баён мекарданд.

Тазоҳургарон гуфтанд, то истеъфои ҳукумати Гарибашвилӣ дар хиёбонҳо мемонанд. Тазоҳурот ба таври осоишта ҷараён дошта, дар он сурудҳои гурҷӣ ва украинӣ садо медиҳанд.

Қаблан дар Брюссел гуфта буданд, Гурҷистон чанд шартро иҷро накардааст ва бинобар ин, ба монанди Украина ва Молдова мақоми номзади узвият дар Иттиҳоди Аврупоро дарёфт нахоҳад кард.

Дар Қирғизистон сарбозе аз захми тир ҷон додааст

Вазорати дифои Қирғизистон хабар додааст, ки 4-уми июл як сарбози қисми низомии №73809-и ин ниҳод ба ҳалокат расидааст.

Бино ба фарзияи вазорат, сарбози қаторӣ, соли таваллудаш 2000-ум, "ҳангоми адои вазифаи посбонӣ дар натиҷаи беэҳтиётӣ бо силоҳ аз тири тасодуфӣ захмӣ шуда, дар маҳалли ҳодиса ҷон бохтааст".

Барои муайян кардани сабабҳои ҳодиса комиссия ташкил шуда, парвандаро Додситонии низомии Қирғизистон тафтиш мекунад.

Наздикони сарбоз дар суҳбат бо расонаи "Kaktus.media" гуфтаанд, мақомот ҳалокати фарзанди онҳоро то ҳол шарҳ надодаанд.

"Сарбоз шаби 3 ба 4-уми июл бо модараш суҳбати телефонӣ карда ва баъди ду соат ин ҳодиса рух додааст. Ҳангоми шиносии ҷасад дар бадани ӯ захми ду тирро дидаанд. Касе бовар надорад, ки ӯ аз тири тасодуфӣ кушта шудааст", - изҳор доштааст холаи сарбоз Индира Рисалиева дар суҳбат ба бахши қирғизии Радиои Озодӣ.

Боздошти муҳоҷирони ҳамраъй бо тазоҳургарони Қароқалпоқистон

Қазоқистон

Даҳҳо нафар дар шаҳри Атирауи Қазоқистон рӯзи 1-уми июл ва дар пайи як тазоҳуроти худҷӯш боздошт шудаанд. Пулиси Атирау хабар дод, ки бештари боздоштшудаҳо пас аз бозпурсӣ раҳо шуданд.

Бино ба иттилои расонаҳои маҳаллӣ, муҳоҷирон аз Ҷумҳурии худмухтори Қароқалпоқистони Узбекистон ба нишони ҳамраъйӣ бо ҳамватанони норозии худ дар Атирау тазоҳурот баргузор кардаанд.

"Дар майдони шаҳр ҳудуди 75 кас ҷамъ шуд. Онҳо гирдиҳамоии ғайриқонунӣ ташкил карданд. Бештари онҳоро раҳо кардем ва бархеи дигар мунтазири ҳукми додгоҳ ҳастанд", - иттилоъ додааст пулиси Атирау.

Манбаъ афзудааст, ки дар миёни боздоштшудаҳо шаҳрвандони кишварҳои хориҷии дигар низ ҳаст.

Сокинони Қароқалпоқистон ба зидди тағйиру иловаҳо ба Конститутсияи Узбекистон эътироз карданд, ки рӯзи 26-уми июн барои баррасӣ ба муҳокимаи умум пешниҳод шуд.

Дар тағйиру ислоҳот дар тарҳи нави Қонуни асосии Узбекистон дар банди мақоми Қароқалпоқистон калимаи "мустақил"- ро бардоштаанд ва дар он ишорае ба ҳаққи ҷудо шудани ин ҷумҳурии мухтор аз қаламрави Узбекистон нест. Дертар порлумони Узбекистон гуфт, мухторияти Қароқалпоқистон дар Қонуни асосӣ ҳифз хоҳад шуд.

40 кишвар нақшаи бозсозии Украинаро баррасӣ мекунанд

Ҳайатҳои дастикам 40 кишвар, созмонҳои байнулмилалӣ ва соҳибкорон дар конфронсе, ки рӯзи душанбе дар Луганои Швейтсария оғоз шуд, роҳҳои асосии бозсозии баъдиҷангии Украинаро баррасӣ хоҳанд кард.

Ба иттилои хабаргузории "Франс пресс", конфронс танҳо ба ҷамъоварии ёриҳо бахшида нахоҳад шуд. Иштирокдорон роҳҳои асосии бозсозии Украинаро, ки бояд пеш аз хатми ҷанг оғоз шавад, ҷустуҷӯ мекунанд. Сухан аз "нақшаи Маршал"-барномаи ҳамсони барқарорсозии Аврупо баъд аз Ҷанги ҷаҳонии дувум меравад.

Украинаро дар конфронс раиси ҳукумат ва вазири умури хориҷии он кишвар -- Денис Шмихал ва Дмитрий Кулеба намояндагӣ мекунанд.

Президенти Украина Владимир Зеленский дар ҳамоиш онлайнӣ иштирок хоҳад кард. Раиси Комиссияи Аврупо Урсула фон дер Лайен ҳам дар конфронс иштирок мекунад.

Ба гуфтаи манобеи "Франс Пресс", Бонки аврупоии таҷдид ва рушд ният дорад, барои сармоягузории бозсозии Украина як фонди нав таъсис диҳад. Он метавонад аз аъзои Иттиҳоди Аврупо ва кишварҳои дигари ҷаҳон тақрибан 100 миллиард евро ҷамъ намояд.

"Мустақилӣ"-и Қароқалпоқистон дар Конститутсияи Узбекистон мемонад

Тазоҳурот дар Қароқалпоқистон

Порлумони Узбекистон тасмим гирифтааст, ки мақоми "мухтор"-и Ҷумҳурии Қароқалпоқистон дар тарҳи Конститутсияи ин кишвар ҳифз карда шавад. Ин тасмим рӯзи 4-уми июл ва дар пайи эътирози сокинони Қароқалпоқистон гирифта шуд.

"Президенти Узбекистон Шавкат Мирзиёев дар вохӯрӣ бо вакилони порлумон ва намояндагони ҷомеаи шаҳрвандӣ зикр кард, ки ҳамаи пешниҳодҳо бояд ба инобат гирифта шаванд", - омадааст дар иттилоияи порлумони Узбекистон.

Сокинони Қароқалпоқистон ба зидди тағйиру иловаҳо ба Конститутсияи Узбекистон эътироз карданд. Матни ислоҳҳо рӯзи 26-уми июн барои баррасӣ ба муҳокимаи умум гузошта шуд. Дар банди вобаста ба мақоми Қароқалпоқистон калимаи "мустақил"-ро бардоштаанд ва дар он ишорае ба ҳаққи ҷудо шудани ин ҷумҳурии мухтор аз қаламрави Узбекистон нест.

Раисиҷумҳури Узбекистон рӯзи 2-юми июл гуфт, ислоҳи панҷ моддаи Конститутсияи Узбекистон, ки ба истиқлоли Қароқалпоқистон пайванд дорад ва боиси норозигии мардум шудааст, "бетағйир гузошта шавад".

Ҷумҳурии Қароқалпоқистон 40 дар сади қаламрави Узбекистонро ташкил медиҳад ва аҳолиаш тақрибан 2 миллион нафар аст. Забони расмии он қароқалпоқӣ ва узбекӣ аст. Дар солҳои аввали Шӯравии собиқ Вилояти Мухтори Қароқалпоқистон вуҷуд дошт, ки соли 1936 ба қаламрави Узбекистон ҳамроҳ карда шуд.

Дар оғози солҳои 90-ум, баъди пошхӯрии Шӯравӣ, Шӯрои Олии Қароқалпоқистон Эъломияи истиқлол қабул кард ва соли 1993 аҳдномаи байнидавлатӣ дар бораи ба қаламрави Узбекистон ворид шудани Қароқалпоқистон имзо шуд. Маҳз дар ҳамин аҳднома ҳаққи берун шудани Қароқалпоқистон аз ҳайати Узбекистон зикр шудааст ва айни чиз дар Конститутсияи Узбекистон низ ҳаст.

Фоиза Ҳошимӣ ба “таблиғот алайҳи низом” муттаҳам шуд

Фоиза Ҳошимӣ

Дар Эрон духтари раиси ҷумҳури собиқ Акбар Ҳошими Рафсанҷониро ба “фаъолияти таблиғотӣ алайҳи низом” ва “тавҳин ба муқаддасот” муттаҳам карданд.

Додситонии Теҳрон рӯзи 3-юми июл гуфт, амри боздошти Фоиза Ҳошимӣ, вакили собиқи 59-сола ва ҳомии ҳуқуқро содир кардаанд, вале ҳоло маълум нест, ки ӯ дастгир шудааст ё не.

Иттиҳомот ба зидди ӯ зоҳиран аз баёнияаш зимни гуфтугӯ дар шабакаҳои иҷтимоӣ бармехезад, ки гуфтааст, “ҳазфи номи Сипоҳи Посдорони Инқилоби Исломии Эрон аз феҳрасти таҳримоти Амрико бар манофеи миллӣ ва ҷомеаи Эрон нест.”

Ин талаби Эрон яке аз монеаҳои аслӣ дар эҳёи созиши атомии соли 2015 бо Эрон аст.

Бино ба гузоришҳо, Фоиза Ҳошимӣ ҳамчунин гуфтааст, Ҳазрати Муҳаммад пайғамбари ислом худаш фаъолияти иқтисодӣ надошт ва дар иваз сарвати ҳамсараш Хадичаро сарф кардааст. Ӯ баъдан гуфтааст, бо ин гапаш қасди тавҳин ба касе надошт ва фақат як шӯхӣ кардааст.

Фоиза Ҳошимӣ соли 2012 бо иттиҳоми “таблиғот ба зидди низом” ба ним соли зиндон маҳкум шудааст. Падари ӯ Акбар Ҳошими Рафсанҷонӣ аз соли 1989 то соли 1997 раиси ҷумҳури Эрон буд ва соли 2017 даргузашт.

навшуда

18 кушта ва 243 захмӣ дар Қароқалпоқистон. ИА хост, мустақилона таҳқиқ кунанд. ВИДЕО

Додситонии кулли Узбекистон рӯзи 4-уми июл гуфт, дар нооромиҳо дар шаҳри Нуқуси Ҷумҳурии мухтори Қароқалпоқистон 243 нафар, аз ҷумла 38 корманди мақомоти ҳифзи ҳуқуқ захмӣ шуда, 18 кас ба ҳалокат расидааст.

Як рӯз пеш раисиҷумҳури Узбекистон дар бораи талафот дар миёни мардуму низомиён хабар дода, аммо рақамеро ба забон наовард. Сомонаи "Дарё" дар Узбекистон рӯзи якшанбе аз қавли як "мансабдори вазорат" навишт, ки "беш аз 1000 эътирозгар захмӣ шудааст."

Мардум мегӯянд, ба зидди ислоҳи Конститутсияи Узбекистон, ки мустақилии онҳоро аз байн мебурд, тазоҳурот карданд. Мақомот онро ғайриқонунӣ ва кӯшиши ғасби идораҳои давлатӣ номиданд.

Расонаҳои Узбекистон рӯзи душанбе бо такя ба сардори хадамоти иттилооти Горди миллии он кишвар, Даврон Ҷумъаназаров, хабар доданд, ки дар ҷараёни бетартибиҳои мазкур 516 кас дастгир шуд. Нисбат ба баъзе онҳо тафтишот идома дошта, иддае ба ҷавобгарии маъмурӣ кашида шудаанд.

Ҳамчунин 58 нафарро барои риоя накардани қуюди шабгардӣ дар шаҳри Нуқус боздошт кардаанд.

"Дар натиҷаи бертартибиҳои оммавии рӯзҳои 1 ва 2-юми июл 243 нафар бо захмҳои гуногун ба бемористон муроҷиат карданд. Дар ҳоли ҳозир 94 нафар дар беморхона бистарӣ буда, вазъи бархеашон, аз ҷумла кормандони ҳифзи ҳуқуқ, вазнин аст. Барои намуна, як фармондеҳи Горди миллии Қароқалпоқистон се захми тир бардоштааст ва пойи як фармондеҳи дигар шикастааст," - иттилоъ дод Ҷумъаназаров.

Иттиҳоди Аврупо рӯзи 4-уми июл хост, тазоҳуроти олуда ба хушунат дар Қароқалпоқистон мустақилона таҳқиқу арзёбӣ шавад. Дар изҳорот аз талафоти ҷонӣ ибрози таассуф шуда, аз “ҳамаи ҷонибҳо” хоста шудааст, хештандорӣ нишон диҳанд ва аз хушунатҳо дар оянда пешгирӣ кунанд.

"Иттиҳоди Аврупо аз мақомот даъват мекунад, ҳуқуқи инсон, аз ҷумла ҳуқуқи бунёдӣ ба озодии баён ва озодии гирдиҳамоиро тибқи масъулиятҳои байнулмилалии Узбекистон кафолат бидиҳанд," – омадааст дар изҳорот.

Наворро дар инҷо бинед:

18 кушта ва 243 захмӣ дар Қароқалпоқистон
лутфан мунтазир бошед

Феълан кор намекунад

0:00 0:01:37 0:00

Тазоҳурот дар Қароқалпоқистон баъди он баргузор шуд, ки мақомоти Узбекистон рӯзи 26-уми июн тарҳи нави Конститутсияро ба баррасии умум гузоштанд. Бар асоси он, “мустақилӣ”-и Ҷумҳурии мухтор аз байн рафтааст. Дертар ва баъди тазоҳуроти хунин порлумони Узбекистон гуфт, мақоми мухтори Қароқалпоқистон нигоҳ дошта хоҳад шуд.

Ҷумҳурии мухтори Қароқалпоқистон дар ҳудуди Узбекистон тақрибан ду миллион аҳолӣ дорад ва чиҳил дарсади қаламрави ин кишвари Осиёи Марказиро ташкил медиҳад.

Феълан дар Қароқалпоқистон, як ҷумҳурии мухтор дар ҳудуди Узбекистон вазъи фавқулода ҷорӣ шудааст ва то 2-юми августи имсол идома хоҳад кард.

Ёфтҳои бештар

XS
SM
MD
LG