Пайвандҳои дастрасӣ

Хабари нав

Хабарҳо

Трамп мавзӯи карантини Пенсро ба худи ӯ ҳавола кард

Майк Пенс, муовини президенти ИМА

Президенти ИМА Доналд Трамп нахост ба саволҳо дар бораи ин ки то куҷо баъди мусбат баромадани озмоишҳои коронавируси аъзои тими муовини президенти ИМА худи Майк Пенс ҳам аз ширкат дар маъракаи таблиғотии интихоботӣ канор меравад, посух надод. Трамп, ки худ дар шаҳри Мэн бо таблиғи номзадиаш банд аст, рӯзи 25-уми октябр ишора кард, ки тасмим бо худи Пенс аст. Пенс инчунин раҳбарии гурӯҳи тасмимгирандаи ҳукуматӣ дар масоили коронавирусро ба ӯҳда дорад ва баъди ба коронавирус гирифтор шудани раиси ситоди ӯву дигар зертобеонаш интизор мерафт, ки ӯ ҳам ба карантин меравад. Ин дар ҳолест, ки як ҳафта пеш аз интихоботи ИМА, Майк Пенс ҳам нақшаву барномаҳои бисёр зиёди интихоботӣ ва сафарҳо дорад. Худи ӯ ҳам номзадиашро ба мақоми муовини президент гузоштааст. Кохи Сафед иддао кард, ки натиҷаҳои тести коронавирус Пенс манфӣ аст ва бо сабаби бисёр муҳим будани салоҳиятҳои ӯ дар ин шабурӯз шарт нест, ки ӯ дар карантини барои дигарҳо ҳатмии 14-рӯза бинишинад.

Ин тасмими Кохи Сафед интиқодҳои Ҷо Байден, номзади демократҳо дар интихоботи президентро ба бор овард.

Ҳамаи хабарҳои имрӯзро дар инҷо бихонед

Исроил ба сохтмони шаҳракҳо дар Каронаи Ғарбӣ оғоз кард

Акс аз бойгонӣ

Исроил ба сохтмони шаҳракҳои нав дар минтақаи ишғолии Каронаи Ғарбӣ оғоз кардааст. Телавив дар назар дорад, дар ин шаҳракҳо беш аз 1300 хона бунёд кунад. Иёлоти Муттаҳида ба хотири сохтмони шаҳракҳои яҳудинишин ибрози нигаронӣ кардааст. Каронаи Ғарбӣ дар ҷанги шашрӯза дар соли 1967 ишғол шудааст. Интизор меравад, дар чанд рӯзи оянда як кумитаи давлатии Исроил дар мавриди пешниҳодҳо барои сохтмони 3000 хонаи дигар баҳс кунад.

Ҳамсари Нозанин Зоғарӣ дар маркази Лондон гуруснанишинӣ кард

Ричард Ратклифф бо духтараш, Габриэлла Ратклифф

Ричард Ратклифф, шавҳари Нозанин Зоғарӣ-Ратклифф, зани бритониёии эрониасл, даст ба гуруснанишинӣ задааст. Зоғарӣ то соли 2020 дар Эрон зиндонӣ буд ва ҳоло ӯро ба як соли дигар ҳабс маҳкум кардаанд.

Ричард Ратклифф рӯзи 24-уми октябр дар назди Вазорати корҳои хориҷии Бритониё, дар маркази Лондон, гуруснанишинӣ кард.

Созмони Афви Байнулмилал мегӯяд, Ричард Ратклифф қасд дорад, Борис Ҷонсон, сарвазири ин кишварро зери фишор қарор диҳад, то барои озодии ҳамсараш ва шаҳрвандони дигар аз зиндонҳои Эрон чора андешад.

Нозанин Зоғарӣ бори аввал, моҳи апрели соли 2016, замоне ки қасд дошт, пас аз мулоқот бо хонаводааш дар Эрон ба Бритониё баргардад, дар фурудгоҳи Теҳрон дастгир шуд. Ӯро бо гуноҳи тавтеаи сарнагунии режими Эрон ба панҷ сол ҳабс маҳкум карданд. Зоғарӣ ин иттиҳомро рад кардааст.

Ҳоло ӯро ба "таблиғи зидди низом" ҳангоми иштирок дар тазоҳуроти соли 2009 дар назди сафорати Эрон дар Лондон ба як сол ҳабс маҳкум кардаанд.

HRW ҳамлаҳои ДОИШ-ро ба зидди ҳазораҳо “ҷиноят алайҳи башарият” донист

Оромгоҳи ҳазораҳое, ки дар ҳамлаҳои ДОИШ қурбон шудаанд

Созмони Дидбони Ҳуқуқи Башар (Human Rights Watch), қароргоҳаш дар Ню-Йорк, ҳамлаҳои гуруҳи тундрави "Давлати исломӣ"-ро ба зидди ҳазораҳо (ақаллияти шиа) дар Афғонистон ба “ҷинояти зидди башарият” баробар донист.

Шохаи “Хуросон”-и ДОИШ масъулияти чанд ҳамла, аз ҷумла бомбгузориҳои маргталабонаро дар масҷиди ҳазораҳо (шиаҳо) дар Кундуз ва Қандаҳор ба уҳда гирифтааст. Дар ин ҳамлаҳо дар як моҳи охир тақрибан 150 нафар кушта ва даҳҳо каси дигар захмӣ шуданд.

Гуруҳи тундрав рӯзи 29-уми августи имсол дар фурудгоҳи Кобул бомбгузории маргталабонаро низ анҷом дод, ки дар он 170 афғон, аксаран ғайринизомиён, кушта шуданд.

Патрисия Госсман, ёвари мудири бахши Осиё дар Дидбони Ҳуқуқи Башар, 25-уми октябр дар изҳороте гуфт: "Ин гуруҳ борҳо ҳамлаҳои харобиоварро анҷом додааст, ки ба назар мерасад, ҳадафаш паҳн кардани терроризм ва расондани зиёни ҳадди аксар ба ҳазораҳои Афғонистон аст."

"Ҳамлаҳои сершуморе, ки ҳазораҳоро нишон гирифтаанд, ҷиноят алайҳи башарият мебошанд ва масъулони он бояд ба ҷавобгарӣ кашида шаванд", -- омадааст дар изҳороти ӯ.

Ҳазораҳо севумин гурӯҳи бузурги қавмии Афғонистон ҳастанд, вале дар ин кишвари умдатан суннимазҳаб бо табъиз ва таъқиб рӯбарӯянд.

Кӯшиши табаддулоти низомӣ дар Судон. Сарвазирро боздошт карданд

Судон

Хабаргузориҳои арабӣ ва ғарбӣ иттилоъ медиҳанд, ки дар Судон кӯшиши табаддулоти низомӣ ҷараён дорад.

Хабарнигорони расонаҳои арабӣ ва ғарбӣ аз шаҳри Хартум иттилоъ додаанд, ки низомиён як қатор сиёсатмадорон, аз ҷумла раисони вилоятҳо, вазирон ва сарвазир Абдуллоҳ Ҳамдукро дастгир карданд.

Ҳамчунин низомиён ба коргоҳи телевизиони давлатии Судон дар шаҳри Умдурмон ҳамла карда, дар кӯчаву хиёбонҳо шумори зиёди афроди низомӣ ва техникаҳои ҳарбӣ мушоҳида мешавад.

Аз номи сарвазири Судон изҳороте нашр шудааст, ки ҷонибдорони демократияро барои муқобала бо кушиши табаддулоти низомӣ дар ин кишвар аз роҳи осоишта даъват мекунад.

Низомиёни Судон то ҳол дар ин бора чизе нагуфтаанд ва изҳороти расмиеро низ нашр накардаанд.

Намояндаи Департаменти давлатии Амрико бо нашри изҳороте кӯшиши табаддулоти низомиро дар Судон маҳкум карда, гуфтааст, ин амал метавонад боиси қатъи кумакҳои Вашингтон ба Хартум бишавад.

Халилзод: Амрико ба Ғанӣ фишори кофӣ наовард, ки қудратро бо "Толибон" тақсим кунад

Залмай Халилзод

Залмай Халилзод, фиристодаи пешини Амрико дар умури сулҳи Афғонистон, пас аз барканориаш аз ин мақом бори аввал бо расонаҳо суҳбат кард.

Ӯ рӯзи 24-уми октябр ба шабакаи телевизионии CBS гуфт, Амрико ба таври кофӣ ба президенти барканоршудаи Афғонистон фишор наовард, то "Толибон"-ро дар қудрат шарик созад.

Дар ҳоли ҳозир президенти Амрико, Ҷо Байден, барои хуруҷи беназм ва ошуфтаи Иёлоти Муттаҳида аз Афғонистон ва вожгунии ногаҳонии Кобул ба дасти "Толибон" танқид мешавад. Дар навбати худ Байден масъулиятро ба гардани Залмай Халилзод гузошт, ки дар Қатар бо "Толибон" музокирот анҷом дода буд.

Рӯзи 29-уми феврали соли 2021 миёни Амрико ва "Толибон" дар Қатар тавофуқнома имзо шуд, ки хуруҷи нерӯҳои амрикоӣ аз Афғонистон пас аз 20 соли ҳузур аз шартҳои асосии он буд.

Дар ин гуфтугӯҳо ҳукумати президент Ашраф Ғанӣ шомил набуд. Аммо Халилзод гуфт, созишнома "бастаи шартҳо"-е буд, ки музокироти ниҳоӣ байни "Толибон" ва Кобул ва инчунин ошашбаси доимиро дар бар мегирифт.

Дар сӯхтори хобгоҳи муҳоҷирон 17 шаҳрванди Тоҷикистон бе санад мондаанд. ВИДЕО

Хобгоҳи 200 муҳоҷири тоҷик дар Русия хокистар шуд
лутфан мунтазир бошед

Феълан кор намекунад

0:00 0:01:33 0:00

Сафорати Тоҷикистон дар Русия гуфт, бар асари сӯхтори ҳафтаи гузашта дар иншооти сохтмонии воқеъ дар назди метрои “Рассказовка”-и шаҳри Маскав 60 муҳоҷири тоҷик молу ашё ва беш аз 17 нафар санадҳояшонро аз даст додаанд.

Раҳбари иншооти сохтмонӣ ваъда додааст, осебдидагонро бо хобгоҳ, либос ва лавозимоти дигари зарурӣ таъмин хоҳад кард.

Сафорати Тоҷикистон барқарор намудани ҳуҷҷатҳои нобудшудаи муҳоҷиронро ба дӯш гирифтааст.

Сабаби сӯхтор дар рӯзи 20-уми октябр риоя накардани қоидаҳои бехатарӣ дониста мешавад. Дар иншооте, ки ба коми оташ рафт, беш аз 100 шаҳрванди Тоҷикистон тибқи шартнома бо 4 ширкати сохтмонӣ ба кор ҷалб шудаанд.

80 нафари онҳо дар хобгоҳи ҳамон сохтмон иқомат мекунанд.

Мақомоти Маскав гуфтанд, танҳо дар маркази «Сахарово» ба муҳоҷирон патент медиҳанд

Аз якуми ноябр пешниҳоди ҳуҷҷатҳо барои гирифтани патент дар ҳудуди шаҳру вилояти Маскав танҳо дар маркази муҳоҷирати «Сахарово» сурат мегирад.

Яъне, аз ҳафтаи оянда маркази муҳоҷиратии воқеъ дар Путилково барои дарёфти патенти меҳнатӣ ҳуҷҷат қабул намекунад ва баста мешавад.

Вадим Коженов, раҳбари Федератсияи муҳоҷирони Русия, дар як навори видеоӣ шаҳр дод, ки муҳоҷироне, ки то 1-уми ноябр санадҳои худро ба маркази муҳоҷират дар Путилково супорида буданд, патенти омодашударо низ бояд аз он ҷо бигиранд.

Тасмими бастани ин марказ баъди он гирифта шуд, ки сокинони деҳаи Путилково аз афзоиши занозаниву тирпаронии гурӯҳии муҳоҷирон шикоят карда буданд.

«Сахарово» бузургтарин маркази хадамот барои муҳоҷирон аст, ки дар як шабонарӯз имкони қабули 7,5 ҳазор нафарро дорад.

Муҳаққиқ: Дар як маҳаллаи Кобул ҷасади 8 кӯдакро ёфтанд, ки аз гуруснагӣ мурдаанд

Муҳаммад Муҳаққиқ

Яке аз раҳбарони ҳазораҳои Афғонистон мегӯяд, дар як маҳаллаи Кобул ҷасади 8 кӯдакеро пайдо кардаанд, ки аз гуруснагӣ мурдаанд.

Муҳаммад Муҳаққиқ рӯзи 24-уми октябр дар баёнияе дар Фейсбук навишт, ин кӯдакон дар маҳаллаи 13-уми Кобул, дар ғарби шаҳр, се ҳафта пеш ҷон додаанд ва ҷасади онҳоро муллоҳо ва мардуми маҳалла ба хок супурдаанд.

Мулло Муҳаммад Алӣ Бомиёнӣ, яке аз муллоҳои маҳалла, гуфтааст, ки калонтарин кӯдак 8-сола ва хурдтарини онҳо якунимсола будааст.

Ба қавли Мулло Муҳаммад, волидони ин кӯдакон вафот кардаанд ва онҳо ягон хеши дигар надоштаанд. Ӯ афзудааст, ки ҳангоме ба хонаи кӯдакон рафт, онҳоро ба ҳадде гурусна пайдо кард, ки ҳатто пойи хешро дароз карда наметавонистанд.

Ҳукумати "Толибон" ҳанӯз ин хабарро шарҳ надодааст. Аз ин пеш Созмони Милали Муттаҳид гуфтааст, агар ба Афғонистон ба зудӣ кумак нашавад, мумкин аст, дар кишвар қаҳтии саросарӣ рух бидиҳад.

Дар Қазоқистон ҳабси фаъолон идома дорад

Акс аз бойгонӣ.

Маруи Есендирова, сокини шаҳри Уралски Қазоқистонро 20 рӯз ба ҳабси маъмурӣ гирифтанд. Додгоҳ ӯро барои суханрониаш дар гирдиҳамое дар як моҳи пеш ба ҳабс гирифт.

Есендирова бо қарори додгоҳ розӣ нест ва тасмим дорад, аз болои он шикоят барад. Ескендирова дар як гирдиҳамоӣ дар рӯзи 25 сентябр, ки ҳамагӣ 5 кас дар он иштирок дошт, суханронӣ карда буд. Додгоҳ ӯро бо айби иштирок дар гирдиҳамоии ғайриқонунӣ айбдор кард.

Фаъоли дигари шаҳрвандӣ аз шаҳри Оқсойи Қазоқистон Тлекқобил Келибоев гуфт, ки дар остонаи гирдиҳамоии эҳтимолии мухолифони ҳукумати Қазоқистон ӯро ба идораи пулис даъват ва ҳушдор додаанд, ки дар гирдиҳамоӣ ширкат накунад.

Ахиран фаъоли дигар Амангелдӣ Орабоев низ дар Қазоқистон 20 рӯз ба ҳабси маъмурӣ гирифта шуд. Ӯро низ бо айби ширкат дар гирдиҳамоии ғайриқонунии рӯзи 25 сентябр ҳабс карданд.

Ҷанги виза байни Русия ва Амрико

Маскав аз тасмими Амрико, ки гирифтани визаи ИМА-ро барои шаҳрвандони Русия мушкил кард, интиқод кард. Ҳамакнун он шаҳрвандони Русия, ки мехоҳанд визаи Амрикоро дарёфт кунанд, бояд онро аз кишвари севум ба даст биоранд. Ин тасмими ИМА пас аз он руи даст гирифта шуд, ки Русия кор кардани шаҳрвандони ин кишварро дар Сафорати Амрико мамнуъ эълом кард. Бар асоси ин дастур, русҳо метавонанд барои дархости визаи Амрико ба сафорати он кишвар дар Варшава, пойтахти Лаҳистон (Полша) муроҷиат кунанд.

Вазорати корҳои хориҷии Амрико ин шаҳрвандони русро дар радаи дархосткунандагони "бе кишвар" қарор додааст. Ин ба он маъно аст, ки Вашингтон дар кишвари онҳо намояндагии консулӣ надорад ё кормандони сафоратхона бо сабабҳои сиёсӣ ва амниятӣ наметавонанд виза содир кунанд.

Русия даҳумин кишваре аст, ки шомили ин феҳрист мешавад. Эрон, Куба, Эритрея, Либия, Сумол, Судони ҷанубӣ, Сурия, Венесуэла, ва Яман аз ҷумла кишварҳое мебошанд, ки қаблан ба ин феҳрист шомил шуда буданд.

Мария Захарова, сухангӯи Вазорати корҳои хориҷии Русия дар шабакаҳои иҷтимоӣ навишт, "дипломатҳои амрикоӣ солҳост, ки дар ҳоли аз байн бурдани системаи хадамоти консулӣ дар Русия ҳастанд..."

Робитаҳои Амрико ва Русия дар поинтарин сатҳ пас аз поёни Ҷанги Сард ба ин тараф қарор дорад. Ду кишвар аз ҷумла дар робита ба шумораи дипломатҳое, ки метавонанд дар пойтахтҳои якдигар дошта бошанд, ихтилофи шадид доранд ва гуфтугӯҳояшон дар ин моҳ низ бенатиҷа монд.

Номзадии раиси порлумони Қирғизистонро дар интихобот ба қайд нагирифтанд

Speaker of the Jogorku Kenesh Talant Mamytov 15-December 2020

Комиссияи марказии интихобот ва раъйпурсии Қирғизистон номзадии раиси порлумон Талант Мамитовро ба мақоми вакилӣ дар интихоботи порлумонии ин кишвар ба қайд нагирифт.

Тибқи қонуни конститутсионӣ "Дар бораи интихоботи президент ва вакилони порлумони Қирғизистон", хидматчиёни давлатии ин кишвар вазифадор ҳастанд, ки дар сурати пешбарии номзадии худ дар интихоботҳо аз мақомҳояшон истеъфо диҳад.

Ба огаҳии комиссия, номзадии Мамитов, ки дар ҳоли ҳозир раиси порлумони Қирғизистон аст, ба хотири иҷро нашудани талаботи мазкури қонун дар интихоботи нави порлумонӣ сабтином карда нашудааст.

Талант Мамитов ибтидои моҳи ноябри соли 2020, баъди ҳаводиси моҳи октябри соли гузашта ва истеъфои президенти пешин Сооронбой Ҷеенбеков раиси порлумони Қирғизистон таъйин шуд. Аз 14 ноябри 2020 то 28 январи соли 2021 иҷрокунандаи муваққати вазифаҳои президенти ин кишвар буд.

Интихоботи нави порлумонии Қирғизистон 28 ноябри соли равон баргузор мешавад. Порлумони нави ин кишвар аз 90 вакил иборат хоҳад буд.

Дабири кулли СММ гуфт, аз ҳаққи занону духтарони афғон ҳимоят мекунад

Антонио Гуттериш, дабири СММ

Дабири кулли Созмони Милали Муттаҳид гуфтааст, ба талошҳояш барои таҳсили духтарони афғон ва ҷалби занон ба кор дар Афғонистон идома медиҳад.

Антонио Гуттериш, дабири кулли СММ рӯзи 23-уми октябр дар саҳифаи Твитераш навишт, ки Созмони Милали Муттаҳид дар Афғонистон мемонад ва ба дифоъ аз ҳаққи занону духтарон пойфишорӣ мекунад.

Толибон, ки рӯзи 15-уми август Кобулро тасарруф карданд, ба занону духтарон иҷозаи кору таҳсил намедиҳанд.

Фишорҳо ба Толибон аз сӯи ҷомеаи Афғонистон ва ҷомеаи байналмилалӣ барои иҷозаи кору таҳсил ба занону духтарон давом дорад.

Толибон ба духтарони аз синфи 6 боло иҷозаи таҳсил надодаанд ва барои бозгашти занон ба кор низ мухолифат доранд.

Аксари кишварҳои дунё як шарти пазируфтани ҳукумати Толибонро дар иҷозаи кору таҳсил ба занону духтарон донистаанд.

Амрико аз Куриёи Шимолӣ хост, озмоиши мушакҳоро қатъ кунад

Охири моҳи сентябр Куриёи Шимолӣ мушакҳои нави худро озмоиш кард.

Як дипломати амрикоӣ аз Куриёи Шимолӣ хостааст, ки озмоиши мушакҳояшро қатъ кунад.

Сунг Ким, намояндаи Амрико дар умури Куриёи Шимолӣ аз ин кишвар хостааст, ки ба мизи музокирот баргардад. Ин дипломат, ки бо мақомоти Куриёи Ҷанубӣ гуфтугӯ дошт, аз Куриёи Шимолӣ хостааст, то аз фаъолиятҳои бесуботкунанда даст кашад.

Дар гузашта Доналд Трамп, президенти собиқи Амрико ва Ким Ҷонг Ун, раҳбари Куриёи Шимолӣ бо ҳам дидор доштанд. Дар ин дидорҳо масъалаи барномаҳои мушакии Куриёи Шимолӣ матраҳ шуда буд, вале ИМА муввафақ нашуд, то ин кишварро ба қатъи озмоиши мушакҳо водорад.

Куриёи Ҷанубӣ ва Куриёи Шимолӣ солҳост бо ҳам душманӣ доранд. Куриёи Ҷанубӣ роҳи демократиро пеш гирифтааст ва ба як кишвари пешрафта табдил ёфтааст. Куриёи Шимолӣ, ки низомаш диктотурӣ аст, як кишвари ақибмонда аст, вале бо озмоиши мушакҳо ҳамеша кишварҳои дигарро таҳдид мекунад.

Дар Олмон 1,2 миллион коргар намерасад

Яке аз хиёбонҳо дар Олмон

Агентии федеролии меҳнат дар Олмон аз норасоии 70 навъи мутахассисон дар ин кишвар хабар додааст. Ба навиштаи хабаргузории "Мавҷи Олмон", дар ин кишвар 1,2 миллион коргар намерасад.

Маркус Йергер, як мақомдори Олмон гуфтааст, ки норасоии коргарон ва мутахассисон ба иқтисод зиён мерасонад. Ӯ даъват кардааст, ки аз кишварҳои дигар бояд мутахассисонро бештар барои кор даъват кунанд.
“Дар Олмон омӯзонидани 390 касб ҷараён дорад, вале касбомӯзон кам ҳастанд”,--гуфтааст ӯ.

Ба иттилои Донишгоҳи иқтисодии Олмон, дар ин кишвар бештар коргарон дар соҳаи иҷтимоӣ намерасанд. Дар Олмон ба муҳандисони сохтмон, устоҳои таъмири таҷҳизоти хонаҳо ва ронандаҳои мошинҳои боркаш аз ҳама бештар ниёз будааст.

Дар Олмон феълан садҳо ҷавони тоҷик барои кор дар бахшҳои иҷтимоӣ, аз ҷумла хонаҳои пиронсолон ва мактаб-интернатҳо барои маъюбон барои кор ҷалб шудаанд, вале онҳо шикоят мекунанд, ки маоши зиёде барояшон пардохт намешавад.

Аксари шаҳрвандони Тоҷикистон барои корҷӯи ба Русия мераванд ва омори дақиқи муҳоҷирони тоҷик дар Олмон маълум нест.

Эрдуғон фармон дод, ки 10 сафири кишварҳои ғарбӣ аз Туркия хориҷ шаванд

Раҷаб Тайиб Эрдуғон, президенти Туркия

Раҷаб Тайиб Эрдуғон, президенти Туркия ба Вазорати корҳои хориҷӣ супориш додааст, ки сафирони даҳ давлати ғарбиро аз ин кишвар берун кунанд.

Ба навиштаи нашрияи “Daily Sabath”, дар ин миён сафирони ИМА, Олмон ва Фаронса низ ҳастанд.

Ин хабар дар ҳоле пайдо шуд, ки сафирони панҷ кишвари аврупоӣ ба озодии Осмон Кавал, тоҷири шинохтаи турк, ки бо иттиҳоми даст доштан дар табаддулоти давлатӣ дар боздошт аст, садо баланд карданд.

Додситонии Истамбул ӯро дар кушиши табаддулоти давлатӣ дар моҳи июли соли 2016 айбдор ва боздошт кардааст.

Озодии ӯро дар ҳафтаи гузашта сафирони ИМА, Олмон, Ҳоланд, Канада, Зеландияи Нав, Дания, Финландия ва Шветсия дархост карда буданд.

Туркия, кишвари узви НАТО аст ва барои шомил шудан ба Иттиҳоди Аврупо номзад аст. Соли 2016 ҳазорон нафар дар ин кишвар бо гумони даст доштан дар табаддулоти давлатӣ боздошт шуданд ва ҳанӯз боздоштҳо дар ин робита давом доранд.

Созмонҳои байналмилалӣ Туркияро барои саркуби мухолифон интиқод мекунанд.

Дар Узбекистон барои интихоби президенти оянда овоз медиҳанд

Яке аз ҳавзаҳои интихоботӣ дар Тошканд

Дар Узбекистон имрӯз, 24-уми октябр, маъракаи овоздиҳӣ ба интихоботи президентии ин кишвар оғоз ёфт.

Яке аз номзадҳои калидӣ ба мақоми прзидентӣ Шавкат Мирзиёев, президенти кунунии кишвар аст, ки бори дуюм дар ин маърака иштирок мекунад. Рақибони ӯ чандон чеҳраҳои шинохта нестанд ва бештар тарафдори президенти кунунӣ ҳастанд. Аз ин рӯ, ба гуфтаи коршиносон, онҳоро танҳо барои намоиши демократия вориди майдон кардаанд.

Узбекистон, ки 35 миллион аҳолӣ дорад, аз замони истиқлолият, дар сӣ соли пеш, бори шашум аст, интихоботи президентӣ баргузор мекунад. Барандаи чор интихоботи гузашта дар ин кишвар Ислом Каримов буд, ки соли 2016 даргузашт ва ба ҷояш Шавкат Мирзиёев раҳбари ин кишвар шуд.
Бо дарназардошти саркуби озодандешон, набуди рақиби ҷиддӣ дар интихобот, коршиносон пешгӯи мекунанд, ки эҳтимол дубора Шавкат Мирзиёевро пирӯз эълон кунанд.

Дар сӣ соли охир маъракаҳои интихобот дар Узбекистонро созмонҳои байналмилалӣ ношаффоф унвон кардаанд.

Раҳбари Қирғизистон имкони истиқрори пойгоҳи амрикоиро дар кишвар рад кард

6 марти соли 2014. Низомиёни амрикоӣ хаймаи худро дар фурудгоҳи Канти Қирғизистон ҷамъ мекунанд

Президенти Қирғизистон Содир Ҷабборов фикри дар хоки Қирғизистон ҷойгир кардани пойгоҳи низомии ИМА-ро рад кард ва гуфт, ки ин иқдом аз назари равобити Бишкек бо Вашингтону Русия кишварашро дар ҳолати монанд ба бозии “мушу губа” қарор медиҳад. Ҷабборов ин суханҳоро дар як нишасти хабарии солонааш баён кард, ки дар он намояндагони матбуоти дохиливу хориҷӣ иштирок карданд. Ба саволи ин ки оё баъди ҳафт соли танаффус имкони дар хоки Қирғизистон ҷойгир шудани пойгоҳи низомии амрикоӣ вуҷуд дорад ё на, ӯ гуфт, ки кишвараш аллакай мизбони пойгоҳи низомии Русия дар Канти вилояти Чуй мебошад. Ҷабборов гуфт, “як пойгоҳи низомӣ барои мо кофӣ аст”. Ӯ афзуд: “Мо намехоҳем, ки бо ҷойгир кардани ду пойгоҳ дар қаламрави худ ба бозии мушу гурба бозӣ кунем”. Бори нахуст дар декабри соли 2001 дар пойгоҳи Манаси Қирғизистон дар доираи амалиёти мубориза бо терроризм дар Афғонистон дар чаҳорчӯби амалиёти “Озодии шикастнопазир” пойгоҳи нирӯҳои байналмилалӣ таҳти раҳбарии ИМА ҷойгир шуда буд. Вале поёни соли 2014 парлумони ин кишвар дар як овоздиҳӣ қарор кард, ки Вашингтон ин пойгоҳро холӣ кунад. Ин таҳаввулот ҳамчун талоши мақомоти Бишкек ба хурсанд кардани Русия арзёбӣ шуд.

Телман Исмоилов дар Черногория паноҳанда шуд ва аз ҳабс озод гардид

Телман Исмоилов замоне моликдори бозори Черкизов буд

Соҳибкори озаритабори Русия ва собиқ моликдори бозори Черкизов Телман Исмоилов дар Черногория (Монтенегро) паноҳандагии сиёсӣ гирифтааст. Милош Вуксанович, вакили дифои Исмоилов рӯзи 22-юми октябр гуфт, ки баъди ин қарор зерҳимояи ӯ аз боздошт озод гардид ва парвандаи истирдоди ӯ ба Русия ҳам қатъ шуд. Маълум нест, ки бар кадом асос мақомоти Черногория ба Исмоилов ҳақи паноҳандагӣ додаанд. Худи мақомоти маҳаллӣ ин қазияро ҳанӯз шарҳ надодаанд. Исмоилов рӯзи 1 октябр бо талаби Русия дар шаҳри Подгоритсе – пойтахти Черногория боздошт шуд. Дар Русия ӯро дар ташкили куштори ду ё зиёда шахс гунаҳгор мекунанд. Вале аз соли 2009 кору даромади ӯ мавриди таваҷҷӯҳи тафтишот шуд, бозори Черкизов, ки мегӯянд, бо ҷинояти муташаккил рабт дошт, баста гардид. Соли 2015 Исмоиловро варшикаста ё банкрот эълон карданд.

Бародараш Рафиқ аз рӯи парвандаи куштори ду соҳибкори рус дар соли 2017 ба 17 соли зиндони низомаш сангин маҳкум шудааст ва худи ӯ ҳам маҳз аз рӯи ҳамин парванда дар ғайбаш ҳабс шудааст.

Рӯзи панҷуми "рекордӣ". Олудашавиҳо ба COVID-19 дар Русия афзоиш меёбад

Беморхонае дар Русия

Дар Русия мақомот рӯзи 23-юми октябр аз марги 1075 нафари дигар бар асари COVID-19 хабар доданд. Ин рӯзи панҷум аст, ки омори қурбониёни COVID-19 дар Русия рекордӣ мешавад. Мақомот қаблан эълон карданд, ки дар пешорӯи чунин вазъият маҳдудиятҳои навбатиро ҷорӣ мекунанд. Дар 24 соати гузашта дар Русия 37 ҳазор 678 нафари нав ба коронавирус олуда шудааст.

Мушкил ин аст, ки бо вуҷуди ин ки Русия аввал шуда дар бораи эҷоди воксинаи зидди COVID-19 хабар дод, то ҳол аҳолии ин кишвар барои эмшавӣ бар зидди коронавирус омода нест. Дарсади хеле ками мардум воксина гирифтаанд ва ҳамин чиз, ба назари мақомот, сабаби асосии афзоиши навбатии олудашавиҳо ба коронавирус дар Русия мебошад.

Низомиёни ИМА гуфтанд, дар Сурия як узви муҳими Ал-Қоида кушта шуд

Июли соли 2019. Ҷангиёни гурӯҳи марбут ба Ал-Қоидаи "Ҳаёт таҳрир аш-Шам" дар марзи Ҳамо ва Идлиби Сурия ҳаракат мекунанд

Як сухангӯи фармондеҳии марказии ИМА гуфт, ки дар натиҷаи ҳамлаи ҳавопаймои бесарнишини онҳо дар хоки Сурия як раҳбари калони гурӯҳи Ал-Қоида ба қатл расид. Ҷон Ригсби, сухангӯи фармондеҳии марказии артиши Амрико дар изҳороте гуфт, марги Абдлҳамид ал-Матар “тавони ин ташкилоти террористиро барои ташкил ва анҷоми ҳамлаҳои сартосарӣ зидди шаҳрвандони ИМА, шарикони он ва ҳам мардуми бегуноҳ ба ҳам мезанад”. Ригсби дар шарҳи худ навишт, “дар паи ҳамлае, ки бо истифодаи ҳавопаймои навъи MQ-9 анҷом шуд, нишонаҳо аз хисороти мулкӣ ба назар намерасад”. Ин ҳамла дар ҳоле сурат гирифт, ки ду рӯз пеш аз ин як қароргоҳи амрикоиҳо дар ҷануби Сурия мавриди ҳамла қарор гирифт.

Ҳафтаи ҷорӣ ИМА тасдиқ кард, ки рӯзи 20-уми октябр гарнизони “Ат-Танф” мавриди ҳамла қарор гирифт ва низомиёни амрикоӣ ҷароҳат бардоштанд.

Ригсби гуфт, ки Ал-Қоида Сурияро ба ҳайси паноҳгоҳи амн истифода бурда, ба ИМА ва муттафиқонаш таҳдид мекунад. Ба гуфтаи ӯ, ба ҳамин хотир ҳам ИМА муборизаашро зидди Ал-Қоидаву дигар созмонҳои террористӣ, ки ҳадафашон осеб расонидан ба ин кишвар аст, идома хоҳад дод.

Муқовимат ба ҷангҷӯёни шартӣ дар Ҳарбмайдони Тоҷикистон

Пойгоҳи Ҳарбмайдон, 20-уми октябр

Рӯзи 23-юми октябр дар Ҳарбмайдони воқеъ дар ҷануби Тоҷикистон ва 20-километрии марзҳои шимолии Афғонистон рӯзи дуюми машқҳои нирӯҳои Созмони паймони амнияти дастаҷамъӣ баргузор мешавад. ТАСС мегӯяд, ки “машқҳои амалии нирӯҳои муштараки узви СПАД аз омӯзиши фазо бо ҳавопаймоҳои Л-39-и нирӯҳои ҳавоии Тоҷикистон шурӯъ шуд”. Ривояти машқҳо ин аст, ки назорати ҳавоӣ ҳаракати ҷангҷӯни шартӣ бо ду корвони техникаи низомиро ба самти марзи Тоҷикистон ошкор мекунад ва бар асоси ин иттилои ҷосусӣ марзбонҳо ба муқовимат бо ҷангиён мепардозанд. Дар ин машқҳо инчунин нирӯҳои воҳидҳои махсус ҳам ҷалб шудаанд. Ба навиштаи манбаъ, дар ин машқҳо 4 ҳазор низомиву 500 адад техникаи ҳарбӣ истифода мешавад. Машқҳо дар Ҳарбмайдон ва ҳам пойгоҳи Мумирак дар ҷануби Тоҷикистон ҷараён доранд.

СПАД созмони низомии минтақавии зери назари Русия буда, баъди дар моҳи август аз ҷониби “Толибон” ишғол шудани аксар қаламраҳои Афғонистон, дар хоки кишварҳои узви ин паймони низомӣ, аз ҷумла Тоҷикистону Қирғизистон, чандин даври машқҳои низомӣ барпо шудааст.

Рейтерс: Мақомоти ИМА мехоҳанд "якбора ҳамаи пилотҳои афғонро" аз Тоҷикистон берун баранд

Халабонҳои афғон аз шароити нигаҳдориашон дар осоишгоҳи канори Душанбе шикоят кардаанд

Мақомоти ИМА изҳори умедворӣ карданд, ки базудӣ ҳамаи тахминан 150 халабони афғонистониеро, ки баъди сари қудрат омадани “Толибон” дар моҳи августи имсол дар Тоҷикистон паноҳ бурда, интизори кӯчидан ба ИМА мебошанд, интиқол медиҳанд.

Як мақоми департаменти давлатии ИМА ба шарти фош нашудани номаш дар сӯҳат бо хабаргузории Рейтерс гуфтааст, ки “мақомоти ИМА мехоҳанд ҳамаи халабонҳои нирӯҳои ҳавоии Афғонистонро дар як вақт ба ҷои дигар интиқол диҳанд”, вале аз додани ҷузъиёти нақша худдорӣ кард.

Дар як санатории Тоҷикистон беш аз ду моҳ аст, ки 143 халабон ё пилоти афғонистоние қарор доранд, ки дар ИМА таҳсил кардаанд. Илова ба онҳо 13 низомии дигари афғонистонӣ низ дар Тоҷикистон қарор доранд ва ҳамчунин мехоҳанд ба ИМА интиқол ёбанд. Ба навиштаи Рейтерс, ин нафарон "дар шароити сабуктар ба сар мебаранд".

Ба иттилои Радиои Озодӣ, гуруҳи 143-нафарии нозирону танзимгарони парвоз, муҳандисони ҳавопаймоҳо ва халабонҳои тамриндида аз ҷониби Амрико 15-уми августи имсол аз Афғонистон ба шаҳри Бохтари Тоҷикистон фирор карданд. Онҳоро 1-уми сентябр ба як осоишгоҳи канори Душанбе оварданд.

Яке аз халабонҳои фирории афғон, ки нахост, номаш бурда шавад, дар суҳбат бо Радиои Озодӣ гуфта буд, онҳо бо 17 ҳавопаймои низомии навъҳои Cessna 208, AC-208 ва Pilatus PC-12, ки ба онҳо тааллуқ доштанд, тавассути марзи шимолии Афғонистон ба Тоҷикистон расиданд.

Ин халабонҳо дар интизори интиқол ба Амрико ҳастанд. "Толибон" қаблан гуфта буданд, ки дар сурати бозгашт ба онҳо хатаре таҳдид нахоҳад кард, аммо халабонҳо ба ваъдаи онҳо бовар надоранд ва дигар Афғонистонро ҷойи амн намедонанд.

Халабони ҳомиладор аз ташхис гузашт

Таваҷҷӯҳ ба сарнавишти норӯшани халабонҳои касбии нирӯҳои ҳавоии Афғонистон баъди он бештар шуд, ки маълум гардид, яке аз ду бонуи халабоне, ки дар ин ҳайат қарор доранд, ҳомиладор буда, қарор аст моҳи ноябр нахустфарзандашро таваллуд кунад. Ӯ ба Радиои Озодӣ аз шароити нигаҳдорӣ дар осоишгоҳу кӯмаки нокофии тиббӣ дар Тоҷикистон шикоят карда буд.

Рӯзи 21-уми октябр Радиои Озодӣ хабар дод, ки халабони ҳомилаи афғонро, ки 6-уми октябри имсол ба як бемористони канори Душанбе бурда буданд, пас аз ташхису табобат дубора ба осоишгоҳ, макони нигаҳдории даҳҳо халабони фирорӣ, овардаанд. Ӯ 27-сола аст. Яке аз ҳамроҳони ин зан ба Радиои Озодӣ ба шарти ифшо нашудани номаш гуфт, ки баъди муоинаи ӯ дар як таваллудхонаи шаҳри Душанбе ӯро бозпас оварданд. Ӯ гуфт: "Пас аз он ки пизишкон мутмаин шуданд, ба ҷони зан ва тифли батнаш хатаре нест, ӯро ба назди мо оварданд. Ҳоло дар интизори ба дунё омадани тифлаш аст."

Макони нигаҳдории халабонҳои афғон ва номи онҳо бо далелҳои амниятӣ нашр намешавад. Ин халабонҳо гуфтанд, ки азбаски дар ИМА касби ихтисос карда, барои ҳукумати Афғонистон кор кардаанд, бо омадани режими "Толибон" аз ҷонашон хатар доранд.

Тафтиш: тири силоҳе, ки Алек Болдуин ба кор бурд, воқеӣ буд

Алек Болдуин, ҳунарпешаи ҷоизадор ва маъруфи амрикоӣ ҳамон замон дар додгоҳ ҳозир шуд ва гуфт, ки аз кушта шудаи ҳамкораш дилшикаста шудааст

Тафтиши пешакии қазияи кушта шудани наворбардори украинӣ Ҳалина Ҳатчинс нишон дод, ки силоҳи аз ҷониби ҳунарпешаи амрикоӣ Алек Болдуин истифодашуда бо тири воқеӣ пур карда шуда буд. Дар ин бора матбуот шоми 22-юми октябр бар пояи санадҳои додгоҳӣ хабар дод. Муовини коргардон ба дасти ҳунарпеша Болдуин силоҳро дода гуфт, ки он барои истифода бехатар мебошад, вале дар натиҷа боиси кушта шудани Ҳатчинс шуд. Хабаргузориҳо бо такя ба маводи додгоҳии шаҳри Санта Фе дар аёлати Ню Мексико навиштанд, ки ёвари коргардон ҳангоме силоҳро ба дасти Болдуин медод гуфт, “силоҳ сард аст”. Ин ба маънои амну бехатар будани он мебошад. Дар идомаи тафтиши пешакӣ муфаттиши идораи полиси Санта Фе навиштааст, ки ёвари коргардон хабар надошт, ки дар дохили силоҳ тирҳои воқеӣ ҷой дода шудаанд.

Тири силоҳ ба синаи Ҳатчинс зад, коргарон Ҷоел Соуса, ки дар пушти ӯ истода буд, ба китфаш тир хӯрд. Тафтиши ҳаматарфаи ин қазия, ки рӯзи 21-уми октяр ба ҳангоми наворгирии филме бо номи “Зангбаста” рух дод, шурӯъ шудааст.

CPJ аз Узбекистон хост, таҳдидҳоро ба хабарнигорони "Озодлик" бисанҷад

Кумитаи Дифоъ аз Журналистон (CPJ) аз мақомоти Узбекистон хостааст, ки гузоришҳоро дар бораи таҳдиди куштани хабарнигорони "Озодлик", бахши узбекии Радиои Озодӣ, фавран таҳқиқ кунанд.

Созмон мегӯяд, рӯзноманигорон дар остонаи интихоботи президентии Узбекистон таҳдидҳои бешумори онлайнӣ гирифтаанд. Интихобот 24-уми октябр баргузор хоҳад шуд.

Кумитаи Дифоъ аз Журналистон, қароргоҳаш дар Ню-Йорк, 21-уми октябр дар баёнияе гуфт, мақомот бояд ба таҳдидҳои "бесобиқа ва нафратангез" ба кормандони бахши узбекии Радиои Озодӣ дар рӯзҳои охир вокуниш кунанд.

Гулноза Саид, ҳамоҳангсози Барномаи Аврупо ва Осиёи Марказии CPJ гуфт: "Ҳукумати Узбекистон бояд сарчашмаи пайдо шудани ин таҳдидҳоро таҳқиқ карда, масъулонро ба ҷавобгарӣ кашад."

Рӯзи 16-уми октябр корбарони номаълуме дар Telegram ба кормандони бахши узбекии Радиои Озодӣ даҳҳо паёми таҳдид ба марг фиристоданд.

Ин арфод кормандон ва модарони онҳоро таҳқир карда, ба сар буридану таҷовузи ҷинсӣ таҳдид намуданд ва тасвирҳои порнографӣ ё шаҳвонӣ фиристоданд.

Чунин ба назар мерасад, ки аксари ин тасвирҳо аз ҷониби ҳамон афрод ё гурӯҳ сохта шудаанд, зеро дар онҳо навиштаҳои якхела вуҷуд дорад: "Ҳадафи асосии “Озодлик” сар задани ошӯб дар Узбекистон, халалдор кардани сулҳ ва бадном кардани президенти мост."

Қирғизистон аз Туркия ва Русия ҳавопаймои бесарнишин мехарад

Содир Ҷабборов, раиси ҷумҳурии Қирғизистон (байн)

Раиси Кумитаи амнияти миллии Қирғизистон рӯзи 21-уми октябр дар суҳбат бо рӯзноманигорон гуфт, ин кишвар аз Туркия ва Русия ҳавопаймоҳои бесарнишини навъи "Bayraktar" ва "Орлан-10Е" харидорӣ хоҳад кард.

"Мо ин техникаҳоро аз ҳисоби буҷаи давлат мехарем. Рӯзҳои наздик аз Туркия ҳавопаймои бесарнишини "Байрактар" оварда мешавад. Дар дунё танҳо 5 кишвар ин гуна силоҳ дорад, ки мо яке аз онҳо хоҳем шуд. Мутахассисони мо ҳоло дар онҷо истифодаи ҳавопаймои бесарнишинро меомӯзанд. Ҳамчунин мо аз Русия ҳавопаймои бесарнишини "Орлан-10Е" хоҳем харид. Барои ин аллакай аз буҷа пул ҷудо шудааст", - изҳор дошт раиси Кумитаи амнияти миллии Қирғизистон.

Вале Тошиев дақиқ нагуфт, ки Қирғизистон чанд то ҳавопаймои бесарнишин мехарад.

Расонаҳо моҳи июни соли равон, баъди сафари президенти Қирғизистон Содир Ҷабборов ба Туркия хабар доданд, ки Анқара ба Бишкек кумаки низомӣ менамояд.

Ёфтҳои бештар

XS
SM
MD
LG