Пайвандҳои дастрасӣ

Хабари нав

Хабарҳо

Хабарнигори олмонӣ бо кӯдакаш дар Сурия озод шуд

Хабарнигори олмонӣ Янина Финдайзен, ки беш аз як сол дар Сурия асири гурӯҳи мусаллаҳи "Ҷабҳат-ан-Нусра" буд ва дар асорат кӯдак ба дунё овард, ба озодӣ баромад. Ӯ феълан дар Туркия қарор дорад ва барои бозгашт ба Олмон омодагӣ мегирад, гуфт вазорати умури хориҷии Олмон. Ба навиштаи мутботи Олмон Финдейзен, хабарнигори мустақил, бо нашрияи "Sueddeutche Zeitung" ва шабакаи NDR ҳамкорӣ мекард.

Финдейзенро моҳи октябр гурӯҳи мусаллаҳи "Ҷабҳат-ан-Нусра" дар Сурия рабуд ва барои озодиаш 5 миллион евро талаб кард. ББС аз қавли маҷаллаи "Фокус" гуфтааст, ки Финдейзенро моҳи октябр рабуданд ва ӯ моҳи декабр дар асорат писар таваллуд кардааст. Ин гурӯҳ даст доштани худро дар рабудани хабарнигори олмонӣ рад мекунад ва мегӯяд, ки баръакс дар озод кардани ӯ саҳм дорад. ББС ҳамчунин менависад, ки хабарнигор бо ваъдаи як дӯсташ, ки ба ӯ бояд дар бораи ҷангиёни исломӣ сӯҳбати ихтисосӣ медод, ба Сурия рафт.

Ҳамаи хабарҳои имрӯзро дар инҷо бихонед

Чехия бе тасдиқи Аврупо мехоҳад аз ваксинаи русии Sputnik-V истифода кунад

Андрей Бабиш нахуствазири Чехия бо Владимир Зеленский раисҷумҳури Украина

Андрей Бабиш, нахуствазири Чехия гуфт, кишвараш метавонад, воксинаи русии Sputnik V-ро зидди короновирус бидуни тасдиқи Оҷонсии аврупоӣ оид ба доруворӣ истифода кунад.

Ҷумҳурии Чех бо 10,7 миллион аҳолӣ аз пандемияи COVID-19 сахт зиён дид ва мизони сироятёбӣ ба вирус дар ин кившар назар ба кишварҳои ҷаҳон хеле боло аст. Ба ҳолати 27-уми феврал дар шаҳри Прага танҳо 649 ҳазор нафар нафар ваксинаи Pfizer / BioNTech-ро гирифтанд. Дар ин кившар ҳамчунон ваксинаҳои тавлидаардаи ширкати Moderna ва AstraZeneca ҳам истифода мешавад.

Бабиш дар як суҳбат ба телевизиони CNN Prima News гуфт, “мо наметавонем, мунтазири тасдиқи Оҷонсии аврупоӣ оид ба доруворӣ бимонем, дар ҳоле ки Русия ба он дархост надодааст”. Ӯ гуфт, барои истифодаи воксинаи русӣ тасдиқи оҷонсии дорувории худи Чехия кофӣ хоҳад буд.

“SUKL- (Оҷонсии дорувории Чехия) бояд санадҳои ваксинаро омӯзад ва агар ин оҷонсӣ онро барои истифода тасдиқ кунад, Вазорати тандурстӣ ба таври истисно метавонад иҷоза диҳад... баъдан ҳар нафаре, ки ҳоҳишманд аст метавонад ин гуна ваксинаро бигирад”, гуфт Бабиш.

Бо ишора ба Венгрия, ки нахуствазир Виктор Орбан ваксинаи чиниро дастрас карда аст, Прага бо ваксинаи Sinopharm-и тавлидкардаи Чин ҳам метавонанд, айнин чунин корро кунад, иброз дошт Бабиш.

Нахуствазири Чехия гуфтааст, “ваксинаҳои Русия ва Чин нерӯгоҳи атомии Дуковани нестанд”. Ишораи Бабиш ба нерӯгоҳи атомӣ аз он аст, ки ду кишвар аз бехатарии ин нерӯгоҳи азим ибрози нигаронӣ кардаанд.

Изҳороти Бабиш дар ҳолест, ки қаблан 10-уми феврал ӯ гуфта буд, Чехия мунтазири тасдиқи Оҷонсии аврупоӣ оид ба доруворӣ хоҳад монд, қабл аз оне ки аз ваксинаи русӣ истифода кунад.

Исроил мегӯяд, мунфаҷир кардани киштии боркашон эҳтимол кори дасти Эрон аст

Киштии Helios Ray, ки ба Исроил тааллуқ дорад

Фармондеҳон ва сиёсатмадорони баландпояи Исроил рӯзи 28-уми феврал дар як ҳамоиш ҷамъ меоянд, то масъалаи ҳамла ба киштии боркашон дар халиҷи Оманро баррасӣ кунанд. Вазири мудофеаи Исроил гуфт, эҳтимол ин ҳамларо Эрон тарҳрезӣ кардааст.

Телевизион давлатии “Кан” аз қавли мақомдорони исроилӣ, ки аз онҳо ном бурда намешавад гуфт, Эрон бо ташкили таркиш дар киштии боркашони Helios Ray, ки боиси тахриби он шуд “хати сурхро убур кард”. Бени Ганс вазири дифои Исроил, рӯзи 27-уми феврал гуфт, эҳтимол пушти ҳамла ба киштии борбари мошинкашонӣ, ки аз бандари Дамами Арабистони Саъудӣ ба Сингапур равон буд, Эрон меистад.

Ганс ба телевизиони давлатӣ гуфт, “Макони киштӣ нисбатан ба Эрон наздик аст ва масъулияти ҳамларо ба души Эрон мегузорад, аммо инро ҳоло бояд санҷид. Инро ман бо назардошти наздик будани мавқеи будубоши киштӣ арзёби кардам”, гуфт ӯ.

Мақомоти расмии Эрон дар ин робита то ба ҳол, ягон вокунише накарданд. Дар ҳамин ҳол, сухангӯи ширкати идоракунандаи бандари давлатии Имороти Муттаҳидаи Араб, DP World гуфт, зиёни воридшуда ба киштии Helios Ray-ро то якуми март арзёбӣ хоҳанд кард. Телевизиони “13 News”-и Исроил хабар дод, ки як ҳайати исроилӣ барои тафтиши ин қазия ба шаҳри Дубай сафар кард.

Пайрави зиндонии "Шоҳидони Яҳво" дар Тоҷикистон таҳти ҳимояти USCIRF қарор гирифт

Шамил Ҳакимов пайрави "Шоҳидони Яҳво" дар Тоҷикистон

Нуру Туркел нозири Комиссияи ИМА оид ба озодиҳои байналмилалии динӣ Шомил Ҳакимов як пайрави фирқаи “Шоҳидони Яҳво”-ро, ки барои 7,5 дар Тоҷикистон зиндон шудааст зери ҳимояти худ қарор додааст.

Дар як баёнияи Комиссияи ИМА оид ба озодиҳои байналмилалии динӣ (USCIRF), ки рӯзи 24-уми феврал нашр шудааст, гуфта мешавад аокимов дар доираи барномаи “Маҳбусони мазҳабӣ” мавриди ҳимоят қарор хоҳад гирифт. Шамил Ҳакимов, як узви созмони насронии дар Тоҷикистон мамнӯи "Шоҳидони Яҳво", бо ҷурми барангехтани кинаву адовати милливу мазҳабӣ сентябри соли 2019 ба 7.5 соли ҳабс маҳкум шуд. Ба гуфтаи мақомот Ҳамкимов ҷашни Наврӯзро мазаммат карда, онро “мероси даврони оташпарастӣ”, номидааст.

Дар баёнияи Комиссияи ИМА оид ба озодиҳои байналмилалии динӣ гуфта мешавад, Ҳакимови бемор аз соли 2019 дар зиндони пур аз маҳбусон нигоҳ дошта мешавад, ки бо иттиҳоми сохта ба 7,5 соли зиндон маҳкум шудааст.

“Ҳакимов бемории фишорбаландӣ дорад ва ҳангоми боздошт шудан дар таърихи 26-уми феврали соли 2019 пас аз ҷарроҳӣ саломатии худро барқарор мекард. Дар зиндон ба Ҳакимов иҷозат надодаанд, ки китоби Инҷилро қироат кунад. Дар сурати озод шудан дар соли 2025 низ ӯ се соли дигар ҳақ надорад, дар кори иттиҳодияҳои дини ширкат варзад. Мақомоти Тоҷикистон амалан зиндагии ин шахсро бинобар эътиқоди диниаш ба ҳам мезананд”, гуфта мешавад дар изҳороти ин созмон.

Созмони динии масеҳии Шоҳидони Яҳво соли 1997 фаъолияташро дар Тоҷикистон қонунӣ карда, аз равияҳои фаъоли масеҳӣ шинохта мешуд. Фаъолияти ин созмони насронӣ соли 2007 бо як қарори Вазорати фарҳанги Тоҷикистон, ки он вақт идораи умури динро ба уҳда дошт, мамнуъ эълон шуд ва додгоҳ низ ин қарорро тасдиқ кард.

Толибон дар Афғонистон се узви хонаводаи рӯзноманигорро куштанд

Комиссияи мустақили ҳуқуқи башари Афғонистон (AIHRC) рӯзи 28-уми феврал гуфт, як фармондеҳи Толибон се узви оилаи рӯзноманигори кушташударо дар маркази вилояти Ғур ба қатл расондааст.

Рӯзноманигор Бисмиллоҳ Одил Аймоқ сардабири як радиои хусусӣ дар вилояти Ғур буд ва дар аввали моҳи январи имсол аз ҷониби афроди мусаллаҳи ношинос кушта шуд.

Рӯзи 25-уми феврал афроди мусаллаҳ ба хонаи падари Аймоқ дар канораи Фирузкӯҳ ҳамла карданд. Сабаби ҳамла ҳанӯз рӯшан нест. Комиссияи мустақили ҳуқуқи башари Афғонистон хабар дод, ки илова бар се нафари кушташуда, ҷангҷӯёни Толибони чаҳор нафарро маҷрӯҳ карда, се узви дигари хонаводаро рабудаанд.

Комиссияи мазкур аз мақомоти Афғонистон даъват кард, ки ин қазияро тафтиш кунанд. Масъулияти ҳамла ба хонаводаи Аймоқро ҳеҷ гурӯҳ ба дӯш нагирифтааст. Рӯзи 26-уми феврал сухангӯи Толибон Забеҳуллоҳ Муҷоҳид гуфт, Толибон дар ташкили ҳамла даст надоранд. Моҳҳои охир ҳамла ба рӯзноманигорон дар Афғонистон афзоиш ёфтааст.

Ба гузориши "Созмони Ҳимояткунадаи Расонаҳои Озоди Афғонистон" - як пойгоҳи мониторинги ВАО дар Кобул, давоми соли 2020 ҳадди ақал 11 корманди васоити ахбори умум дар Афғонистон кушта шуданд. Ҳукумати Афғонистон дар ташкили ҳамлаҳо Толибонро айбдор мекунад. Гурӯҳи мусаллаҳ даст доштани худро рад мекунад.

Созмони Хабарнигорони бидуни марз (RSF) мегӯяд, Афғонистон ҳоло яке аз минтақаҳои хатарзо дар ҷаҳон барои рӯзноманигорон аст.

Ҳалокати як муҳоҷири тоҷик дар садамае дар Русия. Соли гузашта 300 тобут овардаанд

Тобути яке аз муҳоҷирони тоҷик. Акс аз соли 2019

Як шаҳрванди 37-солаи Тоҷикистон дар садамаи нақлиётӣ дар Русия ҷон бохтааст. Расонаҳои Русия бо такя ба манобеи худ дар ниҳодҳои интизомии ин кишвар гуфтанд, ҳодиса шоми 26-уми феврал дар роҳи Петрозаводск - Санкт-Петербург рух дод, вале аз шаҳрванди Тоҷикистон ном набурданд.

Ҷониби Тоҷикистон ҳанӯз дар ин замина иттилоъ надодааст. Як манбаи огоҳ дар идораҳои расмии Тоҷикистон гуфт, дар сурати тасдиқи хабар, иттилои пурраро дар ихтиёри матбуот мегузоранд.

Дар ҳамин ҳол, расонаҳои Русия навиштанд, ронандаи мошини "Нексия", ки шаҳрванди Тоҷикистон савори он буд, дар шифохона бистарист. Сомонаи "Петрозаводск говорит" навишт, мусофирбари МАЗ ба мошин бурхӯрдааст. "Дар он мусофирбар 19 нафар будаанд, вале касе осеб надидааст", -- навишт манбаъ.

Ҳар сол дар Русия садҳо нафар аз муҳоҷирони тоҷик ба иллатҳои гуногун, ба мисли садамаи нақлиётӣ, фалокат дар сохтмон, маризӣ ва қисме бо марги иҷборӣ, аз ҷумла аз дасти гурӯҳҳои раҳзан ё қавмгаро вафот мекунанд.

Вазорати корҳои хориҷии Тоҷикистон мегӯяд, соли гузашта тобути 300 шаҳрванди кишвар аз Русия ба ватан оварда шуд. Дастикам панҷоҳ тобутро моҳи июни соли гузашта тавассути роҳи заминӣ оварданд. Муҳоҷирон мегӯянд, ба сабаби баста будани марзҳо баъзе аз ҷасадҳоро дар Русия дафн карданд.

Дар гузашта ҳар сол аз 600 то 800 ва бештар аз он тобути муҳоҷиронро ба ватан меоварданд.

Русия мизбони асосии муҳоҷирони кории тоҷик аст. То замони пандемия, онҳо аз Русия солона ба Тоҷикистон бештар аз ду миллиард доллар мефиристоданд, аммо ба иттилои раҳбарияти Бонки Миллӣ, имсол муҳоҷирон 6,3 дарсад камтар пул фиристодаанд.

Дар ҳоле ки мақомоти Тоҷикистон омори муҳоҷирони тоҷикро дар Русия камтар аз ним миллион нафар мегӯянд, мақомоти Русия ин рақамро бештар аз 1 миллион медонанд. Вазири меҳнату муҳоҷирати Тоҷикистон рӯзи 11-уми феврали имсол сабаби тафовутро шарҳ дод ва гуфт, Тоҷикистон танҳо муҳоҷиронро ҳисоб мекунад, Русия аъзои оилаи онҳоро низ ба шумор мегирад.

Барои ҳамла ба Капитол беш аз 300 нафар муттаҳам шудаанд

Барои ҳамла ба бинои Конгресси Амрико беш аз 300 кас муттаҳам шудаанд. Ҳамла рӯзи 6-уми январ ва дар соатҳое рух дод, ки Конгресс пирӯзии Ҷо Байденро дар интихоботи президентии 3-юми ноябри соли гузашта расман тасдиқ мекард. Мақомот гуфтанд, ҳамлаварон ҷонибдорони президенти собиқ Доналд Трамп буданд.

Ҷон Карлин, муовини додситони кулли Амрико, рӯзи 26-уми феврал ба хабарнигорон гуфт, дастикам 280 нафарро Вазорати адлия дастгир кардааст.

Ба қавли ӯ, таҳқиқот дар мавриди афроди масъул "бо суръату миқёси бесобиқа" идома дорад ва масъулин бояд посухгӯ бошанд.

Дар ҳамла ба бинои Конгресс дастикам панҷ нафар, аз ҷумла як афсари пулис ҷон бохтанд.

Бисёре аз ҳамлаварон бар асоси навиштаҳояшон дар шабакаҳои иҷтимоӣ дастгир шудаанд. Ба иттилои расмӣ, яке аз онҳо бо гузоштани видео ва ҳузураш дар байни ҳамлаварон ифтихор карда буд.

Баъд аз як ҳафтаи ҳодиса Доналд Трамп бо иттиҳоми таҳрики ҳамлаварон бо "импичмент" рӯ ба рӯ шуд, вале рӯзи 13-уми феврал Сенат ӯро "бахшид".

Дар Маскав аз шашумин солгарди қатли Борис Немтсов ёд оварданд

Ёдбуди Борис Немтсов дар Маскав

Дар шаҳри Маскав аз шашумин солгарди кушта шудани Борис Немтсов, яке аз мунтақидони барҷастаи ҳукумати Русия, ёд оварданд. Немтсов рӯзи 27-уми феврали соли 2015 дар болои пули калони рӯди Маскав ва дар наздикии кохи Кремлин бо зарби тир кушта шуд.

Садҳо фаъоли мухолифин ва чанде аз дипломатҳои ғарбӣ рӯзи 27-уми феврали имсол дар рӯйи ин пул ҷамъ омада, шамъу гул гузоштанд. Дар гузашта дар ин рӯз роҳпаймоӣ баргузор мешуд, аммо бо далели бемории ҳамагир фаъолони мухолифин бо таҷаммуъи хурд иктифо карданд.

Михаил Касянов, сиёсатмадори мухолиф ва нахуствазири пешини Русия, рӯзи 27-уми феврал ба хабаргузории "Франс-Пресс" гуфт, "ҳар сол дар ин рӯз дар инҷо ҷамъ мешавем, то ба ҳукумат нишон диҳем, ки фаромӯш накардаем ва фаромӯш нахоҳем кард."

Дар ин маросим сафирони Амрикову Иттиҳоди Аврупо ва Бритониё дар Русия ва, инчунин, намояндагони дигари кишварҳои ғарбӣ ҳузур доштанд.

Шашумин солгарди қатли Борис Немтсов дар ҳоле баргузор шуд, ки раҳбари мухолифони ҳукумати Русия, Алексей Навалний, ба зиндон маҳкум шуда, ҷонибдоронаш зери фишор қарор гирифтаанд.

Сенатори амрикоӣ гуфт, аз "иқдоми зиддидемократӣ" дар Гурҷистон нигарон аст

Боб Менендез

Боб Менендез, раиси Кумитаи равобити хориҷии Сенати Амрико, дар мавриди "иқдоми зиддидемократӣ" дар Қафқози Ҷанубӣ ибрози нигаронӣ карда, дар ин робита ба сафи ҳамтоёнаш аз Олмону Литва, Эстония, Лаҳистон ва Ҷумҳурии Чех пайваст.

Муттаҳидони Амрико дар эъломияи муштарак ҳамла ба дафтари Ҷунбиши иттиҳоди миллии Гурҷистон ва боздошти раҳбари он Ника Мелиаро танқид кардаанд. Онҳо гуфтаанд, ин ҳаракат "демократия ва озодии шиканандаро дар Гурҷистон" ошкор месозад.

Эъломия рӯзи 26-уми феврал нашр шуд.

Ҳамлаи пулис ба дафтари Ҷунбиши иттиҳоди миллии Гурҷистон рӯзи 23-юми феврали имсол сурат гирифт. Ника Мелиа барои таҳрики хушунат дар ҷараёни эътирозҳои моҳи июни соли 2019 муттаҳам мешавад, аммо худаш ин иттиҳомро дорои ангезаҳои сиёсӣ номид.

Созмони Афви Байнулмилал низ истифодаи шадид аз қудратро барои боздошти Ника Мелиа "як ҳаракати нигаронкунанда" дар Гурҷистон хондааст.

Чехия вазъияти бадеро дар замони пандемия таҷриба мекунад

Марзи Олмону Ҷумҳурии Чех

Ҷумҳурии Чех вазъияти бадтаринро дар ҷараёни пандемияи коронавирус таҷриба мекунад. Аз тақрибан 11 миллион аҳолии ин кишвари аврупоӣ то кунун беш аз як миллиону дусад ҳазор кас ба бемории ҳамагир мубтало шуда, 20 ҳазор нафар ҷони худро аз даст додаанд.

Дар ҳоле ки баъзе аз кишварҳо аз "сабук" шудани вазъи вобаста ба коронавируси нав хабар медиҳанд, дар Чехия маҳдудиятҳои сахттар ҷорӣ мешавад. Яке аз муқаррароти нав ин аст, ки сокинон бояд ду ниқоби тиббиро рӯйи ҳам бипӯшанд ва ё аз ниқобҳои вижа, ки қудрати муҳофизаташ бештар аст, истифода кунанд.

Муқаррароти манъи гаштугузор низ аз моҳи декабри соли гузашта ба ин сӯ аз соати 9-и шаб то 5-и субҳ давом мекунад. Ба истиснои фурӯшгоҳҳои маводи ғизоиву ҷиҳози кӯдакон ва дорухонаҳо фурӯшгоҳҳои дигар ва мактабу баъзе аз коргоҳҳо бастаанд.

Зоҳиран маҳдудиятҳои шадид то ҳанӯз натавонистаанд, ҷилави густариши коронавирусро дар Ҷумҳурии Чех бигиранд. Рӯзона гирифтории аз 10 то 15 ҳазор тан ба ин вирус тасдиқ мешавад.

Паҳншавии намуди нави коронавирус корро дар Чехия мушкилтар карда, зарфияти шифохонаҳо ба ҳадди ниҳоӣ расидааст. Акнун аз Олмону Австрия кумак хоста шудааст, то барои муолиҷаи беморони COVID-19 ҳамкорӣ кунанд.

Андрей Бабиш, сарвазири Чехия, гуфт, рӯзҳои душворе дар пеши рӯй аст. Вай афзуд, "мехоҳам, такрор кунам, ки ҳеч хабари хуше надорам, аммо ниёз аст, то маҳдудиятҳо идома ёбанд. Дар ғайри он фоҷиа дар шифохонаҳои мо ба бор хоҳад омад. Аз ҳама хоҳиш мекунам, ки вазъиятро дарк кунанд, зеро ҳеч гоҳе чунин вазъиятро таҷриба накарда будем."

Гуруҳе аз сокинон мухолифи маҳдудиятҳо ҳастанд
Гуруҳе аз сокинон мухолифи маҳдудиятҳо ҳастанд

Дар ҳоли ҳозир Олмону Лаҳистон, Австрия ва Словакия ба ҷуз аз мавридҳои истисноӣ иҷозаи равуоро аз (ба) Чехия намедиҳанд.

Бо оғози татбиқи ваксинаи зидди коронавирус дар моҳи декабри соли гузашта, умедвориҳо дар Чехия зиёд буд, ки шояд аз мавридҳои сирояти беморӣ ҷилавгирӣ шавад, аммо гуфта мешавад, ваксинзанӣ дар ин кишвар ба кундӣ пеш меравад. То кунун фақат 624 ҳазор дона ваксина татбиқ шуда, ки дар муқоиса бо аҳолии Ҷумҳурии Чех ва шумори мубталоён хеле андак ва ночиз будааст.

Бемории ҳамагир, ки дар охири соли 2019 кашф шуд, то кунун ба беш аз 114 миллион кас дар ҷаҳон сироят карда, боис ба марги зиёда аз дуним миллион нафар шудааст. Кишварҳо мегӯянд, беш аз 83 миллион тан шифо ёфтанд.

Вазорати тандурустии Тоҷикистон аз оғози имсол пайиҳам дар бораи сабт нашудани мавридҳои сирояти беморӣ гузориш медиҳад, ҳарчанд дар кишвар шубҳаҳо ба омори расмӣ боқист. Мақомоти Тоҷикистон мегӯянд, беморӣ ба беш аз 13 ҳазор кас сироят карда, 90 нафарро куштааст.

Дар Узбекистон устухонҳои навъи ношинохтаи динозавреро ёфтаанд

Ҳанс-Дитер Сюз, бостоншинос аз Донишкадаи Смитсонови Вашингтон ва Александр Аверянов, узви Академияи илмҳои Русия, намуди нави динозавреро, ки дар Узбекистон пайдо шуд, Dzharatitanis kingi (мухтарас D.Kingi) номиданд.

Калимаи аввал аз номи ноҳияи Ҷарқудуқ гирифта шудааст, ки устухонпораҳо дар онҷо ёфтанд. Калимаи дувум насаби олим Кристофер Кинг аст, ки дар шиносоии устухонҳо мадад кардааст.

Соли 2016 Сюз, Стивен Брюсаттӣ, Эмӣ Мюир ва Ен Б.Батлер динозаври дигарро, ки дар Узбекистон пайдо шуда буд, Амир Темур унвон карданд.

D.Kingi навъи махсуси динозаврҳои rebbachisaurid аст, ки пештар аз ин танҳо дар минтақаи Африқои Шимолӣ, Аврупо ва Амрико пайдо шуда буданд. Сюз мегӯяд, эҳтимол ин навъи динозаврҳо 90-100 миллион сол пеш дар рӯйи замин мавҷуд буданд.

Сафири Мянмар аз ҷомеаи ҷаҳонӣ хост, режими низомиро напазиранд

Мянмар

Сафири Мянмар (Бирма) дар Созмони Милали Муттаҳид мухолифаташро бо кудето ё табаддулоти давлатӣ дар он кишвар иброз дошт.

Кяу Моэ Тун рӯзи 26-уми феврал аз ҷомеаи ҷаҳонӣ хост, барои эҳё ва ё барқарор кардани ҳукумати ғайринизомӣ дар Мянмар кумак кунанд. Вай аз ҳамаи кишварҳо талаб кард, кудето дар Мянмарро ба таври ошкор танқид карда, аз эътирофи расмии режими низомӣ худдорӣ варзанд.

Мянмар аз аввали моҳи феврали имсол, замоне ки артиш қудратро ба даст гирифт ва Аунг Сан Су Чи, раҳбари мунтахаб ва бисёре аз аъзои ҳизби ӯро дастгир кард, дучори ҳарҷу марҷ шуд.

Артиш иддао дорад, ки дар интихоботи моҳи ноябри соли гузашта, ки ҳизби Аунг Сан Су Чи баранда эълон шуд, тақаллуб сурат гирифтааст.

Аъзои оилаи журналисти кушташудаи афғон ҳам ба қатл расиданд

Ҷасади хешовандони журналисти кушташуда Бисмиллоҳ Одил Аймақро ба ҳукумати вилоят оварданд. 26 феврал, Ғур, Афғонистон

Дар вилояти Ғури Афғонистон рӯзи 25 феврал се узви оилаи як журналисти кушташудаи маҳаллиро ба қатл расониданд. Дар ҳамла ба манзили журналист Бисмиллоҳ Одил Аймақ панҷ нафари дигар маҷрӯҳ шуданд. Ба иттилои як мақоми маҳаллӣ, ҳамаи маҷруҳон кӯдакон мебошанд.

Нураҳмад Кӯҳнавард, волии Ғур гуфт, ки ин ҳамла кори дасти Толибон буд, вале ҷузъиёти бештаре надод. Забеҳулло Муҷоҳид, сухангӯи Толибон даст доштани ин гуруҳро дар ин ҳамлае, ки касе то ҳол масъулияташро ба дӯш нагирифтааст, рад кард. Худи Аймақ дар рӯзи таҷлили соли нав кушта шуд.

Ин ҳодиса дар ҳолест, ки аввали ҳафтаи ҷорӣ афроди ҳамлагари ношинос Халил Нармгӯ, раиси собиқи анҷумани журналистони вилояти Бағлонро кушт. Маъракаи куштори журналистону фаъолони ҳуқуқ дар Афғонистон дар ҳоле авҷ гирифтааст, ки мақомоти ҳукуматӣ ва Толибон ба музокироти сулҳ идома медиҳанд ва ин музокираҳо ба сахтӣ пеш меравад.

Вазири дифои Олмон ба Афғонистон сафар кард

26 феврал, Мазори Шариф. Вазири дифои Олмон Аннегрет Крамп-Карренбауэр бо низомиёни олмонии мустақар дар Афғонистон мулоқот мекунад

Вазири дифои Олмон Аннегрет Крамп-Карренбауэр бо як сафари ғайримунтазира ба Афғонистон сафар кард, то ба қавли мақомоти Берлин, ӯҳдадории ин кишварро дар баробари сулҳи Афғонистон ба намоиш гузорад. Ҳавопаймои вазири дифоъ 26 феврал дар шаҳри Мазори Шариф фуруд омад. Дар ин шаҳр шумори бештари сарбозони олмонӣ мустақар шудаанд.

Ӯ гуфт, “Олмон дар ҷараёни сулҳ кӯмакрасонӣ ба Афғонистонро идома хоҳад дод”. Ӯ гуфтааст, “ба Афғонистон ба таври оҷил зарур аст, ки муносибатҳои миёни гурӯҳҳои мухолифи ин ҷомеа хуб шаванд”. Ӯ афзуд, ки Олмон хуруҷи нирӯҳояшро ботартиб ба роҳ мемонад. Ҳафтаи ҷорӣ Олмон эълон кард, ки нирӯҳояш дар Афғонистон то як соли дигар боқӣ хоҳанд монд. Олмон дар Афғонистон 1300 сарбоз дорад.

Раҳпаймоии мухолифони ҳукумати Арманистон дар Ереван

26 феврал, майдони Озодии Ереван. Вазген Манукян ба тарафдоронаш муроҷиат мекунад

Ҳазорҳо тарафдорони мухолифон рӯзи 26 феврал аз маркази Ереван бо талаби истеъфои нахуствазир Никол Пашинян раҳпаймоӣ карданд. Фазои Арманистон баъди он ки низомиёнро дар талоши сарнагунии қудрат айбдор кард, пуртаниш мешавад. Тарафдорони мухолифон бо парчаму шиорҳо дар даст ҳукуматро ба истеъфо даъват мекунанд. Интиқод аз Пашинян дар заминаи имсози созиши оташбас бо Озарбойҷон бар сари минтақаи ҷудоиталаби Қаробоғи Кӯҳӣ, ки моҳи ноябри порсол бо миёнҷигии Русия сурат гирифт, мояи интиқоду эътироз аз ҳукумати Никол Пашинян шудааст. Вазген Манукян, ки ӯро мухолифон номзад ба мақоми нахуствазирӣ пешбарӣ карданианд, рӯзи 26 феврал тарафдоронро ба эътироз даъват кард. Бисёр мухолифону тарафдоронашон шаби гузаштаро дар маркази шаҳр назди бинои парлумон саҳар карданд. Манукян гуфт, “ё мо аз аъзои ҳукумат халос мешвем, ваё Арманистонро аз даст медиҳем”.

Пеш аз он ки мулоқоти эътирозгарон бо президент Армен Саркисян баргузор шавад, эътирозгарон ба самти дафтари раёсатҷумҳуриву нахуствазир ҳаракат карданд.

Пашинян шоми 25 феврал хитоб ба 20 ҳазор тарафдоронаш дар Ереван гуфт, иҷоза намедиҳад, ки нирӯҳои мусаллаҳ мудохила кунанд. Ин посухи Пашинян дар вокуниш ба талаби истеъфои нахуствазир садо дод, қаблан чунин талабро гурӯҳҳои мухолифини ҳукумати Арманистон ҳам ба забон оварда буданд.

Баъди имзои созиши оташбас бо Озарбойҷон ва миёнҷигии Русия дар Қаробоғи Кӯҳӣ дар моҳи ноябри порсол, Пашинян дар дохили кишвар бо эътирозу мухолифатҳои афзоянда рӯбарӯ шуд. Созиши оташбас ба ҷанги 44-рӯза дар минтақаи ҷудоиталабе дар ҳудуди Озарбойҷон хотима гузошт ва дар натиҷа, Арманистон дар муқобили Озарбойҷони мавриди ҳимояти низомии Туркия бархе қаламравҳоро аз даст доду дар ҷараёни ҷангҳо ҳам талафоти низомӣ дид.

Рӯзи 26 феврал ҳам мухолифон, ки 10 ҳазор нафарро ба хиёбонҳо баровардаанд, дар назди бинои парлумон хайма зада тарки қудрат кардани Пашинянро талаб доранд.

Вазген Манукян, номзади муштараки мухолифон ба мақоми нахуствазири нави Арманистон таҳдид кард, ки то замони дар ҷаласаи изтирории парлумони кишвар ҳал шудани истеъфои Пашинян, эътирозҳо бетанаффус шабонарӯзӣ идома мекунанд. Вале Эдмон Марукян, раиси гурӯҳи оппозитсионии парлумонии “Арманистони мунаввар” ба журналистон гуфт, нақшаҳои ташкили ҷаласаи изтирории парлумонӣ 26-уми феврал бо сабаби ба ҷаласа ҳозир нашудани раиси маҷлис бекор шуд. Марукян гуфт, ки бо сабаби ҳозир нашудани намояндагони ҳизби “Иқдоми ман”-и Пашинян, кворум ё шумори зарурии вакилон дар маҷлис ҳозир нашуд ва бо ҳамин сабаб ҳам маҷлис барпо нагардид.

Пашинян рӯзи 25 феврал хитоб ба издиҳом дар Ереван гуфт, ки низомиён бояд кори худро кунанд ва дар фикри дифои кишвар аз ҳамлаи хориҷӣ бошанд.

Пашинян гуфт: “Баъзе одамон мехоҳанд, ки артишро ба ҷараёнҳои зиддиконститутсионӣ ҷалб кунанд. Ин талоши табаддулот аст, вале мардум иҷоза намедиҳад, ки дар Арманистон кудатои низомӣ рух диҳад”

Номаи нирӯҳои мусаллаҳ замоне пахш шуд, ки Пашинян тасмим гирифт муовини раиси ситоди кулли нирӯҳои мусаллаҳро аз мақомаш барканор кунад. Баъди нома бо талаби истеъфои нахустазир, Пашинян раиси ситодро ҳам ба истеъфо фиристод. Эътилофи “Иқдоми ман”-и Пашинян дар парлумон аксариятро ташкил медиҳад. Пашинян гуфтааст, ки талаби мухолифон барои қабули истеъфоро рад мекунад ва бар иваз ҳамаро ба машварати сиёсӣ даъват кард.

Дар як вокунишаш вазорати дифои Арманистон гуфт, ки ҳама гуна дахолати низомӣ ба сиёсат «ғайри қобили қабул» аст.

Ба таниши эҷодшуда дар Арманистон ҳамкорони берунаи Ереван вокуниш карданд. ИМА, ки бо Арманистон равобити дӯстона дорад, аз ҳама гуна иқдомҳои низомӣ ҳушдор дод ва ҷонибҳоро ба худдорӣ аз хушунат даъват кард. Нед Прайс, сухангӯи Департаменти давлатӣ рӯзи 25 феврал гуфт: “Мо ба ҳамаи ҷонибҳо ёдовар мешвем, ки ба принсипҳои демократӣ пойбанд бошанд ва нирӯҳои мусаллаҳ ба сиёсати дохилӣ набояд дахолат кунанд”. Русия, ки муттафиқи наздики Арманистон буда, дар хоки ин кишвар як пойгоҳи низомӣ ҳам дорад, инчунин ҷонибҳоро ба оромӣ даъват кард. Дмитрий Песков, сухангӯи президент Владимир Путин бо Пашинян телефонӣ ҳамсӯҳбат шудааст. Ӯ гуфт, «Путин ба ҷонибдорӣ аз ҳифзи тартибу интизом ва оромӣ дар Арманистон ва ҳам ба маҷрои қонунӣ овардани вазъ дар Арманистон сӯҳбат кард”. Ӯ гуфт: “Путин аз раҳбарияти қонунии Арманистон ҳимоят мекунад ва умедвор аст, ки вазъ базудӣ оддӣ хоҳад шуд”.

Рӯзи 26 феврал Кремлин гуфт, ки Арманистон бояд ба иҷрои созиш бо Озарбойҷон пойбанд бимонад

Созиши оташбас дар Қаробоғи Кӯҳиро мунаққидони Пашинян як “мағлубияти сиёсӣ” барои Арманистон меноманд, чунки бар асоси он, арманиҳо аз аксар манотиқи дар солҳои 1990 ишғолкардаашон дар ин минтақаи ҷудоиталаб ва ҳам ҳафт ноҳияи атрофи он ақибнишинӣ карданд.

Дар номае, ки аз афсарони низомӣ расидааст, раиси ситоди кулл Пашинян ва ҳукуматро дар он муттаҳам кард, ки кишварро “ба ҳолати наздик ба шикаст” оварданд ва онҳо дигар “қудрати қабули қарорҳои дуруст дар ҳолати изтирорӣ барои мардуми Арманистонро надоранд”. Ин номаро даҳҳо афсарони артиш, аз ҷумла, раиси ситоди кулл Оник Гаспарян ҳам имзо карданд. Гаспарян рӯзи 25 феврал баъди муовинаш аз кор барканор шуд.

Президенти Арманистон Армен Саркисян, ки салоҳиятҳои ӯ бештар ифтихорӣ аст, гуфт, барои бартараф кардани ҳолати бӯҳронӣ даст ба кор шудааст ва аз ҳама ҷонибҳо хост, ки хештандорӣ ва дарки дурусти воқеиятро ба намоиш гузоранд. Президент гуфтааст, ки бо Гаспарян ба хотири рафъи ҳолати таниш мулоқот хоҳад кард.

Дархости як зани ҷангии ДОИШ барои барқарории шаҳрвандии Бритониё рад шуд

Дар акси соли 2015 Шамима Бегум

Додгоҳи олии Бритониё дархости як ҷавонзанеро рад кард, ки хост баъди фирораш ба Сурия бо ҳадафи пайвастан ба ДОИШ дубора ба ватан баргардад, чун, ба гуфтааш, зиндагиаш таҳти хатар аст. Шамима Бегум ҳоло 21 сол дорад ва ӯ соли 2015, замоне, ки ноболиғ буд, ҳамроҳ бо ду духтари мактабхони дигар ба Сурия рафта он ҷо ба як марди узви гурӯҳи мамнӯи «Давлати исломӣ» оиладор шуд. Соли 2019 шиносномаи шаҳрванди Бритониёи ӯ мусодира гардид, вале ӯ аз болои ин қарор шикоят карда хост, ки шаҳрвандии ӯ барқарор гардад. Додгоҳи таҷдиди назар ба ҷонибдории барқарор шудани ҳуқуқи Бегум қарор кард, вале Додгоҳи олӣ ин ҳукмро 26 феврал бекор кард. Додгоҳ гуфт, ки Бегум метавонад муборизаҳои додгоҳии худро барои барқарории шаҳрвандии Бритониё идома диҳад, вале акнун аз беруни хоки Бритониё. Бегум ҳоло дар як қароргоҳи боздоштшудаҳо дар Сурия мебошад. Баъди издивоҷаш соҳиби се фарзанд шуд, вале ҳамаашон даргузаштанд. Дар ҳоле, ки бархе мегӯянд, Бегум барои барқарор кардани шаҳрвандиаш пурра ҳақ дорад, дигарҳо назарҳои мухолифи инро ҳам баён мекунанд.

Мусаллаҳон садҳо духтарро аз мактабе дар Нигерия бо худ бурданд

Катсина, 18 декабри соли 2020. Писарбачаҳоро аз дасти гаравгонгирҳо озод карданд

Сокинони кишвари Нигерия гуфтанд, ки дар паи як шабехуни гурӯҳи азими мусаллаҳе ба мактби маҳаллӣ рӯзи 26 феврал, садҳо духтари мактабхон рабуда шуданд ва то ҳол нопайдо мебошанд. Ҳодисае, ки дар мактаби давлатии аёлати Замфара рух дод, ҳамчун одамрабоии мудҳише арзёбӣ мешавад. Волидони Носира Абдуллоҳӣ ба Associated Press гуфтанд, ки ба иттилои онҳо 300 духтар нопадид шудааст ва синни онҳо 10 то 13-сола мебошад. Ба гуфтаи сокини дигари маҳаллӣ Мӯсо Мустафо, афроди мусаллаҳ инчунин ба як қароргоҳи низомиву посгоҳе дар ҳамин маҳал ҳамла карданд. Ӯ гуфт, ин кори онҳо боис шуд, ки вақте ба мактаб ҳамла карданд, низомиён натавонистанд пеши роҳи онҳоро бигиранд.

Сулаймон Тунау Анка, як намояндаи давлат гуфт, “Ин рост аст. Хонандаҳои мактаб рабуда шуданд”. Ӯ гуфт, ки мусаллаҳон ба мактаб бо мошин расиданд ва маҷбур карданд, ки духтарҳо ба мошинҳо савор шаванд. Ӯ гуфт, ки нирӯҳои амниятӣ аз паи таъқиби мусаллаҳон шудаанд.

Феълан маълум нест, ки оё дар ҳодисаи ҳамла ба мактаб касе осеб дидааст ё на.

Дар аёлати Замфара гурӯҳҳои азими мусаллаҳон кор мекунанд ва онҳо аз роҳи гаравгонгирӣ пул ваё озодкунии аъзои дигари гурӯҳҳои худро аз зиндон тақозо мекунанд.

Дар як ҳамлаи аз ин пеш ба мактаби аёлати Нигери давлати Нигерия, як хонандаи мактаб куштаву 42 мактабхон, омӯзгор ва аъзои оилаашон рабуда шуданд. Ду моҳ пеш мусаллаҳон дар аёли Катсина 300 писарбачаи мактабхонро рабуданд.

Мақомот тасдиқ карданд Навалнийро аз боздоштгоҳ ба зиндони дигар бурданд

Алексей Навалний дар додгоҳ

Мақомоти низоми зиндонҳои Русия тасдиқ карданд, ки раҳбари мухолифон Алексей Навалний аз боздоштгоҳ ба зиндони дигар интиқол дода шуд. Александр Калашников, раиси Хадамоти зиндонҳои Русия дар изҳороти рӯзи 26 феврали худ нагуфт, ки маҳалли нигаҳдории Навалний куҷо аст. Навалнийро ба 2,6 соли зиндон маҳкум карданд. Калашников ба журналистон гуфт, “ӯ ба ҷое интиқол дода шуд, ки бар асоси қарори додгоҳ бояд мерафт”. Ӯ гуфт, “ба шумо кафолат медиҳам, ки ба ҳаёти ӯ чизе таҳдид намекунад, ӯро ба ҳоли худ гузоред”. Маъмулан мақомоти зиндонҳои Русия маҳалли интиқоли зиндониҳоро ошкор намекунанд. Ин изҳорот дар ҳолест, ки рӯзе пеш вакили дифои Навалний - Вадим Кобзев гуфт, вақте ба дидани зерҳимояаш ба боздоштгоҳ рафт, фаҳмид, ки Навалнии 44-соларо ба як макони номаълум интиқол додаанд. Ҳабс ва ҳукми зиндони Навалний баробари бозгашташ аз табобати Олмон эътирозу норизоиятҳои зиёде дар дохили Русия ва ҳам маҳкумиятҳои ғарбро ба бор овард. Навалнийро дар он муттаҳам карданд, ки қарори додгоҳ аз соли 2014 оид ба ҳабси шартиро нақз кард, ин дар ҳоле буд, ки Навалний аз як заҳролудшавӣ бо заҳри низомии сохти шӯравӣ аз моҳи август ба ин сӯ дар табобат қарор дошт. Оғози моҳи феврал қарори додгоҳ ҳабси шартии ӯро ба ҳабси воқеӣ табдил кард.

Эътирозгарони Янгонро пароканда карданд

Нирӯҳои амниятӣ дар Янгон, калонтарин шаҳри Мянмар рӯзи 26 феврал бо ҳадафи пароканда кардани беш аз як ҳазор эътирозгар ба ҳаво тири огоҳкунанда кушоданд. Эътирозгарон дар муқобили як маркази тиҷоратии азими Янгон бо шиору навиштаҷот ба даст ҷамъ шуда, мухолифати худро бо ғасби қудрат аз ҷониби низомиён дар таърихи 1 феврал баён карданд. Эътироз бо вуҷуди он идома кард, ки нирӯҳои амниятӣ ба сӯи мардум об пошиданд. Вақте тахминан 50 полиси роҳ ба муқобили эътирозгарон ҳаракат карданд, садои тири огоҳкунанда ба гӯш расид ва дасти кам як нафар боздошт шуд. Нирӯҳои амниятӣ эътирозгаронро аз кӯчаи марказӣ пеш карда дар хиёбонҳои дигар ҳам онҳоро таъқиб намуданд. Ихтилофи миёни эътирозгарону низомиён баъди он шиддат гирифт, ки низомиён раҳбарони қонунан интихобшудаи мулкӣ, аз ҷумла Аун Сан Суҷиро ҳабс карданд.

Дастёри додситони Шоҳмансурро ба қаллобӣ муттаҳам кардаанд

Generic -- Corruption

Мақомоти интизомии Тоҷикистон мегӯянд, ба зидди як додситон дар шаҳри Душанбе парвандаи ҷиноӣ боз кардаанд, вале худашро «намеёбанд». Як манбаъ дар Додситонии кулли Тоҷикистон рӯзи 26-уми феврал ба Радиои Озодӣ гуфт, Сайфиддин Баҳриддинзода, дастёри додситони ноҳияи Шоҳмансур ба қаллобӣ муттаҳам мешавад ва ҳоло таҳти ҷустуҷӯ қарор дорад.

Парвандаашро бо моддаи «қаллобӣ дар ҳаҷми махсусан калон» калон таҳқиқ мекунанд ва парванда дар дасти Раёсати парвандаҳои махсусан муҳим аст. Ба гуфтаи мусоҳиби Радиои Озодӣ: “Маълум нест, ки Баҳриддинзода дар куҷо ҳаст, вале расман имрӯз дар ҷустуҷӯ қарор дода шуд.” Додситонии кулл расман қазияро шарҳ надодааст. Ҷузъиёти парванда ҳанӯз дастраси Радиои Озодӣ нашудааст.

Раҳбарони ИА масоили амният ва дифоъро баррасӣ мекунанд

Брюссел, 26 феврал. Дабири кулли НАТО Йенс Столтенберг (аз чап) ва раиси Шӯрои Аврупо Шарл Мишел

Рӯзи 26-ми феврал дар рӯзи дуюми ҷаласаи онлайнии Иттиҳоди Аврупо 27 раҳбари кишварҳои узви ин созмон масоили дифоъ ва амниятро баррасӣ мекунанд. ИА барои иқдомҳои ҳамоҳангшуда дар барномаҳои дифоӣ, масалан, нақшаҳои маблағгузории муштарак дар барномаҳои рушди дифоӣ, ки чанд соли охир ба ҳам хӯрда буд, ташкили ҷаласа мекунанд. Бархе раҳбарон аз он изҳори нигаронӣ карданд, ки талошҳои ИА метавонад ба НАТО, ки президенти ИМА Ҷо Байден барои барқарории рисолату нуфузи он талош дорад, зарба занад.

Ба музокираҳои ИА тавассути тамоси видеоӣ дабири кулли НАТО Йенс Столтенберг ҳам ҳамроҳ шуд. Столтенберг пеш аз ширкат дар ҷаласа ба журналистон гуфт: “Талошҳои ИА шона ба шона бо иқдомҳои низомӣ пеш меравад”. Столтенберг гуфт, “барои НАТО муҳим аст, ки бӯҳрони пандемия ба як бӯҳрони амниятӣ табдил нашавад”, чунки, ба гуфтаи ӯ, “таҳдидҳое, ки мо пеш аз пандемия бо онҳо рӯбарӯ будем, ҳамоно пойбарҷо ҳастанд: ин амалҳои хашини Русия, шаклҳои дағалтари терроризм, ҳамлаҳои моҳиронаи интернетӣ, афзоиши нуфузи Чин ва паёмадҳои амниятии тағйироти иқлим мебошанд”.

Зимни суханронӣ дар оғози ҷаласа президенти Шӯрои Аврупо Шарл Мишел гуфт, иртиботи миёни Аврупо ва ИМА аз тақвияти муносибатҳои ИА ва НАТО наздиктар хоҳад шуд. Дар рӯзи аввали ҷаласа раҳбарони аврупоӣ тааҳҳуд карданд, ки истеҳсол ва тақсими воксинаҳои зидди COVID-19 дар қораи Аврупо суръат бахшида мешавад. Президенти Комиссиюни Аврупо Урсула вон дер Лейен гуфт:

“Боварӣ дорем, ки метавонем то охири тобистон ба ҳадаф бирасем ва 70 дарсади аҳолии Иттиҳоди Аврупо, яъне калонсолонро бо ваксина таъмин кунем. Дар Иттиҳоди Аврупо 255 миллион нафар аст. Вақте мо ба омори нақшавӣ нигоҳ мекунем, бовар дорем, ки ба ҳадаф мерасем”.

Мақомоти аврупоӣ инчунин гуфтанд, ки маҳдудиятҳои сафар нигоҳ дошта мешавад ва танҳо дар сурати зарурати корӣ ва эҳтиёҷоти дигар сокинони Аврупо ҳақ хоҳанд дошт аз як кишвар ба кишвари дигар ҳаракат кунанд.

AI тасмими бекор шудани мақоми "маҳбуси ақидатӣ"-и Навалнийро шарҳ дод

Алексей Навалний дар додгоҳ

Созмони байналмилалии Amnesty International дар шарҳи сабабҳои бозбинӣ шудани мақоми “маҳбуси ақидатӣ”-и Алексей Навалний, гуфт, ин ташкилоти ҳомии ҳуқуқ на бар асоси навиштаҳо дар шабакаҳо ваё зери фишори фаъолони рӯ ба давлат қарор қабул мекунад. Созмон мегӯяд, ки қарорҳояш бар асоси омӯзиши бисёр амиқ ва далелҳо қабул мешаванд. Ин созмон мегӯяд, хабарҳо дар бораи ин ки ба қарори он маъракаи ташкилшудаи тӯҳмати Навалний таъсиргузор шудааст, бепояву асос мебошад. Ҳомиёни ҳуқуқ мегӯянд, “пропагандаи мақомоти Русия шинохташаванда аст”.

“Масъала бояд возеҳ бошад, мафҳумҳоро омехта кардан мумкин нест. Ҳеҷ як аз изҳороти қаблии Навалний боздошти ҳозираи ӯро сафед намекунад, чун ин ҳабс дорои ангезаҳои сиёсӣ мебошад”, гуфтааст Amnesty International. Муаллифони ин изҳорот эътироф карданд, ки қарори қабулкардаи онҳо дар бораи аз мақоми “маҳбуси ақидатӣ” маҳрум карданди Алексей Навалний дар фурсату замони номуносиб гирифта шуд ва гуфтанд, ки ин тасмими онҳо ба маъракаи озод кардани сиёсатмадори мунаққиди Кремлин таъсири манфӣ мегузорад. Созмон дар ин замина изҳори таассуф кардааст.

Як рӯз пеш аз изҳороти Amnesty International, нависандаи маъруфи рус Борис Акнунин дар номаи электроние ба унвонии ин созмон дархост кард, ки қарори худро бозбинӣ кунад. Акунин навиштаст: “Бо маҳрум кардани Алексей Навалний аз мақоми маҳбуси ақидатӣ, Amnesty International ба шахсияте зарба задааст, ки “аввал ӯро куштан мехостанд ва баъди ин ноодилона ба зиндон партофтанд”. Нависанда гуфтааст, “Шумо дари утоқи зиндонро ба рӯи ӯ маҳкамтар баста роҳи мубориза барои озод кардани ӯро ҳам мушкилтар кардед. Шумо бо садоқат ба протоколи корӣ, ба рӯҳу рисолати кории худ зарба задед”.

Amnesty International шоми 17 январ, чанд соат баъди он ки Алексей Навалний баъди бозгашт аз Олмон дар фурудгоҳи “Шерметево” боздошт шуд, ӯро “маҳбуси ақидатӣ” номид. Навалний бо ин ки дар Олмон давоми ним сол аз заҳрлудшавӣ бо як заҳри низомие табобат гирифтааст, мақомот дар Русия гуфтанд, ки ӯ қарори ҳабси шартии зиндон аз соли 2014-ро нақз кард ва оғози моҳи феврал ӯро ба 2 солу 8 моҳи зиндон маҳкум карданд. Худи Навалний ин ҳукмро дорои ангезаҳои сиёсӣ номида, қаблан гуфтааст, ки заҳролудкунии ӯро президент Владимир Путин фармоиш додааст. Кремлин ин иттиҳомро рад мекунад.

23 феврал маълум шуд, ки Навалний аз мақоми “маҳбуси ақидатӣ” маҳрум шудааст. Ин қарор бар асоси хулосаҳои раёсати умури ҳуқуқиву сиёсии Amnesty International қабул шуд. Созмон гуфт, ки дар изҳориназарҳои солҳои оғози 2000-уми Навалний андешаву ҳарфҳои паҳнкунандаи ақидаҳои нажодпарастиву бадбинӣ ошкор шудааст.

Соли 1964 ҳам созмони Amnesty International айни чунин қарорро дар нисбати Нелсон Мандела ҳам қабул карда буд. Бар асоси меъёрҳои ин созмони ҳомии ҳуқуқи инсон, афроди дорои мақоми маҳбуси ақидатӣ наметавонанд хушунатро таблиғ ё ба чунин амалҳо даъват бикунанд.

Матбуот: ИМА ҷузъиёти қатли Хошуқчиро нашр кард

29 сентябри соли 2018. Ҷамол Хошуқчӣ

Дар гузориши хадамоти вижаи ИМА, ки ҷузъиёти куштори бераҳмонаи журналист Ҷамол Хошуқчиро таҳқиқ кардаанд, гуфта шудааст, ки валиаҳди Саудӣ Муҳаммад Бил Салмон, ба эҳтимоли ғолиб, фармоишгари куштор буд ваё ҳадди аққал ба ин куштор ризоият додааст. Дар ин бора рӯзи 25 феврал матбуоти амрикоӣ хабар дод. Ҷамол Хошуқчӣ, ки дар хориҷа зиндагӣ мекарду бо мақолаҳои интиқодиаш дар ҳақи раҳбарияти Арабистони Саудӣ ном бароварда буд, соли 2018 дар дохили консулгарии саудӣ дар шаҳри Истамбул кушта шуд. Баъди ин куштор ҷасади ӯро пора-пора карда, аз дохили консулгарӣ берун бурданд ва то ҳол осоре аз ҷасади ӯ пайдо нашудаанд. Баъди куштори Хошуқчӣ аввал шуда бисёриҳо валиаҳди саудӣ Муҳаммадро ҳамчун фармоишгари эътимолии куштор номиданд. Валиаҳд даст доштанаш дар ин кушторро рад кардааст. Арабистони Саудӣ аввал талош кард, ки кушторро рад кунад, вале баъди чанд вақт инро эътироф кард. Мақомоти саудӣ гуфтанд, ки кормандони хадамоти вижаи консулгарӣ бо ташаббуси худ амал мекарданд ва кори онҳоро ба додгоҳ супурданд.

Оилаи Хошуқчӣ бо нашри як изҳорот хост, ки қотилони журналист афв шаванд. Қонунҳои саудӣ мегӯянд, ки дар чунин ҳолат қотилонро ба марг маҳкум намекунанд. Дар ниҳоят, ҳамаи муҷримон дар ин қазия ба мӯҳлатҳои мухталифи зиндон маҳкум шуданд.

Дар гузориши хадамоти вижаи Амрико гуфта шудааст, ки исбот ё далели мустақими даст доштани валиаҳд дар ин куштор дастрас нашуд, вале хадамоти вижа таъкид мекунанд, ки чунин амалиёт наметавонист бе ризоияти Муҳаммад бин Салмон, як раҳбари бонуфуз анҷом шавад.

Дар хабарҳо гуфта шуд, ки президенти ИМА Ҷо Байден бо ҷузъиёти ин гузориш ошно шуд ва ният дорад, ки ин мавзӯъро телефонӣ бо шоҳ Салмон баррасӣ кунад. Қаблан Байден аз зарурати бозбинии робитаҳо бо Риёз, як муттафиқи ИМА дар минтақа гуфта буд.

Пентагон аз мушакборони муассисаҳои ҷангҷӯёни марбут ба Эрон дар Сурия хабар дод

19 феврали соли 2021. ТВ Kurdistan-24 ҳолати баъди ҳамлаи мушакӣ болои як пойгоҳи низомӣ дар фурудгоҳи Ирбилро ба навор гирифтааст

Пентагон гуфт, ки дар шарқи Сурия муассисаҳои марбут ба ҷангҷӯёни мавриди ҳимояти Эронро мушакборон кардааст. Вазорати дифои ИМА рӯзи 25 феврал гуфт, ки мушакҳо дар посух ба мушакборонҳои моҳи феврал болои як пойгоҳи ироқӣ буд, ки дар он нирӯҳои амрикоиву эътилофӣ мустақар шудаанд. Пентагон дар изҳороташ гуфт, ки ин амалиёт паёми рӯшане дорад, ки мегӯяд, «Президент Байден барои ҳимоят аз ҳуқуқи низомиёни амрикоиву эътилофӣ иқдом мекунад».

Дар изҳорот омадааст, ҳамлаҳо ба “чандин муассисае” дар марзи Сурияву Ироқ нигаронида шуданд, ки аз ҷониби низомиёни мавриди ҳимояти Эрон, аз ҷумла гурӯҳҳои шиаёни Ироқ бо номи “Катаиб Ҳизбуллоҳ” ва “Катаиб Сайид аш-Шуҳадо” назорат мешаванд.

Пентагон нагуфт, ки то куҷо гурӯҳҳои ҷангӣ дар ин ҳамлаҳо осеб диданд ё на. Вале созмони суриягии нозири ҳуқуқи башар гуфт, дар паи асобати мушакҳо ба се мошини ҷангии пур аз муҳимот, ки аз Ироқ меомад, 17 узви як воҳиди низомии марбут ба давлати Ироқ кушта шуданд. Ба узвияти ин нирӯи ниманизомӣ асосан гурӯҳҳои ҷангии шиамазҳаб шомил мешаванд.

Амалиёти мазкур дар ҳоле анҷом шуд, ки ахиран се ҳамлаи мушакӣ рух дод. Рӯзи 15 феврал дар натиҷаи мушакборони фурудгоҳи байналмилалии Ирбил дар маркази минтақаи нимамухтори Курдистони Ироқ як корманди мулкӣ кушта ва як низомии амрикоӣ ва чанд сарбози эътилофӣ маҷрӯҳ шуданд. Дар мушакборони дигар болои пойгоҳи нирӯҳои амрикоӣ дар шимоли Бағдод ҳам чанд рӯз баъд дасти кам як нафар кушта шуд. Як ҳамлаи дигари мушакӣ аввали ҳафтаи ҷорӣ сафорати ИМА дар Бағдодро ҳадаф қарор дод.

Дар Арманистон фазо пуртаниш боқӣ мемонад

25 феврал, майдони Республикаи шаҳри Ереван. Нахуствазир Никол Пашинян дар баробари тарафдоронаш сӯҳбат мекунад

Як рӯз баъди он ки нахуствазири Арманистон Никол Пашинян низомиёнро дар талоши сарнагун кардани давлат гунаҳгор карду ғарбу Русия ҳама ҷонибҳоро ба хештандорӣ даъват намуданд, фазо пуртаниш боқӣ мемонад. Пашинян шоми 25 феврал хитоб ба 20 ҳазор тарафдоронаш дар Ереван гуфт, иҷоза намедиҳад, ки нирӯҳои мусаллаҳ мудохила кунанд. Ин посухи Пашинян дар вокуниш ба талаби истеъфои нахуствазир садо дод, қаблан чунин талабро гурӯҳҳои мухолифини ҳукумати Арманистон ҳам ба забон оварданд.

Рӯзи 26 феврал ҳам мухолифон, ки 10 ҳазор нафарро ба хиёбонҳо бароварда буданд, дар назди бинои парлумон хайма зада тарки қудрат кардани Пашинянро талаб доранд. Намояндаи ҳизби оппозитсионии “Арманистони шукуфо” дар парлумон Ивета Тоноят ба журналистон гуфт, ки гурӯҳҳои мухолифон ният доранд 26 феврал як ҷаласаи изтирории парлумонӣ барпо кунанд ва дар он вазъи сиёсии кишвар ба баррасӣ гирифта мешавад.

Дар ҳамин ҳол Вазген Манукян, номзади муштараки ҳизбҳои мухолифон ба мақоми нахуствазирӣ таҳдид кард, ки агар ҷаласаи изтирории парлумон барканории Пашинянро ҳал накунад, мухолифон эътирозҳои 24-соата барпо мекунанд.

Пашинян рӯзи 25 феврал хитоб ба издиҳом дар Ереван гуфт, ки низомиён бояд кори худро кунанд ва дар фикри дифои кишвар аз ҳамлаи хориҷӣ бошанд.

Номаи нирӯҳои мусаллаҳ замоне пахш шуд, ки Пашинян тасмим гирифт муовини раиси ситоди кулли нирӯҳои мусаллаҳро аз мақомаш барканор кунад. Баъди нома бо талаби истеъфои нахустазир, Пашинян раиси ситодро ҳам ба истеъфо фиристод.

Эътилофи “Иқдоми ман”-и Пашинян дар парлумон аксариятро ташкил медиҳад. Пашинян гуфтааст, ки талаби мухолифон барои қабули истеъфоро рад мекунад ва бар иваз ҳамаро ба машварати сиёсӣ даъват кард.

Ба таниши эҷодшуда дар Арманистон ҳамкорони берунаи Ереван вокуниш карданд. ИМА ва Русия дар аввалин вокунишашон ба таҳаввулоти Арманистон ҳама ҷонибҳоро ба хештандорӣ ва худдорӣ аз хушунат даъват карданд.

Мансабдорони тоҷик бояд то 1 апрел дар бораи дороиҳои худ гузориш диҳанд

Хабаргузории давлатии "Ховар" гузориш додааст, ки мансабдорони тоҷик бояд 1-уми апрели имсол дар бораи дороиҳои худ маълумот диҳанд. Чунин тартиб солҳо боз дар Тоҷикистон амал мекунад, аммо имсол фарқ мекунад.

Мансабдорон ё хизматчиёни давлатӣ дар Тоҷикистон акнун муваззаф шудаанд, ки дар бораи дороиҳояшон ба монанди гову асп ва парранда ба мақомот гузориш диҳанд.

Қаблан қонунҳои Тоҷикистон аз мансабдорон танҳо эъломия дар бораи хонаву замин ва авроқи гаронбаҳо (саҳмияҳо)-ро талаб мекард. Теъдоди мансабдорон дар Тоҷикистон ҳудуди 20 ҳазор нафар аст.

Кумитаи андози Тоҷикистон мегӯяд, бо мақсади осон кардани пешниҳоди эъломияҳо, чанде пеш барномаи махсуси компютериеро таҳия ва ба кор даровардаанд, ки он имкон медиҳад эъломияҳо дар шакли электронӣ пешниҳод карда шаванд.

"Дар сомонаи расмии идора гӯшаи "Кабинети шахсии андозсупоранда" мавҷуд аст, ки барои шахсони мансабдори Тоҷикистон тартиби пешниҳоди эъломияҳоро оид ба даромадҳо осон мекунад",-омадааст дар хабарномаи расмӣ.

Дар хабари расмӣ ба мансабдорон ҳушдор дода шудааст, ки дар сурати пешниҳод накарданд ё нодуруст додани маълумот дар бораи дороиҳо, аз мақом барканор мешаванд. Агарчӣ тартиби пешниҳоди эъломия дар бораи дороиҳо ва амволи мансабдорони Тоҷикистон аз соли 2004 инҷониб амал мекунад, аммо ин маълумотҳо боре оммавӣ нашудааст.

Ифшо нашудани маълумот дар бораи амволи мансабдорон ба гуфтаи мақомот аз як сӯ хоҳиши худи онҳост ва аз тарафи дигар, ба қавли раиси Оҷонси хидмати давлатӣ, ҷомеаи Тоҷикистон барои қабули он омода нест.

Бархе аз коршиносон мегӯянд, эҳтимол ходимони давлатӣ аз ифшои дороиҳои худ, ки зоҳиран кам нест ва сарчашмаашро фош кардан намехоҳанд, ҳарос доранд. Дар ҳоле, ки дар кишварҳои пешрафта маълумот дар бораи дороиҳои мансабдорон озод аст.

Пинҳон мондани маълумот дар бораи дороиҳои мансабдорон ҳамеша дар ҷомеаи Тоҷикистон ва шабакаҳои иҷтимоӣ баҳсҳоеро ба миён овардааст. Бисёриҳои ба ин суол мехоҳанд посух гиранд, ки чаро маълумот дар бораи дороиҳои мансабдорон дар Тоҷикистон бояд аз ҷомеа пинҳон карда шавад?

Ёфтҳои бештар

XS
SM
MD
LG