Пайвандҳои дастрасӣ

Хабари нав

Хабарҳо

Маскав имзои мувофиқатнома бо Украинаро рад мекунад

Виктор Янукович ва Владимир Путин
Владимир Путин ва Виктор Янукович-руасои ҷамоҳири Русияву Украина дар мулоқоти худ масъалаи пайвастани Украина ба Иттиҳодияи Гумрукиро баррасӣ накардаанд. Дар ин бора Дмитрий Песков-сухангӯи раиси ҷумҳури Русия хабар дод ва гуфт, дар мулоқоти ҷонибҳо сӯҳбат дар бораи фаъолияти кумиссиюни байнидавлатии ду кишвар дар миён буд ва қарор аст ҷаласаи ин кумиссиюн 17 декабр дар Маскав баргузор шавад.

Рӯзи шанбе Эдвард Лукас-сардабири маҷаллаи “Экономист”-чопи Британия бо такя ба сарчашмаҳои хабарии худ дар Маскав дар блоги худ навишт, ки раиси ҷумҳури Украина бо Русия мувофиқатномаи стротегиеро имзо кардааст ва дар он уҳдадор шудааст, ки то соли 2015, яъне то интихоботи ояндаи раёсати ҷумҳурӣ ба узвияти Иттиҳодияи Гумрукӣ медарояд.

Дар ин мувофиқатнома пешбинӣ шудааст, ки Русия ба Украина 5 миллиард доллар нася хоҳад дод ва нархи фурӯши газ ба Украинаро то 200 доллар поин хоҳад овард. Лукас менависад, ки дар маҷмуъ Янукович аз Маскав 15 миллиард доллар хоҳад гирифт.

Ҳамаи хабарҳои имрӯзро дар инҷо бихонед

Ширкати генерали амрикоӣ дар нишасти амниятӣ дар Тошканд

"Узбекистон барои муқобила бо таҳдидҳои дохилию берунӣ ва пойдории субот дар минтақа бо дигар кишварҳои Осиёи Марказӣ ҳамкорӣ мекунад". Дар ин бора рӯзи чоршанбе Баҳодур Қурбонов, вазири дифои Узбекистон дар нишасте бо иштироки генерал Ҷозеф Вотел, фармондеҳи қувваҳои Марказии Амрико дар Ховари Миёна изҳорот дод.

Ҷозеф Вотел, генерали амрикоӣ гуфт, Узбекистон омодаи ҳамкорӣ бо шарикони хориҷӣ аст ва бо таваҷҷӯҳ ба ҳамкориҳои стратегӣ ба кишварҳо талош мекунад, то амнияти дарозмуддат таъмин шавад.

Хабаргузории ТААС гуфт, ки генерали амрикоӣ дар конфронси раҳбарони ситодҳои генералии кишварҳои Осиёи Миёна ва Осиёи Ҷанубӣ бо ширкати фармондеҳии қувваҳои Марказии Амрико дар Ховари Миёна сӯҳбат кард.

Генерали амрикоӣ гуфтааст, ки барои ИМА муносибат бо кишварҳои минтақа бисёр муҳим аст.

«Ин нишасти муҳим аст, чун ки таҳдидҳои амниятӣ ҳанӯз вуҷуд дорад ва мо бо ҳам омадем, то роҳҳои коҳиши таҳдидро ба таври алоҳидагӣ ё дастаҷмъӣ баррасӣ кунем», - гуфт Ҷозеф Вотел.

Ба ин хотири Ҷозеф Вотел гуфтааст. Амрико барои оромиш дар Афғонистон аз тамоми имконот истифода мекунад.

Ӯ аз Шавкат Мирзиёев, президенти Узбекистон барои роҳандозии нишасти сулҳи Афғонистон дар Тошканд изҳори сипос кардааст.

Дар нишасти Тошканд намояндагони ситодҳои генералии қувваҳои мусаллаҳи Узбекистон, Афғонистон, Қазоқистон, Покистон, Туркманистон ва Тоҷикистон ширкат доштанд.

Дар ин нигаст бештар таъмини амнияту субот дар минтақа ва вазъи Афғонистон баҳс шуд.

$15600 дар ду моҳ. Ошкор шудани "фоҳишахонаи хориҷӣ" дар Душанбе

Акс аз гузориши Вазорати корҳои дохилии Тоҷикистон

Кормандони Раёсати мубориза зидди ҷиноятҳои муташаккили Вазорати корҳои дохилии Тоҷикистон як шаҳрванди Чин ва як табааи Ветнамро бо иттиҳоми ташкили фоҳишахона бо ҷалби хориҷиён боздошт кард.

Вазорати корҳои дохилии Тоҷикистон шаби 20-уми феврал бо нашри як гузориш хабар дод, ки Ван Вен Мин, марди 32-солаи шаҳрванди Чин ва Ҳувен Данг Ми, зани 29-сола аз Ветнам дар ҳудуди ноҳияи Шоҳмансури Душанбе манзилеро ба иҷора гирифта, онро ба фоҳишахона табдил додаанд.

Ба гуфтаи вазорат, зани ветнамӣ бо шаҳрванди Чин машварат карда, бо баҳонаи таъмини кор дар тарабхонае дар Русия се зани ветнамиро аз тариқи Қазоқистон ба Тоҷикистон оварданд.

ВКД гуфт, ки се зане, ки бидуни хоҳишашон дар Тоҷикистон мавриди танфурӯшӣ қарор дода шуданд, 34-36-сола ҳастанд. Вазорат гуфт, ки қурбониҳои тиҷорати фаҳшо "бевазан ва соҳиби фарзанд буда, ба ҷойи кор эҳтиёҷ доштанд”.

Вазорати корҳои дохилии Тоҷикистон мегӯяд, аз 3-уми декабри соли 2018 ин се зан “дар асорати қарзӣ” буданд ва шиносномаҳои онҳо аз ҷониби Вен Мин, мусодира шуда, ҳарсе зан дар хонаи иҷорае дар Душанбе дар утоқҳои алоҳида ва бидуни шонси вохӯрӣ бо ҳамдигар нигаҳ дошта мешуданд. Аз ин рӯ, ба гуфтаи мақомот, “замони озод кардан ва дидори ҳам онҳо шодӣ ашк рехтанд”.

Муштариён ин се зан бештар шаҳрвандони Чин будаанд, ки дар Тоҷикистон кор мекунанд. Ба ҳисоби ВКД, дар зарфи ду моҳ ташкилкунандагони фоҳишахона аз ҳар ҷабрдида 5200 долларӣ фоида ба даст овардаанд.

Назари адвокати боздоштшудаҳо ва занони озодшуда ҳанӯз дастрас нашудааст ва маълум нест, ки онҳо ба ин иттиҳом чӣ назар доранд.

Феълан, нисбат ба шаҳрванди Чин ва Ветнам барои “савдои одамон” ва “ташкили фоҳишахона” парвандаи ҷиноӣ боз шудааст. Парвандаро додситонии шаҳри Душанбе тафтиш мекунад.

Бурак Озчивит "чеҳра"-и “Olmazor city”-и Тошканд интихоб шуд

Бурак Озчиви, ҳунарманди турк

Ҳунарманди машҳури турк Бурак Озчивит барои он ба Узбекистон сафар кард, ки дар маъракаи таблиғотии тарҳи "Olmazor city” ширкат кунад. "Olmazor city” қарор аст, ба ҷои хонаҳои тахрибшудаи Тошканд бунёд шавад. Ин хабарро намояндагони "Bizning uylar" - ширкати иҷрокунандаи тарҳ тасдиқ карданд.

Бурак Озчивит 16 феврал дар рӯнамоии тарҳи "Olmazor city" дар шаҳри Тошканд иштирок кард. Дар маросим хабар дода шудааст, ки ҳунарманди туркро ҳамчун "симои тарҳ" интихоб кардаанд.

Дар эълони тарғиботии тарҳи мазкур омадааст, "Мо ҳамроҳи Бурак Озчивит бо ифтихор ба шумо тарҳи маҷмааи зисти "Olmazor City"-ро пешниҳод мекунем!".

Дар ҳоли ҳозир маълум нест, ки ҳунарманди турк бар ивази чи қадар маблағ розӣ шудааст, дар эълонҳои тарқиботии "Bizning uylar" иштирок кунад ва намояндагони ширкат низ гуфтанд, ки наметавонад ин маълумотро ошкор кунанд.

Бино ба навиштаи Hürriyet, Озчивит соли гузашта барои иштирок дар эълони тарғиботие ҳудуди 3 миллион лири туркӣ ($565 ҳазор) гирифтааст.

Расонаҳои маҳаллӣ 18 феврал хабар доданд, ки бозигари синамо барои сарфи ғизои нисфирӯзӣ бо ҳамсарони сарватмандон, занони соҳибкор ва зебосанамҳои Узбекистон ба шаҳри Тошканд рафта, дар 2,5 соат 379 ҳазор доллар даромад кард.

Тарҳи "Olmazor city" як қисми тарҳи "Tashkent City" аст, ки бар ивази 1 миллиард доллар иҷро хоҳад шуд. Шаҳрдори Тошканд Ҷаҳонгир Ортиқхоҷаев яке аз сармоягузорони ин тарҳ шумурда мешавад.

“Amnesty International” : Тоҷикистон аз қонуни "агенти хориҷӣ" пайравӣ кард

СозмониAmnesty International” мегӯяд, қонун дар бораи агентҳои хориҷӣ” дар Русия кишварҳои собиқ шӯравӣ, аз ҷумла Тоҷикистонро ба қабули қонуни монанд ба он водоштааст.

Қонун дар бораи “агентҳои хориҷӣ” соли 2012 дар Русия қабул шуд, ки фаъолияти расонаҳо ва созмонҳои ҷамъиятиеро, ки аз хориҷ саромоягузорӣ мешаванд, маҳдуд кард.

СозмониAmnesty International” дар гузориши тозаи худ, ки 20-уми феврал нашр шуд, навиштааст, зоҳиран Тоҷикистон низ бо пайравӣ аз Русия соли 2015 қонун “Дар бораи иттиҳодияҳои ҷамъиятӣ”-ро тасвиб кард. Ба навиштаи Amnesty International”, созмонҳои ҷамъиятӣ бар асоси ин қонун пеш аз дарёфти сармояи хориҷӣ аз вазорати адлияи Тоҷикистон иҷозат мегиранд ва аз сарфи он ба ин вазорат ҳисобот медиҳанд.

Amnesty International” навиштааст, қонуне, ки фаъолияти созмонҳои ҷамъиятиро маҳдуд мекунад, пас аз Русия дар Озарбойҷон ва Қазоқистон низ қабул шуд.

Охири моҳи майи соли 2015 қонуни мазкур дар порлумони кишвар бо ширкати 20 намояндаи иттиҳодияҳои ҷамъиятӣ ва вакилони кумитаҳои порлумон мавриди баҳс қарор гирифта буд. Тарафи ҳукумат ин тағйирро шафофият ва танзими фаъолияти иттиҳодияҳои ҷамъиятӣ унвон кард, вале созмонҳои ғайридавлатӣ ин иқдомро ҳамчун фишор ба фаъолияти ин созмонҳо маънидод намуда буданд.

Дар Русия низ бо қабули қонун дар бораи “агенти хориҷӣ” ба Вазорати вазорати адлияи ин кишвар ҳақ медиҳад, расонаҳои хориҷии мустақар дар Русия ва ё он расонаҳое, ки аз хориҷ сармоягузорӣ мешаванд, “маъмури хориҷӣ” унвон диҳад.

Туркманистон сабаби манъи убури мошинҳои Тоҷикистонро шарҳ намедиҳад

Боркашонҳои тоҷикистонӣ ба далели манъи убур аз ҳудуди Туркманистон хисороти молии зиёд мебинанд. Дар ҳамин ҳол, мақомоти Туркманистон сабаби манъи убури мошинҳои боркаши Тоҷикистонро шарҳ намедиҳанд.

Дар ҳоли ҳозир дар ҳудуди Туркманистон бештар аз 40 мошини боркаш ва 100 вагон молу маҳсулоти Тоҷикистон дар мондааст. Дар ин бора Фарида Яқубова, роҳбари шуъбаи муносибатҳои байналхалқии Вазорати нақлиёти Тоҷикистон хабар дод.

Ба гуфтаи вай, ҷониби Тоҷикистон то кунун аз мақомоти Туркманистон дар ин робита шарҳе дарёфт накардааст. "Мо дар якҷоягӣ бо вазорати корҳои хориҷӣ ба Туркманистон муроҷиат кардем, вале то кунун посухе нарасидааст", - гуфт Яқубова.

Мошинҳои боркаши Тоҷикистон ибтидои моҳи феврал дар Туркманистон ба мушкили убур рӯ ба рӯ шуданд. Даҳҳо мошин дар марзи Туркманистон дар монд.

"15 рӯз муҳлат медиҳанд, агар дар ин муддат аз ҳудуди Туркманистон убур накунӣ, барои ҳар рӯзи боқӣ мондан 20 доллар аз мошин ва 10 доллар аз ронанда ҷарима меситонанд", - гуфт Парвиз Шарипов, раҳбари як ширкати боркашонӣ.

Панҷ зани ӯзбекистонӣ дар Қирғизистон бо гумони дуздӣ боздошт шуданд

Занони боздоштшуда

Ҳангоми убури марзи Қирғизистону Ӯзбекистон панҷ зани ӯзбекистонӣ бо гумони дуздии маснуоти заргарӣ аз Мағозаи марказии шаҳри Ҷалолободи Қирғизистон боздошт шуданд.

Гулмира Бурубоева, намояндаи Хадамоти марзбонии Қирғизистон гуфт, ҳамаи боздоштшудаҳо шаҳрвандони Ӯзбекистон ҳастанд.

Яке аз занҳои боздоштшуда эътироф кард, ки дуздӣ кардааст.

"Мо инҷо ба хотири он омадем, ки мол харидорӣ кунем ва ба Ӯзбекистон барем. Дар роҳ ба мағозаи маснуоти заргарӣ даромадем. Дуздиро ман танҳо содир кардам, онҳо (боздоштшудаҳои дигар) гунаҳкор нестанд ва хабаре ҳам надоштанд", - гуфт яке аз занҳои боздошт шуда.

Боздоштшудаи дигар - зани 57-сола, ки дар ноҳияи Яккабоғ омӯзгорӣ мекунад, гуфт, намедонад чаро ӯро боздошт кардаанд.

Улан Омурзақов, корманди пулиси шаҳри Ҷалолободи Қирғизистон мегӯяд, дар дурбинҳои наворбардор лаҳзаи дуздӣ сабт шудааст.

Бо қарори додгоҳи Ҷалолобод боздоштшудаҳо то ду моҳ ба ҳабс гирифта шуданд.

Рӯзе як кушта ва чор маҷрӯҳ. Дар роҳҳои Тоҷикистон 395 нафар ҳалок шудааст

Дар Тоҷикистон дар соли 2018 тақрибан ҳар рӯз як одам дар садамаҳои нақлиётӣ ҳалок шуда, чаҳор нафар ҷароҳат бардоштаанд.

Вазорати корҳои дохилии Тоҷикистон хабар дод, ки соли гузашта наздики 1300 садама сабт шудааст, ки тақрибан рӯзе чор садама ҳисоб мешавад. Дар пайи ин садамҳо 395 нафар кушта шуда, 1357 нафар ҷароҳат бардоштаанд.

Соли гузашта ҷазо барои ронандаҳое, ки боиси сар задани садамаҳои нақлиётӣ мешаванд, сахттар шуд. Барои ронандагӣ дар ҳоли мастӣ дар Тоҷикистон то 20 ҳазор сомонӣ ҷарима муқаррар шудааст, вале агар ронандаи маст, сабаби садама ва ё фоҷиае шавад, ба солҳои тулонии зиндон маҳкум мешавад.

Вазорати корҳои дохилии Тоҷикистон сабаби садамаҳои маргборро дар риоя накардани қоидаҳои ҳаракат дар роҳ, бо суръати баланд рондани мошин ва дар ҳолати мастӣ ронандагӣ кардан медонад.

Дар Македонияи шимолӣ раиси порлумон ва 2 вазир боздошт шуданд

Порлумони Македония

Маъмурони пулис дар Македонияи шимолӣ раиси собиқи порлумон ва ду вазири дигар аз ҳукумати пешинро бо иттиҳоми даст доштан дар ҳамлаи хушунатбор ба порлумон дар соли 2017 дастгир кардаанд. Додситонҳо рӯзи 20-уми феврал гуфтанд, "амали онҳо баробар ба дасисаи террористӣ бо ҳадафи халалдор кардани сохти конститутсионӣ ва амният мебошад".

Трайко Веляновски, раиси собиқи порлумон, Спиро Ристовски, вазири собиқи маориф, Миле Янакиески, вазири собиқи нақлиётро ба он муттаҳам мекунанд, ки дар ташкили ҳамлаи тарафдорони ҳукумати миллатгарои пешин ба бинои порлумон дар рӯзи 27-уми апрели соли 2017, кӯмак кардаанд.

Веляновски ҳанӯз ҳам раиси порлумон аст ва аз ҳаққи масуният бархӯрдор мебошад. Ӯ баъди раҳоӣ аз идораи пулис дар сӯҳбати кӯтоҳе бо хабарнигорон иттиҳомотро рад кард. Дар ҳамла ба порлумон, ки дар он афроди ниқобпӯш ҳам ширкат карданд, даҳҳо вакили мардумӣ, хабарнигор ва аз ҷумла Зоран Заев, раиси Ҳизби Сотсиал демократ маҷруҳ шуданд.

Сӯхтор дар пойтахти Бангладеш ҷони 69 нафарро гирифт

Дар натиҷаи оташсӯзии азим дар яке гӯшаҳои қадимии шаҳри Дакка, пойтахти Бангладеш, дасти кам 69 нафар ҳалок шудаанд. Мақомоти расмӣ гуфтанд, мумкин аст, теъдоди қурбониёни фалокат дар маҳаллаи Чавкбозор бештар шавад, чун амалиёти поккорӣ идома дорад. Маҳаллаи Чавкбозор таърихи 300-сола дорад.

Алӣ Аҳмад, раиси Идораи оташнишонии Бангладеш гуфтааст, зоҳиран балони гази моеъ сабаби сӯхторе шудааст, ки дар муддати кӯтоҳе ба биноҳои гирду атроф доман паҳн кардааст. Дар зери яке аз биноҳои истиқоматӣ дар ин маҳалла анбори балонҳои гази моеъ будааст ва шоҳидон гуфтаанд, ки ин балонҳо яке паси ҳам метаркид. Соли 2010 дар шаҳри Дака дар натиҷаи сӯхтор дар як анбори маводи кимиёвӣ 120 нафар ҳалок шуданд.

НАТО изҳороти таҳдидомези Путинро ғайриқобили қабул номид

Дабири кулли НАТО.

Изҳороти таҳдидомези президенти Русия Владимир Путин ба ҳампаймонони НАТО "ғайриқобили қабул" аст. Ин нуктаро 19-уми феврал намояндаи НАТО дар шарҳи паёми Путин ба Маҷлиси федеролии Русия баён дошт.

Путин гуфтааст, Русия дар вокуниш ба бурунрафти ИМА аз Созишномаи маҳви мушакҳои кутоҳу дурпарвоз низоми мушакиеро хоҳад сохт, ки ҳадафи он на танҳо таслиҳотӣ, балки марказҳои қабули қарор дар ҳудуди ИМА ва ҳампаймононаш хоҳад буд.

Вале масъулони НАТО дар посух гуфтанд, ки дар бурунрафти ИМА аз созишномаи мазкур худи Русия айбдор аст. Паймони Атлантики шимолӣ бори дигар Москваро ба риояи созишнома даъват кард.

Намояндаи НАТО дар сӯҳбат бо расонаҳои Русия афзудааст, ки паймон мусобиқаи нави таслиҳотиро намехоҳад ва дар Аврупо силоҳи нави ҳастаӣ низ сохтанӣ нест.

Даъват ба ислоҳи низоми андоз дар Тоҷикистон дар ҷаласаи шӯрои сармоягузорӣ

Ян-Петер Олтерс, намояндаи доимии Бонки ҷаҳонӣ дар Тоҷикистон дар ҷаласаи Шӯрои беҳтаргардонии фазои сармоягузорӣ, ки дар ҳузури президент Эмомалӣ Раҳмон баргузор шуд, ба ислоҳоти низоми андоз дар кишвар даъват кард. Ян-Петер Олтерс дар ҷаласаи рӯзи 20 феврал гуфтааст, ки дар суханронии хеш дар ин шӯро ба чанд нуктаи заъфи андозситонӣ дар Тоҷикистон таъкид карда гуфт, гуруҳи Бонки ҷаҳонӣ омода аст ислоҳотро дар ин самт дастгирӣ кунад.

Ҷаноби Олтерс дар ин суханронӣ аз ҷумла гуфт, “ҳар қадаре, ки ҷамъоварии андоз барои корхонаҳо пешгӯинашаванда гардад, ҳамон қадар онҳо камтар дар ихтиёри Кумитаи андоз қарор ёфта, иҷрои нақшаи ҷамъоварии зикршудаи андозро мушкилтар мегардонад. Аз як тараф, ин ба афзоиши шумораи санҷишҳои андоз, ҷаримаҳо ва дархостҳои пешпардохти андоз оварда мерасонад, ки он ташаббусҳои соҳибкориро бештар маҳдуд месозад”.

Дар ҷаласаи XIX Шӯрои беҳтар гардонидани фазои сармоягузории назди президенти Тоҷикистон ба ҷуз аз вазирону раисони кумитаҳои давлатӣ Пратибҳа Меҳта, намояндагии Барномаи рушди СММ, Лючиано Колестини, намояндаи Хазинаи кудакони СММ ва дигарон иштирок карданд.

Кори "консули" кишвари вуҷуднадоштаи "ASPI" ба додгоҳ рафт

Сокини 64-солаи Санкт-Петербург, ки дар тақаллубкорӣ ва қонунисозии ғайриқонунии муҳоҷирон муттаҳам мешавад, базудӣ дар додгоҳ посух хоҳад дод. Ба навиштаи оҷонсии Интерфакс, ин мард худро консули кишвари вуҷуднадоштаи «ASPI, воқеъ дар ҳавзаи Кариб” муаррифӣ карда, нафарони зиёд, аз ҷумла муҳоҷирони тоҷикро фиреб кардааст. Ирина Волк, намояндаи расмии ВКД Русия рӯзи 19 феврал ба оҷонсии русӣ гуфт, ки таҳқиқи пешакии парвандаи ҷиноии як сокини маҳаллӣ анҷом шуда, ин шахс барои таҳия ва иҷрои як нақшаи тарҳрезишудаи фиреби шаҳрвандони хориҷӣ ва фурӯши шиносномаҳои қалбакии кишвари вуҷуднадошта муттаҳам мешавад”. Муфаттишон маълум кардаанд, ки шарикони ин ҷиноят аз номи як созмони тақаллубӣ шиносномаҳои шаҳрвандони кишвари вуҷуднадошта ва шаҳодатномаи ронандагӣ таҳия карда ин санадҳои сохтаро ба хориҷиҳо мефурӯхтанд. Дар парванда гуфта мешавад, ки кори ин ширкати тақаллубӣ аз соли 2015 ба ин сӯ ба роҳ монда шуда буд. Дар дохили шиносномаҳои тақаллубӣ мӯҳри убури марзи Беларус гузошта мешуд. Арзиши чунин санадҳо 15 то 100 ҳазор рубл таъин шуда буд. Аксар онҳое, ки мавриди тақаллуби онҳо қарор гирифтанд, шаҳрвандони Узбекистон, Тоҷикистон, Покистон, Афғонистон ва ҳам чанд дигар ҷумҳурии шӯравии пешин буданд, ки бо ҳадафи кор ба Русия рафтаанд.

Даъвати ИМА аз Покистон барои муҷозоти омилони ҳамла дар Ҳинд

ИМА аз Покистон даъват кард, ки омилони ҳамлаи маргбор ба низомиёни Ҳинд дар минтақаи баҳсии Кашмирро муҷозот кунад. Ин даъват дар ҳоле садо медиҳад, ки таниш дар равобити Деҳлӣ ва Исломобод дар ҳоли афзоиш аст. Рӯзи 14 феврал дар натиҷаи ҳамлае дар минтақаи Ҳимолой беш аз 40 сарбози ҳиндӣ кушта шуд. Масъулияти ин ҳамларо гурӯҳи “Ҷаиши Муҳаммад” ба ӯҳда гирифт, ки дар Покистон ҷойгир шудааст. Ҳинд Покистонро ҳушдор дод, ки ба ин ҳамлаи даҳшатбор дар даҳсолаҳои ахир посухи муносиб медиҳад. Роберт Палладино, сухангӯи Департаменти давлатии ИМА рӯзи 19 феврал гуфт: “Мо бо ҳукумати Ҳинд дар тамоси наздик ҳастем ва дар баробари изҳори тасаллият, пуштибонии қавии худро ба Ҳинд дар мубориза бо терроризм баён кардем”. Палладино гуфт, ки ИМА аз Покистон хост, ки ба хотири таҳқиқи ҳамаҷониба ва муҷозоти масъулони ин ҳодиса бо Ҳинд ҳамкории наздик барпо кунад.

Путин: дар сурати истиқрори мушакҳои ИМА, ин кишвар ва дигарҳоро ҳадаф қарор медиҳад

Президенти Русия Владимир Путин гуфт, ки агар ИМА мушакҳои миёнапарвозашро дар Аврупо мустақар кунад, Русия на танҳо кишварҳое, ки дар онҳо ин силоҳ мустақар шудааст, балки худи ИМА-ро ҳадаф қарор медиҳад. Дар суханрониаш ба парлумон рӯзи 20 феврал Путин батакрор гуфт, ки Русия аз созиши соли 1987 оид ба силоҳҳо берун мешавад, то ки дар паи рушди системаи дифои мушакии худ бошад. Путин гуфт:

"Медонем, ки ин корро чӣ гуна анҷом диҳем ва ҳамин ки ин таҳдидҳо воқеӣ шуданд, билофосила ин нақшаҳоро амалӣ мекунем".

ИМА 2 феврал ҷараёни шашмоҳаи берунрафт аз созиши силоҳҳоро оғоз намуд. Қаблан НАТО ва Вашингтон Маскавро дар он муттаҳам мекарданд, ки бо истиқрори мушакҳои навъи 9M729 созишро нақз кардааст. Русия, ки ин иттиҳомотро рад мекунад, гуфт, ҳамчунин аз ин санад берун мешавад. Созиши мазкур истеҳсол ва истиқрори мушакҳои замин ба ҳаво ва баллистикии қудрати парвозашон 500 то 5,5 ҳазор километрро манъ мекунад. Путин гуфт, ки Русия ба ИМА таҳдид намекунад, вале хостори ин аст, ки Амрико бо Русия «равобити дӯстона ва баробар» дошта бошад.

Бернӣ Сандерс гуфт, дар интихоботи президентии ИМА иштирок мекунад

Сенатори мустақил аз аёлати Вермонт Бернӣ Сандерс эълом кард, ки номзадии худро бори дигар ба мақоми президентии ИМА дар интихоботи соли 2020 пешниҳод хоҳад кард. Ӯ дар ин бора 19 феврал бо як радиои маҳаллӣ суҳбат кард.

Сандерс соли 2016 аз ҷониби Ҳизби демократ дар маъракаи интихоботи президентӣ иштирок кард. Вале баъдан номзадиашро ба нафъи Ҳилларӣ Клинтон, ки аз Доналд Трамп шикаст хӯрд, бозпас гирифт.

Сенатор дар суҳбат бо радио гуфт, пеш аз ҳама мехоҳад дар мақоми президентӣ Доналд Трампро иваз кунад. Ӯ президенти кунунии Амрикоро барои кишвараш шармовар номид. Сандерс ҳамчунин мехоҳад, идеяҳоеро амалӣ созад, ки дар интихоботи соли 2016 ваъда дода буд.

Бернӣ Сандерс яке аз авлавиятҳои барномаи интихоботии худро низоми тандурустии дастраси умумӣ, боло бурдани маоши ҳадди ақал ва ислоҳи сиёсати муҳоҷират номид.

Сандерс расман узви Ҳизби демократ нест ва худро номзади мустақил меномад. Нашрияи Politico менависад, ки иштироки сенатор ҳамчун номзади мустақил имконпазир аст, вале ғайриодӣ хоҳад буд. Интихоботи навбатии президентии ИМА 3 ноябри соли 2020 баргузор мешавад.

Интизор меравад, аз ҷониби ҷумҳурихоҳон президенти кунунӣ Доналд Трамп ва раиси аёлати Массачусетс Уилям Уэлд номзадии худро дар он пешниҳод кунанд. Аз демократҳо эҳтимол аст, номзадии сенатори Ню-Ҷерсӣ Корӣ Букер, намояндаи Ҳавайӣ дар Конгресс Тулсӣ Габбард, сенатори Калифорния Камала Ҳаррис ва Элизабет Уоррен аз Массачусетс пешниҳод шавад.

Истифодаи телефонҳои ҳушманд барои низомиёни рус манъ шуд

Думаи давлатии Русия лоиҳаи қонунеро қабул кард, ки ба низомиён ва наваскарони ин кишвар доштани телефони мобилӣ ва дастгоҳҳои дигари сабту ҳифзи маълумотро ҳангоми дар хидмати ҳарбӣ будан манъ мекунад. Ин қонун рӯзи 19 феврал қабул шуд.

Талаботи қонуни нав ба телефонҳои одие, ки дурбини аксбардорӣ надоранд, дахл намекунад.

Низомиёни рус ҳамчунин дигар ҳақ надоранд, дар бораи хусусиятҳои хидмати ҳарбӣ, ҳамхидматони пешин ва наздиконашон бо рӯзноманигорон суҳбат кунанд ё дар интернет бинависанд.

Аз лоиҳаи қонун 408 вакили порлумони Русия "ҷонибдорӣ" карда, касе "зид" набаромадааст.

Ҳомиёни ҳуқуқ мегӯянд, қонуни нав, ки ба наваскарон ҳам дахл дорад, боиси афзоиши ҳолатҳои "дедовшина" дар артиши Русия хоҳад шуд.

Зодаи Узбекистон даст доштанашро дар ҳамла террористӣ дар Истамбулро рад мекунад

Абдулқодир Машарипов, шаҳрванди Ӯзбекистон, ки дар ҳамлаи террористии клуби шабонаи шаҳри Истамбули Туркия муттаҳам мешавад, гуфт, ба ин ҷиноят рабте надорад.

Нашрияи Hurriyet навишт, ки Машарипов рӯзи 18 феврал дар додгоҳ гуфт: "Ман ин корро анҷом надодаам. Ман он касе нестам, ки шаби ҳодиса дар клуби шабона дар дасташ силоҳи Калашников буд".

Баррасии парвандаи Абдулқодир Машарипов дар додгоҳ моҳи декабри соли 2017 шуруъ шуд.

Машарипов баъди 17 рӯзи рух додани ҳодисаи террористӣ боздошт шуд.

Додситон барои Абдулқодир Машарипов 40 ҳукми зиндони якумрӣ талаб дорад. Абдулқодир Машарипов - яке аз 57 нафарест, ки бо айби ҳамдастӣ дар ҳамла ба клуби шабонаи Reina боздошт шудаанд. Ҳамсари вай Зарина Нуруллоева низ дар рӯйхати айбдоршавандаҳо аст.

Дар натиҷаи ҳамла ба клуб дар шаби 1 январи соли 2017 - 39 нафар кушта ва 69 тани дигар маҷруҳ шуданд. Масъулияти он ҳамларо гуруҳи террористии "Давлати исломӣ" ба дӯш гирифт.

Рӯзноманигорони Қазоқистон омодаанд, зидди қоидаҳои нави сабти номи хабарнигорон эътироз кунанд

Дар Қазоқистон чанд рӯзноманигор барои баргузории эътироз зидди тағйироти нави қоидаҳои сабти номи расонаҳо изҳори омодагӣ карданд. Вазири иттилоот ва иртибототи он кишвар Даврон Абаев гуфт, дар эътирози рӯзноманигорон ширкат ва мавқеашро шарҳ хоҳад дод.

Абаев рӯзи 19 феврал хабар дод, ки ворид кардани тағйир ба қоидаҳои сабти номи рӯзноманигоронро дар чорабиниҳои давлатӣ сармуҳаррирони расонаҳо талаб кардаанд.

Ба гуфтаи вазир, сармуҳаррирон арз кардаанд, ки хабарнигорон баъди аз кор рафтан аз идораи онҳо, аз номи маҳалли кори пешини худ дар чорабиниҳо ширкат кардаанд. Ба ин далел, сармуҳаррирон хостаанд, хабарнигорон вазифадор шаванд, ки ҳангоми ширкат дар чорабиниҳо, амсоли нишастҳои хабарӣ, маҷлиси ниҳодҳои давлатӣ ва ғайра ҳуҷҷатҳоеро пешниҳод кунанд, ки фаъолияти рӯзноманигорро собит созанд.

"Ҳоло шикоят зиёд мерасад, ки рӯзноманигорон ба як чорабинӣ ворид шуда, баъдан чанд утоқи кориро давр мезананд. Чунин рафтор норавост. Ахлоқи корӣ мавҷуд аст, ки бояд дархост фиристода шавад ва мо вазифадор мешавем, ки посух диҳем. Агар, фаразан, шумо мансабдорро дар долон дидед, метавонед суол диҳед, вале ба утоқи кории вай даромадан нодуруст аст", - гуфт Абаев.

Ворид кардани тағйир ба қоидаҳои сабти номи хабарнигорон миёни кормандони расонаҳои Қазоқистон нигарониро ба бор овард. Рӯзноманигорон мегӯянд, тағйири мазкур хилофи қонунгузорӣ ва ҳуқуқи дастрасии одамон ба иттилоот аст.

Парвандаи ҷиноӣ барои таҷовузи дастаҷамъии духтаре дар Қароқалпоқистон

Дар вилояти Қароқалпоқистони Узбекистон як хонандаи синфи 9-уми мактаби миёнаи рақами 14 бордор шудааст. Ба гуфтаи волидони духтар, ба номуси фарзандашон чанд хонандаи мактаби мазкур якҷоя дастдарозӣ кардаанд.

Як омӯзгори мактаби № 14 гуфт, ҳомиладории хонанда пас аз он ошкор шудааст, ки сабабҳои ба дарс наомадани ӯро ҷустуҷӯ карданд. "Баъд аз таътили зимистонӣ дигар ба дарс наомад. Дар аввал гуфтанд, ки ӯ бемор аст. Вале дертар маълум шуд, ки дар моҳи 5-уми ҳомиладорӣ қарор дорад", - афзуд ҳамсуҳбати мо.

Ба гуфтаи яке аз хешони духтар, волидон талош кардаанд, ҳамли ӯро сиқт кунанд, вале духтурон гуфтаанд, ки аллакай дер шудааст. Ҳоло духтар дар хонаи хешонаш дар Қазоқистон ба сар мебарад.

Мудири мактаби № 14 Давлатмурод Жарлихонов мегӯяд, аз ҳомиладории хонандаи худ хабар надошт. Чанд омӯзгор ва хешовандони духтар мегӯянд, мақомот талош доранд, ҳодисаро пинҳон кунанд.

Вале дар пайи пурсуҷӯи рӯзноманигорон кормандони пулис ва додситонии Чимбой 13 феврал барои таҳқиқи ҳодиса ба мактаби № 14 рафтаанд. Дар Додситонии кулли Узбекистон низ тасдиқ карданд, ки 13 феврал дар робита ба таҷовузи як хонандаи мактаб дар ноҳияи Чимбой парвандаи ҷиноӣ боз шудааст.

Президент Трамп фармони таъсиси Неруҳои кайҳонии ИМА-ро имзо кард

Президенти ИМА Доналд Трамп рӯзи сешанбе фармони таъсиси неруҳои нави амрикоӣ - Артиши кайҳониро барои пешгирӣ аз хушунат ва ҳифзи манофеи миллӣ дар кайҳон имзо кард.

Ҳафтаи гузашта дар гузорише, ки аз сӯи Оҷонсии иктишофи низомӣ нашр шуд, Русияву Чин дубора ҳамчун рақибони эҳтимолии ИМА зикр шуданд. Оҷонсӣ хабар медиҳад, ки Маскав ва Пекин барои мубориза бо ИМА дар кайҳон чораҷӯӣ мекунанд.

Ду корманди Пентагон дар суҳбат бо хабарнигори "Садои Амрико" гуфтанд, ки лоиҳаи қонуни таъсиси Артиши кайҳонӣ дар рӯзҳои наздик ба Конгресс фиристода хоҳад шуд. Дар лоиҳа буҷаи солонаи артиши кайҳонӣ 73 миллион доллар нишон дода шудааст.

Трамп бори аввал дар моҳи марти соли 2018 дар бораи таъсиси артиши кайҳонӣ хабар дода буд. Вай ваъда кард, ки буҷаи ҳарбиро барои амалисозии ҳадафи мазкур бештар хоҳад кард. Барои ҳифзи Амрико "бояд дар кайҳон султаҷӯӣ кард", гуфта буд Трамп.

Пешниҳоди вакил: касоне, ки алимент намесупоранд, дар шабакаҳо шарманда карда шаванд. ВИДЕО

Порлумони Қирғизистон лоиҳаи тағйирот ба қонун "Дар бораи вазъи судиҷрочиён" ва Кодекси оиларо баррасӣ мекунад. Муаллифи тарҳ вакили порлумон Максат Собиров аст.

Вакил пешниҳод дорад, ки иттилои қарздорони алимент дар шабакаҳо нашр, ҳуҷҷатҳои ронандагиашон гирифта ва иҷозаи шикорашон бекор шавад. Дар лоиҳа омадааст, ки чунин шаҳрвандон ҳамчунин аз ҳаққи ба хориҷ рафтан маҳрум шаванд. Дар ин бора рӯзи 19 феврал ТВ "Настоящее время" хабар дод.

Собиров мегӯяд, ҷомеаи Қирғизистон суннатист ва анъанаҳои мардумиро дар бисёри маврид нисбат ба қонун бештар риоя мекунанд. Дар ҳоли ҳозир падароне, ки алимент намесупоранд, бо андак ҷарима аз ҷавобгарӣ озод мешаванд. Вакил пешниҳод дорад, чораҳои сахттаре қабул шавад, ки ҳам ба ҷайб ва ҳам ба виҷдони алиментгурезон таъсир расонад.

"Агар 70 дарсади алимент пардохт нашавад, парвандаи ҷиноятӣ боз мегардад. Мо пешниҳод кардем, ки ба Кодекси маъмурӣ тағйирот ворид шавад ва ба ин тартиб, одамоне, ки алимент намепардозанд, аз ҳаққи ронандагӣ ва шикор маҳрум шаванд", - шарҳ дод Собиров.

Тағйирот ба Кодекси оила пешбинӣ мекунанд, ки ҳуқуқи кӯдакон дар дарёфти маълумоти олӣ риоя шавад: ҷуфтҳои аз ҳам ҷудошуда вазифадор мегарданд, ки харҷи таҳсили фарзанди муштаракашонро то синни 24-солагӣ баробар пардохт кунанд. Дар сурати сарпечӣ аз пардохти харҷ волидон ба ҷавобгарӣ ҷалб хоҳанд шуд.

Ба иттилои мақомоти додгоҳии Қирғизистон, дар он кишвар бештар аз 40 ҳазор шаҳрванд аз алимент қарздор ҳастанд. Болоравии шумори қарздорони алимент аз як сӯ ба бештаршавии талоқҳо ва аз сӯи дигар ба афзоиши бекорӣ рабт дорад.

Бишкек гуфтугӯро бо Тошканд дар робита ба нирӯгоҳи "Қамбарота-1" оғоз мекунад

Муовини раиси Кумитаи саноат ва энергетикаи Қирғизистон Айтмамат Қодирбоев дар ҷаласаи порлумон хабар дод, ки рӯзҳои наздик як гуруҳи кории ин кишвар барои гуфтугӯ дар робита ба нирӯгоҳи обии барқии "Қамбарота-1" ба Тошканд хоҳад рафт.

Ба гуфтаи ӯ, ин гуруҳи корӣ охирҳои соли 2018 ташкил шудааст. "Гуфтугӯҳои пешакӣ тавассути телефон сурат гирифтанд. Масъала низ бо иштироки муовини аввали сарвазир баррасӣ шудааст", - гуфт ӯ.

Баъди ба сари қудрат омадани Шавкат Мирзиёев дар Узбекистон дар соли 2017 Тошканд эълом кард, ки имкони иштирок дар бунёди нирӯгоҳи обии барқии "Қамбарота-1"-ро меомӯзад.

Иҷрои тарҳи бунёди "Қамбарота-1" дар рӯдхонаи Норин чанд сол аст, ки ба таъхир меафтад. Бунёди ин нирӯгоҳ бо иқтидори 1860 мегаватт ҳанӯз дар охирҳои соли 1980 дар назар буд. Вале то ҳол иҷро нашудааст.

Ҳукумати Қирғизистон барои бунёди нирӯгоҳи мазкур бори охир соли 2012 бо Русия созишнома ба имзо расонд. Вале санад соли 2016 бо ташаббуси ҷониби Қирғизистон бекор карда шуд.

Эмомалӣ Раҳмон бо рӯзноманигорон вомехӯрад

Эмомалӣ Раҳмон, раисҷумҳури Тоҷикистон бо рӯзноманигорон дар Душанбе мулоқот мекунад. Мақомот аз ҷумла дафтари матбуоти президент дар ин бора расман шарҳ надоданд. Аммо ҳадди ақал се даъватшудаи ин вохӯрӣ дар сӯҳбат ба Радиои Озодӣ гуфтанд, вохӯрии президент бо рӯзноманигорон пас аз зуҳри 20-уми феврал сурат мегирад.

Ба қавли манбаъ, ба мулоқоти президент асосан сардабирон ва рӯзноманигорони расонаҳои давлатӣ даъват шудаанд. Манбаъ афзуд, дар ин вохӯрӣ, масъалаи фаъолияти расонаҳои расмӣ баррасӣ мешавад.

Дар Тоҷикистон бисёр кам аст, ки президент бо рӯзноманигорон вохӯрӣ кунад. Бори ахир вохӯрии хосаи Эмомалӣ Раҳмон бо рӯзноманигорон дар ҷашни 100-солагии матбуоти тоҷик дар соли 2012 вохӯрд.

Эмомалӣ Раҳмон аҳёнан дар ифтитоҳи ягон телевизион ё радиои давлатӣ бо рӯзноманигорон сӯҳбатҳои сарироҳӣ анҷом медиҳад. Аз ҷумла, моҳи октябри соли гузашта Эмомалӣ Раҳмон дар ифтитоҳи телевизиони Хуҷанд аз кори телевизионҳои давлатӣ танқид кард.

Раиси ҷумҳур аз хабарнигорон ва бахусус кормандони телевизионҳои кишвар хоста буд, ки ба ҷойи таърифу тавсифи аз ҳад зиёд аз камбудҳои ҷомеа низ бигӯянд.

"Афсӯс, ки аз телевизиони марказӣ сар карда, худтаърифкунӣ зиёд аст. Гӯё дар ҷомеа дигар камбуд вуҷуд надорад. Ин хел нест, давлатдорӣ бе камбуд намешавад",-таъкид карда буд Эмомалӣ Раҳмон. Баъд аз ин телевизионҳо ба пахши гузоришҳои интиқодӣ шурӯъ карданд.

Зилзила Тоҷикистонро такон дод

Субҳи рӯзи чаҳоршанбеи 20-уми феврал ду заминларза шаҳри Душанбе, пойтахти Тоҷикистон такон дод. Умеда Юсупова, сухангӯи Кумитаи ҳолатҳои фавқулоддаи Тоҷикистон ба Радиои Озодӣ гуфт, маркази заминларза дар наздикиии шаҳри Ваҳдат -- канори пойтахт мебошад.

Ба гуфтаи хонум Юсупова, заминларзаи аввал соати 6:26 ба вақти маҳаллӣ ва ҷунбиши дуввум даҳ дақиқа пас аз он рух дод. Сухангӯи Кумитаи ҳолатҳои фавқуллода гуфт, ларзиши аввали замин дар Душанбе бо қувваи 2 балл ва дуввумӣ бо қувваи 3 балл рух додааст. Мақомот мегӯянд, заминларзаи мазкур харобие дар пай надоштааст.

Тоҷикистон дар яке аз минтақаҳои зилзилахези қораи Осиё ҷойгир аст. Ҳамасола дар кишвар садҳо заминларза сабт шуда, дар натиҷаи он баъзе аз манзили сокинон вайрон мешавад.

Познер барои шӯхиаш дар бораи чиниҳо узрхоҳӣ кард

Владимир Познер дар ҷаласаи Коллегияи ҷамъиятии шикоят аз болои матбуот. 19 феврали соли 2019

Журналисти шабакаи аввали телевизиони Русия Владимир Познер барои шӯхиаш дар бораи чиниҳо, ки дар барномаи ахираш ("Самые-самые-самые") садо дод, узрхоҳӣ кард. Ҳангоми наворгирии гузорише аз хонаи рамзии Бобои Барфӣ дар Финландия, Познер шӯхӣ карду гуфт, ки дар деҳа “хитоиҳо хеле зиёд будааст”. “Чашми ман каҷ нашуд?”, пурсид Познер аз ҳайати эҷодӣ ва чашмонашро ба онҳо нишон дод. Ин шӯхии журналистро яке аз тамошобинони телевизион таҳқиромез дарёфт ва аз болои ин рафтори журналист ба Коллегияи ҷамъиятии шикоят аз болои матбуот ариза фиристод.

Хонуме бо номи Туяна Басанова дар ин нома худро “намояндаи мардуми осиёии минтақаи Сибир” муаррифӣ кард ва гуфт, ки ҳарфу ҳаракатҳои Познер барои намоиш дар телевизиони федеролӣ “ғайри қобили қабул” мебошад.

Басанова гуфт, ки бо ин ҳаракаташ Познери 84-сола “адовати худро нисбат ба намояндагони қавмҳои дигар” ба намоиш гузоштааст. “Познер фикр мекунад, ки агар дар миёни чиниҳо зиёд бигардад, чашмонаш каҷ мешаванд”, гуфт Басанова.

Рӯзи сешанбе коллегия шикояти Басановаро арзёбӣ кард ва дар ин ҷаласа Познер эътироф кард, ки “ҳарфҳои ӯ як шӯхии ноҷо буд”.

Интерфакс бо такя ба ҳарфҳои Познер менависад: “Ман дар асл вокуниши хонум Басановаро хеле хуб дарк мекунам ва эътироф мекунам, ки ӯро ранҷондам. Ман аз ин кори худ узр мепурсам”. Бахши русии Би-Би-Си бо такя ба журналист менависад: “Ман ба ҳеҷ сурат нажодпараст нестам. Ин як шӯхии воқеан ҳам бад буд”. Баъди ҷаласа Познер гуфтааст, ки “ин як аблаҳӣ буд” ва узрхоҳӣ барои ин ҳодиса мушкиле надорад. Ӯ гуфтааст, ки омода аст дар барномаи телевизионии худ ҳам аз тамошобинон узрхоҳӣ кунад.

Муаллифи шикоят Туяна Басанова гуфтааст, ки узри журналист қабул аст ва изҳори умедворӣ кардааст, ки журналист аз телевизион ҳам мавқеи худро такрор мекунад.

Ёфтҳои бештар

Гузоришҳои видеоӣ

Кор аз дохили хона. Соҳибхоназанҳо ҳунари комютеру интернетро азхуд карданд
лутфан мунтазир бошед

### Феълан кор намекунад ###

0:00 0:02:24 0:00
XS
SM
MD
LG