Додгоҳи Африқои ҷанубӣ дархости раҳоии чемпиони Бозиҳои паралимпӣ дар давидан Оскар Писториус дар ивази васиқаро пазируфт. Ӯ ба қатли қасдонаи дӯстдухтараш айбдор мешавад. Қозӣ Десмонд Нейр ҳукм кард, ки хатари фирори Писториус вуҷуд надорад ва ӯро метавон то оғози мурофиа озод кард. Вакилони Писториус мегуфтанд, ӯ хеле маъруф аст, ки фирор кунад. Ба гуфтаи додситонҳо, Писториуси 26-сола рӯзи 14 феврал аз дохили ҳаммоми бастаи манзилаш дар Претория Рива Стинкампи 29-соларо дониста паррондааст. Худи ӯ мегӯяд, Стинкампро дузд гумон карда буд. Писториус, ки поҳои сунъӣ дорад, дар Олимпиадаи Лондон бо варзишгарони солим рақобат кард ва дар ватанаш қаҳрамони варзиш шинохта мешуд.