Шабакаи форсизабони телевизиони Би-би-си мегӯяд, ки додгоҳи Эрон бо судури як амр ҳисобҳои бонкии 152 корманди ин ширкатро масдуд кардааст.
Ба гуфтаи раҳбари хадамоти ҷаҳонии Би-би-си Франческа Ансворт қарори мақомоти Эрон кормандони ширкатро аз хиридорӣ ва фурӯши амволи ғайри манқул, ҳамчунин мошин ва таҷҳизоти дигар маҳрум мекунад.
Пахши барномаҳои шабакаи форсизабони телевизиони Би-би-си дар Эрон мамнӯъ аст. Солҳои ахир кормандони телевизион мавриди таҳдиду фишори мақомот қарор гирифтаанд.
Би-би-си аз судури амри додгоҳ огоҳ набуд ва дар ҳоле бохабар шуд, ки наздикони яке аз корманди Би-би-си натавонистанд аз номи ӯ хонаеро бифурӯшад.
Ҷониби Эрон қарор додгоҳрро шарҳ надодааст.
"Мо аз ин ҳамлаи зоҳиран ҳадафмандона алайҳи кормандон, кормандони собиқ ва баъзе хабарнигорони ғайриштатии Би-би-си изҳори таассуф мекунем"- гуфтааст Франческа Ансворт.
Раҳбарияти телевизиони форсизабон қарори мақомоти Эронро талоши хомуш кардани хабарнигорони беғараз номидааст.
Амир Азимӣ, раҳбари телевиион гуфтааст, ки сарфи назар аз маҳдудият, Би-би-си пахши хабарҳои беғаразона ва санҷидашуда ба форсизабонҳои тамоми ҷаҳонро идома медиҳад.
Бо вуҷуди манъи пахши барномаҳо, теъдоди тамошобинони шабакаи ҷаҳонии Би-би-си дар Эрон 13 миллион буда, ин ҳафтумин бозори бузурги шабакаи хабарӣ унвон мешавад.
