Пайвандҳои дастрасӣ

Хабари нав

Изҳори андӯҳи адибони тоҷик аз марги Распутин


Валентин Распутин
Валентин Распутин

Иттифоқи нависандагони Тоҷикистон бо изҳори андӯҳ аз марги нависандаи машҳури рус Валентин Распутин ба Иттифоқи нависандагони Русия ва Иттифоқи байналмилалии нависандагон номаи таслият ирсол доштааст.

Абдулҳамид Самадов, муовини аввали раиси Иттифоқи нависандагони Тоҷикистон рӯзи 19 март ба Радиои Озодӣ гуфт, осори ин нависандаи шинохта барои хонандагони тоҷик ошност: “Хабари марги Валентин Распутин барои нависандагони Тоҷикистон низ андӯҳовар аст. Марг як нависандаи бузургеро, ки бо сабки классики рус менавишт ва бо осори насрии худ дар ҷаҳон шинохта шуда буд, аз миёни мо рабуд.”

Абдулҳамид Самадов гуфт, чанд асари Распутин, аз ҷумла “Зинда бошу фаромӯш накун”, “Алвидоъ бо Матёра”, “Пул барои Мария”, ”Муҳлати охирон”, “Дарси фаронсавӣ” ва даҳҳо қиссаву ҳикояҳояш ба забони тоҷикӣ тарҷума шудаанд. Абдулҳамид Самадов афзуд, Распутин як сабки хосе дошт, ки дар бораи афроди хоксор менавишт, вале ҳадафҳо ва масъалаҳои бузургро дунбол мекард: “Бар асоси навиштаҳои Валентин Распутин дар масъалаи пок нигоҳ доштани кӯли Байкал ҳукумати Русия барномаи махсусе қабул кард, ки аз олудагии оби Байкал ҷилавгирӣ кард.”

Рӯзи 19 март Валентин Распутин дар зодгоҳаш, вилояти Иркутски Русия ба хок супурда шуд. Дар маросими видоъ бо адиби шинохтаи рус ҳудуди 15 000 нафар ширкат кардаанд.

XS
SM
MD
LG