Сарони Амрико, Чин ва Русия дар як эъломияи муштарак хостори ислоҳи Созмони Милал ҳамчун кафили сулҳу суботи ҷаҳон шуданд. Онҳо ҳамчунин замонат доданд, ки силоҳи ҳастаӣ бояд ҳаргиз ба кор бурда нашавад.
Доналд Трамп, Си Ҷинпин ва Владимир Путин рӯзи 19-уми ноябр дар Шенҷени Чин хоҳони дахлнопазирии мансабдорони давлатӣ аз, ба гуфтаи онҳо, суистифодаи ниҳодҳое монанди Додгоҳи Ҷиноии Байнулмилал шуданд. Ин додгоҳ ба ҳабси Путин ва сарвазири Исроил Бенаямин Нетаняҳу ҳукм бароварда буд.
Се раҳбар гуфтаанд, тавлиди сӯзишвориро зиёд мекунанд ва таъмини ҷаҳон аз он бояд зарба набинад.
Ин изҳороти иборат аз чор нукта дар вебсайти Кремл ва аз ҷониби “Синҳуа”, хабаргузории давлатии Чин, нашр шуд. Вашингтон ҳанӯз матни эъломияро шарҳ надодааст.
ИНЧУНИН, БИХОНЕД:
Мулоқоти Трамп ва Ҷинпин: "Ду кишвар бояд шарик бошанд, на рақиб"Мулоқоти раҳбарони се кишвари абарқудрат – Амрико, Чин ва Русия – дар ҳошияи Нишасти сарони кишварҳои Осиё ва Уқёнуси Ором дар Шенҷени Чин барпо шуд.
Дар оғоз раҳбари Чин иброз дошт, ки се кишвар ва аъзои доимии Шӯрои Амнияти СММ бояд ҳамчун намунаи ҳамкорӣ ва ҳалли мушкилиҳои ҷаҳонӣ хидмат кунанд. Вай афзуд, Амрико, Чин ва Русия бояд ҳомии сулҳу суботи саросарӣ буда, барои рушди инсоният талоши бештар кунанд.
Владимир Путин, президенти Русия, гуфтаҳои раҳбари Чинро қабул кард ва изҳор дошт, ки се кишвар бояд дар таҳкими амнияти байналмилал ва назму субот саҳми бештар гиранд.
Доналд Трамп, раисҷумҳури Амрико, пешниҳод кард, се абарқудрати олам ба коҳиши аслиҳаи ҳастаӣ ва хавфи истифодаи он таваҷҷуҳ кунанд. Ӯ ба ҳалли низоъ дар Украина ҳам ишора кард, ки Русия моҳи феврали соли 2022 оғоз кардааст.
"Мо тасмим дорем ҷанг миёни Русия ва Украинаро баррасӣ кунем. Мо – президент Путин ва ман – аллакай суҳбати тӯлоние дар ин бора доштем. Ба фикрам корҳое анҷом мешаванд ва фикр мекунам ҷониби дигар тарафдори хатми ҷанг аст," -- афзуд ӯ.
Инро ҳам бинед:
Шарти Маскав ба қатъи ҳамкории НАТО бо Осиёи Марказӣ. Хаёли хом ё бозии сиёсӣ?Алекс Рауфоғлу, хабарнигори Радиои Озодӣ дар Вашингтон, гуфт, дар остонаи мулоқоти Трамп бо Путин ва Ҷинпин 9 сенатори демократ аз президенти ИМА даъват карданд, аз манфиатҳои Амрико ҳимоят карда, зидди “таҳдиди рӯзафзуни Пекин ва Маскав истодагӣ кунад.
"Амнияти Амрико набояд дар муқобили имкони аксгирӣ ё бузургманишии хусусӣ ба фурӯш гузошта шавад. Президент Трамп бояд намоиш диҳад, ки ҳозир аст, Путинро водор кунад, нархи воқеии таҷовузашро ба Украина пардозад ва набояд барои ин амали мухолиф ба манфиати Украина, муттафиқони мо дар паймони НАТО ва амнияти миллии Амрико, ҷоиза бигирад,” – гуфта шудааст дар эъломияи сенаторони Ҳизби демократ.
Ба қавли онҳо, мулоқоти сарони се кишвари абарқудрат набояд ба имкони тақсими ҷаҳон ба минтақаҳои нуфуз ва рақобат табдил ёбад.
Бар пояи назархоҳии маркази таҳқиқотии “PEW”, ки моҳи равон доир шудааст, аз се ду ҳиссаи амрикоиён аз вокуниши Доналд Трамп ба ҷанги Русия бо Украина қаноатманд набудаанд. Ҳамчунон 33 дарсади амрикоиён бар инанд, ки таҷовузи Русия ба хоки Украина таҳдиди асосӣ ба манофеи Амрико мебошад.