Раисҷумҳури Украина рӯзи 4 сентябр хабар дод, ки як паҳподи русӣ ба қароргоҳи Хадамоти амнияти ин кишвар дар Киев бархӯрдааст.
Владимир Зеленский ваъда дод, ки Украина интиқоми ин ҳамларо хоҳад гирифт. Ӯ бо нашри ин хабар дар Телеграм навишт, "ин паҳпод мустақиман бинои дафтари раиси Хадамоти амниятро ҳадаф гирифтааст".
Раисҷумҳури Украина мегӯяд, ба нерӯҳои ин кишвар дастур додааст, ки "посухе муносиб" ба Русия бидиҳанд ва дар сурати имкон, вақте ҳама чиз омода шуд, вокунише нишон диҳанд, ки "монанди ин ҳамла" бошад.
Ҳамлаи Русия дар пайи ҳамлаҳои ҳавоии пайвастаи ин кишвар алайҳи Украина дар даҳ рӯзи ахир рух додааст.
Аксҳо ва наворҳои видеоии нашршуда нишон медиҳад, ки пас аз ин ҳамла дуди сиёҳ ва ғализе дар маркази шаҳри Киев ба ҳаво бархост.
Шаҳрдори Киев эълон кард, ки дар ин ҳодиса дастикам ҳафт нафар захмӣ шудаанд. Ҳанӯз маълум нест оё аъзои Хадамоти амниятии Украина низ дар миёни захмиён ҳастанд ё на.
Ин ҳамла дар ҳоле рух дод, ки дар беш аз чаҳоруним соли ҷанг бо Русия, биноҳои давлатии Украина хеле кам ҳадафи ҳамлаҳои паҳподӣ ва мушакӣ қарор гирифтаанд.
Хадамоти амнияти Украина нақши муҳиме дар фаъолиятҳои ҷангии ин кишвар дорад ва амалиёти густурдаеро барои осеб задан ба мошини ҷангии Русия ва зерсохтҳои энержии он дунбол мекунад.
Хадамоти амнияти Украина дар солҳои ахир амалиётҳои ногаҳонӣ ва бепарвоёнаеро алайҳи Русия анҷом додааст, аз ҷумла, бамгузории пуле дар соли 2022, ки Русияро ба нимҷазираи Қрим мепайванд ва ҳамлаи паҳподии соли 2025 бо номи "Тори анкабут", ки бамафканҳои стратегии Русияро дар умқи он кишвар ҳадаф қарор дод.
Хадамоти амнияти Украина ҳамчунин яке аз бозигарони аслӣ дар маъракаи террори махфиёнаи мақомҳои баландпояи низомии Русия ва дигар шахсиятҳо шинохта мешавад, ки Украина онҳоро ба иртикоби "ҷиноятҳои ҷангӣ" муттаҳам кардааст.