Пайвандҳои дастрасӣ

Хабари нав

Хабарҳо

Вусъат гирифтани таҳқиқи парвандаи Файсал Шаҳзод

Мақомоти Амрикову Покистон мегӯянд, таҳқиқи қазияи Файсал Шаҳзод, шаҳрванди амрикоии покистонитаборро, суръат мебахшанд, ки ӯ бо иттиҳоми бомбгузории нофарҷом дар шаҳри Ню Йорк дастгир шуд. Мақомоти расмии Амрико Файсал Шаҳзодро ба терроризм ва талош барои инфиҷори силоҳи куштори дастаҷамъӣ муттаҳам карданд. Файсал Шаҳзоди 30-сола ба муфаттишон гуфтааст, ки сохтани бомбро ба ӯ дар Покистон дар Вазиристони Ҷанубӣ ёд додаанд. Файсал Шаҳзодро мазнуни аслӣ дар бомбгузории нофарҷом дар майдони Таймсквери Ню Йорк медонанд, ки рӯзи шанбеи гузашта сурат гирифт. Мақомот мегӯянд, саъй доранд, то иртиботи Файсал Шаҳзод бо шабакаҳои хориҷӣ ва нақши унсурҳои хориҷӣ дар тарҳрзии ҳамларо ташхис кунанд. Айни замон дар Покистон ҳам чанд нафарро дар иртибот ба тарҳрезии он ҳамла дастгир кардаанд.

Ҳамаи хабарҳои имрӯзро дар инҷо бихонед

Мақомоти рус гуфтанд, муҳоҷирон бояд воксина бигиранд

Марат Ҳуснуллин, муовини сарвазири Русия

Ширкатҳои сохтмонии Русия барои маблағгузорӣ ва ташкили эмгузаронии муҳоҷирон изҳори омодагӣ кардаанд.

Дар ин бора Марат Ҳуснуллин, муовини сарвазири Русия зимни суҳбат бо шабакаи телевизионии "Русия 24" хабар дод. Ба гуфтаи мақомдори рус, "муҳоҷирон аз Тоҷикистону Узбекистон ва Белорус талабгори кор дар Русия мебошанд. “Мо умедворем, ки онҳо шарти моро оиди гирифтани воксинаи зидди КОВИД-19 мепазиранд."-aфзудааст Ҳуснуллин.

Ҳафтаи гузашта Марат Ҳуснуллин гуфта буд, шароити вуруди муҳоҷироне, ки дар сохтумон кор мекунанд, ба Русия содда ва гирифтани воксина алайҳи коронавирус ҳатмӣ мешавад. Дар пайи ин назар, Владимир Жириновский, раиси Ҳизби либерал-демократи Русия ва як сиёсатмадори миллатгарову пархошгар гуфт, бояд муҳоҷирон дар ватанҳои худашон эм бигиранд ва баъдан ба Русия сафар кунанд.

Муовини пешини раиси дастгоҳи президенти Қирғизистон боздошт шуд

Алмамбет Салиев.

Муовини пешини раиси дастгоҳи президенти Қирғизистон Алмамбет Салиев бо гумони "ҷамъоварии ғайриқонунии сарват" дастгир шуд.

Бино ба фарзияи Кумитаи давлатии амнияти миллии Қирғизистон, Салиев аз пуштибонии президенти собиқи он кишвар Сооронбек Ҷеенбеков сӯистифода карда, ба кори низоми додгоҳӣ, мақомоти ҳифзи ҳуқуқ, ниҳодҳои давлатӣ дахолат ва аз "манфиатҳои ширкатҳои хусусӣ бар зарари давлат" ҳимоят мекардааст.

Ҳамчунин Салиев дар давраи фаъолияташ ба ҳайси хидматчии давлатӣ амволеро ҷамъоварӣ карда, ки гӯё бо даромади расмии ӯ созгор нестанд. Ӯ пулҳои худро дар як ширкати сохтмонӣ ва бунёди баландошёнаҳои зист дар Қирғизистон сармоягузорӣ мекардааст.

Алмамбет Салиевро Сооронбой Ҷеенбеков 11 декабри соли 2017 муовини раиси дастгоҳи президенти Қирғизистон таъйин карда буд. Вале ӯ моҳи октябри соли 2020 бо фармони иҷрокунандаи вазифаҳои президенти Қирғизистон Содир Ҷабборов аз мақомаш барканор гашт.

Хатмкунандагонро дар Туркманистон аз мактаб ба артиш бурданд

Ишқобод, Туркманистон.

Дар мактабҳои шаҳри Ишқободи Туркманистон хатмкунандагонеро, ки ба синни 18 расидаанд, аз дохили мактаб мустақиман ба артиш бурданд.

Ба иттилои як манбаъ, рӯзи 15-уми июн дар мактабҳои Ишқобод имтиҳонҳои хатм ба поён расид ва хатмкардаҳоро дар ҳалқаи кормандони пулис мустақиман аз мактаб ба артиш бурданд.

Бархе аз хонандагони дигар, ки тавонистанд, баъди супоридани имтиҳон ба хонаҳояшон раванд, кормандони комисариатҳои ҳарбӣ ба манзилҳояшон рафта, аз волидонашон талаб кардаанд, ки фарзандонашон ба артиш баранд.

Ба иттилои расмӣ, дар Туркманистон ҳамасола наздики 100 ҳазор кас мактабро хатм мекунад.

Довари тоҷик дар Бозиҳои олимпӣ Токио-2020 ҳакамӣ мекунад

Довари тоҷик Мансур Муҳиддинов (дар байн).

Мансур Муҳиддинов, довари дараҷаи байналмилалӣ дар риштаи муштзанӣ, мусобиқоти бокс дар Бозиҳои олимпии Токио-2020-ро ҳакамӣ мекунад. Кумитаи олимпии Тоҷикистон гуфт, ин бори аввал аввал аст, ки як намояндаи Тоҷикистон дар Бозиҳои олимпӣ доварӣ мекунад.

Ба иттилои манбаъ, Мансур Муҳиддинов аз тарафи гурӯҳи вижаи Кумитаи байналмилалии олимпӣ оид ба бокс ба мусобиқаҳои интихобии олимпии Африқо ва Аврупо даъват шуд. Ӯро дар баробари 36 нафар ба Бозиҳои олимпӣ-2020 даъват карданд. Аз кишварҳои Иттиҳоди Давлатҳои Мустақил ба ҷуз Мансур Муҳиддинов инчунин намояндагони Русия, Украина, Озарбойҷон ва Қазоқистон барои доварии ин мусобиқот даъват шудаанд.

Мансур Муҳиддинов соли 1977 таваллуд шуда, аз соли 1991 ба бокс машғул мебошад. 10 сол варзишгар, аз ҷумла 5 сол узви дастаи мунтахаби кишвар оид ба бокс буд ва ҷоизадори бисёр мусобиқаҳои байналмилалӣ аст.

Аз соли 2001 ба кори мураббигӣ ва доварӣ гузашт. Соли 2010 ситораи дараҷаи 1-и Ассотсиатсияи байналмилалии бокси ҳаваскориро (AIBA) гирифт. Пас аз ҳафт сол имтиҳон супорида, ситораи дараҷаи 2 ва соли 2018 ситораи дараҷаи 3 (довари дараҷаи олимпӣ)-ро ба даст овард.

Дар Бишкек ба далели бадшавии вазъи беҳдоштӣ дубора маҳдудият ҷорӣ мешавад

Шаҳри Бишкек.

Дар шаҳри Бишкеки Қирғизистон шуруъ аз 17-уми июн фаъолияти муассисаҳои дилхушӣ ва тарабхонаҳо маҳдуд мешавад.

Аз шаҳрдории Бишкек гуфтанд, клубҳои шабона, тарабхонаҳо, каҳвахонаҳо ва дигар муассисаҳои дилхушӣ аз соати 23 то 7 субҳ баста мешаванд. Ин маҳдудият то беҳшавии вазъи беҳдоштӣ давом мекунад.

Дар Қирғизистон ҳафтаҳои охир омори гирифторон ба COVID-19 якбора меафзояд. Рӯзи 16 июн дар он кишвар 647 ҳолати нави гирифторӣ сабт шуд. Чунин теъдод аз моҳи июли соли гузашта то ба ин ҷониб сабт нагардида буд.

Вазорати ҳифзи тандурустии Қирғизистон хабар дод, ки дар ин кишвар мавҷи севуми вабои коронавирус идома дорад. Мавҷи дувумро Қирғизистон тирамоҳи соли 2020 пушти сар карда буд. Ба иттилои мақомоти он кишвар, мавҷи аввали вабои коронавирус моҳи июли соли 2020 ба анҷом расида буд.

Дар тамоми муддати вабои коронавирус дар Қирғизистон 111 990 ҳолати гирифторӣ ва 1912 ҳолати марг аз ин вабо сабт шудааст.

Вазири энержии Қирғизистон пешниҳоди фурӯши об ба ҳамсояҳоро шарҳ дод

Нерӯгоҳи "Тоқтогул" дар вилояти Ӯш.

Вазири энержӣ ва саноати Қирғизистон Доскул Бекмурзоев дар суҳбат бо рӯзноманигорон пешниҳоди фурӯши об ба ҳамсоякишварҳоро шарҳ дод.

Бекмурзоев 16 июн дар ҷараёни сафари корӣ ё худ пресс-тур ба неругоҳҳои Тоқтогул ва Қамбарато гуфт, ки Қирғизистон бо Қазоқистону Узбекистон дар мавриди табодули нерӯи барқ ба созиш расидаанд.

"Мо аз 1 июн то 1 сентябр барқро бармегардонем. Табиист, ки дар ин давра истеҳсоли нерӯи барқ ва партофтани об афзоиш меёбад. Бинобар ин, хоҳиш мекунем, аз айбдоркуниҳо дар фурӯши об худдорӣ кунед. Энергетикҳо ҳечгоҳ обро нафурӯхтаанд ва нахоҳанд фурӯхт", - изҳор дошт вазири энержии Қирғизистон.

Ӯ дар посух ба суоли рӯзноманигорон, ки оё дар зимистони оянда интиқоли нерӯи барқ ба сокинони ин кишвар маҳдуд мешавад, ё не, гуфт, "Худо хоҳад, намешавад".

Дар ғарби Қазоқистон як сарбоз худро парронд

Артиши Қазоқистон. Акс аз бойгонӣ.

Дар шаҳри Урали Қазоқистон як сарбоз аз захми тире фавтид, ки ба эҳтимоли зиёд худ ба сараш холӣ карда буд.

Жанибек Сарсенов, як масъули қисми низомие, ки ҳодисаи мазкур онҷо рух дод, гуфт, сарбоз худро субҳи 16-уми июн захмӣ кардааст. "Ӯро ба беморхона бурдем, аммо наҷот додан имкон нашуд", - гуфт Сарсенов.

Аз рӯи ин ҳодиса тафтишот идома дорад.

Дар Қазоқистон маргу мири сарбозон ҳодисаи нодир нест. Моҳи майи соли ҷорӣ як сарбози дигар дар вилояти Ҷамбил фавтид. Мақомоти вазорати мудофиаи Қазоқистон гуфтанд, вай худро аз ошёнаи чаҳорум ба замин партофтааст.

Сокинони Қазоқистон мегӯянд, дар артиши ин кишвар сарбозозорӣ ҷой дорад.

Ҷо Байден гуфт, ҳар чизе мехост, бо Путин дар миён гузошт

Ҷо Байден дар Женева

Ҷо Байден, президенти ИМА дар нишасти матбуотии худ гуфт, ки бо Путин мавзуи Афғонистон, Украина, Беларус ва ҳуқуқи башарро баҳс кардааст.

Владимир Путин, президенти Русия ва Ҷо Байден, президенти ИМА рӯзи 16-уми июн зиёда аз се соат суҳбат карданд, вале ҷонибҳо дар алоҳидагӣ нишасти матуботӣ баргузор намуданд.

“Ман ва президент Путин масъулияти бузург дорем. Мо ихтилофҳо дорем, аммо мо бояд муносибати устувор дошта бошем.”, - таъкид кард ӯ. "Ман ба Путин гуфтам, ки вазифаи ман на зарар расонидан ба Русия, балки ҳимояи мардуми Амрико аст." Бо вуҷуди ин, ба гуфтаи Байден, ӯ дар бораи Алексей Навалний ва шаҳрвандони Амрико, ки дар зиндонҳои Русия ҳастанд, суҳбат карда, изҳор доштааст, ки аз ҳаққи онҳо ҳимоят мекунад.

"Ман ба ӯ гуфтам, ки чӣ тавр ҳамчун президенти ИМА дар баробари нақзи ҳуқуқи инсон хомӯш бимонам?”,--гуфт ӯ.

Инчунин, Байден гуфт, ки бо Путин масъалаи ҳамлаи киберӣ ба ширкатҳои амрикоӣ ва ҳамчунин дар бораи Беларус, Украина ва Афғонистон низ суҳбат карданд.

"Русия низ ба Афғонистони бидуни террористҳо манфиатдор аст”,--гуфт ӯ.

"Ман он чизеро кардам, ки бояд мекардам. Аввалан соҳаҳое, ки мо метавонем дар он ҳамкорӣ кунем, муайян кардам. Дуюм масъала шахсан вохӯрдан буд. Сеюм ин буд, ки мавқеи худро равшан кунам. Ман бо чизе розӣ набудам, гуфтам. Ӯ ҳам бо чизе розӣ набуд гуфт”,--зикр кард Байден.

Мулоқоти нахустини раиси ҷумҳуриҳои ИМА ва Русия – Ҷо Байден ва Владимир Путин дар Женева дар ҳоле баргузор шуд, ки равобити ин ду кишвар аз замони Ҷанги сард дар поинтарин сатҳ қарор дошта, моҳе пеш Байден дар як мусоҳибааш гуфт, бовар дорад, ки ҳамкори русаш як “қотил” аст. Мулоқоти ҷонибҳо зиёда аз се соат давом кард, ки беш аз ду соаташ суҳбати рӯ ба рӯ буд.

Путин мулоқот бо Байденро "созанда" номид

Ҷо Байден, президенти ИМА ва Владимир Путин, президенти Русия

Владимир Путин, президенти Русия дар нишасти матбуотӣ гуфт, ки дар мулоқот бо Ҷо Байден, президенти ИМА масъалаи кори сафирони ду кишвар дар Вашингтон ва Маскав ҳал шудааст.

Дар шаҳри Женеваи Шветсария ду президент беш аз 90 дақиқа бо ҳам суҳбат карданд.

Ду кишвар бо ҳам танишҳои дипломатӣ доштанд ва сафирони худро бозпас хонда буданд. Путин гуфт, ин “масъала ҳал шуд.”

Пас аз ҳодисаи заҳролудсозии Алексей Навалний, мухолифи ҳукумати Русия ва ошкор шудани ҳолатҳои даст доштани Русия дар таркиши анбори силоҳ дар Чехия ИМА нисбат ба Русия таҳрим эълон кард. Дар навбати худ Русия Амрикоро ба рӯйхати кишварҳое ворид кард, ки “дӯсти ин кишвар нестанд”.

“Мо бо ӯ чашм ба чашм ду соат суҳбат кардем. На бо ҳама раҳбарон чунин мулоқот кардаем. Дар мулоқот фазои душманӣ набуд. Вохӯрӣ ба таври принсипӣ сурат гирифт, мавқеъҳои мо ба ҳам мувофиқат намекунад, аммо мулоқот хеле созанда буд,”-- гуфт Владимир Путин.

Путин тасдиқ кард, ки ду раҳбар масъалаи Украина, Навалний ва ҳуқуқи инсонро низ баҳс кардаанд.

Путин гуфт, ки президенти ИМА ӯро ба Қасри Сафед даъват накард ва ӯ низ аз Байден нахост, ки ба Русия сафар намояд.

Ӯ ҳамчунин Фонди мубориза бо фасоди Навалнийро “ташкилоти экстремистӣ” ном бурд.

"Ин созмон ошкоро ба бетартибиҳои оммавӣ даъват кард, ба ин ноболиғонро ҷалб намуд, ки дар Русия манъ аст, тарзи таҳияи “Коктейл Молотова”-ро пешниҳод кард ва маълумоти шахсии кормандони пулисро паҳн кард.”,--гуфт Путин.

Пас аз ин Путин аз эътирозҳои оммавии рухдода дар ИМА, ки пас аз марги Ҷорҷ Флойид, як африқоитабори амрикоӣ, ки ҳангоми боздошти пулис фавтид, ёд кард. Ӯ гуфт: “Мо намехоҳем, ки дар кишвари мо чунин рух диҳад ва ҳама корро мекунем, то ба ин роҳ надиҳем”.

Дар ибтидо мулоқоти ҷонибҳо дар як доираи маҳдуд, бо иштироки Сергей Лавров, вазири умури хориҷии Русия ва Энтони Блинкен, вазири умури хориҷии Амрико баргузор шуд.

Суҳбатҳои ду президент дар Вилла де ла Гранжеи шаҳри Женеваи Шветсария рӯзи 16-уми июн баргузор шуд.

Мулоқоти рӯ ба рӯи Байдену Путин 90 дақиқа идома кард

Женева, Вилла де ла Гранже

Мулоқоти нахустини раиси ҷумҳуриҳои ИМА ва Русия – Ҷо Байден ва Владимир Путин дар Женева дар ҳоле баргузор мешавад, ки равобити ин ду кишвар аз замони Ҷанги сард дар поинтарин сатҳ қарор дошта, моҳе пеш Байден дар як мусоҳибааш гуфт, бовар дорад, ки ҳамкори русаш як қотил аст.

Бахши аввали сӯҳбатҳои ду президент, ки дар Вилла де ла Гранжеи шаҳри Женева баргузор шуд, 90 дақиқа тӯл кашид. Дар ин нишаст инчунин котиби давлатӣ Энтони Блинкен ва вазири хориҷаи Русия Сергей Лавров ба шумули тарҷумонҳо иштирок карданд. Байден гуфт, ба мулоқоте меравад, ки онро як сӯҳбати “ду қудрат” номид ва гуфт, ки “ҳамеша беҳтар аст, ки рӯ ба рӯ сӯҳбат кунем”. Путин дар навбати худ гуфт, умедвор аст, ки ин мулоқот “бомаҳсул” мешавад.

Баъди ин мулоқот қарор аст ду ҷаласаи дигаре барпо шавад, ки дар он инчунин дигар намояндагони ҳукуматҳо иштирок хоҳанд кард.

Аз ҷониби ИМА дар ҷаласати васеъ қарор аст Блинкен, инчунин мушовири амнияти миллӣ Ҷейк Салливан, муовини котиби давлатӣ дар умури сиёсӣ Виктория Нуланд, сафири ИМА дар Русия Ҷон Салливан ва ду мутахассиси Русия аз Шӯрои амнияти миллӣ – Эрик Грин ва Стергос Калоудис иштирок кунанд.

Аз ҷониби Русия дар ҷаласаи васеъ Лавров, мушовири умури сиёсии президент Юрий Ушаков, муовини вазири хориҷӣ Сергей Рябков, раиси ситоди кулли артиши Русия генерал Валерий Герасимов, сафири Русия дар Вашингтон Анатолий Антонов, фиристодаҳои Кремлин дар Украинаву Сурия ва сухангӯ Дмитрий Песков ҳузур хоҳанд дошт.

Ин мулоқот дар шароите барпо мешавад, ки Путин ҳамоно тамоми қудратро дар Русия дар дасти худ нигаҳ дошта, созмонҳои ҷамъиятиро буғӣ мекунаду мухолифони мисли Алексей Навалнийро ба зиндон андохтааст.

Як сухангӯи Байден гуфт, ки Кохи Сафед “на дар андешаи азсаргирии робитаҳо ва на дар фикри шиддат бахшидани онҳо мебошад”. Айни замон, Байден дар қиёс бо президенти пешин Доналд Трамп аз мавзеъгирии шадидтар кор мегирад. Аз замони сари кор омаданаш то кунун Байден аллакай ба Русия ду дафъа таҳрими иқтисодӣ ҷорӣ кард. Дар ҳамин ҳол, ӯ розӣ шуд, ки созишномаи боздорандаи силоҳ бо ИМА тамдид шавад ва ҳам барои бунёди лӯлаи гази “Северный поток-2” монеъ нашуд.

Барои Путин ин мулоқот аз қабили гуфтугӯҳо бо “қудратҳои ҷаҳонӣ” буда, давраҳои шӯравиро ба ёд меорад, ки раҳбари СССР бо раҳбари ИМА ба мулоқоте мерафт, ки аҳамияти ҷаҳонӣ касб мекард.

Дар миёни масоили мавриди баррасӣ назорати силоҳ, ҳамлаҳои рахнагарон, ҷосусӣ, тағйироти иқлим ва муқобила бо COVID-19 мебошад.

Шурӯи мулоқоти нахустини президентони ИМА ва Русия дар Женева

Женева, мулоқоти Ҷо Байден ва Владимир Путин шурӯъ шуд

Дар шароите, ки равобити ИМА ва Русия дар поинтарин сатҳ аз замони Ҷанги Сард қарор дорад, президентони ду кишвар аввалин мулоқоти худро барпо мекунанд. Як моҳ пеш аз ин Ҷо Байден гуфт, ки бовар дорад Владимир Путин “як қотил” аст.

Мулоқоти рӯзи 16-уми июн дар беруни Вилла де ла Гранже бо истиқболи президенти Швейсария Гай Пармелин шурӯъ шуд ва ӯ ба ҳарду нафар “як гуфтугӯи пурсамаре” таманно намуд. Ҳарду президент баъди ин дасти ҳамро фишурда барои муколама ба дарун даромаданд. Дар аввалин мулоқоти ду раҳбар онҳоро котиби давлатии ИМА Энтони Блинкен ва вазири хориҷаи Русия Сергей Лавров ба иловаи тарҷумонҳо ҳамроҳӣ мекунанд. Дар қисми баъдии сӯҳбатҳо ба онҳо мушовирону дигар мақомот ҳамроҳ мешаванд.

Ин мулоқот дар шароите барпо мешавад, ки Путин ҳамоно тамоми қудратро дар Русия дар дасти худ нигаҳ дошта, созмонҳои ҷамъиятиро буғӣ мекунаду мухолифони мисли Алексей Навалнийро ба зиндон андохтааст.

Як сухангӯи Байден гуфт, ки Кохи Сафед “на дар андешаи азсаргирии робитаҳо ва на дар фикри шиддат бахшидани онҳо мебошад”. Айни замон, Байден дар қиёс бо президенти пешин Доналд Трамп аз мавзеъгирии шадидтар кор мегирад. Аз замони сари кор омаданаш то кунун Байден аллакай ба Русия ду дафъа таҳрими иқтисодӣ ҷорӣ кард. Дар ҳамин ҳол, ӯ розӣ шуд, ки созишномаи боздорандаи силоҳ бо ИМА тамдид шавад ва ҳам барои бунёди лӯлаи гази “Северный поток-2” монеъ нашуд.

Барои Путин ин мулоқот аз қабили гуфтугӯҳо бо “қудратҳои ҷаҳонӣ” буда, давраҳои шӯравиро ба ёд меорад, ки раҳбари СССР бо раҳбари ИМА ба мулоқоте мерафт, ки аҳамияти ҷаҳонӣ касб мекард.

Дар миёни масоили мавриди баррасӣ назорати силоҳ, ҳамлаҳои рахнагарон, ҷосусӣ, тағйироти иқлим ва муқобила бо COVID-19 мебошад.

Украина як зану ҳафт фарзандашро аз қароргоҳи Рож баргардонид

Аминаву ҳафт фарзандашро ба Украина баргардониданд

Ҳукумати Украина як занеро бо ҳафт фарзандаш аз Сурия ба ватан баргардонид. Дар ин бора рӯзи 16-уми июн як хабарнигори Радиои Аврупои Озод/Радиои Озодӣ аз марзи Сурияву Ироқ хабар дод. Мақомот гуфтанд, ки амалиёти мазкурро ҳукумати Киев бо ёрии мақомоти минтақаи нимамухтори Курдистони Ироқ созмон додааст. Ин оила аз соли 2019 дар қароргоҳи Рожи шимолушарқи Сурия дар боздошт буд. Зан, ки худро дар сӯҳбат бо РАО/РО бо исми Амина муаррифӣ кард, дар гузашта сокини Қрим буд ва баъди ишғоли ғайриқонунии нимҷазира аз ҷониби Русия моҳҳои феврал-марти соли 2014 ин минтақаро тарк кард. Пеш аз сафар ба Сурия ин зан дар шаҳри Лвов зиндагӣ кардааст. Амина гуфт, “аз ҳукумати Украина бисёр миннатдорам, ки моро фаромӯш накард ва ба ватан баргардонид”.

Мақомот гуфтанд, ки санадҳои Аминаву фарзандонашро барқарор мекунанд.

Вадим Скибитский, сухангӯи сарраёсати иттилооти Вазорати дифои Украина гуфт, “муҳим аст, ки ин зану кӯдаконаш ба ҳаёти маъмулӣ баргарданд”.

Аз моҳи декабри соли 2020 ба ин сӯ ин бори дуюм аст, ки ҳукумати Украина шаҳрвандонашро аз манотиқи собиқ зери назари гурӯҳи мамнӯи “Давлати исломӣ” бармегардонад. Бори аввал ду зани украиниву ҳафт фарзандашон баъди он ки тафтиш даст надоштани онҳоро ба “фаъолитяҳои террористӣ” собит кард, ба Украина баргардонид.

Қаблан созмони Human Rights Watch аз ҳукумати Украина тақозо кард, ки дар бозгардони тахминан 40 зан ва кӯдаки украинӣ, ки ба навиштааш, дар Рож ва Ал-Ҳол дар шароити “даҳшатнок” ва “ғайриқонунӣ” нигоҳ дошта мешаванд, иқдом кунад. Хурдтарини кӯдакон дусола будааст.

Ин занон бахше аз 43 ҳазор хориҷиҳое мебошанд, ки бо иттиҳоми доштани иртибот бо гурӯҳи “Давлати исломӣ” аз ҷониби мақомоти минтақавӣ боздошт шудаанд.

Бисёр ҳукуматҳое, ки шаҳрвандонашон дар ин қароргоҳҳо нигаҳдорӣ мешаванд, мегӯянд, ки бозгардони онҳо ба ватан хатарҳои амниятӣ дорад.

Яке аз ин кишварҳо Тоҷикистон аст, ки ҳанӯз барои баргардонидани занону кӯдакон аз ин урудгоҳҳо шитоб намекунад.

Журналисти беларус барандаи ҷоизаи озодии матбуот шуд

19 маи соли 2021. Катерина Борисевич баъди озод шудан аз зиндон дар Комаровка

Кумитаи дифоъ аз журналистон гуфт, ки соли 2021 журналисти беларус Катерина Борисевич яке аз чор барандаи ҷоизаи “ҷасорат”-и ин ниҳод мешавад. Созмони воқеъ дар Ню-Йорк рӯзи 15-уми июн гуфт, ки Борисевич ва се журналисти дигар аз Гватемала, Мозамбик ва Мянмар барои гузоришдиҳиашон дар “шароити ноустувори сиёсӣ, пӯшиши хабарии эътирозҳо ва таҳаввулоти кишварҳояшон” қадрдонӣ мешаванд. Борисевич журналисти расонаи маъруфи Tut.by аст, ки то ҳол чандин кормандаш барои пӯшиши хабарии эътирозҳои пасоинтихоботии зидди раҳбари худкома Александр Лукашенко боздошту азият шудаанд. Ӯ барои гузоришҳояш дар бораи марги эътирозгар Роман Бондаренко шаш моҳро дар зиндон пуштисар кард.

Дар гузоришҳои Борисевич зидду нақизиҳои маълумоти расмӣ ва воқеии сабабҳои марги ин сокини Беларус бо ҷузъиёташ зикр шудааст. Мақомот гуфтаанд, ки ӯ ҳангоми марг маст буд, вале сабаби воқеии марги Роман Бондаренко шиканҷаву латукӯб номида шудааст. Ҷоизаҳои журналистон моҳи ноябр дар як маросим тақдим мешаванд.

Ҳукумати Байден ҷонибдори ҳукми қатли Ҷавҳар Тсарнаев аст

Ҷавҳар Тсарнаев барои нақшаш дар таркиши марафони Бостон дар соли 2015 ба ҳукми марг маҳкум шудааст

Маъмурияти президент Ҷо Байден аз Додгоҳи олии ИМА тақозо дорад, ки ҳукми марги бомбгузори марафони Бостон Ҷавҳар Тсарнаев нигаҳ дошта шавад. Ҳуқуқшиносони вазорати адлия дар матни санадҳое, ки ҳафтаи гузашта ба додгоҳ ирсол кардаанд, мегӯянд, қазияи Тсарнаев яке аз парвандаҳои бисёр муҳими марбут ба терроризм дар таърихи ИМА мебошад. Онҳо даъво доранд, ки қарори додгоҳи зинаи поёнӣ, ки ҳукми марги Тсарнаеви 27-соларо бо ҳукми додгоҳи тӯлонӣ иваз кард, хато буд.

Тсарнаев як ҷавони чечентабор аст, ки дар Қирғизистон таваллуд шуда, соли 2015 дар куштори се ва маҷрӯҳ шудани садҳо ширкатдори марафони Бостон дар соли 2013 гунаҳгор дониста шуд. Баъди чанд рӯзи бомбгузории марафон бародари ӯ Тамерлан Тсарнаев дар як задухӯрд бо полис кушта шуд.

Тими дифоӣ эътироф кард, ки ин ду бародар масъули бомбгузории марафон буданд, дар ҳоле, ки Тамерлан ба ҳайси иҷрокунандаи ифротишудаи ин ҷиноят буда, Ҷавҳар бародари хурдии таҳти таъсири эҳсосот монда қаламдод шудааст. Вале додситонҳо гуфтанд, ки гуноҳи Ҷавҳар камтар нест ва ӯ ИМА-ро барои ҷангҳое, ки дар кишварҳои мусалмонӣ пеш мебурд, ҷазо додан мехост.

Додгоҳи олии ИМА моҳи март розӣ шуд, ки бозбинии парвандаи Тсарнаевро, ки ҳанӯз замони президенти пешин Доналд Трамп шурӯъ шуда буд, пеш барад.

Ҳукми додгоҳ барои Байден, ки гуфтааст, мухолифи иҷрои ҳукмҳои қатл мебошад, баҳсбарангез хоҳад шуд. Эндрю Бейтс, сухангӯи Кохи Сафед ба “соҳибихтиёрӣ"-и вазорати адлия дар арзёбии ҳукми қатл ишора кард. Вале Бейтс гуфт, ки президент “бовар дорад, ки вазорати адлия бояд ба таҷрибаи пешинаи иҷро накардани ҳукмҳои марг баргардад”.

Дар Узбекистон ширкатдорони анҷумани ҳизби "Эрк"-ро ба бозпурсӣ даъват карданд

Логои Ҳизби сиёсии "Эрк".

Ширкатдорони анҷумани ҳизби сиёсии "Эрк" ё "Ирода"-ро дар Узбекистон ба бозпурсӣ даъват карданд. Анҷумани ҳизб дар манзили овозхон Ҷаҳонгир Отаҷонов дар шаҳри Тошканд сурат гирифт. Ширкатдорони анҷуман рӯзи 15 июн бозпурсӣ шуданд.

Абдусалом Эргашев, яке аз фаъолони ҳизби "Эрк" гуфт, ӯро дар доираи парвандаи ҷанҷол дар манзили Отаҷонов ба бозпурсӣ даъват, аммо асосан дар бораи фаъолияти ҳизб бозпурсӣ кардаанд.

Рӯзи 26 майи соли ҷорӣ дар манзили Отаҷонов дар шаҳри Тошканд анҷумани ҳизби "Эрк" баргузор ва Ҷаҳонгир Отаҷонов ба ҳайси номзад дар интихоботи президентии Узбекистон пешбарӣ шуд.

Отаҷонов низ рӯзи 13 июн дар шабакаҳои иҷтимоӣ хабар дод, ки ӯро низ ба бозпурсӣ даъват ва 4 соат бозпурсӣ кардаанд.

Отаҷонов ҳамчунин навишт, ки ӯро таъқиб ва телефонашро гӯш мекунанд. Овозхони ҳамакнун пешин мегӯяд, амволашро ба ҳабс гирифтаанд. Вай ҳамаи ин таъқибҳоро ба эъломи ширкат дар интихоботи президентӣ рабт медиҳад.

Рӯзе ки дар манзили Отаҷонов анҷуман баргузор мешуд, гуруҳе аз занону мардон вориди манзили вай шуда, ҷанҷол роҳандозӣ карданд.

Дар назар аст интихоботи президентӣ дар Узбекистон рӯзи 24 октябр баргузор шавад. Бино ба қонунгузории он кишвар, танҳо ҳизбҳои сиёсӣ ҳаққи пешбарии номзадро доранд.

Таҷаммуи сокинони норозӣ дар назди Додгоҳи олии Қазоқистон

Назди Додгоҳи олии Қазоқистон. 16 июн, 2021.

Як гуруҳи сокинони Қазоқистон, ки аз ҳукми додгоҳҳо норозӣ ҳастанд, шаби гузаштаро дар назди бинои Додгоҳи олии он кишвар дар шаҳри Нурсултон рӯз карданд.

Ин гуруҳи шаҳрвандони Қазоқистон (25 кас), ки аз навоҳии гуногун бо талаби бекор кардани "қарорҳои ноодилонаи додгоҳӣ" ба пойтахт рафтаанд, мегӯянд, то раиси Додгоҳи олии он кишвар Жакип Асанов онҳоро ба ҳузур напазирад, пароканда нахоҳанд шуд.

"Мо аз соати 11-и субҳи сешанбе инҷоем. Бигузор, Асанов моро қабул кунад. Мо шабро инҷо рӯз кардем", - гуфт сокини норозии Қазоқистон Мадина Кукетаева.

Ба гуфтаи ӯ, дар миёни онҳо сокиноне низ ҳастанд, ки бо талаби лағви қарорҳои додгоҳӣ аз шаҳрҳои Алмато, Қарағанда, Чимкент, Атирау, Оқтеппа ва Урал ба пойтахти Қазоқистон рафтаанд.

​Шикояти таҷаммуъкунандагон дар назди Додгоҳи олии Қазоқистон гуногун аст. Онҳо талаб доранд, ки парвандаҳои марбут ба наздиконашон дубора баррасӣ ва ҳукми додгоҳҳо бозбинӣ шавад.

HRW аз Ереван хост, ки раҳбари язидиҳоро аз пайгарди ҷиноӣ озод кунад

Фаъолони ҷамъиятии язидиҳои Арманистон - Борис Мурази (аз чап) ва Сашик Султониён (аз рост). Акс аз соли 2014

Созмони дидбони ҳуқуқи башар Human Rights Watch (HRW) аз мақомоти Арманистон тақозо кард, ки иттиҳоми “барангехтани адовати миллӣ”-ро аз парвандаи фаъоли язидиҳо Сашик Султониён бардоранд. Дар изҳороти рӯзи 16-уми июни HRW омадааст, ки иттиҳомоти зидди Султониён “қассосгирӣ” барои як мусоҳибааш дар бораи мушкилоти ҷомеаи язидӣ дар Арманистон мебошад. Язидиҳо, ки аксарашон бо як навъ лаҳҷаи курдӣ сӯҳбат мекунанд, дини худро доранд, ки аз омехтаҳои намунаҳои суннатҳои мазҳабии масеҳиён, зардуштиён ва мусалмонон мебошад.

Гиорги Гогиа, як намояндаи бахши Аврупову Осиёи Марказӣ дар созмони Human Rights Watch гуфт, ки назари Султониён метавонад барои бисёр сокинони Арманистон нохушоянд бошад, вале гуфтаҳои ӯ ба чаҳорчӯби суханроние дар доираи қонун мутобиқат мекунад. Ӯ гуфт, ки мақомоти Арманистон бояд билофосила Султониёнро аз ин иттиҳомҳо раҳо кунанд ва бигузоранд, ки фаъолиятҳои худро дар амри ҳимоят аз ҳуқуқи инсон идома диҳад.

Султониён раҳбари Маркази язидӣ барои ҳуқуқи инсон аст, ки аз соли 2018 дар самти боло бурдани сатҳи огаҳии мардум дар масоили мубориза бо коррупсия кор мекунад. Дар мусоҳибае, ки октябри соли 2020 нашр шуд, Султониён гуфт, ки язидиҳӣ дар Арманистон бо табъйиз рӯбарӯ ҳастанд, ба забони худ таҳсил карда наметавонанд ва ҳам дар корбурди забону фарҳангашон ҳам мушкил доранд.

Дар Арманистон тахминан 40 ҳазор язидӣ ба сар мебарад, шумори умумии намояндагони ин халқ дар Ховари Миёна ба 1,5 миллион нафар мерасад.

Барандаи ТВ Беларус "ба ҷои амн" фирор кард

Валерина Кустова

Як барандаи телевизион ва шоираи беларусӣ Валерина Кустова баъди он ки ӯро дар ду ҳолати нақзи Кодекси ҷиноӣ гунаҳгор карданд, аз кишвар фирор кард. Кустова яке дигар аз нафароне мебошад, ки барои интиқодаш аз интихоботи президентии Беларус ва саркӯбҳои идомаёбандаи ширкатдорони эътирозҳо мавриди ҳадаф қарор мегирад. Кустова рӯзи 15 феврал дар саҳифаи худ дар Фейсбук навишт, ки ӯву духтари дусолааш “ҳоло дар макони амн” ҳастанд.

Кустова чанде пеш хабар дод, ки полис хонаи ӯро кофтукоб карда дарҳояшро баст, аз ин рӯ дигар ба хонааш ворид шуда наметавонист.

Пирӯзии раҳбари худкома Александр Лукашенко дар интихоботи августи порсол мояи эътирози даҳҳо ҳазор сокини Беларус шуд. Талаби онҳо истеъфои Лукашенко ва даъвати интихоботи нав аст, чун бовар доранд, ки натиҷаҳо тақаллуб шуд. Мақомот ба ин талабот бо саркӯбу ҳабсу шиканҷа посух доданд.

Муҳсин Меҳрализода аз ширкат дар интихоботи Эрон даст кашид

Муҳсин Меҳрализода яке аз ду номзади ислоҳталабон аст, ки барои ширкат дар интихобот роҳ дода шуд

Як номзади ислоҳотхоҳи эронӣ, ки нахуст хост дар интихоботи президентии 18-уми июн ширкат кунад, аз рақобат даст кашид. Матбуоти Эрон хабар дод, ки Муҳсин Меҳрализодаи 64-сола, собиқ муовини президенти Эрон дар охирин рӯзи таблиғоти интихоботӣ номзадиашро пас кашид.

Меҳрализода яке аз ду ислоҳталабон буд, ки барои ширкат дар маъракаи интихоботӣ иҷоза гирифт. Ҳанӯз маълум нест, ки чаро Меҳрализода фикрашро дигар кард.

Қарор аст президенти амалкунанда Ҳасани Рӯҳонӣ бо ҳамин давраи дуюми раёсатҷумҳуриашро дар ин кишвар ба анҷом расонад. Ҳамакнун дар интихоботи Эрон шаш номзад рақобат мекунанд ва аксарият бовар доранд, ки дар асл як намояндаи муҳофизакорон - раҳбари додгоҳи олии Эрон Иброҳими Раисӣ баранда хоҳад шуд.

Раисӣ, ки аз нафарони наздик ба раҳбари олии Эрон Оятулло Алии Хоманеӣ дониста мешавад, баъди ба сабқат роҳ надодани чандин номзади пештоз, феълан чун номзади калидӣ ба бурдани курсии арёсатҷумҳурӣ арзёбӣ мешавад.

Ryanair аз “сиёсатзада” кардани парвозҳои ҳавоӣ ҳушдор дод

Майкл О’Лери, раҳбари иҷроияи ширкати ҳавоии Ryanair

Мудири иҷроияи ширкати Ryanair гуфт, ки бо қарори манъи дарозмуддати парвозҳо ба Беларус мухолиф аст ва ба назараш, сиёсатзада кардани парвозҳои ҳавоӣ кори хатарнок мебошад. Майкл О’Лери афзуд, маҷбуран ва бо баҳонаи дурӯғини мавҷудияти бомба дар даруни ҳавопаймо нишондани он дар фурудгоҳи Минск “нақзи ошкорои тамоми муқаррароти байналмилалии парвозҳо мебошад”. Вале, ба гуфтаи ӯ, вокуниши ҷомеаи байналмилалӣ ба воқеа бо роҳи қатъи парвозҳо дар фазои Беларус дар дарозмуддат коромад нахоҳад буд. Майкл О’Лери ин ҳарфҳоро дар ҷаласае, ки 15 июн дар парлумони Бритониё баргузор шуд, зикр кард.

Ҳодиса 23 май рух дод. Мақомоти Беларус аз ҳавопаймое, ки аз Атен ба Вилнюс парвоз мекард, тақозо карданд, ки дар хоки Минск фуруд ояд ва дар паи ин, блоггери мунаққиди ҳукумати Беларус Раман Пратасевич ва дӯстдухтараш София Сапега, ки шаҳрванди Русия мебошад, боздошт шуданд. Ин амали мақомоти беларусӣ боиси интиқодҳои фаровони ҷомеаи байналмилалӣ шуд.

Бритониё ва Иттиҳоди Аврупо аз ширкатҳои ҳавоии худ талаб карданд, ки дигар баъди ин аз ҳарими ҳавоии Беларус парвоз накунанд ва ҳам дар хоки ИА фуруд омадани ҳавопаймоҳои беларусӣ манъ шуд.

Дар иёлоти Ню-Йорк ва Калифорния ба пандемия падруд мегӯянд

Гевин Нюсом, волии Калифорния ба нишасти матбуотие меравад, ки дар студияи синамои Universal Studios воқеъ дар шаҳри Ҳолливуд ташкил шудааст. 15 июни соли 2021

Ду аёлати серҷамъияти ИМА – Калифорния ва Ню-Йорк тахминан ҳама маҳдудиятҳои иҷтимоии марбут ба пандемияро бекор карданд, чун мизони эмкунии сокинон бо воксина ҳам ба баландтарин сатҳ расидааст. Дар ин ду аёлати азим моҳи июн поинтарин нишондоди олудашавӣ ба коронавирус дар беш аз як соли охир мушоҳида мешавад. Дар Калифорния ин ҳодисаро ҳамчун як иди калон таҷлил карданд ва волии аёлат Гевин Нюсом гуфт, ки марҳилаи нави баъди пандемия фаро расидааст. Ӯ гуфт, “имрӯз рӯзи ҳамоиш бо бегонаҳо, азизон ва аҳли оила аст. Ҳамдигарро ба оғӯш бикашед”. Дар Калифорнияву Ню-Йорк беш аз 70 дарсади аҳолии калонсол дастикам як дафъа эм шудаанд.

Дар аёлати Ню-Йорк 19 миллион ва дар Калифорния 39 миллион нафар зиндагӣ мекунанд ва бештар аз дигар манотиқи ИМА аз пандемия осеб диданд. Дар маҷмӯъ дар ин ду аёлат 116 ҳазор нафар аз COVID-19 даргузаштанд. Дар маҷмӯъ дар саросари ИМА то 15-уми июн беш аз 600 ҳазор нафар қурбони COVID-19 шудааст.

Охирин таҳаввулот дар Навори Ғазза

16 июни соли 2021, шаҳри Ғазза

Нирӯҳои ҳавоии Исроил субҳи 16-уми июн ҳадафҳоеро дар Навори Ғазза мушакборон карданд. Низомиёни исроилӣ гуфтанд, ин посухи он буд, ки пештар ҷангҷӯён аз қаламравҳои фаластинӣ ба ҷануби Исроил пуфакҳое бо маводи сӯхт фиристоданд. Ин нахустин ҳамлаи исроилиҳо баъди ҷорӣ шудани оташбас дар поёни 11 рӯзи ҷангҳои моҳи май буд. Исроил гуфт, ки дар паи ба қаламрави Исроил фиристода шудани пуфакҳо бо маводи сӯхт, тахминан 20 ҳолати сӯхтор дар Исроили ҷанубӣ ба қайд гирифта шуд. Дар паи ин, ба қавли низомиёни исроилӣ, ҳавопаймоҳои он қароргоҳҳои низомии Ҳамосро ҳадаф қарор доданд.

Чин барои бунёди роҳи Қалъаихум-Ванҷ то сарҳади Рӯшон $203 млн ҷудо кард

Шоҳроҳи Душанбе-Кӯлоб-Хоруғ.

Чин барои идомаи сохтмони роҳи Душанбе--Хоруғ-Қулма ба Тоҷикистон 203.9 млн. доллар маблағи бебозгашт медиҳад. Дар ин бора Азим Иброҳим, вазири нақлиёти Тоҷикистон рӯзи 16-уми июн дар Маҷлиси намояндагон хабар дод. Ба гуфтаи вазир, ин маблағ барои бунёди қитъаи Қалъаихумб-Ванҷ-сарҳади ноҳияи Рӯшон сарф мешавад.

Дар шарҳи ин тасмим дар Маҷлиси намояндагон зикр гардид, ки Тоҷикистон воридоти молу маҳсулот барои бунёди ин қитъаи роҳро аз андоз ва боҷи гумрукӣ озод мекунад. Чин яке аз сармоягузорони асосӣ ба иқтисоди Тоҷикистон аст. Вале қарзҳои ҳангуфти Пекин боиси нигаронӣ аст.

Роҳи мошингарди Душанбе-Хоруғ-Қулма барои Тоҷикистон шоҳроҳи муҳими стратегии байналмилалӣ ба шумор меравад, вале бо вуҷуди ин қисматҳои зиёди он ноҳамвору хатарнок аст. Солона дар ин роҳ даҳҳо ронандаву мусофир ҷон медиҳанд. Як сабаби фалокатҳои маргбор низ харобии роҳ аст.

Дар даврони истиқлол тамоми шоҳроҳо аз Душанбе ба минтақаҳо ба шеваҳои гуногун бозсозӣ ва навсозӣ шуданд, ба истиснои роҳи асосии вилояти Бадахшон аз Қалъаи Хумб то Хоруғ ва идомаи он то сарҳади Чин. Аз нуқтаи назари иқтисодӣ ин роҳ аҳамиёти зиёд дорад, зеро молҳои асосӣ аз Чин ба Тоҷикистон аз ҳамин роҳ ворид мешавад.

Омодагиҳои ахир ба мулоқоти Байден ва Путин

Байден ба Женева ворид шуд

Рӯзи 16 июн дар шаҳри Женеваи Швейсария мулоқоти нахустини президентони ИМА ва Русия – Ҷо Байден ва Владимир Путин барпо мешавад. Ин мулоқот дар ҳоле баргузор мешавад, ки равобити ду кишвар дар поинтарин сатҳ аз замони Ҷанги Сард буда, моҳе пеш Ҷо Байден гуфт, ки бовар дорад Путин “қотил аст”. Путин ҳамоно тамоми қудратро дар кишвар дар дасти худ нигаҳ дошта, созмонҳои ҷамъиятиро буғӣ мекунаду мухолифони мисли Алексей Навалнийро ба зиндон андохтааст.

Як сухангӯи Байден гуфт, ки Кохи Сафед “на дар андешаи азсаргирии робитаҳо ва на дар фикри шиддат бахшидани онҳо мебошад”. Айни замон, Байден дар қиёс бо президенти пешин Доналд Трамп аз мавзеъгирии шадидтар кор мегирад. Аз замони сари кор омаданаш то кунун Байден аллакай ба Русия ду дафъа таҳрими иқтисодӣ ҷорӣ кард. Дар ҳамин ҳол, ӯ розӣ шуд, ки созишномаи боздорандаи силоҳ бо ИМА тамдид шавад ва ҳам барои бунёди лӯлаи гази “Северный поток-2” монеъ нашуд.

Барои Путин ин мулоқот аз қабили гуфтугӯҳо бо “қудратҳои ҷаҳонӣ” буда, давраҳои шӯравиро ба ёд меорад, ки раҳбари СССР бо раҳбари ИМА ба мулоқоте мерафт, ки аҳамияти ҷаҳонӣ касб мекард.

Дар миёни масоили мавриди баррасӣ назорати силоҳ, ҳамлаҳои рахнагарон, ҷосусӣ, тағйироти иқлим ва муқобила бо COVID-19 мебошад.

Даромади "Кумтор Голд Компани" дар як моҳ ба бештар аз $40 млн расид

KYRGYZSTAN -- A general view of the Kumtor mine in Kyrgyzstan, June 15, 2011.

Содир Ҷабборов, президенти Қирғизистон рӯзи 15-уми июн ба кони тиллои "Қумтор" рафт ва бо фаъолияти ширкат, баъди ҷорӣ кардани мудирияти муваққат, шинос шуд.

Масъулони ширкат гуфтанд, ки фаъолият дар кон бе таваққуф идома дошта, коргарон сари вақт маош дарёфт мекунанд ва пардохтҳои ҳатмии давлатӣ ва андоз сари вақт ба буҷаи кишвар ворид мешавда.

"Дар камтар аз як моҳи фаъолияти мудирияти берунӣ ширкати "Кумтор Голд Компани" дар ҳаҷми 40 млн доллар тило фурӯхтааст", - хабар доданд аз маркази матбуотии президенти Қирғизистон.

Содир Ҷабборов дар суҳбат бо коргарони кон гуфт, ки аз ҳисоби даромади ширкати "Кумтор Голд Компани" бунёди рушди вилояти Норин таъсис дода хоҳад шуд.

Порлумони Қирғизистон рӯзи 17 май ба девони вазирон дастур дод, ки дар ширкати "Қумтор Голд Компани" мудирияти муваққат ҷорӣ кунад.

Кони тилои Қумторро дар Қирғизистон ширкати канадагии Centerra Gold Inc. коркард мекунад. Ин ширкат аз тасмимҳои охир дар Қирғизистон нигарон аст. Ширкат гуфт, ба додгоҳи ҳакамии байналхалқӣ шикоят хоҳад бурд.

Қумтор калонтарин кони тилои Қирғизистон ба ҳисоб меравад. Қирғизистон дар ин кон 26 дарсад саҳм дорад.

Ёфтҳои бештар

XS
SM
MD
LG