Миллиардер Бидзина Иванишвилӣ, раиси ҳизби ҳокими “Орзуи Гурҷистон” аз мақомаш канор рафт ва гуфт, ки фаъолияти сиёсиро ҳам қатъ мекунад. Дар изҳороти 11-уми январаш сарватмандтарин шаҳрванди Гурҷистон гуфт, ки фаъолияти сиёсии худро хотима медиҳад, чун, ба гуфтааш, баъди дар интихоботи моҳи октябр пирӯз шудани “Орзуи Гурҷистон” ӯ бо ҳамин “рисолаташро анҷом дод”. Ӯ гуфт, як далели дигари канор рафтанаш аз сиёсат ин аст, ки дар чанд ҳафтаи дигар 65-сола мешавад. Шохиси миллиардерҳои Bloomberg мегӯяд, Иванишвилӣ 5,7 миллиард доллар сарват дорад, ки дар солҳои 1990-ум аз ҳисоби истеҳсоли маъдани оҳан, пӯлод, бонкдориву хонафурӯшӣ ба даст омадааст. Дар солҳои 2003 то 2006 ӯ аксар дороиҳои худро ба фурӯш дод ва боқӣ пулҳояшро ба фаъолиятҳои сиёсиву интихобот, дарёфти курсии нахуствазирӣ дар соли 2012 ва таъсиси ҳизбаш сарф кард. Ӯ соли 2013 ҳам гуфта буд, ки сиёсатро тарк мекунад, вале соли 2018 боз раҳбарии “Орзуи Гурҷистон”-ро ба ӯҳда гирифт. Истеъфои ӯ метавонад боиси коҳиши таниш дар сиёсати Гурҷистон шавад. Иванишвилиро дар он муттаҳам мекунанд, ки чун як шахси наздик ба Кремл пинҳонӣ ҳамоно дар фаъолиятҳои сиёсӣ иштирок мекунад, вале худи ӯ ин иттиҳомро рад кардааст.
Миллиардери гурҷӣ Иванишвилӣ аз раҳбарии ҳизби ҳоким ва сиёсат канор рафт
