Пайвандҳои дастрасӣ

Хабари нав

Хабарҳо

Дар шимол ва шарқи Афғонистон 20 нафар кушта шуд

Рӯзи 11 июн дар Кобул як таркиши дигаре шуд, ки ҷони одамони зиёдро гирифт

Дар паи ҳамлаи Толибон ба нирӯҳои амниятии Афғонистон дар ноҳияи Сайёди вилояти Сарипул 14 нафар кушта шуд. Мақомот гуфтанд, ки ҳодиса шаби 12 июн рух дод. Нуроғо Нурӣ, як узви шӯрои вилоятӣ гуфт, ки дар ин ҳамла дасти кам 25 тани дигар маҷрӯҳ шуданд. Нурӣ гуфт, ки шӯришиён чор сарбози маҷрӯҳшударо гаравгон гирифтанд.

Дар вилояти шарқии Ғазнӣ як маргталаб бо истифода аз мошин низомии навъи “Humvee”-е дасти кам панҷ узви нирӯҳои амниятии Афғонистонро кушт.

Сухангӯи волии Ғазнӣ гуфт, ки ин ҳодиса ҳам субҳи 12 июн рух дод. Ба гуфтаи Нурӣ, дасти кам 26 нафар, аз ҷумла раҳбари ноҳия ва 18 афсари полис дар ин таркиш маҷрӯҳ шуданд.

Ҳеҷ гурӯҳе масъулияти ин ҳамларо ба дӯш нагирифтааст, вале ба қавли Нурӣ, мошини низомии “Humvee” аз ин пештар аз ҷониби ҷангиёни Толибон рабуда шуд.

Ҳамаи хабарҳои имрӯзро дар инҷо бихонед

AI гуфт, дар ошӯби маҳбусон дар Эрон беш аз 30 нафар кушта шуд

Зиндони Шибони Аҳвоз яке аз муассисаҳое буд, ки дар он зиндониҳо аз тарси паҳншавии коронавирус ошӯб карданд

Созмони Афви Байнулмилал (Amnesty International) гуфт, беш аз 30 зиндонии эронӣ, ки дар пайи таҳлука аз олудашавӣ ба коронавирус ошӯб бардоштанд, аз ҷониби нирӯҳои амниятӣ кушта шуданд.

Созмони мустақар дар Лондон 9-уми апрел эълон кард, дар чанд рӯзи гузашта дар дастикам ҳашт зиндони Эрон ҳазорҳо маҳбус аз тарси олудашавӣ ба коронавирус даст ба ошӯб заданд. Ин ҳолат "вокуниши маргбор"-и нирӯҳои амниятиро дар пай доштааст.

Нигаронии созмон бар пояи иттилооти қобили эътимод, аз ҷумла бар асоси шаҳодати хешовандони зиндониҳо навишта шудааст.

Дар он гуфта мешавад, ки бар зидди зиндониҳои ошӯбгар дар чандин муассисаи ислоҳӣ тир ва гази ашковар истифода шуд. Дар натиҷа, 35 нафар куштаву садҳо тан захмӣ шуданд.

Диана Элтаҳавӣ, муовини раиси бахши минтақаи Ховари Миёна ва Африқои Шимолии созмони Афви Байнулмилал гуфт:

"Бисёр нафратангез аст, ки бар ивази вокуниш ба талаботи қонунии зиндониҳо дар заминаи ҳимоят шудан аз КОВИД-19, мақомоти эронӣ бори дигар барои саркӯби нигарониҳо даст ба қатли инсонҳо заданд".

Элтаҳавӣ афзуд, ходимони амниятии зиндонҳо бояд ба талабҳои маҳбусон бе зӯр ҷавоб диҳанд ва даст ба муҷозоти зиндониҳо назананд.

Ӯ, инчунин ба таҳқиқи мустақилонаи "шиканҷаву марг дар зиндонҳо Эрон" даъват кард.

Дар фазои бӯҳронии коронавирус мақомоти Эрон ба 100 ҳазор зиндонӣ иҷоза доданд, ки ба таври муваққат ба хонаҳояшон баргарданд. Шумори олудашудаҳо ба коронавирус дар Эрон аз 66 ҳазор ва ҳодисаҳои марг бар асари олудагӣ ба КОВИД-19 аз 4110 нафар гузаштааст.

Мақомоти эрониро барои вокуниши заиф дар муқобили эпидемияи коронавирус интиқод карда, гуфтанд, ки агар онҳо зуд иқдом мекарданд, вазъро мешуд таҳти назорат қарор дод. Рӯзи 9-уми апрел раҳбари олии Эрон Оятуллоҳ Алии Хоманаӣ ишора кард, ки дар моҳи Рамазон маъракаҳои серодаме ба монанди намозҳои ҷамъӣ манъ мешавад, то пеши роҳи паҳншавии вирус гирифта шавад.

Моҳи Рамазон дар рӯзҳои охири моҳи апрел фаро расида як моҳ идома хоҳад кард.

Айни замон, дар изҳороти зиддунақизаш президенти Эрон Ҳасани Рӯҳонӣ гуфт, кишвар шурӯъ аз рӯзҳои истироҳати оянда бояд тадриҷан ба ҳаёти маъмулӣ баргардад, вале ин изҳорот нигарониҳо аз бозгашти мавҷи дуюми эпидемияро ба бор овард.

Иқтисоди Эрон аз таҳримҳои ҷорикардаи Амрико дар вазъияти ногувор аст. Вашингтон соли 2018 Эронро ба вайронгарӣ дар минтақа гунаҳкор кард ва аз созиши ҳастаии соли 2015 бо Теҳрон хориҷ шуд.

Кобул гуфт, 100 узви Толибон иловатан озод мешаванд

Ҳукумати Афғонистон 100 узви Толибонро озод карданд

Ҳукумати Афғонистон гуфт, ки тахминан 100 узви Толибонро рӯзи панҷшанбе иловатан озод мекунад, бо ин вуҷуд, ки гурӯҳи шӯришӣ ба таври якҷониба аз ҷараёни музокира барои озодкунии зиндониҳо хориҷ шуд. Рӯзи чоршанбе маъмурияти президент Ашраф Ғанӣ гуфт, ки 100 узви Толибон, ки афроди начандон хатарнок мебошанд, озод шуданд. Аз онҳо тақозо шуд, ки ба ҳеҷ сурат дубора ба майдони ҷанг барнагарданд ва мақомот гуфтанд, ки айни чунин гурӯҳи саднафараи дигари Толибон ҳам рӯзи панҷшанбе ба озодӣ мебарояд.

Озодкунии Толибони зиндонӣ дар ҳолест, ки Ғанӣ дар пешорӯи бӯҳрони нави сиёсӣ аст ва ИМА аз таъхир дар татбиқи ҷараёни сулҳ дар пасманзари эпидемияи коронавирус дар Афғонистон нохушнуд аст. Мақомоти амрикоӣ ҳарос доранд, ки паҳншавии вирус боиси шӯриш дар зиндонҳо мешавад.

Ҷовид Файсал, сухангӯи дафтари Шӯрои амнияти миллӣ дар Твиттераш навишт, ки Кобул “дар чаҳорчӯби ҷараёни сулҳ ва муқобила бо паҳншавии Ковид-19, имрӯз 100 узви Толибонро дар заминаи вазъи сиҳҳатӣ, синну сол ва мӯҳлати боқимондаи ҳукми зиндонашон озод мекунад”. Сухангӯи Толибон Забеҳулло Муҷоҳид ба АФП гуфтааст, ки ин иқдом мутаносиб нест.

Як гурӯҳи хурди намояндагони Толибон ҳафтаи гузашта ба Кобул рафта табдили 5 ҳазор Толибони зиндонӣ бо як ҳазор низомиёни ҳукуматиро баррасӣ карда базудӣ бо далели, ба гуфтаашон, музокираҳои “бесамар” Кобулро тарк карданд. Муҷоҳид гуфт, ҳамарӯза саднафарӣ озод мешаванд, вале “ин хости мо нест ва ин чиз ғайриқобили қабул аст”. Файсал ба саволи ин ки чаро бо вуҷуди тарки гуфтугӯҳо кардани Толибон ҳамоно озодкунии зиндониҳо амалӣ мешавад, ӯ гуфт, ки “ҷараёни сулҳ бояд пеш равад”.

Озодкунии зиндониҳо аз ҳарду тараф як шарти муҳими созиши сулҳи ИМА ва Толибон аст, ки 29 феврал имзо шуд. Қадами баъдӣ бояд роҳандозии музокираҳои миёни шӯришиён ва ҳукумати Афғонистон бошад, вале маълум нест кай шурӯъ хоҳад шуд

Сурияро дар истифодаи силоҳҳои кимиёӣ айбдор карданд

Аксҳо аз гузориши OPCW - Созмони манъи аслиҳаи кимиёӣ аз соли 2018. Ин созмон намунаҳои истифодаи силоҳҳои кимиёиро нашр карда буд

Созмони нозири силоҳҳои кимиёӣ барои аввалин бор ба таври мустақим ҳукумати Сурияро дар он муттаҳам кард, ки дар се ҳодисаи бомбгузории охири марти соли 2017 дар шаҳри марказии Латомна аз гази асаби хлорину зарин истифода кардааст. Тими муфаттишони Созмони манъи аслиҳаи кимиёӣ рӯзи 8 апрел гузориши аввалини худро нашр кард. Дар гузашта ин созмон танҳо гуфта метавонист, ки оё воқеан ҳам аз силоҳи кимиёӣ истифода шудааст ё на, вале касеро гунаҳгор накарда буд. Дар гузориши созмон омадааст: “Далелҳои қобили эътимод вуҷуд дорад, ки имкон медиҳад ба истифодаи силоҳҳои кимиёӣ дар Латомна дар соли 2017 ва хлорин аз ҷониби шахсиятҳои марбут ба Нирӯҳои ҳавоии арабҳои Сурия бовар ҳосил шавад”.

Дар гузашта давлатҳои ғарбӣ бисёр вақт ҳукумати Сурияро барои дар ҷанги нӯҳсолаи шаҳрвандии ин кишвар дар муқобили гурӯҳҳои шӯришиву маданӣ истифода кардани силоҳҳои кимиёӣ интиқод кардаанд. Вале ин интиқодҳоро президенти Сурия Башор Асад ва муттафиқони калидиаш – Русияву Эрон ҳамеша рад кардаанд.

100 рӯз пеш СҶБ дар бораи паҳншавии коронавирус огоҳонида шуд

Аввалин бор вируси нав дар шаҳри Вуҳани Чин ошкор шуд ва баъди ин дар дигар нуқоти ҷаҳон босуръат паҳн шудан гирифт. Вуҳан аз инзивову маҳдудиятҳои сахт раҳо шуда тадриҷан ба ҳолати маъмулӣ бармегардад

Ба назар мерасад, ки тадбирҳои маҳдудкунандаву карантин ҳодисаҳои бистарӣ шудани беморон дар бемористонҳову марги инсонҳо бар асари олудагӣ ба коронавирусро камтар мекунад ва ин кишварҳо тадриҷан заъиф кардани меъёрҳои маҳдудкунандаро андеша доранд. Роберто Азеведо, раиси кулли Созмони ҷаҳонии беҳдошт рӯзи 8 апрел ҳушдор дод, ки вазъи фавқулоддаи беҳдоштӣ метавонад ба иқтисод таъсири амиқи манфӣ гузоранд.

Рӯзи 9 апрел аз эълони СҶБ дар бораи пайдоиши вируси хатарнок дар Чин 100 рӯз гузашт ва бархе мутахассисони тиб ҳушдор медиҳанд, ки суст кардани муқаррароти маҳдудкунандаву карантин баръакс метавонад паҳншавии вирусро суръат бахшад. То имрӯз шумораи олудашудаҳо ба коронавирус дар саросари сайёра ба 1,5 миллион нафар наздик шуда бар асари Ковид-19 то ҳол 89 ҳазор нафар ҷон додаанд.

Омори воқеӣ метавонад аз ин ҳам баландтар бошад, чунки имкони анҷоми санҷишҳои тиббӣ маҳдуд буда қоидаҳои ҳисобу китоби даргузаштаҳо дар кишварҳо гоҳо аз ҳам фарқ мекунанд. Бархе ҳукуматҳо барои адами шаффофият дар иттилои дақиқу дуруст дар ин замина интиқод мешаванд.

Дороиҳои Назарбоева ва Алиев дар Лондон аз ҳабс озод шуд

Нуралӣ Алиев ва Дариға Назарбоева

Додгоҳи олии Лондон рӯзи 8-уми апрел ҳабси се иншоот, аз ҷумла қасреро, ки Нуралӣ Алиев, набераи Нурсултон Назарбоев, президенти пешини Қазоқистон дар онҷо зиндагӣ дорад, бекор кард.

Пештар аз ин Оҷонси миллии ҷиноии Бритониё дар доираи маъракаи мубориза зидди сармояе, ки аз роҳи номашруъ ба даст омадааст, амволи мазкурро ба ҳабс гирифта буд. Амволи баробар ба 80 миллион фунт стерлинг (наздики 140 миллион доллар) ба номи ширкатҳои офшорӣ сабт шудааст, ки моликонаш Нуралӣ Алиев ва модараш Дариға Назарбоева, духтари Нурсултон Назарбоев ҳастанд.

Мақомоти ҳифзи ҳуқуқи Бритониё талаб карданд, ки аз кадом ҳисоб ба даст омадани ин амвол шарҳ дода шавад.

Ба иттилои расонаҳои Бритониё, Лондон ба "дороиҳои аз манбаъҳои номаълум бадастовардаи этилаи сиёсии Қазоқистон" таваҷҷуҳ кардааст.

Расонаҳо манзили набераи Назарбоевро бинои дорои сатҳи олии муҳофизат тасвир карданд. Ин манзил дар яке аз маъруфтарин кӯчаҳои Лондон ҷойгир аст. Ин бино ҳавз ва толори синамо низ дорад.

Нуралӣ Алиев - набераи Нурсултон Назарбоев ва писари калонии Дариға Назарбоева аст. Дариға Назарбоева аз издивоҷ бо Роҳат Алиев се фарзанд - ду писар ва як духтар дорад.

Нуралӣ Алиев аз соли 2014 то 2016 муовини раиси пойтахти Қазоқистон буд.

Падари Нуралӣ - Роҳат Алиев, сафири Қазоқистон дар Австрия, соли 2015 дар зиндони Австрия, ба гуфтаи тафтишот, худкушӣ кардааст. Чанд сол пеш аз маргаш вай ба мухолифи давлати Қазоқистон табдил шуд ва никоҳаш бо Дариғаро бекор кард.

Ҳамакнун додгоҳ қарор кард, ки ин амволро Дариға Назарбоеваи "аз нигоҳи иқтисодӣ мустақил" ба даст овардааст.

Намояндагони Дариға Назарбоева дар суҳбат бо расонаҳо гуфтаанд, нафари таҳти ҳимояташон "комилан сафед" шудааст. Ба гуфтаи намояндагон, "барои сафед кардани номи Назарбоева хеле талош кардаанд".

Нуралӣ Алиев дар навбати худ пажуҳиши мақомотро "ғайриқонунӣ ва беасос" унвон кард. Ба гуфтаи Алиев, Оҷонси миллии ҷиноии Бритониё бо оғози "тафтиши беасос" ӯ ва "хонаводаву кишвараш"-ро таҳқир кардааст.

Оҷонси миллии ҷиноӣ гуфтааст, ки аз рӯйи қарори додгоҳ шикоят мебарад.

СММ аз шиканҷаву маҳдудияти озодӣ дар Узбекистон изҳори нигаронӣ кард

СММ гуфтааст, ки шиканҷаи афроди маҳрум аз озодӣ дар Узбекистон як мушкили доимӣ аст

Human Rights Watch мегӯяд, ки СММ баъди баррасии вазъи ҳуқуқи башар дар Узбекистон ба ин натиҷа омадааст, ки мушкилоти мисли шиканҷаи доимӣ дар боздоштгоҳҳо ва маҳдудкунии озодиҳои бунёдӣ мавриди нигаронӣ мебошанд. Дар изҳороти рӯзи 8 апрели HRW гуфта мешавад, ки хулосаҳои Кумитаи ҳуқуқи башари СММ ин воқеиятро собит мекунад, ки ваъдаҳои зиёде дар заминаи ислоҳоти ҳуқуқи башар ҳанӯз иҷро нашудааст.

Ҳю Виллиамсон, раиси бахши Аврупову Осиёи Марказӣ дар HRW дар Берлин мегӯяд, “таҳқиқи кумитаи СММ собит мекунад, ки Узбекистон як кишвари бештар худкома бо нишондодҳои хеле заъифи ҳуқуқи башар боқӣ мемонад”.

Кумитаи ҳуқуқи башари СММ ҳафтаи гузашта дидгоҳҳои худро дар заминаи мутобиқати Узбекистон ба Аҳдномаи байналмилалии ҳуқуқи маданиву сиёсӣ нашр кард. Ин нахустин арзёбӣ баъди соли 2016 сари қудрат омадани президент Шавкат Мирзиёев мебошад.

Кумитаи СММ аз “шиканҷаву бадрафторӣ бо нафарони маҳрум аз озодӣ, маҳдудият дар озодиҳои динӣ, озодии таҷаммӯъ ва ҳамоишҳои сулҳомез” изҳори нигаронӣ кардааст.

Айни замон, кумитаи СММ гуфтааст, ки пешравиҳо дар мубориза бо коррупсия, пешгирӣ аз хушунати занон, ислоҳоти низоми додгоҳӣ, решаканшавии кори кӯдак ва кори маҷбурӣ дар соҳаи пахтапарварӣ дида мешавад.

Мирзиёев баробари шурӯи кор дар мақоми президентӣ бархе иқдомҳоро дар самти ислоҳот роҳандозӣ кард. Вале ҳомиёни ҳуқуқ мегӯянд, дар кишваре, ки замони раёсатҷумҳурии Ислом Каримов поймолшавии ҳуқуқи башар сартосарӣ буд, ҳанӯз ҳам вазъ нигаронкунанда боқӣ мемонад.

Додгоҳ "Ахбор"-ро баст. Мирзои Салимпур: Ин ҳамлаи ошкор ба озодии матбуот аст

Саҳифаи асосии сомонаи "Ахбор" дар рӯзи 9-уми апрели 2020

Додгоҳи олии Тоҷикистон сомонаи мустақили "Ахбор"-ро, ки қароргоҳаш дар шаҳри Прага аст, ба рӯйхати вебсайтҳои мамнуъ дар кишвар ворид кард. Мақомот торнаморо ба он айбдор кардаанд, ки ба созмонҳои дар Тоҷикистон мамнӯи наҳзати исломӣ ва Паймони миллӣ, эътилофи чаҳор созмони мухолифин дар Аврупо, "хидмат мекунад".

Мирзои Салимпур, муассис ва сардабири “Ахбор”, гуфт, сомонаи зери раҳбарии ӯ ба ҳеч созмон ё ниҳоде тааллуқ надорад ва бастанаш "як амали ғайриқонунӣ ва ҳамлаи рӯйирост ба озодии матбуот аст".

Дафтари матбуоти Додгоҳи олии Тоҷикистон рӯзи 8-уми апрел бо нашри иттилоия гуфт, дар баробари "Ахбор.ком" дастрасӣ ба сомонаи “Наҳзат.ру”-ро низ қатъ кардаанд.

Мақомоти Додгоҳи олӣ гуфтанд, қарор дар бораи бастани ин сомонаҳо рӯзи 18-уми феврал содир шуда, аз 19-уми март ба иҷро даромадааст. Маълум нест, чаро ин хабар баъди қариб як моҳ нашр шуд.

Мирзои Салимпур
Мирзои Салимпур

Мирзои Салимпур, муассис ва сардабири сомонаи “Ахбор”, аз қарори Додгоҳи олии Тоҷикистон дар бораи баста шудани ин сомона интиқод кард. Ӯ рӯзи 9-уми апрел ба Радиои Озодӣ гуфт, сомона "тарҳи комилан мустақили журналистӣ аст ва ба ягон гуруҳу ҳизбу ҳаракат вобаста нест - на ба тарафи ҳукумат ва на ба мухолифинаш."

Салимпур мегӯяд, ба зидди онҳо парванда сохтанд, аммо намояндаи онҳоро ягон бор ба додгоҳ даъват накарданд.

"Сабаби аслии масдуд кардани сомонаи "Ахбор” чанд хабару гузориш дар бораи ҳизбҳои мухолиф нест, чунки сомона ҳар моҳ беш аз 500 мақолаву гузориш нашр мекунад, ки аз ин шумор шояд як ё дутояш дар бораи мухолифин бошад. Бо ин баҳонаи беасос мақомот мехоҳанд аз "Ахбор” барои фош кардани мавридҳои фаровони коррупсия, порахӯрӣ ва дигар камбудиҳое, ки ин сомона фош мекунад, ниқор бигиранд", - афзуд ӯ.

Сомонаи "Ахбор.ком" моҳи ноябри соли 2016 дар маркази Ҷумҳурии Чех ба кор оғоз карда, хабарҳои марбут ба Тоҷикистону минтақаро бе парда бозтоб медиҳад. Мирзои Салимпур мегӯяд, дар муддати фаъолияти тақрибан чаҳорсолаи сомона хабару гузоришҳои нашркардаи онҳоро беш аз 20 миллион бор дидаанд. Дастрасӣ ба ин сомона беш аз ду сол боз дар Тоҷикистон масдуд аст.

Ҷаласаи ОРЕС коҳиши истеҳсоли нафтро ба баррасӣ мегирад

Вазири энержии Саудӣ ва Русия - шоҳзода Абдулазиз бин Салмон Ассауд ва Александр Новак декабри соли 2019 дар ҷаласаи ОРЕС дар Вена

Аъзои Созмони кишварҳои содиркунандаи нафт (ОРЕС), Русия ва дигар кишварҳои истеҳсолкунанда қарор аст рӯзи 9 апрел бо ҳадафи баррасии коҳиши истеҳсоли нафт ба хотири мӯътадил шудани вазъи бозор ташкили ҷаласа кунанд.

Ҷаласа замоне баргузор мешавад, ки бо сабаби пандемияи коронавирус дар ҷаҳон ва коҳиши фавқулоддаи сафару парвозҳо нархи нафт дар даҳсолаҳои охир ба поинтарин сатҳ фаромадааст. Нархи нафт пеш аз пандемияи коронавирус ҳам заъиф ва ба мояи ихтилофи Саудӣ ва Русия – ду истеҳсолкунандаи азими нафт дар ҷаҳон табдил шуд.

Баҳсҳои охир барои поин бурдани нархи нафт бо сабаби мухолифати ИМА дар кам кардани истеҳсол бо сабаби нақзи қонунҳои ИМА оид ба адами эътимод печидатар шуд. Президенти ИМА Доналд Трамп ҳафтаи гузашта гуфт, ки Сауиву Русияро ба созиш овард ва ин мувофиқа метавонад боиси рӯзона аз 10 то 15 миллион бушка камтар истеҳсол шудани нафт сабаб шавад. Ин созиш дигар ширкатдорони ОРЕС-ро ҳам водор мекунад, ки коҳиши истеҳсолро ба роҳ монанд. Маъмурияти Трамп гуфт, ки хоҳиши кам кардани захираҳои дохилиро надорад, чун, ба гуфтаи Кохи Сафед, истеҳсол бидуни иқдоме аз ҷониби ҳукумат ҳам кам шудааст.

Конфронси аъзои ОРЕС бо сабаби тадбирҳои марбут ба коронавирус ба шакли видеоӣ баргузор мешавад.

Украинаву Русия дар остонаи Иди Пок табодули зиндониҳоро ба роҳ мемонанд

16 январи соли 2020. Хешовандони зиндониҳо дар назди парлумони Украина истода озодкунии наздиконашон аз дасти ҷудоиталабонро тақозо доранд

Украинаву Русия бо даъвати ҷудоиталабон дар шарқи Украина розӣ шуданд, ки дар остонаи таҷлили Иди Поки провославӣ барномаи навбатии табодули зиндониҳоро иҷро кунанд. Изҳороти мазкур шоми 8 апрел тавассути як конфронси видеоӣ аз ҷониби гурӯҳҳои Русия ва Украина, ки ба узвияти Гурӯҳи тамоси сегона шомил ҳастанд, нашр шуд.

Вебсайти президенти Украина Владимир Зеленский бо пахши изҳороте гуфт, ки мувофиқаҳо дар заминаи мушаххас кардани феҳристи зиндониҳо ва иҷрои ин нақша дар таърихҳои пеш аз таҷлили иди 19 апрел ба даст омадааст.

Борис Гризлов, фиристодаи Русия дар Гурӯҳи тамоси сегона гуфт, ки Киев ва ҷудоиталабон дар минтақаи Донбас дар тасдиқи феҳристи зиндониҳои табдилшаванда ба мувофиқа расиданд.

Вале то ҳол маълум нест, ки дар доираи табодули нави зиндониҳо чӣ шуморе аз маҳбусон аз ҳарду тараф озод хоҳанд шуд. Дар даври гузаштаи табодули зиндониҳо декабри соли гузашта 200 нафар озод шуда ба хонаашон баргаштанд.

Дар музокираи ахири тарафҳо, ки бо сабаби пандемияи коронавирус ба шакли конфронси видеоӣ барпо шуд, инчунин мавзӯи барчидани минаву нирӯҳо аз минтақаи Донбас баррасӣ шуд. То имрӯз талошҳои Киеву ҷудоиталабон барои дастёбӣ ба оташбас дар шарқи Украина бенатиҷа анҷомидааст.

Низоъҳо дар шарқи Украина аз апрели соли 2014 ба ин сӯ боиси кушта шудани тахминан 13200 нафар шудааст.

Ин таҳаввулот дар ҳолест, ки дабири кулли СММ Антонио Гутерреш моҳи март аз ҷонибҳои даргир даъват кард, ки дар фазои пандемияи коронавирус дар саросари ҷаҳон низоъҳоро хотима диҳанд.

Тошканд аз Маскав хост, пардохти ҳаққи патентро барои узбекистониҳо ба таъхир андозад

Муҳоҷирони узбек дар Русия.

Вазорати корҳои хориҷии Узбекистон бо ирсоли номаи расмие ба ҳукумати Русия дархост кардааст, ки пардохти ҳаққи патент ё иҷозаи корро барои муҳоҷирони ӯзбекистонӣ ба таъхир андозад.

Дар ин бора Авазбек Ҳоҷиматов, намояндаи вазорати корҳои хориҷии Узбекистон хабар дод. Вай гуфт, айни ҳол ин масъала аз сӯи мақомоти Русия баррасӣ мешавад.

Мақомоти Узбекистон мегӯянд, дар натиҷаи манъи фаъолияти муассисаҳои Русия то рӯзи 30-юми апрел, муҳоҷирони узбекистоние, ки дар Русия қарор доранд, бе кор мондаанд.

Владимир Путин, президенти Русия 2-юми апрел гуфт, дар кишвараш то охири моҳи ҷорӣ рӯзҳои ғайрикорӣ эълом мешавад.

Бино бар омори расмӣ, дар Русия айни ҳол наздики 2 миллион муҳоҷири узбекистонӣ ҳузур дорад.

Қирғизистон дар робита ба коронавирус аз Бонки исломии рушд кумак хост

Сооронбой Ҷеенбеков, раиси ҷумҳури Қирғизистон.

Президенти Қирғизистон Сооронбой Ҷеенбеков бо президенти Бонки исломии рушд (БИР) Бандар Ҳаҷар суҳбати телефониеро анҷом дод.

Ҷеенбеков ба раҳбарияти бонк пешниҳод кардааст, ки имкони кумак ба Қирғизистонро дар коҳиш додани оқибатҳои иҷтимоӣ ва иқтисодии коронавирус баррасӣ кунанд.

Президенти Бонки исломии рушд дар навбати худ ваъда додааст, ки дархости кумаки Қирғизистонро баррасӣ хоҳанд кард.

Қирғизистон то кунун дар робита ба коронавирус аз Бонки осиёии рушд 200 ҳазор доллар, аз Бонки ҷаҳонӣ 12,15 млн доллар ва аз Сандуқи байналмилалии пул 120,9 млн доллар кумак дарёфт кардааст.

То 8-уми апрел дар Қирғизистон 270 нафар ба коронавирус мубтало шудаанд.

Маҳбуси сиёсии қазоқ Асет Абишев ба боздоштгоҳи ҷаримавӣ интиқол ёфт

Асет Абишев (аз рост)

Фаъоли мадании қазоқ Асет Абишев, ки бо гуноҳи иштирок дар "фаъолияти созмони мамнуъ" дар зиндон аст, ба боздоштгоҳи ҷаримавии "картсер" интиқол дода шуд. Дар ин бора вакили дифоъ Гулнора Жуаспаева иттилоъ дод.

"Асетро баъди он ба боздоштгоҳи ҷаримавӣ интиқол доданд, ки хост чораҳо барои пешгирӣ аз коронавирус сахттар ва ба маҳбусон ниқоби тиббӣ дода шавад. Ҳоло дар зиндон каратин эълом шудааст ва ман натавонистам бо раҳбарияти он мулоқот кунам. Ҳоло маълум нест, барои чанд рӯз ӯро ба картсер бурдаанд",-афзуд вакили дифоъ.

Муовини додситони вилояти Алмато Ербол Керимбек низ хабари ба боздоштгоҳи муваққатӣ интиқол ёфтани фаъоли мадании қазоқро тасдиқ кард. "Аз ҷайби Абишев телефони мобилӣ пайдо кардаанд. Бинобар ин, барои 15 рӯз ба боздоштгоҳи ҷаримавӣ интиқол дода шуд. Агар мо далели видеоӣ дар ин замина намедоштем, ӯ муҷозот намешуд", - изҳор дошт муовини додситон.

Жуаспаева иддаои муовини додситонро рад карда, гуфт, "Абишев марди донишманд аст ва ҳечгоҳ даст ба қонуншиканӣ намезанад".

Асет Абишевро 30 ноябри соли 2018 бо гумони узвият дар ҳаракати мамнуи "Интихоби демократии Қазоқистон", ки аз сӯи мухолиф Мухтор Аблязов таъсис шудааст, чор сол аз озодӣ маҳрум карданд.

Бернӣ Сандерс аз идомаи корзор барои мақоми президентӣ даст кашид

Сенатор Берни Сандерс

Сенатор Бернӣ Сандерс аз идомаи маъракаҳо барои пешбарии номзадиаш ба мақоми президентии ИМА аз сӯи Ҳизби демократ дар интихоботи соли 2020 даст кашид.

Ин тасмими Сандерс ба муовини пешини президенти ИМА Ҷо Байден имкон медиҳад, ки дар интихоботи соли 2020 аз тарафи Ҳизби демократ номзад ба мақоми президентӣ шуда, бо президент Доналд Трамп вориди рақобат шавад. Байден чанде пеш дар маъракаҳои пешакӣ дар Иллинойс, Аризона ва Флорида бар Сандерс пирӯз шуда буд.

Довталабони курсии президентии ИМА дар пайи паҳн шудани коронавирус натавонистанд маъракаҳои худро ба таври анъанавӣ анҷом диҳанд. Баргузории тазоҳурот ва мулоқот бо интихобкунандагон ба иллати коронавирус манъ карда шудааст.

Барои пешбарии номзадӣ ба мақоми президентӣ аз сӯи Ҳизби демократ номзад бояд аз 3979 овоз 1991-тоашро ба даст орад. Ин раъйгирӣ қарор аст, миёнаҳои моҳи июл баргузор шавад. Байден то 7-уми апрел ҷонибдории 1217 интихобкунандаро ба даст овардааст.

Трамп дар маъракаи пешакии Ҳизби ҷумҳурихоҳ дар Иллинойс ва Флорида 1301 раъйро соҳиб шуд. Трамп барои дубора ба мақоми президентӣ номзад шудан бояд аз 2441 овоз 1276 овозро ба даст орад.

Интихоботи президентии ИМА 3-юми ноябри имсол баргузор мешавад.

Дар Душанбе ва баъзе минтақаҳои дигари Тоҷикистон барф борид. ВИДЕО

Акс аз барфбории соли гузашта дар Сангвор. Моҳи апрели 2019

Шоми 8-уми апрел дар шаҳрҳои Душанбеву Панҷакент ва баъзе аз минтақаҳои дигари Тоҷикистон барф борид. Аз ҳоло кишоварзон ва сокинони деҳаҳо нигаронанд, ки сардии ҳаво метавонад ҳосили дарахтон ва зироати онҳоро нобуд кунад. Маркази обу ҳавошиносии Тоҷикистон эҳтимоли сард шудани ҳаво ва боридани барфро дар рӯзҳои 8 ва 9-уми апрел пешбинӣ карда буд. Бино иттилои марказ, "шаби 8-уми апрел ва субҳи 9-уми апрел дар водиҳои вилояти Хатлон, ноҳияҳои тобеи марказ ва вилояти Суғд эҳтимол барф меборад." Масъулони марказ мегӯянд, ҳавои сард ба Тоҷикистон аз Русия тавассути Қафқоз ворид шудааст. Хеле кам мешавад, ки дар моҳи апрел дар Тоҷикистон барф борад. Соли гузашта дар ҳамин моҳ дар ноҳияи Сангвори минтақаи Рашт барф борида буд.

Туркманистон машқҳои оммавӣ баргузор кард

Худи Қурбонгулӣ Бердимуҳаммадов ҳам гӯиё дучархасаворӣ баромадааст.

Рӯзи 7-уми апрел дар Туркманистон дар Рӯзи Ҷаҳонии Сиҳатӣ машқҳои оммавии варзишӣ баргузор карданд, ҳарчанд баръакси ин дар кишварҳои дигар барои роҳ надодан ба густариши коронавируси нав ба мардум дастур додаанд, ки аз ҳам фосила бигиранд.

Дар Туркманистон ба гуфтаи мақомот, ҳеҷ мавриди сирояти беморӣ сабт нашудааст ва ҳаргуна баррасии мавзуъ дар ин бора мамнӯъ аст. Рӯзи 7-уми апрел Қурбонгулӣ Бердимуҳаммадов, раиси ҷумҳури худкомаи Туркманистонро дар телевизион намоиш доданд, ки ҳамроҳ бо гурӯҳи хурде аз мақомоти расмӣ асп ва дучархасаворӣ мекард.

Худи ӯ фақат ҳафтаи гузашта бори аввал коронавирусро дар мазҳари ом ба забон овард. Матбуоти давлатӣ гузориш дод, ки дар шаҳри Ишқобод 3500 нафар ва дар тамоми Туркманистон 7000 нафар ҳамроҳ дучархасаворӣ кардаанд. Бахши туркмании Радиои Озодӣ гузориш дод, ки ҳафтаи гузашта маъмурони амниятӣ, ки либоси оддӣ ба бар доштанд, чанд касро, ки доир ба коронавирус гап мезаданд, бо худ бурданд.

Вирус Вуҳанро раҳо кард, гиребони Аврупову Амрикоро сар надодааст

Нақлиёти умумӣ дар Вуҳан ба кори маъмулӣ шурӯъ кард.

Дар шаҳри Вуҳони Чин, ки пандемияи коронавируси нав аз онҷо оғоз ёфт, муқаррароти манъи равуоро комилан бардоштанд. Айни замон теъдоди қурбониёни бемории КОВИД-19 дар Аврупо ва Иёлоти Муттаҳидаи Амрико ҳамчунон зиёд мешавад. Хотимаи маҳдудияти якмоҳаи равуо ва гаштугузор дар Вуҳон, маркази пайдоиши вирус, ки то кунун 82 ҳазор нафарро дар ҷаҳон куштааст, як нишонаи умедворкунанда ба ҳисоб меравад.

Аз тарафи дигар вирус ҳамчунон дар кишварҳои зиёде бедодгарӣ мекунад ва мардуми зиёдтарро мекушад. Бино ба омори расмӣ, коронавируси нав дар Вуҳон 50 ҳазор нафарро бемор кард ва аз ин миён 2500 нафарашон фавтидаанд. Вале мунтақидон мегӯянд, ҳукумати Чин рақамҳои воқеиро пинҳон доштааст ва матбуоти зери назари ҳукумат ҳам воқеиятро намегӯяд.

Дар Аврупо Борис Ҷонсон нахуствазири бемори Бритониё рӯзи дуввумашро дар шӯъбаи эҳёгарии шифохонае дар Лондон сипарӣ кард. Эдвард Аргар, вазири тандурустӣ гуфт, вазъи Борис Ҷонсон, ки аз бемории КОВИД-19 муолиҷа мегирад, “мӯътадил” ва “рӯҳияааш ҳам хуб аст”. Донишгоҳи Ҷон Ҳопкинси Амрико, ки иттилоъ дар бораи сироят ва маргумир аз бемориро ҷамъ мекунад, гуфт, рӯзи 7-уми апрел дар Иёлоти Муттаҳида 1800 кас аз ин беморӣ фавтиданд. То кунун КОВИД-19 дар саросари ин кишвар ҷони тақрибан 13 ҳазор нафарро гирифтааст.

Корхонаи "Трансформатор"-и Бохтар бозсозӣ мешавад. ВИДЕО

Корхонаи "Трансформатор"-и шаҳри Бохтар

Корхонаи "Трансформатор"-и шаҳри Бохтар баъд аз солҳои зиёд бозсозӣ шуда, дар назар аст, иқтидори истеҳсолиашро зиёд кунад. Ин корхонаи азим бо ширкатҳои русӣ қарордод бастааст.

Назаралӣ Давлатшоев, мудири корхонаи "Трансформатор"-и шаҳри Бохтар мегӯяд, "баъди азнавсозии корхона мо ҳам сифатан хуб мешавад, ҳам арзиши аслии маҳсулот арзонтар шавад ва ҳам дар бозори ҷаҳонӣ ҷойи худро меёбад".

Корхонаи саҳомии "Трансформатор" дар Бохтар яке аз азимтарин корхонаҳои тавлиди трансформаторҳо дар Тоҷикистон аст. Замони Шӯравӣ дар корхонаи "Трансформатор" зиёда аз 1200 нафар кор мекард.

Бино ба камбуди молӣ чанд соли пеш истеҳсолро ба маротиб кам карда, даҳҳо кормандро ба рухсатии бемузд фиристод. ​Шарофат Ҳасанова, корманди собиқи корхона, баъди солҳо дигарбора ба кор даъват шуд.

Корхонаи "Трансформатор"-и Бохтар бозсозӣ мешавад
лутфан мунтазир бошед

Феълан кор намекунад

0:00 0:02:26 0:00

Корхонаи "Трансформатор" соли 2017 дубора корро аз сар гирифт, вале то ҳол натавонистааст ба ҳолати пешина баргардад. Ба гуфтаи масъулони корхона, Тоҷикистон дар як сол ба ҳазор трансформатори нав ниёз дорад.

Феълан барои истеҳсоли истгоҳи барқӣ ё трансформатор маҳсулоти хомро аз Узбекистону Русия ва Чин меоранд. Харидорони асосии трансформаторҳо ширкати “Барқи тоҷик” аст.

Соли 2016 Кумитаи давлатии сармоягузорӣ саҳмияҳои корхонаи “Трансформатор”-ро ба фурӯш гузошт, вале бо талоши роҳбарияти феълиаш корхона аз тендер ё музояда гирифта шуд ва бо сармояи хусусӣ дигарбора ба кор идома дод. Шарти асосӣ ин буд, ки корхонаро дубора фаъол ва шумораи коргаронро бештар кунад. Масъулини корхона умедворанд, бо фаъол шудани нерӯгоҳҳои барқӣ ва бекор шудани маҳдудияти барқ дар Тоҷикистон, кори ин корхона ҳам дубора равнақ меёбад.

Дар Покистон 7 ҷангҷӯро кушта, силоҳҳояшонро гирифтаанд

Вазиристони Шимолӣ борҳо саҳнаи ҳамлаву бомбгузориҳои хунин шудааст.

Артиши Покистон мегӯяд, бо юриш ба ду пинҳонгоҳи Толибон дар марзи Афғонистон 7 нафари онҳоро кушт. Дар баёнияи расмӣ аз рӯзи 7-уми апрел омадааст, ки чаҳор ҷангҷӯро дар вилояти Вазиристони Шимолӣ куштанд, ки дар солҳои гузашта ба пойгоҳи чанде аз гурӯҳҳои ифротии дохилӣ ва хориҷӣ табдил ёфтааст.

Се ифротгарои дигар дар минтақаи қабоилнишини Муҳманд нобуд карда шудаанд. Дар баёнияи артиши Покистон омадааст, ки нерӯҳои амниятӣ ҳамчунин аз ҳарду пинҳонгоҳ аслиҳа ёфта ва мусодира кардаанд. Ҳоло маълум нест, ифротгароёни маҳвшуда узви кадом гурӯҳе будаанд. Хабари артиши Покистонро аз дигар манобеъ тасдиқ кардан, имконнопазир аст.

Рӯҳонӣ хост, IMF барои иқтисоди беҳоли Эрон зудтар қарз бидиҳад

Рӯҳоние дар ҳоли истироҳат дар Исфаҳон.

Ҳасан Рӯҳонӣ, раиси ҷумҳури Эрон аз Сандуқи Байналмилалии Пул хост, ба кишвараш қарзи чанд миллиардоллариеро ихтисос бидиҳад, ки барои мубориза бо хуруҷи бемории КОВИД 19 тақозо кардааст. “Ӯ рӯзи 8 -уми апрел дар нишасти ҳукумат, ки дар телевизион намоиш доданд, гуфт: “Мо узви Сандуқи Байналмилалии Пул ҳастем. Ва инҷо дар қарз додан набояд ҳеҷ табъизе вуҷуд дошта бошад.”

Бонки Марказии Эрон моҳи гузашта аз Сандуқи Байналмилалии Пул хост, аз хазинаи кӯмакҳои фаврии махсус барои мубориза бо коронавирус 5 миллиард доллар қарз бидиҳад. Эрон яке аз кишварҳоест, ки гирифторону қурбониёни КОВИД-19 дар он бисёр зиёд аст. Ба гуфтаи мақомот, то кунун вирус ба 62 500 нафар сироят карда ва 3800 касро куштааст, вале мутахассисон мегӯянд, ки Эрон ҳақиқатро пинҳон медорад ва миқёси густариши вирус васеътар аз он аст, ки гуфта мешавад.

Пандемияи коронавирус ҳоли иқтисоди Эронро, ки аз таҳримоти иқтисодии Амрико сахт осеб дида буд, бадтар кард. Амрико соли 2018 аз созиши байналмилалии атомӣ бо Эрон хориҷ шуд ва таҳримоти иқтисодӣ ба зидди ин кишварро барқарор кард.

Вазирони Еврогруп ба созиш нарасиданд

Вазирони молияи кишварҳои узви Иттиҳоди Аврупо бо вуҷуди гуфтугӯҳои дароз дар бораи барномаи наҷоти иқтисоди иттиҳод аз бӯҳрони пешовардаи коронавирус сари қабули барнома ба созиш нарасиданд. Гуфтугӯҳои вазирон то субҳи 8-уми апрел идома кард. Марио Сентено, раиси Еврогруп ҳавзаи кишварҳои евро гуфт, “Баъд аз 16 соат мубоҳиса мо ба созиш наздик шудем, вале ҳоло ба даст наёмадааст. Ба гуфтаи ӯ, баррасии барнома рӯзи 9-уми апрел идома мекунад.

Бо афзоиши фишор барои коҳиши паёмадҳои карантини саросарӣ ба вазъи иқтисодӣ ва иҷтимоӣ дар Аврупо, вазирон рӯзи 7-уми апрел видеоконфронс баргузор карданд. Марио Сентено, гуфт, ки масъалаи таъсиси “тӯри эминии молӣ” -и 540 миллиард евроӣ дар миён аст. Масъалаи ихтилофи назар нашри авроқи гаронбаҳои муштараки Аврупо ба истилоҳ “коронабонд” аст.

Кишварҳои қарздори сахте ба мисли Итолиё ва Испониё мехоҳанд, дар ин замони сахт ба онҳо ҳамраъйӣ нишон дода, бори қарзи онҳоро сабуктар кунанд. Фаронса ҳам тарафдори ин пешниҳод аст, вале кишварҳои сарватманди Иттиҳодияи Аврупо ба мисли Олмон, Ҳолланд, Австрия ва Финландия ингуна пешниҳодро қабул надоранд, чун ба тахмини ин кишварҳо мумкин аст, дар ниҳояти амр молиётсупорандагони онҳо, қарзи кишварҳои заифтару осебпазири Иттиҳодияи Аврупоро бипардозанд.

Нахуствазири Бритониё ҳанӯз ҳам дар шӯъбаи эҳёгарӣ аст

Борис Ҷонсон чанде пеш ба бемории КОВИД-19 гирифтор шуд.

Борис Ҷонсон, нахуствазири Бритониё рӯзи дуввуми худро дар шӯъбаи эҳёгарии шифохонае дар шаҳри Лондон сипарӣ кард. Айни замон дар рӯзи 7-уми апрел дар он тарафи уқёнус дар Амрико теъдоди қурбониёни бемории КОВИД-19 аз 4000 нафар ҳам гузашт. Дар дигар гӯшаҳои ҷаҳон аз ҷумла Аврупо, манъи равуои зиёд ва нигаҳдории фосила аз ҳамдигар натиҷа додааст, ки суръати густариши вируси хатарнок сусттар мешавад.

Вазъи сиҳатии нахуствазири Бритониё, яке аз раҳбарони шинохта дар ҷаҳон, ки чанде пеш вирус ба ӯ ҳам сироят кард, ба қавли сухангӯяш “мӯътадил” аст ва ӯро барои “назорати дақиқ дар шӯъбаи эҳёгарӣ нигаҳ медоранд”. Дар саросари Бритониё то ҳол бештар аз 55 ҳазор нафар бемор шудаанд ва 6200 каси онҳо ҷон додаанд.

Дар шаҳри Ню Йорк дар як рӯз тақрибан 1000 нафар фавтид ва теъдоди қурбониён аз 4000 ҳазор тан гузашт. Дар саросари Амрико КОВИД-19 дар маҷмӯъ тақрибан 13 ҳазор нафарро кушта ва ба 400 ҳазор кас сироят кардааст. Омори мазкурро Донишгоҳи Ҷон Ҳопкинси Амрико ҷамъ меорад.

Мурофиаи додгоҳии Далер Шарифов ҳафтаи оянда оғоз мешавад

Далер Шарифов

Мурофиаи нахустини додгоҳии Далер Шарифов, рӯзноманигори боздоштшудаи тоҷик, рӯзи 13-уми апрел дар Додгоҳи ноҳияи Шоҳмансури пойтахт баргузор хоҳад шуд. Дар ин бора вакилони мудофеи Маркази мустақил оид ба ҳифзи ҳуқуқи инсон, ки аз ҳаққи Далер Шарифов ҳимоят мекунанд, хабар доданд.

Шарифов аз моҳи январ боз дар боздоштгоҳ аст. Маълум нест, мурофиаи ӯ паси дарҳои пӯшида мегузарад ва ё озод бо иштироки наздикону хабарнигорон.

Далер Шарифов расман ба барангехтани кинаву адовати миллӣ ва мазҳабӣ муттаҳам аст. Қонуни ҷиноии Тоҷикистон барои ин иттиҳом то 5 соли зиндонро пешбинӣ кардааст.

Наздикон ва созмонҳои ҳомии ҳуқуқи хабарнигорон ин иттиҳомро беасос медонанд ва озодии ҳарчи зуди ӯро талаб доранд.

Далер Шарифов, хабарнигори 32-солаи тоҷикро рӯзи 28-уми январи имсол дастгир карданд.

Созмонҳои ҳомии ҳуқуқ ва озодии баён аз боздошти Далер Шарифов изҳори нигаронӣ карда, борҳо аз мақомоти Тоҷикистон раҳоии ӯро талаб кардаанд.

Толибон аз идомаи гуфтугӯ бо ҳукумати Афғонистон даст кашидаанд

Гурӯҳе аз зиндониёни Толиб ҳангоми ибодат дар зиндони Пули Чархӣ дар шаҳри Кобул. Акс аз рӯзи14-уми соли 2019.

Гурӯҳи Толибон ҳайати худро аз Кобул бозхондаанд ва чанд соат баъд аз он ки гуфтанд, музокирот дар бораи табодули асирон бо ҳукумат қатъ шуд. Табодули асирон тадбири аслӣ барои музокироти сулҳ миёни ду тараф аст, ки бо мусоидати Амрико ба роҳ андохта шуд.

Гурӯҳи 3 нафарии Толибон дар шаҳри Кобул бо чанде аз намояндагони ҳукумати Афғонистон дар бораи озод кардани зиндониёни Толиб гуфтугӯ доштанд. Суҳайл Шоҳин, сухангӯи дафтари Толибон дар Қатар рӯзи 7-уми апрел дар Твиттер навишт, ҳайат “ҳамин лаҳза” аз музокирот даст мекашад. Ба гуфтаи ӯ, зиндониёну асирони Толибро бояд то ҳол озод мекарданд, вале “тарафҳои марбута дониста” ин корро ба таъхир меандозанд.

Аз ин пештар Суҳайл Шоҳин дар Твиттер навишт, ки Толибон дар “мулоқотҳои беҳосил” ширкат нахоҳанд кард ва гуфт, ки сабаби таъхир дар раҳоии зиндониён ҳукумати раиси ҷумҳур Ашраф Ғанӣ аст. Ду тараф аз ҳафтаи гузашта саъй доштанд, қарори табодули асиронро ниҳоӣ кунанд. Воҳид Умар, яке аз мушовирони Ашраф Ғанӣ гуфт, ҳукумат раҳоии зиндониёнро ҳамчун бахше аз музокироти васеъ бо Толибон қабул дорад. Ӯ рӯзи 7-уми апрел гуфт, зиндониёни Толибро замоне озод мекунанд, ки ин гурӯҳ “қадаме ба сӯи пеш бардорад.”

Дар Чехия теъдоди гирифторони КОВИД-19 ба 5033 нафар расид

Дар Чехия пӯшидани ниқоби тиббӣ дар кӯчаву нақлиёт ҳатмист.

Вазорати тандурустии Чехия мегӯяд, теъдоди мубталоёни бемории КОВИД-19 ба 5033 нафар расидааст ва аз ин миён 91 нафари онҳо фавтидаанд. Беморие, коронавируси нав бармеангезад, то кунун гиребони 181 нафарро сар додааст.

Порлумони Чехия рӯзи 7 - уми апрел бо қабули як қарор вазъи фавқуллодаро, ки рӯзи 11 - уми апрел ба поён мерасид, 19- рӯзи дигар ва то 30 - уми апрел тамдид кард. Ҳукумати ҷумҳурӣ пешниҳод кард, ки қарздорон, аз ҷумла онҳое, ки барои харидани хона қарз гирифтаанд, то 6 моҳ пардохти қарзи моҳонаро ба таъхир андозанд ва бонкҳо ҷаримае ҳам барои таъхир наситонанд.

Ҳукумати Чехия ҳамчунин дар андешаи сабуктар кардани муқаррароти карантин аст ва мехоҳад, баъзе аз мағозаҳо ва муассисаҳое, ки мардуми зиёд онҷо ҷамъ намеоянд, боз карда шавад. Суръати густариши коронавирус дар ин кишвар сусттар шудааст ва талош барои он идома дорад, ки таъсири бӯҳрон ба иқтисод камтар шавад.

ИМА ба Туркманистон барои мубориза бо вирус наздики $1 млн медиҳад

Ишқобод, Туркманистон, моҳи марти 2020.

Амрико бо ҳадафи мубориза бо коронавирус ба Туркманистон 920 ҳазор доллар медиҳад. Дар ин бора сафорати ИМА дар Туркманистон хабар дод.

Маблағи ҷудошуда барои таҳияи озмоишгоҳҳо, ташхиси гирифторӣ ба бемориҳои гузаранда, хабар додан аз хатарҳо ва ғайра сарф мешавад.

Дар хабари вазорат омадааст, ки айни ҳол ҳукумати Туркманистон расман ҳолатҳои гирифторӣ ба COVID-19 -ро дар кишвар тасдиқ намекунад ва эҳтимол дорад, дар сурати ошкор шудани гирифторӣ низ тасдиқ накунад.

Ҳукумати он кишвар ахиран тадбирҳоеро барои пешгирӣ аз паҳншавии вирус роҳандозӣ кард, аммо ҳамзамон дар Туркманистон чорабиниҳое бо ширкати шумораи зиёди одамон баргузор мешавад, пӯшидани ниқоби тиббӣ манъ аст ва хонандагонро баъди анҷоми таътили баҳорӣ дубора ба мактаб даъват карданд.

Ҳукумати он кишвар ҳам пӯшидани ниқобро дар кӯчаҳо ва ҳам фурӯши онро дар дорухонаҳо манъ кардааст. Ба ин тартиб, ба забон овардани вируси корона дар Туркманистон ғайрирасмӣ мамнуъ шуд. Аммо расонаҳои маҳаллӣ хабар медиҳанд, ки бемориҳое монанд ба нишонаҳои коронавирус дар чанде аз минтақаҳои Туркманистон ба қайд гирифта шудааст.

Ёфтҳои бештар

XS
SM
MD
LG