Пайвандҳои дастрасӣ

Хабари нав

Хабарҳо

Дар мактабҳои Узбекистон навбатдории шабонарӯзӣ ташкил шуд

Дар мактабҳои Узбекистон аз 10 декабр то 15 январи соли равон дар се баст навбатдорӣ ташкил карда шудааст. Ба гуфтаи омӯзгорон, навбатдориро ба хотири таъмини амният дар рӯзҳои ҷашни солинавӣ роҳандозӣ карданд. Як омӯзгор аз вилояти Ҷиззахи Узбекистон ба шарти ифшо нашудани номаш гуфт, бонувони омӯзгор рӯзона ва мардон шабона навбатдорӣ мекунанд.

"То ҷое медонам, ин гуна ҳолат дар тамоми мактабҳо ҳаст. Навбатдории шабонарӯзӣ аз 10 декабр оғоз шудааст. Мо мардон аз соати 8-и бегоҳ то 8-и субҳ меистем. Ду басти дигар, 6-соатӣ рӯзона меистанд. Бонувонон рӯзона навбатдоранд", - афзуд.

Омӯзгори яке аз мактабҳои ноҳияи Хоҷайлии Қарақалпоқистон мегӯяд, барои навбатдорӣ маош намегиранд. "Аз ҳама дида барои мардони омӯзгор мушкил аст. Шаб навбатдорӣ мекунанд ва рӯз кор мебароянд. Ин меҳнати иҷборӣ аст ва ҳеч маблағе ҳам намегирем. Ин нақзи Кодекси меҳнат аст ва ягон кас ҳам тафтиш намекунад", - изҳор дошт ӯ.

Ҳамкорони мо муайян карданд, ки навбатдории шабонарӯзӣ дар тамоми мактабҳои Узбекистон роҳандозӣ шудааст. Як масъули Идораи маорифи Ҷиззах низ ин хабарро тасдиқ кард. Дар Вазорати маорифи Ӯзбекистон гуфтанд, ки дар бораи ташкили навбатдориҳои шабонарӯзӣ дар мактабҳо хабар надоранд.

"Вазорат ин гуна дастур надодааст. Агар омӯзгоронро маҷбур доранд, бигзор ба воситаи рақамҳои боварии 1006 занг зананд ва ё ариза бинависанд. Вазорат барои омӯзиши меҳнати иҷборӣ ва ҷамъоварии пул коллегияи махсусеро ташкил кардааст. Агар омӯзгорон шикоят кунанд, мо онро хоҳем омӯхт", - гуфт як масъули хадамоти матбуотии вазорат.

Ҳамаи хабарҳои имрӯзро дар инҷо бихонед

Ҳукумат Толибонро сабабгори таъхир дар табодули асирон номид

Анас Ҳаққонӣ, яке аз раҳбарони шабакаи Ҳаққонӣ аст, ки гуруҳи террористӣ ба ҳисоб меравад ва мумкин аст, ӯро ҳам озод кунанд.

Ҳукумати Афғонистон гуфт, таъхир дар табодули се мақоми Толибон бо ду гаравгони ғарбӣ ба айби ин гурӯҳи ифротгаро ба таъхир афтодааст. Дафтари матбуоти раёсати ҷумҳурии Афғонистон рӯзи 16-уми ноябр гуфт, “зиндониёни Толиб ҳанӯз дар дасти ҳукумат ҳастанд.” Сиддиқ Сиддиқӣ, сухангӯи ҳукумат рӯзи 16-уми ноябр дар Твиттер навишт, “Иҷро накардани шарти табодул аз тарафи Толибон сабаби таъхир дар ин раванд шудааст” ва афзуд, ҳукумат бо арзёбии вазъ, қарореро қабул мекунад, ки ба нафъи кишвар бошад. Ҳукумати Афғонистон нагуфтааст, ки Толибон кадом шарти табодули асирон бо гаравгононро иҷро накардааст. Ашраф Ғанӣ, раиси ҷумҳури Афғонистон рӯзи 12-уми ноябр гуфт, баъзе аз зиндониёни Толибро, ки дар зиндони Багром нигаҳ медоранд, “шартан” озод мекунанд. Раҳоии ҷангҷӯёни Толибро як қадами муҳими ҳукумат барои музокироти мустақим бо Толибон мешуморанд. Ин гуруҳ ҳукуматро дастнишондаи кишварҳои ғарбӣ номида аз гуфтугуи мустақим бо он дар бораи хотима додан ба ҷанг худдорӣ кардааст.

Ҳалокати 18 нафар дар таркише дар Ҳалаб

Ал -Боб саҳнаи ҷангҳои шадиде будааст.

Дар натиҷаи таркиши мошини бомбгузоришуда дар Ал-Боб як шаҳри шимолии Сурия 18 нафар кушта шудаанд. Дар ин бора фаъолони мухолифони Сурия ва вазорати дифои Туркия хабар дод, ки нерӯҳо дар ин шаҳр таҳти ҳимояти он қарор доранд. Созмони Нозири Ҳуқуқи Инсон дар Сурия, ки дар Лондон қароргоҳ дорад, рӯзи 16-уми ноябр гуфт, ки дар ин таркиш 19 нафар аз ҷумла 13 ғайринизомӣ кушта шуданд.

Ал-Боб дар вилояти Ҳалаб ҷойгир аст. “Медиа Сентер” -як маркази хабарии фаъолони мухолифон дар Ҳалаб гуфт, ки таркиш дар як ҷойи пуродам ва наздикии истгоҳи автобус сурат гирифтааст. Вазорати дифои Туркия гуфт, ки теъдоди қурбониён 18 нафар аст ва ҳамларо кори дасти ошӯбгарони курд номид. Туркия размандагони курдро террорист меномад ва мегӯяд, ки онҳо бо ҷудоиталабони курд дар дохили Туркия робита доранд. То кунун касе масъулияти ҳамла дар Ал-Бобро ба ӯҳда нагирифтааст.

Русия киштиҳои Украинаро бармегардонад

Киштиҳои Украина ҳангоми берун шудан аз Керч

Бино ба гузоришҳо, Русия се киштии тасарруфкардаи Украинаро ба зудӣ ба ин кишвар бармегардонад. Ҳарсе киштиро рӯзи 17-уми ноябр ҳангоми ҳаракат дар назди гулугоҳи Керч ва зери назорати нерӯҳои дарёии Русия мушоҳида кардаанд. Расонаҳои Украина ва Русия гуфтанд, ки мумкин аст, ҳарсе киштиро дар қаламравҳои байналмилалии обӣ ба мақомоти Украина супоранд. Аз ин пештар Андрей Ермак, дастёри раиси ҷумҳури Украина, дар бораи марҳилаи ниҳоии бозгардонидани киштиҳо хабар дод.

Русия киштиҳои хурди украиниро ноябри соли 2018 дар наздикии нимҷазираи Қрим боздошт кард. Маскав гуфт, ки киштиҳо ба қаламравҳои обии Русия ворид шуданд, ҳарчанд баъди ишғоли нимҷазираи Қрим дар соли 2014, бисёре аз кишварҳои ҷаҳон онро қаламрави Русия эътироф накардаанд. Мақомоти Украина иддаоҳо дар бораи вуруд ба қаламравҳои обии Русияро рад кардаанд. Маскав моҳи сентябр маллоҳони ҳамин киштиҳои украиниро бо баъзе аз зиндониёни рус иваз кард.

Владимир Зеленский, раиси ҷумҳури нави Украина баъди расидан ба ин мақом дар баҳори имсол, саъй дорад, ба муноқиша бо Русия поён бидиҳад. Дар ҷанги 6-солаи ҷудоиталабони тарафдори Русия ва ҳукумати Украина дар шарқи кишвар то кунун 13 ҳазор нафар ҳалок шудаанд. Қарор аст, раҳбарони Олмону Фаронсаву Украина ва Русия дар шаҳри Париж ҷамъ омада ва роҳҳои ҳалли муноқишаро баррасӣ кунанд.

Идомаи эътирозҳо ва ҳимояти Хоманаӣ аз қарори ҳукумати Эрон. ВИДЕО

Тазоҳурот дар шаҳри Исфаҳон дар рӯзи 16-уми ноябр

Оятуллоҳ Алии Хоманаӣ, раҳбари олии Эрон бо ҳимоят аз қарори ҳукумат дар бораи боло бурдани қимати бензин, мардумеро танқид кард, ки ба зидди ин қарор дар чанд шаҳри Эрон эътироз карданд. Рӯзи 17-уми ноябр дар баъзе аз гӯшаҳои Эрон тазоҳургарон бо пулиси зиддиюриш бархӯрд карданд. Бино ба гузоришҳо, дастрасӣ ба Интернет дар бисёре аз манотиқи кишвар аз ҷумла Теҳрон қатъ шудааст.

Эътироз дар Эрон баъди 15-уми ноябр баъди эълони маҳдуд кардани фурӯши бензин ва боло бурдани қимати он оғоз шуд. Дар шаҳри Сирҷон дар ҷанубушарқи Эрон рӯзи 16-уми ноябр як нафар дар ҷараёни тазоҳурот кушта шудааст. Бар асоси гузоришҳои тасдиқношуда, чаҳор нафар дар шаҳрҳои дигар аз ҷумла Беҳбаҳон, Исфаҳон ва Маривон ба ҳалокат расидаанд. Дар умум бино ба гузоришҳо дар 50 шаҳр тазоҳурот сурат гирифтааст.

Нигоҳе ба рӯзи дуввуми эътирозҳо ба афзоиши қимати нафт дар Эрон
лутфан мунтазир бошед

Феълан кор намекунад

0:00 0:03:17 0:00

Дар Эрон қимати бензин яке аз арзонтаринҳо дар ҷаҳон ба ҳисоб меравад, чун ҳукумат барои фурӯши он ёрона ва ё кӯмакпулӣ мепардозад. Ин кишвар соҳиби захираҳои азими нафту газ аст, вале ба сабаби таҳримоти байналмилалӣ наметавонад, истихроҷу коркарди онро зиёд кунад. Корхонаҳои коркарди нафт ҳам кӯҳна шудаанд ва ба сабаби таҳримоти иқтисодӣ, Эрон наметавонад, барои навсозии онҳо таҷҳизоти хориҷӣ бихарад.

Доналд Трамп, раиси ҷумҳури Амрико аввали имсол, Эронро ба риоят накардани созиши атомии соли 2015 муттаҳам кард ва таҳримоти нафасгиркунанда ба зидди Эронро барқарор кард. Оятуллоҳ Алии Хоманаӣ дар як суханронӣ, ки дар телевизиони давлатӣ нашр шуд, аз мақомоти амниятӣ хост, ки “вазифаҳояшонро иҷро кунанд”, вале шарҳе надод. Ӯ афзуд: “Баъзе аз мардум бешубҳа аз ин қарор нигаронанд, вале харобкорӣ ва оташ задан кори дасти авбошон аст, на мардуми мо.” Ӯ хориҷиёнро ба харобкорӣ муттаҳам кард ва гуфт: “Мухолифони инқилоб ва душманони Эрон ҳамеша аз харобкорӣ ва халалдор шудани амният тарафдорӣ кардаанд ва ин корро идома медиҳанд."

Интихобот дар Ҷумҳурии Беларус бо ҳузури мухолифон

Дар Ҷумҳурии Беларус интихоботи порлумонӣ идома дорад ва бо вуҷуди ҳузури номзадҳои зиёде аз мухолифон аксарият бовар доранд, ки тарафдорони раиси ҷумҳур Александр Лукашенко бештари курсиҳоро соҳиб мешаванд. Интихоботи рӯзи 17-уми ноябр дар замонест, ки Беларус дар чаҳорроҳа қарор дорад. Фишори Русия ба Беларус барои ҳамкориҳои наздиктари низомӣ ва иқтисодӣ, Лукашенкоро водор кардааст, аз паси тақвияти ҳамкориҳо бо Иттиҳоди Аврупо, Амрико ва Чин шавад.

Як давраи дигари раёсати ҷумҳурии худи ӯ, ки 25 сол аст, кишвари 9.5 миллионнафариро раҳбарӣ мекунад, соли оянда ба поён мерасад. Ва ҳоло ин суол матраҳ аст, ки ҳукуматдории худкомаи Лукашенко то кай идома мекарда бошад. Барои 150 курсии палатаи поёнии Маҷлиси Миллии Беларус, ки мутеи ҳукумат аст, 500 номзад ба мақоми вакилӣ рақобат доранд. Бештар аз 200 довталаби курсии вакилӣ ва аксарият аз тарафдорони мухолифонро ба интихобот роҳ надоданд, чун ба гуфтаи мақомоти интихоботӣ ба қадри кофӣ имзо ҷамъ оварда натавонистаанд.

Аз ҷумла Ҳанна Канапатская, узви Ҳизби Шаҳрвандони Муттаҳид, як ҳизби мухолифи давлат ва Алёна Анисим, номзади мустақили наздик ба мухолифон аз ҳаққи ширкат дар интихобот маҳрум шуданд. Ҳарду соли 2016 ба порлумон роҳ ёфтанд ва баъди соли 1996 нахустин вакилони мустақил ва ё мухолиф дар Маҷлиси миллии Беларус шуданд.

Ҳафт узви гуруҳи Толибонро дар Кундуз куштаанд

Мақоти Афғонистон мегӯянд, ки дар ҷараёни амалиёти низомӣ дар ноҳияи Майванди вилояти Кундуз ҳафт узви гуруҳи Толибон кушта шудаанд.

Хоҷа Яҳёи Алавӣ, сухангуи Артиши миллии Афғонистон ба Радиои Озодӣ гуфт, ки ин амалиёт рӯзи ҷумъа, 15-уми ноябр сурат гирифт.

Ӯ афзуд, ки дар ҷараёни ҳамла ҳафт ҷангии гуруҳи Толибон кушта ва ду тан захмӣ шуданд.

Толибони мусаллаҳ ҳанӯз дар ин бора чизе нагуфтаанд.

Улусволӣ ё ноҳияи Майванд як минтақаи ноамни вилояти Кундузи Афғонистон аст.

Дар ҳамлаи Толибон ба пойгоҳи урдуи миллӣ дар ин ноҳия дар аввали соли равон даҳ сарбоз кушта шуда буд.

Бахши «Север. Реалии»-и Радиои Озодӣ дар Русия шомили руйхати "агенти хориҷӣ" шуд

Вазорати адлияи Русия бо нашри як баёния, саҳифаи интернетии бахши русиии «Север. Реалии»-и Радиои Аврупои Озод/Радиои Озодиро дар руйхати расонаҳое шомил сохт, ки ба гуфтаи ин вазорат, ҳамчун «агенти хориҷӣ» ифои вазифа мекунанд.

Сомонаи русиии «Север. Реалии»-и Радиои Аврупои Озод/Радиои Озодӣ аз моҳи сентябри имсол ба фаъолият оғоз кард ва бештар ҳодисаву воқеаҳои шимолу ғарби Русияро инъикос мекунад.

Вазорати адлияи Русия дар баёнияи худ гуфтааст, ки ин тасмим бар асоси натиҷагирӣ аз сӯи Кумитаи маҷлиси намояндагон дар умури дохилӣ гирифта шудааст.

Як сол пеш низ Вазорати адлияи Русия Радиои Озодӣ, Садои Амрико ва чанд расонаи дигарро “агенти хориҷӣ” унвон дод. Чунин унвонгузорӣ баъди он шурӯъ шуд, ки Владимир Путин, раиси ҷумҳури Русия моҳи ноябри соли 2017 зери қонуне имзо гузошт, ки ба мақомот иҷоза медиҳад, расонаҳоеро, ки аз хориҷ маблағгузорӣ мешаванд, “агенти хориҷӣ” унвон диҳанд.

Кишварҳои ғарбӣ ва ҳомиёни ҳуқуқ ин қонуни Русияро сахт танқид карданд.

Додгоҳ мушовири собиқи Трампро айбдор эътироф кард

Роҷер Стоун, мушовири собиқи Доналд Трамп

Роҷер Стоун, мушовири собиқи Доналд Трамп аз ҷониби ҳайати додгоҳ айбдор эътироф шуд.

Дар ин бора рӯзи ҷумъа Оҷонсии Ройтерс хабар дод.

Ба навиштаи «Садои Амрико» Стоун ба ҳафт банди қонун, аз ҷумла шаҳодати дуруғ ба Конгресс, монеи адолати додгоҳӣ шудан ва фишор ба шоҳидон айбдор мешавад.

Роҷери 67 сола аъзои ҳизби Ҷумҳурихоҳон аст.

Тибқи шаҳодати Стив Баннон, собиқ роҳбари ситоди маъракаи пешазинтихоботии Трамп, Стоун аз пеш иттилоъ дошт, ки сомонаи WikiLeaks метавонад ҳуҷҷатҳоеро, ки ҳакерҳо аз серверҳои Кумитаи Миллии Ҳизби Демократӣ дуздидаанд, нашр кунад.

Ин маълумот, ки баъдан нашр шуд, ба обруи Ҳиллари Клинтон, рақиби Доналд Трамп дар интихоботи соли 2016 осеб расонд.

Боздошти муовини "Вазири ҷанг"-и ДОИШ дар Украина

Ал-Бара Шишонӣ

Мақомоти Украина аз боздошти як чеҳраи калидии гурӯҳи ба ном “Давлати исломӣ” хабар доданд.

Хадамоти амнияти Украина рӯзи 15-уми ноябр бо нашри изҳороте дар шабакаи Фейсбук хабар дод, ки Ал-Бара Шишонӣ, шаҳрванди Гурҷистон дар наздикии Киев боздошт шуд.

Дар изҳорот гуфта мешавад, ки хадамоти истихборотии Амрико ва Вазорати корҳои дохилии Гурҷистон дар амалиёти боздошти ӯ ширкат доштанд.

Вика Климичева, сухангуи Хадамоти давлатии амнияти Гурҷистон тасдиқ кард, ки ин шахс дар Украина боздошт шудааст ва гуфт, номи зодгоҳи ӯ дар Гурҷистон Сезар Токосашвилӣ аст.

Ал-Бара Шишонӣ ҳамчун муовини Абу Умар ал-Шишонӣ, нафаре, ки Пентагон онро "вазири ҷанг"-и гурӯҳи ба ном “Давлати исломӣ” медонист, шинохта мешавад.

Пас аз кушта шудани “Вазири ҷанг”-и гуруҳи ба ном "Давлати исломӣ", Шишонӣ ба Туркия фирор кард ва он ҷо бо таҳияи шиносномаи қалбакӣ вориди Украина шуд. Ба нақли Хадамоти амнияти Украина ӯ аз хоки ин кишвар бо тундравон тамос доштааст.

Ӯ дар як хонаи иҷора дар наздикии пойтахти Украина дастгир шуд.
“Тафтиш нишон дод, ки воқеан ӯ Шишонӣ аст”,--гуфта мешавад, дар изҳорот.

Ал-Бара Шишонӣ ва Абу Умар ал-Шишонӣ ҳарду дар Гурҷистон таваллуд шудаанд ва аз афроди муҳими гуруҳи тундрави "Давлати исломӣ" буданд.

Қабули барномаи мубориза бо вазни барзиёд дар Тоҷикистон

"Барномаи пешгирӣ аз фарбеҳӣ ва ташаккули ғизои солим барои солҳои 2019-2024" дар Тоҷикистон қабул шуд.

Пеш аз қабули барнома масъалаи вазни барзиёди сокинон дар ҷаласаи ҳукумат баррасӣ шуд ва вазири тандурустӣ ва ҳифзи иҷтимоии аҳолии Тоҷикистон Насим Олимзода гуфт, мавзӯи мазкур ба "таваҷҷуҳ" ниёз дорад.

Пажуҳиши Вазорати тандурустии Тоҷикистон собит кардааст, ки 17 дарсади аҳолии кишвар вазни барзиёд доранд ва 11,3 дарсади дигар аз фарбеҳӣ ранҷ мекашанд. Ба ҷуз ин, ошкор шудааси, ки 5 дарсади кӯдакони синни мактабӣ низ вазни барзиёд доштаанд.

Ин дар ҳолест, ки Созмони Байналмилалии Тандурустӣ мегӯяд, тоҷикистониҳо нисбат ба сокинони дигари кишварҳои Шӯравии собиқ камтар аз фарбеҳӣ ранҷ мекашанд. Пажуҳишгоҳи байналмилалии сиёсати ғизоӣ дар соли 2016 Тоҷикистонро "гуруснатарин" кишвари Шӯравии пешин унвон кард. Ба иттилои институти мазкур, наздики 33 дарсади аҳолии Тоҷикистон аз камғизоӣ ранҷ мекашанд.

Вазорати тандурустии Тоҷикистон ба ин назар аст, ки сокинон бештар маҳсулоти хамирӣ ва ширинӣ мехӯранд. Маҳсулоти хамирӣ қисмати асосии ғизои сокинонро ташкил медиҳад.

Қирғизистон аз Қазоқистон 50 ғизол "қарз" гирифтанист

Қирғизистон барои афзоиши саршумори оҳуҳои кишвар аз Қазоқистон 50 сар ғизол дархост кард. Дар ин бора Оҷонси давлатии ҳифзи муҳити зист ва хоҷагии ҷангали Қирғизистон хабар дод.

Мақомоти Қирғизистон мехоҳанд, ғизолҳои қазоқистониро дар соҳили шимолии Иссиқкӯл ва ҷанубу ғарби обанбори Урта-Туқай сар диҳанд.

"Ин маҳалҳо барои сукунати ғизол мувофиқ аст. Дар солҳои 30-70-уми асри пор дар ин маконҳо ғизол мавҷуд буд", - гуфт раиси Оҷонси давлатии ҳифзи муҳити зисти Қирғизистон Мирослав Амонқулов.

Ба иттилои ниҳоди мазкур, дар асри гузашта шумори зиёди ғизолҳо дар Қирғизистон мавҷуд буд. Дар солҳои 80-90-уми асри гузашта шумори онҳо якбора кам шуд. Дар ҳоли ҳозир ғизол дар Иссиқкӯли Қирғизистон умуман мавҷуд нест.

Байни Қирғизистон ва Қазоқистон шартномаи интиқоли 50 ғизол ба имзо расидааст.

Ҷайрон дар Китоби сурхи Қирғизистон шомил шудааст. Барои шикори ғайриқонунии ғизол дар Қирғизистон як миллион сом (ҳудуди 140 ҳазор сомонӣ) ҷарима пешбинӣ шудааст.

Дар Узбекистон 20 000 никоҳи мусалмониро расмӣ карданд

Мақомоти сабти асноди ҳолати шаҳрвандии Ӯзбекистон дар пайи як санҷиш муайян кардаанд, ки беш аз 20 ҳазору 350 оила бо никоҳи исломӣ зиндагӣ мекунанд. Никоҳи онҳоро расман ба қайд гирифта, барояшон шаҳодатнома додаанд.

Дар ин бора 13 ноябр дар нишасти хабарие иттилоъ дода шуд, ки бахшида ба тақвияти институти оила дар Ӯзбекистон баргузор гашт.

Дар Ӯзбекистон аз моҳи июли соли 2018 раҳбарии шуъбаҳои сабти ҳолати шаҳрвандии сокинон бар зиммаи муовинони раисони шаҳру навоҳӣ вогузор шуд. Пас аз ин тағйирот дар саросари Ӯзбекистон 13 ҳазору 478 кӯдаке ошкор карда шуд, ки шаҳодатномаи таваллуд надоранд. Ба ҳамаи онҳо шаҳодатномаи таваллуд дода шуда, ҳамчунин 21 ҳазору 229 оилаи дигар соҳиби шаҳодатномаи ақди никоҳ шуданд.

То ин замон шуъбаҳои сабти асноди ҳолати шаҳрвандӣ зертобеи Вазорати адлияи Ӯзбекистон буданд.

Навбатпоии туркманистониҳо барои дарёфти визаи Ӯзбекистон

Дар назди сафорати Ӯзбекистон дар шаҳри Ишқобод имрӯзҳо навбатпоии тӯлонии сокинон барои дарёфти раводид (виза) мушоҳида мешавад.

Расонаи "Türkmen.news" 13 ноябр иттилоъ додааст, ки соати 7 субҳ шумори навбатпоён барои раводид аллакай ба 250 нафар расида, давоми рӯз ин рақам афзоиш хоҳад ёфт.

Бештари навбатпоён сокинони вилоятҳои Лебап ва Дашоғузи Туркманистон буда, дар миёни онҳо калонсолон ва кӯдакон низ ҳастанд.

Манбаъ афзудааст, ки қисми зиёди шаҳрвандони Туркманистон барои фурӯши маҳсулот ва нақдина кардани пули кортҳои бонкиашон дар бонкҳои Ӯзбекистон ба ин кишвар мераванд.

Шаҳрванде, ки раводиди 20-рӯзаи Ӯзбекистонро дарёфт мекунад, метавонад чандин бор ба он кишвар биравад. Бархе аз сокинони Туркманистон кортҳои бонкии хешу шиносҳояшонро ба Ӯзбекистон бурда, пулҳои онҳоро нақдина мекунанд ва аз ҳар корт 100-150 манат "ҳақ" мегиранд. Соҳибони корт 1 долларро, ки қурби расмияш 3,5 манат аст, дар бозори сиёҳ 19 манат мефурӯшанд.

WSJ: таҳдиди ИМА ба Миср баъди эҳтимоли харидории Су-35-и Русия

Вашингтон таҳдид кард, ки агар Миср ҳавопаймоҳои ҷангии Су-35-и Русияро харидорӣ кунад, ИМА зидди Қоҳира таҳрим ҷорӣ хоҳад кард. Дар ин бора нашрияи амрикоии The Wall Street Journal иттилоъ медиҳад.

Ба иттилои нашрия, котиби давлатии ИМА Майк Помпео ва вазири мудофиаи он кишвар Марк Эспер ба вазири мудофиаи Миср нома ирсол кардаанд. Дар нома омадааст, ки "додуситади нави таслиҳотӣ бо Русия ҳадди ақал додугирифти ИМА ва Мисрро дар бахши низомӣ душвор хоҳад кард".

The Wall Street Journal менависад, нома дар остонаи сафари вазири мудофиаи Русия ба Миср ирсол шудааст. Сергей Шойгу, вазири мудофиаи Русия ҳафтаи ҷорӣ ба Қоҳира омада буд. Дар гуфтугӯ бо мақомоти Миср вазири рус ҳамкориҳои низомиву техникиро низ баррасӣ кард.

Баҳори соли ҷорӣ нашрияи "Коммерсант"-и Русия хабар дода буд, ки Русияву Миср шартномаи хариду фурӯши беш аз 20 ҳавопаймои ҷангии Су-35-ро бо арзиши наздики ду миллиард доллар ба имзо расонидаанд. Ҳамчунин хабар дода мешуд, Русия ба истеҳсоли ҳавопаймоҳо шуруъ кардааст. Ин дар ҳолест, ки "Рособоронэкспорт" мавҷудияти шартномаро бо Миср рад мекунад.

Пелосӣ иддао кард, Трамп масъалаи "ришва"-ро пазируфтааст

Раиси Маҷлиси Намояндагони Амрико иддао дорад, ки Доналд Трамп, раиси ҷумҳури он кишвар масъалаи "пора"-ро дар ҷараёни ҷанҷолҳои руйдода вобаста ба Украина пазируфтааст.

Ненси Пелоси ин изҳоротро бо истифода аз вожаи англисии "bribery" (пора) ба миён гузошт. Пештар дар чунин ҳолатҳо калимаҳои лотинии "quid pro quo" истифода мешуд.

Дар остонаи рӯзи дуввуми раванди таҳқиқоти ошкорои нобоварӣ ба раиси ҷумҳури Амрико, Ненси Пелоси, раиси Маҷлиси Намояндагон, дар нишасти хабарие гуфтааст, "ин пора аст". Пелоси ин суханонро дар ишора ба гуфтугӯи телефонии 25-уми июли имсол миёни Трамп ва Владимир Зеленский, раиси ҷумҳури Украина, баррасӣ кардааст.

Дар он гуфтугӯ Доналд Трамп аз ҳамтои украиниаш хоста буд, дар бораи Ҷо Байден, рақиби сиёсии ӯ ва писараш пажуҳиш кунанд. Пелоси мегӯяд, "ончӣ раиси ҷумҳур пазируфта ва изҳор кардааст, ки "бегуноҳ" буд, ман мегӯям як кори пурра хато буд. Ин пора аст".

Ишораи Пелоси ба изҳороти Трамп аст, ки гуфта буд, гуфтугӯи телефонии ӯ бо ҳамтои украиниаш "бенуқс" буд ва ҳеч кори хатое накардааст.

Аз рӯи Қонуни асосии Амрико, гуноҳҳои сахти хиёнат, пора ва монанд ба инҳо метавонад сабаби бозхонд ё фарохонд шавад.

Путин: то нишасти "нормандӣ" ҳеч дидоре бо Зеленский сурат намегирад

Акси сохтаи ду президент бо Қрим дар пасманзар

Владимир Путин, президенти Русия гуфт, ки тасмим надорад, бо ҳамтои украинаш Владимир Зеленский пеш аз саммити роҳбарони Украина, Русия, Фаронса ва Олмон мулоқот кунад.

Путин рӯзи 14 ноябр баъд аз саммити БРИКС дар пойтахти Бразилия дар суҳбат бо рӯзноманигорон гуфт, ки "ҳоло то мулоқоти "нормандӣ" аз ҳеч мулоқоти дигар бо Зеленский ҳарфе дар миён нест, зеро мо мувофиқа карда будем, ки дар нишасти "нормандӣ" мулоқот хоҳем кард". Ба гуфтаи вай, "ба ҷуз аз "нишасти нормандӣ", ҳеч механизми дигаре мавҷуд нест".

Нурсултон Назарбоев, президенти пешини Қазоқистон 12 ноябр пешниҳод кард, ки кишвараш омода аст, мулоқоти мустақими Путину Зеленскийро ташкил кунад. Ба гуфтаи Назарбоев, Зеленский барои мулоқот дар Қазоқистон бо Путин ризоият додааст. Дмитрий Песков, сухангӯи президенти Русия дар ҳамон рӯзи изҳороти Назарбоев гуфт, ки роҳбари Русия "бар ин назар аст, ки мулоқот барои мулоқот нафъе надорад".

"Агар мулоқот хоҳем кард, чаро бояд зоҳирнамоӣ намоем ва ба мулоқоти омоданашуда шитобем? Ман фикр мекунам, ки касе манфиатдори ин нест: на ман, на президент Зеленский", - гуфт Путин рӯзи 14 ноябр дар суҳбат бо рӯзноманигорон.

Вадим Пристайко, вазири корҳои хориҷии Украина рӯзи 12 ноябр эҳтимоли мулоқоти президенти Украина бо ҳамтои русашро дар Қазоқистон рад кард.

Бори охир гуфтугӯҳои чаҳорҷонибаи маъруф ба "нишасти нормандӣ", ки мебоист, роҳҳои ҳалли низоъ дар шарқи Украинаро ҷустуҷӯ ва муаррифӣ кунад, моҳи октябри соли 2016 баргузор шуда буд.

Дар Узбекистон бо $63 ҳазор ба хонаводаҳои нодор орду нон мехаранд

Ҳукумати Узбекистон дар соли ҷорӣ ҳамчун ҷуброни харҷи нону орд ба хонаводаҳои камбизоат $63.5 ҳазор ҷудо кардааст.

Дар хабари ҳукумати он кишвар омадааст, ки баъди бекорсозии назорати қимати нон, ҳаҷми ҷуброне ки ба хонаводаҳои камбизоат пардохт мешуд, сар аз 1 октябр аз 2,3 доллар ба 5 доллар дар моҳ боло бурда шуд.

Ба ҷуз ин, шумори касоне, ки ҳаққи дарёфти ҷубронпулиро доранд, аз 9 ба 11 гуруҳ расид. Дар маҷмуъ, 2 миллион сокини Узбекистон чунин ҷубронпулӣ ё кумакпулиро дар ҳоли ҳозир дарёфт мекунанд.

Ба иттилои Бунёди нафақа, дар он кишвар пойгоҳи ягонаи дарёфткунандагони нафақа ва кумакпулиҳо мавҷуд аст, ки ба таври худ гирандагони кумакро муайян мекунад. Сокинон чунин кумакҳоро аз "Бонки халқӣ" дарёфт менамоянд.

Тирпарронӣ дар як мактаби Калифорния: ду хонанда кушта шуд

Дар натиҷаи тирпарронӣ дар як мактаби миёнаи шаҳри Санта-Кларитаи Калифорнияи ИМА ду нафар ба ҳалокат расида, се тани дигар захмӣ шуданд. Ба иттилои пулиси маҳаллӣ, кушташудаҳо 14 ва 16-сола буданд.

Дар ҳамла хонандае гумонбар аст, ки рӯзи панҷшанбе 16-солагии худро ҷашн гирифт. Ӯ бо либоси сиёҳ ба мактаб рафта, тирпарронӣ кардааст. Гумонбар баъдан худро низ парондааст. Вазъи ӯ вахим буда, сабабҳои даст заданаш ба ҳамлаи мусаллаҳона маълум нест.

Соли равон аз ҳамлаи хунин ва пурқурбонии мактаби "Колумбайн"-и иёлати Колорадо 20 сол гузашт. Он замон дар натиҷаи ҳамлаи мусаллаҳонаи ду хонанда 15 нафар кушта ва 23 кас захмӣ шуданд.

Ба ҳисоби созмони ғайритиҷории Эверитаун, ки ба сахттар шудани хариду фурӯши силоҳи оташфишон дар ИМА даъват мекунад, ҳодиса рӯзи панҷшанбе 85-умин ҳамлаи мусаллаҳона дар соли равон аст.

Русия ба марзи Сурия бо Туркия техникаҳои ҳарбӣ фиристод

Вазорати дифои Русия ба фурудгоҳи шаҳри ал-Қамишлии Сурия, ки бо Туркия ҳаммарз аст, ду чархболи боркаши ҷангии Ми-35М ва як Ми-8 фиристод.

Нашрияи "Ведомостӣ" бо истинод ба сардори фармондеҳии ҳавоии Ал-Қамишлӣ Темур Хоҷаев иттилоъ додааст, ки дар ин минтақаи Сурия чандин муҷтамаи мушакии русии "Пантсир-С1" низ ҷойгир шуданд.

Вазифаи онҳо таъмини парвозҳои бидуни танаффус, муҳофизати чархболҳо ва дифои минтақа гуфта мешавад. Ҳамчунин барои муҳофизати минтақа даҳҳо техникаи зиреҳпӯш ва гуруҳҳои пулиси низомӣ қарор доранд.

Чанде пеш дар фурудгоҳи мазкури Сурия ҳавопаймои низомии боркаши Ил-76-и нерӯҳои ҳавоии Русия мушоҳида шуда буд.

Нерӯҳои ҳавоии Русия марзҳои шимолу шарқи Сурияро ҳамарӯза назорат доранд. Назорати муштараки марзи Сурия аз сӯи нерӯҳои русу турк охирҳои моҳи октябри соли равон дар асоси санаде оғоз шуд, ки раҳбарони Русия ва Туркия дар шаҳри Сочӣ 22 октябр ба имзо расонданд.

Дар Қирғизистон расонаҳои давлатиро ба як иттиҳодия табдил медиҳанд

Ҳукумати Қирғизистон имкони муттаҳидсозии тамоми воситаҳои ахбори омми давлатиро дар як корхона баррасӣ дорад. Ҳадафи ин иқдом беҳтар сохтани роҳҳои харҷи буҷа гуфта мешавад. Дар ин бора муовини сарвазири Қирғизистон Олтиной Омурбекова 14 ноябр ҳангоми баррасии тарҳи буҷаи соли 2020 дар порлумон хабар дод.

Омурбекова гуфт, дар ҳоли ҳозир корҳо дар самти таъсиси марказҳои расонаӣ дар вилоятҳо идома доранд. "Нашрияҳои ноҳиявӣ беҳтар карда мешавад. Баъзе аз онҳо ихтисор мешаванд. Дар ҳоли ҳозир пешниҳодҳо ҳастанд, ки "Кабар", "5 канал" ва расонаҳои расмии дигар дар як корхона муттаҳид карда шаванд. Корҳо дар ин самт идома доранд",-афзуд ӯ.

Вазири фарҳанг, иттилоот ва сайёҳии Қирғизистон Азамат Жаманқулов моҳи июли соли равон гуфт, ҳукумат тасмим дорад, сармоягузории нашрияҳои ноҳиявиро қатъ кунад. Дар саросари Қирғизистон 34 нашрияи ноҳиявӣ аст.

Масъалаи таъсиси маркази расонаҳо дар минтақаҳо Қирғизистон ҳанӯз дар соли 2017 матраҳ шуда буд. Маркази расонаҳо манбаи дарёфти иттилоъ барои сокинон хоҳад буд.

Ба гуфтаи Жаманқулов, дар мувофиқа бо тамоми вазоратхонаҳо дар ин замина консепсияе таҳия ва барои баррасӣ ба ҳукумат пешниҳод шудааст.

Даъвати “шоҳиди муҳим” ба таҳқиқи нобоварӣ ба Трамп

Адам Шифф, узви Конгресси Амрико, раиси Кумитаи иктишофии Маҷлиси Намояндагон гуфт, вай як коргари сафорати Иёлоти Муттаҳидаро дар Украина даъват кардааст, то дар таҳқиқи нобоварӣ ба президент Доналд Трамп гувоҳӣ диҳад. Вай ин коргарро "шоҳиди хеле муҳим" номид.

Вилям Тейлор, дипломати баландпояи Амрико дар Украина, рӯзи 13-уми ноябр дар Кумитаи иктишофии Конгресс гуфт, яке аз кормандонаш ҳангоми суҳбати телефонӣ шунидаст, ки Трамп аз сафири Амрико дар Иттиҳоди Аврупо Гордон Сондланд дар бораи "тафтишот" пурсидааст.

Ба гуфтаи Тейлор, Сондланд гуфта, ки украинҳо омодаанд пеш раванд. Изҳороти Тейлор дар бораи он чи ин коргар шунидааст, эҳтимолан бузургтарин пешрафтест, ки дар беш аз панҷ соати гувоҳидиҳии ӯ ва Ҷорҷ Кент, ҷонишини вазири корҳои хориҷӣ оид ба назорати Украина дар Кумитаи иктишофи маҷлис ба даст омадааст.

Кумита дар ҳоли баррасӣ аст, ки оё Трамп бо нигоҳ доштани ёриҳои ҳарбӣ ба ин кишвар ба президент Владимир Зеленский фишор овардааст ба зидди рақиби сиёсии ӯ Ҷо Байден тафтишот сар кунад ё не. Пас аз телефон Сондланд ба коргари сафорат гуфтааст, президенти ИМА “бештар дар бораи тафтишот”-и хонаводаи Байден ғамхорӣ мекунад, то ба Украина.

Тейлор гуфтааст, аз гузориши ин коргар дар бораи гуфтугӯи рӯзи 26-уми июли Трамп ва Зеленский танҳо ҳафтаи гузашта шунидааст. Адам Шифф маълумоти навро "ниҳоят муҳим" номид ва ба хабарнигорон дар поёни рӯзи гувоҳидиҳӣ гуфта, ин нишон медиҳад дастурҳои вобаста ба Украина "аз президент баромадаанд".

Дукони гӯштфурӯшии омӯзгори самарқандӣ дар ҳудуди мактаб

Дар ҳудуди мактаби №24 дар шаҳри Самарқанди Узбекистон дукони гӯштфурӯшӣ ба роҳ монда шудааст.

Дар бораи фурӯши гӯшти гӯсфанд дар ҳудуди мактаб рӯзи 12 ноябр дар шабакаҳои иҷтимоӣ хабар дода шуд. Ин хабар баҳси гармеро дар шабакаҳо ба бор овард.

"Гӯштфурӯш" омӯзгори мактаби мазкур будааст, ки рӯзи 11 ноябр аз коргоҳи бародараш гӯшт оварда, дар ҳудуди мактаб ба фурӯш гузоштааст.

Бархе аз омӯзгорон гӯштро бо нася харида, ваъда кардаанд, ки аз маошашон пардохт хоҳанд кард. Комисияи маҳаллӣ аз рӯи ин ҳодиса санҷиш гузаронида, ба омӯзгор ва мудири мактаб огоҳӣ додааст.

Донишҷӯе дар Амур 1 касро кушт ва 3 тани дигарро маҷруҳ кард

Дар шаҳри Благовешени вилояти Амури Русия дар тирпарронии рӯзи 14 ноябр дар коллеҷи сохтмонӣ ва хоҷагии коммуналӣ як одам кушта ва се тани дигар захмӣ шуд. Ин тирпаррониро донишҷӯи коллеҷ ташкил кард. Маҷруҳони 17, 19 ва 20-сола дар бемористон бистарӣ шуданд.

Пулис ҷавони 19-солаи мусаллаҳро дар ошёнаи дувуми коллеҷ муҳосира кард. Байни кормандони пулис ва ҷавони мусаллаҳ тирпарронӣ сурат гирифт. Ба иттилои пешакӣ, ҷавон дар ниҳоят аз силоҳи шикорӣ, ки ба номи худаш сабт шуда буд, худкушӣ кард.

Дар наворе, ки расонаҳои маҳаллӣ нашр карданд, донишҷӯе дида мешавад, ки дар замин хоб аст ва аз ҷисми вай хун меравад.

Шоҳидон гуфтанд, ҳодиса соати 10 субҳ замоне рух дод, ки ба далели дер мондан ӯро нагузоштанд, вориди синфхона шавад. Баъди ин вай тирпарронӣ кард. Ба гуфтаи шоҳидон, ҳадди ақал садои 5 тир шунида шудааст.

Абилғозиев гуфт, медонад кӣ аз қочоқчиён ҳимоят мекунад

Сарвазири Қирғизистон Муҳаммадқулӣ Абилғозиев гуфт, ҳар рӯз ба кишвараш аз тариқи қочоқ беш аз 100 тона маводи сӯхту равғани молиданӣ ворид мешавад. Ба гуфтаи Абилғозиев, ӯ огаҳ аст, ки дар ин қочоқҳо кадом мансабдорон даст доранд.

Вакили порлумони Қирғизистон Азамат Араббоев ҳангоми баррасии тарҳи буҷаи соли 2020 гуфт, қочоқ бидуни иштироки "шахсони рутбадор" номумкин аст. "Раҳбарони дидбонгоҳҳои марзӣ миллионер шудаанд. Ман ҳисоб кардам, тақрибан 8 миллиарду 200 миллион соми буҷа ба ҷайби бархеҳо меравад",-изҳор дошт Араббоев.

Сарвазири Қирғизистон дар посух ба гуфтаҳои вакил иқрор кард, ки ҳангоми воридоти сӯзишворӣ нақшаи қочоқ вуҷуд дорад.

"Масъалаи мудирияти воридот солҳо боз ҳалношуда аст. Мо аз чӣ оғоз кардем? Нахуст воридоти сӯзишвориро бо мошин манъ кардем. Ҳоло маводи сӯхт танҳо бо роҳи оҳан ворид мешавад. Дар ҳақиқат мушкилиҳо вуҷуд доранд ва лӯлаҳои интиқоли ғайриқонунии сӯзишворӣ низ ҳастанд. Мегӯянд, рӯзона беш аз 100 тона ворид месозанд. Вале ман фикр мекунам, рақамҳо бештар аз инанд. Инро низ медонам, ки иҷрои чунин нақшаҳо бе иштироки мақомоти ҳифзи ҳуқуқ имкон надорад. Ба мо хабар мерасонанд, ки дар онҷо кӣ нишастааст ва чи қадар мегирад",-изҳор дошт Абилғозиев.

Видеои латтукӯби ду ҷавон аз сӯи марзбонони Узбекистон

Дар шабакаҳои иҷтимоӣ 12 ноябри соли равон видеое нашр шуд, ки низомиёни ниқобпӯш ду ҷавони 22-23-соларо дашномҳои қабеҳ дода, сахт латтукӯб мекунанд. Умедҷон Саидҷонови 22-сола, ки баъди латтукӯб шудан аз тарафи низомиёни Хадамоти марзбонии Узбекистон дар беморхонаи ноҳиявии Фарғона бистарӣ шудааст, ҳодисаро чунин шарҳ дод:

"Ҳамроҳи модарам барои хариди нон ба марказ рафтем. Марзбонон хостанд мошини маро тафтиш кунанд ва гуфтанд, ки курсии ақибро боло бардор. Сипас талаб карданд, ки курсиро кушоям. Ман гуфтам, барои он калид лозим аст. Вале исрор карданд, ки "мекушоӣ". Боз фаҳмондам, ки ин номумкин аст. Баъдан гуфтанд, "мошинро яктараф гир". Ман мошинро ронда ба хонаамон, ки дар наздикӣ аст, рафтам ва модарамро гузошта, ҳамроҳи як дӯстам баргаштам. Вале марзбонон маро ба итоат накардан ва фирор аз тафтиш айбдор карда, латтукӯб намуданд. Ба сарам бо чӯбдаст заданд ва боқиро дар ёд надорам".

Абдурасул Фозилови 23-сола мегӯяд, марзбонони ӯзбек ӯро низ ба ҳадде латтукӯб карданд, ки дар беморхона бистарӣ шудааст.

"Шахсеро, ки марзбонон дар видео латтукӯб мекунанд ман ҳастам. Китфам то ҳол дард мекунад ва осори латтукӯб ҳанӯз ҳам боқист. Ҳамроҳи Умедҷон дар дохили мошин будам. Маро ҳам бе сабаб аз мошин бароварда, заданд", - афзуд ӯ.

Умедҷон Саидҷонов мегӯяд, марзбонони Узбекистон шахсони "шубҳанок"-ро пайваста таҳқир ва латтукӯб мекунанд.

Хадамоти амнияти давлатии Узбекистон бо нашри изҳороте видеои латтукӯби ҷавононро шарҳ дода, гуфт, Саидҷонов ва Фозилов ба марзбонон "итоат накарданд". Хадамот афзудааст, ки ин ду ҷавон қаблан бо ҷурми қочоқ ба ҷавобгарии маъмурӣ кашида шуда буданд.

Наздикони Саидҷонов ва Фозилов аз болои марзбонон ба додситонии ноҳияи Фарғона шикоят бурдаанд. Талошҳо барои дарёфти назари додситонии Фарғона бенатиҷа буданд.

Ёфтҳои бештар

Гузоришҳои видеоӣ

Нигоҳе ба рӯзи дуввуми эътирозҳо ба афзоиши қимати нафт дар Эрон
лутфан мунтазир бошед

Феълан кор намекунад

0:00 0:03:17 0:00
XS
SM
MD
LG