9 медали ИМА дар Паралимпиадаи Пхёнчхан-2018

Март 12, 2018

Нарзуллоҳи Латиф

Бозиҳои XII зимистонаи паралимпӣ дар Пхёнчхани Кореяи Ҷанубӣ бо ширкати 567 варзишгар аз 49 кишвар то рӯзи 18-уми март идома хоҳад кард.

Дар ду рӯзи мусобиқот (10-11 март) аз рӯи барномаи Бозиҳо варзишгарони 16 кишвар соҳибони медалҳо гардиданд, аз он ҷумла намояндагони ҳашт кишвар медалҳои тилло ба даст оварданд.

Мунтахаби ИМА (Иёлоти Муттаҳидаи Амрико), ки 9 медал (4 тилло, 3 нуқра ва 2 биринҷӣ) ба даст овардааст, дар ҳисоби умумидастаӣ ҳам аз рӯи сифати медалҳо ва ҳам аз рӯи шумораи умумии медалҳо дар мақоми аввал аст. Фаронса бо 6 медал (3 тилло, 2 нуқра ва 1 биринҷӣ) дар мақоми дувум қарор дорад. Словакия бо 5 медал (3 тилло, 1 нуқра ва 1 биринҷӣ) мақоми севумро касб кардааст.

Олмон бо 5 медал (2 тилло ва 3 нуқра) мақоми чорум, Канада ва Украина ҳар кадом бо 6 медал (2 тилло, 1 нуқра ва 3 биринҷӣ) мақоми панҷумро соҳиб шудаанд. “Варзишгарони паралимпии бетараф” аз Русия бо 3 медал (2 тилло ва 1 нуқра) дар мақоми ҳафтум қарор доранд. Ба даҳгонаи аввал, инчунин Беларус бо 4 медал (2 нуқра ва 2 биринҷӣ) ва Ҷопон бо 3 медал (2 нуқра ва 1 бирингҷӣ) дохиланд.

Ҳисоби медалҳо

Ҷ	Кишвар	Т	Н	Б	Ҳ
1	ИМА	4	3	2	9
2	Фаронса	3	2	1	6
3	Словакия	3	1	1	5
4	Олмон	2	3	0	5
5	Канада	2	1	3	6
5	Украина	2	1	3	6
7	Русия	2	1	0	3
8	Швейтсария	2	0	0	2
9	Беларус	0	2	2	4
10	Ҷопон	0	2	1	3
10	Британияи Кабир	0	2	1	3
12	Австрия	0	1	2	3
13	Италия	0	1	1	1
14	Белгия	0	0	1	1
14	Кореяи Ҷанубӣ	0	0	1	1
14	Зеландияи Нав	0	0	1	1

Дар Паралимпиадаи зимистона дар Пхёнчхан варзишгарон барои 80 маҷмуи медалҳо аз рӯи 6 ришта - биатлон, лижаронии кӯҳӣ, пойгаи лижаронӣ, сноуборд, кёрлинг ва слеҷ-ҳоккей – рақобат мекунанд. Гурҷистон, Кореяи Шимолӣ ва Тоҷикистон барои аввалин бор дар Бозиҳои зимистонаи паралимпӣ иштирок доранд.

Сиёвуш Илёсови 28-сола танҳо варзишгарест, ки Тоҷикистонро дар Бозиҳои XII зимистонаи паралимпӣ намояндагӣ мекунад. Ӯ ҳамроҳи мураббиаш Илҳомиддин Абдуллоев рӯзи чоршанбе, 14-уми март, дар пойгаи лижаронӣ байни мардон ба масофаи 1,5 километр (Sprint Classic, Vis Imp) дар даври интихобӣ вориди рақобат мешавад.