Радиои Озодӣ дар бораи Рамазоналӣ Басиров, шаҳрванди Тоҷикистон, ки дар ҳамлаи паҳподӣ ба Нижнекамск дар Тотористони Русия кушта шуд, маълумоти бештар ба даст овард.
Як намояндаи ҷомеаи тоҷикон дар Нижнекамск, ки бо далелҳои амниятӣ номаш фош намешавад, рӯзи 11-уми август ба Радиои Озодӣ гуфт, "Рамазоналӣ Басиров ҳамагӣ як моҳ пеш барои кор ба Русия омада буд".
Басиров 30 сол дошта, аз ноҳияи Бобоҷон Ғафуров будааст. Аз ӯ ду кӯдак ятим монд.
"Рамазоналӣ дар ширкати туркии "Ямата" кор мекард. Ин ширкат дар Нижнекамск корхонаи кимиёӣ месозад. Коргарон дар хобгоҳ ё ҳостел мезистанд," - афзуд мусоҳиби мо.
Дар иҷозатномаи кор ё патенти муҳоҷири тоҷик, ки Радиои Озодӣ нусхаашро дастрас кард, шуғли Рамазоналӣ Басиров ронандаи мошини борбардор (кран) зикр шудааст.
Ҷасади ӯро 13-уми август ба воситаи шаҳри Қазон ба Хуҷанд меоранд. Намояндагони мақомот дар Тоҷикистон ба хонаводаи Басиров хабари маргашро расондаанд.
"Ширкати корфармо ва ҳукумати Тотористон ваъда доданд, ки хароҷоти фиристодани ҷасадро пардохт мекунанд ва ҳамчунин ба хонаводаи ин ҷавон ҷубронпулӣ медиҳанд," - афзуд намояндаи ҷомеаи тоҷикони Нижнекамск.
Ӯ мегӯяд, тибқи иттилои онҳо як шаҳрванди дигари Тоҷикистон дар ин ҳамла зарар дидааст. Радиои Озодӣ мустақилона ин маълумотро тасдиқ ё инкор карда наметавонад.
Ҳамла ба Нижнекамск шаби 9 ба 10-уми август рух дод. Мақомоти Русия иддао карданд, ки паҳподҳои украинӣ иншооти мулкӣ ва саноатии Нижнекамскро ҳадаф қарор додаанд.
Ситоди кулли артиши Украина мегӯяд, нерӯҳои ин кишвар ба корхонаи истеҳсоли нафти "Танеко" зарба заданд.
Вазорати корҳои хориҷии Русия хабар дод, ки дар ин ҳамла асосан шаҳрвандони хориҷӣ, аз ҷумла 8 узбекистонӣ ва як тоҷикистонӣ кушта шуданд.
Дар ин ҳодиса ҳамчунин ҳудуди 20 шаҳрванди дигари хориҷӣ захмӣ шудаанд. Шахсияти онҳо маълум нест.
Дар Тотористон рӯзи мотам эълон шудааст.
Русия дар моҳи феврали соли 2022 ба хоки Украина таҷовуз кард ва аз он замон даргирӣ идома дорад.
Украина тайи моҳҳои охир ва дар посух ба ҳамлаҳои Маскав корхонаҳои коркарди нафти Русияро ҳадаф қарор дода, сабаби буҳрони сӯзишворӣ дар ин кишвар гаштааст. Тоҷикистон ҳам, ки беш аз навад дарсади маводи сӯхтро аз Русия меовард, акнун дар ҷустуҷӯйи роҳҳои алтернативист.
Гуфтугӯ