Пайвандҳои дастрасӣ

Хабари нав

Хабарҳо

Эрон барои эҳёи музокирот изҳори омодагӣ кард

Сайид Ҷалилӣ
Эрон барои эҳёи музокирот оид ба барномаи ҳастаияш омода аст. Дар ин бора Сайид Ҷалилӣ, раҳбари ҳайати Эрон дар музокирот бо шаш кишвари пешрафтаи олам, рӯзи ҷумъа дар ҷараёни сафараш ба Деҳлӣ хабар дод. Ҳамоҳангсозии мавзӯи гуфтугӯ ва замону ҷойи баргузории музокирот идома дорад.

Кишварҳои ғарбӣ бо ҷорӣ намудани таҳримҳо алайҳи Эрон чандин бор талош карданд то Теҳронро барои даст бардоштан аз пажуҳиши барномаи ҳастаӣ водор созанд, зеро ҳадс мезананд, ки Эрон мехоҳад соҳиби силоҳи ҳастаӣ шавад. Аммо Теҳрон мегӯяд, ки барномаи ҳастаияш фақаи ҳадафҳои осоишта дорад.

Бори охир музокироти Эрон бо “шашгона” – ИМА, Русия, Фаронса, Бритониё, Чин ва Олмон моҳи июн дар Маскав баргузор шуд ва бенатиҷа поён ёфт.

Ҳамаи хабарҳои имрӯзро дар инҷо бихонед

Э.Раҳмон ба оилаи қурбониёни ҷанг дар марз бо Қирғизистон изҳори ҳамдардӣ кард

Эмомалӣ Раҳмон

Раиси ҷумҳури Тоҷикистон баъд аз тақрибан ду ҳафтаи ҷанҷоли хунин дар марз бо Қирғизистон ба хонаводаи қурбониён изҳори ҳамдардӣ кард.

Эмомалӣ Раҳмон рӯзи 12-уми май дар паёме бахшида ба Иди Фитр гуфт: "Ба оилаҳое, ки наздикону пайвандони онҳо дар натиҷаи муноқишаву задухӯрди чанд рӯз пеш дар сарҳади давлатӣ байни Тоҷикистон ва Қирғизистон дар ҳудуди шаҳри Исфара рухдода ба ҳалокат расиданд, ҳамдардии амиқ баён карда, ба ҳамаи онҳо аз даргоҳи Худованд сабри ҷамил металабам." Ӯ ба шахсони захмӣ ва осебдида шифои комил хостааст.

Низоъ дар марзи Тоҷикистону Қирғизистон рӯзҳои 28 ва 29-уми апрел рӯй дод. Мақомоти Тоҷикистон танҳо 6-уми май тасдиқ карданд, ки дар ҷанҷоли марзӣ 19 кас кушта ва 87 кас захмӣ шудаанд.

Ҷониби Қирғизистон эълон кард, ки дар ин ҳодиса 189 шаҳрванди он кишвар маҷруҳ шуда, 36 кас, аз ҷумла ду кӯдак, ҷон бохтанд. Содир Ҷабборов, президенти Қирғизистон, ба хотири қурбониёни муноқишаи ахир дар марз рӯзҳои 1 ва 2-юми майро мотами миллӣ эълон карда буд.

Дар тақрибан ду ҳафтаи охир намояндагони мухолифини тоҷик дар хориҷа чанд дафъа раиси ҷумҳурро барои изҳори ҳамдардӣ накардан ба оилаи қурбониён танқид карданд.

Намояндагони ҳукумат гуфтанд, ки барои ибрози ҳамдардӣ ба хонаводаи қурбониён рафта буданд ва бо дастури раиси ҷумҳурӣ ба ҳар як хонаводаи кушташудаҳо ба маблағи 70 ҳазор сомонӣ (беш аз 6 ҳазор доллар) доданд.

Рӯйхати расмии онҳое, ки дар ин муноқишаҳо ҷон бохтанд:

  1. Бахтовар Маҳмудов, сокини ҷамоати деҳоти Сурхи Исфара;
  2. Собир Ваҳҳобов, сокини ҷамоати Чоркӯҳ;
  3. Манучеҳр Қаландаров, сокини ҷамоати Чоркӯҳ;
  4. Ҳакимбой Ниёзов, сокини ҷамоати Чоркӯҳ;
  5. Нусратулло Набиев, сокини ҷамоати Чоркӯҳ;
  6. Ҳасанхон Шаропов, сокини ҷамоати Чоркӯҳ;
  7. Далер Эшонов, сокини ҷамоати Чоркӯҳ;
  8. Иброҳим Ҳошимзода, сокини ҷамоати Чоркӯҳ;
  9. Ҳикматуллоҳ Маҳкамов, сокини ҷамоати Чоркӯҳ;
  10. Меҳрафрӯз Болтаев, сокини ҷамоати Ворух;
  11. Нозим Каримов, сокини шаҳри Конибодом;
  12. Умедҷон Юсупов, сокини ноҳияи Бобоҷон Ғафуров;
  13. Ҷасур Сиярқулов, сокини ноҳияи Деваштич;
  14. Ҳасан Акбаров, сокини ноҳияи Фархор;
  15. Аслиддин Абдузамонов, сокини ноҳияи Нуробод;
  16. Абдулло Саидов, сокини ноҳияи Нуробод;
  17. Некрӯз Ғафурзода, сокини шаҳри Турсунзода;
  18. Салоҳиддин Гадоев, сокини ноҳияи Ховалинг;
  19. Маҳмадулло Раҷабзода, сокини ноҳияи Муъминобод.

Душанбеву Бишкек якдигарро барои оғози даргирии мусаллаҳона айбдор карда, барои таҳқиқи ҳодиса парвандаҳои ҷудогона кушодаанд.

Тоҷикистону Қирғизистон 970 километр марз доранд ва аз ин ҳисоб танҳо 519 километри онро муайян ва нишона гузоштаанд. Минтақҳои дигари баҳсӣ, ки аз обу замину чарогоҳ иборатанд, ҳар чанд вақт сабаби занозаниву тирпарронии сокинон ва нерӯҳои ду кишвар мешаванд.

Муовини раиси ҳизби ҳоким дар Тоҷикистон ба сокинони Қирғизистон муроҷиат кард

Хайриннисо Юсуфӣ. Акс аз бойгонӣ

Муовини раиси ҳизби ҳоким дар Тоҷикистон аз шаҳрвандони Қирғизистон хостааст, ки "дар рӯзҳои мушкил барои ҳарду кишвар" қувваҳоро барои барқарории субот дар марз муттаҳид кунанд.

Хайриннисо Юсуфӣ рӯзи 12-уми май дар муроҷиати видеоӣ бо забонҳои русӣ ва қирғизӣ гуфт, мардуми Тоҷикистону Қирғизистон "бояд дар сулҳу оромӣ ба сар баранд". Раҳбарии Ҳизби халқии демократии Тоҷикистонро президент Эмомалӣ Раҳмон ба уҳда дорад.

Ин муроҷиат пас аз тақрибан ду ҳафтаи задухӯрди мусаллаҳона дар сарҳади Тоҷикистону Қирғизистон садо дод. Дар ин ҳодиса аз ду тараф даҳҳо нафар куштаву садҳо кас захмӣ шуданд.

"Дар таърихи чандинасраи ҳамсоядорӣ якҷоя бисёр санҷишҳоро гузаштем, аз якдигар омӯхтем. Ҳар кадоме мо дар кишварҳои ҳамсоя ҳамкорони хубу шиносҳо ва дӯстону наздикон дорем. Моро хешутаборӣ, таърих ва дину фарҳанги ягона пайваст мекунад", -- гуфтааст Хайриннисо Юсуфӣ дар муроҷиаташ дар Ютуб.

Муроҷиати ӯ ва наворҳои дигари баъзе аз хабарнигорони расонаҳои давлатии Тоҷикистон дар масъалаи марз дар ҳоле нашру паҳн мешаванд, ки пештар мақомотро барои сустӣ ва посух нагуфтан ба иддаоҳои ҷониби Қирғизистон танқид карда буданд.

Баъзе аз шаҳрнависон ба ин видео вокуниш кардаанд. Корбаре бо номи Саид Сооронбоев дар Ютуб навиштааст, ки муроҷиати Хайриннисо Юсуфӣ ботаъхир садо дод.

Низоъ дар марзи Тоҷикистону Қирғизистон рӯзҳои 28 ва 29-уми апрел рӯй дод. Мақомоти Тоҷикистон гуфтанд, ки дар ҷанҷоли ахири марзӣ 19 кас кушта, 87 кас захмӣ шуд. Ҷониби Қирғизистон эълон кард, ки дар ин ҳодиса 189 шаҳрванди он кишвар маҷруҳ шуда, 36 кас, аз ҷумла ду кӯдак, ҷон бохтанд.

Душанбеву Бишкек якдигарро барои оғози даргирии мусаллаҳона айбдор карда, барои таҳқиқи ҳодиса парвандаҳои ҷудогона кушодаанд.

Ба иттилои расмӣ, ин шабу рӯз дар марзи ду кишвар оромӣ ҳукмфармост. Сокинони деҳаҳои наздисарҳадии ду тараф ба маҳалли зисти худ баргашта, сохтмони хонаҳои вайроншуда низ шуруъ шудааст.

Тоҷикистону Қирғизистон 970 километр марз доранд ва аз ин ҳисоб танҳо 519 километри онро муайян ва нишона гузоштаанд. Минтақҳои дигари баҳсӣ, ки аз обу замину чарогоҳ иборатанд, ҳар чанд вақт сабаби занозаниву тирпарронии сокинон ва нерӯҳои ду кишвар мешаванд.

Қонуни гузаштан ба хати лотинӣ дар Узбекистон ним соли дигар баррасӣ мешавад

Навиштаҳо бо хатти лотинӣ ва кириллӣ дар Узбекистон

Гурӯҳи кории таъмини гузаштан ба алифбои лотиниасос дар Узбекистон тасмим гирифтааст, ки баррасии тарҳи қонунро то 1-уми ноябри имсол дароз кунад.

Дар ин бора аз маркази матбуоти Департаменти рушди забони давлатии Девони вазирони Узбекистон иттилоъ доданд.

Гуфта мешавад, тамдиди муҳлат ба хотири омӯзиши ҳамаҷонибаи тарҳ ва пешниҳоди мутахассисону ҷомеа андешида шудааст.

Давоми шаш моҳи оянда Департаменти мазкур конфронсҳои илмӣ, маърӯзаву давраҳои омӯзишӣ дар бораи зарурати гузаштан ба хатти лотиниасосро баргузор мекунад.

Тарҳи қонуни Узбекистон дар бораи гузаштан ба хатти лотиниасос 16-уми марти имсол ба баррасии умум гузошта шуда буд. Алифбои нав аз 28 ҳарф иборат аст.

Мақомоти Узбекистон мегӯянд, тарҳи мазкур дар 15 рӯзи муҳокима дар интернет 1035 шарҳ гирифтааст.

Бозиҳои варзишии Тоҷикистон моҳҳои май - июн мегузарад

Бахшида ба 30-солагии ҷашни Истиқлол дар Тоҷикистон ва ташвиқи тарзи ҳаёти солим аз 21-уми май то 30-юми июни имсол Бозиҳои варзишии Тоҷикистон доир мегардад. Дар ин бора сомонаи Кумитаи миллии олимпии Тоҷикистон хабар додааст.

Ба иттилои манбаъ, ба барномаи Бозиҳои варзишии Тоҷикистон 15 намуди варзиш - баскетбол, бокс, вазнабардорӣ, варзиши сабук, волейбол, гуштигирӣ, гуштии варзишӣ (тарзи озод ва юнониву румӣ), камонварӣ, каратэ, қайиқронӣ, самбо, таеквондо, ҳандбол, ҷудо ва шиноварӣ - ворид шудааст.

Бозиҳои варзишии Тоҷикистон-2021 рӯзи 22-юми май бо мусобиқаи варзиши сабук оғоз мегардад, ки ду рӯз идома хоҳад кард. Сипас,

  • рӯзҳои 1-2-юми июн мусобиқаи гуштигирӣ,
  • 3-4-уми июн гуштии юнониву румӣ ва каратэ,
  • 5-6-уми июн шиноварӣ,
  • 7-8-уми июн гуштии озод,
  • 9-10-уми июн ҷудо ва таэквондо,
  • 10-14-уми июн волейбол миёни занон,
  • 11-12-уми июн самбо,
  • 12-13-уми июн вазнабардорӣ,
  • 13-17-уми июн ҳандбол,
  • 18-22-юми июн баскетбол миёни мардон,
  • 23-27-уми июн волейбол миёни мардон,
  • 24-25-уми июн қайиқронӣ дар байдарка ва каноэ,
  • 25-29-уми июн бокс ва
  • 28-29-уми июн камонварӣ доир хоҳанд шуд.

Ҳамаи мусобиқаҳо, ба ғайр аз вазнабардорӣ, волейбол миёни занон ва камонварӣ дар шаҳри Душанбе баргузор мешаванд. Мусобиқаи вазнабардорӣ дар Кулоб, волейбол миёни занон дар Хоруғ ва камонварӣ дар Хуҷанд ба нақша гирифта шудааст.

"Фурӯравии замин дар ноҳияи Ҷомӣ идома дорад". Ба зарардидаҳо замин додаанд. ВИДЕО

Барои 20 хонаводаи зарардида аз лағзиши замин дар деҳаи Ифтихори ноҳияи Абдураҳмони Ҷомӣ қитъаҳои замин ҷудо кардаанд. Шаби 8 ба 9-уми май дар ин деҳа лағзиши замин шуруъ шуд ва то кунун беш аз 100 гектар замини кишоварзии сокинон ва 20 манзили онҳо фурӯ рехтааст.

Ба гуфтаи масъулони Кумитаи ҳолатҳои фавқулоддаи Тоҷикистон ва намояндагони Cитоди ҷумҳуриявии рафъи оқибатҳои ин офати табиӣ, лағзиши замин дар деҳаи Ифтихори ноҳияи Абдураҳмони Ҷомӣ аз 8-уми май ба ин сӯ идома дорад. Ба ин далел, масоҳати то 30 метри атрофи ҷойи ҳодиса барои гаштугузор мамнуъ шудааст.

Умеда Юсуфӣ, сухангӯи Кумитаи ҳолатҳои фавқулодаи Тоҷикистон, рӯзи 12-уми май дар сӯҳбат бо Радиои Озодӣ гуфт, бар асари ин ҳодиса дар ҷамоати Ифтихор 20 манзил пурра зери замин рафтанд. Ба гуфтаи ӯ, 167 хоҷагӣ ба ҷойҳои бехавф кӯчонида шуданд.

Юсуфӣ афзуд, Ситоди ҷумҳуриявии рафъи оқибатҳои ин офати табиӣ тасмим гирифтааст, барои ҳар як оилаи зарардида дар маҳалли амни ҳамин деҳа 10-сотихӣ замин ҷудо карда, манзили навро дар муддати як моҳ бунёд кунад.

Сокинони деҳаи офатзада ба ҷойи дигар мекӯчанд
лутфан мунтазир бошед

Феълан кор намекунад

0:00 0:03:00 0:00

Ситоди ҷумҳуриявии рафъи оқибатҳои ин офати табиӣ дар саҳни ҳавлии мактаби шумораи 50-и ин деҳа барои осебдидагон "шаҳраки хаймавӣ" таъсис додаанд

Азиза Давлатова, сокини 40-солаи ҷамоати Ифтихори ноҳияи Абдураҳмони Ҷомӣ, дар суҳбат бо Радиои Озодӣ зимни ёдоварӣ аз оғози фурӯрезии замини манзилаш гуфт, фурсати кӯтоҳе барои наҷоти ҷонаш дошт.

Ӯ гуфт: "Фурӯрезии замин аз дурӣ шуруъ шуд. Ҳамон рӯз борони сахт меборид ва аз дара ба самти деҳа сел омад. Баъд роҳи сел баста шуд ва об ба деҳа расид. Фурӯрезии заминро дида, зуд хостам аз ҳавлӣ берун шавам, вақте ба кӯча баромадам, дидам, ки ҳавлиам зери замин рафт."

Феълан созмонҳои байналмилалии имдодӣ ва шахсони хайрхоҳи маҳаллӣ ба осебдидагон ин ҳодиса ёриҳо ироа мекунанд. Масъулини Кумитаи ҳолатҳои фавқулода гуфтанд, барои зарардидаҳо кумакҳои USAID ва ЮНИСЕФ дастрас карда шудааст.

Тибқи иттилои масъулини КҲФ Тоҷикистон, соли 2020 дар пайи офатҳои табиӣ дар кишвар 41 бинои маскунии сокинони пурра ва 102 бинои дигар қисман тахриб шуда буданд. Ин ҳодисаҳо ба 18,5 ҳазор гектар заминҳои кишоварзӣ хисорот ворид карда, шаш пули иртиботӣ комилан тахриб шуда буданд.

Гузориш: Сухангӯи сафорати Амрико дар Маскав "персона нон грата" эълон шуд

Назди сафорати ИМА дар Маскав

Дар миёни даҳ корманди сафорати Амрико дар Русия сухангӯйи сафорат Ребекка Росс ҳам "персона нон грата" эълон шудааст. Ӯ ҳам бояд ин кишварро тарк кунад.

Нашрияи "Коммерсантъ" навишт, ихроҷи Росс ва дипломатҳои дигар посух ба иқдомҳои Вашингтон мебошад.

"Коммерсантъ" бо такя ба як манбааш дар Вазорати корҳои хориҷии Русия навишт, номи Росс ба он хотир ба феҳрист ворид карда шуд, ки мақомоти амрикоӣ ним сол боз ба Маскав имкон намедиҳанд, то ҷойи холишудаи сухангӯи сафоратро дар Вашингтонро пур кунанд.

Ин манбаъ иддао кардааст, ки ҷониби амрикоӣ санадҳои номзадро ба гирифтани виза бидуни шарҳ баргардондааст.

Иёлоти Муттаҳида рӯзи 15-уми апрел бастаи нави таҳримҳоро нисбат ба Русия содир карда, гуфт, ин тасмим ба хотири дахолати Маскав ба интихобот ва дурӯғпароканӣ гирифта шудааст. Ба феҳрист номи 30 шаҳрванд ва ширкати Русия ворид гардидааст. Илова ба ин, бар асоси таҳримҳо, даҳ дипломати рус ҳам аз Амрико берун карда мешаванд.

Рӯзи 23-юми апрел мақомоти рус огоҳ карданд, ки дигар ба сафорати ИМА ба кор қабул кардани шаҳрвандони хориҷӣ имконпазир нахоҳад буд. "Коммерсантъ" ёдовар шудааст, ки айни чунин меъёрҳои маҳдудкунандаро Маскав соли 1986 ҳам ҷорӣ карда буд.

Он замон сафири Амрико то ҷойи кор бояд худаш мустақилона мерафт ва ҳамсараш низ ҳангоми ташкили меҳмониҳо худаш ба меҳмонҳо хидмат мекарду кормандони дигари сафорат дар ошхона, гараж ва боғ кор мекарданд.

Се рӯз пеш аз оташбас Толибон як ноҳияи стратегиро ишғол карданд

Июни соли 2019, ноҳияи Нархи вилояти Вардак. Сарбозони амрикоӣ дар як баландӣ камин гирифтаанд

Мақомоти Афғонистон гуфтанд, дар остонаи се рӯзи оташбасе, ки Толибон ба муносибати Иди Фитр эълон карданд, дар 40-километрии шаҳри Кобул як ноҳияи стратегиро ишғол карданд.

Ториқ Ориён, сухангӯи Вазорати корҳои дохилии Афғонистон, рӯзи 12-уми май гуфт, "нирӯҳои амниятиву дифоӣ ба ақибнишинии тактикӣ аз қароргоҳи полис дар ноҳияи Нарх роҳ доданд".

Ин таҳаввулот дар ҳолест, ки нирӯҳои Амрико ва эътилофи байналмилалӣ ба беруншавӣ аз хоки Афғонистон идома медиҳанд. Фавод Амон, сухангӯи Вазорати дифои Афғонистон, гуфт, нирӯҳо дар талошанд, ки ин ҳадафро дубора зери назорат дароваранд.

Сухангӯи Толибон Забеҳулло Муҷоҳид гуфт, ки ин гурӯҳ як рӯз пеш ноҳияро ба даст овард ва баъд аз ин қароргоҳи полис ва пойгоҳи низомиро ишғол карданд. Ноҳияи Нарх ба самти чанд минтақаи муҳими кишвар дар марказ ва ҷануби Афғонистон бо шоҳроҳҳо пайваст шудааст.

Ҷумҳурихоҳон барои барканории Лиз Чейнӣ овоз медиҳанд

Лиз Чейнӣ дар сафи раҳбарияти ҳизби Ҷумҳурихоҳи ИМА мақоми сеюм дорад

Намояндагони Ҳизби Ҷумҳурихоҳ дар Маҷлиси намояндагони Амрико, қарор аст, рӯзи 12-уми май Лиз Чейниро аз мақоми раҳбарикунанда дар сафи ин ҳизб берун кунанд.

Лиз Чейнӣ, духтари муовини пешини президенти Амрико Дик Чейнӣ, дар сафи ҷумҳурихоҳон мақоми сеюми раҳбариро дорад.

Чейнӣ раиси ҷумҳури пешини Амрико Доналд Трампро рӯйирост ба баҳс кашида, пас аз иддаои ӯ дар бораи гуё тақаллуб шудани натиҷаҳои интихоботи моҳи ноябри порсол Трампро “як дурӯғгӯи калон” номида буд.

Ӯ, инчунин, президент ва тарафдоронашро дар ташкили беназмиҳои 6-уми январи имсол дар бинои Капитол гунаҳкор кард.

Як шаб пеш аз овоздиҳӣ дар маҷлис, Чейни дар суханрониаш мушовирони ҷумҳурихоҳро бо лаҳни шадид танқид ва аз мазеъгирии худ ҳимоят кард.

Ӯ гуфт, “хомӯшӣ ва бепарвоӣ дар баробари дурӯғ ин дурӯғро азимтар мекунад” ва афзуд, “ман ҳамин тавр ором нишаста нигоҳ намекунам, ки дигарон ҳизби моро ба ақиб мекашанду аз роҳе пеш мераванд, қонуну қоидаро нодида мегиранд ва самтгириҳои президенти собиқро барои ба ҳам задани демократия идома медиҳанд”.

Раҳбари ақаллиятҳои Маҷлиси намояндагон Кевин МакКарти (ҷумҳурихоҳ аз Калифорния), ки ба сабукдӯш кардани Чейни даъват кардааст, гуфт, чунин иқдом ба хотири даст ёфтан ба ягонагӣ ва бартараф кардани ихтилоф дар дохили ҳизб зарур аст.

Бисёриҳо бовар доранд, ки баъд аз ин мушкилоти дохилии Ҳизби Ҷумҳурихоҳ амиқтар мешавад.

Маҳмуди Аҳмадинажод мехоҳад, бори сеюм президенти Эрон шавад

12-уми май, Теҳрон. Маҳмуди Аҳмадинажод дар ҳалқаи тарафдоронаш дар назди вазорати умури дохилӣ истодааст

Маҳмуди Аҳмадинажод, раиси ҷумҳури пешини Эрон, мехоҳад, бори сеюм дар интихоботи президентӣ дар он кишвар иштирок кунад.

Телевизиони давлатии Эрон рӯзи 12-уми май Аҳмадинажод ва ҷонибдоронашро намоиш дод, ки ба назди Вазорати корҳои дохилӣ барои пешниҳоди аризаи номзадӣ мерафтанд.

Аҳмадинажоди 64-сола, ки дар гузашта дар мансаби шаҳрдори Теҳрон низ кор кардааст, бо дидгоҳҳои муҳофизакоронааш маъруф аст ва дар солҳои охир аз кори раҳбарияти Эрон танқид мекунад.

Аризаи ӯ барои сабтиноми номзадияш дар интихоботи соли 2017 рад шуда буд.

Маҳмуди Аҳмадинажод аз соли 2005 то 2013 раёсати Ҷумҳурии Исломиро бар дӯш дошт. Дар он замон Эрон бо Ғарб бар сари барномаи ҳастаӣ дар ҳолати ихтилофи сахт қарор дошт ва натиҷаҳои баҳсбарангези интихоботи соли 2009, ки расман бо ғалабаи ӯ анҷомид, азимтарин эътирозҳоро аз соли 1979 ба бор овард.

Дар Эрон рӯзи 11-уми майи имсол сабтиноми довталабони курсии президентӣ оғоз шуд. Интихоботи президентии Эрон 18-уми июн барпо мешавад.

"Имсол зоирони тоҷик ба зиёрати Каъба мераванд"

Каъба

Мақомоти Тоҷикистон гуфтанд, ки имсол зоирони тоҷик барои адои маносики ҳаҷ хоҳанд рафт. Соли гузашта бо сабаби пандемияи коронавирус роҳ ба Арабистони Саудӣ баста буд.

Дафтари матбуоти Кумитаи дин, танзими анъана ва ҷашну маросими миллии Тоҷикистон рӯзи 12-уми май ба Радиои Озодӣ хабар дод, ки мақомоти Арабистони Саудӣ гуфтаанд, имсол маросими ҳаҷ баргузор мешавад.

Ба қавли масъулони Кумитаи дин, шароити баргузории ҳаҷ то ҳол дақиқ нест ва рӯзҳои наздик эълон хоҳад шуд. Вале тибқи иттилои як манбаи огоҳ, имсол зоироне ба Арабистони Саудӣ сафар карда метавонанд, ки ваксинаи зидди COVID-19 гирифтаанд. Мақомот то ҳол расман ин маълумотро шарҳ надодаанд.

Солона аз Тоҷикистон ҳудуди 6 ҳазор нафар барои адои маносики ҳаҷ ба Арабистони Саудӣ мераванд. Мақомот гуфтанд, имсол низ омори зоирин аз Тоҷикистон бетағйир аст.

Ҳамасола беш аз ду миллион мусулмон аз 180 кишвари ҷаҳон ба маросими ҳаҷ ба Маккаву Мадина мераванд. Ҳаҷ яке аз панҷ рукни ислом аст ва барои ҳар мусулмони тавоно як бор дар тӯли умр фарз аст.

Дар Тотористон қурбониёни тирандозӣ дар гимназияро ба хок супурданд. АКС

Қазон, маросими дафни Амир Шайхутдинови 15-сола

Рӯзи 12-уми май дар Тотористон мотам аст ва маросими дафни қурбониёни ҳамлаи мусаллаҳонаи як рӯз пеш баргузор шуд.

Як ҷавони 19-сола рӯзи 11-уми май ба дохили гимназияи шаҳри Қазон ворид шуда, нахуст чанд таркиш ташкил кард ва баъдан ба сӯи муаллимаву талабаҳо тир кушод. Дар натиҷа, нӯҳ нафар кушта шуда, садҳо нафар дар изтиробу тарс бинои дудолудро тарк карданд.

Ин ҳодиса боис ба он шуд, ки президенти Русия Владимир Путин амр дод, муқаррароти дастрасӣ ба силоҳ сахттар шавад.

Президенти Тотористон Рустам Миннихонов гуфт, ки дар миёни кушташудаҳо ҳафт талаба, як муаллима ва як корманди мактаб буданд. Ӯ ҳамла ба мактабро "як фоҷеаи бемисл барои ҷумҳурӣ" номид. Вазорати корҳои дохилӣ гуфт, ки дар ин ҳодиса 21 нафар, аз ҷумла 18 хонанда захмӣ шуданд.

Ба Қазон, ки дар 700-километрии шарқи Маскав ҷойгир аст, Кумитаи ҳолатҳои фавқулодаи Русия дар як ҳавопаймо табибону дастгоҳҳоҳи тиббӣ фиристод. Инчунин, вазирони тандурустиву маорифи Русия ҳам ба Тотористон рафтанд.

Шиддатёбии хушунатҳо дар Ховари Миёна

12-уми май

Шаби гузашта задухӯрдҳои миёни исроилиҳову фаластиниҳо шиддат гирифт. Исроилиҳо ҳадафҳои Ҳамосро дар Ғазза ҳадаф қарор доданд ва ҷангиён ба дохилтари Исроил мушак партоб карданд. Мақомоти беҳдошт дар Ғазза 12-уми май гуфтанд, ки дар давоми ду рӯзи ахир, ки задухӯрдҳо пуршиддат шудааст, дастикам 30 фаластинӣ, аз ҷумла 10 кӯдак кушта шуда, беш аз 200 нафар ҷароҳат бардоштанд. Низомиёни исроилӣ гуфтанд, дар паи 140 оташи онҳо ба ҳадафҳои ҷангиён, 20 ҷангӣ кушта шуданд. Ҳафт исроилӣ кушта ва даҳҳо маҷрӯҳ шуданд. Хушунатҳои ахир баъди ҷанги миёни Исроил ва Ҳамос дар соли 2014 пурхушунаттарин буда, мояи нигаронии ҷомеаи ҷаҳонӣ шудааст.

Иттиҳоди Аврупо барои таҳияи шаҳодатномаи воксина омода мешавад

Иттиҳоди Аврупо умедвор аст, ки то моҳи июн шаҳодатномаи воксинаи зидди COVID-19-ро ба истифода мебарорад, то ки дар мавсими тобистон ва ҷаҳонгардӣ ба мардум сайру ҳаракат осон шавад. Чунин санадҳо ба кишварҳое бисёр зарур аст, ки аз туризм вобаста ҳастанд ва мехоҳанд, ки амнияти сиҳҳатии мардумро фароҳам кунанд. Муовини президенти Комиссиюни Аврупо Марош Шефчович рӯзи 11-уми май баъди мулоқот бо вазирони корхои хориҷаи кишварҳои узви ин ниҳод гуфт, “ин як бартарии шаҳрвандони мо аст ва аз ин хотир бовар дорам, ки чунин шаҳодатномаҳо дар остонаи тобистон омода мешаванд”. Ҳоло мақомот бояд ба мувофиқа бирасанд, ки то 21-уми май чунин санадро таҳияву ба истифода бидиҳанд.

Додгоҳи Қазоқистон дархости озодии пеш аз муҳлати "маҳбуси сиёсӣ"-ро рад кард

Кенҷабек Абишев дар додгоҳ.

Додгоҳи Қазоқистон иҷозат надод, Кенҷабек Абишеви 52-сола, ки бо ҷурми "таблиғи терроризм" ва "ангехтани адовати динӣ" зиндонӣ шудааст, шартан пеш аз муҳлат озод шавад.

Дар ин бора вакили дифои Абишев -- Гулнора Жуаспаева 11 май хабар дод. Ҷонибдорони Абишев пештар аз мақомоти Қазоқистон даъват карда буданд, ки ӯро ба иллати авҷи беморияш шартан озод кунанд.

Ба гуфтаи вакили дифоъ, Абишев, ки 7 сол аз озодӣ маҳрум карда шудааст, аллакай чор солу як моҳи ин муҳлатро дар зиндон сипарӣ кардааст ва бо назардошти рафтораш дар зиндон бояд ӯ озод мешуд. Абишев аз фишори хун ва дарди қалб ранҷ мебарад.

Кенҷабек Абишев қаблан бо навиштани муроҷиатномае ба унвони раҳбарияти зиндон ва президенти Қазоқистон Қосимҷомарт Тоқаев гуфта буд, ғайриқонунӣ аз озодӣ маҳрум карда шудааст.

Парвандаи "ҷиҳодиён" дар Қазоқистон яке аз парвандаҳои баҳсбарангез буда, дар доираи он се шаҳрванди ин кишвар -- Алмат Жумагулов, Оралбек Омиров ва Кенҷабек Абишев бо гумони даъват ба терроризм аз озодӣ маҳрум гаштаанд.

Се нафар парвандаи худро сохта ва сиёсӣ меноманд. Ҳар сеи гумонбарон тирамоҳи соли 2017 боздошт шуда буданд. Як қатор созмонҳои ҳомии ҳуқуқ Абишев ва Жумагуловро маҳбуси сиёсӣ меноманд.

Парвандаи рахнаи обанбор дар Узбекистон: додгоҳ ҳукми 17 касро содир кард

Президенти Узбекистон Шавкат Мирзиёев дар назди сарбанди Сардоба

Додгоҳи олии Узбекистон рӯзи 10 май ҳукми 17 айбдоршавандаи парвандаи рахнаи обанбори Сардобаро содир кард. Муҳокимаи парванда 21 декабри соли 2020 шуруъ шуда, пушти дарҳои баста сурат мегирифт. Дар доираи парвандаи мазкур М. Холматов, роҳбари пешини Идораи сохтмони иншооти обиву техникии Узбекистон бо айбҳои ғоратгарӣ, сӯистифода аз мақом, вайрон кардани қоидаи бехатарӣ дар сохтмон ва ғайра 10 сол зиндонӣ шудааст.

С. Руднев, сардори пешини шуъбаи банақшагирии тарҳҳои корхонаи UzGIP бо айни ҳамин айбҳо 5 сол зиндонӣ ва 12,6 ҳазор доллар ҷарима шудааст. Афроди дигар низ дар доираи ин парванда қисме ҷарима, қисми дигар то 5 сол зиндонӣ шудаанд.

Садди обанбор 1 майи соли 2020 канда шуд ва боиси марги шаш тан гардид. Ҳамзамон наздики 70 ҳазор кас ба ҷои амн кӯчонида шуд. Дар хулосаи тафтишот гуфта шудааст, ки иштибоҳу норасоӣ дар ҳуҷҷатгузорӣ, сохтмон ва истифодаи обанбор боиси рахна шудани сад гардидааст.

Обанбори Сардоба соли 2017 бо харҷи 404,4 миллион доллар сохта шуда буд. Дар пайи рахнаи он чанд минтақаи Узбекистон ва Қазоқистон зери об монд.

ИМА воксинаи Pfizer ва BioNTech-ро барои эмкунии наврасон иҷоза дод

Дар ИМА истифодаи воксинаи сохтаи ширкати Pfizer ва BioNTech-ро барои эмкунии наврасони 12 то 15-сола иҷоза доданд. Хабаргузории Reuters гуфт, ки эмкунии ин гурӯҳи аҳолӣ аллакай рӯзи панҷшанбе шурӯъ шуда метавонад. Ин нахустин воксина аст, ки дар ИМА барои эмкунии кӯдакон иҷоза дода шудааст. Дар бархе кишварҳо воксинаи сохтаи ширкати Pfizer-ро аллакай ба наврасони аз 16-сола боло иҷоза додаанд. Мутахасиссон мегӯянд, ки эмкунии наврасон барои дастёбӣ ба иммунитети дастаҷамъӣ як қадамаи муҳим ба шумор меравад. Сирояти коронавирусро кӯдакону наврасон назар ба калонсолон сабуктар паси сар мекунанд, вале ин гурӯҳ метавонанд интиқолдиҳандаи вирус бошад. Моҳи сентябр таҳқиқот дар бораи муассир будани воксина барои гурӯҳи 2 то 11-солаҳо нашр мешавад. ИМА дар миёни кишварҳое мебошад, ки эмкунӣ дар миёни аҳолиаш бо суръати зуд ба роҳ монда шудааст.

Дипломати амрикоӣ гуфт, омодагиҳо ба мулоқоти Байден ва Путин идома дорад

Акси сохташудаи президентони ИМА ва Русия - Ҷо Байден ва Владимир Путин

Сафири халъи силоҳи ИМА гуфт, ки барои ташкили мулоқоти президентони ИМА ва Русия корҳои омодагӣ ҷараён дорад. Роберт Вуд дар як конфросни СММ рӯзи 11-уми май гуфт, ки Ҷо Байден ва Владимир Путин ба мувофиқа расиданд, ки мавзӯи эътидоли стратегиро дар робита бо созиши назорати силоҳ ва чолишҳои амниятӣ баррасӣ мекунанд. Ӯ гуфт, ки корҳои омодагӣ ба ин мулоқот идома дорад. Вазири хориҷаи Русия Сергей Лавров, ки 11-уми май дар Боку буд, тасдиқ кард, ки Маскав пешниҳод кардааст дар дидори ду раҳбар мавзӯи назорати силоҳ ва масоили амниятӣ баррасӣ шаванд. Ӯ гуфт, ки Маскав интизори посухи Вашингтон дар заминаи ҷузъиёти ин мулоқот мебошад. Байден қаблан гуфта буд, ки интизор дорад моҳи июн дар Аврупо бо ҳамтои русаш дидор хоҳад кард. Пешниҳоди Байден ба Путин ин буд, ки дар қаламрави як кишвари сеюм масоили марбут ба афзоиши таниш дар равобити ду кишвар сари мавзӯи таҳдиди низомӣ ба Украина, ҳамлаҳои рахнагарони эҳтимолии рус ва бархӯрди мақомоти рус ба раҳбари мухолифони Русия Алексей Навалний баррасӣ шаванд.

Дар Эрон сабтиноми довталабони интихоботи президентӣ шурӯъ шуд

Саид Муҳаммад, собиқ мақомдори сипоҳи посдорони инқилоби исломӣ 11-уми май номзадии худро барои ширкат дар интихоботи президентӣ пешбарӣ кард

Дар Эрон сабтиноми номзадҳо ба интихоботи президентӣ шурӯъ шудааст. Омодагиҳо ба интихобот дар ҳолест, ки таниш дар равобит бо Ғарб дар ҳоли афзоиш аст ва ҳам сарнавишти созиши атомии Эрон бо қудратҳои ҷаҳонӣ номаълум боқӣ мемонад. Сабтиноми номзадҳо 11-уми май шурӯъ шуд ва панҷ рӯз давом мекунад. Ҳар номзадро Шӯрои нигаҳбон, як ниҳоди иборат аз рӯҳониёни муҳофизакор аз санҷиш мегузаронанд. Дар гузашта ин ниҳод чандин довталаби мӯътадилро ба сабқат роҳ надода буд. 27-уми май исми ниҳодии довталабони курсии раёсатҷумҳурӣ дар Эрон нашр мешавад ва баъди ин маъракаи 20-рӯзаи таблиғотӣ шурӯъ мешавад. Интихоботи президентӣ 18-уми июн барпо мешавад. Президенти амалкунанда Ҳасани Рӯҳонӣ ҳақи ширкат дар интихоботро надорад.

Байден гуфт, ки дар ҳамлаи рахнагарон ба лӯлаи сӯзишворӣ Русия ҳам ”як андоза масъулият дорад”

Анборҳои сӯзишворӣ дар масири лӯлаи Colonial Pipeline

Президенти ИМА Ҷо Байден рӯзи 10-уми май гуфт, ки дар ҳамлаи ҳакерӣ ё рахнагарон ба лӯлаи таъминкунандаи сӯзишворӣ Русия “як андоза масъулият дорад”. Ин ҳамла кори лӯлаи азими таъминкунандаи маводи сӯхтро дар ИМА фалаҷ кардааст. Айни замон Байден Кремлинро ба таври мустақим айбдор накард. Байден гуфт, ки далели дахолати ҳукумати Русия дар ҳамлаи рахнагарон ба лӯлаи Colonial Pipeline “дар даст нест”, вале шаҳодати он вуҷуд дорад, ки рахнагарон ё нармафзори тамаъкор “дар Русия” истифода шудааст. Байден гуфт, “Онҳо дар истифодаи он як андоза масъулият доранд” ва афзуд, ки ба эҳтимоли зиёд ӯ моҳи июн бо президенти Русия Владимир Путин мулоқот хоҳад кард. Дар вокуниш ба изҳороти Байден сухангӯи Кремлин Дмитрий Песков ба ТАСС гуфт, ки “Русия ҳеҷ дахле ба ин кор надорад”.

Чанде пеш Бюрои федеролии тафтишоти ИМА гуфт, ки ҳамлаи рахнагаронро шабакаи бо номи DarkSide анҷом додааст, ки соли гузашта пайдо шуда, ҳадафаш аз қурбониҳо тамаъ кардани пул мебошад. Коршиносони амнияти интернетӣ мегӯянд, ки эҳтимоли дар Русия ё қаламрави Иттиҳоди Шӯравии пешин ҷойгир будани ин гурӯҳ вуҷуд дорад, чун дар ин ҳавза хадамоти амниятӣ ин гурӯҳҳоро таҳаммул мекунад ва гоҳе ҳатто ба кор мегирад.

Тамоми корхонаҳои давлатии Қирғизистонро дар як сол хусусӣ мекунанд

Омодагиҳо ба хусусигардонии амволи давлатӣ дар Қирғизистон оғоз шуд. Чанде пеш президенти Қирғизистон Содир Ҷабборов пешниҳод кард, ки қисми бештари амволи давлатӣ фурӯхта ва боқӣ дар ихтиёри вазорату идораҳо гузошта шавад.

Дар ҳоли ҳозир дар ихтиёри Бунёди амволи давлатии Қирғизистон, чандин корхона, биноҳои гуногун, нақлиёт ва иншоотҳои дигар мебошад, ки қарор аст, дар давоми як сол хусусӣ шаванд.

"Воқеияти иқтисодӣ нишон дод, ки мудирияти хусусӣ назар ба давлатӣ бештар корсоз аст. Вазифаи мо ин аст, ки корхонаҳои давлатиро бояд бозсозӣ карда, дар оянда ба сармоягузорон диҳем. Хидматрасонӣ дар иншоотҳои стратегиро ҳам бояд ширкатҳои хусусӣ анҷом диҳанд. Бунёди амволи давлатӣ ҳам бояд баъди анҷоми ин корҳо барҳам дода шавад. Амволи давлатие, ки хусусӣ шудани онҳо ғайриимкон аст, бояд дар ихтиёри вазорату кумитаҳои давлатӣ қарор дода шавад", - изҳор дошт Ҷабборов дар ҷараёни ироаи паёмаш ба мардум 5 май.

Як қатор сиёсатмадорон ва фаъолони ҷомеаи мадании Қирғизистон аз ин ташаббуси президент Ҷабборов интиқод карданд. Аз ҷумла, вакили пешини порлумони Қирғизистон Исҳоқ Масалиев гуфт, давлат аз фурӯши амволи худ ҳеч гоҳ ғанӣ нахоҳад шуд.

"Президент гуфт, ки давлат ҳечгоҳ мудири хуб шуда наметавонад. Вале ин давлат аст, ки наметавонад. Кормандон ва раҳбароне, ки дар онҷо кор мекунанд, наметавонанд мудири хуб набошанд. Агар шахсони воқеӣ ширкатҳои барқ ва истгоҳҳои барқу гармидиҳиро хусусӣ гардонанд, ин барои ояндаи давлат хатар дорад. Давлат аз онҳое, ки ин корхонаҳоро раҳбарӣ мекунанд, вобаста хоҳад шуд", - афзуд ӯ.

Раванди ҳисоби амволи давлатӣ дар Қирғизистон солҳои 2014-2015 бо дастури порлумони он кишвар оғоз шуда буд. Ба ин иқдом 50 миллион долларе сарф шудааст, ки Бонки ҷаҳонӣ ҷудо карда буд.

Кӯчарӯбҳои пойтахти Қазоқистон маоши бештар талаб доранд

'Эътирози кӯчарӯбони пойтахти Қазоқистон. 11 май, 2021.

Даҳҳо корманди ширкати "Остона Тозалик", ки бо рубучини кӯчаву хиёбонҳои шаҳри Нурсултон, пойтахти Қазоқистон машғуланд, боло бурдани маошашонро талаб доранд.

Кормандони норозӣ субҳи 11 май дар назди бинои ширкат ҷамъ шуда, гуфтанд, давоми чанд соли ахир маоши онҳо боре баланд карда шудааст. Дар ҳоле ки нарх дар бозорҳои Қазоқистон борҳо боло рафтааст.

"Мо паст будани маошро ҳамеша матраҳ мекунем, вале раҳбарият метарсонад: "агар маош маъқул нест, метавонед аз кор равед", - изҳор дошт яке аз кормандони "Остона Тозалик" Ҳасан Имонбек.

Ба гуфтаи кормандон, моҳонаи онҳо 120 ҳазор танга (наздики 280 доллар) аст, вале баъди пардохти андозу ва дарсади нафақа дар дасташон наздики 90 ҳазор танга мемонад.

Кормандони "Остона Тозалик" баъди мулоқот бо намояндагони шаҳрдории пойтахти Қазоқистон гуфтанд, ба онҳо ваъда дода шудааст, ки дар давоми чанд рӯз ба талабҳояшон расман посух дода мешавад.

Дар ширкати "Остона Тозалик" беш аз ҳазор одам кор мекунад. Ба гуфтаи эътирозгарон, аксари кормандон ба иллати фишори раҳбарият натавонистаанд дар таҷаммуъ иштирок кунанд.

Ҳушдори СҶТ аз фарбеҳшавии кӯдакон дар давраи пандемия  

Дар давраи пандемия маҳдудиятҳои ҳаракат ҷорӣ шуд ва бисёр нафарон, ки аз зиндагии фаъоли серҳаракат дур шуданд, дучори фарбеҳӣ гардиданд

Созмони ҷаҳонии тандурустӣ ҳушдор додааст, ки дар моҳҳои тӯлонии ҷорӣ будани маҳдудиятҳои марбут ба пандемияи коронавирус дар миёни кӯдакони мактабхон мушкили мисли фарбеҳӣ пайдо шудааст ва хатараш дар ин аст, ки паёмадҳои ин мушкил метавонад дарозмуддат боқӣ бимонад.

Гузориши созмон рӯзи 11-уми май нашр шуд. Таҳқиқи СҶТ маълум кардааст, ки баста шудани мактабҳову маҳдудиятҳои марбут ба фаъолиятҳои мухталифи ҷисмонӣ ва худдорӣ аз тарбияи ҷисмонӣ боиси вайрон шудани системаи ҳозима ва боло рафтани вазни кӯдакон шудааст. Ҳанс Клюге, раҳбари барномаҳои аврупоии СҶТ, “яке аз паёмадҳои бисёр нигаронкунандаи COVID-19 барои минтақаи Аврупо зиёдии вазни кӯдакон шавад”. Табибон мегӯянд, ки фарбеҳӣ ё вазни зиёд метавонад боиси бемориҳои дил, диабет ва саратон шавад. Таҳқиқи мутахассисон нишон додааст, ки сеяки кӯдакони 6 то 9-солаи сокини 36 кишвари Аврупо вазни беш аз ҳад доштаанд. Чунин мушкил пештар дар миёни калонсолони сокини ИМА ва Аврупо ҳам мушоҳида шуда буд.

Тирандозӣ дар мактаби Қазон. Хабарҳо аз марги мактаббачаҳо мерасанд. ВИДЕО

Гимназияи рақами 175-уми Қазон ҳоло аз ҷониби сохторҳои қудрати иҳота шудааст

Дар шаҳри Қазон, пойтахти Тотористон дар гимназияи рақами 175 тирандозӣ рух дод. РИА Новости гуфт, ки шумори кушташудаҳо ба 9 нафар баробар шудааст. Хабаргузории ТАСС шуморои кушташудаҳоро то ин замон 7 нафар навишта гуфтааст, ки яке аз онҳо омӯзгор аст. Baza мегӯяд, ки 9 нафар кушта шудааст. Ба ҷои ҳодиса мошинҳои хадамоти ёрии изтирорӣ расидаанд, хонандагонро аз тирезаҳои мактаб наҷот медиҳанд.

РИА Новости гуфт, ки эҳтимолан як ҳамлагар боздошт шудааст. Шояд шумори ҳамлагарон ду-се нафар бошад. Хабаргузории Интерфакс бо такя ба маъмурияти мактаб навиштааст, ки тирандозиро яке аз шогирдони ҳамин мактаб шурӯъ кард. Ӯ бо силоҳ ба синф ворид шуда, ба сӯи ҳамсинфонаш оташ кушод ва ҳадди аққал се нафарро маҷрӯҳ кард.

Дар Чин коҳиши суръати таваллуд мушоҳида мешавад

Зоишгоҳи шаҳри Ҳефеи вилояти Анҳой

Дар Чин суръати таваллуд дар даҳсолаи гузашта камтар шуда, ба ҳисоби миёна 0,53 дарсад дар як солро ташкил додааст. Охири соли 2020 ҳисоб шудааст, ки дар Чин шумори аҳолӣ 1,411 миллиард нафарро ташкил дод ва дар як даҳсолаи гузашта ҳамагӣ 72 миллион нафар афзоиш ёфт. Ин омор назар ба даҳсолаҳои пеш камтар будааст. Бюрои миллии омори Чин рӯзи сешанбе хабар дод, ки соли 2020 камтарин шумори навзодон дар ин кишвар ба дунё омаданд ва баъди соли 1961, ки соли қаҳтиву гуруснагӣ буд, ин камтарин нишондод будааст. Нашрияи амрикоии New-York Times бо такя ба мутахассисони соҳаи демография дар Чин навиштааст, ки коҳиши якбораи таваллуд дар солҳои охир ҳамроҳ бо афзоиши умри аҳолӣ метавонад боиси бӯҳрони демографӣ шавад ва иқтисоди ин кишварро зарба бизанад. Дар Чин ҳар нафари панҷум ё 19 дарсади аҳолӣ аз 60-сола боло ҳастанд. Ин қишри аҳолӣ дар даҳсолаи охир 6 дарсад афзоиш ёфтааст.

Чанд сол пеш мақомот дар Чин сиёсати аз соли 1980 ҷоришуда дар бораи манъи таваллуди беш аз як фарзандро бекор карданд, вале чор соли охир дар ин кишвар коҳиши таваллуди кӯдак мушоҳида мешавад. CNBC мегӯяд, ки соли 2020 мизони таваллуд дар Чин 15 дарсад коҳиш ёфт.

Идомаи хушунатҳо дар Байтулмуқаддас

11 маи соли 2021, Ғазза

Дар идомаи хушунатҳои сангин дар шаҳри Байтулмуқаддас шаби гузашта Исроил ба сӯи Ғазза ҳамлаҳои ҳавоӣ ва ҷангиёни фаластинӣ аз макони зисти мардуми зиёд ҳамлаҳои мушакӣ анҷом доданд. Мақомоти беҳдошти фаластинӣ дар Ғазза гуфтанд, ки 24 нафар, аз ҷумла нӯҳ тифл кушта шуда, беш аз 100 нафар маҷрӯҳ шуданд. Низомиёни исроилӣ гуфтанд, ки шаби дери 10-уми май дар посух ба 200 ҳамлаи мушакӣ аз Ғаззаи зери назари Ҳамос ва дигар гурӯҳҳои ҷангӣ, исроилиҳо 130 ҳадафро зарба заданд. Дар изҳорот гуфта шудааст, ки дар миёни кушташудаҳо 15 нафарашон ҷангиён буданд. Дар шаҳри ҷанубии Ашкелон дар паи асобати мушакҳо ба ду бинои истиқоматӣ шаш нафар маҷрӯҳ шуд.

Салиби Сурхи Фаластин гуфт, аз ин пеш ҳисоб шудааст, ки дар 24 соат задухӯрди миёни эътирозгарони фаластинӣ ва полиси исроилӣ 700 нафар дар қаламрави соҳилҳои Ғарбии рӯди Урдун ва Байтулмуқаддас осеб дидаанд. Полиси Исроил гуфт, ки 21 афсар ва ҳафт фарди мулкии исроилӣ осеб диданд.

Дар паи қарори аз маконҳои зист берун кардани хонаводаҳои фаластинӣ дар Байтулмуқаддаси шарқӣ, ки ҷои онҳоро бояд паноҳандаҳои исроилӣ бигиранд, таниш дар минтақа боло гирифт.

Ёфтҳои бештар

XS
SM
MD
LG