Даври баъдии музокироти сулҳи Сурия рӯзҳои 12-13-уми июн дар Остона, пойтахти Қазоқистон, баргузор хоҳад шуд. Хабаргузориҳои Русия гузориш доданд, ки ин ҳарфҳоро сафири Сурия дар Маскав рӯзи шанбе баён кардааст. Хабаргузории «РИА Новости» ба нақл аз Риёз Ҳаддод гузориш дод, ки даъватномаро барои иштирок дар ин музокирот дарёфт кардаанд. Як намояндаи мухолифини сиёсии Сурия гуфтааст, оппозитсия то ҳанӯз дар мавриди ширкати худ дар ин музокирот тасмим нагирифтааст.
