Пайвандҳои дастрасӣ

Хабари нав

Хабарҳо

Орас Амирӣ муваққатан аз зиндон озод шуд

Орас Амирӣ ду сол пеш, замоне, ки ба Эрон ба дидани модараш рафт, боздошт ва бо ҷурми ҷосусӣ ба даҳ соли зиндон маҳкум шуд

Созмони Amnesty International рӯзи 9 апрел гуфт, ки мақомоти Эрон Орас Амириро муваққатан аз зиндон озод карданд. Дар изҳороти созмон омадааст, ки “Орас Амирӣ, сокини Бритониё ва Лондон аз соли 2018 ба ин сӯ ба таври ғайриодилона дар зиндони Эвини Теҳрон ҳамроҳ бо Нозанин Зоғарӣ-Ратклифф нигаҳдорӣ мешуд ва ахиран муваққатӣ ба озодӣ баромад”. Раҳбари шӯрои мудирони Афви байнулмилал Дарен Наир гуфт, ки мақомоти эронӣ бояд ӯро озод кунанд, то ин ки ба Лондон назди дӯстписараш баргардад.

Августи соли 2019 Додгоҳи олии Эрон ҳукми 10 соли зиндони Амириро тасдиқ кард ва гуфт, ки ӯ бо кораш дар Шӯрои Бритониё дар Лондон ба ҷосусӣ машғул буд. Амирӣ марти соли 2018 замоне, ки барои дидани модараш ба Эрон рафт, боздошт шуд.

Ҳамаи хабарҳои имрӯзро дар инҷо бихонед

Нишасти Ҳинд ва кишварҳои ОМ 27 январ баргузор мешавад

Нарендра Моди, нахуствазири Ҳиндустон бо Эмомалӣ Раҳмон, раиси ҷумҳурии Тоҷикистон. Акс аз соли 2016

Нишасти нахустини Ҳинд ва кишварҳои Осиёи Марказӣ ба таври онлайн рӯзи 27-уми январ баргузор хоҳад шуд.

Вазорати корҳои хориҷии Ҳинд рӯзи 19-уми январ гуфт, дар нишаст нахуствазири ин кишвар Нарендра Моди ва раҳбарони Тоҷикистону Узбекистон, Қазоқистон, Қирғизистон ва Туркманистон иштирок мекунанд.

Ҳамон тавр ки дар Вазорати корҳои хориҷии Ҳиндустон гуфтаанд, "нишасти нахустин баёнгари равобити дар ҳоли рушди Деҳлӣ ва кишварҳои минтақа аст."

Интизор меравад, раҳбарони Ҳинд ва кишварҳои Осиёи Марказӣ масъалаҳои байнулмилалӣ ва бахусус амнияти минтақаро баррасӣ кунанд.

Раҳбарони кишварҳои Осиёи Марказӣ бояд рӯзи 26-уми январ дар гузашти низомӣ дар Ҳиндустон иштирок мекарданд. Деҳлӣ мегӯяд, ҳатто ба раҳбарони Тоҷикистону Узбекистон, Қазоқистон, Қирғизистон ва Туркманистон даъватнома фиристодааст, вале дар пасманзари бад шудани вазъи вобаста ба коронавирус нақшаро бекор карданд.

Даъвати Блинкен аз Путин: “Роҳи сулҳомез”-ро пеша кунед

19 январ, Киев. Сафорати ИМА дар Украина

Котиби давлатии ИМА Энтони Блинкен аз президенти Русия Владимир Путин даъват кард, ки бо “роҳи сулҳомез” пеш равад. Эҳсоси хатар аз он ки ногаҳон Русия ба Украинаи ҳамсояаш ҳамла мекунад, то рафт бештар мешавад. Аксар кишварҳои ғарбӣ аз таҷаммӯи 100 ҳазор сарбози рус дар хати сарҳади Русияву Украина ва машқҳои нирӯҳои Русия дар Беларус чун ҳушдор аз низои нави азиме нигарон ҳастанд. Блинкен имрӯз дар Киев, пойтахти Украина гуфт, “бисёр умедвор аст, ки вазъ дар ҳолати дипоматии сулҳомез ҳифз мешавад, вале дар ниҳоят қарори асосиро президент Путин қабул мекунад”. Ин суханҳоро Блинкен рӯзи 19 январ дар як мулоқот бо кормандони сафорати ИМА дар Киев баён кард. Ӯ ҳушдор дод, ки Русия нақшае дорад, ки нирӯҳоро афзоиш диҳад ва ин чиз, ба гуфтааш, барои “таҷовуз алайҳи Украина” имкон медиҳад.
Чанде пеш аз ин як мақоми калони амрикоӣ гуфт, ки маъмурияти президенти Амрико Ҷо Байден моҳи гузашта тақдими 200 миллион доллар пулро барои ёрии иловагии дифоӣ ба Киев тасдиқ кард ва афзуд, ки Вашингтон “истиқлолият ва тамомияти арзии Украина”-ро эҳтиром мекунад. Маълум нест, ки ба ин бастаи кӯмакҳо чӣ дохил мешавад.
Қарор аст Блинкен бо президенти Украина Владимир Зеленский ва дигар мақомот дидору гуфтугӯ кунад. Рӯзи 20-уми январ ӯ ба Берлин меравад, то дар ҷаласае бо иштироки мақомоти Бритониё, Фаронса ва Олмон як эътилофи воҳиди ғарбӣ ба ҳимояти Украинаро эҷод кунад.
Инчунин рӯзи 21 январ дар Женева мулоқоти Блинкен бо вазири корҳои хориҷии Русия Сергей Лавров барпо мешавад. Ин дипломатҳои баландпоя рӯзи 18 январ бо ҳам як сӯҳбати телефонӣ доштанд.
Ҷен Псаки, сухангӯи Кохи Сафед рӯзи 18-уми январ дар бораи таҷаммӯи нирӯҳо дар марзи Украина гуфт, “ин як ҳолати бисёр хатарнок аст. Мо ҳоло дар як марҳилае қарор дорем, ки Русия метавонад ҳар лаҳза ба Украина ҳамла кунад”.
Азимтарин мавриди истиқрори нирӯҳои Русия дар сарҳади Украина ба ҳодисаҳои атрофи ишғоли нимҷазираи Қрим дар соли 2014 рабт мегирад. Он замон Русия ин қаламравро забт кард, аз ҷудоиталабони украинӣ дар шарқи Украина ҳимоят кард ва дар натиҷаи низоъҳо аз он замон то кунун 13 ҳазору 200 нафар кушта шуданд. Ин амалҳои Маскавро бисёр кишварҳо маҳкум карданд. Худи Русия ҳама гуна нақшаи эҳтимолии ҳамла ба Украинаро рад карда НАТО-ро барои нияти ба узвияташ қабул кардани Украина интиқод кардааст.

Фаъолияти ширкати марбут ба духтари Назарбоев қатъ шуд

Алия Назарбоева, акс аз соли 2019

Ҳукумати Қазоқистон қарореро қабул кард, ки тибқи он фаъолияти ширкати "Оператор РОП" дар он кишвар бас шудааст. "Фаъолияти ширкати "Оператор РОП" қатъ ва дороиҳои он ба ҳисоби давлат гузаронида шуд," - омадааст дар иттилоияи ҳукумати Қазоқистон.

Қосимҷомарт Тоқаев, президенти Қазоқистон, рӯзи 11-уми январ дастур дода буд, ки фаъолияти ширкати "Оператор РОП" қатъ шавад. "Соҳибкорон ва ҷомеа дар мавриди ширкати маъруф ба "Оператор РОП" суолҳои зиёде доранд. Кор то ҷое расид, ки як ҳаракати мардумӣ зидди ин ширкат ташкил шуд. Ман ба ҳукумат дастур медиҳам, ки фаъолияти ширкати мазкурро қатъ кунад," -- гуфт Тоқаев.

Ширкати "Оператор РОП" соли 2015 таъсис шуд. Ин ширкат ба таъсиси зерсохтори марбут ба ҷамъоварии партовҳо ва коркарди партовҳо машғул аст. Онро ба Алия Назарбоева, духтари хурдии президенти пешини Қазоқистон Нурсултон Назарбоев рабт медиҳанд.

Алия Назарбоева рабт доштани худро ба ширкати мазкур ошкор накардааст, аммо расонаҳо навиштанд, ки даромади ширкатро Назарбоева соҳиб мешавад.

Боздошти Комбиз Кошонӣ бо иттиҳоми канор задани таҳримҳо

Акс аз бойгонӣ

Хадамоти Таҳқиқоти Федеролии Иёлоти Муттаҳида як шаҳрванди Эрону Амрикоро бо иттиҳоми канор задани таҳримоти содирот ба Теҳрон боздошт кардааст.

Вазорати адлияи Амрико дар як баёнияи расмӣ гуфт, Комбиз Аттор Кошонии 44-соларо рӯзи 14- уми январ дар шаҳри Чикаго пас аз талоши интиқоли таҷҳизот ва мол ба Бонки Миллии Эрон дастгир карданд.

Амрико фурӯши молу ашё ба муассисаҳои давлатии Эрон, аз ҷумла Бонки миллии ин кишварро манъ кардааст, чун ба гуфтаи мақомот ин муассисаҳо ба созмонҳои террористӣ мадад мекунанд.

Вазорати адлияи Амрико гуфтааст, ки Комбиз Кошонӣ бо истифода аз ширкатҳояш дар Имороти Муттаҳидаи Арабӣ таҷҳизоти электронӣ ва фанновариҳои дигари ширкатҳои амрикоиро бидуни иҷозаи расмӣ ба Эрон мефурӯхтааст.

Ҳоло ӯ ба содироти ғайриқонунии мол ба Эрон муттаҳам мешавад ва дар сурати собит шудани иттиҳо, мумкин аст, барои 20 сол зиндонӣ ва 1 миллион доллар ҷарима шавад.

Дар Русия ҷазо барои кӯдакозорӣ сахттар мешавад

Дар Русия барои кӯдакозорӣ ва cуистифодаи ҷинсии ноболиғон ҳабси якумрӣ пешбинӣ хоҳад шуд. Вакилони Думаи давлатии Русия бо ислоҳи Кодекси ҷиноӣ ҷазо барои ин ҷиноятро сахттар карданд.

Тибқи қонуни ҳозира, ҳабси абад барои онҳое пешбинӣ шудааст, ки агар муттаҳам қаблан ба таҷовузи навраси то 14-сола маҳкум шуда бошад. Дар тарҳи нави қонун дар баробари кӯдакозор ё педофилҳо, ҳамчунин афроде, ки нисбати ду ноболиғ ё бештар аз он ҷинояти шаҳвонӣ содир мекунанд, ба муҳлати аз 15 то 20 соли зиндон ё ба ҳабси якумрӣ маҳкум хоҳанд шуд.

Қонуни нав дар Русия баъди куштори ду духтари 10-сола дар Киселевск, дар моҳи сентябри соли 2021, таҳия шуд. Виктор Пестерникови 41-соларо ба таҷовуз ва куштани наврасон гунаҳкор донистанд.

Пестерников қаблан ҳам барои озори ҷинсии ноболиғон зиндонӣ шудааст.

Тибқи тағйироти нав, кӯдакозорон ё педофилҳо дар шароити сахттарин ва дар минтақаҳои шимолу сарди Русия адои ҷазо хоҳанд кард.

Дар Хатлон ҳашт шаҳрванди хориҷиро ба ҷавобгарӣ кашидаанд

Кишоварзони чинӣ дар Хатлон, акс аз соли 2013

Мақомот дар минтақаи Хатлон 8 шаҳрванди хориҷиро ба ҷавобгарӣ кашидаанд. Ин афрод, ки дар шаҳру ноҳияҳои Хатлон кору зиндагӣ мекарданд, барои қонуншиканӣ дар як соли ахир ҷарима шудаанд.

Дилшод Одинаев, як масъули Раёсати хадамоти муҳоҷирати вилоят ба Радиои Озодӣ гуфт, ҳангоми амалиёт ошкор шудааст, ки шаҳрвандони хориҷӣ қоидаи будубошро вайрон кардаанд. Онҳоро ба маблағи беш аз 10 ҳазор сомонӣ ҷарима бастанд.

Дар як соли охир Хадамоти муҳоҷират дар вилоят ба 200 шаҳрванди хориҷӣ барои кор дар қаламрави Хатлон иҷозатномаи кор додааст, ки 170 нафари онҳо аз Чин ҳастанд.

Дар Хатлон дар 39 корхонаву ширкатҳо 636 шаҳрванди хориҷӣ фаъолият доранд.

"Дарсҳои фоҷиаи Қазоқистон" барои Тоҷикистон чист?

Қазоқистон дар оғози моҳи январ шоҳиди эътирозу беназмиҳо буд

Саломиддин Мирзораҳматов, хабарнигор ва таҳлилгари муқими Қазоқистон, дар як шарҳе бо номи "Дарсҳои фоҷиаи Қазоқистон барои Русия ва кишварҳои Осиёи Миёна" гуфтааст, дар Тоҷикистон ҳам чунин таҳдидҳо ба амнияти миллӣ вуҷуд дорад ва сабабҳои он пеш аз ҳама аз дохил аст, на аз хориҷ.

Ӯ дар ин шарҳи тӯлонӣ, ки дар саҳифааш дар Фейсбук рӯзи 17-уми январ гузоштааст, навишааст, яке аз ин сабабҳо бемайлии мақомоти Тоҷикистон барои дарки воқеият дар кишвар аст.

Ба навиштаи ӯ, дар кишвар сол ба сол вазъи иқтисодӣ бадтар, даромади мардум камтар ва бекорӣ ҳам саросарӣ мешавад. Як сабаби дигар, таҳаммулнопазирии мутлақи ҳукумат нисбат ба танқид аст, ки мунтақидонро ҳадаф мегирад ва ё мустақим ба феҳрасти бадхоҳон ё душманони мардум ворид мекунад.

Сабаби дигар ва асоситарин, ба гуфтаи хабарнигори тоҷик, сарватмандони ҳарису золиму худхоҳи Тоҷикистонанд, ки фарзандонашон дар пеши чашми мардуми камбизоат бо мошинҳои гаронбаҳо мегарданд.

Ба гуфтаи Саломиддин Мирзораҳматов, агар вазъ чунин идома кунад, мардуми фақир мисли Қазоқистон бо калтаки чӯбиву оҳанӣ ва табар қиём мекунанд ва муасисаву қасрҳои сарватмандонро аз байн мебаранд.

Дар Қазоқистон аввали моҳи январ тазоҳурот ба зидди болоравии қимати гази моеъ ба ошӯбу бархӯрд бо нерӯҳои амниятӣ печид. Дар натиҷаи нооромиҳо ба гуфтаи мақомот бештар аз 200 нафар кушта шуданд.

Раҳбари ҳукумати Толибон: "Моро эътироф кунед"

Мулло Муҳаммад Ҳасан Охунд, иҷрокунандаи мақоми нахуствазири "Толибон"

Иҷрокунандаи вазифаи раиси ҳукумати Толибон дар Афғонистон аз ҳукуматҳои ҷаҳон хост, ки "аморати исломӣ"-и онҳоро ба расмият бишиносанд.

Ин гуруҳ дар моҳи августи соли 2021, баъди аз Афғонистон рафтани нирӯҳои байналмилалӣ ба раҳбарии Амрико назорат бар аксар қаламравҳои кишвари ҷангзадаро ба уҳда гирифт.

Мулло Муҳаммад Ҳасан Охунд, ки ҳаммуассиси “Толибон” мебошад, рӯзи 19-уми январ дар нишасти матбуотӣ дар Кобул гуфт: “Аз ҳама ҳукуматҳо, бахусус кишварҳои исломӣ, тақозо мекунам, ки бояд аз пайи эътироф шаванд”.

Ӯ афзуд, ин гурӯҳи тундрави исломӣ тамоми шартҳои заруриро барои истиқрори сулҳу амният иҷро кардааст. Мулло Охунд инчунин даъват кард, ки дороиҳои бандмондаи Афғонистон дар хориҷа аз таҳрим озод шуда, ба ин кишваре, ки миллионҳо сокинаш бо буҳрони башарӣ дучор ҳастанд, ёрӣ дода шавад.

Ин даъват дар ҳоле садо медиҳад, ки Иттиҳоди Аврупо ахиран гуфт, тарҳеро бо арзиши 268 мллион евро барои мадад ба мардуми Афғонистон рӯи даст гирифт.

Аз замони ба қудрат расидани “Толибон” ҳанӯз ҳукумати онҳо эътироф нашудааст. Бархе кишварҳои Осиёи Марказӣ бо “Толибон” гуфтугӯҳои дипломатиро ба роҳ мондаанд, вале Тоҷикистон хоҳони ташкили ҳукумати фарогир бо ҷойгоҳи вижаи тоҷикон ва қавмҳои дигар дар Афғонистон аст.

Мулоқоти Ашрафҷон Гулов бо вазири дифои Туркия

Акси мулоҷоти Ашрафҷон Гулов ва Хулуси Акар аз сайти mfa.tj

Мақомоти тоҷик гуфтанд, дар шаҳри Анкара мулоқоти сафири Тоҷикистон дар Туркия бо вазири дифои ин кишвар баргузор шуд. Дар иттилоияи вазорати корҳои хориҷии Тоҷикистон омадааст, ки сафир Ашрафҷон Гулов рӯзи 18 январ дар Вазорати мудофиаи миллии Туркия бо вазир Хулуси Акар дидору гуфтугӯ кард. Дар хабари расмӣ дар бори ҷузъиёти ин дидору гуфтугӯҳо иттилои зиёд нашр намешавад, ба ҷуз ин ки, ба навиштаи вазорат, “ҷонибҳо ҳолати кунунӣ ва дурнамои ҳамкориҳои ду кишварро дар самти мудофиа мавриди муҳокима қарор дода, вобаста ба вазъи минтақа ва ҷаҳон табоддули афкор намуданд”.

Хулуси Акар, вазири мудофиаи Туркия тобистони соли 2021 дар сафараш ба Тоҷикистон бо мақомоти маҳаллӣ масъалаи мубориза бо терроризмро баррасӣ карда буд. Ба навиштаи хабаргузориҳои Туркия, мубориза бо созмони ФЕТО-и Фатҳуллоҳ Гюлен, аз мавзуъҳои дигари гуфтугӯи Хулуси Акар бо мақомоти тоҷик будааст. Ҳукумати Туркия, созмони ФЕТО-ро ба Фатҳуллоҳ Гюлен, руҳонии туркро рабт дода, онро дар кӯшиши табаддулоти соли 2016 муттаҳам мекунад. Худи Фатҳуллоҳ Гюлен, ки феълан дар Амрико ба сар мебарад, иттиҳоми ҳукумати Туркияро беасос мехонад. Дар Тоҷикистон мактабҳои байналмилалии ҷузъе аз шабакаи Гюлен баста шудаанд.

Туркия дар низои Арманистону Озарбойҷон ба дувумӣ кӯмаки ҳарбӣ кард ва ба вазъи амниятӣ дар кишварҳои туркзабони Осиёи Марказӣ ҳассосият нишон медиҳад. Ахиран яке аз ҳарбиёни бонуфузи бознишаста аз президенти Туркия Раҷаб Тайиб Эрдуғон хост, кишварҳои туркзабонро ба таъсиси артиши ягона даъват намояд.

Аз эҷоди равобити дипломатии миёни Тоҷикистону Туркия 29 январи имсол 30 сол пур мешавад ва ҳамкориҳои ду кишвар бештар дар бахши тиҷорату савдо чашмрас аст. Ба иттилои ВКХ Тоҷикистон, соли 2018 ҳаҷми додуругирифти тиҷоратии миёни ду кишвар беш аз 401 миллион долларро ташкил додааст.

Раҳбари СҶТ: “Пандемия тамом нашудааст”

Раҳбари Созмони ҷаҳонии тандурустӣ (СҶТ) гуфт, пандемияи COVID-19 ҳанӯз тамом нашудааст ва навъи Омикрони коронавирус боиси афзоиши ҳолатҳои сироятшавӣ мешавад. Тедрос Аданом Гебреусус дар як изҳороташ рӯзи 18-уми январ аз бархе хусусиятҳои Омикрон ёдовар шуд ва гуфт, бо андешаи ин ки ин навъи коронавирус хатари камтар ва нишонаҳои сабуктар дорад, хотирҷамъ шуд. Ӯ гуфт, “Омикрон метавонад чандон сангин набошад, вале дар умум, гуфтани ин ки ин як бемории сабук аст, фикри гумроҳкунанда мебошад”. Раҳбари СҶТ гуфт, “лутфан ба хато роҳ надиҳед: Омикрон боиси бистаришавиву марги инсонҳо ҳам мешавад ва ҳатто бо шаклҳои сабуктар ба беморхонаҳо бистарӣ мешаванд”. Ҳоло ба иттилои СҶТ, ҳамин навъи коронавирус дар аксар кишварҳои ҷаҳон паҳн шудааст. Дар Тоҷикистон дар бораи вуҷуди навъи Омикрон иттилое дар даст нест, вале ба шикояти бисёриҳо, дар ҳафтаҳои охир ҳолатҳои гирифторӣ ба сирояти монанд ба коронавирус зиёд мешавад ва бархе тахмин мекунанд, ки эҳтимолан ин ҳамон навъи Омикрон мебошад. Дар бораи ба кишварҳои онҳо роҳ ёфтани ин навъи коронавирус аллакай кишварҳои ҳамсояи мисли Қирғизистону Узбекистон хабар додаанд.

Сафари Блинкен ба Украина

Фурудгоҳи Борисполи Киев, 19 январ

Котиби давлатии ИМА Энтони Блинкен рӯзи 19 январ ба нишони пуштибонӣ аз Украина дар пасманзари нигарониҳо аз эҳтимоли ҳамлаи Русия ба Украина ба шаҳри Киев расид. Қарор аст Блинкен бо президент Владимир Зеленский ва дигар мақомоти Украина дидору гуфтугӯ кунад. Рӯзи 20-уми январ ӯ ба Берлин меравад, то дар ҷаласае бо иштироки мақомоти Бритониё, Фаронса ва Олмон як эътилофи воҳиди ғарбӣ ба ҳимояти Украинаро эҷод кунад.

Инчунин рӯзи 21 январ дар Женева мулоқоти Блинкен бо вазири корҳои хориҷии Русия Сергей Лавров барпо мешавад. Ин дипломатҳои баландпоя рӯзи 18 январ бо ҳам як сӯҳбати телефонӣ доштанд.

Русия бо истиқрори 100 ҳазор сарбозу муҳимоти ҷангиаш дар хати сарҳад бо Украина ва ташкили машқҳои низомӣ дар Беларус хатари ҳамла ба Украинаро ба вуҷуд овардааст. На танҳо дар Киев, балки дар бисёр пойтахтҳои кишварҳои ғарбӣ аз хатари сар задани низои азими наве сӯҳбат мешавад.

Ҷен Псаки, сухангӯи Кохи Сафед рӯзи 18-уми январ дар баробари хабарнигорон гуфт, “ин як ҳолати бисёр хатарнок аст. Мо ҳоло дар як марҳилае қарор дорем, ки Русия метавонад ҳар лаҳза ба Украина ҳамла кунад”.

Азимтарин мавриди истиқрори нирӯҳои Русия дар сарҳади Украина ба ҳодисаҳои атрофи ишғоли нимҷазираи Қрим дар соли 2014 рабт мегирад. Он замон Русия ин қаламравро забт кард, аз ҷудоиталабони украинӣ дар шарқи Украина ҳимоят кард ва дар натиҷаи низоъҳо аз он замон то кунун 13 ҳазору 200 нафар кушта шуданд. Ин амалҳои Маскавро бисёр кишварҳо маҳкум карданд. Худи Русия ҳама гуна нақшаи эҳтимолии ҳамла ба Украинаро рад карда НАТО-ро барои нияти ба узвияташ қабул кардани Украина интиқод кардааст.

Раиси Бонки Миллии Тоҷикистон пули муҳоҷиронро "муҳим" хонд

Ҳоким Холиқзода, раиси Бонки миллии Тоҷикистон.

Ҳоким Холиқзода, раиси Бонки миллии Тоҷикистон, дар як ҷаласа бо ширкати роҳбарони бонкҳои кишвар гуфтааст, пулҳои фиристодаи муҳоҷирати корӣ барои иқтисоди кишвар муҳим аст. Ин ҷаласа шаш моҳ пеш баргузор шуда, ҷузъиёти онро тоза маҷаллаи Бонки Миллӣ нашр кардааст.

Нашрияи "Бонкдорӣ, тараққиёт, ҷаҳонишавӣ" аз қавли раиси Бонки миллӣ навиштааст, "пулҳои интиқолӣ аз муҳоҷирон омиле мебошад, ки ба ҳамаи нишондиҳандаҳои макроиқтисодӣ, хусусан ба устувории пули миллӣ ва нигоҳ доштани қобилияти харидории аҳолӣ таъсири мусбат расонда, ба самаранокии сиёсати пулию қарзӣ ва сиёсати фискалии давлат мусоидат менамоянд".

Дар ин нишаст Ҳоким Холиқзода омори пулҳои фиристодаи муҳоҷиронро ошкор накардааст. Ӯ танҳо гуфтааст, сарфи назар аз пайомадҳои бемории COVID-19 интиқоли пулҳои муҳоҷирон дар ним соли аввали соли гузашта назар ба як сол пеш зиёдтар шудааст.

Изҳороти Раиси Бонки миллӣ дар ҳоле садо медиҳад, ки роҳбари қаблии ин ниҳод талош мекард, нақши пулҳои муҳоҷиронро дар иқтисод камранг ҷилва диҳад. Ҷамшед Нурмуҳаммадзода, раиси пешини Бонки миллӣ, моҳи январи соли 2017 зимни нишасти хабарӣ ба рӯзноманигорон гуфт, болои пули муҳоҷирони тоҷик ва таъсири он ба иқтисоди кишвар "аксент" ё таъкид накунед.

“Иқтисоди мо ба ҷуз аз пули муҳоҷирон чизи дигар надорад?"-, суол гузошта буд Нурмуҳаммадзода. Изҳороти онвақтаи раиси вақти Бонки миллӣ вокунишҳои зиёдро ба миён оварда буд.

Тоҷикистон яке аз он кишварҳои ҷаҳон аст, ки иқтисодаш сахт пойбанди пули муҳоҷирони корӣ мебошад. Бино ба оморҳои гуногун дар Русия андаке бештар аз 1 миллион нафар аз аҳолии Тоҷикистон кору иқомат мекунанд. Солона онҳо ба кишвар миллиардҳо доллар мефиристанд, то оилаҳояшон рӯз гузаронанд ва зиндагии муносибтаре дошта бошанд.

Мақомоти қазоқ теъдоди кушташудаҳо дар беназмиҳоро 227 кас гуфтанд

Эътирозҳои мардумӣ дар Қазоқистон.

Дар чанд рӯзи охир дар беморхонаҳои Қазоқистон ду тани дигар аз маҷруҳони бетартибиҳои ибтидои моҳи январи он кишвар фавтидаанд. "Дар робита ба фавтидаҳо дар беморхонаҳо: то имрӯз шумори фавтидаҳо ба 177 расид", - гуфт Ажар Гиният, вазири ҳифзи тандурустии Қазоқистон рӯзи 18-уми январ.

Пештар аз ин вазорат аз 175 фавтида дар беморхонаҳо хабар дода буд. Додситонии кулли Қазоқистон рӯзи 15 январ иттилоъ дода буд, ки ба сардхонаҳои он кишвар 225 фавтидаро овардаанд. Ба ин тартиб, теъдоди умумии фавтидаҳо дар бетартибиҳои ибтидои моҳи январи Қазоқистон ба 227 кас расид.

Вазорати ҳифзи тандурустии Қазоқистон хабар дод, "дар рӯзҳои бетартибӣ 2739 кас барои дарёфти ёрии тиббӣ ба беморхонаҳо муроҷиат кардааст". Аз ин шумор 14 тан дар шуъбаҳои эҳё бистарӣ шудааст.

Рӯзи 2 январ дар Қазоқистон зидди болоравии қимати газ эътироз шуруъ шуд. Ин эътирозҳо тамоми Қазоқистонро фаро гирифт. Мақомоти Қазоқистон гуфтанд, "20 ҳазор террорист" ба шаҳри Алмато ҳамла кард, ки гӯё дар хориҷ омодагӣ дида будаанд. Баъдтар вазорати корҳои дохилии Қазоқистон гуфт, манзур шумори умумии ширкатдорони эътирозҳо дар шаҳр буд. Дар робита ба ин, Қосимҷомарт Тоқаев, президенти Қазоқистон аз Созмони паймони амнияти дастаҷамъӣ ё СПАД кӯмаки низомӣ дархост кард.

Роберта Метсола - зодаи Малта раиси Порлумони Аврупо шуд

Роберта Метсола, раиси нави Порлумони Аврупо.

Роберта Метсола - сиёсатмадори зодаи Малта раиси Порлумони Аврупо интихоб шуд. Метсола ҷавонтарин раиси Порлумони Аврупо дар тамоми тӯли таърихи ин созмон аст: вай ҳамагӣ 43 сол дорад. Метсола ҳамчунин нахустин намояндаи Малта - хурдтарин кишвари Иттиҳоди Аврупо - аст, ки яке аз сохторҳои Иттиҳодро роҳбарӣ мекунад.

Метсола ҷонибдори сарсахти қонунгузорӣ дар бахши исқоти ҳамл аст, аммо пеш аз интихоб шуданаш ба ҳайси раиси порлумон вай ваъда кард, ки аз мавқеи аксари вакилон ҷонибдорӣ мекунад.

Роберта Метсола ҳамсари вакили Порлумони Аврупо аз Финландия Укко Метсола аст. Онҳо чаҳор фарзанд доранд.

Ахиран дар Порлумони Аврупо бо ширкати роҳбари сиёсати хориҷии Иттиҳоди Аврупо Жозеп Боррел гуфтугӯ сурат гирифт. Мавзуи гуфтугӯ ташаннуҷи авзоъ дар марзи Украина бо Русия буд. Боррел гуфт, дар марзи Украина 140 ҳазор низомии рус ҷамъ омадааст. Боррел гуфт, дар сурате, ки агар Русия ба Украина ҳамла кунад, Иттиҳоди Аврупо нисбати Русия таҳримҳои сахт ҷорӣ мекунад.

Дар Узбекистон ба тавлиди ҳавопаймоҳои бесарнишин шуруъ карданд

Ҳавопаймои бесарнишини "Лочин".

Узбекистон нахустин шуда дар Осиёи Марказӣ ба истеҳсоли ҳавопаймоҳои бесарнишин шуруъ кард. Дар ин бора аз Кумитаи давлатии саноати ҳарбии Узбекистон хабар доданд.

Маркази илмиву истеҳсолии маҷмаи ҳавопаймоҳои бесарнишин ба дастгоҳҳои бесарнишини "Лочин" шуруъ кардааст.

Марказ хабар намедиҳад, ки истеҳсоли бесарнишинҳо дар кадом қисмати Узбекистон ба роҳ монда шудааст ва аз рӯи намунаи кадом кишвар бесарнишин сохта мешавад. Ҳамзамон хабар дода намешавад, ки барои истеҳсоли бесарнишинҳо чи қадар маблағ ҷудо шудааст.

Бино ба иттилои мақомоти Узбекистон, дрон ё бесарнишинҳо бо чанд ҳадаф истифода хоҳанд шуд: иҷрои вазифаҳои иктишофӣ, зарба задан, назорат, дарёфти иттилоъ ва инчунин дар бахши кишоварзиву ҷангалбонӣ ва ғайра.

Мунтақиди сарсахти Кремлин аз тарафдоронаш хост, аз чизе наҳаросанд

Алексей Навалнийро 17-уми январи соли 2021 дастгир карданд

Алексей Навалний, мунтақиди сарсахти Кремлин, мегӯяд, бо гузашти як сол аз зиндонӣ шуданаш, ҳеч гуна пушаймонӣ надорад. Вай аз ҷонибдоронаш хостааст, аз чизе наҳаросанд.

Навалний рӯзи 17-уми январ аз зиндон дар як навиштааш дар Инстгарам гуфт, намехоҳад, то мардуми, ба гуфтаи ӯ, содиқ пас аз ин дар тарс ба сар баранд.

Алексей Навалний акси муштараки худ ва ҳамсарашро дар ҳоле ки дар либоси зиндониён дида мешавад, низ нашр кард.

Созмони Афви Байнулмилал дар нахустин солгарди боздошт ва ҳабси Навалний аз ҷомеаи ҷаҳонӣ хост, то садояшонро барои раҳоии ӯ баланд кунанд.

Навалний моҳи августи соли 2020 заҳролуд шуда, барои муолиҷа ба Олмон рафта буд. Вай моҳи январи соли 2021, ҳангоми бозгашт ба Русия, дар фурудгоҳи Маскав дастгир шуд. Додгоҳ ӯро дуним сол аз озодӣ маҳрум кард.

Дар робита ба ҳаводиси Қазоқистон 695 парванда кушодаанд

Алмаато, 12-уми январи 2022

Ёвари додситони кулли Қазоқистон Азамат Сергазин рӯзи 18-уми январ дар як нишасти хабарӣ иттилоъ дод, ки дар робита ба ҳаводиси моҳи январи ин кишвар ҳудуди 700 парванда боз шудааст.

"Тафтиши пеш аз додгоҳии 695 парванда дар бораи ҷиноятҳои махсусан вазнин, аз ҷумла терроризм, куштор, таблиғ ва даъват ба ғасби ҳокимият дар Қазоқистон оғоз шудааст," – гуфт Сергазин.

Пештар додситонии кулли Қазоқистон хабар дода буд, ки роҷеъ ба ҳаводиси моҳи январ 546 парванда тафтиш мешавад. Ин ниҳод гуфт, 100 шаҳрванди Қазоқистон, ки "беасос дастгир шуда буданд", озод гаштаанд.

Ҳомиёни ҳуқуқ мегӯянд, дар миёни онҳое, ки дар натиҷаи эътирозҳои оммавии Қазоқистон дар аввали моҳи январ дастгир, бедарак ё кушта шудаанд, шахсони бегуноҳ низ ҳастанд.

Ҳомиёни ҳуқуқи байнулмилалӣ ва маҳаллӣ аз мақомоти Қазоқистон даъват карданд, ки иштирокдорони тазоҳуротҳои осоиштаро ба ҷавобгарӣ накашанд.

Қирғизистон мехоҳад, шаҳрвандони зиндонияшро аз Тоҷикистон барад

Акс аз бойгонӣ

Идораи Омбудсмени Қирғизистон оид ба ҳуқуқи инсон аз Додситонии кулли ин кишвар дархост кардааст, ки имкони истирдоди ду маҳбуси қирғизистониро аз Тоҷикистон ба ватан баррасӣ кунад.

Ба огаҳии идораи омбудсмен, сокини ноҳияи Лайлаки вилояти Бодканди Қирғизистон ба ин ниҳод муроҷиат карда, гуфтааст, шавҳари ӯ - Нооман Самадов ҳамроҳи Саидакмат Артиков аз сӯи мақомоти интизомии Тоҷикистон дастгир ва ба зиндон маҳкум шудаанд. Самадов 2 сол ва Артиков 18 сол аз озодӣ маҳрум гаштаанд.

"Худи маҳкумшудаҳо айбҳои эъломшударо беасос ва дорои ангезаи сиёсӣ медонанд. Аз шикоят ба зинаҳои болоии додгоҳӣ ҳам даст кашидаанд," - гуфтанд дар идораи омбудсмен.

Наздикони Самадов ва Артиков аз мақомоти Қирғизистон дархост кардаанд, ки онҳоро аз маҳбаси Тоҷикистон ба ватан истирдод кунанд. Бинобар ин, Идораи Омбудсмени Қирғизистон аз Додситонии кулли он кишвар дархост кардааст, ки имкони истирдоди қирғизистониҳоро аз маҳбаси Тоҷикистон ба ватан баррасӣ намояд.

Ба гуфтаи наздикони Самадов ва Артиков, ин ду шаҳрванди Қирғизистон, ки моҳи сентябри соли 2021 дастгир гаштаанд, дар Тоҷикистон нахуст ба убури ғайриқонунии марз ва дертар ба ҷосусӣ гунаҳкор шудаанд.

Нурсултон Назарбоев аз худ дарак ва гуфт, дар Қазоқистон аст

Нурсултон Назарбоев соли 2019 аз мансаби президенти Қазоқистон истеъфо дод, вале дар қудрат монд

Нурсултон Назарбоев, раиси ҷумҳури собиқи Қазоқистон, ки аз 28-уми декабр ба ин сӯ аз мазҳари ом дур шуда буд, рӯзи 18-уми январ аз худ дарк дод ва дар як суханрониаш гуфт, ки миёни элитаҳои сиёсии кишвар ҳеҷ ихтилофоте вуҷуд надорад. Ӯ гуфт, дар замони ҳукуматдориаш дар Қазоқистон, ба дастовардҳои зиёде ноил шудааст ва аз мардум хост, ки раиси ҷумҳури феълӣ Қосимҷомарт Тоқаевро дастгирӣ кунанд.

Нурсултон Назарбоев, ки се даҳсола Қазоқистонро раҳбарӣ мекард, ду сол пеш аз мансаби президенти канор рафта буд, вале ҳамчун “Элбаси” (Пешвои миллат) раиси Шӯрои амниятро бар душ дошт. Бо оғози нооромиҳои аввали январ, Нурсултон Назарбоев вазифаи раиси Шӯрои амнияти миллиро бо ихтиёри худ ба Қосимҷомарт Тоқаев, раиси ҷумҳурии ин кишвар супурд.

Пас аз оғози тазоҳурот дар ин кишвар, Назарбоев дар хомӯшӣ ба сар мебурд ва шоеаҳое ҳам паҳн шуд, ки ӯ бо наздиконаш аз Қазоқистон берун рафтааст.

Аз оғози моҳи январ бо сабаби гаронии гази моеъ дар Қазоқистон мардум эътироз карданд. Ин эътироз дар Алмато ба хушунат печид ва дар даргириҳо даҳҳо нафар кушта ва захмӣ шудаанд. Президенти Қазоқистон гуфт, ки "террористон" ба ин кишвар ҳамла кардаанд. Кишварҳои узви СПАД, аз ҷумла Тоҷикистон барои назорати вазъ бо даъвати Қазоқистон ба ин кишвар нерӯ фиристоданд.

NYT: Русия хонаводаи дипломатҳояшро аз Украина берун мебарад

Намояндагии расмии Русия дар Украина

Дипломатҳои ду консулгарии Русия дар Украина амр гирифтаанд, ки барои тарк кардани қаламрави ин кишвар омодагӣ бинанд. Дар ин бора нашрияи "The New York Times" бо истинод ба як масъули баландпояи Хадамоти махсуси Украина хабар додааст.

Ҳамсуҳбати нашрия гуфтааст, 18 нафар, асосан занону кӯдакони дипломатҳои рус 5-уми январи имсол Украинаро тарк карданд. Ҳамчунин, ҳудуди 30 кас давоми рӯзҳои охир аз сафорати Русия дар Киев ва консулгарии он кишвар дар Лвов рафтанд.

Намояндаи расмии Иёлоти Муттаҳида мегӯяд, Вашингтон аз ин "омодагиҳо" хабар дорад. "Мо дар бораи он ки ҳукумати Русия барои берун бурдани аъзои хонаводаи дипломатҳои худ дар Украина дар охирҳои моҳи декабр ва аввали моҳи январ омодагӣ медид, хабар дорем," -- афзудааст ӯ.

Дар Вазорати корҳои хориҷии Русия дар шарҳи хабари берун рафтани хонаводаи дипломатҳо аз Украина ба "Интерфакс" танҳо гуфтаанд, ки сафорати ин кишвар дар шаҳри Киев ба таври муқаррарӣ кор мекунанд.

Рӯзноманигори қазоқ Махамбет Абжан "то ҳол бедарак аст"

Махамбет Абжан

Рӯзноманигор Махамбет Абжан, ки дар авҷи эътирозҳои оммавӣ дар Қазоқистон бедарак гашта буд, то ҳол пайдо нашудааст. Наздикони рӯзноманигор мегӯянд, ӯ аз 6-уми январи имсол ба ин сӯ беному нишон гаштааст.

"Вакили дифоъ ба Вазорати корҳои дохилии Қазоқистон муроҷиат кард. Дар онҷо гуфтанд, ки рӯзноманигорро дастгир накардаанд. Мо мехоҳем, дар ин бора расман посух диҳанд. Қадамҳои минбаъдаи мо низ аз он чи дар посух гуфта мешавад, вобастааст," - изҳор дошт ҳамсари рӯзноманигор Гулзира Дуйсембоева.

Ба гуфтаи Дуйсембоева, як рӯз пеш аз бедаракшавии шавҳараш кормандони пулис дар либоси мулкӣ ба хонаи онҳо омада, талаб карданд, ки дарро кушоянд. Рӯзноманигор дарро накушодааст. Кормандони пулис гуфтаанд, ҳамсояҳо шикоят кардаанд, ки гуё аз хонаи рӯзноманигор сарусадои баланд шунида мешавад.

Абжан эътирозҳои оммавии 4-уми январ дар пойтахти Қазоқистонро бозтоб медод ва субҳи 6-уми январ аз хона берун шуда, то ҳол бедарак аст. Номи ӯ дар рӯйхати расмии бедаракшудаҳо дида намешавад. Пулис 12-уми январ гуфтааст, ки рӯзноманигорро дастгир накардаанд.

"Салла пӯшед, ришро қайчӣ накунед." Дастури нави Толибон ба мардон

Толибон дар Урузгон

Толибон дар вилояти Урузгони Афғонистон ба мардон дастур додаанд, ки қайчӣ кардани ришашонро бас кунанд ва ба ҷойи кор бо салла оянд.

Дар моҳи августи соли гузашта, вақте Толибон Афғонистонро ишғол карданд, бо ҳадафи дарёфти эътирофи байналмилалӣ исрор меварзиданд, ки аз ифрот даст кашида, роҳи муътадилро пеш мегиранд. Аммо бисёре аз ҳомиёни ҳуқуқ бо ишора ба расонаҳои маҳаллии афғон мегӯянд, сухани Толибон як ва амалашон дигар аст.

Рӯзи 16-уми январ дар як ҷамъомад Мавлавӣ Таййиб, намояндаи баландпояи Толибон дар вилояти Урузгон гуфтааст, мардум мехоҳад, бар пояи шариати исломӣ зиндагӣ кунад.

Ӯ гуфтааст: "Тамоми кормандон бояд сиёсати Аморати исломии Афғонистонро, ки тибқи шариати исломӣ асос ёфтааст, дарк кунанд." Ва афзудааст, ки тамоми кормандон бояд аз қайчӣ кардани ришашон даст кашида, салла дар сар ба кор ҳозир шаванд.

Чин фурӯши билетро ба Бозиҳои олимпии Пекин мутаваққиф кард

Коргарон дар парки олимпӣ. Пекин, 4-уми январи 2022

Чин бо ишора ба пандемияи коронавирус фурӯши билетро барои тамошои бозиҳои олимпии Пекин боздошт. Бозиҳои зимистонаи олимпӣ дар пойтхати Чин 4-уми феврали имсол ифтитоҳ меёбанд.

Тибқи барнома, масъулони бозиҳои олимпӣ ва гурӯҳи мунтахаби бинандагон ба тамошои бозиҳо даъват шуда, бар пояи дастурҳои пешгирӣ аз сирояти COVID-19 мусобиқаҳоро пайгирӣ мекунад.

Пештар Чин эълон кард, ки ҳаводорони бозиҳои олимпӣ аз кишварҳои дигар имкон нахоҳанд дошт, ки ба Пекин рафта, олимпиадаро бинанд.

Варзишгарон ва мураббиён бояд тибқи дастури зидди коронавирус амал кунанд. 15-уми январ дар Чин аввалин мавриди гирифторӣ бо навъи Омикрони коронавирус ташхис шуд.

Боздошти як зани тоҷикистонӣ дар Украина

Акс аз бойгонӣ

Мақомоти Украина як зани 32-соларо аз Тоҷикистон бо гумони узвият дар созмонҳои террористӣ дар фурудгоҳи шаҳри Одесса дастгир кардаанд.

Аз зан ном бурда намешавад. Ба иттилои расмӣ, ӯро Интерпол ё пулиси байнулмилалӣ меҷуст.

Хадамоти давлатии марзбонии Украина гумонбарро ба кормандони пулиси миллӣ супурдааст ва “масъалаи истирдодаш дар ҳоли баррасист”.

Ҳафтаи гузашта дар шаҳри Қазони вилояти Тотористони Русия як зани 43-солаи тоҷикистониро бо иттиҳоми таблиғи гурӯҳи террористӣ боздошт карданд. Ин зан, ки дар Қазон ба сар мебурд, бо дархости мақомоти Тоҷикистон дастгир гардидааст.

Додгоҳи шаҳри Қазон 14-уми январи имсол ӯро барои як моҳ ба ҳабс гирифт. Эҳтимол ин зан ба Тоҷикистон истирдод шавад. Дар ватан ба ӯ аз 12 то 20 сол зиндон таҳдид мекунад.

Ба сабаби маълум набудани номи гумонбарон мавқеи онҳо ва ё наздикону вакилони мудофеашон низ дастрас нест.

Ба Тоҷикистон 1 миллион дона ваксинаи Moderna додаанд

Фурудгоҳи Душанбе, 26-уми июли соли 2021. Як бахши воксинаҳои ширкати Moderna вориди Тоҷикистон шуд

Созмони Ҷаҳонии Тандурустӣ ба Тоҷикистон як миллион воя ваксинаи сохти ширкати Moderna додааст. Бунёди кӯдакони Созмони Милал гуфт, ин миқдор ваксинаи зидди коронавирус рӯзи 17-уми январ ба Душанбе оварда шуд.

Ҳукумати Тоҷикистон узви барномаи COVAX-и Созмони Ҷаҳонии Тандурустӣ – ниҳоди вобаста ба Созмони Милал – аст ва дар як соли охир аксар ваксинаҳои зидди коронавирусро маҳз тавассути ҳамин барнома гирифтааст.

Аз 3-юми июли соли 2021 дар Тоҷикистон эмшавии зидди коронавирус барои сокинони аз 18-сола боло ҳатмӣ аст ва мақомот дар бораи нишондодҳои баланди эмшавӣ гузоришҳо медиҳанд. Вале ҳамоно эҳсоси нобоварӣ ва майли сарди сокинон ба ваксинагирӣ мушоҳида мешавад.

Ба навиштаи хабаргузориҳои русӣ, то оғози ҳафтаи ҷорӣ дар Тоҷикистон наздик ба 69% калонсолон воксинаи аввал ва 57% ваксинаи дуюмро дастрас кардаанд.

Дар як соли охир тавассути барномаи COVAX ба Тоҷикистон беш аз 9 миллион ваксина ворид карда шудааст.

Дар муассисаҳои тиббии Тоҷикистон панҷ навъи ваксинаи зидди коронавирус – AstraZeneca-и сохти Ҳинд, CoronaVac-и сохти Чин, Moderna ва Pfizer/BionTech-и сохти Амрико ва Олмон ва "Спутник V"-и Русия дастрас мебошанд.

Мақомот дар Тоҷикистон мегӯянд, ки аз замони шурӯи пандемияи коронавирус 17 ҳазору 95 мавриди гирифторӣ ба COVID-19 сабт шуда, 124 нафар аз ин вирус ҷон бохтаанд. Омори ғайрирасмии беморону қурбониёни коронавирус ба маротиб бештар гуфта мешавад.

Ёфтҳои бештар

XS
SM
MD
LG